1. Bautizakushqana karqa, ¿ima mastatan ruranantsik?

BAUTIZAKUSHQANA karqa, Jehoväman markäkunqantsikta o yärakunqantsiktam rikätsikushqantsik. Y markanwan sirwinapaqmi änikurquntsik. * Tsënö kaptimpis, Jehoväman y markanwan llapan munanqanta cumplimunampaq kaqmanmi markäkunantsik o yärakunantsik.

2, 3. Markanta yanapanqanchöqa, ¿imanö kanqantatan Jehovä rikätsikun?

² Kanan witsan Jehovä markanta yanapëkanqanchömi rikätsikun imanö kanqanta, imata munanqanta y mandakuyninkunata. Jehoväqa markanchömi imanö kanqanta rikätsikun. Kimallata yachakurishun.

³ Juk, Diosqa llapantapis igualpam rikan (Hëch. 10:34). Jehoväqa kuyamanqantsikrëkurmi, noqantsikrëkur tsurin Jesus wanunampaq mandamurqan (Juan 3:16; 1 Tim. 2:6). Jesus wanunqanrëkur nunakuna salvakuyänampaqmi, Jehoväqa markanwan alli willakuykunata pï mëta yachëkätsin. Ishkë, Jehoväqa manam imatapis lluta ruraqtsu, sinöqa yamë kananta munaq Diosmi (1 Cor. 14:33, 40). Tsëmi, markanchö tsënö rurayänampaq kallpachakuyan. Kima, Jehoväqa Alli Yachatsikoqmi (Is. 30:20, 21). Jehoväqa markanwanmi Palabrampita noqantsikta y wakinkunatapis yachëkätsin. Jehovä tsënö kanqanqa, ¿imanötan rikakurqan apostolkuna kawayanqan witsan? Kanan witsan sirweqninkunaqa, ¿imanötan tsëta rikätsikuyan? Kanan witsan sirweqninkunataqa, ¿imanötan Jehoväqa yanapamantsik?

4. Hëchus 1:8 ninqannö, ¿imatatan qateqninkunata Jesus mandarqan? Y ¿imanötan tsëtaqa rurayänan karqan?

⁴ Apostolkuna kawayanqan witsan. Jesus yachatsikunqanqa llapan nunakunatam yanaparqan (Lüc. 4:43). Y qateqninkunatam mandarqan “patsapa mas karu kuchunyaq” pënölla yachatsikuyänampaq (leyi Hëchus 1:8). Tsëtaqa, manam kikinkunapa kallpanllawanqa rurëta puëdiyanmantsu karqan. Tsëmi Jesusqa, tsë rurëkunachö Jehovä yanapanampaq änikurqan (Juan 14:26; Zac. 4:6).

5, 6. Jesuspa qateqninkunataqa, ¿imanötan Jehovä yanaparqan?

⁵ 33 wata Pentecostes fiestachömi Jesuspa qateqninkunaqa, Jehoväpa kallpanta chaskiyarqan. Jehoväpa yanapakuyninwanmi yachatsikur qallëkuyarqan y mëtsikaqmi Jehoväta sirwiyänampaq änikuyarqan (Hëch. 2:41; 4:4). Chikishqa karninmi, yachatsikur sïguiyänampaq Jehoväman kënö mañakuyarqan: “Sirwishoqnikikunata yanapëkayämë mana mantsakushpa musyatsikur sïguiyänäpaq”. Tsënö Jehovä yanapaptinmi, mana mantsakushpa “Diospa palabranta” yachatsikur sïguiyarqan (Hëch. 4:18-20, 29, 31).

⁶ Jesuspa qateqninkunapaqqa, manam fäciltsu karqan Diospita yachatsikuyqa. Tsë witsanchöqa manam fäciltsu Biblia tarinanqa karqan y manam kanannötsu yachakuyänampaq yapakuykuna karqan. Pëkunaqa tukuyläya parlaq nunakunatam yachatsiyänan karqan. Tsënö kaptimpis wallka watakunallachömi Diospa alli willakuyninkunataqa, “entëru patsachö nunakunata” musyatsiyarqan (Col. 1:6, 23).

