1. Abakristaayo ababatiziibwe baine kugumizamu nibakora ki?

OBATIZIIBWE? Ku kiraabe nikwo kiri, oyorekire muranga ngu noikiririza omuri Yehova, kandi ngu oyeteekateekire kuheereza hamwe n’ekibiina kye. * Kwonka, oine kugumizamu noohamya okwikiriza kwawe omuri Yehova. Kandi toine kurekyera aho kwombeka obwesigye bwawe omu kibiina eki Yehova arikukoresa obunaku obu.

2-3. Yehova naayebembera ata ekibiina kye obunaku obu? Ha eby’okureeberaho.

² Obunaku obu, Yehova naayebembera ekibiina kye omu muringo ogurikworeka emitwarize ye, ebigyendererwa bye, n’emitindo ye. Ka tureebe oku ekibiina kya Yehova kirikworeka emwe aha emitwarize ye eshatu.

³ Ogw’okubanza, ‘Ruhanga tarikushoroora.’ (Byak. 10:34) Yehova akahigwa rukundo ye kuhayo Omwana we nk’ekitambo “kucungura abantu boona.” (1 Tim. 2:6; Yoh. 3:16) Yehova naakoresa abantu be kubuurira amakuru marungi boona abarikuhurikiza, reero baingi nk’oku kirikubaasika bagasirwa omu kitambo. Ogwa kabiri, Yehova ni Ruhanga w’obuteeka n’obusingye. (1 Kor. 14:33, 40) N’ahabw’ekyo, abaheereza be bashemereire kumuramya nka guruupu baine obuteeka n’obusingye. Ogwa kashatu, Yehova niwe Mwegyesa Orikukirayo. (Isa. 30:20, 21) N’ahabw’ekyo, ekibiina kye nikita omutima aha kwegyesa Ekigambo kye eki yaahandiikiise, hombi omu kibiina n’omu buheereza bw’orweteeraine. Emitwarize egi eshatu eya Yehova  ekoorekwa eta butunu omu kibiina Ekikristaayo omu kyasha ky’okubanza? Abaheereza ba Yehova nibamutooreza bata obunaku obu? Kandi omwoyo gurikwera nigubaasa kukuhwera guta waaba nooheereza hamwe n’ekibiina kya Yehova obunaku obu?

4. Nk’oku kiri omu Ebyakozirwe 1:8, Yesu akagambira abakuratsi be kukora ki, kandi akabaraganisa buhwezi ki?

⁴ Omu kyasha ky’okubanza. Obutumwa obu Yesu yaabuuriire bukaba nibuha abantu boona amatsiko. (Luk. 4:43) Akagambira abakuratsi be kugumizamu omurimo ogu yaatandikire, barikubuurira okuhika omu bicweka by’ensi ebya hare. (Shoma Ebyakozirwe 1:8.) Kwonka omurimo ogu tibaragukozire ahabw’amaani gaabo. Kikaba nikiija kwetengyesa omwoyo ogurikwera, “omuhwezi” ou Yesu yaabaraganiise.​—Yoh. 14:26; Zek. 4:6.

5-6. Omwoyo gurikwera gukahwera guta abakuratsi ba Yesu?

⁵ Abakuratsi ba Yesu bakashukwaho omwoyo gurikwera aha Pentekoote, 33 Y.A.K. Barikuhwerwa omwoyo gurikwera, ahonaaho bakatandika kubuurira, kandi omu kaire kakye, enkumi n’enkumi z’abantu baikiriza amakuru marungi. (Byak. 2:41; 4:4) Ku baatandikire kuhiiganisibwa, tibaratiinire kubuurira kureka bakeesiga Ruhanga. Bakashaba nibagira bati: “Obaasise abahuuku baawe kugamba ekigambo kyawe n’obumanzi bwona.” Ekyarugiremu boona bakaijura omwoyo ogurikwera, kandi “baagamba ekigambo kya Ruhanga n’obumanzi.”​—Byak. 4:18-20, 29, 31.

⁶ Abeegi ba Yesu bakahikwaho n’oburemeezi obundi. Nk’eky’okureeberaho, ebyahandiikirwe ebikopooroirwe bikaba biri bikye. Hakaba hatariho ebitabo by’okucondoozamu nk’ebi twine hati. Kandi abeegi bakaba baine kubuurira abarikugamba endimi zitari zimwe na zimwe. Oyihireho embeera ezo ezigumire, ahabw’obweziriki bw’abo omu myaka nka 30, bakaba baabuuriire amakuru marungi omu ‘bihangirwe byona eby’ahansi y’eiguru.’​—Kol. 1:6, 23.

