1. Khuyini amaKrestu abhajadisiweko ekufuze aragele phambili ayenza?

UBHAJADISIWE na? Nangabe kunjalo, sewutjengisile ukuthi uyakholelwa kuJehova begodu uzimisele ukumlotjha ehlanganwakhe. * Iqiniso kukuthi, ukukholwa kwakho kufuze kuthuthuke. Ukholwe ukuthi uJehova usebenzisa ihlanganwakhe bona atlhogomele abantu bakhe namhlanjesi.

2-3. UJehova uyinqophisa ngayiphi indlela ihlanganwakhe namhlanjesi? Nikela iimbonelo.

² Namhlanjesi, uJehova unqophisa ihlanganwakhe ngendlela etjengisa ubuntu bakhe, ihloswakhe kunye neenkambisolawulo zakhe. Akhesicoce ngobuntu obuthathobu obubonakala endleleni anqophisa ngayo ihlanganwakhe.

³ Kokuthoma, “uZimu akakhethi.” (IzE. 10:34) Lithando elamenza wanikela ngeNdodanakhe ‘yabe sihlengo’ sabo boke. (1 Thim. 2:6; Jwa. 3:16) UJehova usebenzisa abantu bakhe bona batjhumayele iindaba ezimnandi kibo boke abalalelako, ngokwenza njalo usiza abanengi ngendlela ekungakghonakala ngayo bazuze esihlengweni sakaJesu. Kwesibili, uJehova unguZimu wokuthula. (1 Kor. 14:33, 40) Ngikho silindele nokuthi abantu abamlotjhako, bazomlotjha ngokuhleleka nangokuthula. Kwesithathu, UJehova ‘unguMfundisethu.’ (Isa. 30:20, 21) Ngikho-ke nehlanganwakhe idzimelela khulu ekufundiseni iliZwi lakhe eliphefumulelweko, kokubili ebandleni nebantwini tjhatjhalazi. Ubuntu obuthathobu babonakala njani emaKrestwini wangeenkhathi zabapostoli? Bubonakala njani emalangeni  esiphilakiwo la? Ummoya ocwengileko ungakusiza njani ulotjhe uJehova ehlanganwenakhe namhlanjesi?

4. Ngokuya ngokomtlolo wezEnzo 1:8, khuyini uJesu ayilayela abafundi bakhe begodu ngiliphi isizo ebekazobanikela lona?

⁴ Ngesikhathi sabapostoli. Umlayezo uJesu ebekawutjhumayela bewunikela ithemba. (Luk. 4:43) Walayela abalandeli bakhe bona barage nomsebenzi awuthomileko, bebanikele ubufakazi “eendaweni ezikude khulu zephasi.” (Funda izEnzo 1:8.) Iqiniso kukuthi bebangeze bakghone ukuwenza ngamandlabo umsebenzi lo. Bebatlhoga ummoya ocwengileko, “umsizi” uJesu abathembisa wona.—Jwa. 14:26; Zak. 4:6.

5-6. Ummoya ocwengileko wabasiza njani abalandeli bakaJesu?

⁵ Abalandeli bakaJesu bafumana ummoya ocwengileko ngePentekoste laka-33 ngeenkhathi zabapostoli. Ngesizo lommoya ocwengileko, bathoma ukutjhumayela, kwathi ngesikhathi esincani, iinkulungwana zabantu zamukela iindaba ezimnandi. (IzE. 2:41; 4:4) Abantu nabathoma ukubatjhutjhisa, bathandaza bathi: “Usize neenceku zakho bona ziragele phambili zikhuluma ilizwi lakho ngesikhulu isibindi.” Bazala ummoya ocwengileko baragela phambili, “bakhuluma ilizwi lakaZimu ngesibindi.”​—IzE. 4:18-20, 29, 31.

⁶ Abalandeli bakaJesu kwaba neentjhijilo abahlangabezana nazo. Ngokwesibonelo, imiTlolo ebebanayo beyitlhayela, bezingekho izinto ezisiza ukufundisa njengombana sinazo namhlanjesi. Abalandeli bakaJesu bebatjhumayela ebantwini abakhuluma amalimi ahlukahlukeneko. Ngitjho naphezu kweentjhijilo ebebahlangabezana nazo, abafundi bakaJesu abanetjiseko benza umsebenzi ebewubonakala ungeze wakghoneka. Kungapheli iminyaka eminengi, besele batjhumayele iindaba ezimnandi “kiyo yoke indalo engaphasi kwezulu.”​—Kol. 1:6, 23.

