1. King so Makreste ya gore ma kolobetsiwwe di nyakang ma ya mahlong ma se maka?

AYITSANO o kolobetsiwwe? Mo nkare go ka mokgonone, di fo ba lekgwaying gore ga Jehova wa mo tshepa fote wa di nyaka go bereka le mokgahlo wage. * Nnete ke gore a di nyake o lesetsa tshepo yo o nang nayo ga Jehova yi kwaritšela. Fote di nyaka o sa kamake le ka tšatši la mohlolo gore le lekgono Jehova o sa na a berekisa mokgahlo wage.

2-3. Jehova o yetetsa mokgahlo wage lekgono ka mokgo mang? Beyisa.

² Lekgono, Jehova o yetetsa mokgahlo wage ka mokgwa wa go šupetsa dilo tso a tšibegang ka tsona, tso a tikemiseleng go di maka le melawo yage. Tla re tšhuteneng ka kararo ya dilo tso Jehova a tšibegang ka tsona tsa gore di thogo bonala gabutši ga mokgahlo wage.

³ Sa mathomo, ‘Modimo aa hlawolane go ya ka mohlobo.’ (Meber. 10:34) Jehova o re nyaka ka matla, tsotsone di mo tšhofiye gore a neyele ka Morwayi wage gore go be “patela ya batho ka moka.” (1 Thim. 2:6; Joh. 3:16) Jehova o berekisa batho bage gore ba tšhomayele ditaba tsa go bafala ga batho ka mokana ga bona ba gore ba nyaka go theetsela, ke mokane ba go tlala ba thogo bona gore patela yone yi ba gelepa ka mokgo mang. Sa bobedi, Jehova ke Modimo wa go maka dilo ka letheto le wa go beba. (1 Makor. 14:33, 40) Byalo, di ra gore bo ba mo rapelang le bona ba maka dilo ka letheto le ka go beba mo ba kene ba mmerekela. Sa boraro, Jehova ke “Thitšere ye Kgolo.” (Jes. 30:20, 21) Nka taba lo mokgahlo wage wo tshwaraganneng ka go tšhutisa Lentsu lage ka phutegong le tšhomong. Dilo tsone ka ditharo di yye dya bonala ka mokgo mang ga Makreste ya  phutego ya ku botala go šupetsa gore ma yekisela dilo ka ditharo tso Jehova a tšibegang ka tsona? Ga dinako tsa gana byalo, malata ya Jehova ma yekisela mekgwa yage ka mokgo mang? Fote lekgono mo o kene o bereka le mokgahlo wa Jehova, moya wa go hlawolega wo ka go gelepa ka mokgo mang?

4. Mebereko 1:8 yi re Jeso o butsiye malata yage gore ma make ying fote o ma butsiye gore ma nyoko gelepiwa byang?

⁴ Ka dinako tsa mapostola. Molayetsa wa go tšhomayela wo Jeso ne a wo maka ke mo wo maka gore batho ka mokana ga bona ba be le tshepo. (Luk. 4:43) O yye a botsa malata yage gore ma ye mahlong ma kene ma maka mmereko wo a šeleng a wo thomme wa go tšhomayela “go segela dipolekeng tsa kgole ka matla tsa lefase.” (Bala Mebereko 1:8.) Nnete ke gore ne ma ka sa kgone go maka mmereko wo ka matšhika ya wona. Ne di nyaka ma be le moya wa go hlawolega, go leng so Jeso a ma tshepisiyeng sona gore se nyoko ma “gelepa.”—Joh. 14:26; Zak. 4:6.

5-6. Moya wa go hlawolega wo gelepiye malata ya Jeso ka mokgwa wofeng?

