1. Kiko kristian batisá mester sigui hasi?

BO TA batisá? Si ta asina, bo a demostrá públikamente ku bo tin fe den Yehova i ku bo ke sirbié huntu ku su organisashon. * Ta klaru ku bo mester sigui fortalesé bo fe den Yehova. Ademas, bo mester sigui konvensé bo mes ku Yehova ta usa su organisashon pa kumpli ku su boluntat.

2-3. Ki karakterístika di Yehova nos por mira den su organisashon? Duna algun ehèmpel.

² Nos ta mira Yehova su personalidat, propósito i norma moral den e manera ku Yehova ta guia su organisashon. Laga nos analisá tres di Yehova su karakterístikanan ku nos por mira den su organisashon.

³ Promé, “Dios no ta hasi distinshon di persona.” (Echo. 10:34) Amor a motivá Yehova p’e duna su Yu komo “reskate . . . pa tur hende.” (1 Tim. 2:6; Huan 3:16) Yehova ta usa su pueblo pa prediká e bon notisia na tur hende ku ke skucha. Di e manera ei, e ta yuda mas tantu hende posibel benefisiá di e reskate. Di dos, Yehova ta un Dios di òrdu i pas. (1 Kor. 14:33, 40) P’esei, nos por ferwagt ku su pueblo ta sirbié na un manera ordená i pasífiko. Di tres, Yehova ta e mihó Siñadó. (Isa. 30:20, 21) Pues, su organisashon ta enfoká riba siña hende Su Palabra inspirá, tantu den kongregashon komo den sirbishi. Kon e rumannan den kongregashon di promé siglo a imitá e tres karakterístikanan ei di Yehova? Kon Yehova su pueblo ta  imitá e karakterístikanan ei den nos tempu? I kon spiritu santu por yuda nos segun ku nos ta sirbi huntu ku Yehova su organisashon awe?

4. Na Echonan 1:8, kiko Hesus a bisa su siguidónan pa hasi, i ki yudansa nan lo a haña?

⁴ Den promé siglo. E mensahe ku Hesus a prediká a duna henter humanidat speransa. (Luk. 4:43) El a bisa su siguidónan pa sigui ku e trabou ku el a kuminsá kuné, esta, pa prediká “te na e parti mas leu di tera.” (Lesa Echonan 1:8.) Klaru ku nan lo no por a hasi e trabou ei riba nan mes forsa. Nan lo tabatin mester di spiritu santu, esta, “e ayudante” ku Hesus a primintí nan.—Huan 14:26; Zak. 4:6.

5-6. Den ki manera spiritu santu a yuda Hesus su disipelnan?

⁵ Na Pentekòste di aña 33, Hesus su disipelnan a haña spiritu santu. Ku yudansa di e spiritu ei, mesora nan a kuminsá prediká, i den un periodo kòrtiku míles di hende a aseptá e bon notisia. (Echo. 2:41; 4:4) Ora persekushon a kuminsá, nan no a kobardiá i stòp di prediká. En bes di esei, nan a pidi Dios yudansa. Nan a resa: “Laga bo esklabonan sigui deklará bo palabra ku kurashi.” E ora ei, nan a yena ku spiritu santu i a sigui “deklará e palabra di Dios ku kurashi.”—Echo. 4:18-20, 29, 31.

⁶ Pero, Hesus su disipelnan tabatin otro difikultat tambe. Por ehèmpel, no tabatin hopi kopia di e Skritura ni no tabatin literatura ku a splika Beibel manera nos tin awe. Anto, e disipelnan zeloso ei mester a prediká na hende ku a papia diferente idioma. Apesar di tur e difikultatnan ei, nan a hasi algu ku a parse imposibel: den mas o ménos 30 aña, nan a prediká e bon notisia “na henter e kreashon bou di shelu.”—Kol. 1:6, 23.

7. Kon Yehova su sirbidónan tabata sa mas ku 100 aña pasá kiko Dios tabata ferwagt di nan, i kiko nan a hasi?

⁷ Den nos tempu. Yehova ta sigui guia su pueblo i duna nan forsa pa hasi su boluntat. E guia ei ta bini prinsipalmente mediante Dios su Palabra inspirá. Den Beibel, nos ta lesa di Hesus su sirbishi i su mandamentu pa su disipelnan sigui ku e trabou ku el a kuminsá kuné. (Mat. 28:19, 20) For di yüli 1881, e revista akí a bisa: “Yehova no a skohe nos pa nos haña onor òf bira riku, pero pa nos usa tur loke nos tin pa prediká e bon notisia.” Un foyeto publiká na 1919 titulá Pa Esnan Ku A Ser Enkargá ku e Trabou di Prediká a bisa: ‘Aunke e trabou nos dilanti por parse algu imposibel pa kumpli kuné, ku yudansa di Señor nos lo hasié pasobra ta Señor su trabou.’ Sí, meskos ku e kristiannan di promé siglo, e rumannan ei tabatin kurashi i a traha masha duru pasobra nan tabatin konfiansa ku spiritu santu lo a yuda nan prediká na tur sorto di hende. Nos tin e mesun konfiansa ei.