7. Unë witsan Diospa sirweqninkunaqa, ¿imanötan musyayarqan Jehovä mandakunqanta? Y ¿imatatan rurayarqan?

⁷ Kanan witsan. Jehoväqa llapanchömi markanta yanapëkan. Tsëtaqa ruran Palabran Bibliawanmi, tsëchömi Jesus yachatsikunqan y qateqninkunata yachatsikuyänampaq mandanqampis këkan (Mat. 28:19, 20). 1881 wata juliu killapaq Täpakoq revistachömi kënö nirqan: “Manam reqishqa ni kapoqyoq kanapaqtsu akramarquntsik, sinöqa kapamanqantsikwan Diospa alli willakuyninkunata yachatsikur yanapakunapaqmi”. 1919 watachö yarqamoq A quienes se les confía la obra follëtum nirqan: “Diospita yachatsikuyqa manam fäciltsu, tsënö kaptimpis Diospa kaptinmi kikin yanapamäshun tsëta ruranapaq”. Awmi, apostolkunapa tiempunchö wawqi panikunaqa Jehovä yanapanampaq kaqman markäkur o yärakurmi yachatsikur sïguiyarqan. Tsënöllam kanan witsampis Jehovä yanapamanqantsikman markäkuntsik o yärakuntsik.

8, 9. Alli willakuykunata musyatsikunampaqqa, ¿imakunatatan Jehoväpa markan utilizashqa?

⁸ Jehoväpa markanqa imëkatam utilicëkan Diospa alli willakuyninta yachatsikuyänampaq. Tsëkunaqa kayan: librukuna, revistakuna, follëtukuna, “Kamashqakunapita Yachatsikoq Fötuwan Actuacion”, tocadiscukuna, parlantiyoq cärrukuna, radiuchö willakuykuna y kanan witsanna Internetchö yanapakuykuna. Y kananqa, Jehoväpa markanllam tukuyläya nunakuna parlayanqanmannö Diospa yachatsikuyninkunata rurëkamun. Tsënöqa rurëkätsin Diospa alli willakuyninkunapita nunakuna yachakuyänampaqmi. Jehoväqa llapantapis  igualpa rikarmi “llapan nacionkunata, kastakunata, idiömakunata y markakunata” yachatsiyänampaq willakurqan (Rev. 14:6, 7). Jehoväqa llapan nunakuna reqiyänantam munan.

⁹ Wakin nunakunata yachatsiqa manam fäciltsu. Tsërëkurmi Jehoväqa markanta yanapashqa tukuynöpa yachatsikuyänampaq. 2001 watachömi Jehoväpa Testïgunkunata Pushaqkunaqa, Francia nacionpa cällinkunachö carrïtukunawan y jukläya yachatsikuyänampaq patsätsiyarqan. Tsëpitanam 2011 watachö Estädus Unïdus nacionpa Nueva York markanchö, mas nunakuna puriyanqan sitiukunachö carrïtukunawan yachatsikur qallëkuyarqan. Juk watallachömi 102.129 librukunata y 68.911 revistakunata qarakuyarqan, y 4.701 Bibliapita yachakuyänampaq mañakuyarqan. Clärum këkarqan Jehovä yanapakunqanqa. Tsëmi Jehoväpa Testïgunkunata Pushaqkunaqa patsätsiyarqan entëru patsacho carrïtukunawan yachatsikunapaq.

10. Mas alli yachatsikunapaqqa, ¿imatatan rurashwan?

¹⁰ Ruranantsikpaq kaqkuna. Reunionkunachö Jehovä yachatsimanqantsikta alli yachakushun. Diospita yachatsikoq seguïdu yarqushun. Mas alli yachatsikunapaqqa, wawqi panintsikkunapitam yachakuyta puëdintsik. Mana allikunapa pasarpis yachatsikuykäshun. Kë yachatsikuypaq Bibliachö willakunqannöpis, Jehovä yanapamashqam pëpita yachatsikur këkantsik (Zac. 4:6). Awmi, kë llapan rurëqa Jehoväpam.

