1. Ngera kirir a remla metecholb el Kristiano el meruul?

KAU ke mla metecholb? A leuaisei, e ke mla ochotii a klaumerang er kau er a Jehovah me a urungulem el soam el mesiou el teloi er a cheldebechelel. * Nguaisei, me ngkirel a klaumerang er kau er a Jehovah el melemolem el mukeroul. E kirem el melemolem el melisiich er a klaumerang er kau el kmo a Jehovah a ousbech er a cheldebechelel er chelecha el taem.

2-3. Ngoeak a ngera el rolel e a Jehovah a omekrael er a cheldebechelel er chelecha el taem? Mosaod a bebil er a olechotel.

² Chelecha el taem, e a Jehovah a omekrael er a cheldebechelel el mo olecholt a blekerdelel, moktek er ngii, me a omellach er ngii el kirel a ungil me a mekngit. Me bo dosaod a edei er a blekerdelel a Jehovah el mocholt er a cheldebechelel.

³ A kot, “a Dios a diak longetukel rar chad.” (Rel. 10:34, BT) A bltikerreng a ultbechii me ngodersii a Ngelekel el mo “olbatel ra rokuil chad.” (1 Ti. 2:6, BT; Jn. 3:16) A Jehovah a ousbech er a rechedal el mo omerk er a ungil chais el mora rokui el sorir lorrenges, me bo el sebechir a rebetok el mo ngmai a klungiolir er a olubet. A ongerung, a Jehovah a Dios er a chelderoder el tekoi me a budech. (1 Ko. 14:33, 40) Me kede mengerechir el kmo, a remengull er ngii a mesiou er ngii el ngar er a chelderoder e budech el rolel. A ongedei, a Jehovah a “Ngarbab el Sensei.” (Isa. 30:20, NW, 21) Sei a uchul me a cheldebechelel a meringel el oureor el olisechakl er a mlukreng el Tekingel, el ngar er a ongdibel me a buai. Ngmekera aika el edei el blekerdelel a Jehovah e mlocholt er a ongdibel er a Rekristiano er a irechar? Ngmekera e mocholt er chelecha el taem? E mekera chedaol reng a lengesukau el mesiou el teloi er a cheldebechelel a Jehovah er chelecha el taem?

4. Ngua lolekoi a Rellir 1:8, e a Jesus ngdilu er a rultirakl er ngii el mo mekerang, e ngera el ngeso a bo lenguu?

⁴ Sera taem er a Rekristiano er a irechar. A klumech el lulemerk er ngii a Jesus a milsterir a rokui el chad a omelatk. (Lk. 4:43) Ngdilu er a rultirakl er ngii me lemelemii a ureor el lebiluchelii e bo el sioning el mora “bek el beluu er a beluulchad.” (Monguiu er a Rellir 1:8.) Nguaisei, engdi ngdiak el sebechel di klisichir e kutmeklii tia el ureor. Te ousbech er a chedaol reng, el “Ngikel Olengeseu” el Jesus a tilbir el mo omesterir.​—Jn. 14:26; Sek. 4:6.

5-6. Ngoeak a ngera el rolel e a chedaol reng a ullengeseu er a rultirakl er a Jesus?

⁵ A rultirakl er a Jesus a ngiluu a chedaol reng er a Pentekost 33 C.E. Ngokiu a ngelseuil tia el chedaol reng, e te di mle mereched el mo omerk er a klumech, e di mle chelsel a kedeb el taem, e a rebetok el telael a kilengei er a ungil chais. (Rel. 2:41; 4:4) Sera leduubech odechelakl e a redisaiplo a dimlak lebecherei dakt me longitechut er tir te bai mlora Jehovah el kirel a ngeso. Te milluluuch el kmo: “Beskemam a re mesiungem a blekeu el mengedecheduch a tekingem.” Me te meltuchel er a chedaol reng e di millemolem el “diak le medakt el omerk a tekingel a Dios.”​—Rel. 4:18-20, 29, 31.

⁶ Me nguaisei, te dirrek el mlo chelebangel a kuk bebil omelsemai. El ua tiang, ngdimlak lebetok a iluil babier el mle llechukl a bades er ngii. E dimlak er tir aika el babilenged lolengeseu er kid el mesuub er a Biblia. Ngmle kirir el omerk er a klumech el mora rechad el melekoi a betok el kakerous el omelekoi. Malta te mlo chelebangel omelsemai engdi a chelsel a bekord el okedei el rak e ngmle sebechir el kutmeklii a tekoi el ngar osengir a redi chad e ngdiak el sebechel meketmokl. Te mirrekii a ungil chais el mora “re bek el chad er a beluulchad.”​—Kol. 1:6, 23.

