1. Ko e heigoa kua lata e tau Kerisiano papatiso ke matutaki ke taute?

KUA papatiso nakai a koe? Ka pihia, kua fakakite e koe ke he tau tagata e tua haau ki a Iehova mo e makai haau ke fekafekau mo e fakatokatokaaga haana. * Mooli, ko e tua haau ki a Iehova kua lata ke matutaki ke tupu. Ti lata a koe ke atihake tumau e mauokafua haau kua fakaaoga e Iehova e fakatokatokaaga haana mogonei.

2-3. Puhala fe kua takitaki e Iehova e fakatokatokaaga haana mogonei? Talahau e tau fakatai.

² Mogonei kua takitaki e Iehova e fakatokatokaaga haana he fakakite e aga, finagalo, mo e tau puhala haana. To fakatutala a tautolu ke he tolu e aga ha Iehova ne kitia ke he fakatokatokaaga haana.

³ Fakamua, “nakai fakamailoga tagata e Atua.” (Gahua 10:34) Omoomoi he fakaalofa a Iehova ke foaki e Tama haana mo “lukutoto ma e tau tagata oti kana.” (1 Timo. 2:6; Ioane 3:16) Fakaaoga e Iehova e tau tagata haana ke fakamatala e tala mitaki ki a lautolu oti kua fanogonogo he lagomatai e tokologa ke aoga mai he lukutoto. Uaaki, ko Iehova ko e Atua maopoopo mo e mafola. (1 Kori. 14:33, 40) Ti ko e mena ia kua lata a tautolu ke amanaki ko e tau tagata tapuaki kua fekafekau ki a ia ko e matakau maopoopo mo e mafola. Toluaki, ko Iehova ko e Iki po ke Faiaoga Homo Ue Atu. (Isaia 30:20, 21) Ti ko e fakatokatokaaga haana kua hagaaki ke he fakaako he Kupu omoomoi  haana he fakapotopotoaga mo e gahua fakamatala. Kitia maali fēfē e tolu he aga ha Iehova he fakapotopotoaga Kerisiano fakamua atu? Kitia fēfē ai mogonei? Maeke fēfē e agaaga tapu ke lagomatai a koe he fekafekau mo e fakatokatokaaga ha Iehova mogonei?

4. Ia Gahua 1:8, ko e heigoa e poakiaga ha Iesu ke he tau tutaki haana ke taute, ti ko e heigoa e lagomatai ka moua e lautolu?

⁴ He senetenari fakamua. Ko e fekau ne fakamatala e Iesu ne foaki e amaamanakiaga ke he tau tagata oti kana. (Luka 4:43) Poaki a ia ke he tau tutaki haana ke matutaki e gahua ne kamata e ia, ke fakamatala ke “hoko ni ke he fakaotiaga he lalolagi.” (Totou Gahua 1:8.) Mooli, nakai maeke a lautolu ke taute e gahua nei he malolō ni ha lautolu. Lata a lautolu ke moua e agaaga tapu, ko e “lagomatai” ne mavehe e Iesu ki a lautolu.​—Ioane 14:26; Saka. 4:6.

5-6. Lagomatai fēfē he agaaga tapu e tau tutaki ha Iesu?

⁵ Ko e tau tutaki ha Iesu ne moua e agaaga tapu he Penetekoso 33 V.N. Mo e lagomatai he agaaga ia, ne kamata agataha a lautolu ke fakamatala, ti ko e magaaho kū, totou afe ne talia e tala mitaki. (Gahua 2:41; 4:4) He tupu e totokoaga, nakai mahala e tau tutaki he matakutaku, ka e ono atu a lautolu ke he Atua ma e lagomatai. Liogi a lautolu: “Foaki mai e koe ke he hau a tau fekafekau, kia talahau atu e lautolu hau a kupu mo e fakamalolo ni.” Puke a lautolu mogoia he agaaga tapu mo e tumau ke “talahau atu e kupu he Atua mo e fakamalolo.”​—Gahua 4:18-20, 29, 31.

⁶ Fehagai e tau tutaki ha Iesu mo e falu paleko foki. Ma e fakatai, gahoa e tau lagaki he tau Tohiaga Tapu. Nakai fai tohi fakaako tuga kua moua e tautolu mogonei. Ti kua lata e tau tutaki ke fakamatala ke he tau tagata ne vagahau he tau vagahau kehekehe. Pete e tau paleko nei, ne taute he tau tutaki fakamakutu ia e mena ofoofogia, ti gahoa ni e tau hogofulu tau, ne fakamatala atu e tala mitaki “ke he tau tagata oti ke he lalolagi.”​—Kolo. 1:6, 23.

