1. Aun waut mott eena no de Doop schaufen?

BEST du aul jedeept? Dan hast du bie diene Doop ver aundre bewäsen, daut du nu aun Jehova jleefst un daut du am met siene Organisazion * toop deenen west. Oba dien Gloowen mott noch emma jrata woaren. Un du motst uk emma dolla doaropp vetruen, daut Jehova siene Organisazion vondoag dän Dach sienen Wellen deit.

2-3. Woo leit Jehova vondoag dän Dach siene Organisazion? Jeff Biespels.

² Aun daut, woo Jehova vondoag dän Dach siene Organisazion leit, es daut to seenen, woo hee es un waut hee sikj väajenomen haft un waut hee fa rajcht un orrajcht talt. Well wie mol dree von Jehova siene Ieejenschoften seenen, waut wie uk en siene Organisazion beoobachten kjennen.

³ Daut ieeschte es, “daut Gott . . . kjeen Unjascheet moakt” (Apj. 10:34). Ut Leew jeef Jehova sienen Sän “aus Leesjelt fa aule” (1. Tim. 2:6; Joh. 3:16). Jehova well, daut siene Deena aulem de goode Norecht brinjen, waut doa wellen toohorchen. Un opp dee Wajch kjemt daut Leesjelt soo väl Menschen aus mäajlich togood. Daut tweede es, daut Jehova opp Ordnunk un opp Fräd helt (1. Kor. 14:33, 40). Doawäajen saul daut mank siene Deena uk ordentlich un frädlich sennen. Daut dredde es, daut Jehova de “groota Liera” es (Jes. 30:20, NW; 30:21). Doawäajen schauft siene Organisazion  uk doaropp, de Menschen sien Wuat to lieren, biejlikj en de Toopkomes un em Deenst. Woo wieren dise dree Sachen bie de Christen en de Aposteltiet to beoobachten? Un woo es daut en onse Tiet? Un woo kaun de heilja Jeist ons halpen met Jehova siene Organisazion tooptoschaufen?

4. Waut fa een Jeboot jeef Jesus siene Nofolja en Aposteljeschicht 1:8, un waut vonne Help wudden dee kjrieen?

⁴ En de Aposteltiet. Daut, waut Jesus prädijd, jeef aule Menschen Hopninj (Luk. 4:43). Hee säd, daut siene Nofolja dautselwje Woakj “äwa de gaunze Welt” doonen sullen (läs Aposteljeschicht 1:8). Oba dee wudden daut nich ut sikj selfst doonen kjennen. Dee brukten dän heiljen Jeist. Daut wia “de Treesta”, ooda Helpa, waut Jesus an vesproaken haud (Joh. 14:26; Sach. 4:6).

5-6. Woo holp de heilja Jeist Jesus siene Nofolja?

⁵ Pinjsten aune 33 kjrieejen Jesus siene Nofolja dän heiljen Jeist. Dee fungen fuaz aun to prädjen un boolt neemen dusende de Woarheit aun (Apj. 2:41; 4:4). Un aus daut Jäajenstaunt jeef, leeten de Jinja sikj nich engrulen. Dee fruagen Gott no Help un bäden: “Jeff diene Kjnajchts, daut see brow dien Wuat prädjen.” Dan jeef Gott an dän heiljen Jeist un see “prädijden brow Gott sien Wuat” (Apj. 4:18-20, 29, 31).

⁶ Oba Jesus siene Jinja hauden noch aundre Schwierichkjeiten. To jane Tiet kunn biejlikj nich jieda eena siene ieejne Schreft haben. Dee hauden uk nich Bieekja, waut de Schreft utläden, soo aus wie vondoag dän Dach haben. Un de Jinja sullen uk opp väl veschiedne Sproaken prädjen. Daut sach soo, daut dee daut nich wudden kjennen. Oba dise flietje Jinja deeden en ojjefäa 30 Joa “aule Menschen unja däm Himmel” de goode Norecht prädjen (Kol. 1:6, 23).