7. Te milekera remesiungel a Jehovah e medengei aike el soal a bo loruul er a kuk betok er a 100 el rak er a mla me mong? E ngera te mirruul?

⁷ Chelecha el taem. A Jehovah a melemolem el omekrael e melisiich er a rechedal. A oumesingd el ulekrael er a Jehovah el dolai a mengai er a mlukreng el Tekingel. Ngar er a Biblia, e kede menguiu el kirel a omesiungel a Jesus me a omengelechel er ngii el kmo a rultirakl er ngii lemelemii a ureor el lebiluchelii. (Mt. 28:19, 20) Sera July 1881, e tia el babier el Ongkerongel a dilu el kmo: “Kid a dimlak demokedong me a lechub e demengilt el mo melai a chetengakl e dongudel a kerruul e kede bai mengoit a udoud me a taem el mo omerk er a ungil chais.” A booklet el To Whom the Work Is Entrusted el tilobed er a 1919 a kmo: “A ureor a ua lesal kmal klou engdi tia urerel a Rubak me ngoeak a klisichel e kede mo kutmeklii.” Me ngdi ua Rekristiano er a irechar, tirka el odam a uleba blekeu e mle meringel el oureor, el ulterekokl a rengrir el kmo a chedaol reng a mo ngosuterir el omerk el mora rekakerous el chad. Kede oba osisiu el ulterekokl el reng er chelecha el taem.

8-9. Ngera el tekoi a bla lousbech a cheldebechelel a Jehovah el mo omerk er a ungil chais?

⁸ A cheldebechelel a Jehovah a mla ousbech aike el kot el ungil dongu el mo omerk er a ungil chais. Aika el dongu a uldimukl er a mla motobed el babier, “Photo-Drama of Creation,” karmobol, mlai el ngar ngii a spika er bebul, prokuram er a razio, me chelecha el taem e ng computer me a Internet. A cheldebechelel a Dios a dirrek el meruul er a kot el klou el ureor er a oliuid el ngar ngii! E ngera uchul? Me bo el sebechir a rokui el chad el rongesii a ungil chais el ngar er a omelekingir. A Jehovah a diak longetukel, me ngulemlaoch el kmo a ungil chais a mo oberk el mora “bek el bedengir a re chad, ma kebliil, ma omelekoi, ma beluu.” (Och. 14:6, 7) Ngsoal a klumech er a Renged a bo el sebechir a rokui el chad el rongesii.

 ⁹ Engdi ngkuk mekera tirke el meringel er kid a mo er tir e le ngar ngii a security me a lechub e ng gate er a blirir? A cheldebechelel a Jehovah a millatk er a reuaisei el chad me te mlo omuchel el ousbech a kakerous el rolel a dousioning er a buai. El ua tiang, sera 2001, e a Chelechad er a Ruungerachel a kilengei er a usbechel a cart me a lmuut el bebil er a rolel a dolecholt a babilenged el ngar er a France, e a uriul e ngngar er a bebil er a beluu. Tia mlo uchul a ungil tekoi. Sera 2011 e a beches el prokuram a ulemuchel er a Merikel el ngar er a ta er kot el mechesang el basio er a New York City. Sel kot el rak el lurruul er tiang, e te rirous a 102,129 el babier me a 68,911 el magazine. Me a re 4,701 el chad a ullengit a omesubel a Biblia! Me ngbleketakl el kmo a chedaol reng a olengeseu er tia el ureor. Me a Chelechad er a Ruungerachel a kilengei er a usbechel a kakerous el rolel a dolecholt a babilenged er a beluulechad el rokir.

10. Ngera sebeched el meruul el olengeriakl er a rolel a doruul er a omesiunged?

¹⁰ Aike el sebechem el meruul. Mousbech a osisechakl el mngai er a miting er a Rekristiano. Bo blechoel el oureor el obengkel a group er kau er a odingel. A rudam me a rudos el ngar er a group er kau a sebechir el ngosukau el lmuut el mo meduch el oldingel e olisechakl e smisichau loeak a ungil kerebai er tir. Molemolem el omerk er a klumech alta ke mo chelebangel a ringel. Ngdi ua lomeklatk er ngii a bades el mesaod er tia el suobel, ngsebeched el kutmeklii a soal a Dios lokiu a chedaol reng er ngii, el diak lokiu a klisiched. (Sek. 4:6) E le kid a meruul er a urerel a Dios.