8-9. Ki método Yehova su organisashon a usa pa plama e bon notisia?

⁸ Pa plama e bon notisia, Yehova su organisashon ta usa e mihó hèrmèntnan disponibel. Entre nan tin publikashon imprimí, “Foto-Drama di Kreashon,” tokadisko, outo ku loutspiker, transmishon di radio i mas resien kòmpiuter i Internet. Ademas, Dios su organisashon ta tradusí informashon na mas tantu idioma ku nunka promé. Dikon? Pa tur sorto  di hende skucha e bon notisia na nan mes idioma. Yehova no ta hasi distinshon di persona; el a profetisá ku e bon notisia lo ser prediká “na tur nashon, tribu, idioma i pueblo.” (Rev. 14:6, 7) E ke pa tur hende skucha e mensahe di Reino.

⁹ Pero, kiko awor di hende ku nos no por prediká fásilmente na nan debí ku nan ta biba den edifisio ku tin hopi siguridat? Pa por alkansá mas di e hendenan ei, Yehova su organisashon a usa diferente método di prediká públikamente. Por ehèmpel na 2001, Kuerpo Gobernante a aprobá pa nos rumannan na Fransia kuminsá usa garoshi di literatura i otro stènt di literatura. Despues, e rumannan na otro pais tambe a kuminsá usa e mesun método ei. E resultadonan tabata fenomenal! Na 2011, un programa nobo a kuminsá na Merka den un di e zonanan mas drùk di New York City. Den e promé aña, e rumannan a laga 102.129 buki i 68.911 revista. Anto 4.701 hende a pidi estudio di Beibel! Ta bisto ku Yehova tabata usando su spiritu santu pa apoyá e trabou ei. P’esei, Kuerpo Gobernante a aprobá pa nos rumannan rònt mundu usa garoshi òf stènt di literatura.

10. Kiko nos por hasi pa mehorá nos sirbishi?

¹⁰ Loke bo por hasi. Usa e entrenamentu ku Yehova ta duna bo na reunion. Prediká regularmente ku bo grupo di sirbishi. E rumannan por yuda bo mehorá den prediká i siña hende, i nan por animá bo pa medio di nan bon ehèmpel. Perseverá den sirbishi. Manera nos teksto sentral ta rekordá nos, nos ta kumpli ku e boluntat di Dios no riba nos mes forsa pero pa medio di spiritu santu. (Zak. 4:6) Al fin i al kabo, ta Dios su trabou nos ta hasiendo.

11. Kon kuerpo gobernante di promé siglo a traha huntu pa mantené òrdu i pas meimei di Dios su pueblo?

¹¹ Den promé siglo. Kuerpo gobernante na Herúsalèm a traha huntu pa mantené òrdu i pas meimei di Dios su pueblo. (Echo. 2:42) Por ehèmpel rònt di aña 49,  a surgi un desakuerdo tokante sirkunsishon den e kongregashon kristian. Pues, kuerpo gobernante bou di guia di spiritu santu a analisá e asuntu. Si e kongregashon a keda dividí enkuanto e asuntu ei, nan lo no por a sigui prediká ku éksito. Aunke e apòstel- i ansianonan tabata hudiu, nan no a laga nan mes ser influensiá pa tradishon hudiu ni pa esnan ku ta promov’é. Mas bien, nan a buska guia di Dios su Palabra i spiritu santu. (Echo. 15:1, 2, 5-20, 28) Kiko tabata e resultado? Yehova a bendishoná nan desishon, e kongregashon a keda pasífiko i uní i e trabou di prediká a sigui.—Echo. 15:30, 31; 16:4, 5.

12. Dikon nos por bisa ku den Yehova su organisashon tin òrdu i pas?

¹² Den nos tempu. Yehova su organisashon a traha duru pa mantené òrdu i pas meimei di Yehova su pueblo. Toren di Vigilansia di Sion i Anunsiadó di e Presensia di Kristu di 15 di novèmber 1895 tabatin un artíkulo titulá “Desente i na un Manera Ordená” ku tabata basá riba 1 Korintionan 14:40. Den e artíkulo tabatin skirbí: “E apòstelnan tabatin hopi konseho pa duna e kongregashon di promé siglo tokante òrdu . . . Ta importante pa obedesé kuidadosamente ‘tur loke a ser skirbí anteriormente pa nos instrukshon.’” (Rom. 15:4) Yehova su organisashon awe ta traha masha duru pa mantené òrdu i pas den kongregashon meskos ku tabata e kaso den promé siglo. Por ehèmpel, si bo bishitá un otro kongregashon òf un otro pais i asistí na Estudio di Toren di Vigilansia, lo bo sa kon e estudio ei lo ser dirigí i ki artíkulo lo ser studiá. Mesora lo bo sinti bo na kas! Solamente Dios su spiritu santu por logra un union asina!—Sof. 3:9.

