1. Börö me no tebayagö ndraʼugö idanö, hadia zi lö mamalö öfalua?

HADIA no tebayagö ndraʼugö idanö? Na noa, no öforomaʼö ba niha böʼö wa mamati ndraʼugö khö Yehowa ba omasiʼö farahu ba organisasinia * ba wamosumange yaʼia. Hizaʼi, moguna lö aetu öʼaroʼö wamatimö khö Yehowa. Moguna göi itugu mamati ndraʼugö wa Yehowa zameʼe fanuturu lala ba organisasi andre ba wamalua ohitö dödönia.

2-3. Hadia manö mbua-bua Yehowa si tola oroma ba organisasinia iadaʼa?

² Moroi ba lala niʼogunaʼö Yehowa ba wameʼe fanuturu lala ba organisasinia iadaʼa, tola oroma gamuatania, ohitö dödönia, hegöi goi-goinia. Ba artikel daʼa, tatutunö tölu ngawalö mbua-bua Yehowa si tola taʼila bakha ba organisasinia.

³ Si oföna, ”Lö ifaigi mbawa niha Lowalangi”. (Hal. 10:34) Börö waʼomasinia, terou dödö Yehowa ba wameʼe Ononia tobali ”höli . . . ba niha fefu”. (1 Tim. 2:6; Yoh. 3:16) Enaʼö abölö ato niha sanema bua moroi ba höli, iʼogunaʼö nono mbanuania Yehowa ba wanuriaigö turia somuso dödö ba niha somasi mamondrongo. Si dua, omasi Yehowa na toföfö ba atulö fefu hadia ia. (1 Kor. 14:33, 40) Börö daʼö, hasambalö so waʼatulö hegöi faʼatoföfö ba gotalua niha samosumange yaʼia. Si tölu, Yehowa andrö no ”Samahaʼö Fondrege Zalawa”. (Yes. 30:20, 21, Terjemahan Dunia Baru) Daʼö mbörö wa laforege ira niha si so ba organisasinia ba wamahaʼö niha böʼö sanandrösa ba Daromalinia, Sura Niʼamoniʼö, he bakha ba mbanua niha Keriso hegöi na lafalua halöwö fanuriaigö. Hewisa wa tola oroma mbua-bua Yehowa si tölu ngawalö andre ba mbanua niha Keriso  me abad siföföna? Hewisa wa tola oroma mbua-buania andre ba götöda iadaʼa? Ba hewisa geheha niʼamoniʼö ba wanolo yaʼugö iadaʼa ba wamosumange Yehowa ba organisasinia?

4. Simane nitutunö ba Halöwö Zinenge 1:8, hadia goroisa nibeʼe Yesu khö ndra soloʼö yaʼia, ba hadia wanolo nifabuʼunia khöra?

⁴ Ba abad siföföna. Turia somuso dödö nifaʼema Yesu zameʼe fanötöna ba niha gulidanö. (Luk. 4:43) Omasi Yesu na latohugö ira nifahaʼönia halöwö si no ibörögö. Omasi göi ia na lafaʼema duria somuso dödö andrö ”irugi wondrege danö”. (Baso Halöwö Zinenge 1:8.) Hizaʼi, tebai lafalua halöwö andrö na laʼodaligö waʼabölöra samösa. Moguna khöra ’zanolo’ si no ifabuʼu Yesu, yaʼia daʼö eheha niʼamoniʼö moroi khö Lowalangi.​—Yoh. 14:26; Zakh. 4:6.

5-6. Hewisa lala geheha niʼamoniʼö ba wanolo ndra nifahaʼö Yesu?

⁵ Latema geheha niʼamoniʼö ira nifahaʼö Yesu me Fendrakose 33 M. Börö wanolo geheha niʼamoniʼö, tola iʼanemaiʼö lafalua halöwö fanuriaigö. Buania, ha ba zi lö arara, so ribu waʼato niha sanemaʼö turia somuso dödö. (Hal. 2:41; 4:4) Hewaʼae na göna ira folohi ba gafuriata, lö laböhöli wanuriaigö ira nifahaʼö andrö. Lö khöra faʼataʼu börö me laʼandrö wanolo moroi khö Yehowa. Mangandrö ira, lamane, ”Ba yaʼaga sawuyumö andre, beʼe khöma waʼabarani ba wamaʼema taromalimö.” Aefa daʼö, fahöna khöra geheha niʼamoniʼö, ba ”lö ataʼu ira wamatunö taromali Lowalangi”.​—Hal. 4:18-20, 29, 31.

