1. E na pya Nɛɛ Kraist eliamaā ekiisī lo edoo a?

O ELIAGE maā ni? Lo a le wo, o suā kɔ o etɔgɛ o yira bu Jɛhova kɛ̄sī dɛ̄dɛɛ̄ nɛɛ le kɔ o gbī etaāŋa ye bah bu ye bɔŋanaloo. * Bu kaka, yira o ɛrɛ bu Jɛhova ɛrɛ ekiisī lo e’agaloo. E alu ebɛɛ̄ kɔ o kiisī lo edɛrɛ nyiɛ nyɔɔ kɔ Jɛhova gaa su ye bɔŋanaloo daānu anii’ee.

2-3. Bu mɛ sīdee na Jɛhova gaa zaāsī ye bɔŋanaloo anii’ee a? Naa nɛ edoba.

² Nii’ee, Jɛhova gaa zaāsī ye bɔŋanaloo bu sīdee a tɔgɛ dua nɛɛ alu, ye ekɛɛrɛ, le ye daakuu. I kɛɛrɛ nu akiiloo taa elap dogo Jɛhova i muɛ̄ bu ye bɔŋanaloo.

³ Tuatua, “Bari naa wee ɛp sī nɛɛ.” (Doonu pya Nɛɛ lɛɛratam 10:34) Wereloo bee zū Jɛhova kɔ a su ye Nwiīnɛɛdam ‘aŋana dɛ̄dɛɛ̄ nɛɛ.’ (1 Tim 2:6; Jɔn 3:16) Jɛhova gaa su pya ye nɛɛ zuema le yereue nɛ pya a gbī edā, sa gaa yerebah nɛ gbɛnɛ-edo nɛɛ kɔ ba a ɛrɛ biī aāloo lo a’agara. Eree baɛ, Jɛhova lu nɛɛ a wee para nɔɔ̄nu le Bari efɛɛloo. (1 Kɔr 14:33, 40) Nyɔɔwo, a lee e’ɛmadɛɛ̄ kɔ pya a gaa ye taāŋabah edoo wo bu efɛɛloo, le nyɔɔ etaā. Eree taa, Jɛhova ɛɛ Gbɛnɛ “Nɛɛ-tɔgɛ-nu.” (Ais 30:20, 21) Ɛɛ na anua ye bɔŋanaloo piiga lo etɔgɛ ye Muɛ̄ Ue pya dɔɔ̄na a, kere bu bɔŋanaloo ale bie taɛkɛ̄. Bu mɛ sīdee na pya Nɛɛ Kraist a bee le bu tua sɔ̄ o’oo tup zua bee tɔgɛ pya elap dogo Jɛhova ani? Bu mɛ sīdee na a gaa lu etɔgɛ bu  ilii dee ama a? E mɛ sīdee na kaɛ edɔɔ̄ edap a yerebah nɛ kuma sɔ̄ o le bu bɔŋanaloo Jɛhova anii’ee a?

4. Dookɛ̄ Doonu pya Nɛɛ lɛɛratam 1:8 kɔ doo, amunu lok na Jizɔs bee nɛ pya a wee ye nyɔɔnɛ dumɛ a, e amunu yerebah na ba e’ɛrɛ a?

⁴ Bu tua sɔ̄ o’oo tup zua. Yereue Jizɔs bee zue bee nɛ bɛābu dɛ̄dɛɛ̄ nɛɛ. (Luk 4:43) A bee nɛ lok pya a wee ye nyɔɔnɛ dumɛ kɔ ba a kiisī lo esitam a bee bɔātɛ̄, lo a le kɔ ba alu pya ye “ekeebee . . . mmɛ kuma nyɔuwe.” (Buū Doonu pya Nɛɛ lɛɛratam 1:8.) Kerewo, ba naale edap si tam ama nyɔɔ wa loo. Lu ebɛɛ̄ kɔ ba a ɛrɛ kaɛ edɔɔ̄ lo a le “nɛɛ agɛrɛ beenyiɛ” lo Jizɔs bee yira yii kumaloo a.—Jɔn 14:26; Zek 4:6.