7. He molea e 100 tau kua mole, iloa fēfē he tau fekafekau ha Iehova e mena kua manako e Atua ki a lautolu ke taute, ti tali atu fēfē a lautolu?

⁷ He magaaho nei. Matutaki a Iehova ke takitaki mo e foaki age e malolō ke he tau tagata haana. Ko e lahi he takitakiaga ne moua mai ai he Kupu he Atua ne omoomoi he agaaga tapu. He Tohi Tapu, totou e tautolu ke he fekafekauaga ha Iesu mo e poaki haana ke he tau tutaki ke matutaki e gahua ne kamata e ia. (Mata. 28:19, 20) Pehē e mekasini nei he Iulai 1881: “Nakai kotofa po ke fakauku a tautolu ke moua e lilifu mo e monuina ke he tau koloa ka ko e lahi e magaaho ke fakaaoga ke fakamatala e tala mitaki.” Ko e tohi tote To Whom the Work Is Entrusted ne lomi he 1919 ne pehē: “Kua lahi mahaki e gahua ke taute, ka ko e malolō he Iki ka maeke ia tautolu ke taute ai.” Ē, tuga e tau Kerisiano fakamua atu, ne loto malolō e tau matakainaga nei ke taute e gahua he mauokafua to lagomatai he agaaga tapu a lautolu ke fakamatala ke he tau tagata oti kana. Matutaki a tautolu ke moua e mauokafua pihia mogonei.

8-9. Ko e heigoa e tau puhala kua fakaaoga he fakatokatokaaga ha Iehova ke fakalaulahi e gahua fakamatala?

⁸ Kua fakaaoga he fakatokatokaaga ha Iehova e tau koloa kua mua e mitaki ke fakapuloa e tala mitaki. Putoia ai e tau tohi ne lomi, “Photo-Drama of Creation,” tau lapa kofe fakatagi, tau motokā fakailoa, tau fakapuloaaga letiō, mo e tau matini foou foki mogonei. Lahi mahaki foki e gahua fakaliliu ne taute he fakatokatokaaga he Atua! Ko e ha? Ke maeke e tau tagata oti kana ke logona e tala  mitaki he vagahau ni ha lautolu. Nakai fakamailoga tagata a Iehova ti kua talahau tuai e ia ko e tala mitaki to fakailoa ke he “tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakite. 14:6, 7) Manako a ia ke moua he tau tagata oti e fekau he Kautu.

⁹ Ka e kua a lautolu kua uka ke hoko ki ai, liga ha kua nonofo he tau fale ne loka e hala ki loto? Ke maeke ke hoko ke he tau tagata tokologa, kua taute he fakatokatokaaga ha Iehova e falu puhala ke fakamatala ke he tau tagata. Ma e fakatai, he 2001 ne talia he Kau Fakatufono ke fakaaoga e tau peleō tohi mo e falu fakatātāaga i Falani mo e mogo fakamui he falu matakavi foki. Ne mitaki e fua ne moua. He 2011 ko e fakaholoaga foou ne kamata i United States he taha vala ne mua atu e lavelave ha New York City. He tau fakamua, ne 102,129 e tohi mo e 68,911 e mekasini ne foaki. Ti 4,701 e tagata ne ole ma e fakaako Tohi Tapu! Maaliali ai, kua lalago he agaaga tapu e gahua nei. Ti talia he Kau Fakatufono ke fakaaoga e tau peleō tohi mo e tau fakatātāaga ke he lalolagi katoa.

10. Ko e heigoa ka taute e tautolu ke holo ki mua he gahua fakamatala?

¹⁰ Mena haau ka taute. Fakaaoga katoatoa e fakamahani kua foaki e Iehova he tau feleveiaaga Kerisiano. Gahua tumau mo e matakau gahua fakamatala haau. Moua e koe i ai e lagomatai kua lata mo koe, ti atihake foki ha ko e fakafifitakiaga mitaki he falu. Fakauka tumau ke fakamatala. Fakamanatu mai he kupu tohi he vala tala nei, kua taute e tautolu e finagalo he Atua ha ko e agaaga tapu, nakai ha ko e malolō ni ha tautolu. (Saka. 4:6) Ti ko e gahua he Atua hane taute e tautolu.

