1. Со мора понадари да те керен о крстиме христијања?

ДАЛИ сиан крстимо? Ако оја, тегани јавно сикавѓан англо јавера кај иси тут вера ко Јехова хем кај мангеа те служине леске сар дело тари лескири организација. * Џанѓола пе, мора понадари да те бајраре тли вера ко Јехова. Освен адава, мора понадари да те овел тут доверба кај о Јехова водинела пле организација авдиве.

2-3. Сар о Јехова водинела пле организација авдиве? Вакер примерија.

² О Јехова водинела пле организација ко склад пле намераја хем мерилонцар. Таро начин сар керела адава, дикхјона лескере бут шуже особине. Те дикха трин лендар.

³ Прво, „о Девел нане пристрасно“ (Дела 10:34). Таро мангипе о Јехова денѓа пле Чхаве сар откупно жртва сариненге (1. Тим. 2:6; Јован 3:16). О Јехова користинела пле народо те проповединел о шукар хабери околенге со мангена те шунен. Ко асавко начин, ов поможинела кобор со шај повише манушенге те овел лен корист тари откупнина, или јавере лафенцар те овен спасиме. Дујто, о Јехова тано Девел башо редо хем мир (1. Кор. 14:33, 40). Адалеске, шај те очекујна кај адала со служинена леске керена адава ко организиримо начин хем ко мир. Трито, о Јехова тано о Најбаро Учители (Иса. 30:20, 21). Адалеске, лескири организација трудинела пе те сикавел е јаверен башо лескоро Лафи — хем ко собрание хем ки  служба. Сар о пхраља хем о пхења таро христијанско собрание ко прво веко сикавѓе акала трин особине е Јеховаскере? Сар е Јеховаскоро народо сикавела акала особине ко авдисутно време? Хем сар шај о свети дух те поможинел аменге те служина заедно е Јеховаскере организацијаја авдиве?

4. Спрема Дела 1:8, со заповединѓа о Исус пле следбениконге, хем сави помош ваљани сине те добинен?

⁴ Ко прво веко. И порака со проповединела сине о Исус дела сине надеж са е манушенге (Лука 4:43). Ов заповединѓа пле следбениконге те продолжинен и бути која со почминѓа ла ов, а адаја тани те сведочинен „ко најдур тхана ки пхув.“ (Читин Дела 1:8.) Џанѓола пе, ола нашти сине те керен акава пле силаја. Ка ваљани сине ленге свети дух — „о помошнико“ кова со ветинѓа ле ленге о Исус (Јован 14:26; Зах. 4:6).

5-6. Ко кола начинија о свети дух поможинѓа е Исусескере следбениконге?

⁵ Е Исусескере следбеникија добинѓе свети дух ки Педесетница, 33 берш а.е. Адалеске со сине лен е Девлескоро духо, ола одма почминѓе те проповединен хем башо кратко време, некобор милја мануша прифатинѓе о шукар хабери (Дела 2:41; 4:4). Кеда почминѓе те противинен пе ленге, ола на дарандиле него родинѓе помош таро Девел. Ола молинѓе пе: „Поможин тле слугенге понадари да храбро те вакерен тло лафи“. Откеда пхердиле свети дух, понадари да храбро проповединѓе е Девлескоро Лафи (Дела 4:18-20, 29, 31).

⁶ Е Исусескере ученикон сине лен јавера да проблемија. На пример, на сине лен бут копие таро света списија. А исто аѓаар на сине лен публикацие со објаснинена е Девлескоро Лафи, сар со иси амен авдиве. Освен адава, о ученикија ваљани сине те проповединен е манушенге со керена лафи ко различна чхибја. Иако сине лен акала проблемија, акала ревна ученикија керѓе адава со дикхјола сине сар нешто со нашти те керел пе — само околу 30 бершенге успејнѓе те проповединен о шукар хабери „са е манушенге тело небо“ (Кол. 1:6, 23).

