1. ¿Imapaqmi hinalla kallpanchakunanchik bautizasqaña kaspapas?

BAUTIZAKUSQANCHIKWANMI qawachirqanchik achka runakunapa qayllanpi Jehova Dios kuyasqanchikta hinaspa yupaychaqninkunawan kuska payta serviy munasqanchikta. * Kunanpas hinallam kallpanchakunanchik astawan Jehova Diosta kuyananchikpaq, chaynapi munaynin ruwakunanpaq yupaychaqninkunata yanapasqanmanta mana iskayrayanapaq.

2, 3. ¿Imayna Dios kasqantam yachanchik yupaychaqninkunata yanapawasqanchikwan?

² Yupaychaqninkunata Jehova Dios imayna yanapawasqanchikwanmi yachanchik imayna sunquyuq Dios kasqanta, ima munaynin kasqanta hinaspa imakuna allin utaq mana allin paypaq kasqanta.

³ Imayna yanapawasqanchikwanmi yachanchik “Jehova Diosqa mana pimanpas sayapakuq” kasqanta (Hech. 10:34). Payqa llapallanchikta kuyawaspanchikmi ñuqanchikrayku churin wañunanta munarqa (Juan 3:16; 1 Tim. 2:6). Paypa wañukusqanwan llapallan runakuna salvasqa kanankupaqmi Jehova Diosqa paymanta willakunanchikpaq yupaychaqninkunata yanapawanchik. Chaymantapas, “Jehova Diosqa manam chaqwa ruwaqchu, aswanqa hawkalla kananchikta munaqmi” (1 Cor. 14:33, 40). Chaymi kallpanchakunchik huk sunqulla hinaspa munasqanman hina yupaychanapaq. Yachanchiktaqmi, “Jehova Diosqa yachachiwaqninchik”  kasqanta (Is. 30:20, 21). Chaymi yupaychaqninkunaqa paymanta yachachinchik. Kay yachachikuypim yachasunchik apostolkunapa tiemponpi hinaspa kunan tiempopi Jehova Diosqa mana pimanpas sayapakuq kasqanmanta, mana chaqwa ruwaq kasqanmantawan hawka kananchikta munasqanmanta hinaspa yachachiwaqninchik kasqanmanta. Yachasuntaqmi kay tiempopi yupaychaqninkunata atiyninwan imayna yanapawasqanchikmantapas.

4. Hechos 1:8 nisqanman hinaqa, ¿imatam Jesusqa qatiqninkunaman kamachirqa? ¿Sapallankuchu chayta ruwananku karqa?

⁴ ¿Imaynatam Jehova Diosqa chayna kasqanta qawachirqa apostolkunapa tiemponpi? Chaytam qawachirqa llapallan runakunaman willakunanpaq churin Jesusta kamachimusqanwan (Luc. 4:43). Jesusñataqmi qatiqninkunata kamachirqa sumaq willakuymanta kay pachapa “cantonkama willakunankupaq” (qaway Hechos 1:8). Chay ruwaytaqa manamá kikillankumantaqa atinmankuchu karqa, chaymi Jesus nirqa atiyninwan utaq chuya espiritunwan Jehova Dios yanapananmanta (Juan 14:26; Zac. 4:6).

5, 6. ¿Imaynatam Jehova Diosqa Jesuspa qatiqninkunata yanaparqa?

⁵ Jesuspa qatiqninkunam Diospa atiyninta chaskirqaku 33 kaq watapi. Chaymi Jehova Diosmanta willakuyta qallaykurqaku, hinaptinmi manapas unaypi achka runakuna Jesuspa qatiqnin karqaku (Hech. 2:41; 4:4). Chiqnisqa kaspankupas manam hukmanyarqakuchu, aswanqa Dios yanapaykunanpaq mañakuspankum kaynata nirqaku: “Serviqnikikunata kallpanchawayku mana manchakuspa palabraykimanta hinalla rimanaykupaq”, nispa. Chaymi Jehova Diosqa atiyninwan yanaparqa mana manchakuspanku hinalla willakunankupaq (Hech. 4:18-20, 29, 31).

⁶ Chaymantapas, chay tiempopiqa manam kunan tiempopi hinachu achka qillqakuna karqa Diosmanta willakunankupaqqa. Chaywanpas Dios yanapaptinmi huk rimayniyuq runakunaman willakurqaku. Chayraykum manapas unaypi ‘sumaq willakuykunaqa enteron kay pachapi willakusqaña kachkan’ (Col. 1:6, 23).

