1. Antoy nepeg ya tuloytuloy ya gawaen na saray bautismadon Kristiano?

KASIN bautismado ka la? No on, impaamtam la ed saray totoo ya talagan walay pananisiam ed si Jehova tan labay moy manlingkor ed sikato bilang kabiangan na organisasyon * to. Siempre, kaukolan moy mansagpot pian tuloytuloy ya ombiskeg so pananisiam ed si Jehova tan say panagmatalek mo ya uusaren to so organisasyon to pian nasumpal so gagala to.

2-3. Anto ran kualidad nen Jehova so sankapatnagan ed pangidadaulo to ed organisasyon to natan? Mangiter na alimbawa.

² Sankanengneng ed pangidadaulo nen Jehova ed organisasyon to natan so personalidad to, gagala to, tan saray prinsipyo to. Amtaen tayo so taloran kualidad nen Jehova ya sankapatnagan ed pangidadaulo to ed organisasyon to.

³ Unona, “anggapoy lalabien na Dios.” (Gawa 10:34) Lapud inar-aro nen Jehova iray totoo, inter to so Anak to bilang “dondon parad amin.” (1 Tim. 2:6; Juan 3:16) Igaganggan nen Jehova iray lingkor to ya ipulong so maong a balita ed amin a malabay ya ondengel, ta labay to ya anggad nayari et dakel so minabang ed dondon. Komadua, si Jehova et organisado tan “Dios na kareenan.” (1 Cor. 14:33, 40) Kanian nailaloan tayo ya saray manlilingkor ed sikato et organisado tan mareen ya totoo. Komatlo, si Jehova so “Makapadinayew a Managbangat.” (Isa. 30:20, 21) Kanian mansasagpot so organisasyon to natan pian ibangat so Salita to, balanglan diad kongregasyon odino diad  panagpulong a kimey. Panon ya apatnagan irayan taloran kualidad nen Jehova diad Kristianon kongregasyon nen inmunan siglo? Tan panon ya napatnagan iratan ed organisasyon to natan? Panon kan natulongan na masanton espiritu legan kan manlilingkor ed si Jehova bilang kabiangan na organisasyon to?

4. Base ed Gawa 1:8, antoy ingganggan nen Jesus ed saray papatumbok to, tan panon to ran tulongan?

⁴ Nen inmunan siglo. Say mensahe ya impulong nen Jesus et angiter na ilalo ed amin ya totoo. (Luc. 4:43) Ingganggan to ray papatumbok to ya itultuloy da so kimey ya inggapo to, ya manpulong ira “diad sankaarawian a pasen na dalin.” (Basaen so Gawa 1:8.) Siempre, agda itan nagawaan diad sarili da labat ya biskeg. Kaukolan day masanton espiritu​—“say mananulong” ya insipan nen Jesus ed sikara.​—Juan 14:26; Zac. 4:6

5-6. Panon ya tinulongan na masanton espiritu iray papatumbok nen Jesus?

⁵ Akaawat na masanton espiritu iray papatumbok nen Jesus nen Pentecostes 33 C.E. Diad tulong na masanton espiritu, inggapo dan tampol so manpulong, tan kalabas labat na pigaran agew et nilibo la so angawat ed maong a balita. (Gawa 2:41; 4:4) Nen wala ray sinmumpa ed pampupulong da, ag-ira tinmakot, noagta kinerew day tulong na Dios. Oniay impikasi ra: “Ikdan mo komon na pakpel iray ariripen mo pian nitultuloy min niyabawag so salitam.” Kayari dan nampikasi, “napno ran amin na masanton espiritu tan makmakpel dan inyabawag so salita na Dios.”​—Gawa 4:18-20, 29, 31.

⁶ Wala ni arum ya subok ed saray disipulo nen Jesus. Pigpigara labat so kopya na Kasulatan tan anggapo ni ray publikasyon a makatulong ed panagbangat da, aliwan singa natan. Tan nandurumay lenguahe na totoon pinulongan na saray disipulo. Balet anggano wala iratan ya subok, agawaan na sarayan maseseg a disipulo so singa imposiblin gawaen​—diad loob labat na pigaran dekada, nipulong da la so maong a balita “ed amin a pinalsa diad silong na tawen.”​—Col. 1:6, 23.