7. Eminyakeni engaphezu kweli-100 edlulileko, iinkhonzi zakaJehova zazi njani ukuthi yini ayifunako kizo begodu zasabela njani?

⁷ Emihleni esiphila kiyo. UJehova usaragela phambili anqophisa abantu bakhe. Iinqophiso zivela eliZwini lakhe eliphefunyulelweko. Kulapho sifumana khona umlando wekonzo kaJesu nesinqophiso sokuthi abalandeli bakhe kufuze baragele phambili nokwenza umsebenzi awuthomileko. (Mat. 28:19, 20) Ngomnyaka ka-1881, Julayi, umagazini wethu wathi: “UJehova akhenge asikhethe namkha asizese bona sihlonitjhwe babantu namkha sinjinge, kunalokho wasikhetha bona sisebenzise koke esinakho bona sitjhumayele iindaba ezimnandi.” Incwadi enesihloko esithi, Kilabo Abanikelwe Umsebenzi Lo, eyagadangiswa ngo-1919, efumaneka ngesiNgisi ithi, “Umsebenzi lo ubonakala umkhulu khulu kodwana ungeweKosi begodu ngamandlayo, sizowenza.” Abafowethwaba balandela isibonelo samaKrestu wangeenkhathi zabapostoli, basebenza ngamandla banethemba lokuthi ummoya ocwengileko uzobasiza batjhumeyeze yoke imihlobo yabantu. Nanamhlanjesi sinethemba elifanako.

8-9. Ngiziphi iindlela ihlangano kaJehova eyazisebenzisako bona ithuthukise umsebenzi wokutjhumayela?

⁸ Ihlangano kaJehova isebenzisa amathulusi afumaneka lula bona irhatjhe iindaba ezimnandi. Amathulusi la afaka hlangana iincwadi ezigadangisiweko, “i-Photo-Drama of Creation,” iintjumayelo namkha iinkulumo ezirekhodiweko, ikoloyi enesipikara, ukutjhumayela ngomrhatjho neendlela ezinengi zokutjhumayela zamva nje ezifaka itheknoloji. Ihlangano kaZimu yenza umsebenzi omkhulu khulu ekhewenziwa emlandwini, umsebenzi  wokutjhugululela kwamanye amalimi. Lokho ikwenza ngebanga lokuthi woke umuntu ezwe umlayezo kaZimu ngelimi lakhe. UJehova akakhethi begodu wabikezela kusesengaphambili ukuthi iindaba ezimnandi zizokutjhunyayelwa “kizo zoke iintjhaba, iinkoro, amalimu, nabantu.” (IsAm. 14:6, 7) Ufuna bona umlayezo womBuso ufunyanwe ngibo boke abantu.

⁹ Kuthiwani ngalabo ekubudisi ukubafumana ngebanga lokuthi bahlala eendaweni ekungasibulula ukungena kizo? Ngebanga lobujamo obunjengalobo, ihlangano kaJehova yahlela iindlela ezihlukahlukeneko zokutjhumayela tjhatjhalazi. Ngokwesibonelo, ngo-2001, isiHlopha esiBusako sanikela imvumo yokutjhumayela ngekarana eFrance ngokukhamba kwesikhathi nakwezinye iindawo. Kwaba nemiphumela emihle. Ngo-2011, kwathonywa ihlelo elitjha e-United States, endaweni ephithizela khulu yengcenye yeNew York City. Ngomnyaka wokuthoma ijimeli lithomile, kwakhanjiswa iincwadi eziyi-102 129 nabomagazini abayi-68 911. Abantu abayi-4 701 babawa ukufundelwa iBhayibheli! Siyaqiniseka ukuthi ummoya ocwengileko bewusekela umsebenzi lo. Ngalokho isiHlopha esiBusako saphumelelisa indlela le yokutjhumayela bona yenziwe ephasini mazombe.