7. Pasaq watakunapi iñiqmasinchikkunaqa, ¿imaynatam yacharqaku Diosmanta runakunaman willakunankuta? ¿Imatam ruwarqaku?

⁷ ¿Imaynatam Jehova Diosqa mana pimanpas sayapakuq kasqanta qawachin kunan tiempopi? Llapallan runakunaman willakunapaq yanapawaspanchikmi hinaspa palabranwan yachachiwaspanchikmi. Chaypim willawanchik Jesuspa willakusqanmanta hinaspa qatiqninkuna willakunankupaq Jesuspa kamachisqanmanta (Mat. 28:19, 20). Chaywanmi pasaq watakunapi iñiqmasinchikkunaqa yacharurqaku Diosmanta llapallan runakunaman willakunankuta. Chaymi 1881 watapa julio killanpi lluqsiq ingles rimaypi Willakuq qillqa kaynata nirqa: “Qayawarqanchikqa hinaspa akllawarqanchikqa manam riqsisqa hinaspa imapas kapuqniyuq kanapaqchu, aswanqa tukuy imapas kapuqninchikwan hinaspa kallpanchikwan Diosmanta willakunapaqmi”, nispa. 1919 watapi lluqsiq huk qillqanchikpas kaynatam nirqa: “Enteron allpa pachapi Diosmanta willakuy sasa rikchakuptinpas Diospa yanapakuyninwanqa atisunmi”, nispa. Chay tiempopi iñiqmasinchikkunaqa apostolkunapa tiemponpi iñiqkuna hinam tukuy sunqunkuwan Diosmanta willakurqaku. Manamá iskayrayarqakuchu llapallan runakunaman willakunankupaq atiyninwan Dios yanapananmantaqa. Ñuqanchikpas manamá chaymantaqa iskayrayanchikchu.

8, 9. ¿Imakunawanmi ñawpaqtapas chaynataq kunanpas Diospa serviqninkunaqa paymanta willakuchkanchik?

⁸ Ñawpaq tiempopi iñiqmasinchikkunam  Jehova Diosmanta willakurqaku qillqakunawan, videokunawan, tocadisco hina aparatokunawan, parlanteyuq carrokunawan hinaspa wayra wasintakama. Kunanñataqmi Diosmanta willakunapaqqa servichikunchik internetta hinaspa huk aparatokunata. Chaymantapas, qillqanchikkunawan videonchikkunam achka-achka rimaykunapi kachkan, chaynapi llapallan runakuna kikinkupa rimayninpi Diosmanta yachanankupaq. Chaywanmi Jehova Diosqa mana pimanpas sayapakuq kasqanta qawachin. Payqa ñam nirqaña ‘llapallan nacionkunaman, kastakunaman, tukuy rikchaq rimayniyuqkunaman hinaspa lliw llaqtakunaman’ sumaq willakuy willakusqa kananmanta (Apoc. 14:6, 7).

⁹ Wakin runamasinchikkunataqa manamá wasinkupiqa tarinchikchu Diosmanta willanapaqqa. Chaymi Diospa llaqtanpi punta apaqkuna tantiarurqaku achka runakunapa kasqanpi carretachakunawan Diosmanta willakunapaq. Puntatam qallaykurqaku Francia nacionpi, chayqa karqa 2001 watapim. Chaymantam huk llaqtakunapipas chayna carretachakunawan willakuyta qallaykurqaku. Chaymantañataqmi Estados Unidos nacionpipas achka runakunapa kasqanpi chayna willakuyta qallaykurqaku, chayqa karqa 2011 watapim. Chaynata willakuspankum huk watallapi qururqaku 102.129 librokunata hinaspa 68.911 Willakuq hinaspa ¡Rikchariy! qillqakunata, 4.701 runakunañataqmi bibliamanta astawan yachayta munarqaku. Diospa llaqtanpi punta apaqkunaqa manamá iskayrayarqakuchu chayqa Jehova Diospa yanapakuyninwan kasqantaqa. Chayraykum tantiarurqaku enteron allpa pachapiña carretachakunawan willakunapaq.

10. ¿Imatam ruwananchik Diosmanta allinta willakunapaq?

