1. Σο πρέπει τι κερέν ο Χριστιανοί σο μπολντιλέ;

ΜΠΟΛΝΤΙΛΕΝ; Άμα βα, τουμαρέ μπολντιμάσαρ σικαντέν ανγκλάλ σαριλέντε ότι τθερένα πίστη κο Ιεχωβά ντα ότι μανγκένα τι υπηρετίνεν-λες λέσκε οργανωσιάσαρ. * Σίγουρα, πρέπει τι μπαριαρέν τουμαρί πίστη κο Ιεχωβά. Ντα πρέπει τι πακιάν ότι ι Ιεχωβάσκι οργάνωση κερέλα οντουβά σο μανγκέλα βοβ αντιβές.

2, 3. Σαρ οδηγίνελα ο Ιεχωβά πι οργάνωση αντιβές; Βακερέν παραδείγματα.

² Αντιβές, ο Ιεχωβά οδηγίνελα πι οργάνωση τροπόσαρ σο σικαβέλα σο Ντεβέλ ισί, σο τθερέλα πι γκοντιάτε τι κερέλ ντα καλά ισί λέσκε κανόνες. Κα βακεράς τριν ιδιότητες ι Ιεχωβάσκε σο ντικχάσα-λεν κι οργάνωση λέσκι.

³ Πρώτον, «ο Ντεβέλ να ξεχωρίνελα ι τζενέν». (Πράξ. 10:​34) Η αγάπη τσσιντιντάς ι Ιεχωβάς τι ντελ πι Τσσαβές “σαρ λύτρος σαριλένγκε”. (1 Τιμ. 2:6· Ιωάν. 3:​16) Ο Ιεχωβά αντράλ πι λαόσταρ βακερέλα ο λατσσέ αμπέρια σαρέ οντουλένγκε σο μανγκένα τι ασουνέν. Αντικάς, βοηθίνελα τι σώντιβεν καζόμ πιο μπουτ τζενέ αβέλα-πες. Δεύτερον, ο Ιεχωβά μανγκέλα ι ειρήνη ντα τι αβέν-πες ο πράγματα εκχέ σειράσαρ. (1 Κορ. 14:​33, 40) Οτθάρ, οντουλά σο υπηρετίνενα-λες πρέπει τι αβέν οργανωμέ ντα τι τθερέν ειρήνη σαρ λαός. Τρίτον, ο Ιεχωβά ισί ο «Μπαρό Εκπαιδευτής». (Ησ. 30:​20, 21) Οντουλέσκε, λέσκι οργάνωση κερέλα μπουτ μπουτί για τι σικλιαρέλ γιαβερέν λέσκε Λαφίσταρ, εμ αντρέ κι κχανγκιρί εμ κο έργος. Σαρ σικαντέ ανταλά τριν ιδιότητες ο πρώτοι Χριστιανοί; Σαρ σικαβένα ανταλά ιδιότητες ο Χριστιανοί αμαρέ ντιβεσέντε; Ντα σαρ βοηθίνελα-τουμέν ο άγιος πνεύμας καζόμ υπηρετίνενα λέσκε οργανωσιάσαρ αντιβές;

4. Σο βακερντάς ο Ιησούς πι μαθητένγκε τι κερέν, ντα καγιά βοήθεια κα τθερένας σαρ βακερέλα ο εδάφιος Πράξεις 1:8;

⁴ Κο μπρεσά κι πρώτε Χριστιανόνγκε. Ο λατσσέ αμπέρια σο βακερέλας ο Ιησούς κερένας ι τζενέν τι μπεκλεντίνεν πιο λατσσέ ντιβεσένγκε. (Λουκ. 4:​43) Ο Ιησούς βακερντάς πι μαθητένγκε τι κερέν ο έργος σο κερέλας βοβ, τι ντεν μαρτυρία «ατζέ-ντα κο τθαν σο ισί πιο ντουρ οπράλ κι πφουβ». (Διαβάνεν Πράξεις 1:8) Σίγουρα, ναστί κερένας ανταβά έργος κορκορέ. Έπρεπε τι τθερέν ο άγιος πνεύμας​—ι «βοηθός» σο βακερντάς λένγκε ο Ιησούς ότι κα ντέλας-λεν.​—Ιωάν. 14:​26· Ζαχ. 4:6.