7. Panon ya naamtaan na saray lingkor nen Jehova masulok ya 100 taon lay apalabas ya kaukolan day manpulong, tan antoy ginawa ra?

⁷ Diad panaon tayo. Tuloytuloy ya idadaulo tan papabiskegen nen Jehova iray totoo to. Igigiya to ra panamegley na Biblia, ya pinuyanan na masanton espiritu to. Ditan et nabasa tayo so nipaakar ed ministeryo nen Jesus tan say ganggan to ya ituloy na saray papatumbok to so kimey ya panagpulong. (Mat. 28:19, 20) Diad isyu na Hulyo 1881 ya The Watchtower et onia lay nabasa: “Tinawag tan nilanaan itayo nen Jehova, aliwan pian idayew itayo na arum tan manpayaman, noagta pian gawaen tayoy anggaay nayarian tayo ya ipulong so maong a balita.” Diad booklet ya To Whom the Work Is Entrusted ya ni-publish nen 1919 et oniay nabasa: “Talagan balbaleg iyan kimey, balet lapud kimey iya na Katawan, nagawaan tayo iya diad biskeg ya iter tod sikatayo.” On, singa saray Kristiano nen inmunan siglo, makulikuli tan makmakpel ya impulong na sarayan agagi so maong a balita ed amin a klase na totoo lapud matalek ira ya tulongan ira na masanton espiritu. Singa sarayan agagi, matalek tayo met ya tulongan itayo na masanton espiritu natan.

8-9. Anto ran paraan so uusaren na organisasyon nen Jehova pian lalon onlaknab so panagpulong a kimey?

⁸ Nanduruman paraan so uusaren na organisasyon nen Jehova pian ipulong so maong a balita. Nan-imprinta ira na saray publikasyon, impabantay da so “Photo-Drama of Creation,” angusar ira na portable ya sound player, de-trumpa ya luluganan, wala ray programa ed radyo, tan diad agano ni labat et uusaren tayo met la so computer tan Internet pian ipulong so maong a balita. Saray publikasyon tayo et ipapatalos ed dakel a lenguahe! Akin? Pian naamtaan na amin a klase na totoo so maong a  balita diad mismon lenguahe da. Anggapoy lalabien nen Jehova; impropesiya to la ya say maong a balita et nipulong “diad kada nasyon tan tribu tan lenguahe tan rasa.” (Apo. 14:6, 7) Labay to ya narengelan na amin so mensahe na Panarian.

⁹ Panon tayo balet ya napulongan iramay totoon agtayo makakaonla ed abung da, singa saramay manaayam ed guardiado iran apartment? Pian napulongan ira, angiyuksoy so organisasyon nen Jehova na nanduruman paraan na public witnessing. Singa bilang nen 2001, inaprobaan na Mananguley ya Ulop so pangusar na saray literature cart tan literature display diad France, tan ag-abayag et dia met lad arum ya bansa. Balibali iray resulta. Nen 2011, insali ed United States so sakey a paraan na public witnessing diad matoo ya lugar ed New York City. Diad inmunan taon, say nipalima da et 102,129 ya libro tan 68,911 ya magasin. Tan 4,701 ya totoo so nan-request na panangiyaral na Biblia! Malinlinew ya tinulongan ira na masanton espiritu. Lapud satan et inaprobaan na Mananguley ya Ulop so pangusar na literature display ed interon mundo.

10. Panon tayon napaaligwas so panagpulong tayo?

¹⁰ No antoy nepeg mon gawaen. Diad saray aral tayo et ipapasal itayo nen Jehova ya manpulong. Usar mo iray nanaaralan mo ditan. Lanang kan manpulong kaiba na saray kagrupom pian natulongan da ka ed saray kaukolan mo nin paaligwasen tan napaseseg ka ed alimbawa ra. Itultuloy moy manpulong anggano mairap so situasyon. Singa ipapanonot na pinagkateman teksto na sayan artikulo, nagawaan tayo so linawa na Dios aliwan diad pakayari tayo, noagta diad tulong na masanton espiritu. (Zac. 4:6) Tandaan tayo ya kimey iya na Dios.

11. Antoy ginawa na mananguley ya ulop nen inmunan siglo pian mansiansian organisado tan nankakasakey iray totoo na Dios?