11. Gahua fakalataha fēfē e kaufakatufono he senetenari fakamua ke fakatumau e maopoopo he tau tagata he Atua?

¹¹ He senetenari fakamua. Ko e kau fakatufono i Ierusalema ne gahua fakalataha ke fakatumau e maopoopo mo e mafola he tau tagata he Atua. (Gahua 2:42) Ma e fakatai, ha ko e matalekua ke he peritome he 49 V.N., ne fakatutala e kau fakatufono i lalo he takitakiaga  he agaaga tapu ke he matakupu nei. Kaeke ke mavehevehe e fakapotopotoaga ha ko e matakupu nei, to tauhele e gahua fakamatala. Pete ko e tau Iutaia a lautolu, nakai fakaohooho e tau aposetolo mo e tau patu ha ko e aga fakamotu Iutaia po ko lautolu ne omoomoi ai. Ka kua onoono a lautolu ke he Kupu he Atua mo e agaaga tapu ma e takitakiaga. (Gahua 15:1, 2, 5-20, 28) Ko e fua? Fakamonuina e Iehova e fifiliaga ha lautolu, moua e mafola mo e kaufakalataha, ti holo ki mua e gahua fakamatala.​—Gahua 15:30, 31; 16:4, 5.

12. Ko e heigoa kua fakakite e maopoopo mo e mafola kua kitia he fakatokatokaaga a Iehova mogonei?

¹² He magaaho nei. Gahua e fakatokatokaaga ha Iehova ke fakatumau e maopoopo mo e mafola he tau tagata a Iehova. He 1895, ha ha he Zion’s Watch Tower and Herald of Christ’s Presence ia Novema 15 e vala tala ne mataulu “Decently and in Order,” kua fakavē ke he 1 Korinito 14:40. Pehē e vala tala: “Loga e mena ne talahau he tau aposetolo ke he Lotu fakamua hagaao ke he maopoopo . . . Kua aoga ke mataala ke omaoma tumau ke he tau ‘mena oti ne tohi mai i tuai, ne tohi ia, ke fakaako ai a tautolu.’” (Roma 15:4) Ē, ko e manako pihia ma e maopoopo mo e mafola ne mailoga ke he tau Kerisiano fakamua ne kitia ke he fakatokatokaaga ha Iehova mogonei. Ke fakatai: Ka fina atu a koe ke he Fakaakoaga Kolo Toko he taha fakapotopotoaga po ke taha motu, to iloa e koe e puhala ka taute e fakaakoaga mo e vala tala ka tutala ki ai. To fakatotoka agataha e logonaaga haau! Ko e agaaga tapu he Atua ni kua maeke e kaufakalataha uho ia!​—Sefa. 3:9.

13. He tokaloto e Iakopo 3:17, ko e heigoa e tau hūhū kua lata ke hūhū hifo ki a tautolu?

¹³ Mena haau ka taute. Manako a Iehova ke he tau tagata haana “ke toto mau e loto fakalataha ha he Agaga ke he pipiaga he mafola.” (Efeso 4:1-3) Ti hūhū hifo ki a koe: ‘Fakaholo ki mua nakai e au e kaufakalataha mo e mafola he fakapotopotoaga? Omaoma nakai au ki a lautolu hane takitaki? Maeke nakai falu ke falanaki ki a au, mua atu ka fai matagahua au he fakapotopotoaga? Ko e mafiti, fiafia ke lagomatai, mo e makai nakai au ke  taute e matagahua?’ (Totou Iakopo 3:17.) Ka kitia e koe kua lata ke holo ki mua, liogi ma e agaaga tapu. Ka lahi e fakaatā e koe e agaaga tapu ke fakahakohako e aga haau mo e fakaohooho e tau mahani haau, to lahi e fakaalofa mo e tokiofa he tau matakainaga haau a koe.

