1. ¿Imastataj ruwananchej tiyan?

BAUTIZAKUSHASPAQA tukuypa ñaupaqenpi iskay imasta nerqanchej: Jehová Diospi creesqanchejta, llajtanwan * khuskataj sirviyta munasqanchejta. Jinapis Jehovapi creesqanchejta astawan wiñachina tiyan. Payqa munayninta llajtannejta kay tiempopi juntʼashan. Chaymantataj mana iskayrayanachu tiyan.

2, 3. ¿Ima kinsa imastataj Diospa llajtan paymanta rikuchin?

² Kay tiempopeqa Jehová Diospuni llajtanta ñaupajman pusashan. Chaypitaj reparasunman, imaynachus kasqanta, imatachus ruwayta munasqanta, kamachiykunasnintapis. Diospa llajtan ima kinsa imastachus paymanta rikuchisqanta qhawarina.

³ Ñaupaj kaj, “Diosqa tukuy runasta uj rejllata” qhawan (Hech. 10:34). Jehová Diosqa mayta munakuwasqanchejrayku, Wawanta tukuy runasrayku wañunanpaj qorqa (Juan 3:16; 1 Tim. 2:6). Jesuspa wañuyninpi creejkunaqa, ashkha bendicionesta japʼenqanku. Jehová Diostaj tukuy runas chay bendicionesta japʼinankuta munan. Chayrayku sumaj willaykunata tukuyman willachishan. Iskay kaj, Jehová Diosqa mana munanchu imapis pejtu kananta, astawanpis allin kausay kananta munan (1 Cor. 14:33, 40). Chayrayku payqa, llajtanpi tukuy ima sumajta ruwakunanta munan. Jehovaqa munallantaj, llajtanpi kajkuna allinpi kausakunankuta. Kinsa kaj, Jehová Diosqa Sumaj Yachachejninchej (Isa. 30:20, 21). Chayrayku llajtanpi kajkunaqa, congregacionpi, predicacionpipis Bibliamanta yachachinku. Rikunchej jina, Jehová Diosqa tukuy runasta munakun, allin kausay kananta munan, Sumaj Yachachejtaj. ¿Imaynatá chay rikukorqa ñaupa tiempomanta llajtanpi? ¿Imaynatá kay tiempomanta llajtanpi rikukun? Chanta, ¿imaynatá Diospa atiynin llajtanpi kajkunata yanapan?

4. Hechos 1:8 nisqanman jina, ¿imatá Jesús discipulosninman kamacherqa, chanta imatataj japʼerqanku?

⁴ Ñaupa tiempopi. Jesusqa tukuy runaspaj allin kausay kananmanta willarqa (Luc. 4:43). Discipulosninmantaj kamacherqa, chay sumaj willayta “kay jallpʼaj tukuy kʼuchusnintinpi” willamunankuta (Hechos 1:8 leey). Discipulosnenqa kallpallankuwan mana chayta ruwayta atinkumanchu karqa. Paykunaqa Diospa atiyninta necesitarqanku. Jesustaj ñaupajpiña nerqa, Jehová Dios paykunata atiyninwan yanapananta (Zac. 4:6; Juan 14:26).

5, 6. ¿Imatataj Jesuspa discipulosnin Diospa atiyninwan yanapachikuspa ruwarqanku?

⁵ Jesuspa discipulosnenqa, 33 watamanta Pentecostespi Diospa atiyninta japʼerqanku. Chay atiyta japʼispataj, sumaj willaykunata willayta qallarerqanku. Pisi tiemponman, may chhika runas chay willayta japʼikorqanku (Hech. 2:41; 4:4). Discipulosqa qhatiykachasqa kaspapis, mana manchachikorqankuchu. Astawanpis Diosmanta mañakorqanku: “Yanapariwayku ari, mana manchachikuspa palabraykimanta willanallaykupajpuni”, nispa. Diostaj paykunaman atiyninta qorqa. Paykunataj ‘Diospa palabranta mana manchachikuspa willarqanku’ (Hech. 4:18-20, 29, 31).

⁶ Jinapis Jesuspa discipulosnenqa, waj problemasniyoj kallarqankutaj. Diospa Palabranmanta qhelqasqasqa, wakillanpata kaporqa. Manataj kay tiempopi jinachu, Diospa Palabranta entiendenapaj yanapas kaj. Chantapis Jesuspa discipulosnenqa, tukuy laya parlaykunapi willamunanku karqa. Jina kajtinpis, sumaj willaykunaqa 30 wataspi jinalla “tukuynejpi willasqa karqa”. Chaytaj runaj qhawayninman jinaqa, ni jaykʼaj atikunmanchu karqa (Col. 1:6, 23).

