1. So mora ponadari da te keren o krstime hristijanja?

DALI sian krstimo? Ako oja, tegani javno sikavgjan anglo javera kaj isi tut vera ko Jehova hem kaj mangea te služine leske sar delo tari leskiri organizacija. * Džangjola pe, mora ponadari da te bajrare tli vera ko Jehova. Osven adava, mora ponadari da te ovel tut doverba kaj o Jehova vodinela ple organizacija avdive.

2-3. Sar o Jehova vodinela ple organizacija avdive? Vaker primerija.

² O Jehova vodinela ple organizacija ko sklad ple nameraja hem meriloncar. Taro način sar kerela adava, dikhjona leskere but šuže osobine. Te dikha trin lendar.

³ Prvo, „o Devel nane pristrasno“ (Dela 10:34). Taro mangipe o Jehova dengja ple Čhave sar otkupno žrtva sarinenge (1. Tim. 2:6; Jovan 3:16). O Jehova koristinela ple narodo te propovedinel o šukar haberi okolenge so mangena te šunen. Ko asavko način, ov pomožinela kobor so šaj poviše manušenge te ovel len korist tari otkupnina, ili javere lafencar te oven spasime. Dujto, o Jehova tano Devel bašo redo hem mir (1. Kor. 14:33, 40). Adaleske, šaj te očekujna kaj adala so služinena leske kerena adava ko organizirimo način hem ko mir. Trito, o Jehova tano o Najbaro Učiteli (Isa. 30:20, 21). Adaleske, leskiri organizacija trudinela pe te sikavel e javeren bašo leskoro Lafi — hem ko sobranie hem ki  služba. Sar o phralja hem o phenja taro hristijansko sobranie ko prvo veko sikavgje akala trin osobine e Jehovaskere? Sar e Jehovaskoro narodo sikavela akala osobine ko avdisutno vreme? Hem sar šaj o sveti duh te pomožinel amenge te služina zaedno e Jehovaskere organizacijaja avdive?

4. Sprema Dela 1:8, so zapovedingja o Isus ple sledbenikonge, hem savi pomoš valjani sine te dobinen?

⁴ Ko prvo veko. I poraka so propovedinela sine o Isus dela sine nadež sa e manušenge (Luka 4:43). Ov zapovedingja ple sledbenikonge te prodolžinen i buti koja so počmingja la ov, a adaja tani te svedočinen „ko najdur thana ki phuv.“ (Čitin Dela 1:8.) Džangjola pe, ola našti sine te keren akava ple silaja. Ka valjani sine lenge sveti duh — „o pomošniko“ kova so vetingja le lenge o Isus (Jovan 14:26; Zah. 4:6).

5-6. Ko kola načinija o sveti duh pomožingja e Isuseskere sledbenikonge?

⁵ E Isuseskere sledbenikija dobingje sveti duh ki Pedesetnica, 33 berš a.e. Adaleske so sine len e Devleskoro duho, ola odma počmingje te propovedinen hem bašo kratko vreme, nekobor milja manuša prifatingje o šukar haberi (Dela 2:41; 4:4). Keda počmingje te protivinen pe lenge, ola na darandile nego rodingje pomoš taro Devel. Ola molingje pe: „Pomožin tle slugenge ponadari da hrabro te vakeren tlo lafi“. Otkeda pherdile sveti duh, ponadari da hrabro propovedingje e Devleskoro Lafi (Dela 4:18-20, 29, 31).

⁶ E Isuseskere učenikon sine len javera da problemija. Na primer, na sine len but kopie taro sveta spisija. A isto agjaar na sine len publikacie so objasninena e Devleskoro Lafi, sar so isi amen avdive. Osven adava, o učenikija valjani sine te propovedinen e manušenge so kerena lafi ko različna čhibja. Iako sine len akala problemija, akala revna učenikija kergje adava so dikhjola sine sar nešto so našti te kerel pe — samo okolu 30 beršenge uspejngje te propovedinen o šukar haberi „sa e manušenge telo nebo“ (Kol. 1:6, 23).

