1. ¿Bautizarishca cashpapish imata rurashpataj catina canchij?

BAUTIZARISHCA cashpaca shujtajcunapaj ñaupajpi Jehová Diospi crishcata, paipaj organizacionpi sirvisha nishcatami ricuchishcanchij. * Pero Diospaj munai pajtarichunca paillataj paipaj organizacionta pushacushcatami crishpa catina canchij.

2, 3. ¿Jehová Diosca paipaj organizacionta pushangapajca ima cualidadcunatataj ricuchin?

² Jehová Dios cunan punllacunapi paipaj organizacionta ima shina ñaupajman pushacujta ricushpami pai ima shina cashcata, pai munashcata pajtachisha nishcata, pai ima shina causachun munashcatapish yachai tucunchij. Cai yachaipimi Diospaj quimsa cualidadcunata ricushun.

³ Puntapica, Jehová Diosca tucuicunata shuj shinalla ricuj Diosmi can (Hechos 10:34). Yayitu Diosca cꞌuyaimantami tucuicunata quishpichingapaj paipaj churita curca (Juan 3:16; 1 Timoteo 2:6). Diosca achca gentecuna quishpirichunca paipaj pueblotami alli huillaicunata huillachun utilizan. Ishquipica, Diosca tucuita ordenpi charij, tandalla causaita cujmi can (1 Corintios 14:33, 40, NWT ). Chaimantami paita sirvijcunaca tucui ordenpi tandalla sirvina canchij. Quimsapica, “Diosca alli yachachijmi” can (Isaías 30:20, 21, NWT ). Chaimi paipaj organizacionca congregacionpipish predicanapipish Bibliamantaca yachachincuna. Apostolcuna causashca punllacunapica ¿Diosca cai cualidadcunataca ima shinataj ricuchirca? ¿Cunan punllacunapish Jehová Diosca ima shinataj cai cualidadcunataca ricuchin? ¿Diospaj organizacionpi sirvijcunatapish ima shinataj paipaj espíritu santohuanca ayudan?

4. a) Hechos 1:8-pi nishca shinaca ¿Jesusca paipaj discipulocunataca imata rurachuntaj mandarca? b) ¿Chai mingashcata pajtachingapajca imatataj chasquina carcacuna?

⁴ Apostolcuna causashca punllapica Jesús predicashcami tucui gentecuna esperanzata charichun ayudarca (Lucas 4:43). Jesusca paipaj discipulocunamanca ñuca huillai callarishcataca “cai pachapi tiyaj tucui llajtacunapi huillanguichij” nishpa mandarca (Hechos 1:8-ta liyipai). ¿Ima shinataj chai mingashcataca pajtachi tucurcacuna? Jesusca cancuna minishtishca “espíritu santotami cusha” nircami (Juan 14:26, NWT; Zacarías 4:6).

5, 6. ¿Discipulocunaca espíritu santota chasquishpaca imatataj rurarcacuna?

⁵ Huata 33 Pentecostés fiestapica Jesuspaj discipulocunaca espíritu santotami chasquircacuna. Espíritu santota chasquishpaca chai ratomi huillai callarircacuna. Asha tiempo qꞌuipallami Diospaj alli huillaicunataca achca gentecuna chasquircacuna (Hechos 2:41; 4:4). Discipulocunaca paicunata catirashpa llaquichi callarijpipish mana mancharcacunachu. Paicunaca Diostaca: “Ñucanchij cambajta rurajcunataca, canmanta huillangapaj imatapish mana manchana yuyaita cuhuai” nishpami mañarcacuna. Ña Diospaj espíritu santota chasquishpaca Diospaj Shimitami huillashpa catircacuna (Hechos 4:18-20, 29, 31).

⁶ Jesuspaj discipulocunaca chꞌican chꞌican shimicunapimi huillana carca. Pero Dios Quillcachishcacunamantaca asha copiacunallatami charircacuna. Paicunaca Bibliata alli intindingapajca cunan punllacunapi shinaca mana publicacioncunata, librocunata charircacunachu. Cashna jarcaicunata charishpapish casi 30 huatacunataca tucui cai pachapi causajcunamanmi huillashcacuna carca (Colosenses 1:6, 23).

7. a) ¿100 huatacuna huashamanca Diosta sirvijcunaca Jehová paicunamanta imata shuyashcataca ima shinataj yacharcacuna? b) ¿Chaita yachaj chayashpaca imatataj rurarcacuna?