7. 1) Kay 1881 wata chaynejmanta cristianos, ¿imaynatá yacharqanku imapajchus Jehová Dios paykunata wajyasqanta? 2) ¿Imatá chay cristianos ruwarqanku?

⁷ Kay tiempopi. Jehová Diosqa llajtanta ñaupajman pusashallanpuni, kallpachashantaj. Payqa Biblianejta chayta ruwashan. Bibliaqa willawanchej, Jesusqa Diospa Gobiernonmanta runasman willasqanta. Discipulosnintaj chayta ruwanallankupuni karqa. Bibliaqa Jesús chayta kamachisqanta nin (Mat. 28:19, 20). Chayrayku julio de 1881 watamanta inglés parlaypi Torremanta Qhawaj revista nerqa: “Jehovaqa mana jatunchachikunapajchu, nitaj qhapajyanapajchu ajllawarqanchej. Astawanpis wajyawarqanchej, sumaj willaykunata tukuy kapuyninchejwan willamunapaj”, nispa. 1919 watapitaj, ¿Pikunataj kay llankʼayta ruwananku tiyan? nisqa folletota inglespi orqhorqanku. Chaytaj nerqa: “Kay llankʼayqa jatun ruway kaspa jinan, chaywanpis Señorpata, kallpanwantaj juntʼayta atisun”, nispa. Chay tiempomanta hermanosqa, ñaupa cristianos jinallataj tukuy atisqankuta predicarqanku. Paykunaqa Diospa atiyninwan tukuy clase runasman willamunankuta yacharqanku. Noqanchejpis paykuna jinallataj yuyanchej.

8, 9. ¿Imaynasmantataj Diospa llajtan sumaj willaykunata willan?

⁸ Jehová Diospa llajtanqa, sumaj willaykunata willananpaj tukuy imata ruwan. Chayrayku libroswan, waj publicacioneswan ima willarqanchej. Chantapis “Foto-Drama de la Creación” nisqa peliculawan, tocadiscoswan, parlantesniyoj autoswan, radionejta ima willarqanchej. Kunantaj Internetnejta willashanchej. Publicacionesninchejpis may chhika parlaykunapi orqhokushan. Ni mayqen organizacionpis, noqanchej jina traducinchu. ¿Imaraykutaj chayta ruwanchej? Imaraykuchus tukuy runas sumaj willaykunata parlayninkupi uyarinankuta munanchej. Jehová Diosqa tukuy runasta munakun. Chayrayku nerqa, sumaj willaykunaqa “tukuy nacionesman, tukuy ayllusman, tukuy laya parlayniyojkunaman, tukuy laya runasmanpis” willakunanta (Apo. 14:6, 7). Jehovaqa tukuy runas Gobiernonmanta yachanankuta munan.

 ⁹ Jinapis wakin runasmanqa, mana predicayta atillanchejchu. Imaraykuchus guardiaswan qhawasqa wasispi chayri edificiospi tiyakunku. Jinapis Jehovaqa waj jinasmanta willananchejpaj yanapawanchej. Chayrayku Diospa Llajtanta Kamachejkunaqa, 2001 watapi Franciamanta hermanosta nerqanku, ashkha runas purinku chaypi, carritoswan, mostradoreswan ima predicakunanta. Aswan qhepamantaj, waj lugarespiwan ajinata predicakunanta nerqanku. Chantá 2011 watapi, Estados Unidospi waj jinamanta predicakunanpaj pruebata ruwarqanku. Nueva York llajtapi, maypichus ashkha runas purinku chaypi, mostradoresta, carritosta ima churarqanku. Uj watallapi 102.129 librosta, 68.911 revistastawan runasman jaywarqanku. 4.701 runastaj Bibliamanta yachakuyta munarqanku. Sutʼi rikukorqa chay predicasqankuta Jehová Dios bendecisqanta. Chayrayku Diospa Llajtanta Kamachejkunaqa, mundontinpi carritoswan willakunanta nerqanku.

10. ¿Imatá ruwasunman aswan sumajta predicanapaj, yachachinapaj ima?

¹⁰ ¿Imatá ruwasunman? Jehová Dios reunionespi yachachiwasqanchejta japʼikuna. Gruponchejwanpis predicaj llojsinapuni. Gruponchejmanta hermanosqa, aswan sumajta predicanapaj, yachachinapaj ima yanapawasunman. Ruwasqankuwanpis kallpachawasunman. Runasman willamuspaqa, Diospa munayninta juntʼashanchej. Kay yachaqanapaj texto nin jinataj, mana kallpayoj kasqanchejraykuchu chay llankʼayta ruwashanchej, manaqa Jehová Dios atiyninwan yanapawasqanchejrayku (Zac. 4:6). Chayrayku ima kajtinpis predicanallapuni.