7. Angleder poviše taro 100 berša, sar e Jehovaskere sluge džanle so očekujnela sine lendar o Devel, hem so kergje?

⁷ Ko amaro vreme. O Jehova ponadari da vodinela ple narodo hem dela le sila te kerel leskiri volja. Adava kerela le glavno preku i Biblija, koja so o sveti duh pomožingja te pišinel pe. Ki Biblija čitinaja baši e Isuseskiri služba hem baši zapoved so dengja la ple učenikonge te prodolžinen e propovedibaja so počmingja le ov (Mat. 28:19, 20). Panda ko juli 1881 berš, ki Stražarsko kula pišinela sine: „O Jehova na vikingja amen, ni na pomazingja amen te šaj te dobina čest taro manuša hem te barvaljova, nego te koristina sa so isi amen te šaj te propovedina o šukar haberi“. Ki brošurka Okolenge soj dendo o propovedibe, koja so iklili 1919 berš, pišinela sine: „Iako isi but buti, adaja tani e Gospodareskiri, hem ov ka del amen sila te kera la“. Isto sar o prva hristijanja, akala phralja sine hrabra hem but trudingje pe ki akaja buti soske sine uverime kaj o sveti duh ka pomožinel lenge te propovedinen različna manušenge. Amen da avdive siem uverime kaj o sveti duh ka pomožinel amenge.

8-9. Kola metode koristingja e Jehovaskiri organizacija te šaj te širinel o šukar haberi ko celo sveto?

⁸ E Jehovaskiri organizacija koristingja o najšukar alatke te šaj te širinel o šukar haberi. Ko akala alatke sine vklučime pečatime publikacie, i „Fotodrama bašo stvoribe“, gramafonija, vrdija so sine len zvučnikija hem radioemisie, a angleder nesavo vreme koristinena pe elektronska uredija hem internet. Isto agjaar, avdive e Devleskiri organizacija prevedinela publikacie ko  but poviše čhibja nego poangle! Soske? Te šaj najrazlična manuša te šunen o šukar haberi ki pli čhib. O Jehova nane pristrasno. Ov angleder vakergja kaj o šukar haberi ka ovel propovedimo „sekole nacijake, plemeske, čhibjake hem narodoske“ (Otk. 14:6, 7). Ov mangela i poraka bašo Carstvo te šunen la sarine.

⁹ A soj okolencar so živinena ko zgrade kote so isi obezbeduvanje ili kote so o glavno udar tano phanlo? Te šaj ola da te šunen o šukar haberi, e Jehovaskiri organizacija počmingja te koristinel različna metode propovedibaske. Na primer, ko 2001 berš, o Vodečko telo odobringja te koristinen pe količke hem štandija baši literatura, prvo ki Francija a posle ko javera thana. Sine but šukar rezultatija. Ko 2011 berš, ko SAD počmingja jekh probno programa svedočibaske ko jekh taro najprometna thana ki diz Njujork. Ko prvo berš, sine dende 102.129 lila hem 68.911 spisanija. A isto agjaar, 4.701 manuša rodingje te proučinen i Biblija! Jasno tano kaj o Jehova koristingja plo sveti duh te poddržinel sa akava. Adaleske o Vodečko telo odobringja o phralja hem o phenja taro celo sveto te koristinen količke hem štandija svedočibaske.

10. So ka pomožinel amenge pošukar te kera i služba?

¹⁰ So šaj te kere tu? Trudin tut te ovel tut celosno korist taro pouke so o Jehova dela len amenge ko hristijanska sostanokija. Redovno propovedin e phralencar hem e phenjencar tari tli grupa propovedibaske. Ola šaj te pomožinen tuke te ove pošukar ki služba hem te ohrabrinen tut ple šukar primerea. Prodolžin te propovedine iako nane lokho. Sar so dikhaja taro stiho ko kova so temelinela pe akaja statija, amen na služinaja e Jehovaske amare silencar, nego keraja leskiri volja agjaar so pomožinela amen leskoro sveti duh (Zah. 4:6). Ma te bistra, i buti so keraja la tani e Devleskiri.