7. Emyaka nka 100 enyima, abaheereza ba Yehova bakamanya bata ebi Ruhanga arikubenza, kandi bakakora ki?

⁷ Omu bunaku obu. Yehova naagumizamu kwebembera abantu be n’okubaha amaani. Okukira munonga naakoresa Ekigambo kye ekihandiikisiibwe omwoyo gurikwera kutwebembera. Nimwo turikushanga ebirikukwata aha buheereza bwa Yesu, n’ekiragiro eki yaahaire abakuratsi be eky’okugumizamu nibakora omurimo ogu yaatandikire. (Mat. 28:19, 20) Okuruga nk’omu Kwamushanju 1881, magaziini egi ekagira eti: “Titutoorainwe kugira ekitiinisa n’obugaiga kureka kwehayo n’okuhayo ebyaitu, n’okubuurira amakuru marungi.” Akatabo To Whom the Work Is Entrusted, akaatairwe 1919, kakagira kati: “Omurimo gw’okukora ni muhango, kwonka n’ogwa Mukama, kandi nitwija kuguhikiiriza ahabw’amaani ge.” Eego, nk’Abakristaayo ba ira, ab’eishe-emwe aba bakakora omurimo ogu baine obumanzi, barikwesiga omwoyo gurikwera kubahwera kubuurira abantu boona. Naitwe nitugumizamu kugira obwesigye nibwo bumwe.

8-9. Ekibiina kya Yehova kikoreise miringo ki ey’okubuurira okwongyera kujanjaaza amakuru marungi?

⁸ Ekibiina kya Yehova kikoreise ebikoreso ebirikukirayo oburungi kubuzya amakuru marungi. Ebi nibitwariramu, ebitabo ebitairwe, omuzaano “Photo-Drama of Creation,” ebyoma ebiriho embazo, emotoka z’okurangiirira obutumwa, radiyo, kandi omu bunaku obu nitukoresa kompyuta na Intaneeti. Ekibiina kya Ruhanga kiriyo nikyejumbira kimwe omu murimo gw’okuvunuura ogurikukirayo omu byafaayo! Ahabw’enki? Kugira ngu abantu boona babaase kuhurira amakuru marungi omu ndimi zaabo. Yehova tarikushoroora, akaha obunabi  ngu amakuru marungi nigaija kubuurirwa omu ‘mahanga goona, n’enganda zoona, n’endimi, n’abantu.’ (Kush. 14:6, 7) Naayenda ngu amakuru marungi g’Obukama gahikye aha bantu boona.

⁹ Kandi shi abu kigumire kuhika, obundi ahabw’okutuura omu byombeko ebirinzirwe? Ahabw’okwenda kuhika abantu nk’abo, ekibiina kya Yehova kikateekateeka aha miringo mingi ey’okubuurira omu myanya y’orweteeraine. Nk’eky’okureeberaho, omu 2001, Akakiiko Akareeberezi kakaikiriza okukoresa obugaari n’ebindi eby’okutangarikaho ebitabo omuri France, kandi bwanyima n’omu myanya endiijo. Kikarugamu ebirungi. Omu 2011 hakatandikwaho entebeekanisa nsya omuri United States omu bicweka ebirikukirayo kugira abantu baingi omu rurembo New York. Omu mwaka gw’okubanza, ebitabo 102,129 na magaziini 68,911 bikagabwa. Kandi abantu 4,701 bakashaba kwegyesibwa Baibuli! Buzima, bakaba baine obushagiki bw’omwoyo gurikwera omu murimo ogu. N’ahabw’ekyo Akakiiko Akareeberezi kakacwamu ngu omu nsi yoona bakorese emiringo y’okutangarika ebitabo.

10. Nitubaasa kukora ki kwongyera kukora gye omu buheereza bwaitu?

¹⁰ Eki orikubaasa kukora. Gasirwa omu miringo ei Yehova arikututendekamu kurabira omu nteerane z’Ekikristaayo. Butoosha kora hamwe na guruupu yaawe y’okubuuriramu. Noija kushangayo ab’eishe-emwe abaraakuhwere, kwongyera kwegyesa gye kandi bakugumye barikukuteeraho eky’okureeberaho kirungi. Gumisiriza omu buheereza. Nk’oku ekyahandiikirwe kikuru ky’ekicweka eki kirikworeka, titurikwija kuhikiiriza eki Ruhanga arikwenda, ahabw’amaani gaitu, kureka ahabw’omwoyo gurikwera. (Zek. 4:6) Ahakuba, nituba nitukora omurimo gwa Ruhanga.