⁶ So göi daha-taha tanö böʼö nitaögö ndra nifahaʼö Yesu. Duma-dumania, ha maʼifu Zura Niʼamoniʼö si no mufazökhi me luo daʼö. Baero daʼö, lö göi laʼokhögö publikasi si tola manutunö ösi Zura Niʼamoniʼö, simane niʼokhögöda iadaʼa. Moguna göi manuriaigö ira ba niha sangogunaʼö li si faböʼö-böʼö. Hizaʼi, hewaʼae na lataögö ngawalö daha-taha simane daʼö, tola mofozu ira ba wamalua halöwö si tebai mufalua ba wamaigi niha. Ha barö zi tölu ngafulu fakhe, tola manuriaigö ira ”ba gotalua niwöwöi Lowalangi ba gulidanö”.​—Kol. 1:6, 23.

7. Töra 100 fakhe silalö, hewisa wa tola aboto ba dödö ndraono mbanua Yehowa sanandrösa ba gohitö dödö Lowalangi khöra, ba hewisa wanemaʼöra daʼö?

⁷ Ba götöda iadaʼa. Lö aetu ibeʼe wanuturu lala Yehowa ba nono mbanuania, ba ibeʼe khöra waʼabölö ba wamalua ohitö dödönia. Dela sabölö tohude niʼogunaʼö Yehowa ba wameʼe fanuturu lala, yaʼia daʼö Taromalinia si no musura börö wanolo moroi ba geheha niʼamoniʼö. Na tabaso Zura Niʼamoniʼö, tola taʼila sanandrösa ba halöwö nifalua Yesu hegöi fareta nibeʼenia khö ndra nifahaʼönia ba wanohugö halöwö si no ibörögö. (Mat. 28:19, 20) Iʼotarai me baŵa si Fitu 1881, no saʼae imane wangumaʼö majalah andre, ”Tenga ba wanöndra lakhömi mazui faʼakayo wa mukaoni mazui mufataro ita. Hizaʼi, ba wangogunaʼö fefu zi no taʼokhögö ba wanuriaigö turia somuso dödö.” Baero daʼö, imane buku ”Mufaduhusi Tödö ba Wamalua Fanuriaigö” (To Whom the Work Is Entrusted), nirilis me döfi 1919, ”Oya sibai halöwö sinangea tafalua. Hizaʼi, halöwö khö Zoʼaya daʼa, ba hasambalö ibeʼe khöda waʼabölö ba wamalua yaʼia.” Simane niha Keriso me abad siföföna, faduhu dödö ndra talifusöda andrö wa hasambalö itolo ira eheha niʼamoniʼö ba wamalua fanuriaigö ba niha fefu. Buania, tola barani ira ba wamalua halöwöra, ba lafalua daʼö ba lala sabölö sökhi. Faduhu göi dödöda iadaʼa wa hasambalö itolo ita eheha niʼamoniʼö.

8-9. Hadia manö lala niʼogunaʼö organisasi Yehowa ba wanuriaigö turia somuso dödö?

⁸ Iʼotarai me föna, lö aetu iʼogunaʼö fakake sabölö sökhi organisasi Yehowa ba wamazaewe turia somuso dödö. Duma-dumania, taʼogunaʼö publikasi tercetak, ”Drama Foto Penciptaan”, fonograf, moto si so fangebua li, hegöi siaran radio. Barö-barö daʼa, iʼogunaʼö göi teknologi digital organisasi, simane komputer hegöi internet. Baero daʼö, ifalua göi organisasi Yehowa halöwö famoʼeluaha sabölö ebua sagötö waö-waö waʼauri niha. Ifalua daʼö organisasi Yehowa enaʼö tola  teturiaigö duria somuso dödö ba niha fefu, ba li niʼogunaʼöra samösa. Ba daʼa taʼila wa lö khö Yehowa famaigi bawa. No ifaʼeleʼö wa hasambalö teturiaigö duria somuso dödö ”ba ngawalö soi, ba ngawalö mado, banua, hegöi li”. (Fam. 14:6, 7) Omasi ia na larongo fefu niha duria somuso dödö sanandrösa ba Wamatörö Lowalangi.