11. Sar o phralja taro vodečko telo ko prvo veko sorabotingje te šaj te ovel redo ko hristijansko sobranie?

¹¹ Ko prvo veko. O vodečko telo ko Erusalim sine ko jekhipe hem zaedno sorabotinena sine te šaj te ovel redo hem mir maškar  e Devleskere sluge (Dela 2:42). Na primer, ko 49 berš a.e., but hristijanja sine len različno mislenje bašo adava dali sekoj so služinela e Jehovaske mora te ovel obrežimo. Adaleske o vodečko telo vodimo taro sveti duh diskutiringja bašo akava pučibe. Ako ko sobranie ačhola sine različno mislenje baši akaja buti, adava ka vlijajnel sine negativno ko propovedibe. Iako ola sine Evreija, o apostolija hem o starešine na dozvolingje upri lende te vlijajnen o evrejska tradicie hem okola so uporno sikavena e manušen bašo akala tradicie. Namesto adava, rodingje vodstvo taro e Devleskoro Lafi hem taro sveti duh te šaj te anen ispravno odluka (Dela 15:1, 2, 5-20, 28). Savo sine o rezultati? O Jehova dengja bereketi ki lengiri odluka, sine len mir hem jekhipe ko sobranie hem ponadari da propovedinena sine o šukar haberi (Dela 15:30, 31; 16:4, 5).

12. So sikavela kaj avdive ki e Devleskiri organizacija čače isi redo hem mir?

¹² Ko amaro vreme. E Jehovaskiri organizacija kerela sa so šaj te ovel redo hem mir maškar e Devleskoro narodo. Panda ko 1895 berš, ki Sionsko Stražarsko kula taro 15 noemvri iklili statija e naslovea „Pristojno hem agjaar sar soj o redo“, temelimi ko stiho taro 1. Korinkjanite 14:40. Ki akaja statija pišinela sine: „O apostolija dena sine e sobranieske taro prvo veko but upatstvija bašo redo... Važno tano vnimatelno te šuna sa adava so nekogaš sine pišimo baši amari pouka“ (Rim. 15:4). Avdive da e Jehovaskiri organizacija trudinela pe but te šaj te ovel asavko redo hem mir sar so sine ko hristijansko sobranie ko prvo veko. Na primer, ako sian prisutno ko Proučibe i Stražarsko kula ko javer sobranie — pa čak ki javer phuv — ka džane sar ka ikerel pe adava sostanok hem baši koja statija ka kerel pe lafi. Odma ka osetine tut sar te phene khere sian! Samo e Devleskoro duho šaj te kerel te ovel asavko jekhipe! (Sof. 3:9).

13. Povrzimo e stihoja taro Jakov 3:17, so valjani te puča amen?

¹³ So šaj te kere tu? O Jehova mangela leskere sluge „te ikeren o jekhipe e duhoskoro, ko mir kova so povrzinela [len]“ (Ef. 4:1-3). Adaleske puč tut: „Dali me da kerava te ovel  ko sobranie jekhipe hem mir? Dali sium poslušno okolenge so predvodinena? Dali šaj o javera te potprinen pe ki mande, posebno ako isi man nesave odgovornostija ko sobranie? Dali točno ko vreme završinava mle zadače hem dali sekogaš sium spremno te pomožinav e javerenge?“ (Čitin Jakov 3:17.) Ako dikhea kaj šaj te ove pošukar ko nesave bukja, molin tut bašo sveti duh. Kobor poviše dozvolinea te vlijajnel upri tute hem upro tle postapke, doborom poviše o phralja hem o phenja ka mangen tut hem ka ceninen tut.