5-6. Bu mɛ sīdee na kaɛ edɔɔ̄ bee yerebah nɛ pya a wee nyɔɔnɛ dumɛ Jizɔs a?

⁵ Pya a wee nyɔɔnɛ dumɛ Jizɔs bee ɛrɛ kaɛ edɔɔ̄ a dee Pɛntikɔst bu zua 33 C.E. Tɛ̄maloo ekpo a aaloo kaɛ edɔɔ̄ ba bee bɔātɛ̄ ezue ue, e bu nwī kere sɔ̄, gbɛnɛ-edo nɛɛ bee su lo le yereue. (Doonu pya Nɛɛ lɛɛratam 2:41; 4:4) Sɔ̄ ba bee tɛ̄ŋaloo pya a wee ye nyɔɔnɛ dumɛ, ba naa bee ɛrɛ bɔɔ sa ɔbɛ zue ue, taāwo, ba bee bara Bari kɔ a yereebah wa nɛ. Ba bee yere kara kɔ: “Doo kɔ pya o zooro a su e’agaloo kɔā o ue.” Lo sɔ̄ kaɛ edɔɔ̄ bee wa mma loo sa ba kiisī lo e “su e’agaloo kɔā ue Bari.”—Doonu pya Nɛɛ lɛɛratam 4:18-20, 29, 31.

⁶ Pya a wee nyɔɔnɛ dumɛ Jizɔs bee kpe nagesī dɔɔ̄na taāŋa. Bu edoba, gbɛnɛ-edo Kpa Kaɛ naa bee le lo sɔ̄. Lɔgɔ pya kpa a baatɛ̄ Kpa Kaɛ naa bee le dookɛ̄ i ɛrɛ doo anii’ee. E pya a wee ye nyɔɔnɛ dumɛ bee zue ue nɛ gbɛnɛ-edo pya a kɔ keekee muɛ̄ ue. Kaɛlɛɛ pya lo nu finiabah, pya a wee ye nyɔɔnɛ dumɛ ba bɛamiā ama bee doo nu a bee kɔ a naale ewaɛ edoo, ba bee zue le yereue “nɛ dɛ̄dɛɛ̄ nu a le kɛɛ̄ bunyɔɔ” bu 30 zua.—Kɔl 1:6, 23.

7. Bu nu a eeloo 100 zua akii adumɛ, pya zooro Jɛhova bee doodoo wa suā nu Bari wa gbī aābah, e e na ba bee doo a?

⁷ Bu ilii dee ama. Jɛhova kiisī lo ezaāsī pya ye nɛɛ sa wa nɛ ekpo. Gbɛnɛ-edo leredee bah ama aabu ye Muɛ̄ Ue a bee lu esu kaɛ edɔɔ̄ ɛma. Bu pya lo e’ɛma, i buū nu akiiloo esiatam Jizɔs le lok a bee nɛ pya a wee ye nyɔɔnɛ dumɛ kɔ ba a kiisī lo esitam a bee bɔātɛ̄. (Mat 28:19, 20) Bu nyɔɔnyɔɔ sɔ̄ akii adumɛ magazin a bee lu e’ɛm bu Ɛrɛba Enɔɔ̄ bu zua 1881 bee kɔ: “Naa bee lu ekue i, ale tɔ̄ i nɔɔ̄ bee lo e’ɛrɛ ka aābah nɛɛ sa ɛrɛ gbɛnɛkpo zɔ, mɛ lo esu dɛ̄dɛɛ̄ nu i ɛrɛ zuema le yereue.” Ziī kpa a kura To Whom the Work Is Entrusted a bee lu e’ɛm bu zua 1919 bee kɔ: “Bee kɔ lo tam eeloo, mɛ ɛɛ tam Nɛɛ-a-i-ɛrɛ, e tɛ̄maloo ye yerebah i gaa le si lo tam. Bu kaka, doodoo pya Nɛɛ Kraist bu bagara sɔ̄, pya wuga ama bee su e’agaloo le dɛ̄dɛɛ̄ wa ekpo siā lo tam, sa dɛrɛ nyiɛ nyɔɔ kɔ kaɛ edɔɔ̄ eyerebah wa nɛ lo edap zue ue nɛ ɛrɛgeba nɛɛ. I ɛrɛ nage lo dua dɛrɛ nyiɛ nyɔɔ anii’ee.