11. Abaabaire bari aha kakiiko akareeberezi omu kyasha ky’okubanza bakakorera bata hamwe kureetaho obuteeka omu baheereza ba Ruhanga?

¹¹ Omu kyasha ky’okubanza. Akakiiko Akareeberezi omuri Yerusaalemu kakakorera hamwe kurinda obuteeka n’obusingye bw’abaheereza ba Ruhanga. (Byak. 2:42) Nk’eky’okureeberaho, ku haimukireho enshonga  y’okushara nk’omuri 49 Y.A.K., akakiiko akareeberezi karikuhwerwa omwoyo gurikwera kakahajaana aha nshonga egyo. Ku ogire ngu ekibiina kikaguma kyebaganiisemu ahabw’enshonga egi, eki kikaba nikiija kuremesa omurimo gw’okubuurira. N’obu baraabe baabaire bari Abayudaaya, entumwa n’abareeberezi tibaraikiriize kuhabisibwa emigyenzo y’Ekiyudaaya nari abaabaire nibagishagika. Kureka, bakasherura omu Kigambo kya Ruhanga kandi baikiriza obuhwezi bw’omwoyo gurikwera. (Byak. 15:1, 2, 5-20, 28) Hakarugamu ki? Yehova akaha omugisha okucwamu kwabo, obusingye n’obumwe bwagumaho, kandi omurimo gw’okubuurira gwagumizamu.​—Byak. 15:30, 31; 16:4, 5.

12. Niki ekirikworeka ngu ekibiina kya Yehova obunaku obu kiine obuteeka n’obusingye?

¹² Omu bunaku obu. Ekibiina kya Yehova kitwire nikihwera abaheereza ba Ruhanga kugira obuteeka n’obusingye. Okuruga 1895, Zion’s Watch Tower na Herald of Christ’s Presence eza Novemba 15, zikaiziramu ekicweka ekiine omutwe ‘Bikorwe Gye Bitebeekanisiibwe,’ kuruga omu 1 Abakorinso 14:40. Ekicweka eki kikaba nikigira kiti: “Entumwa bakaba baine bingi by’okugambira ekibiina aha kikwatiraine n’obuteeka . . . N’eky’oburyo kugumizamu nitworobera ‘ebyahandiikirwe ira byona okutwegyesa’ omu bwegyendesereza.” (Rom. 15:4) Eego, ekibiina kya Yehova obunaku obu nikiteeraho kurinda obuteeka n’obusingye nk’Abakristaayo omu kyasha ky’okubanza. Teekateeka aha ky’okureeberaho eki: Waaza kwega Omunaara gw’Omurinzi omu kibiina ekindi nari omu ihanga erindi noija kuba noomanya ekicweka eki murashwijume n’oku muraakyege. Ahonaaho noija kuhurira oikaikaine! Omwoyo gurikwera nigwo gurikubaasa kutuhwera kugira obumwe obu obw’omuhendo.​—Zef. 3:9.

13. Kurugiirira ahari Yakobo 3:17, ni bibuuzo ki ebi tushemereire kwebuuza?

¹³ Eki orikubaasa kukora. Yehova naayenda ngu abantu be barinde ‘obumwe bw’omwoyo, bateerainwe omurunga gw’obusingye.’ (Efe. 4:1-3) Yebuuze oti: ‘Ninkora ebirikushagika obumwe n’obusingye omu kibiina? Ninyorobera abareeberezi omu kibiina? Abandi nibabaasa kunyesiga na munonga naaba nyine obujunaanizibwa omu kibiina? Ninkwata obwire,  nimpwera abandi, kandi nimba nyeteekateekire kuheereza?’ (Shoma Yakobo 3:17.) Waareeba ngu haine empinduka ezi orikubaasa kukora, shaba omwoyo gurikwera. Oku oraikirize omwoyo gurikwera kukuhwera kugira emitwarize mirungi n’ebikorwa birungi, nikwo ab’eishe-emwe na banyaanyazi-itwe baraayeyongyere kukukunda n’okukutwara nk’ow’omuhendo.