14. Sprema Kološanite 1:9, 10, sar o Jehova sikavela sine ple narodo ko prvo veko?

¹⁴ Ko prvo veko. O Jehova mangela te sikavel ple narodo (Ps. 32:8). Ov mangela te pendžara le, te manga le hem te živina večno sar leskere mangle čhave. Sa akava šaj te ovel samo ako dozvolinaja ov te sikavel amen (Jovan 17:3). Ko prvo veko, o Jehova sikavela sine e manušen preku o hristijansko sobranie. (Čitin Kološanite 1:9, 10.) O sveti duh, ili „o pomošniko“ kova so vetingja le o Isus, but pomožingja lenge ko adava (Jovan 14:16). Pomožingja e učenikonge pošukar te haljoven e Devleskoro Lafi, hem setinkergja len ko but bukja so o Isus vakergja hem kergja, a kola so pokasno sine pišime ko evangelija. Adava so siklile akala hristijanja bajrargja lengiri vera hem lengoro mangipe sprema o Devel, sprema leskoro Čhavo hem sprema o javera.

15. Ko kola načinija dikhljan kaj o Jehova ispolninela plo vetuvanje soj pišimo ko Isaija 2:2, 3?

¹⁵ Ko amaro vreme. O Jehova vakergja angleder kaj „ko posledna dive“, manuša taro sa o narodija ka kheden pe ki leskiri simbolično planina te šaj te oven sikavde bašo leskere drumija. (Čitin Isaija 2:2, 3.) Amen akana dikhaja sar ispolninela pe akava proroštvo. Amen šaj te dikha kaj i čačutni religija tani but pošukar tari sa o hovavne religie. Hem kobor but duhovno hrana dela  amen o Jehova! (Isa. 25:6). Preku „o verno hem razborito robo“, ov dela amen informacie, kola so avena ko različna načinija. Na primer, šaj te čitina statie, te šuna govorija, te dikha videoklipija pa čak crtana filmija (Mat. 24:45). Osetinaja amen isto sar o Eliu, e Joveskoro amal, kova so bašo Devel vakergja: „Isi li učiteli sar leste?“ (Jov 36:22).

16. So ka pomožinel tuke te ove duhovno zrelo?

¹⁶ So šaj te kere tu? E Devleskoro duho ka pomožinel tuke te primenine sa adava so čitinea hem so sikljovea tari Biblija. Molin tut sar o psalmisti, kova so vakergja: „Sikav man Jehova bašo tlo drumo! Ka džav ko tlo čačipe. Pomožin mange celo vilea te darav taro tlo anav!“ (Ps. 86:11). Adaleske ponadari da le i duhovno hrana koja so o Jehova dela la amenge preku plo Lafi hem preku pli organizacija. Džangjola pe, tli cel nane tani samo te džane poviše bukja. Namesto adava, valjani o čačipe te ovel ko tlo vilo hem te primenine adava ko tlo životo. E Jehovaskoro duho šaj te pomožinel tuke te kere adava. Isto agjaar, valjani te ohrabrine tle phralen hem phenjen (Evr. 10:24, 25). Soske? Adaleske so ola tane tli duhovno familija. Molin tut o Jehova te pomožinel tuke ple sveti duhoja te de iskrena komentarija ko sostanokija hem te de tlo najšukar keda isi tut nesavo učestvo ki programa. Agjaar ka sikave e Jehovaske hem leskere Čhaveske kaj mangea lengere skapocena „bakhren“ (Jovan 21:15-17).

17. Ko kola načinija šaj te sikave kaj verno poddržinea e Jehovaskere organizacija?

¹⁷ Panda hari, i edinstveno organizacija so ka postojnel ki Phuv ka ovel vodimi taro e Devleskoro duho. Adaleske, revno sorabotin e Jehovaskere organizacijaja. Sikav kaj sian nepristrasno isto sar o Devel adalea so ka vakere o šukar haberi sa e manušenge. Adalea so ka pomožine te ovel jekhipe ko sobranie tu da ka ove sar o Jehova kova so mangela o redo hem o mir. Šun tle Najbare Učitele agjaar so ka sikljove taro sa o informacie so dela amen ov. Tegani, keda ka avel o krajo e Satanaskere svetoske, tu nane te dara. Namesto adava, hrabro ka tergjove maškar sa o javera kola so verno služinena e Jehovaske sar delo tari leskiri organizacija.