1. ¿Tlenon noneki tikchiuaskej akin yotoapolaktijkej?

TLA yotoapolaktijkej, kijtosneki ika yotikteititijkej teixpan ika titlaneltokaj itech Jehová niman ika tiknektokej tiktekichiuiliskej iuan ikalpan. * Melauak, noneki tikchiuaskej seki tlemach niman ijkon nochipa tikneltokaskej ika yejua kiyekantika ikalpan niman ijkon kichiuas tlen kineki.

2, 3. ¿Katlejua kualneskayomej kiteititia Jehová ijkuak kiyekana ikalpan?

² Ipan yejuin tonaltin, Jehová kiyekantika ikalpan. Ipampa ken tlayekana, tikitaj kenon yejua, tlenon kineki kichiuas ika tlayekapan niman tlenon kintlajtlanilia itekipanojkauan. Matikimitakan yeyi kualneskayomej tlen kiteititia Jehová ijkuak kiyekana ikalpan.

³ Kachtopa, “Dios xkichikoita se tlakatl iuan okse” (Hech. 10:34). Jehová melak techtlasojtla, ika yejon, okitemakak iKonetsin niman ijkon “okimakixtij nochi tlakatl” (Juan 3:16; 1 Tim. 2:6). Pampa kineki miyekej makinpaleui tlen okichiuj iKoneuj, kitekitiltia ikalpan niman ijkon matenojnotsa itech iTlajtol. Ika ome, Jehová xkineki “sa kenijki ma nochiua itlaj” niman kuelita maonia yolseuilistli (1 Cor. 14:33, 40). Ika yejon, tikitaj ika ikalpan kuajli kichiua itekiyo niman kipiya yolseuilistli. Ika yeyi, Jehová se Ueyi Tlamachtijketl (Is. 30:20, 21, TNM). Yejua ika, ikalpan temachtia iTlajtol ipan tlanechikojli niman noijki ijkuak tenojnotsa. ¿Kenon tlanechikojli tlen onkatka ipan kachtopa siglo okiteititi yejuin yeyi ikualneskayouan Jehová? ¿Kenon aman ikalpan noijki kiteititia yejuin kualneskayomej? ¿Niman kenon techpaleuiya espíritu santo akin tinemij ipan ikalpan?

4. Itech tlen kijtoua Hechos 1:8, ¿tlenon okinnauati Jesús inomachtijkauan, niman tlenon kinpaleuiskia?

⁴ Ipan kachtopa siglo. Ipampa tlen Jesús okiteijli ijkuak otenojnotstinen, aman miyekej tlaltikpakchanejkej kimatij ika uelis kiseliskej tlen kualtsin ika tlayekapan (Luc. 4:43). Okimijli inomachtijkauan ika makichiujtokan yejon tekitl tlen yejua okipeualtijka niman matenojnotsakan “nochiuiyan ipan in tlaltikpaktli” (xpoua Hechos 1:8). Yemelak, san yejuamej xueliskiaj kichiuaskiaj yejuin tekitl. Ika yejon, Jesús okimijli ika “kuajtitlanis on Espíritu Santo” niman ijkon makinpaleui (Juan 14:26; Zac. 4:6, TNM).

5, 6. ¿Kenon espíritu santo okinpaleui inomachtijkauan Jesús?

⁵ Inomachtijkauan Jesús okiselijkej espíritu santo ipan Pentecostés itech xiuitl 33. Ika itlapaleuilis yejuin espíritu, nimantsin opeujkej tenojnotsaj, niman melak miyekej okineltokakej yejon kuajli tlajtoltin (Hech. 2:41; 4:4). Niman, ijkuak okintlaueltokakej, yejuamej xonomojtijkej niman xokikajkaujkej ika tenojnotsaj. Yejuamej okitlajtlanilijkej toTajtsin makinpaleui niman okijlikej: “Xkinkauili motekitkauan para ma kiteijlijkan motlajtol ikan nochi yolchikaualistli”. Kuakon, nimantsin okiselijkej espíritu santo niman nochipa “otemachtijkej itlajtol Dios ikan yolchikaualistli” (Hech. 4:18-20, 29, 31).

⁶ San ika, yejuin inomachtijkauan Jesús noijki okixnamijkej tlen ouijtika. San matikonnemilikan yejuin, yejuamej xkinpiayaj miyek tlajkuilolamamej itech iTlajtol toTajtsin niman xkinpiayaj amatlajkuiloltin tlen tejuamej aman tikinpiyaj. Noijki nonekiya kinnojnotsaskej oksekimej akin tlajtouayaj tlatlamantikej tlajtoltin. Maski ijkon, yejuamej okichiujkej itlaj tlen nesiya ika xkeman ueliskia nochiuas: san yopanokaj kanaj 30 xiuitl niman yejuamej yotenojnotskaj “nochiuiyan imanian in tlaltikpaktli” (Col. 1:6, 23).