7. Англедер повише таро 100 берша, сар е Јеховаскере слуге џанле со очекујнела сине лендар о Девел, хем со керѓе?

⁷ Ко амаро време. О Јехова понадари да водинела пле народо хем дела ле сила те керел лескири волја. Адава керела ле главно преку и Библија, која со о свети дух поможинѓа те пишинел пе. Ки Библија читинаја баши е Исусескири служба хем баши заповед со денѓа ла пле учениконге те продолжинен е проповедибаја со почминѓа ле ов (Мат. 28:19, 20). Панда ко јули 1881 берш, ки Стражарско кула пишинела сине: „О Јехова на викинѓа амен, ни на помазинѓа амен те шај те добина чест таро мануша хем те барваљова, него те користина са со иси амен те шај те проповедина о шукар хабери“. Ки брошурка Околенге сој дендо о проповедибе, која со иклили 1919 берш, пишинела сине: „Иако иси бут бути, адаја тани е Господарескири, хем ов ка дел амен сила те кера ла“. Исто сар о прва христијања, акала пхраља сине храбра хем бут трудинѓе пе ки акаја бути соске сине увериме кај о свети дух ка поможинел ленге те проповединен различна манушенге. Амен да авдиве сием увериме кај о свети дух ка поможинел аменге.

8-9. Кола методе користинѓа е Јеховаскири организација те шај те ширинел о шукар хабери ко цело свето?

⁸ Е Јеховаскири организација користинѓа о најшукар алатке те шај те ширинел о шукар хабери. Ко акала алатке сине вклучиме печатиме публикацие, и „Фотодрама башо створибе“, грамафонија, врдија со сине лен звучникија хем радиоемисие, а англедер несаво време користинена пе електронска уредија хем интернет. Исто аѓаар, авдиве е Девлескири организација превединела публикацие ко  бут повише чхибја него поангле! Соске? Те шај најразлична мануша те шунен о шукар хабери ки пли чхиб. О Јехова нане пристрасно. Ов англедер вакерѓа кај о шукар хабери ка овел проповедимо „секоле нацијаке, племеске, чхибјаке хем народоске“ (Отк. 14:6, 7). Ов мангела и порака башо Царство те шунен ла сарине.

⁹ А сој околенцар со живинена ко зграде коте со иси обезбедување или коте со о главно удар тано пханло? Те шај ола да те шунен о шукар хабери, е Јеховаскири организација почминѓа те користинел различна методе проповедибаске. На пример, ко 2001 берш, о Водечко тело одобринѓа те користинен пе количке хем штандија баши литература, прво ки Франција а после ко јавера тхана. Сине бут шукар резултатија. Ко 2011 берш, ко САД почминѓа јекх пробно програма сведочибаске ко јекх таро најпрометна тхана ки диз Њујорк. Ко прво берш, сине денде 102.129 лила хем 68.911 списанија. А исто аѓаар, 4.701 мануша родинѓе те проучинен и Библија! Јасно тано кај о Јехова користинѓа пло свети дух те поддржинел са акава. Адалеске о Водечко тело одобринѓа о пхраља хем о пхења таро цело свето те користинен количке хем штандија сведочибаске.

10. Со ка поможинел аменге пошукар те кера и служба?

¹⁰ Со шај те кере ту? Трудин тут те овел тут целосно корист таро поуке со о Јехова дела лен аменге ко христијанска состанокија. Редовно проповедин е пхраленцар хем е пхењенцар тари тли група проповедибаске. Ола шај те поможинен туке те ове пошукар ки служба хем те охрабринен тут пле шукар примереа. Продолжин те проповедине иако нане локхо. Сар со дикхаја таро стихо ко кова со темелинела пе акаја статија, амен на служинаја е Јеховаске амаре силенцар, него кераја лескири волја аѓаар со поможинела амен лескоро свети дух (Зах. 4:6). Ма те бистра, и бути со кераја ла тани е Девлескири.