¹⁰ ¿Imatam ruwananchik? Huñunakuyman rispayá yachachikuykunata allinta uyarisunchik, chaypim yachachiwanchik Diosmanta imayna willakunapaq. Chaymantapas, iñiqmasinchikkunawan kuskayá Diosmanta willakuq lluqsisun. Paykunam yanapawasun hinaspa kallpanchawasun Diosmanta allinta willakunapaq. Imaña-haykaña kaptinpas hinallayá Diosmanta willakusun. Zacarias 4:6 nisqanman hinataqmi Diospa munaynintaqa ruwanchik  paypa atiyninwan, manam kikillanchikmantachu.

11. ¿Imaynatam Diospa llaqtanpi punta apaqkunaqa iñiqkunata yanaparqaku huk sunqulla kanankupaq?

¹¹ ¿Imaynatam Jehova Diosqa chayna kasqanta qawachirqa apostolkunapa tiemponpi? Jehova Diosmi punta apaqkunata yanaparqa, chaynapi yupaychaqninkuna huk sunqulla kanankupaq (Hech. 2:42). 49 watapim iñiqkuna iskayrayarqaku señalachikuymanta, hinaptinmi punta apaqkunaqa chaymanta allinta tantiarqaku Diospa yanapakuyninwan. Apostolkunawan wakin punta apaqkunaqa judio kaspankupas manam kikillankupichu nitaq llaqtamasillankupichu piensarqaku. Manataqmi abuelonkupa imapas ruwasqankuwanchu utaq yachachisqankuwanchu aysachikurqaku, aswanqa Diostam mañakurqaku atiyninwan yanapaykunanpaq, hinaspapas Diospa palabranmantam allinta yacharqaku (Hech. 15:1, 2, 5-20, 28). Jehova Dios yanapaptinmá chay sasachakuymantaqa allinta tantiarqaku. Chaymi iñiqkunaqa huk sunqulla karqaku, hinaspapas Diosmantam hinalla willakurqaku (Hech. 15:30, 31; 16:4, 5).

12. ¿Imaynatam yachanchik huk sunqulla kasqanchikta?

¹² ¿Imaynatam Jehova Diosqa mana chaqwa ruwaq hinaspa hawkayayta munaq kasqanta qawachin kunan tiempopi? Payqa hinallam yanapawachkanchik allin hinaspa hawka kawsakunanchikpaq. 1895 watapa noviembre killanpim ingles rimaypi Willakuq qillqapi lluqsimurqa “Tukuy imayá allin ruwasqa kachun, amayá chaqwa-chaqwachu” niq yachachikuy. Chaymi hurqusqa karqa 1 Corintios 14:40 nisqanmanta. Chay qillqapim kaynata nirqa: “Apostolkunaqa iñiqkunamanmi allinta yachachirqaku imapas mana chaqwa-chaqwa ruwasqa kananpaq [...]. Kasukunanchikmi yachachiwananchikpaq qillqasqa kaqkunataqa”, nispa (Rom. 15:4). Apostolkunapa tiemponpi hinam kunan tiempopipas allinta ruwanchik imatapas, hinaspapas huk sunqullam kanchik. Maypiña kaq iñiqmasinchikkunawan huñunakuptinchikpas Willakuq qillqamanta sapa semana yachachikuykunaqa hina kaqllam. Diospa atiyninwanmá tukuy chaykunaqa ruwakun (Sof. 3:9).

13. Santiago 3:17 nisqanman hinaqa, ¿imakunatam tapukunanchik?

 ¹³ ¿Imatam ruwananchik? Jehova Diospa munasqanman hinam huk sunqulla kanapaq anchata kallpanchakunanchik (Efes. 4:1-3). Chayraykum tapukunanchik: “¿Hawka hinaspa huk sunqullachu iñiqmasiykunawan kawsakuni? ¿Kasukunichu punta apaqkunata? ¿Iñiqmasiykunaqa mana iskayrayaspanchu asuykamuwan utaq imatapas niwan? ¿Kallpanchakunichu hukkunata yanapanaypaq hinaspa maymanpas tiempollanpi chayanaypaq?”, nispa (qaway Santiago 3:17). Imapipas kallpanchakunanchikraq kaptinqa Jehova Diostayá mañakusun atiyninwan yanapawananchikpaq. Chayman hina ruwaptinchikqa iñiqmasinchikkunapas astawanmi kuyawasun.

