1. Kansi Akhristu obatizika ofunika kupitilizhya kucita cinji?

KANSI nimwe wobatizika? Ngati n’tetyo, niye kuti mweonesha patuŵa cikhulupililo canu pa Yehova nakuti mufuna kumutumikila pamozi na gulu yake. * Tetyo, cikhulupililo canu pa Yehova cufunika kupitilizhya kukula. Ndipo mufunika kupitilizhya kunkhala na cidalilo cakuti Yehova osogolela gulu yake masiku ŵano.

2-3. Kansi Yehova osogolela tyani gulu yake masiku ŵano? Fotokozani visanzo.

² Masiku ŵano, Yehova osogolela gulu yake m’njila yamene yuonesha minkhalidwe yake, colinga cake na mfundo zake. Lomba tiyeni tilaŵizhyane minkhalidwe itatu yakuonesha Yehova posogolela gulu yake.

³ Coyamba, “Mulungu aliye sankho.” (Mac. 10:34) Cikondi cecitisha Yehova kuti atwale mwana wake monga “dipo kwa onse.” (1 Tim. 2:6; Yoh. 3:16) Yehova oseŵenzesha atumiki ŵake kulalikila uthenga uweme kuli onse omvwishila. Mwakucita izi, oyavya ŵanthu anyinji kupindula na nsembe ya dipo. Caciŵili, Yehova ni Mulungu wadongosolo koma soti wamtendele. (1 Akor. 14:33, 40) Tetyo, tufunika kuyembekezela kuti atumiki ŵake akomutumikila mwadongosolo koma soti mwamtendele. Cacitatu, Yehova niye “Mlangizi Mkulu.” (Yes. 30:20, 21) Ici niye cifukwa cake gulu yake yuseŵenza mwamphamvu kuphunzisa ayakine Mau a Mulungu mumpingo na mu ulaliki. Kansi Akhristu a  m’vyaka voyambilila etolela tyani minkhalidwe itatu iyi ya Yehova? Kansi atumiki a Yehova masiku ŵano, atolela tyani minkhalidwe iyi ya Yehova? Kansi mzimu utuŵa ungakuyavyeni tyani pamutumikila na gulu ya Yehova masiku ŵano?

4. Molingana na Machitidwe 1:8, kansi Yesu elamula ophunzila ŵake kucita cinji, ndipo enzoyembekezela kulondela thandizo yanji?

⁴ M’vyaka 100 voyambilila. Uthenga wecilalikila Yesu wepasa ciyembekezo ŵanthu onse. (Luka 4:43) Elamula ophunzila ŵake kupitilizhya nchito yeciyamba, yocitila umboni “mpaka kosilizhyila kwa calo.” (Ŵelengani Machitidwe 1:8.) Kulaŵila cendi, sembe aliyokwanishe nchito iyi mwamphamvu zao. Enzofunika mzimu utuŵa wamene ni “mthandizi” weciŵalonjeza Yesu.​—Yoh. 14:26; Zek. 4:6.

5-6. Kansi ophunzila a Yesu eyavyiwa tyani na mzimu utuŵa?

⁵ Ophunzila a Yesu elondela mzimu utuŵa pa Pentekosite mu 33 C.E. Moyavyiwa na mzimu utuŵa eyamba kulalikila nthawi yamene iyo, ndipo pavuli panthawi itontho ŵanthu masauzande anyinji elondela uthenga uweme. (Mac. 2:41; 4:4) Cinzunzo peceyamba, ophunzila aliyocite wowa, koma esenga Yehova kuti aŵayavye. Epemphela kuti: “Lolani kuti akapolo ŵanu apitilizhye kulaŵila mau ŵanu motang’a mtima.” Tetyo, ezula na mzimu utuŵa ndipo epitilizhya “kulaŵila mau a Mulungu motang’a mtima.”​—Mac. 4:18-20, 29, 31.

⁶ Ophunzila a Yesu ekumana soti na mavuto ayakine. Mwacisanzo, kwenzeve mipukutu inyinji ya Malemba. Ndipo kwenzeve soti zofalisa zofotokoza Baibo monga ni mwazilili masiku ŵano. Ophunzila enzofunika kulalikila ŵanthu amene enzolaŵila vilaŵilo vosiyanasiyana. Mosasamala kanthu za mavuto amene ayo, ophunzila aŵa acangu ecita vinthu vamene venzooneka monga vingakwanishike lini. Kwa vyaka pafupifupi 30, elalikila uthenga uweme pacalo conse.​—Akol. 1:6, 23.