7. ¿Kenon ouel okimatkej tokniuan akin yeuejkaui onenkej tlen Jehová kinekiya makichiuakan, niman tlenon okichiujkej?

⁷ Ipan yejuin tonaltin. Jehová ok kiyekantika ikalpan niman kimakatika kojtilistli. Yemelak, yejua kitekitiltia iTlajtoltsin, Biblia, niman ijkon kiyekanas ikalpan. Ompa noijtoua kenon otenojnots Jesús niman kenon okinnauati inomachtijkauan makichiujtokan on tekitl tlen yejua okipeualtijka (Mat. 28:19, 20, TNM). Ipan julio de 1881, yejuin revista okijto: “Xotechnotskej nion xotechtlapejpenijkej niman ijkon matechtlakaitakan noso matotomintikan, yej para matijkuikan tochikaualis niman nochi tlen tikpiyaj niman matitenojnotsakan”. Amatlajkuilojli To Whom the Work Is Entrusted (A quienes se les confía la obra), tlen okis ipan xiuitl 1919, okijto: “Yejuin tekitl nesi melak ueyi, san ika, ualeua itech toTeko, niman yejua techpaleuis matikchiuakan”. Kuakon, ijkon ken onochiuj ipan kachtopa siglo, yejuin tokniuan otenojnotskej ika yolchikaualistli, kimatstoyaj ika espíritu santo kinpaleuiskia makinnojnotsakan nochimej tlaltikpakchanejkej. Tejuamej noijki tikmatstokej ika espíritu santo techpaleuis.

8, 9. ¿Tlenon yokichiuj ikalpan Jehová niman ijkon nochiuiyan manotenojnotsa?

⁸ Ikalpan Jehová yokichiuj miyek tlemach niman ijkon kiteijlis kuajli tlajtoltin. Opeuj kinkixtia amatlajkuiloltin, okichijchiuj “Foto-Drama de la Creación”, opeuj kintekitiltia gramófonos, altavoces tlen kintlaliliayaj carros, radio niman, aman, yopeuj kitekitiltia tecnología tlen más yenkuik. Ikalpan Jehová yokintlajtolkuep iamatlajkuiloluan ika miyek tlajtoltin. Xonka nion se religión noso grupo akin ijkon makichiua. ¿Niman tleka ijkon kichiua ikalpan Jehová? Pampa kineki ika nochimej makikakikan iTlajtol toTajtsin ika intlajtol. Jehová xakaj kichikoita niman yejua yokijto ika kinnojnotsaskiaj  tlaltikpakchanejkej “de nochi tribus, de nochi raza, de nochi kech sesekneka tlajtoltin, niman nochi países” (Apoc. 14:6, 7). Yejua kineki ika nochimej makimatikan tlenon kichiuas iTekiuajyo.

⁹ ¿Niman tlenon tikchiuaj niman ijkon tikinnojnotsaskej akin chantij kampa xnochimej kinkauiliaj makalakikan? Jehová okiyekan ikalpan niman ijkon makinyolchikaua tokniuan matenojnotsakan kampa tojlan nojuitilo. Ipan 2001, Grupo akin Tlayekana ipan nochi tlanechikoltin okimijli tokniuan ika uelis kinkuiskej carritos niman exhibidores kampa tojlan nojuitilo ne Francia, niman sakin okijto ika ueliskia nochiuas yejuin ipan okseki países. Melak kuajli tlen opanok. Ipan 2011, opeuj notenojnotsa kampa tojlan nojuitilo ne Nueva York (Estados Unidos). Ijkuak kemach yopanoka se xiuitl ika ijkon opeuj notenojnotsa, tokniuan okintemakakej 102,129 libros niman 68,911 revistas, niman 4,701 tlaltikpakchanejkej okitlajtlankej makinmachtikan. Kuajli nesi ika Jehová kikuitoya iespíritu santo niman ijkon kiyekanas yejuin tekitl. Ika yejon, Grupo akin Tlayekana ipan nochi tlanechikoltin okijto ika uelis notekitiltiskej carritos niman okseki exhibidores ipan nochi tlaltikpaktli.

10. ¿Tlenon uelis tikchiuaskej niman ijkon más kuajli titenojnotsaskej?

¹⁰ Tlen tejuamej uelis tikchiuaskej. Matitenojnotsakan ijkon ken Jehová techmachtia ipan tlanechikoltin. Matokojtilikan nochipa tikisaskej imiuan tokniuan akin nemij ipan togrupo itech tenojnotsalistli. Yejuamej uelis techpaleuiskej más kuajli matitenojnotsakan niman uelis techyolchikauaskej. Matitenojnotstokan maski tikixnamikiskej tlen ouijtika. Ijkon ken kijtoua tlaxelojli kampa onokixti yejuin tlamachtijli, tejuamej uelij tikchiuaj tlen Jehová kineki pampa techpaleuiya ika iespíritu santo, xipampa tokojtilis (Zac. 4:6, TNM). Kuajli tikmatstokej ika Jehová techpaleuis pampa yejua otechmakak yejuin tekitl.