11. Jehoväpa Testïgunkunata Pushaqkunaqa, ¿imanötan alli kë kanampaq yanapakuyarqan?

¹¹ Apostolkuna kawayanqan witsan. Jerusalenchömi Jehoväpa Testïgunkunata Pushaqkunaqa kayarqan, tsëpitam cristiänukuna yamë y juknölla kayänampaq imatapis shumaq patsätsiyaq (Hëch. 2:42). 49 watamampam wakin cristiänukunaqa señalakuypaq pleytur qallëkuyarqan. Tsëmi Jehoväpa Testïgunkunata Pushaqkunaqa, Jehoväpa yanapakuyninwan  tsëta altsayänampaq juntakäyarqan. Tsërëkur rakikäyaptinqa, manachi yachatsikur sïguita puëdiyanmantsu karqan. Apostolkuna y creikoqkunata rikaqkunaqa Judïum kayarqan, tsënö kaptimpis manam costumbrinkunamannötsu tsë problëmata altsayarqan. Sinöqa Diospa yanapakuyninwan y Palabranchö ninqanwanmi altsayarqan (Hëch. 15:1, 2, 5-20, 28). Tsënö yamë y juknölla llapan cristiänukuna kayanqampita y Diospita yachatsikur sïguiyanqampitam Jehoväqa pëkunata bendicirqan (Hëch. 15:30, 31; 16:4, 5).

12. Jehoväpa markanchöqa, ¿imanirtan juknölla y yamë kantsik?

¹² Kanan witsan. Jehoväpa markanqa yamë y juknölla kayänampaqmi imëkata rurashqa. 1895 wata 15 de noviembri Täpakoq revistam, 1 Corintius 14:40 ninqampita “Alli patsëkatsirnin” yachatsikuypaq parlarqan. Kënömi nirqan: “Imatapis alli patsëkatsir rurayänampaqmi apostolkunaqa cristiänukunata niyarqan [...]. Alli kawakunapaqqa Biblia ninqantam cäsukur sïguinantsik” (Rom. 15:4). Apostolkuna kawayanqan witsan cristiänukunataqa juknölla y yamë kayanqampitam reqiyarqan, kanan witsampis tsënömi Jehoväpa markanqa. Jehoväpa markan tsënö kanqanqa rikakun, Täpakoq revistata më tsë nacionchö kaqllata yachakuyanqanchömi. Awmi, Jehoväpa markanchöqa mëta ëwarpis wayintsikchönömi sientikushun (Sof. 3:9).

13. Santiägu 3:17 ninqannö, ¿imakunatatan tapukunantsik?

¹³ Ruranantsikpaq kaqkuna. Jehoväqa, juknölla kanatam munan (Efes. 4:1-3). Tsëpaqqa tapukushun: “¿Wawqi panikunawan juknölla y yamë kanapaqku imatapis rurä? ¿Carguyoq wawqikuna niyämanqanta cäsuköku? Ima carguyoqpis kaptïqa, ¿wawqi panikuna noqaman markäkayämunku o yärakayämunku? ¿Mëmampis höranchö chaq y yanapakunapaq kallpachakoqku kä?” (leyi Santiägu 3:17). Tsënö ruranapaqqa, Jehovä yanapëkamänapaq mañakushun. Jehovä  munanqannö imatapis rurashqaqa, wawqi panikunaqa masraqmi kuyamäshun.