8-9. Pya amunu sīdee na bɔŋanaloo Jɛhova esua zuema ue a?

⁸ Bɔŋanaloo Jɛhova esua pya nutam a le kɛ̄ zuema le yereue. Pya lo nutam na pya nu alu e’ɛm, lo a le “Photo-Drama of Creation,” ekpo gāmā, fah a ɛrɛ dɔɔ̄ni, kɔ ue nyɔɔ radio, e bu ilii dee ama, kumputa le intanɛt. Bɔŋanaloo Bari gaa tap nage ue yere bu gbɛnɛ-edo muɛ̄ ue ee kɛ̄ a wee le doo! E na anua a? Nyɔnɛbee ba  gbī kɔ dɛ̄dɛɛ̄ nɛɛ a dā lo le yereue bu wa muɛ̄ ue. Jɛhova naa wee ɛp sī nɛɛ; a bee kɔ sere kɛ̄ kɔ lo le yereue gaa le lu ezue “nɛ dɛ̄dɛɛ̄ edonyɔɔ, le edo, le edɛm, le pya nɛɛ.” (Mum 14:6, 7) A gbī kɔ yereue Buɛ̄-mɛnɛ a ina loo dɛ̄dɛɛ̄ nɛɛ.

⁹ E pya nɛɛ ii dap inaloo sa zue ue nɛ nyɔnɛbee ba tɔɔ̄ kɛ̄ pya baɛloo le, ale alu eka gɔh ba le bu ni a? Lokwa a dap lu e’ina loo pya a le doo wo, bɔŋanaloo Jɛhova esua keekee sīdee zue ue taɛkɛ̄ su zuema ue. Bu edoba, bu zua 2001 a, Eku A Baɛbee bee tɛ̄ma kɔ alu esu kpe yere kpa bu kigere le dɔɔ̄na sīdee zue ue taɛkɛ̄ zuema ue li France, e sɔ̄ esaa, bee lunage edoo bie pya dɔɔ̄na kɛ̄. E le nu bee sira aabu. Bu zua 2011, bee lu ebɔātɛ̄ ziī aā nɔɔ̄nu li United States bie ziī kɛ̄ pya nɛɛ wee mma kaāna li New York. Bu tua zua lo nɔɔnɔɔnu bee bɔātɛ̄, bee lu enɛ 102,129 ekpo kpa le 68,911 pya i magazin. E 4,701 pya nɛɛ bee bara kɔ alu enyɔɔnɛe wa nɔ Baibol! Bu kaka, i muɛ̄ kɔ Jɛhova bee su ye kaɛ edɔɔ̄ yeākpotɛ̄ lo esiatam. Wo doo kɔ Eku A Baɛbee a tɛ̄ma kɔ alu esu kpe yere kpa bu kigere zuema ue bu dɛ̄dɛɛ̄ nyɔuwe.

10. E na i dap doo lo ekiisī bu i tam zue ue a?

¹⁰ Nu o dap doo. Su pya nu Jɛhova gaa a tɔgɛ bie enɔānu pya Nɛɛ Kraist daānu. Nyɔɔnɛ eku esiatam zue ue o le bu bu bɔŋanaloo si uwe zue ue dɛ̄dɛɛ̄ sɔ̄. Lo sɔ̄, o dap ɛrɛ yerebah alu ebɛɛ̄ le yere mɛm loo a aabah pya wuga le wa le edoba. Kiisī lo e’egerebu bu o esiatam. Dookɛ̄ dɔ kpa kaɛ a bɛɛ ekobee ue ama kɔ doo, i doo nu Bari gbī, naale tɛ̄maloo i ekpo, mɛ tɛ̄maloo ye kaɛ edɔɔ̄. (Zek 4:6) Kerewo, i suā kɔ Bari enɛ i ekpo nyɔnɛbee i gaa si ye tam.