7. Waut wisten Jehova siene Deena aul äwa 100 Joa trigj, un waut deeden dee?

⁷ En onse Tiet. Jehova deit siene Deena noch emma leiden un stoakjen. Hee leit dee mieeschtens derch sien Wuat. Doa sajcht daut, woo Jesus prädjen deed un daut siene Nofolja met dit Woakj wiedamoaken sullen (Mat. 28:19-20). En Juli 1881 säd daut aul em Wacht-Turm: “Wie sent nich utjewält ooda enjesaulft toom Iea kjrieen ooda toom rikj woaren, oba toom ons gaunz un goa hanjäwen un de goode Norecht prädjen.” Un en daut Heft Wem das Werk anvertraut ist säd daut aune 1919: “Doa es sea väl to doonen. Oba daut es dän Harn sien Woakj un hee woat ons de needje Krauft jäwen.” Dise Breeda wieren krakjt soo aus de Christen en de Aposteltiet. Dee jinjen mootich aun daut Woakj naun un vetruden doaropp, daut de heilja Jeist an halpen wudd, aule Sorten Menschen to prädjen. Un wie denkjen krakjt soo aus dee.

8-9. Waut haft Jehova siene Organisazion jebrukt, om de goode Norecht bekaunttomoaken?

⁸ Jehova siene Organisazion brukt daut baste Jereetschoft, waut et jeft, om de goode Norecht bekaunttomoaken. Dee haben jedrekjte Bieekja jebrukt un uk daut “Photo-Drama der Schöpfung”, Gramafoons, Lautspieker-Foatieja, Rädio-Programs un en de lotre Tiet uk Komputasch un daut Internet. Un daut jeft sest kjeenem, waut opp soo väl Sproaken äwasaten deit aus Gott siene Organisazion! Wuarom doonen dee daut? Daut aule Menschen opp äare Sproak von de goode Norecht hieren kjennen. Jehova moakt kjeenen Unjascheet manke Menschen. Un hee säd verut, daut “aule Menschen von aule Velkja, Raussen, Stam un Sproaken” de goode Norecht  wudd jeprädicht woaren (Opb. 14:6-7). Hee well, daut aule von sien Kjennichrikj hieren kjennen.

⁹ Oba woo kjenn wie dee prädjen, waut en soone vesechade Hiesa wonen, wua eena nich biekjemt? Jehova holp siene Organisazion, veschiednet uttofinjen toom effentlich prädjen, om uk soone Menschen Zeichnis to jäwen. Biejlikj aune 2001 jeef de Väastaunt de Breeda en Frankreich de Frieheit met Bieekjakrotasch un met aundret effentlich to prädjen. Lota deeden se daut uk en aundre Lenda un daut kjeem sea goot ut. Un aune 2011 fungen dee en de Stäts, en New York City, waut nieet ut toom doa prädijden, wua sea väl Menschen wieren. En daut ieeschte Joa jeewen dee 102 129 Bieekja un 68 911 Tietschreften wajch. Un 4 701 fruagen no een Bibelstudium! Daut wia gaunz kloa, daut de heilja Jeist doa metschauft. Doawäajen jeef de Väastaunt dan Frieheit, daut de Breeda dän Bieekjakrota un aundret oppe gaunze Welt brucken kunnen toom effentlich Zeichnis jäwen.

10. Waut kjenn wie doonen, om ons em Deenst to vebätren?

¹⁰ Waut wie doonen kjennen. Nutz daut ut, wan Jehova ons bie de Toopkomes lieet, woo wie prädjen kjennen. Go räajelmässich met diene Deenstgrupp toop prädjen. De Breeda un Sestren doa kjennen die halpen, die em Deenst to vebätren, un jäwen die Moot derch äa goodet Biespel. Hia nich opp to prädjen. Soo aus de Teemavarsch sajcht, kjenn wie Gott sienen Wellen nich ut onse ieejne Krauft doonen, oba bloos derch sienen heiljen Jeist (Sach. 4:6). Jehova woat ons halpen, wäajen daut sien Woakj es.