11. Сар о пхраља таро водечко тело ко прво веко соработинѓе те шај те овел редо ко христијанско собрание?

¹¹ Ко прво веко. О водечко тело ко Ерусалим сине ко јекхипе хем заедно соработинена сине те шај те овел редо хем мир машкар  е Девлескере слуге (Дела 2:42). На пример, ко 49 берш а.е., бут христијања сине лен различно мислење башо адава дали секој со служинела е Јеховаске мора те овел обрежимо. Адалеске о водечко тело водимо таро свети дух дискутиринѓа башо акава пучибе. Ако ко собрание ачхола сине различно мислење баши акаја бути, адава ка влијајнел сине негативно ко проповедибе. Иако ола сине Евреија, о апостолија хем о старешине на дозволинѓе упри ленде те влијајнен о еврејска традицие хем окола со упорно сикавена е манушен башо акала традицие. Наместо адава, родинѓе водство таро е Девлескоро Лафи хем таро свети дух те шај те анен исправно одлука (Дела 15:1, 2, 5-20, 28). Саво сине о резултати? О Јехова денѓа берекети ки ленгири одлука, сине лен мир хем јекхипе ко собрание хем понадари да проповединена сине о шукар хабери (Дела 15:30, 31; 16:4, 5).

12. Со сикавела кај авдиве ки е Девлескири организација чаче иси редо хем мир?

¹² Ко амаро време. Е Јеховаскири организација керела са со шај те овел редо хем мир машкар е Девлескоро народо. Панда ко 1895 берш, ки Сионско Стражарско кула таро 15 ноември иклили статија е насловеа „Пристојно хем аѓаар сар сој о редо“, темелими ко стихо таро 1. Коринќаните 14:40. Ки акаја статија пишинела сине: „О апостолија дена сине е собраниеске таро прво веко бут упатствија башо редо... Важно тано внимателно те шуна са адава со некогаш сине пишимо баши амари поука“ (Рим. 15:4). Авдиве да е Јеховаскири организација трудинела пе бут те шај те овел асавко редо хем мир сар со сине ко христијанско собрание ко прво веко. На пример, ако сиан присутно ко Проучибе и Стражарско кула ко јавер собрание — па чак ки јавер пхув — ка џане сар ка икерел пе адава состанок хем баши која статија ка керел пе лафи. Одма ка осетине тут сар те пхене кхере сиан! Само е Девлескоро духо шај те керел те овел асавко јекхипе! (Соф. 3:9).

13. Поврзимо е стихоја таро Јаков 3:17, со ваљани те пуча амен?

¹³ Со шај те кере ту? О Јехова мангела лескере слуге „те икерен о јекхипе е духоскоро, ко мир кова со поврзинела [лен]“ (Еф. 4:1-3). Адалеске пуч тут: „Дали ме да керава те овел  ко собрание јекхипе хем мир? Дали сиум послушно околенге со предводинена? Дали шај о јавера те потпринен пе ки манде, посебно ако иси ман несаве одговорностија ко собрание? Дали точно ко време завршинава мле задаче хем дали секогаш сиум спремно те поможинав е јаверенге?“ (Читин Јаков 3:17.) Ако дикхеа кај шај те ове пошукар ко несаве буќа, молин тут башо свети дух. Кобор повише дозволинеа те влијајнел упри туте хем упро тле постапке, добором повише о пхраља хем о пхења ка манген тут хем ка ценинен тут.

14. Спрема Колошаните 1:9, 10, сар о Јехова сикавела сине пле народо ко прво веко?