14. Colosenses 1:9, 10 nisqanman hinaqa, ¿imaynatam Jehova Diosqa yupaychaqninkunata yanaparqa?

¹⁴ ¿Imaynatam Jehova Diosqa chayna kasqanta qawachirqa apostolkunapa tiemponpi? Diosqa munanmi paymanta yachananchikta, chaynapi riqsispanchik hinaspa kuyaspanchik wiñaypaq kawsakunapaq (Sal. 32:8; Juan 17:3). Chaypaqmá payqa tukuyta quwanchik. Diosqa apostolkunapa tiemponpiqa punta apaqkunawanmi lliw yupaychaqninkunata yachachirqa (qaway Colosenses 1:9, 10). Jesuspa nisqanman hinam yupaychaqninkunataqa Diosqa yanaparqa atiyninwan (Juan 14:16). Chaynapi palabranmanta allinta yachanankupaq hinaspa Jesuspa lliw nisqankunatawan ruwasqankunata yuyarinankupaq. Chaymantam tukuy chaykunaqa bibliapi qillqasqa karqa. Tukuy chaykunata yachasqankuraykum allin iñiyniyuq karqaku. Astawantaqmi kuyarqaku Jehova Diosta, churin Jesusta hinaspa iñiqmasinkuta.

15. ¿Imaynatam Isaias 2:2, 3 nisqan cumplikusqanta kunan qawachkanchik?

¹⁵ ¿Imaynatam Jehova Diosqa kunan tiempopi yachachiwanchik hinaspa tukuyta quwanchik? Payqa nirqañam tukupay tiempopi llapallan nacionkunamanta runakuna  payman asuykunankumanta, chaynapi yachachisqa kanankupaq (qaway Isaias 2:2, 3). Chayna kasqantamá kunan qawachkanchik. Wara-waranqantin runakunam miskillaña mikuyta mikuchkaq hina Jehova Diosmanta yachachkanchik (Is. 25:6). Paymi ‘allin ruwaq yuyayniyuq sirvientewan’ utaq llaqtanpi punta apaqkunawan tukuy rikchaq mikuyta hina quwachkanchik qillqakunata, yachachikuykunata, videokunata hinaspa tukuy imata (Mat. 24:45). Chaymi Jobpa amistadnin Eliu hina Diosmanta kaynata ninchik: “¿Yaqachu maynaña allin yachachiqpas pay hina kanman?”, nispa (Job 36:22).

16. ¿Imatam ruwananchik Jehova Diosmanta astawan yachanapaq?

¹⁶ ¿Imatam ruwananchik? Kallpanchakunanchikmi Diosmanta astawan yachanapaq, hinaptinqa paymi atiyninwan yanapawasun kasukunanchikpaq. Chaypaqqa Salmos qillqaq hinam Jehova Diosta mañakunanchik. Paymi nirqa: ‘Taytalláy Jehova, ñannikita riqsichillaway chiqap kaqnikipi purinaypaq, allin sunqutaña quykullaway sutikita hatunchanaypaq’, nispa (Sal. 86:11). Chaynaqa, Jehova Diospa yachachikuykuna quwasqanchikta astawan yachanapaqyá kallpanchakusun. Ichaqa manam yachayllachu-yachananchik, aswanqa yuyaymanaspam chayman hina kawsakunanchik. Kallpanchasuntaqyá iñiqmasinchikkunatapas (Heb. 10:24, 25). Diostayá mañakusun huñunakuypi sunqumanta rimarinanchikpaq hinaspa chaypi yachachinanchikpaq. Chaykunataqa ruwananchik payta, churin Jesusta hinaspa iñiqmasinchikkunata kuyaspanchikmi (Juan 21:15-17).

17. ¿Imatam Jehova Diosta yupaychaqkunaqa ruwananchik?

¹⁷ Hamuq tiempopiqa Jehova Diosta yupaychaqkunallañam kay allpa pachapiqa kawsasunchik. Chaynaqa, ¿imatam kunan ruwananchik? Diosta qatipakuspayá kuyakuq kaspa hinaspa mana pimanpas sayapakuspa lliwman willakusun. Iñiqmasinchikkunawanyá huk sunqulla kasun. Chaymantapas, Jehova Diospa tukuy ima yachachikuykuna quwasqanchikta yachanapaqyá kallpanchakusun. Chaynapim satanaspa munaychakusqan tukuy mana allinkuna chinkaptinpas mana manchakusunchu. Iñiqmasinchikkunawan kuskamá Jehova Diosta hinalla yupaychasun.