⁹ Hewisa wamaluada fanuriaigö ba niha si tebai tafalukhaisi ba nomo, simane niha si toröi ba apartemen si no muhaogö muzago? Enaʼö tola manuriaigö ita ba niha simane daʼö, no itolo organisasinia Yehowa ba wamalua ngawalö halöwö fanuriaigö ba nahia sato niha. Duma-dumania, fao dödö ndra Boto Solohe na taʼogunaʼö nahia mbuku si so gaolo-gaolo hegöi meza ba wangoromaʼö publikasida ba nahia sato niha. Mufalua daʼö si oföna sibai ba Prancis me 2001. Ba gafuriata, mufalua göi zimane daʼö ba nahia tanö böʼö. Sökhi sibai mbuania. Me döfi 2011, mubörögö halöwö fanuriaigö ba mbanua segebua. Mufalua daʼö si oföna sibai ba nahia sabölö ato niha ba New York City, Amerika Serikat. Barö zi döfi, so 102.129 mbuku, ba 68.911 majalah si no mubeʼe ba niha. So göi 4.701 niha somasi mamahaʼö yaʼira ba Zura Niʼamoniʼö. Sindruhu-ndruhu wa iʼogunaʼö geheha niʼamoniʼö Yehowa ba wotuhini halöwö andre. Börö daʼö, fao dödö ndra Boto Solohe na muʼogunaʼö nahia mbuku si so gaolo-gaolo hegöi meza ba wamalua halöwö fanuriaigö ba zi sagörö ulidanö.

10. Hadia zinangea tafalua enaʼö itugu onekhe ita ba wamalua halöwö fanuriaigö hegöi famahaʼö?

¹⁰ Sinangea öfalua. Haogö wangogunaʼö famomaha nibeʼe Yehowa ba gangowuloa. Moguna owölö-ölö ndraʼugö wefao manuriaigö khö ndra talifusöda ba kelompok dinas si farahu yaʼugö. Tola latolo ndraʼugö enaʼö itugu onekhe ba wamalua halöwö fanuriaigö, ba tola göi möi famarou dödömö duma-duma nibeʼera. Böi böhöli ba wamalua halöwö fanuriaigö hewaʼae na so zi tobali daha-taha. Börö me halöwö moroi khö Yehowa daʼa, hasambalö ibeʼe khöda waʼabölö ba wamalua yaʼia. Simane si no tesura ba ayati si tobali tuho artikel andre, tenga börö waʼabölöda samösa wa tola tafalua gohitö dödö Lowalangi, hizaʼi börö wanolo moroi ba gehehania niʼamoniʼö.​—Zakh. 4:6.

11. Hadia nifalua ndra boto solohe me abad siföföna ba wotatugöi enaʼö toföfö ba so waʼatulö ba mbanua niha Keriso?

¹¹ Ba abad siföföna. Falulu fohalöwö ndra boto solohe si so ba Yeruzalema ba wotatugöi enaʼö lö  aetu toföfö ba so waʼatulö ba mbanua niha Keriso. (Hal. 2:42) Nehegö duma-duma andre. Te me döfi 49 M, so waʼafaehu lala wangera-ngera ndra talifusöda sanandrösa ba wosuna. Na lö iʼanemaiʼö muʼasiwai gabula dödö andre, tola tobali daha-tahara daʼö ba wamalua halöwö fanuriaigö. Börö daʼö, lafahuhuosi gabula dödö andrö ira sinenge hegöi satua sokubaloi si no mufataro tobali boto solohe. Hewaʼae na niha Yahudi ira, lö laʼoʼö zi toʼölö lafalua ira niha Yahudi, mazui bua gera-era niha sotuhini zi toʼölö mufalua andrö. Hizaʼi, lafareso Daromali Lowalangi, ba laʼandrö wanuturu lala moroi ba geheha niʼamoniʼö. (Hal. 15:1, 2, 5-20, 28) Hadia mbuania? Ifahowuʼö Yehowa gangetula nihalöra. So waʼatulö hegöi fahasara dödö ba mbanua niha Keriso, ba tola latohugö wamalua halöwö fanuriaigö.​—Hal. 15:30, 31; 16:4, 5.