14. Colosensis 1:9, 10 ninqannö, ¿imanötan Jehovä sirweqninkunata yanaparqan “pëpa munëninta” musyayänampaq?

¹⁴ Apostolkuna kawayanqan witsan. Jehoväqa kushishqam markanta yachatsin (Sal. 32:8). Pëqa yachatsimantsik pëta reqinapaq, kuyanapaq y mana wanushpa kawakunapaqmi (Juan 17:3). Apostolkuna kawayanqan witsanqa markanwanmi wawqi panikunata yachatsirqan (leyi Colosensis 1:9, 10). Jesus änikunqannömi Jehoväqa kallpanwan yanapakurqan (Juan 14:16). Tsë kallpam, Diospa Palabranta yachakuyänampaq y Jesus ruranqankunata qellqayänampaq yanapakurqan. Tsënö yachakurmi Teyta Diosman markäkuyarqan o yärakuyarqan. Y Jehoväta, Jesusta y cristiänu mayinkunata maslla kuyayänampaqmi yanapakurqan.

15. ¿Imanötan musyantsik Isaïas 2:2, 3 cumplikëkanqanta?

¹⁵ Kanan witsan. Jehoväqa willakurqannam ‘shamuq watakunachö’ llapan nacionkunapita nunakuna, pëpa markanchö yachatsishqa kayänampaq (leyi Isaïas 2:2, 3 *). Kanan witsanmi tsë willakuyqa cumplikëkan. Mëtsikaq nunakunam Jehovä munanqannö pëta sirwikäyan. Y mikuytanömi mëtsika yachatsikuyta Jehoväqa qarëkämantsik  (Is. 25:6). Tsëtaqa qaramantsik ‘alli juiciuyoq y markäkïpaq sirwipakoqwanmi’ pëkunaqa leyinapaq, wiyanapaq y rikänapaq videukunatam rurëkäyämun wamrakuna y noqantsik yachakunapaq (Mat. 24:45). Jobpa amïgun Elihünömi, Jehoväpaqqa kënö nintsik: “Pëmanqa manam pï yachatsikuqpis iwalantsu” (Job 36:22).

16. Jehoväta mas alli sirwinapaqqa, ¿imatatan rurashwan?

¹⁶ Ruranantsikpaq kaqkuna. Palabran Bibliachö yachakunqantsikmannö ruranapaqmi Jehovä yanapamäshun. Salmus libruta qellqaq nunanö Jehoväman kënö mañakushun: “Teyta Dios, shumaq kawakunäpaq nänikita reqikatsillämë. Tsë nänikipam imëpis purishaq. Llapan shonqüwan qamta mantsakunaqpaq yanapëkallämë” (Sal. 86:11). Awmi, Jehovä Palabranwan y markanwan yachatsimanqantsikta yachakunapaq kallpachakushun. Manam yachakunantsikllatsu, sinöqa shonquntsikmanmi chänan y yachakunqantsikmannömi kawanantsik. Tsëpaqqa Jehovämi kallpanwan yanapamäshun. Y noqantsikpis, wawqi panikunata yanapashun juknölla Jehovä Diosta sirwinapaq (Heb. 10:24, 25). Reunionkunachö shonqupita patsë parlakunapaq y yachatsikunapaq nimashqaqa, Jehovä yanapëkamänapaq mañakushun. Tsënömi Jehoväta y Jesusta rikätsishun llapan wawqi panikuna kuyanqantsikta (Juan 21:15-17).

17. Jehoväpa markanchöqa, ¿imanötan yanapakushwan?

¹⁷ Ichikllachönam Jehoväpa markanllana kë patsachöqa kanqa. Tsëmi tukuyläya nunakunata kushishqa yachatsinantsik Teyta Diospa alli willakuyninkunata. Jehoväpa markan ruranqannölla, wawqi panintsikkunawan juknölla y yamë kanapaq yanapanakushun. Jehoväta cäsukushun y mikuy cuenta qaramanqantsikta yachakunapaq kallpachakushun. Tsëqa ushakë junaq chämuptimpis manam mantsakushuntsu. Tsëpa rantinqa, Jehoväpa markanchö sirweqninkunawanmi kushishqa këkäshun.