11. Bu mɛ sīdee na eku a baɛbee bu tua sɔ̄ o’oo tup zua bee si tam lo edoo kɔ pya nɛɛ Bari a le bu gbaaloo a?

¹¹ Bu tua sɔ̄ o’oo tup zua. Eku a baɛbee a bee le Jerusalɛm bee gbaa si tam lokwa kuūnɛ muɛ̄ le efɛɛloo le yɛɛ pya  nɛɛ Bari. (Doonu pya Nɛɛ lɛɛratam 2:42) Bu edoba, sɔ̄ ue kooa piī bee aakɛ̄ bu zua 49 C.E. a, tɛ̄maloo yerebah a aaloo kaɛ edɔɔ̄, eku a baɛbee bee kɔnia lo ue. Lo epoo epoo bee le bu bɔŋanaloo nyɔɔbee ue ama, ba naale ebee dap si tam zue ue. Kere ba bee le pya Juu, doonu kɛnɛkɛ̄ pya Juu ale wa tɔgɛnu naa bee ɛrɛ pah nyɔɔ pya nɛɛ lɛɛratam le pya kanɛɛ. Taāwo, ba bee gbī yerebah aābu Muɛ̄ Ue Bari le ye kaɛ edɔɔ̄. (Doonu pya Nɛɛ lɛɛratam 15:1, 2, 5-20, 28) E na a bee sira aabu a? Jɛhova bee nɛ leelee wa biaɛfii, e efɛɛloo le gbaaloo bee le bu bɔŋanaloo, e tam zue ue bee kiinage sī leere.—Doonu pya Nɛɛ lɛɛratam 15:30, 31; 16:4, 5.

12. E na a tɔgɛ kɔ gbaaloo le efɛɛloo le bu bɔŋanaloo Jɛhova anii’ee a?

¹² Bu ilii dee ama. Bɔŋanaloo Jɛhova esiatam lo edoo kɔ pya ye nɛɛ a le bu efɛɛloo le gbaaloo. Aāge bu zua 1895 a, Zion’s Watch Tower le Herald of Christ’s Presence loo November 15 bee ɛrɛ ziī ekobee ue a kɔ “Kaāna Sīdee le Nyɔɔ Etaā” lo a dɛɛa nyɔɔ 1 Pya Kɔrint 14:40. Lo ekobee ue bee kɔ: “Pya nɛɛ lɛɛratam bee ɛrɛ gbɛnɛkpo nu ekɔ nɛ pya a le bu bɔŋanaloo bu bagara sɔ̄ akiiloo nɔɔ̄nu nyɔɔ etaā . . . Alu nu a kuī lo egbaɛ̄tɔ̄loo ‘pya nu a bee lu e’ɛm tua sɔ̄ nyɔɔ ilii zuurabahtɔ̄.’ ” (Rom 15:4) Bu kaka, bɔŋanaloo Jɛhova gaa piiga lo edoo kɔ efɛɛloo le gbaaloo a le bu bɔŋanaloo pya Nɛɛ Kraist anii’ee dookɛ̄ a bee le doo bu tua sɔ̄ o’oo tup zua. Bu edoba, lo o si Enɔānu Tɔ Baɛloo bie dɔɔ̄na bɔŋanaloo, ale bie dɔɔ̄na edo, o suā kɛ̄ a wee lu e’aabaloo doo le ekobee ue elu enɔ. E loo a esukɛ̄ aba lo sɔ̄! Aba edɔɔ̄ Bari na a doo kɔ lo ama a waɛ a.—Zef 3:9.