10. Khuyini esingayenza bona sithuthuke emsebenzini wokutjhumayela?

¹⁰ Okufuze sikwenze. Kufuze siyithathele ehloko indlela uJehova asifundisa ngayo emhlanganweni wobuKrestu. Sebenza qobe nesiqhema sesimu owabelwe kiso. Lapho uzokufumana isizo olitlhogako begodu uzokukhuthazeka ngokubona indlela abanye abasebenza ngayo. Bambelela emsebenzini wokutjhumayela. Njengombana umtlolo isihloko esisekelwe kiwo usikhuthaza, sifeza umsebenzi kaZimu, ingasi ngamandlethu kodwana ngommoya ocwengileko. (Zak. 4:6) Ngebanga lokuthi senza umsebenzi kaZimu, uzosinikela amandla esiwatlhogako.

11. Ngesikhathi sabapostoli, isiHlopha esiBusako sasebenza njani bona kube nobunye hlangana nabantu bakaZimu?

¹¹ Ngesikhathi sabapostoli. IsiHlopha seJerusalema sasebenza ngobunye bona kube nokuthula  hlangana nabantu bakaZimu. (IzE. 2:42) Ngokwesibonelo, lokha nakuvela indaba yokusoka ngeenkhathi zabapostoli ngo-49, isiHlopha esiBusako, ngommoya ocwengileko sakghona ukucocisana ngendaba le. Ngathana ibandla lahlukaniswa yindaba le, umsebenzi wokutjhumayela bewuzokuthiyeka. Nanyana abapostoli namadoda amadala bebamaJuda, akhenge bavumele isiko labo bona libe nesandla endleleni abathatha ngayo isiqunto. Kunalokho, bavumela iliZwi lakaZimu kunye nommoya ocwengileko bona ubanqophise. (IzE. 15:1, 2, 5-20, 28) Umphumela waba kukuthi uJehova wabusisa isiqunto sabo, kwaba nokuthula nobunye begodu umsebenzi wokutjhumayela waragela phambili.​—IzE. 15:30, 31; 16:4, 5.

12. Kubonakala njani ukuthula nokuhleleka ehlanganweni kaJehova namhlanjesi?

¹² Eenkhathini zamva nje. Ihlangano kaJehova isebenze ngamandla bona kube nokuthula hlangana nabantu bakaZimu. Ngomnyaka ka-1895, i-Zion’s Watch Tower ne-Herald of Christ’s Presence kaNovemba 15 efumaneka ngesiNgisi enesihloko esithi: “Ngobunye nangokuhleleka” esekelwe emtlolweni weyoku-1 kwebeKorinte 14:40. Isihlokwesi sathi: “Abapostoli bakhuluma okunengi malungana nokuhleleka emasondweni . . . Kuhle ukuthi sitjhejisise ‘ngombana izinto ezatlolwa ngaphambilini zatlolelwa bona zisifundise.’” (Rom. 15:4) Ukuba nokuthula ngesikhathi sabapostoli kusabonakala nesikhathini sanamhlanjesi. Ukwenza isibonelo: Akhesithi uvakatjhela elinye ibandla namkha kwenye indawo, uzokwazi ukuthi isiThala siragwa njani begodu uzokwazi nokuthi kufundwa siphi isihloko. Uzozizwa wamukelekile! Ngummoya kaZimu kwaphela ongenza bona kube nobunye obunjalo!​—Zef. 3:9.

13. Nasicabanga ngoJakopo 3:17, ngimiphi imibuzo ekufuze sizibuze yona?

¹³ Lokho ongakwenza. UJehova ufuna abantu bakhe ‘balonde ubunye bommoya nesibopho esibumbanisako sokuthula.’ (Efe. 4:1-3) Yeke zibuze: ‘Ngiyakwenza na ukuthula ebandleni? Ngiyabalalela abadosa phambili? Ngiyathembeka ebantwini, khulukhulu  nanginomthwalo wefanelo ebandleni? Ngiyasihlonipha isikhathi bengiyabasiza abanye? Ngizimisele ukwenza neminye imisebenzi ebandleni?’ (Funda uJakopo 3:17.) Nakuna la kufuze uthuthukise khona, thandaza ubawe ummoya ocwengileko. Nawubawa ummoya kaZimu bona ubumbe ubuntu bakho, abafowenu nabodadwenu ebandleni bazokuthanda begodu bazokuhlonipha.