7. Pa vyaka 100 vapita, kansi atumiki a Yehova eziŵa tyani vinthu venzofuna Mulungu kuti ove acite, ndipo ecita cinji?

⁷ Masiku ŵano. Yehova wapitilizhya kusogolela noyavya atumiki ŵake. Osogolela atumiki ŵake poseŵenzesha Mau ŵake ouzhyiliwa na mzimu utuŵa. M’Baibo tuŵelengamo zokhuza utumiki wa Yesu na lamulo yecitwala kuli ophunzila ŵake kuti apitilizhye nchito yeciyamba. (Mat. 28:19, 20) Nsanja ya Olonda ya July 1881 yelaŵila kuti: “Yehova aliyotisankhe olo kutizoza kuti tikolondela ulemu kufumila ku ŵanthu olo kuti tilemele, koma kuti tikoseŵenzesha zilizonse zatili nazo polalikila uthenga uweme.” Kabuku kamene kefalisiwa mu 1919 kamutu wakuti: Kwa Amene Apatsidwa Ntchitoyi kefotokoza kuti: “Pali nchito ikulu yufunika kucitika, koma ni nchito ya Asikulu ndipo atipase mphamvu kuti tiikwanishe.” Tetyo, molingana na Akhristu oyambilila, akwasu aŵa motang’a mtima ezitwala pa nchito iyi, ali na cidalilo cakuti mzimu utuŵa uŵayavye kulalikila ŵanthu a mitundu yonse. Nase masiku ŵano tili na cidalilo cakuti mzimu utuŵa utiyavye.

8-9. Kansi gulu ya Yehova yaseŵenzesha njila zotyani pofuna kupitisha pasogolo nchito yolalikila?

⁸ Gulu ya Yehova yankhala yuseŵenzesha zida zamene ni zoyavya polalikila uthenga uweme. Zida izi zuyangizhyilapo mabuku opulintiwa, “Sewero ya Cilengedwe,” magalamafoni, mamotoka onkhala na vokuzhyila mau, wailesi koma soti njila zatuseŵenzesha lomba monga kompyuta na intaneti. Gulu ya Mulungu yukata soti nchito yomasulila m’vilaŵilo vinyinji kupambana kale. Ndaŵa yanji? Kuti ŵanthu a mitundu yonse akokwanisha kumvwa uthenga uweme m’cilaŵilo cao. Yehova aliye sankho niye cifukwa cake elosela kuti uthenga  uweme ukalalikiliwe “ku fuko iliyonse, cilaŵilo ciliconse na mtundu uliwonse.” (Chiv. 14:6, 7) Ofuna kuti aliyense amvwe uthenga wa Ufumu.

⁹ Nanga tyani za ŵanthu amene n’covuta kuwalalikila ku ng’anda kwao payakine cifukwa cakuti onkhala m’mang’anda otetezeka ngako? Pofuna kuyavya ŵanthu amene aŵa, gulu ya Yehova yeyamba kuseŵenzesha njila zosiyanasiyana zocitila ulaliki wapatuŵa. Mwacisanzo, mu 2001, Bungwe Yolamulila yevomelezhya akwasu na azilongosi ku France kuti akoseŵenzesha tumashelufu twamawilo na tumasitandi toikapo mabuku. Pavuli pake, m’vyalo viyakine akwasu na azilongosi eyamba kuseŵenzesha njila zamene izi ndipo penkhala zofumapo ziweme. Mu 2011 ulaliki uyu weyamba ku United States mu mzinda wa New York. M’caka camene ici, mabuku okwanila 102,129 na magazini okwanila 68,911 egaŵiliwa, ndipo ŵanthu okwanila 4,701 esenga phunzilo ya Baibo. Kulaŵila cendi, mzimu utuŵa niye weyavya pa nchito yamene iyi. Tetyo, Bungwe Yolamulila yevomelezhya kuseŵenzesha ulaliki wa tumasitandi pa calo conse.

10. Kansi tingacitenji kuti tikocita luweme pa nchito yolalikila na kuphunzisa?

¹⁰ Zamungacite. Mukoseŵenzesha zakutiphunzisa Yehova pa misonkhano Yacikhristu zokhuza kulalikila. Nthawi zonse mukoseŵenzela pamozi na kagulu kanu ka ulaliki. Akwasu na azilongosi angakuyavyeni kunkhala mlaliki koma soti mphunzisi muweme ndipo mungalimbikishiwe na cisanzo cao ciweme. Mukopitilizhya kulalikila olo kuti mukumana na mavuto. Lemba pafumila nkhani ino, yutikumbusha kuti tukwanisha kukata nchito iyi osati mwamphamvu zasu koma tuyavyiwa na mzimu utuŵa. (Zek. 4:6) Tingankhale osimikizhya kuti Mulungu atipase mphamvu zatufunikila cifukwa tukata nchito yake.