13. Sɔ̄ i kɛɛrɛbu nu a le bu kpa Jemes 3:17, pya amunu ebip na i bip aba ii a?

¹³ Nu o dap doo. Jɛhova gbī kɔ pya ye nɛɛ a “ɛrɛ taɛ lo esere gbanialoo edɔɔ̄ loo . . . bɔp efɛɛloo.” (Ɛfɛs 4:1-3) Nyɔɔwo bip aba ɔɔ kɔ: ‘M wee nyimɛge gbaaloo le efɛɛloo bu bɔŋanaloo ni? M gaa gbaɛ̄ge  tɔ̄ pya a gaa su zaāsī ni? Pya dɔɔ̄na dapge mɛ dɛɛa nyɔɔ, eetɔɔ̄ na lo m ɛrɛ dɔtam bu bɔŋanaloo ni? M wee nwaāgebah ina kɛ̄ nyɔɔ sɔ̄, yerebah, sa kpɛ̄naloo lo esitam ni?’ (Buū Jemes 3:17.) Lo o muɛ̄ kɔ a ɛrɛ kɛ̄ a lee kɔ o kwabaloo, yere kara bara kaɛ edɔɔ̄. Kɛ̄ o lɛɛbaloo kɔ a kwa o elap dogo sa ɛrɛ pah nyɔɔ o dum doo, kɛ̄ pya wuga ewere nage a loo sa a tɔgɛ nia loo doolo.

14. Dookɛ̄ Pya Kɔlɔsi 1:9, 10 kɔ doo, mɛ sīdee na Jɛhova bee tɔgɛnu pya ye nɛɛ bu tua sɔ̄ o’oo tup zua a?

¹⁴ Bu tua sɔ̄ o’oo tup zua. Wee nia Jɛhova ekpɔā pya ye nɛɛ. (Yɔɔ 32:8) A gbī kɔ ba a suā ye loo, ye wereloo, sa tɔɔ̄dum mmɛ deedee doodoo pya ye miɔŋɔ a wereloo. Lɔgɔ nu ama naale ebee waɛ lo a naa bee le ye tɔgɛnu. (Jɔn 17:3) Jɛhova bee tɔgɛ nu pya ye nɛɛ bu tua sɔ̄ o’oo tup zua tɛ̄maloo ye bɔŋanaloo. (Buū Pya Kɔlɔsi 1:9, 10.) Kaɛ edɔɔ̄ lo a le “nɛɛ agɛrɛ beenyiɛ” Jizɔs bee yira yii kumaloo a, bee wa yere nage bah nɛ. (Jɔn 14:16) A bee yerebah nɛ pya a wee ye nyɔɔnɛ dumɛ kɔ ba a dābeeloo Muɛ̄ Ue Bari, sa doo kɔ ba a nyɛŋiabu pya nu Jizɔs bee kɔ sa doo, lo a bee ɛm sere kɛ̄ bu Kpa Le Yereue. Lo suānu bee agɛrɛtɛ̄ yira pya Nɛɛ Kraist bu bagara sɔ̄ le wereloo ba bee ɛrɛ loo Bari le ye Nwiīnɛɛdam, le kiiloo ɛnia aba.