⁵ Ka Pentekoste ya 33 C.E., malata ya Jeso ma yye ma yamogela moya wa go hlawolega. Moya wa go hlawolega wo ma gelepiye gore ma thomise go tšhomayela, di so yi kaye batho ba go tlala ka matla ba yye ba yamogela ditaba tsa go bafala. (Meber. 2:41; 4:4) Mo malata ya Jeso ma phigisiwa, a sanka ma hlagasela mara ma yye ma kgopela Modimo gore a ma gelepe. Ma rapele ma re: “Maka gore malata yago ma ye mahlong ma bolabola lentsu lago ma šišimele.” Ma yye ma tlala ka moya wa go hlawolega ke mokane ma ya mahlong ma “bolabola lentsu la Modimo ma šišimele.”—Meber. 4:18-20, 29, 31.

⁶ Ne go sa na le tse dingwana tso malata ya Jeso ne ma gahlana natso tsa go ma ghula. Mo re beyisa, ne go se ka mokana ga wona ya ma nang le Mangwalo. Ne ma se na dithulusi tsa go tšhuta ka tsona go tshwana le ka mokgo rune re nang natso lekgono. Fote ke mo di nyaka gore malata ya Jeso ma tšhomayelele batho ba go bolabola mebolabolo ya go tlala ya mehlobohlobo. Le mo malata ya Jeso ma kene ma hlakana le tsa go ma ghula tsa mošaga wonone, ma yye ma hlula ntshitshire yone, go so fete mengwaga ya go tlala ke mo ma šele ma tšhomayele ditaba tsa go bafala ga “batho ka mokana ga bona ka tlase ga legedimo.”—Makol. 1:6, 23.

7. Mengwana ya go fela ya go teya ka ku ga 100, malata ya Jehova ma di tšibiye byang tso Modimo a di nyakang fote tsotsone ma di makamakiye byang?

⁷ Ga dinako tso tsa rune. Jehova o sa na a ya mahlong a yetetsa batho bage le go ba tiyisa. Ka matlamatla o ba yetetsa a berekisa Lentsu lage lo le ngwadiwweng le hlohletsela ke moya wage. Ka ho Baebeleng, ke mo re krayang mantsu ya Jeso a ma butsiyeng malata yage gore ma ye mahlong ka mmereko wo a šeleng a wo thomme. (Mat. 28:19, 20) Mo re boyela nthago ku ga July 1881, makazini wowa wo bolabodiye gore: “Jehova aa re bitsela, kela go re hlawolela gore batho ba re hlompe ka matla kela gore re ghanye, mara gore re berekise tso re nang natso go tšhomayela ditaba tsa go bafala.” Sepukwana so se yyeng sa ntshiwa ka 1919 sa gore To Whom the Work Is Entrusted, se yitseri: “Mmereko wowa wa makatsa mo o wo lebelele mara ke wa Morena fote ke yene a nyoko re neyang matšhika ya go wo maka.” Go fo tshwana le Makreste ya ku botala, magageru yawa ma tineyele ga mmereko wowa ma šišimele, ma sa kamake gore moya wa go hlawolega wo nyoko ma gelepa gore ma tšhomayelele batho ba mehlobo ka mokana ga yona. Le ga rune go fo ba ka mokgonone.

8-9. Mokgahlo wa Jehova wo berekisa mekgwa yifeng gore wo thogo sabalatsa ditaba tsa go bafala?

⁸ Mokgahlo wa Jehova wo berekisiye dithulusi tsa mayemo ya gedimo gore wo thogo sabalatsa ditaba tsa go bafala. Ga dithulusi tsone go na le dikgatiso tsa go phrinthiwa, “Photo-Drama of Creation,” sa go kgana lerikoti, dikoloyi tsa gore di na le mbhošongho, setiši sa wayilisi le tsa go tlala tsa thekinoloji ya dithombhe tsa dinako tsa gana byalo. Fote mokgahlo wa Modimo wo tšhela letsogo ga mmereko wa go hlatolla wa gore a sanka gwa ba  le wa go makiwa go tshwana nawo! Ke ntaba? Gore batho ba mehlobo ka mokana ga yona ba thogo kwa ditaba tsa go bafala ka mmolabolo wa bona beng. Jehova aa hlawolane, o yitseri ditaba tsa go bafala di nyoko sabalatsiwa “ga setšhaba se sengwana le se sengwana, setšo, mmolabolo le ga batho.” (Kut. 14:6, 7) Wa di nyaka gore molayetsa wa Mmušo wo kraye ke batho ka mokana ga bona.