11. ¿Imatataj apostoleswan ancianoswan ruwarqanku mana tʼaqanakus kananpaj?

¹¹ Ñaupa tiempopi. Jerusalenmanta apostoleswan ancianoswanqa, Diospa llajtanpi allin kausay kananpaj ujchasqas llankʼarqanku (Hech. 2:42). Imaynatachus paykuna 49 watapi uj problemata allinchasqankuta qhawarina. Chay watapi cristianosqa, circuncisionmanta chʼajwasharqanku. Chay problema kallanmanpuni karqa chayqa, congregacionpi tʼaqanakus kanman karqa, niñataj predicankumanchu karqa. Chayrayku apostoleswan ancianoswanqa, Diospa atiyninwan yanapachikuspa chay problemata qhawaykurerqanku.  Judíos kajtinkupis, mana costumbresninkuman jinachu chay problemata allincharqanku, nitaj chay costumbresta yachachejkuna nisqankuman jinachu. Astawanpis Diospa Palabranta qhawaykurerqanku, paypa atiyninwantaj yanapachikorqanku (Hech. 15:1, 2, 5-20, 28). Ajinata ruwasqankurayku, Jehová Diosqa paykunata bendicerqa. Chayrayku Diospa llajtanpi kajkunaqa, ujchasqallapuni karqanku, predicallarqankupunitaj (Hech. 15:30, 31; 16:4, 5).

12. ¿Imaraykutaj nisunman Diospa llajtan sumaj organizasqa kasqanta?

¹² Kay tiempopi. Diospa llajtanpi kajkunaqa, noqanchejpura allinta kausakunapaj kallpachakunchej, jinallataj imatapis maychus kajman jina ruwanapaj. Chayrayku 15 de noviembre de 1895 watamanta inglespi Torremanta Qhawaj revistapi, uj sumaj yachaqana llojserqa. Chaytaj 1 Corintios 14:40 versiculomanta orqhokorqa, sutikorqataj: “Tukuy imata allinta ruwaychej, maychus kananta jinataj”. Chay yachaqana nerqa: “Apostolesqa cristianosman ashkhata nerqanku, congregacionpi imatapis maychus kajtapuni ruwanankuta [...]. ‘Unay tiempopi qhelqakusqanqa, yachakunanchejpaj qhelqasqa karqa’. Chayrayku noqanchejpis chayllatataj ruwananchej tiyan”, nispa (Rom. 15:4). Ñaupa tiempomanta Diospa llajtanqa, sumaj organizasqa karqa. Cristianostaj paykunapura allinta kausakorqanku. Kay tiempomanta Diospa llajtanpis kikillantaj. Imaynatachus Torremanta Qhawaj revistata estudiasqanchejpi piensarina. Mundontinmanta tukuynin congregacionespi, kikin yachaqanata estudianchej, tapuykunawan kutichiykunawantaj ukhunchanchej. Chayrayku may lugarman rispapis, imatachus estudiananchejta yachanchej, wasinchejpi jinataj kanchej. Diospa atiynin yanapawasqanchejraykulla ajina ujchasqas kanchej (Sof. 3:9).

13. Santiago 3:17 nisqanpi tʼukurispa, ¿ima tapuykunapitaj piensarinanchej kanman?

¹³ ¿Imatá ruwasunman? Jehová Diosqa llajtanpi kajkunaman nin: ‘Ujchasqallapuni kanaykichejpaj kallpachakuychej. Imaraykuchus atiyniynejta ujchasqa kashankichej’, nispa (Efe. 4:1-3). Chayrayku sapa uj, kay tapuykunapi piensarina: “¿Yanapakunichu congregación ujchasqa kananpaj? ¿Kallpachakunichu tukuywan allinta kausakunaypaj? Congregacionta ñaupajman  apajkunata, ¿kasukunichu? ¿Atienekunapaj jinachu kani? Congregacionpi ruwanasniyta, ¿juntʼanipunichu? ¿Tiemponpipunichu imatapis ruwani? ¿Tempranopunichu maymanpis chayani? Yanapakuna kajtin, ¿chay ratochu yanapakuni?” (Santiago 3:17 leey). Mayqen tapuyllamanpis “mana” ninchej chayqa, Jehovaj atiyninta mañakuna. Chay atiywan yanapachikuspaqa, aswan sumaj cristianos kasun. Hermanosninchejpis astawan munakuwasun, sumajpajtaj qhawawasun.

14. ¿Imaynatá Jehová Dios ñaupa cristianosta yachacherqa ‘munayninta allinta rejsinankupaj’? (Colosenses 1:9, 10).