11. Woo schauft de Väastaunt ieeschtemma veeent doaropp, daut doa Fräd un Ordnunk en de Vesaumlunk wia?

¹¹ En de Aposteltiet. De Breeda en Jerusalem, waut to jane Tiet de Väastaunt wieren, schauften veeent doaropp, daut doa Ordnunk un Fräd wia mank Gott siene Deena (Apj. 2:42). Rom daut Joa 49 wieren  väle sikj doaräwa oneenich, aus Christen sikj musten beschnieden loten ooda nich. Doawäajen unjastunt de Väastaunt sikj dise Sach met de Help von dän heiljen Jeist. Wan dee dise Sach nich hauden oppem kloaren jebrocht, dan wudd daut Prädichtwoakj nich sennen soo fein veraunjekomen. De Apostel un elre Mana en Jerusalem wieren Juden un doch kjikjten dee dolla no Gott sien Wuat un no sienen heiljen Jeist aus no de judische Glooweslieren un no dee, waut fa dee enstunden (Apj. 15:1-2, 5-20, 28). Woo kjeem daut ut? Jehova säajend dee äare Entscheidunk un doa bleef Fräd un Eenichkjeit en de Vesaumlunk un daut Prädichtwoakj jinkj wieda (Apj. 15:30-31; 16:4-5).

12. Aun waut es daut to seenen, daut et en Jehova siene Organisazion frädlich un ordentlich toojeit?

¹² En onse Tiet. Jehova siene Organisazion haft noch emma doano jeseenen, daut doa Fräd un Ordnunk mank siene Deena wia. En dän enjlischen Zions Wacht-Turm und Verkünder der Gegenwart Christi vom 15. Nowamba 1895 jeef daut aul eenen Artikjel met daut Teema: “Schekjlich un ordentlich”. Dee stett sikj opp 1. Korinta 14:40 un doa säd daut: “De Apostel räden to de ieeschte Christen väl von Ordnunk . . . Daut es needich, daut wie wieda doaropp achten, waut ‘verhäa jeschräwen wia, . . . daut wie doarut lieren’” (Reem. 15:4). Un Jehova siene Organisazion es vondoag dän Dach noch krakjt soo doarom todoonen, daut doa aules frädlich un ordentlich toojeit. Aun waut es daut to seenen? Na, wan wie en eene aundre Vesaumlunk biem Woaktorm-Studium bie sennen wudden ooda mau rajcht en een aundret Launt, dan wudd wie doawäajen fuaz weeten, woo dee daut doa doonen wudden un woonen Artikjel dee doa studieren wudden. Wie wudden ons doa fuaz tusich feelen. Soone Eenichkjeit es bloos derch Gott sienen Jeist mäajlich! (Zef. 3:9, NW, Fn.).

13. Äwa waut sell wie nodenkjen, un woo kaun Jakobus 3:17 ons doabie halpen?

¹³ Waut wie doonen kjennen. Jehova well, daut siene Deena “de Eenichkjeit em Jeist”  bewoaren un “met eenaunda vebungen bliewen” (Efs. 4:1-3). Wie wudden mol kjennen äwalajen: “Halp ekj met, daut doa Fräd un Eenichkjeit enne Vesaumlunk es? Horch ekj no dee, waut Jehova äwa ons aunjestalt haft? Kjennen aundre sikj opp mie veloten, besonda wan ekj waut fa de Vesaumlunk doonen saul? Sie ekj emma enne Tiet un reed toom halpen?” (Läs Jakobus 3:17.) Wan wie seenen, daut wie ons en waut von dit noch vebätren kjennen, dan sell wie om heiljen Jeist bäden. Dee kaun ons halpen, ons en dän Stekj to vebätren, woo wie sent un waut wie doonen. Dan woaren de Breeda un Sestren ons noch mea räakjnen un noch dankboara sennen.