⁷ Cunan punllacunapipish Jehová Diosca paipaj pueblotaca ñaupajmanmi pushacun. Shinallataj fuerzasta cushpa, Bibliapi yachachishpami ñaupajman pushacun. Bibliapimi Jesús ima shina huillashcata paipaj discipulocunamanpish huillachun mandashcata yachai tucunchij (Mateo 28:19, 20). Shuj revistapica julio de 1881 huatapica: “Espíritu santotaca shujtajcuna ñucanchijta jatunyachichun o charij tucuchunca mana cushcachu. Ashtahuanpish imalla charishca cosascunahuan huillashpa catingapajmi espíritu santota chasquircanchij” nircami. 1919 huatapi “A quienes se les confía la obra” nishca folletopica: “Cai obrata pajtachinaca sinchi layami ricurin. Pero Señorpaj cashcamantami paipaj apoyohuanca pajtachi tucushun” nircami (To Whom the Work Is Entrusted). Discipulocunaca Diospaj espíritu santo paicuna tucui laya gentecunaman huillashpa catichun ayudanatami crircacuna. Cunan punllacunapipish discipulocuna shinallatajmi crinchij.

8, 9. ¿Diospaj organizacionca huillangapajca imacunallatataj utilizashcacuna?

⁸ Gentecunaman alli huillaicunamanta predicashpa catingapajca Diospaj organizacionca achca ayudacunatami utilizashca. Por ejemplo, publicacioncunata, “Foto-Drama de la Creación” nishca videota, gramófono nishcata, parlantecunata charij carrocunata, radiopi programacunatami utilizashca. Shinallataj cunan punllacunapipish internetta, computadoracunatami utilizan. Ashtahuanpish gentecuna paipaj propio shimipi yachachunca Diospaj organizacionllami achca shimicunaman traducishca. Chaimi paicunapaj propio shimita parlajcunaca Diosmanta yachai tucushcacuna. Jehová Diosca tucuicunata shuj shinalla ricuj cashcamantami “tucui  llajtacunaman, chꞌican chꞌican aillucunaman, chꞌican chꞌican rimaicunaman, tucui pueblocunamanpish huiñaipaj alli huillaita” huillashca canga nirca (Apocalipsis 14:6, 7). Yayitu Diosca tucui laya gentecuna paipaj Mandanamanta yachaj chayachunmi munan.

⁹ Huaquin gentecunapaj huasicunataca guardiacunami cuidancuna. Paicunaman huillanami huaquinpica sinchi can. Cashna laya gentecunaman huillangapajmi Diospaj organizacionca carritocunahuan huillai callarircacuna. Por ejemplo, 2001 huatapica Cuerpo Gobernante huauquicunaca Francia llajtapica carritocunapi, mesacunapi, tablerocunapi publicacioncunata churashpa huillachunmi aprobarcacuna. Qꞌuipapish chashnallatajmi shujtaj lugarcunapica huillai callarircacuna. Chashna huillanaca allimi carca. 2011 huatapica Nueva York, Estados Unidos llajtapimi shuj mushuj programata callarichircacuna. Cai programataca achca gentecuna tiyan lugarpi carritocunahuan huillangapajmi llujchircacuna. Chai huata callaripica 102.129 librocunata, 68.911 revistacunatami gentecunaman saquircacuna. 4.701 gentecunaca Bibliamanta estudiota cuchunmi solicitarcacuna. Chaimi Jehová Dios paipaj espíritu santohuan huillachun ayudacushcata cuentata curcanchij. Chaimantami Cuerpo Gobernante huauquicunaca huauqui panicuna muyundij Allpapi carritocunahuan huillachun aprobarcacuna.

10. ¿Alli yachachingapajca imatataj rurana canchij?

¹⁰ ¿Ñucanchijpish imallatataj rurai tucunchij? Tandanacuicunapimi Jehová Diosca gentecunaman huillachun yachachin. Predicangapajca agllashca grupohuanmi huillana canchij. Chashnami grupopi caj huauqui panicunaca imapi ayudachun minishtishcata ricushpaca ayudangacuna. Shinallataj paicunapaj ejemplohuanmi alli huillajcuna cachun animangacuna. Ima jarcaicunata charishpapish huillashpami catina canchij. Zacarías 4:6-pi nishca shinaca Diospaj munaita pajtachichunca Diospaj espíritu santollami ayudan. Diosca paipaj obra cashcamantami pailla ayudai tucun.