14. Ia Kolose 1:9, 10, fakaako fēfē e Iehova e tau tagata haana he senetenari fakamua?

¹⁴ He senetenari fakamua. Fiafia lahi a Iehova ke fakaako e tau tagata haana. (Sala. 32:8) Manako a ia ki a lautolu ke iloa mo e fakaalofa ki a ia, mo e ke moui tukulagi ko e tau fanau fakahelehele haana. To nakai maeke e tau mena nei kaeke ke nakai fakaako e ia. (Ioane 17:3) Fakaaoga e Iehova e fakapotopotoaga Kerisiano he senetenari fakamua ke fakaako e tau tagata haana. (Totou Kolose 1:9, 10.) Ko e agaaga tapu ko e ‘lagomatai’ ne mavehe e Iesu ka lahi e matagahua ke taute. (Ioane 14:16) Kua maeke ai he tau tutaki ke maama lahi e Kupu he Atua, ti liu manatu e tau mena loga ne talahau mo e taute e Iesu ne tohi he tau Evagelia he mogo fakamui. Ko e iloilo nei kua fakamalolō e tua he tau Kerisiano fakamua atu mo e fakaalofa ha lautolu ke he Atua, Tama haana, mo e taha ke he taha.

15. He tau puhala fe kua kitia e koe kua fakamooli e Iehova e maveheaga haana he Isaia 2:2, 3?

¹⁵ He magaaho nei. Talahau tuai e Iehova “to hoko ni ke he tau aho a mui,” to tafe mai e tau tagata he tau motu oti kana ke he mouga haana ke fakaako hagaao ke he tau puhala haana. (Totou Isaia 2:2, 3.) Kitia e tautolu e perofetaaga ia kua fakamooli mogonei. Ko e tapuakiaga mooli kua mua atu ke he tapuakiaga fakavai. Ko e galue fakaagaaga mooli kua foaki mai e Iehova! (Isaia 25:6) Puhala he “fekafekau fakamoli mo e loto matala,” kua foaki mai e ia ki a tautolu e loga mo e ofoofogia he tau vala tala mo e tau lauga ke he tau fakatino mo e tau vitiō. (Mata. 24:45) Logona  hifo e tautolu tuga e kapitiga ha Iopu ko Elihu, ne pehē: “Ko hai kia kua fakaako atu ke tuga a ia [Atua]?”​—Iopu 36:22.

16. Ko e heigoa haau ka taute ke tupu fakaagaaga?

¹⁶ Mena haau ka taute. To lagomatai he agaaga he Atua a koe ke fakagahua e mena ne totou mo e fakaako e koe he Kupu he Atua. Liogi tuga e salamo: “Iehova na e, kia fakakite mai e koe hāu a puhala, to fano au ke he tonu mai ia koe, kia fakamau e koe hoku loto ke matakutaku ke he hāu a higoa.” (Sala. 86:11) Matutaki ke kai he tau mena kai fakaagaaga ne foaki mai e Iehova he Kupu mo e fakatokatokaaga haana. Ka ko e foliaga haau ke nakai ni moua e iloilo. Manako a koe ke hokotia e kupu mooli ke he loto mo e fakagahua ai he moui haau. Maeke e agaaga ha Iehova ke lagomatai a koe ke taute pihia. Manako foki a koe ke fakamafana e tau matakainaga haau. (Hepe. 10:24, 25) Ko e ha? Ha ko lautolu ko e magafaoa fakaagaaga haau. Liogi ma e agaaga he Atua ke lagomatai a koe ke tali mai he loto he tau feleveiaaga Kerisiano mo e taute fakamitaki e vala haau ka fai he feleveiaaga. He tau puhala nei kua fakakite e koe ki a Iehova mo e Tama haana kua fakaalofa a koe ke he “tau mamoe” fakahelehele ha laua.​—Ioane 21:15-17.

17. He tau puhala fe kua fakakite e koe kua lalago fakamooli e koe e fakatokatokaaga ha Iehova?

¹⁷ Nakai leva, ko e fakatokatokaaga ni kua takitaki he agaaga he Atua ka toe he lalolagi. Ti gahua fakamakutu mo e fakatokatokaaga ha Iehova. Manamanatu ke he fakaalofa nakai fakamailoga tagata he Atua ma e tau tagata he fakamatala e tala mitaki ke he tau tagata oti ne feleveia mo koe. Fifitaki e fiafia haana ma e maopoopo mo e mafola he fakatupu e kaufakalataha he fakapotopotoaga. Fanogonogo ke he Faiaoga Homo Ue Atu haau he fakaaoga katoatoa e galue fakaagaaga ne foaki mai e ia. He hoko mai e lalolagi ha Satani ke he moumouaga, ua matakutaku a koe. Ka e tū mauokafua a koe mo lautolu kua fekafekau fakamooli mo e fakatokatokaaga ha Iehova.