⁹ Byalo re nyoko ba segelela byang bo ba gore ba dula ga gore a go kenege lula, ga go tshwana le ga gore go na le bomatšinghelane kela digheyiti tsa mo ba dulang di dula di khiyiwwe? Mokgahlo wa Jehova wo makiye gore go be le mekgwa ya go tšhomayela mo go tleleng batho gore wo thogo ba segelela. Mo re beyisa, ka 2001, Mogoba wa go Lawola wo dumelele magageru ya ku France gore ma tšhomayele ma berekisa dikoloyyane le tse dingwana tsa go šupetsa dikgatiso tsa rune ke mokane le magageru ga dipoleke tse dingwana ma yye ma thomisa go maka ka mokgonone. Go yye gwa ba le maphomela ya gabutši ka matla. Ka 2011, go yye gwa thomisa mokgwa wa nyuwane ku United States ga toropo ya New York ya gore go tlele batho ka matla. Mongwageng wa mathomo, go sipidisiwwe dipuku tsa go segela ga 102 129 le dimakazini tsa go segela ga 68 911. Ke mokane batho ba go teya ga 4 701 ba yye ba kgopela go tšhutisiwa Baebele! Di fo ba lekgwaying gore mmereko wone ne wo thega ke moya wa go hlawolega. Byalo Mogoba wa go Lawola wo dumelele gore go berekisiwe mokgwa wowa wa go tšhomayela lefaseng ka mokana ga lona.

10. Re ka maka ying gore re thogo lokotša matšhomayelelo ya rune?

¹⁰ So o ka se makang. Tseyela gedimo tso Jehova a re tšhutisang tsona megahlanong ya Sekreste. Dula o bereka tšhomo le mogoba wo o leng ga wona. Ba nyoko go gelepa mo o gayelang gona fote ga bona o nyoko tšhuta dilo tsa go tlala tsa go bafala. Ariye mahlong o kene o tšhomayela le mo o gahlana le tsa go go ghula. Lengwalo la hlogotaba ya rune, le re gopotsa gore re maka tso Modimo a di nyakang ka taba la moya wa go hlawolega, go seng ka matšhika ya rune. (Zak. 4:6) A re kamake gore re maka mmereko wa Modimo.

11. Mogoba wa go lawola wa dinako tsa mapostola wo berekiye ggoši ka mokgo mang gore batho ba Modimo ba dule ba maka dilo ka letheto?

¹¹ Ka dinako tsa mapostola. Mogoba wa go lawola wa ku Jerusalema ke mo wo bereka ggoši gore  dilo di sepele ka letheto le ka go beba ga batho ba Modimo. (Meber. 2:42) Mo re beyisa, gana hala ga 49 C.E. mo Makreste ma sa kwane ka taba ya go bollwa, moya wa go hlawolega wo yye wa yetetsa ba mogoba wa go lawola gore ba sa takisi taba yone maahlo. Hala phutego yi sa kwana ka taba yowa, ne go ko ba go fediye ka mmereko wa go tšhomayela. Le mo mapostola le bagolo ne go le Majuda, a sanka ba lesetsa setšo sa Majuda se ba kutšetsela kela ba kutšutsela ke bo ba kwanang naso. Mara, ba yye ba tshepela ga Lentsu la Modimo le moya wa go hlawolega gore wo ba yetetse. (Meber. 15:1, 2, 5-20, 28) Di felele kaye? Jehova o rufiye sepheto sa bona, ba dula ba bebiye fote ba le ggoši ke mokane mmereko wa go tšhomayela wa ya mahlong.—Meber. 15:30, 31; 16:4, 5.