11. ¿Cuerpo Gobernante huauquicunaca Jesusta catijcuna tandalla cachunca imatataj rurarcacuna?

¹¹ Apostolcuna causashca punllapica Cuerpo  Gobernante huauquicunaca Jerusalenpimi carcacuna. Paicunaca congregacionpi orden tiyachun, huauqui panicuna tandalla cachunmi ayudarcacuna (Hechos 2:42). Por ejemplo, huata 49-pimi huaquin huauqui panicunaca circuncisionmantaca chꞌican chꞌican yuyaicunata charircacuna. Chaimi paicunaca Diospaj espíritu santo ayudachun saquircacuna. Huauqui panicuna chꞌicanyashca cajpica huillanaca sinchimi canman carca. Apostolcuna, ancianocunaca judiocuna cashpapish paicunapaj costumbrecunata, pi yachachishcacunataca mana catircacunachu. Ashtahuanpish Diospaj Quillcachishcacuna, Diospaj espíritu santo ayudachunmi mashcarcacuna (Hechos 15:1, 2, 5-20, 28). Diospaj ayudata mashcashcamantami paicuna ima decidishcataca bendiciarca. Chaimi congregacionpica tranquilo, tandalla causaita charircacuna. Shinallataj huillashpami catircacuna (Hechos 15:30, 31; 16:4, 5).

12. ¿Diospaj organizacionpi tranquilo causai, orden tiyashcataca ima shinataj yachai tucunchij?

¹² Cunan punllacunapipish Diospaj organizacionca huauqui panicunapish shuj orden tiyachun, tandalla causachunmi ayudacun. 15 de noviembre de 1895 huatapica inglés shimipimi Watch Tower revistapica shuj yachai llujshirca. Chaipica 1 Corintios 14:40-manta japishcami carca. “Decentemente y con orden” nishca temami carca. Chai revistapica: ‘Apostolcunaca Jesusta punta catijcunamanca congregacionpi orden tiyachunmi consejocunata curcacuna. Shinallataj ñaupaman Quillcachishcacunataca, ñucanchijta yachachingapajmi quillcashcacuna chaitami cazushpa catina canchij’ nircami (Romanos 15:4). Apostolcuna causashca punllacunapi shinallatajmi cunan punllacunapipish Diospaj organizacionca tandalla cachun, orden tiyachun ayudacun. Por ejemplo, maijan llajtaman rishpa o mai congregacionman rishpaca Huillaj revistata ima shina yachachijta, ima temamanta parlashcataca allimi yachanchij. Chaita yachashpami cushilla sintirinchij. Diospaj espíritu santomi cashna tandalla cachunca ayudan (Sofonías 3:9).

13. Santiago 3:17-pi nishca shimicunata yuyaipi charishpaca ¿imatataj tapurina canchij?

¹³ ¿Ñucanchijpish imallatataj rurai tucunchij? Diospaj espíritu santomi tandalla, tranquilo causachun ayudan. Chashna causachunmi Yayitu Diosca munan (Efesios 4:1-3). Chaimanta  cashna nishpa tapurishunchij: “¿Congregacionpica tandalla, tranquilo causachunchu ayudani? ¿Pushajcunatapish cazunatachu yachani? ¿Congregacionpi ima mingashcacunata pajtachijta ricushpaca ñucapichu confiancuna? ¿Huauqui panicunata ayudajchu cani? ¿Tucuipi puntualchu cani?” (Santiago 3:17-ta liyipai). Imapi mejoranata yachashpaca Jehová Dios paipaj espíritu santohuan ayudachunmi mañana canchij. Ñucanchij causaipi ima cambiocunata rurangapajpish Diospaj espíritu santo ayudachunmi saquina canchij. Chaita rurajpimi huauqui panicunaca ñucanchijtaca cꞌuyangacuna, valorangacunapish.

14. Colosenses 1:9, 10-pi nishca shinaca ¿Diosca Jesusta catijcunamanca paipaj munai maijan cashcata yachachunca ima shinataj ayudarca?