12. Hadia zangoromaʼö wa so göi waʼatoföfö hegöi faʼatulö ba mbanua niha Keriso ba götöda iadaʼa?

¹² Ba götöda iadaʼa. No ibeʼe wanolo organisasi Yehowa enaʼö lö mamalö toföfö ba so waʼatulö ba mbanua niha Keriso. Ba majalah Watch Tower edisi 15 Mbaŵa si Felezara 1895, no mufaʼanö sambua artikel si teʼodane-dane ba 1 Korindro 14:40, tuhonia, ”Ba Lala si Sökhi ba si Toföfö”. Imane artikel andrö, ”Asese lafaʼoheʼö zura ira sinenge ba mbanua niha Keriso me abad siföföna sanandrösa ba waʼatohude waʼatoföfö . . . Moguna taforege ba woloʼö ’fefu hadia ia nisura me föna . . . ba wamahaʼö yaʼita’.” (Rom. 15:4) Lö aetu iforege organisasi Yehowa enaʼö toföfö ba atulö mbanua niha Keriso ba götöda iadaʼa, simane banua niha Keriso me abad siföföna. Angeragö atö: Na fao ndraʼugö ba Wamahaʼö Manuriaigö nifalua ba mbanua niha Keriso tanö böʼö mazui ba soi tanö böʼö, tatu no öʼila hadia artikel sedöna mututunö ba hewisa lala ba wanutunö yaʼia. Buania, tola iʼanemaiʼö örasoi waʼahono dödö. Tola tarasoi wahasara dödö simane daʼö börö wanolo geheha niʼamoniʼö moroi khö Lowalangi.​—Zef. 3:9.

13. Me no tabaso Yakobo 3:17, hadia manö wanofu sinangea taʼangerönusi?

¹³ Sinangea öfalua. Omasi Yehowa enaʼö ’lö tebulö khöda wahasara dödö ba geheha niʼamoniʼö, ba wamaböbö faʼatulö andrö’. (Ef. 4:1-3) Börö daʼö, sofu khöu samösa, ’Hadia uforege ba wangaʼasogö fahasara dödö hegöi faʼatulö ba mbanua niha Keriso? Hadia uʼoʼö niwaʼö ndra talifusöda si tobali sondröniaʼö ba mbanua niha Keriso? Hadia tola mufaduhusi tödö ndraʼo ba wamalua noro dödö si no mubeʼe khögu ba mbanua niha  Keriso? Hadia omasido utolo niha böʼö ba ginötö si tefaudu?’ (Baso Yakobo 3:17.) Na so nasa zinangea öbulöʼö, andrö geheha niʼamoniʼö ba wangandrö. Börö wanolo geheha niʼamoniʼö, tola öbulöʼö waʼaurimö hegöi amuatamö. Na omasi öfalua daʼö, itugu laʼomasiʼö ndraʼugö ira talifusöda, ba laʼameʼegö tödö zi no öfalua ba mbanua niha Keriso.

14. Moloʼö Kolose 1:9, 10, hewisa lala Yehowa ba wamahaʼö iraono mbanuania me abad siföföna?

¹⁴ Ba abad siföföna. Omasi sibai Yehowa ba wamahaʼö iraono mbanuania. (Zin. 32:8) Omasi Yehowa enaʼö taʼokhögö waʼaboto ba dödö sanandrösa khönia, taʼomasiʼö ia, ba auri ita sagötö faʼara. Tebai alua fefu daʼö na lö ifahaʼö ita Yehowa. (Yoh. 17:3) Ba abad siföföna, iʼogunaʼö mbanua niha Keriso Yehowa ba wamahaʼö iraono mbanuania. (Baso Kolose 1:9, 10.) Simane si no ifabuʼu Yesu, latema göi ”wanolo” ira nifahaʼö, yaʼia daʼö eheha niʼamoniʼö. (Yoh. 14:16) Eheha niʼamoniʼö zanolo ira nifahaʼö ba wangokhögö faʼaboto ba dödö sanandrösa ba Daromali Lowalangi, ba latörö tödöra fefu wehede Yesu hegöi nifaluania. Ba gafuriata, musura daʼö bakha ba mbuku Injil. Börö me no laʼokhögö waʼaboto ba dödö andrö ira niha Keriso me abad siföföna, tola itugu mamati ira, ba itugu laʼomasiʼö Lowalangi, Ononia, hegöi niha böʼö.