12. King so se šupetsang gore go maka dilo ka letheto le ka go beba di tseyediwa gedimo ka mokgahlong wa Jehova lekgono?

¹² Ga dinako tso tsa rune. Mokgahlo wa Jehova wo dula wo karakara ka matla gore batho ba Jehova ba make dilo ka letheto le ka go beba. Ku nthago ka bo 1895, makazini wa Zion’s Watch Tower and Herald of Christ’s Presence wa November 15 wa gore ke mo wo na le hlogotaba ya gore “Serithi le Letheto,” ya gore yi ntshiwwe ga Makorente wa Mathomo 14:40. Hlogotaba yone yi yitseri: “Mapostola ke mo go na le tsa go tlala tso ma tshwaneleng ma di botse Kereke ga taba ya go maka dilo ka letheto . . . Di gabutši ka matla go tseyela taba yowa gedimo ka taba la gore ‘dilo ka mokana ga tsona tso di ngwadiwweng botala di ngwalediwwe gore di thogo re yetetsa.’” (Mrm. 15:4) Mokgahlo wa Jehova lekgono wo sa tseya taba ya go maka dilo ka letheto le go beba go le ye kgolo go fo tshwana le ka mokgo Makreste ya ku botala ne ma yi tseya ka gona. Mo re beyisa: Mo o ka ya mogahlanong we tšhuta Sewokamelo ga phutego ye nngwana, le mo go ka ba go le ga naga ye nngwana, o ko ba o di tšiba gore se tshwariwa byang fote ke hlogotaba yifeng yo yi tšhutiwang. Nnete ke gore o ko fo kwa pelo yo yi f’lo re kgehle! Ayitsano go ba selo ka ssoši ka mokgonone go ka kgonega mo moya wa Modimo wa go hlawolega wo se šiyo?—Zak. 3:9.

13. Ke diputsiso difeng tso re ka tiputsisang tsona re naganne ka Jakobo 3:17?

¹³ So o ka se makang. Jehova o nyaka gore batho bage ba ‘garagare ka matla ga tso tsa Modimo gore ngata ya bona yi dule yi swinegiye ba mamarelane fote ba bebiye.’ (Maef. 4:1-3) Byalo tiputsise gore: ‘Ayitsano ke maka gore ka ho phutegong re be ngata ka yyoši fote go dule go bebiye? Ayitsano ke ya  ba theetsela bo ba yetang mahlong? Nje ba bangwana ba tikokotlela ka nna ka matlamatla mo ke neyiwwe mmereko ka ho phutegong? Nje nako ke ya yi tshwara, ke ya berekega fote ke tikemisele go berekela ba bangwana?’ (Bala Jakobo 3:17.) Mo nkare di nyaka o ghobolla go gongwana, rapelela moya wa go hlawolega. Mo o ka lesetsa moya wa go hlawolega wo maka gore o tšhentšhe maphelelo yago fote wo kutšetsela ka mokgo o makang dilo ka gona, magageru ma nyoko go nyakisa tsa mohlolo fote ma nyoko go tseyela gedimo ka matla.

14. Makolosi 1:9, 10 yi re Jehova o tšhutisiye batho bage ka mokgo mang ka dinako tsa mapostola?

¹⁴ Ka dinako tsa mapostola. Jehova o di jabolela ka matla go tšhutisa batho bage. (Pis. 32:8) O nyaka gore ba mo tšibe, ba mo nyake ka matla ba boye ba phele go ya go yye go le bana bage bo a ba nyakang ka matla. Tsotsone di ka sa make mo go se ka taba la gore wa ba tšhutisa. (Joh. 17:3) Jehova o berekisiye phutego ya Makreste ya ku botala gore a tšhutise batho bage. (Bala Makolosi 1:9, 10.) Moya wa go hlawolega wo Jeso a wo tshepisiyeng gore wo ko “gelepa,” wo tšhediye letsogo ka matla. (Joh. 14:16) Moya wa go hlawolega wo gelepiye malata ya Jeso gore ma thogo kwisisa Lentsu la Modimo wa boya wa ma gelepa gore ma gopole dilo ka mokana ga tsona tso Jeso a di hlayyeng le go di maka tsa gore di ngwadiwwe ga Diebangedi. Taba yone yi yye ya tiyisa tumelo ya Makreste ya ku botala ya maka gore ga Modimo, Morwayi wage le ba bangwana ma ba nyake ka matla.