15. Bu pya amunu sīdee na o muɛ̄ kɔ Jɛhova edora gbɔmɛɛ̄ ye yii a le bu kpa Aisaia 2:2, 3 a?

¹⁵ Bu ilii dee ama. Jɛhova bee kɔ sere kɛ̄ kɔ bu “dee kpɛdumɛ,” pya nɛɛ bu yube nyɔuwe gaa le lu nyɔɔ ye kpokɛ̄ kaɛ a tɔɔ̄dɔ nu lokwa a wa tɔgɛ dɛ̄dɛɛ̄ ye dee. (Buū Aisaia 2:2, 3.) I gaa muɛ̄ kɛ̄ lo mɔmanudɛɛ̄ gaa dooa gbɔmɛɛ̄ doo.  I emɔna kɔ kaka taāŋabah ekira nyɔɔ ee ekwɔ sīdee taāŋabah. Naa ɛp gbɛnɛ-edo nuede bu edɔɔ̄ Jɛhova enɛā i a! (Ais 25:6) Tɛ̄maloo “zooro a bɔloo eture nyiɛ loo sa suā nu,” Jɛhova gaa i nɛ gbɛnɛkpo kpa, aāloo pya kpa alu e’ɛm le ekɔaue, gbaāloo vidio pya miɔŋɔ le vidio pya gbɛnɛ nɛɛ. (Mat 24:45) A tɔɔ̄ i loo dookɛ̄ a bee tɔɔ̄loo Elihu alu gbo Job doo, lo a bee kɔ: “Mɛɛ̄ na a tɔgɛnu doodoo [Bari] a?”—Job 36:22.

16. E na o doo lo ekiisī leere bu edɔɔ̄ a?

¹⁶ Nu o dap doo. Edɔɔ̄ Bari eyerebah a nɛ kɔ o su pya nu o buū sa nɔ aābu ye Muɛ̄ Ue yere bu dogo. Yere kara bara dookɛ̄ nɛɛ uɛ le-yɔɔ bee doo sɔ̄ a bee kɔ: “Tɔgɛ mɛ oloo dee, Aa Jɛhova, lokwa m kiā bu oloo kaka ue, gba na beenyiɛ nua ziī lo e’ɛrɛ bɔɔ loo oloo bee.” (Yɔɔ 86:11) Nyɔɔwo, kiisī lo ede nuede bu edɔɔ̄ lo Jɛhova gaa nɛ tɛ̄maloo ye Muɛ̄ Ue le ye bɔŋanaloo. Nu o seea sī naale aba lo e’ɛrɛ suānu. Mɛ lo eyiga lo kaka ue, sa su yerebu dogo. Edɔɔ̄ Jɛhova dap a yerebah nɛ kɔ o doowo. O sunage yeābah nɛ pya o wuga nɛɛdam le nɛɛwa. (Hib 10:24, 25) E na anua a? Nyɔnɛbee ba nuūna pya o butɔ bu edɔɔ̄. Yere kara bara kaɛ edɔɔ̄ Bari kɔ a yerebah a nɛ lo e’agara ebip le kɔ o doo leere sɔ̄ o ɛrɛ nu edoo bie enɔānu. Bu lo sīdee, o tɔgɛ Jɛhova le ye Nwiīnɛɛdam kɔ o wereeloo wa gbo “naana pee.”—Jɔn 21:15-17.

17. Bu mɛ sīdee na o tɔgɛ kɔ o yereekpotɛ̄ bɔŋanaloo Jɛhova a?

¹⁷ Sɔ̄ sɔ̄ naa binia, aba bɔŋanaloo ebia a nyɔɔ kɛnɛkɛ̄ na lo kaɛ edɔɔ̄ Bari gaa baɛloo. Nyɔɔwo, gbabeebah bɔŋanaloo Jɛhova. Tɔgɛ kɔ o wereeloo pya nɛɛ dookɛ̄ Jɛhova doo tɛ̄maloo ezue le yereue nɛ dɛ̄dɛɛ̄ pya nɛɛ o zɔŋia. Nɔ kɛ̄ a wereloo efɛɛloo le gbaaloo doo tɛ̄maloo enyimɛ gbaaloo bu bɔŋanaloo. Gbaɛ̄tɔ̄loo o Gbɛnɛ Nɛɛ Nɛ Zuurabahtɔ̄ tɛ̄maloo enɔnu aāloo dɛ̄dɛɛ̄ nuede bu edɔɔ̄ a gaa nɛ. Lo sɔ̄, oo le e’ɛrɛ bɔɔ sɔ̄ nyɔuwe Setan e’ina kuma. Taāwo, o su e’agaloo tɔ̄ma yɛɛ pya a tɔɔ̄ agara nɛ bɔŋanaloo Jɛhova.