14. Ngokuya ngokomtlolo webeKolose 1:9, 10, uJehova bekabafundisa njani abantu bakhe ngeenkhathi zabapostoli?

¹⁴ Ngeenkhathi zabapostoli. Bekumthabisa uJehova ukufundisa abantu bakhe. (Rhu. 32:8) Ufuna bamazi, bamthande begodu baragele phambili baphila njengabantwana bakhe abathandekako. Koke lokhu bengeze kwakghonakala ngathana bekungasi yifundiso asinikela yona. (Jwa. 17:3) UJehova wasebenzisa amaKrestu ebekaphila ngeenkhathi zabapostoli bona afundise abantu bakhe. (Funda beKolose 1:9, 10.) Ummoya ocwengileko, “umsizi” wadlala indima ekulu. (Jwa. 14:16) Wasiza abalandeli bakaJesu bona balizwisise kuhle iliZwi lakaZimu, begodu bakghone ukukhumbula izinto ezinengi uJesu azenzako nazikhulumako njengombana bakghona ukuzitlola emaVangelini. Ilwazeli laqinisa amaKrestu wangeenkhathi zabapostoli abanokukholwa, athanda uZimu neNdodanakhe begodu bathandana nabo.

15. Ngiyiphi indlela obone ngayo ukuzaliseka kwesithembiso sakaJehova esifumaneka ku-Isaya 2:2, 3?

¹⁵ Eenkhathini zamva nje. UJehova wabikezela ukuthi “emihleni yokuphela” ukuthi abantu bazo zoke iintjhaba bazokuya entabeni kaJehova engokomfanekiso bona bafunde iindlela zakhe. (Funda u-Isaya 2:2, 3.) Siyasibona isiphorofidwesi sizaliseka. Ukulotjha kweqiniso kukhamba phambili ukudlula koke ukungahlwengeki. Kwamambala uJehova uyasondla ngelwazi elisenza sitjhidelane naye! (Isa. 25:6)  Usebenzisa “inceku ethembekileko nehlakaniphileko” bona asinikele ilwazi elinabileko elisitjhideza kuye ngeendlela ezihlukahlukeneko, iinhloko, iinkulumo, nelwazi esilifumana emavidiyweni esiwabukelako. (Mat. 24:45) Sizizwa ngendlela umngani kaJobho u-Elihu azizwa ngayo, nakazakuthi: “Ngubani ongafundisa [njengoZimu]?”​—Job. 36:22.

16. Khuyini ongayenza bona uqinise ubuhlobo onabo noJehova?

¹⁶ Lokho esingakwenza. Ummoya kaZimu uzokusiza uthathe amagadango begodu wenze lokho okufundako eliZwini lakhe. Thandaza njengombana kwenza umrhubi nakazakuthi: “Ngifundise indlelakho Somnini, ukuze ngikhambe eqinisweni lakho; ngiphe ihliziyo epheleleko ukuze ngesabe ibizo lakho.” (Rhu. 86:11) Yeke, ragela phambili usebenzise amalungiselelo uJehova asenzela wona bona sifunde ngaye nangeliZwi lakhe nehlanganwakhe. Iye khona kuliqiniso ukuthi akukafuzi ube nelwazi kwaphela, kufuze ulithande iqiniso begodu ulisebenzise ekuphileni kwakho. Ummoya kaJehova uzokusiza wenze njalo. Okhunye ongakwenza kukhuthaza abafowenu nabodadwenu. (Heb. 10:24, 25) Kazi ulotjha nabo uZimu. Thululela uZimu isifuba sakho umbawe akusize ukghone ukuphendula esifundweni begodu wenze koke okusemandlenakho nawunesabelo. Nawenza njalo uzabe utjengisa uJehova neNdodanakhe ukuthi uyazithanda “izimvana” zabo ezikhethekileko.​—Jwa. 21:15-17.

17. Ungatjengisa njani bona uyisekela ngokuthembeka ihlangano kaJehova?

¹⁷ Kungasikade, ihlangano ezokusala ephasini, ngileyo enqotjhiswa mumoya kaZimu. Kukhuthalele ukusebenza nehlangano kaJehova. Yiba nobuntu bakaZimu bokungakhethi uthande boke abantu begodu ubacocele ngeendaba ezimnandi. Mlingise ngokuba nokuthula nokuhleleka ebandleni. Lalela Umfundisi omKhulu ngokusebenzisa koke asinikela khona bona sibe nobuhlobo obuhle naye. Angekhe ube nevalo nakuphela iphasi lakaSathaneli. Kunalokho, uzokuba nalabo abathembekileko abasehlanganweni kaJehova.