15. Ke difeng tso Jehova a di tshepisiyeng ga Jesaya 2:2, 3 tso o di bonneng di makega?

¹⁵ Ga dinako tso tsa rune. Jehova o bolabodiye botala gore “ga dinako tsa matšatši ya mong mafelelofelelong,” batho ba ditšhaba ka mokana ga tsona ba nyoko kgobakana le malata yage gore a thogo ba tšhutisa. (Bala Jesaya 2:2, 3.) Seporofeto sone re ya se bona se ya makega. Di napa di ro šupetsa gabutši gore morapelo wa mannete wo phala merapelo ka mokana ga yona ya matsaka. Ye lune, phela tsa go ja tso Modimo a re neyang tsona di tlele ka matla! (Jes. 25:6) O berekisa “lelata la go tshepega le la gore fote le hlalefiye,” gore a re  neye tsa go ja tsa go tlala le tsa mohlobohlobo tsa go tshwana le dihlogotaba, dipolabolo, dividiyo tsa dipopayi le dividiyo. (Mat. 24:45) Re tikwa go tshwana le ka mokgo monghana wa Jobo ye ba reng ke Elikgu wa gore aa pumutsa mo a re: “Ke mang thitšere ya go tshwana le [Modimo]?”—Jobo 36:22.

16. O ka maka ying gore o gole ga tso tsa Modimo?

¹⁶ So o ka se makang. Moya wa go hlawolega wa Modimo wo nyoko go gelepa gore o berekise tso o di balang le tso o di tšhutang ka Baebeleng. Le wene rapela go tshwana le mopisalema mo a re: “Barena Jehova, ntšhutise ka tsela yago. Ke nyoko sepela nneteng yago. Maka gore pelo yaka yi sa yahlogane gore ke thogo tšhaba lebitso lago.” (Pis. 86:11) Byalo ariye mahlong o kene o bala le go tšhuta Baebele le dikgatiso tse dingwana tso di lukiselelang ke Jehova a berekisa mokgahlo wage. Nnete ke gore a wa tikemisela go fo tšhuta tsa go tlala. Mara nnete yowa o nyaka go yi kokotela ho pelong o boye o yi berekise mo o sa na o phela. Moya wa go hlawolega wa Jehova wo nyoko go gelepa gore o make ka mokgonone. Fote se sengwana ke gore o nyaka go hlohletsela magageru. (Maheb. 10:24, 25) Ke ntaba? Ka taba la gore ke ba mutši wa genu ga tso tsa Modimo. Rapelela moya wa go hlawolega wa Modimo gore o bolabole tsa go tikisa pelo mo o fetola megahlanong ya Sekreste fote mo ba go neyye polabolo, o karakare gore tso o nyoko tlang o di bolabola di kwagale. Ka mokgonone o ko ba o šupetsa Jehova le Morwayi wage gore “dinku” tsage o di nyaka ka matla.—Joh. 21:15-17.

17. Ke mekgwa yifeng yo o ka šupetsang ka yona gore o thega mokgahlo wa Jehova ka go tshepega?

¹⁷ Go se botala, mokgahlo wo wo ko bang wo šele wo lawola ho lefaseng go ko ba go le wa go yetetsa ke moya wa Modimo wa go hlawolega. Byalo berekisana le mokgahlo wa Jehova ka matšato. Šupetsa gore Modimo aa hlawolane ka go sabalatsa ditaba tsa go bafala ga batho ka mokana ga bona bo o hlakanang nabo. Yekisela mokgwa wage wa go maka dilo ka letheto le go beba, ka go maka gore phutego go be ngata ka yyoši. Fote o theetsele Thitšere ye Kgolo ka go tseyela gedimo dilo ka mokana ga tsona tso yi di tšhutisang. Mo go fela ka lefase la Sathane, o ka sa tshosanye ke selo. Mara, o ko yema o sa thogathoge o na le malata ya gore ma bereka le mokgahlo wa Jehova ka go tshepega.