¹⁴ Apostolcuna causashca punllapica Jehová Diosca congregacionpimi paita sirvijcunataca yachachirca (Colosenses 1:9, 10-ta liyipai). Jesusca Diospaj espíritu santohuanmi paita catijcunataca ayudarca (Juan 14:16). Jesusta catijcunaca Diospaj espíritu santo ayudajpimi Diospaj Shimita alli intindircacuna. Shinallataj Jesús imata nishcata, imata rurashcata yuyarichunmi ayudarca. Jesús imallata rurashcacunataca Mateo, Marcos, Lucas, Juan librocunapimi ricui tucurcacuna. Chashnami paicunapaj feta sinchiyachircacuna. Jehová Diostapish, Jesustapish, huauqui panicunatapish ashtahuanmi cꞌuyarcacuna. Caipi yachashca shinaca Diosca paipaj pueblotami yachachinata munan (Salmos 32:8). Diosca paipaj huahuacuna paita rijsichun, cꞌuyachun, huiñaita causachunmi munan. Paipaj yachachishcacunata yachashpallami cai bendicioncunata chasqui tucunchij (Juan 17:3).

15. Isaías 2:2, 3-pi parlashca profecía ¿ima shina pajtarishcatataj ricushcangui?

¹⁵ Cunan punllacunapipish Jehová Diosca cai tucuri punllacunapajca tucui ladomanta gentecuna “urcuman huichiyanatami” huillarca. Chashna nishpaca gentecuna paita sirvijcunahuan tandanacushpa paimanta ashtahuan  yachanatami nisha nirca (Isaías 2:2, 3-ta liyipai). Cunan punllacunami cai profecía pajtarishcataca ricunchij. Jehová Diospaj alli religionlla tucui panda religioncunamanta yalli alli cashcatami ricunchij. Shinallataj sumaj, jatun micuita caracuj shinami Bibliamanta yachachicun (Isaías 25:6). Chaipajca “alli cazuj alli yuyaiyuj huauquicunatami” utilizan. Paicunaca chꞌican chꞌican conferenciacunahuan, huaquin yachaicunahuan, videocunahuan, hasta dibujocunahuanmi yachachincuna (Mateo 24:45, QC, 1989). Chaimi ñucanchijpish Jobpaj amigo Eliú shina cashna ninchij. Paica: ‘¿Pitaj Dios shina yachachijca tiyangari?’ nircami (Job 36:22).

16. ¿Diospaj yachachishcacunamanta beneficiaringapajca imatataj rurana canchij?

¹⁶ ¿Ñucanchijpish imallatataj rurai tucunchij? Diospaj espíritu santomi Biblia yachachishcacunata causaipi pajtachichun ayudanga. Salmista shina Jehová Diosta mañashunchij. Paica: “Mandaj Dioslla, quiquinpaj ñanta yachachihuayari. Quiquinpaj mana llullapimi purisha. Quiquinpaj shutita manchashpa causanata ñuca shungupi sinchiyachiyari” nircami (Salmos 86:11). Chaimanta Bibliata, Diospaj organización cushca publicacioncunatapish estudiashpa catishunchij. Pero yachanallataca mana munanchijchu. Chaipaj randica ima yachashcata causaipi pajtachishpa causashunchij. Diospaj espíritu santomi caita pajtachichunca ayudanga. Huauqui panicunatapish animashunchij. Paicunaca ñucanchij familiacunami can (Hebreos 10:24, 25). Tandanacuicunapi comentangapaj, pai mingashcata pajtachingapajca paipaj espíritu santotami ayudachun mañana canchij. Caicunata pajtachishpaca Jehová Diosta, paipaj Churita, paipaj ovejacunata cꞌuyashcatami ricuchishun (Juan 21:15-17).

17. ¿Diospaj organizacionpi apoyacushcataca ima shinataj ricuchinchij?

¹⁷ Ñallami Diospaj organizacionlla cai Allpapica saquiringa. Paipaj organizaciontaca paipaj espíritu santohuanmi ñaupajman pushacun. Chaimanta Diospaj organizacionta apoyashunchij. Tucui laya gentecunaman huillashpa Jehová Dios shina cꞌuyaita ricuchishunchij. Congregacionpipish orden tiyachun, tranquilo causai tiyachun ayudashunchij. Shinallataj Dios cushca yachaicunata estudiashpa ñucanchijta Yachachij Diosta uyashunchij. Chashnami Diablopaj mundota Jehová Dios tucuchijpica tranquilo sintirishun. Diospaj organizacionpi huauqui panicunahuan tandalla sirvishcamantapishmi cushilla sintirishun.