¹⁴ Ñaupa tiempopi. Jehová Diosqa kamachisninman maytapuni yachachiyta munan (Sal. 32:8). Payqa tukuynin wawasninta mayta munakun. Chayrayku payta rejsinankuta, munakunankuta ima munan. Payqa munallantaj wawasnin wiñaypaj kausakunankuta (Juan 17:3). Jehovaqa ñaupa cristianosta congregacionnejta yachacherqa (Colosenses 1:9, 10 leey). Jinapis astawanqa, atiyninwan paykunata yanaparqa. Jesusqa chay “yanapata” japʼinankuta nerqa (Juan 14:16). Ñaupa cristianosqa, Diospa atiyninwan Palabranta entienderqanku. Diospa atiynenqa, paykunata yanapallarqataj Jesuspa yachachiykunasninta, ruwasqasninta ima yuyarikunankupaj. Chaykunataj Mateo, Marcos, Lucas, Juan librospi kashan. Ñaupa cristianosqa Diospa Palabranta entiendesqankurayku, Jehová Diosta, Wawanta, hermanosninkutapis astawan munakorqanku. Creeyninkupis astawan sinchʼiyarqa.

15. ¿Isaías 2:2, 3 nisqan juntʼakushanchu?

¹⁵ Kay tiempopi. Jehová Diosqa nerqa: ‘Qhepa pʼunchaykunapi tukuy nacionesmanta runas orqoyman jamonqanku, ñankunasniytataj yachakonqanku’, nispa (Isaías 2:2, 3 leey). Chay nisqantaj juntʼakushanpuni. Diospa llajtanpi payta sirveyqa, may sumajpuni. Ni mayqen religionpa ruwasqanwanpis kikinchakunmanchu. Jehová Diosqa, llajtanpi kajkunapaj imaymana miskʼi  mikhunasta wakichipun (Isa. 25:6). Payqa ‘allin kamachi yuyayniyojta’ churan. Chay kamachitaj, imaymana mikhunasta, may chhikatataj qoshawanchej. Chaykunaqa kanku: libros, revistas, discursos, imaymana videos ima. Wawitaspajpis videos tiyallantaj (Mat. 24:45). Chayrayku noqanchejpis Jobpa amigon Eliú jina ninchej: ‘Jehová Diosmanqa ni pi yachachejpis japʼikunchu’, nispa (Job 36:22).

16. ¿Imatá ruwasunman Diospa yachachiyninwan yanapachikunapaj?

¹⁶ ¿Imatá ruwasunman? Diospa atiynenqa, Palabranpi yachakusqanchejman jina ruwanapaj yanapawasun. Chayrayku Jehová Diosmanta kay salmista jina mañakuna: “Tata Dios, ñanniykita rejsichiway, noqa chaynillantapuni purinaypaj. Uj yuyayllata ruwaway sutiykita jatumpaj qhawanaypaj”, nispa (Sal. 86:11). Jehovaqa Palabrannejta, llajtannejta ima yachachiwanchej. Chay yachachiyninwan sumajta yanapachikunallapuni. Jinapis ama astawan yachayniyoj kanallapajchu yachakuna. Astawanpis chay yachachiykunata sonqonchejpi japʼikuna, chayman jinataj kausana. Diospa atiynenqa chayta ruwanapaj yanapawasun. Hermanosninchejtapis Bibliapi yachakusqanchejwan kallpacharina. Imaraykuchus paykunaqa familianchej kanku (Heb. 10:24, 25). Diospa atiynenqa reunionespi tukuy sonqo comentanapaj, asignacionninchejtapis sumajta ruwanapaj yanapawasunman. Chayrayku Jehovamanta atiyninta mañakuna. Chay imasta ruwaspaqa, payman Wawanmanpis rikuchisunchej, ovejitasninta munakusqanchejta (Juan 21:15-17).

17. ¿Imaynatá Diospa llajtanwan khuska llankʼasunman?

¹⁷ Rikunchej jina, Jehová Diospuni llajtanta atiyninwan pusashan. Tumpamantawantaj chay llajtalla kay jallpʼapi qhepakonqa. Chayrayku Diospa llajtanwan khuska tukuy sonqo llankʼana. ¿Imaynatá chayta ruwasunman? Tukuy clase runasman sumaj willaykunata willamuna. Ajinamanta Tatanchej Jehová jina, tukuyta munakusqanchejta rikuchisun. Chantapis congregación ujchasqa kananpaj yanapakuna. Chayta ruwaspaqa, Jehová jina allin kausay kananta munasqanchejta rikuchisun. Chantá Diospa yachachiykunasninwan, tukuy atisqanchejta yanapachikuna. Ajinamanta Sumaj Yachachejninchej Jehovata uyarisun. Chay imasta ruwasun chayqa, Satanaspa sajra mundon chinkachisqa kashajtin mana manchachikusunchu. Astawanpis Jehová Diospa llajtanpi kasqanchejrayku sinchʼita sayasun.