11. Kansi bungwe yolamulila ya m’vyaka 100 voyambilila yeseŵenza tyani mokatizhyana kuti inkhazikishe mtendele?

¹¹ M’vyaka 100 voyambilila. bungwe yolamulila ku Yerusalemu yeseŵenza mokatizhyana kuti inkhazikishe dongosolo na mtendele  pakati pa atumiki a Mulungu. (Mac. 2:42) Mwacisanzo, nkhani ya mdulidwe peyevuta mu 49 C.E., Bungwe Yolamulila moyavyiwa na mzimu utuŵa yelaŵizhyana nkhani yamene iyi. Kuti mpingo wepitilizhya kunkhala wogaŵikana cifukwa ca nkhani yamene iyi, sembe nchito yolalikila iliyoyende luweme. Nangu kuti enze Ayuda, atumwi aliyosonkhezelewe na miyambo ya Ciyuda. M’malomwake, edalila Mau a Mulungu na mzimu utuŵa kuti uŵayavye kupanga cigamulo. (Mac. 15:1, 2, 5-20, 28) Ko penkhala zofumapo zotyani? Yehova edalisa cosankha cao ndipo penkhala mtendele na mgwilizano cakuti nchito yolalikila yepita pasogolo.​—Mac. 15:30, 31; 16:4, 5.

12. Kansi n’cinji cuonesha kuti m’gulu ya Yehova muli mtendele na dongosolo?

¹² Masiku ŵano. Gulu ya Yehova yayavya kuti pakati pa atumiki ŵake pankhale mtendele. Magazini ya Zion’s Watch Tower and Herald of Christ’s Presence ya November 15, 1895 yenze na nkhani ya mutu wakuti “Moyenera ndi Mwadongoso,” yozikiwa pa 1 Akorinto 14:40. Nkhani iyi yefotokoza kuti: “Atumwi elemba vinthu vinyinji ku mpingo woyambilila vokhuza dongosolo. N’cinthu cofunika ngako kukonkha mosamala ‘vinthu vonse vamene velembewa kale-kale, kuti vitilangize.’” (Aro. 15:4) Masiku ŵano gulu ya Yehova yuseŵenza mwamphamvu kuti mipingo Yacikhristu inkhale yogwilizana monga ni mwezenzele m’nthawi ya Akhristu oyambilila. Mwacisanzo, ngati mwapezeka pa phunzilo ya Nsanja ya Mulonda mumpingo uyakine olo ku calo ciyakine, mungaziwe mwakusogozela na nkhani yufunika kuphunziliwa. Nthawi yamene iyo mungazimvwe kunkhala womasuka. Ni mzimu wa Mulungu tyala ungacitishe mgwilizano woteti.​—Zef. 3:9, mau a m’nyansi.

13. Molingana na Yakobo 3:17, kansi tufunika kuzikonsha makonsho otyani?

¹³ Zamungacite. Yehova ofuna kuti atumiki ŵake ‘akoyesayesa na mtima wonse kunkhala okatizhyana mwa mzimu koma soti mwamtendele.’ (Aef. 4:1-3) Tetyo, mungazikonshe kuti: ‘Kansi nulimbikisha mtendele na mgwilizano mumpingo? Ko nugonjela kuli osogolela mumpingo? Ngati nili na maudindo  mumpingo, kansi ayakine onidalila? Ko nusunga nthawi, nuyavya ndipo n’ne wofunisha kutumikila?’ (Ŵelengani Yakobo 3:17.) Ngati mwaona kuti pali payakine pamufunika kucinja, mungasenge mzimu utuŵa. Lolani kuti mzimu utuŵa ukuyavyeni kucinja umunthu wanu na vocita vanu. Mukacita tetyo, akwasu na azilongosi akokukondani ngako.