14. Kurugiirira aha Abakolosai 1:9, 10, Yehova akeegyesa ata abaheereza be omu kyasha ky’okubanza?

¹⁴ Omu kyasha ky’okubanza. Yehova naakundira kimwe kwegyesa abantu be. (Zab. 32:8) Naayenda ngu bamumanye, bamukunde, kandi bagumeho ebiro byona nk’abaana be. Eki tikyakubaasize kubaho kuri hatariho obwegyese obu ataireho. (Yoh. 17:3) Yehova akakoresa ekibiina Ekikristaayo omu kyasha ky’okubanza kwegyesa abantu be. (Shoma Abakolosai 1:9, 10.) “Omuhwezi” ou Yesu yaaraganiise, nigwo omwoyo gurikwera gukakora kihango kubaasisa ekyo kubaho. (Yoh. 14:16) Gukahwera abeegi kwetegyereza gye Ekigambo kya Ruhanga, kandi gwabaijutsya ebintu bingi ebi yaakozire n’ebi yaagambire, reero bwanyima byahandiikwa omu bitabo by’Engiri. Okumanya oku kukahamya okwikiriza kw’Abakristaayo aba ira, rukundo ei bainiire Ruhanga, Omwana we, na bagyenzi baabo.

15. Okuraganisa okuri omuri Isaaya 2:2, 3 kuhikiriire mu miringo ki?

¹⁵ Omu bunaku obu. Yehova akagira ngu “omu biro” by’emperu, abantu kuruga omu mahanga goona bakaba nibaija kwinamuka aha rushozi orw’akamanyiso kwegyesibwa emihanda ye. (Shoma Isaaya 2:2, 3.) Nitureeba obunabi obu buriyo nibuhikiirira. Okuramya okw’amazima kutuungwirwe kwakirira kimwe okuramya kw’ebishuba okw’emiringo yoona okutashemeire. Kandi Yehova ka naatuha eby’okurya by’omwoyo omu bwijwire! (Isa. 25:6) Kurabira omu ‘omwambari omwesigwa  kandi ow’obwengye,’ tarikubituha omu bwingi kyonka, kureka naabituha n’omu miringo mingi nk’ebihandiikirwe omu bitabo, embazo, vidiyo za katuuni, n’eza butoosha. (Mat. 24:45) Nitwehurira nk’oku Elihu munywani wa Yobu yaayehuriire, reero akagira ati: ‘N’oha orikwegyesa nka [Ruhanga]?’​—Yob. 36:22.

16. Noobaasa kukora ki kubaasa kutunguuka omu by’omwoyo?

¹⁶ Eki orikubaasa kukora. Omwoyo gurikwera niguza kukuhwera kuta omu nkora ebi orikushoma n’ebi orikwega omu Kigambo kye. Shaba nk’oku omuhandiiki wa zaaburi yaashabire, arikugira ngu Ai Yehova, ‘onyegyese omuhanda gwawe, mbone kugyendera omu mazima gaawe; teerana hamwe omutima gwangye, gubone kutiina eiziina ryawe.’ (Zab. 86:11) N’ahabw’ekyo gumizamu noogasirwa omu by’okurya by’omwoyo ebi Yehova arikutuha kurabira omu Kigambo kye n’ekibiina kye. Kwonka, ekigyendererwa kyawe tikiine kuba eky’okutunga okumanya kyonka. Amazima gashemereire kuza omu mutima gwawe, kandi okagagyenderaho. Omwoyo gurikwera nigubaasa kukuhwera kukora ekyo. Kandi oshemereire kugumya ab’eishe-emwe na banyaanyako. (Heb. 10:24, 25) Ahabw’enki? N’ahabw’okugira ngu n’eka yaawe ey’eby’omwoyo. Shaba Ruhanga kukuha omwoyo gwe kukuhwera kugarukamu kuruga aha mutima omu nteerane z’Ekikristaayo, kandi teeraho kutebeekanisa gye waaba oine ekicweka omu nteerane. Waakora otyo nooyoreka Yehova n’Omwana we ngu nookunda “entaama” zaabo.​—Yoh. 21:15-17.

17. Noobaasa kworeka ota ngu nooshagika ekibiina kya Yehova omu bwesigwa?

¹⁷ Juba, ekibiina kyonka ekirikuza kugumaho omu nsi n’ekirikwebemberwa omwoyo gwa Ruhanga ogurikwera. N’ahabw’ekyo ba omweziriki omu kukora hamwe n’ekibiina kya Yehova. Yoreka ngu torikushoroora omu abantu orikubuurira amakuru amarungi buri omwe. Tooreza Yehova orikukunda kureetaho obuteeka n’obusingye omu kibiina. Kandi yorobera Omwegyesa waawe Orikukirayo orikwikiriza kukoresa eby’okurya byona eby’omwoyo ebi arikutuha. Obwo ensi ya Sitaane yaaba neecwekyerezibwa, torikwija kutiina. Kureka, noija kwemerera oine obwesigye ori hamwe n’abarikushagika ekibiina kya Yehova omu bwesigwa.