¹⁴ Ко прво веко. О Јехова мангела те сикавел пле народо (Пс. 32:8). Ов мангела те пенџара ле, те манга ле хем те живина вечно сар лескере мангле чхаве. Са акава шај те овел само ако дозволинаја ов те сикавел амен (Јован 17:3). Ко прво веко, о Јехова сикавела сине е манушен преку о христијанско собрание. (Читин Колошаните 1:9, 10.) О свети дух, или „о помошнико“ кова со ветинѓа ле о Исус, бут поможинѓа ленге ко адава (Јован 14:16). Поможинѓа е учениконге пошукар те хаљовен е Девлескоро Лафи, хем сетинкерѓа лен ко бут буќа со о Исус вакерѓа хем керѓа, а кола со покасно сине пишиме ко евангелија. Адава со сиклиле акала христијања бајрарѓа ленгири вера хем ленгоро мангипе спрема о Девел, спрема лескоро Чхаво хем спрема о јавера.

15. Ко кола начинија дикхљан кај о Јехова исполнинела пло ветување сој пишимо ко Исаија 2:2, 3?

¹⁵ Ко амаро време. О Јехова вакерѓа англедер кај „ко последна диве“, мануша таро са о народија ка кхеден пе ки лескири симболично планина те шај те овен сикавде башо лескере друмија. (Читин Исаија 2:2, 3.) Амен акана дикхаја сар исполнинела пе акава пророштво. Амен шај те дикха кај и чачутни религија тани бут пошукар тари са о ховавне религие. Хем кобор бут духовно храна дела  амен о Јехова! (Иса. 25:6). Преку „о верно хем разборито робо“, ов дела амен информацие, кола со авена ко различна начинија. На пример, шај те читина статие, те шуна говорија, те дикха видеоклипија па чак цртана филмија (Мат. 24:45). Осетинаја амен исто сар о Елиу, е Јовескоро амал, кова со башо Девел вакерѓа: „Иси ли учители сар лесте?“ (Јов 36:22).

16. Со ка поможинел туке те ове духовно зрело?

¹⁶ Со шај те кере ту? Е Девлескоро духо ка поможинел туке те применине са адава со читинеа хем со сикљовеа тари Библија. Молин тут сар о псалмисти, кова со вакерѓа: „Сикав ман Јехова башо тло друмо! Ка џав ко тло чачипе. Поможин манге цело вилеа те дарав таро тло анав!“ (Пс. 86:11). Адалеске понадари да ле и духовно храна која со о Јехова дела ла аменге преку пло Лафи хем преку пли организација. Џанѓола пе, тли цел нане тани само те џане повише буќа. Наместо адава, ваљани о чачипе те овел ко тло вило хем те применине адава ко тло живото. Е Јеховаскоро духо шај те поможинел туке те кере адава. Исто аѓаар, ваљани те охрабрине тле пхрален хем пхењен (Евр. 10:24, 25). Соске? Адалеске со ола тане тли духовно фамилија. Молин тут о Јехова те поможинел туке пле свети духоја те де искрена коментарија ко состанокија хем те де тло најшукар кеда иси тут несаво учество ки програма. Аѓаар ка сикаве е Јеховаске хем лескере Чхавеске кај мангеа ленгере скапоцена „бакхрен“ (Јован 21:15-17).

17. Ко кола начинија шај те сикаве кај верно поддржинеа е Јеховаскере организација?

¹⁷ Панда хари, и единствено организација со ка постојнел ки Пхув ка овел водими таро е Девлескоро духо. Адалеске, ревно соработин е Јеховаскере организацијаја. Сикав кај сиан непристрасно исто сар о Девел адалеа со ка вакере о шукар хабери са е манушенге. Адалеа со ка поможине те овел јекхипе ко собрание ту да ка ове сар о Јехова кова со мангела о редо хем о мир. Шун тле Најбаре Учителе аѓаар со ка сикљове таро са о информацие со дела амен ов. Тегани, кеда ка авел о крајо е Сатанаскере светоске, ту нане те дара. Наместо адава, храбро ка терѓове машкар са о јавера кола со верно служинена е Јеховаске сар дело тари лескири организација.