11. Ngmilekera chelechad er a ruungerachel e dmak el oureor me bo el chelderoder a tekoi lurruul a rechedal a Dios er a temir a Rekristiano er a irechar?

¹¹ Sera taem er a Rekristiano er a irechar. A chelechad er a ruungerachel a dilak el oureor me bo el chelderoder a tekoi el lurruul a rechedal a Dios e lengar ngii a budech. (Rel. 2:42) El ua tiang, sera ledubech a mondai el kirel a botk er a 49 C.E., e a chelechad er a ruungerachel, el ngar cheungel a ulekrael er a chedaol reng a milsaod er tia el tekoi. A lsekum a ongdibel a mle kakerous a uldesuir el kirel tia el tekoi, e ngmle sebechel mo meringel er tir el oldingel.  Me alta te mle chad er a Judea, engdi a rechapostol me a remechuodel a dimlak lemechetikaik er a siukang er a Rechijudea me a lechub e ngtirke el mle mesisiich el oldubech er tia el tekoi. Te bai mle ultuil er a Tekingel a Dios me a chedaol reng er ngii el kirel a ulekrael. (Rel. 15:1, 2, 5-20, 28) Me ngera mlo rsel? A Jehovah a ulemekngeltengat er a tekoi el lengileltii, e a ongdibel a millemolem el budech e ngar er a kltarreng, me a ureor er a berkel a klumech a di millemolem.​—Rel. 15:30, 31; 16:4, 5.

12. Ngera ochotii el kmo ngchelderoder a tekoi el loruul e ngar ngii a budech er a cheldebechelel a Jehovah er chelecha el taem?

¹² Chelecha el taem. A cheldebechelel a Jehovah a mla ngosuterir a rechedal me bo el chelderoder a tekoi el loruul e lengar ngii a budech. Sera 1895, e a Zion’s Watch Tower and Herald of Christ’s Presence er a November 15 a mla er ngii a suobel er ngii el kmo “Decently and in Order,” el mengai er a 1 Korinth 14:40. Tia el suobel a dilu el kmo: “A rechapostol a mle betok a omesodir el mora Ikelesia er a irechar el kirel a bo el chelderoder a tekoi . . . Me ngklou a ultutelel a dolemolem el oltirakl aike el ‘tekoi el dimla meluches el kirel chosisechakl el mer kid.’” (Rom 15:4, BT) Nguaisei, a osisiu el uldasu el kirel a bo el chelderoder a tekoi e lengar ngii a budech el mlocholt er a Rekristiano er a irechar a mocholt er a cheldebechelel a Jehovah er chelecha el taem. El ua tiang: A lsekum ke mlora Omesubel a Ongkerongel er a ongdibel el ngar er a ta er a beluu, e ke medengelii a rolel a loruul er ngii me a suobel el bo mosuub er ngii. Me ke di mereched el mo ungil a rengum! Ngdi chedaol reng er a Dios a sebechel kutmeklii a chouaitia el kltarreng!​—Sef. 3:9, NW, ftn.

13. A dolebedebek er a Jakobus 3:17, BT e ngera el ker a sebeched el oker?

¹³ Aike el sebechem el meruul. A Jehovah a soal a rechedal a bo el ‘omtebechel er a kltarreng el loliukes er ngii a Chedaol Reng el okiu a budech el merenged el oldak er kid.’ (Efe. 4:1-3) Me di lekau el oker: ‘Ngak ak melisiich er a kltarreng me a budech er a ongdibel? Ak ullengesenges er tirke el omekrael? Ngsebechir a rechad el ultuil er ngak, el ileakl a lsekum e ngar ngii a ngerechelek er a ongdibel? A kulab a taem, e soak el olengeseu, e kongei el mesiou?’  (Monguiu er a Jakobus 3:17, BT.) * A lsekum ke mesa el kmo ngar ngii a sebechem loureor er ngii, e moluluuch lolengit er a chedaol reng. Sel bo blechoel el mecherei me ngomekrael a blekerdelem me a omerellem, e a rudam me a rudos a mengal mo betik a rengrir er kau e mo mengreos er kau.

14. A doltirakl er a Kolose 1:9, 10, e ngmilekera Jehovah e olisechakl er a rechedal er a taem er a Rekristiano er a irechar?