14. Woo lieed Jehova de Jinja, waut “sien Wellen” wia, soo aus Kolossa 1:9-10 sajcht?

¹⁴ En de Aposteltiet. Jehova jeit daut sea scheen, siene Deena waut to lieren (Psa. 32:8). Hee talt ons aus siene Kjinja un well, daut wie am kjanen un am leewen un fa emma läwen kjennen. Un doawäajen deit hee ons lieren (Joh. 17:3). En de Aposteltiet lieed Jehova siene Deena derch de Vesaumlunk (läs Kolossa 1:9-10). Un de heilja Jeist holp an uk. Daut wia de “Treesta”, ooda Helpa, waut Jesus vesproaken haud (Joh. 14:16). Doaderch kunnen see Gott sien Wuat bäta vestonen un kunnen sikj wada aun aul daut erinren, waut Jesus säd un deed un waut lota en de Evangelien oppjeschräwen wort. Daut stoakjt de Jinja em Gloowen un holp an, daut see Gott un sienen Sän un äare Breeda noch dolla leewden.

15. Woo hast du beläft, daut Jesaja 2:2-3 sikj erfelt haft?

¹⁵ En onse Tiet. Jehova säd, daut en de latste Tiet Menschen von aule Velkja no sienen Boajch, ooda no de woare Aunbädunk, komen wudden toom von am lieren (läs Jesaja 2:2-3). Wie seenen, daut dise Profezeiunk  sikj nu erfelt. Daut es kloa to seenen, daut de woare Aunbädunk väl bäta es aus aule faulsche Gloowes. Jehova haft ons eene scheene jeistelje Moltiet reedjemoakt (Jes. 25:6). Derch dän truen, weisen Kjnajcht jeft hee ons äwajenuach jeisteljet Äten un uk väl veschiednet, biejlikj Artikjels un Räden un veschiedne Videos (Mat. 24:45). Ons jeit daut krakjt soo aus Hiob sienen Frint Elihu, waut säd: “Es doa wua een Liera soona aus [Gott]?” (Hiob 36:22).

16. Woo kaun eena em jeisteljen veraunkomen?

¹⁶ Waut wie doonen kjennen. Gott sien Jeist woat ons halpen, daut wie daut nokomen, waut wie en sien Wuat läsen un studieren. Wie kjennen krakjt daut bäden, waut de Psalmenschriewa: “Wies mie dienen Wajch, oo HAR, un ekj woa en diene Woarheit waundlen. Hool mien Hoat bie daut eene, daut ekj dienen Nomen ferchten woa” (Psa. 86:11). Wie sellen uk nich opphieren de Schreft un de aundre Bieekja to läsen un to studieren, waut Jehova siene Organisazion ons jeft. Secha well wie nich bloos mea lieren, oba ons daut uk to Hoaten nämen un daut nokomen. Un Jehova kaun ons doabie met sienen heiljen Jeist halpen. Wie wellen uk onse Gloowesbreeda Moot toospräakjen, wiels daut onse jeistelje Famielje es (Heb. 10:24-25). Bäd om Gott sienen Jeist, daut du bie de Toopkomes von Hoaten Auntwuaten jäwen kaust un daut du dien bastet doonen kaust, wan du doa eene Oppgow hast. Opp dee Wajch kjenn wie wiesen, daut wie de wieetvolle “Schop” väl räakjnen, waut Jehova un Jesus jehieren (Joh. 21:15-17).

17. Woo kjenn wie daut wiesen, daut wie Jehova siene Organisazion tru unjastetten?

¹⁷ Boolt woat et bloos noch Gott siene Organisazion oppe Ieed jäwen, waut hee met sienen Jeist leit. Doawäajen schauf flietich met dee toop. Wies, daut du krakjt soo aus Gott aule Menschen leefst, un moak aulem de goode Norecht bekaunt. Wies, daut du uk opp Ordnunk un opp Fräd helst, un halp met, daut de Vesaumlunk veeent blift. Horch no dienen grooten Liera un nutz aul daut jeistelje Äten ut, waut hee ons jeft. Dan brukst du nich Angst haben, wan daut met dän Soton siene Welt to Enj jeit. Du woascht kjennen äwanäment sennen un Jehova met siene Organisazion toop tru deenen.