14. Molingana na Akolose 1:9, 10, kansi Yehova ephunzisa tyani atumiki ŵake m’vyaka 100 voyambilila?

¹⁴ M’vyaka 100 voyambilila. Yehova okonda kuphunzisa atumiki ŵake. (Sal. 32:8) Ofuna kuti amuziŵe, amukonde nakuti ankhale kosasila monga ŵana ŵake okondeka. Koma izi zingacitike lini ngati aliyoŵaphunzise. (Yoh. 17:3) Yehova eseŵenzesha mpingo Wacikhristu woyambilila kuti aphunzise atumiki ŵake. (Ŵelengani Akolose 1:9, 10.) Mzimu utuŵa wamene ni “mthandizi” wecilonjeza Yesu, weyavya ngako ophunzila ŵake. (Yoh. 14:16) Weŵayavya kumvwisha Mau a Mulungu ndipo weŵakumbusha vinthu vinyinji vecicita Yesu nophunzisa vamene vupezeka m’Mabuku a Uthenga Uweme. Vinthu veciphunzila Akhristu oyambilila, vetang’isha cikhulupililo na cikondi cao pa Mulungu, Mwana wake koma soti pakati pao.

15. Kansi ulosi wa pa Yesaya 2:2, 3 ukwanilishiwa tyani masiku ŵano?

¹⁵ Masiku ŵano. Yehova elosela kuti “m’masiku osilizhya” ŵanthu ofumila m’mitundu yonse akalute ku lupili yake yophiphilisila, ndipo akaphunzisiwe njila zake. (Ŵelengani Yesaya 2:2, 3.) Tuona kukwanilishiwa kwa ulosi uyu. Kulambila kwacendi kuli palulu ngako kupambana kulambila kulikonse kwawenye. Yehova ophunzisa atumiki ŵake vinthu vinyinji vokhuza Baibo. (Yes. 25:6) Oseŵenzesha “kapolo wokhulupilika na wanzelu,” potiphunzisa m’njila zosiyanasiyana. Mwacisanzo, tingaŵelenge  nomvwishila nkhani koma soti tingaonele mavidyo ya akadoli na mavidyo ayakine. (Mat. 24:45) Tukumvwa monga ni mwecimvwila Elihu shamwali wa Yobu, wamene elaŵila kuti: “Kansi ni mphunzisi muyakine wotyani angalingane na [Mulungu]?”​—Yobu 36:22.

16. Kansi mungacitenji kuti mukule mwauzimu?

¹⁶ Zamungacite. Mzimu wa Mulungu ukuyavyeni kuti mukoseŵenzesha zamuŵelenga nophunzila m’Mau a Mulungu. Mukopemphela monga ni mwecicitila wamasalimo kuti: “Nilangizeni njila yanu, mweo Yehova. Niyende m’cendi canu. Niyavyeni kunkhala na mtima wosayaŵanika kuti niyope zina yanu.” (Sal. 86:11) Tetyo, pitilizhyani kulya cakulya cauzimu cakutwala Yehova kupitila m’Mau ŵake na gulu yake. Nangu n’tetyo, colinga canu nikufuna lini tyala kuziŵa vinthu, koma nikufuna kusimikizhyila kuti zamuphunzila n’zacendi noziseŵenzesha. Mzimu wa Yehova ungakuyavyeni kucita zamene izi. Mufunika soti kulimbikisha akwasu na azilongosi. (Aheb. 10:24, 25) Ndaŵa yanji? Cifukwa ni banja yanu yauzimu. Mukosenga mzimu wa Mulungu kuti ukokuyavyani kutwala ndemanga olo kulaŵila nkhani zokata mtima pa misonkhano Yacikhristu. Mwa kucita izi, muoneshe Yehova na Mwana wake kuti mukonda “mbelele” zao zamtengo wapatali.​—Yoh. 21:15-17.

17. Mungaoneshe tyani kuti mucilikiza mokhulupilika gulu ya Yehova?

¹⁷ Lombapano, pacalo pakankhale tyala gulu ya Mulungu yamene ikosogolelewa na mzimu wake. Tetyo, mwacangu mukokatizhyana na gulu yamene iyi. Mukoonesha kuti muliye sankho mwa kulalikila uthenga uweme ku ŵanthu onse ŵamungapeze. Mukotolela cisanzo ca Yehova mwa kulimbikisha mtendele. Ndipo izi, zicitishe kuti mumpingo munkhale mgwilizano. Mukomvwishila kuli Mlangizi wanu Mkulu mwakuseŵenzesha malangizo yonse yauzimu yakutwala. Calo ca Satana pati cikoonongewa, mukacite lini wowa. M’malomwake, motang’a mtima mukankhale pakati pa gulu ya ŵanthu otumikila Yehova mokhulupilika.