15. Hadia dandra sangoromaʼö wa no ifalua Yehowa mbuʼusa linia si no musura ba Yesaya 2:2, 3?

¹⁵ Ba götöda iadaʼa. No ifaʼeleʼö Yehowa wa ”na luo safuria” dania, hasambalö tohare niha moroi ba ngawalö soi ba wangondrasi hili andrö khönia enaʼö tola ifahaʼö ira sanandrösa ba gamakhoitania. (Baso Yesaya 2:2, 3.) No alua zi no ifaʼeleʼö andrö iadaʼa. Tola taʼila wa abölö tohude nasa wamosumange sindruhu moroi ba ngawalö wamosumange sofaya si so ba gulidanö andre. Baero daʼö, oya sibai göi waʼaboto ba dödö sanandrösa ba Zura Niʼamoniʼö si no ihenaigö Yehowa ba nono mbanuania. (Yes. 25:6) Iʼogunaʼö ”zawuyu si lö faröi ba satua-tua” ba wameʼe khöda fefu waʼaboto ba dödö andrö, si no ifaʼanö ba lala si faböʼö-böʼö. Duma-dumania, tola tabaso artikel,  tafondrondrongo huhuo, ba tafaigi video animasi. (Mat. 24:45) Tarasoi zimane nirasoi zi fahuwu khö Yobi sotöi Elihu, sangumaʼö, ”Heza so zamatörö simane [Lowalangi]?”​—Yob. 36:22.

16. Hadia zinangea öfalua enaʼö tola ötema mbua moroi ba wanuturu lala nibeʼe Yehowa?

¹⁶ Sinangea öfalua. Hasambalö itolo ndraʼugö eheha niʼamoniʼö moroi khö Lowalangi ba woʼaurifagö hadia zi no öbaso hegöi si no öfahaʼö yaʼugö ba Daromali Lowalangi. Angandrö simane sanura sinunö, sangumaʼö, ”Ombakhaʼö khögu lala andrö khöu, Yehowa, enaʼö utörö ia, ba zi faduhu dödöu; osambalöʼö dödögu ba wangataʼufi töimö andrö.” (Zin. 86:11) Börö daʼö, böi böhöli ba wombaso hegöi ba wamahaʼö yaʼugö ba Zura Niʼamoniʼö awö publikasi tanö böʼö, si no ihenaigö Yehowa ba organisasinia. Tatu manö, tenga ha ba wondrouʼö faʼaboto ba dödöu wa öfalua daʼö. Hizaʼi, omasiʼö na tofakha ba dödöu zindruhu andrö ba öfalua daʼö ba waʼauriu. Tola itolo ndraʼugö eheha niʼamoniʼö moroi khö Yehowa ba wamalua daʼö. Baero daʼö, omasiʼö göi öfarou dödö ndra talifusöda. (Heb. 10:24, 25) Hadia mbörö? Börö me ösi nomou ba wamati ira. Andrö geheha niʼamoniʼö moroi khö Lowalangi ba wanolo yaʼugö enaʼö tola öbeʼe mbua gera-era si möi fondrara dödö niha böʼö, hegöi ba wamalua zabölö sökhi na so halöwö nibeʼe khöu ba gangowuloa. Na öfalua daʼö, no öforomaʼö khö Yehowa hegöi Yesu wa öʼomasiʼö ’mbiri-birira’ sebua böli.​—Yoh. 21:15-17.

17. Hadia manö lala si tola öfalua ba wangoromaʼö wa lö faröi ndraʼugö ba wotuhini organisasi Yehowa?

¹⁷ Ba zi lö ara tö, hatö organisasi sanemaʼö fanuturu lala moroi ba geheha niʼamoniʼö zi toröi ba gulidanö. Börö daʼö, moguna falulu fohalöwö ndraʼugö ba organisasi Yehowa si fao faʼaterou dödö. Moguna öʼomasiʼö fefu niha simane nifalua Lowalangi, ba öturiaigö khöra duria somuso dödö. Simane yaʼia, moguna göi öforomaʼö wa omasi ndraʼugö enaʼö toföfö ba atulö ngawalö hadia ia, ba öforege ba wangaʼasogö faʼatulö ba mbanua niha Keriso. Ba no göi öfondrondrongo Zamahaʼö Fondrege Zalawa na öfahaʼö ndraʼugö ba ngawalö waʼaboto ba dödö si no ihenaigö. Na öfalua daʼö, lö khöu faʼataʼu hewaʼae na itugu ahatö waʼatekiko gulidanö Zatana andre. Hizaʼi, tola öʼokhögö waʼabarani ba fao ndraʼugö khö ndra talifusöda si lö faröi ba wamosumange Yehowa ba organisasinia.