11. ¿Tlenon okichiuj grupo akin tlayekanaya niman ijkon maonia yolseuilistli ipan ikalpan toTajtsin?

¹¹ Ipan kachtopa siglo. Tokniuan itech grupo akin tlayekanaya ipan nochi tlanechikoltin, akin nemiyaj Jerusalén, nokojtiliayaj kuajli kichiuaskej  intekiyo niman kinpaleuiskej tokniuan manemikan ika yolseuilistli (Hech. 2:42). Matikonnemilikan tlenon opanok kanaj ipan xiuitl 49. Ijkuakon, miyekej tokniuan kijtouayaj ika nochimej akin kitekichiuiliayaj toTajtsin nonekiya nochiuiliskej circuncisión. Kuakon, tokniuan itech grupo akin tlayekanaya onosentlalijkej niman okitakej kenon kiyektlaliskiaj yejon tlauejli. Tla xnoyektlaliskia yejuin tlauejli, miyekej tokniuan xueliskiaj kuajli tenojnotsaskej. Maski tokniuan akin okiyektlalijkej yejuin tlauejli katkaj judíos, yejuamej xsan otlanemilijkej itech tlen inchanejkauan yokinmachtijkaj niman itech incostumbres. Yejuamej okitakej tlen kijtouaya iTlajtol toTajtsin niman okitlajtlanilijkej Jehová makinyekana ika iespíritu (Hech. 15:1, 2, 5-20, 28). Jehová okiteochiuj ken tokniuan okiyektlalijkej yejuin tlauejli. Ipampa yejon, tlanechikoltin ouel onenkej ika yolseuilistli niman xok xexeliujtoyaj. Noijki, xokikajkaujkej ika tenojnotsaj (Hech. 15:30, 31; 16:4, 5).

12. ¿Tleka tikijtouaj ika ikalpan Jehová kuajli kichiua itekiyo niman kinpaleuiya tokniuan manemikan ika yolseuilistli?

¹² Ipan yejuin tonaltin. Ikalpan Jehová nokojtilia kuajli kichiuas itekiyo niman kinpaleuis tokniuan manemikan ika yolseuilistli. Ipan revista Watch Tower del 15 de noviembre de 1895, okis se tlamachtijli tlen onokixti ipan 1 Corintios 14:40, itoka katka “Decentemente y con orden”. Ompa kijtouaya: “Apóstoles okinnauatijkej tlanechikoltin makichiuakan miyek tlemach niman ijkon kuajli kichiuaskiaj intekiyo [...]. Melak noneki maka keman matikilkauakan tlen yeuejkaui onoijkuilo” (Rom. 15:4). Ijkon ken ipan kachtopa siglo, ipan yejuin tonaltin ikalpan Jehová noijki kuajli kichiua itekiyo niman tokniuan nemij ika yolseuilistli. San matikonnemilikan yejuin, tla tiaskiaj ipan okse tlanechikojli ipan topaís noso okse país niman ijkon tikonkakiskej tlamachtijli Amatl Tekakistilijketl, kuajli tikmatstoskiaj kenon nopanoltiskia niman katlejua tlamachtijli noitaskia. Melak kuajli tomachiliskiaj. Tejuamej xtixeliujtokej pampa iespíritu santo toTajtsin techpaleuiya (Sof. 3:9).

13. Itech tlen kijtoua Santiago 3:17, ¿tlenon noneki matotlajtoltikan?

¹³ Tlen tejuamej uelis tikchiuaskej. Jehová kineki ika espíritu santo nochipa “san sekan” matechpiya “ikan yolseuilistli” (Efes. 4:1-3).  Ika yejon, matotlajtoltikan: “¿Nitlapaleuiya maonia yolseuilistli ipan tlanechikojli niman maka maxeliujto? ¿Nikintlakamati tokniuan akin tlayekanaj? Tla nikpiya se tekitl ipan tlanechikojli, ¿uelis notech tlaneltokaskej tokniuan? ¿Nimantsin najsi kampa nechnotsaj niman niknektika nitepaleuis?” (xpoua Santiago 3:17). Tla tikitaj ika techpoloua tikchiuaskej tlen nikan yotikteneujkej, matiktlajtlanilikan Jehová matechpaleui ika iespíritu santo. Tla tokauiliaj matechyekana espíritu santo, tokniuan más techtlasojtlaskej niman kitlasojkamatiskej tlen tikchiuaj ipan tlanechikojli.