¹¹ Nen inmunan siglo. Nankimey ya nankakasakey so mananguley ya ulop diad Jerusalem pian mansiansian organisado tan nankakasakey iray totoo na Dios. (Gawa 2:42) Singa bilang, nen linmesa so isyu nipaakar ed panagsegat nen manga 49 C.E., nantotongtong so mananguley ya ulop tan nampaigiya ira ed  masanton espiritu. Kaukolan ya naresolbe iyan isyu, ta no andi et naderal so pankakasakey na kongregasyon tan posiblin ontunda so kimey ya panagpulong. Anggano Judio iray apostol tan saray mamatatken, ag-ira nampaimpluensya ed tradisyon na saray Judio tan ed saray totoo ya mangibabangat ed satan. Imbes, inaral dan maong no antoy ibabaga na Salita na Dios tan nampaigiya ira ed masanton espiritu. (Gawa 15:1, 2, 5-20, 28) Antoy resulta? Benendisyonan nen Jehova so desisyon da, nansiansia so kareenan tan pankakasakey, tan agtinmunda so kimey ya panagpulong.​—Gawa 15:30, 31; 16:4, 5.

12. Antoy pakapatnagan ya walay uksoy tan kareenan ed organisasyon nen Jehova natan?

¹² Diad panaon tayo. Mansasagpot met so organisasyon nen Jehova natan pian mansiansian organisado tan nankakasakey iray totoo nen Jehova. Nen 1895 et wala lay artikulon pinmaway ed Nobyembre 15 ya Zion’s Watch Tower and Herald of Christ’s Presence ya say title to et “Masimpit tan Mauksoy,” ya akabase ed 1 Corinto 14:40. Oniay nabasa ed satan ya artikulo: “Dakel so insulat na saray apostol ed saray kongregasyon nensaman nipaakar ed inkauksoy . . . Maabig no itultuloy tayon unoren so ‘amin ya insulat nensaman ta insulat iratan pian nibangat itayo.’” (Roma 15:4) On, anggad natan et walay uksoy tan kareenan ed organisasyon nen Jehova, singa saray Kristiano nen inmunan siglo. Pian napruebaan itan, isip mo pa: No onatendi ka na Panagaral na Panag-bantayan diad arum ya kongregasyon​—anggan diad arum ya bansa ni ingen—​antam no panon so panaral ed satan tan no anton artikulo so aralen. Kanian agka nababaingan tan naliknam ya welcome ka! Wala kasi ontan ya pankakasakey no anggapoy tulong na masanton espiritu na Dios?​—Sof. 3:9.

13. Pian niyaplika tayo so Santiago 3:17, anto ray itepet tayo ed sarili tayo?

¹³ No antoy nepeg mon gawaen. Labay nen Jehova ya ‘pansiansiaen na saray totoo to so pankakasakey ed espiritu tan manbilay ira a walaay kareenan.’ (Efe. 4:1-3) Kanian tepetan moy sarilim: ‘Kasin ontutulong ak pian mansiansiay pankakasakey tan kareenan ed kongregasyon? Kasin uunoren ko ray mangidadaulo? Kasin nailaloan ak, lalo la no wala ray  responsabilidad ko ed kongregasyon? Kasin onsasabi ak ed dugan oras, ontutulong ak ed saray kimey, tan labalabay kon serbian iray agagi?’ (Basaen so Santiago 3:17.) No bilang ta nanengneng mo ya wala ni ray papaaligwasen mo, ipikasim ed si Jehova ya ikdan to ka na masanton espiritu to. No manpaigiya ka ed satan pian nauman moy ugalim tan saray kagagawam, mas aroen tan pablien ka na saray agagi.