13. Teniendo Santiago 3:17 na mente, ki pregunta nos mester hasi nos mes?

¹³ Loke bo por hasi. Yehova ke pa su pueblo “mantené e union di spiritu den e vínkulo di pas.” (Efe. 4:1-3) P’esei, puntra bo mes: ‘Mi ta promové union i  pas den kongregashon? Mi ta obedesé e rumannan ku ta guia e kongregashon? Otro ruman por stèns riba mi, foral si mi tin responsabilidat den kongregashon? Mi ta puntual i ta kla pa yuda?’ (Lesa Santiago 3:17.) Si bo mira ku bo por mehorá den algun manera, pidi Yehova pa spiritu santu. Mas bo permitié moldia bo personalidat i influensiá loke bo ta hasi, mas bo rumannan lo stima bo i balorá bo.

14. Di akuerdo ku Kolosensenan 1:9 i 10, kiko e kristiannan di promé siglo tabatin mester, i kon Yehova a perkurá esei pa nan?

¹⁴ Den promé siglo. Yehova gusta siña hende. (Sal. 32:8) E ke pa nan konos’é, stim’é i biba pa semper komo su yunan stimá. Tur esei ta posibel solamente ku e siñansa ku e ta duna nos. (Huan 17:3) Yehova a usa e kongregashon di promé siglo pa siña su pueblo. (Lesa Kolosensenan 1:9, 10.) Spiritu santu—e “ayudante” ku Hesus a primintí—tambe a yuda e disipelnan. (Huan 14:16) Spiritu santu a yuda nan komprondé Dios su Palabra i kòrda hopi kos ku Hesus a bisa i hasi. Nan a skirbi hopi di e detayenan ei despues den Evangelio. E konosementu ei a fortalesé nan fe i a fortalesé e amor ku nan tabatin pa Dios, su Yu i nan rumannan.

15. Den ki manera bo a mira Yehova kumpli ku su promesa di Isaías 2:2 i 3?

¹⁵ Den nos tempu. Yehova a profetisá ku den e lastu parti di “e último dianan,” hende di tur nashon lo basha bai na su “seru,” esta, nan lo djòin su berdadero adoradónan. (Lesa Isaías 2:2, 3.) Nos ta mira ku e profesia ei ta kumpliendo. Adorashon berdadero ta mas mihó ku  kualke otro tipo di adorashon falsu. I ki un bankete spiritual Yehova ta dunando nos! (Isa. 25:6) Pa medio di “e esklabo fiel i prudente,” e ta duna nos un abundansia i un variedat inkreibel di artíkulo, diskurso i diferente vidio. (Mat. 24:45) Nos ta sinti meskos ku Yòb su amigu Eliú, kende a bisa: “Ken ta un siñadó manera [Dios]?”—Yòb 36:22.

16. Kiko bo por hasi si bo ke benefisiá di loke Yehova ta siña bo?

¹⁶ Loke bo por hasi. Dios su spiritu santu lo yuda bo apliká loke bo ta lesa i studia den e palabra di Dios. Pidi Yehova meskos ku e salmista: “Siña mi bo kaminda, o SEÑOR; lo mi kana den bo bèrdat; uni mi kurason pa teme bo nòmber.” (Sal. 86:11) Pues, sigui hasi esfuerso pa lesa i studia Beibel i otro publikashon ku Yehova su organisashon ta proveé. Ta klaru ku bo meta no ta pa djis haña konosementu. Bo ke konvensé bo mes di e bèrdat i aplik’é den bo bida. Yehova su spiritu santu por yuda bo hasi esei. Ademas, bo ke animá bo rumannan. (Heb. 10:24, 25) Dikon? Pasobra nan ta bo famia spiritual. Pidi Yehova pa su spiritu santu yuda bo duna komentario sinsero na reunion i pa bo hasi bo esfuerso ora bo tin parti. Di e maneranan ei, bo ta demostrá Yehova i su Yu ku bo ta stima nan “lamchinan” balioso.—Huan 21:15-17.

17. Den ki manera bo por demostrá ku bo ta apoyá Yehova su organisashon fielmente?

¹⁷ Pronto, e úniko organisashon ku lo keda riba tera ta esun guiá pa Dios su spiritu santu. P’esei, hasi esfuerso pa kooperá ku Yehova su organisashon. Demostrá ku bo ta stima tur hende meskos ku Dios ta stima nan i prediká na tur hende ku bo topa. Imitá Dios su amor pa òrdu i pas i promové union den kongregashon. Anto, skucha e mihó Siñadó i usa tur informashon ku e ta duna nos. E ora ei, lo bo no tin miedu ora Satanas su mundu yega na su fin. En bes di esei, lo bo tin kurashi i lo bo ta entre esnan ku fielmente ta sirbi huntu ku Yehova su organisashon.