14. Ijkon ken kijtoua Colosenses 1:9, 10, ¿kenon Jehová okinmachti tokniuan ipan kachtopa siglo?

¹⁴ Ipan kachtopa siglo. Jehová melak kuelita kimachtis ikalpan (Sal. 32:8). Pampa ijkon kichiua, ueli tikixmatij, tiktlasojtlaj, niman noijki uelis tikpiyaskej se nemilistli tlen xkeman tlamis (Juan 17:3). Ipan kachtopa siglo, Jehová okinmachti tokniuan itechkopa ikalpan (xpoua Colosenses 1:9, 10). Jehová noijki okitekitilti iespíritu santo niman ijkon kinpaleuis makasikamatikan miyek tlemach, ijkon ken Jesús okijtoka (Juan 14:16). Espíritu santo okinpaleui makasikamatikan iTlajtol toTajtsin niman okimilnamikti tlen Jesús okijtoka niman okichiujka, tlen sakin onoijkuilo ipan Evangelios. Tlen okasikamatkej okinchikauili intlaneltokil, niman okichiuj más makitlasojtlakan toTajtsin, iKonetsin niman oksekimej tokniuan.

15. ¿Kenon yotikitak ika inochiujtika tlen okijto Jehová ipan Isaías 2:2, 3?

¹⁵ Ipan yejuin tonaltin. Jehová yokijtoka ika “ipan on sa itlankan in tonaltin [...,] miyek tlakatl de miyekan naciones” tlejkoskiaj ipan itepeuj Jehová niman ijkon makinmachti toTajtsin (xpoua Isaías 2:2, 3). Tikitaj ika aman inochiujtika yejuin teotlajtojli. Kuajli nesi ika ken tejuamej tikueyichiuaj toTajtsin más kuajli xijkon ken kichiuaj okseki religiones. ¡Niman Jehová melak kuajli ken techmachtijtika! (Is.  25:6). Itechkopa “tekitketl” yolmelauak niman tlamachilise, Jehová tlatlamantik ken texchikauilia totlaneltokil, techinmaka miyek amatlajkuiloltin, discursos, tlaixkopinaltin niman videos (Mat. 24:45). Titlanemiliaj ijkon ken Elihú, akin nouikaya iuan Job, akin okijto itech toTajtsin: “Xnemi sen temachtijketl ken yejua” (Job 36:22).

16. ¿Tlenon uelis tikchiuaskej niman ijkon maonia ipan toyojlo tlen Jehová techmachtia?

¹⁶ Tlen tejuamej uelis tikchiuaskej. Espíritu santo techpaleuis matikchiuakan ipan tonemilis tlen tikpouaj niman tlen tiuelij ipan iTlajtol toTajtsin. Matiktlajtlanilikan Jehová tlen salmista okitlajtlanilijka, yejua okijli: “Ay noTEKO, xnechititi moojui, para nochipa yejua ipan ma ninejnemi. Xchiua para noyojlo ma kitlakaita moyektokatsin” (Sal. 86:11). Ika yejon, matikchiuakan tlen Jehová techmachtia itechkopa iTlajtol niman ikalpan. Yemelak, xsan tiknekij miyek tikmatiskej, tiknekij tiktlaliskej ipan toyojlo niman tikchiuaskej ipan tonemilis. Iespíritu santo Jehová techpaleuis ijkon matikchiuakan. Noijki matikinyolchikauakan tokniuan, pampa yejuamej kentla tochanejkauan yeskiaj (Heb. 10:24, 25). Matiktlajtlanilikan Jehová matechpaleui más kuajli matitlanankilikan ipan tlanechikoltin niman matechpaleui kuajli matikinpanoltikan totlamachtiluan. Tla tikchiuaj nochi yejuin, tikititiskej Jehová niman iKoneuj ika tikintlasojtlaj iborreguitos (Juan 21:15-17).

17. ¿Kenon uelis tikteititiskej ika tikpaleuiyaj ikalpan Jehová?

¹⁷ Sa achijtsin poliui ijkuak san ikalpan toTajtsin nokauas ipan yejuin tlaltikpaktli. Ika yejon, ika toyojlo matikpaleuikan yejuin kalpan tlen toTajtsin kiyekantika ika iespíritu. Nochimej matikinnojnotsakan itech toTajtsin. Noijki, ijkon ken Jehová, matitetlasojtlakan niman maka matitechikoitakan. Matikchiuakan tlen noneki niman ijkon maonia yolseuilistli ipan tlanechikojli niman maka maxeliujtokan tokniuan. Niman matokauilikan matechmachti Jehová, akin se Ueyi Tlamachtijketl. Tla ijkin tikchiuaj, xtomojtiskej ijkuak toTajtsin kipopolos nochi tlen Satanás kiyekantika niman nochipa tinemiskej ipan ikalpan Jehová.