14. Base ed Colosas 1:9, 10, panon ya imbangat nen Jehova iray totoo to nen inmunan siglo?

¹⁴ Nen inmunan siglo. Labalabay nen Jehova ya bangatan iray totoo to. (Sal. 32:8) Labay to ya sikatoy nakabat da, aroen da, tan manbilay ira na andi-anggaan bilang inad-aro ton ananak. Ag-iratan nagawa no agto ra ibangat. (Juan 17:3) Inusar nen Jehova so Kristianon kongregasyon nen inmunan siglo pian ibangat iray totoo to. (Basaen so Colosas 1:9, 10.) Inusar to met so masanton espiritu​—say “mananulong” ya insipan nen Jesus ya awaten na saray disipulo to. (Juan 14:16) Atan so tinmulong ed saray disipulo pian mas natalosan da so Salita na Dios. Tan atan met so angipanonot ed sikara ed dakel ya imbaga tan ginawa nen Jesus, kanian nisulat da itan ed saray Ebanghelyo. Lapud impangibangat nen Jehova ed saray Kristiano nen inmunan siglo, binmiskeg so pananisia ra, lalo dan naar-aro so Dios tan say Anak to, tan lalo dan naar-aro so sakey tan sakey.

15. Parad sika, akin et nibagan susumpalen la nen Jehova imay sipan to ya nabasad Isaias 2:2, 3?

¹⁵ Diad panaon tayo. Impasakbay la nen Jehova ya diad “kasampotan a parte na saray agew,” saray totoo ya manlapu ed amin ya bansa et ondagsa ed palandey to tan ibangat to ra ed saray dalan to. (Basaen so Isaias 2:2, 3.) Nasusumpal la itan ya propesiya natan. Say dugan panagdayew et niyatagey tan nidumaduma no ikompara ed amin a klase na palson panagdayew. Tan talagan espiritual ya ponsia so ipaparaan nen Jehova! (Isa. 25:6) Diad panamegley na “matoor tan makabat ya aripen,” tataryaan to itayo na dakdakel tan nanduruman  espiritual ya naakan​—wala ray artikulo, paliwawa, digital animation, tan video. (Mat. 24:45) Kanian nalilikna tayo imay alikna na kaaro nen Job ya si Elihu ya say kuanto: “Wala tay managbangat a singa [say Dios]?”​—Job 36:22.

16. Anto ray nepeg mon gawaen pian ombiskeg so espiritualidad mo?

¹⁶ No antoy nepeg mon gawaen. Tulongan ka na masanton espiritu pian niyaplikam iray nababasam tan nanaaralan mo ed Salita na Dios. Kerew moy tulong nen Jehova ya singa ginawa na salmista sanen impikasi to: “Ibangat mo pad siak so dalan mo, O Jehova. Manakar ak unong ed katuaan mo. Iyapasakey mo pay pusok ya ontakot ed ngaran mo.” (Sal. 86:11) Kanian itultuloy mo labat ya basaen tan aralen so Biblia tan saray publikasyon ya itatarya na organisasyon nen Jehova. Balet siempre, gawaen mo itan aliwan pian naaruman labat so antam. Labay mon onsabi ed pusom so katuaan tan niyaplikam itan ed bilay mo. Tulongan ka na espiritu nen Jehova pian nagawaan mo itan. Tan labay mo met ya pasesegen iray agagi. (Heb. 10:24, 25) Akin ey? On ta sikara so espiritual ya pamilyam. Kerew mo sirin so tulong na masanton espiritu na Dios pian makapankomento ka ed saray aral tan nagawaan moy sankaabigan mo no walay partem. No gawaen mo iratan, ipapanengneng mo ed si Jehova tan ed Anak to ya inar-arom iray ‘karnero’ da.​—Juan 21:15-17.

17. Panon mon nipanengneng ya matoor mon susuportaan so organisasyon nen Jehova?

¹⁷ Onsabi panaon ya say nakera labat ya organisasyon diad dalin et say organisasyon na Dios ya igigiya to panamegley na espiritu to. Asingsingger lan nagawa itan, kanian gawam so anggaay nayarian mo ya mikimeyan ed organisasyon nen Jehova. Ipanengneng mo ya aaligen moy panangaro nen Jehova diad pangipulong mo ed maong a balita diad amin a klase na totoo. Alig moy Aman Jehova, say Dios na kareenan tan uksoy​—mitulongan ka pian mansiansia so pankakasakey ed kongregasyon. Tan dengel ka ed Makapadinayew a Managbangat tayo diad pangan mo ed espiritual ya ponsia ya itatarya to. No gawaen mo iratan, anggapoy nepeg mon takotan no manampot la iyan mundo nen Satanas. Imbes, makapanpakpel ka kaiba iray matoor ya agagi ed organisasyon nen Jehova.