¹⁴ Sera taem er a Rekristiano er a irechar. A Jehovah a kmal soal lolisechakl er a rechedal. (Psa. 32:8) Ngsoal a bo lodengelii, e lebetik a rengrir er ngii, e bo lekiei el mo cherechar el betik er a rengul ngelekel. Aika sebechel meketmokl loeak a osisechakl el dengai er ngii. (Jn. 17:3) A Jehovah a uluusbech er a ongdibel er a Rekristiano er a irechar el mo olisechakl er a rechedal. (Monguiu er a Kolose 1:9, 10.) A chedaol reng el “Ngikel Olengeseu” el letilbir a Jesus el omesterir a mla er ngii a klou el lerellii. (Jn. 14:16) Ngilsuterir a redisaiplo el mo ungil medengelii a Tekingel a Dios e mo lmatk aike el rokui el lurruul me a lullekoi a Jesus, el mle sebechir el chemuiu er a uriul el ngar er a Ebangkelio. Tia el klemedengei a silsichii a klaumerang me a bltkil a rengrir el mora Dios, me a Ngelekel, me a ta me a tang.

15. Ngoeak a ngera el rolel e ke mla mesa Jehovah loltaut er a telbilel el ngar er a Isaia 2:2, 3?

¹⁵ Chelecha el taem. A Jehovah a ulemlaoch el kmo “a ngar medad el sils,” e a rechad er a bek el renged a mora rois er ngii el mo mosisechakl er a rolel. (Monguiu er a Isaia 2:2, 3.) Kede mesa otutel tia el ulaoch er chelechang. Kede mesa el kmo a mera el omengull a lmuut el kmal ungil er a ngii di el klsuul el omengull. A Jehovah a mla meskid a mur er a tekoi er a klereng! (Isa. 25:6) Ngokiu a “blak a rengul e mellomes a rengul el mesiou” e ngdiak di lomeskid a klou el  ildois e ngdirrek el meskid a betok el kakerous el bedengel a suobel, cheldecheduch, cartoon, me a video. (Mt. 24:45) Kede di ua uldesuel a sechelil a Job el Elihu el dilu el kmo: “Ngtecha el sensei a uai [a Dios]?”​—Job 36:22, NW.

16. Ngera sebechem el meruul me mukeroul er a tekoi er a klereng?

¹⁶ Aike el sebechem el meruul. A chedaol reng er a Dios a mo ngosukau el oltaut aike el tekoi el mchuiu e msuub er a Tekingel. Moluluuch el uai ngike el milluches er a psalm el dilu el kmo: “Mosisecheklak er a rolem e RUBAK, me bo kurael er a klemerang er kau, mrellii a renguk el mo meluu er a ngklem.” (Psa. 86:11) Me bo molemolem el melai a kall er a klereng el lomeskau a Jehovah lokiu a Tekingel me a cheldebechelel. Nguaisei, engdi a turrekong er kau a diak di molechel a klemedengei er kau, ngsoam el mo ulterekokl a rengum er a klemerang e mo oltaut er ngii. A chedaol reng er a Jehovah a sebechel ngosukau el mo meruul el uaisei. Ngdirrek el soam el melisiich er a rudam me a rudos er kau. (Heb. 10:24, 25) E ngera uchul? E le te chedal a telungalek er kau er a klereng. Moluluuch me a chedaol reng er a Dios lengesukau el mo onger el mera el ngar er a rengum er aike el miting er a Rekristiano e bo er a tkurrebab el sebechem el kutmokl a part er kau er a miting. Ngoeak aika el rolel e ke ochotii el mora Jehovah me a Ngelekel el kmo ngbetik a rengum er a mekreos el “sib” er tir.​—Jn. 21:15-17.

17. Ngoeak a ngera el rolel e ke ochotii el kmo ngblak a rengum el olengeseu er a cheldebechelel a Jehovah?

¹⁷ Ngdi kmedung, e a di ta el cheldebechel el mo medechel er tia el chutem a sel lomekrael er ngii a chedaol reng er a Dios. Me bo el blak a rengum el oureor el obengkel a cheldebechelel a Jehovah. Molecholt er a uldesuel a Dios el diak longetukel er a rechad lokiu sel momerk er a klumech el mora rokui el chad. Moltirakl er a bltkil a rengul el kirel a chelderoder el tekoi me a budech lokiu sel molisiich er a kltarreng er a ongdibel. E morrenges er a Ngarbab el Sensei lokiu sel mousbech a rokui el tekoi el lomeskid el ngar er a mur er a klereng. Me sel bo lemokngemed a beluulechad er a Satan, e ngdiak bo medakt. Ke bai mo oba blekeu e dechor el obengterir tirke el rokui el blak a rengrir el mesiou el teloi er a cheldebechelel a Jehovah.