5, 6. Σαρ βοηθιντάς ο άγιος πνεύμας ι Ιησούσκε μαθητέν;

⁵ Ο μαθητές ι Ιησούσκε λιντέ ο άγιος πνεύμας κι Πεντηκοστή κο μπρες 33 Κ.Χ. Ανταβά πνεύμας βοηθιντάς-λεν τι αρχίνεν τι κερέν έργος, ντα μπουτ σουγκό χιλιάδες τζενέ ασουντέ ο λατσσέ αμπέρια. (Πράξ. 2:​41· 4:4) Κάνα ο τζενέ γκιλέ λέντζαρ κόντρα, η νταρ να τσσιναντάς ι μαθητέν τι βακερέν ο λατσσέ αμπέρια, αλλά μανγκλέ βοήθεια κατά Ντεβέλ. Προσευχισάλε: «Βοήθινε τι υπηρετόν τι βακερέν το λάφι μπίνταρανες». Σοράν, πφερντιλέ άγιος πνεύμας ντα «βακερντέ ο λάφι ι Ντεβλέσκο μπίνταρανες».​—Πράξ. 4:​18-20, 29, 31.

⁶ Ο μαθητές ι Ιησούσκε τθερένας γιαβερά-ντα δυσκολίες. Για παράδειγμας, να τθερένας μπουτ Γραφές. Να τθερένας έντυπα σαρ τθεράσα αμέν αντιβές για τι βοηθίνεν-λεν τι αγαβέν ι Γραφή. Επίσης, ο μαθητές έπρεπε τι βακερέν ο λατσσέ αμπέρια μπουτέ διαφορετικέ τσσιμπέντε. Παρόλο σο τθερένας ανταλά δυσκολίες, οντουλά πιστοί μαθητές κερντέ κάτι σο ντικχίντιβελας ότι ναστί αβέλας-πες. Αντρέ 30 μπρεσέντε περίπου, βακερντέ ο λατσσέ αμπέρια «σαρί κι δημιουργία σο ισί τελάλ κατά ουρανός».​—Κολ. 1:6, 23.

7. Πριν από 100 ντα πιο μπουτ μπρεσά, σαρ τζανένας ο υπηρέτες ι Ιεχωβάσκε σο μανγκέλας λένταρ, ντα σο κερντέ;

⁷ Αμαρέ ντιβεσέντε. Ο Ιεχωβά ατζέκ ατζέκ οδηγίνελα ντα ντέλα ζορ πι λαός. Πιο μπουτ κερέλα-λες ανταβά αντράλ κατά Γραφή, σο γραφίντιλι λέσκε άγιε πνευμάσταρ. Κι Γραφή, ντικχάσα ο έργος ι Ιησούσκο ντα ι εντολή σο ντινάς πι μαθητέντε τι κερέν ο έργος σο κερέλας βοβ. (Ματθ. 28:​19, 20) Κο Ιούλιος 1881, η Σκοπιά (κι αγγλική) βακερντάας: «Ο Ιεχωβά να τραμπιντάς-αμέν για τι ισαρέν-αμέν ο τζενέ ή για τι χουλάνιβας, αλλά για τι ντας αμαρέ πραγματένταρ ντα αμαρέ ζοριάταρ, ντα για τι βακεράς ο λατσσέ αμπέρια». Κο βιβλιάριος Σε Ποιον Είναι Εμπιστευμένο το Έργο (To Whom the Work Is Entrusted), σο νικίστιλο κο 1919 ντα βακερέλας ι πφραλένγκε σαρ τι κερέν ο έργος, διαβάνασα: «Τθεράσα μπουτ έργος τι κεράς, αλλά ισί ι Κυριόσκο, ντα βοβ κα ντελ-αμέν ι ζορ τι κεράς-λες». Βα, σαρ ο πρώτοι Χριστιανοί, αντικάς ανταλά πφραλά-ντα ισινέ μπίνταρανε ντα κερντέ μπουτ μπουτί σόσκε ισινέ σίγουροι ότι ο άγιος πνεύμας κα βοηθίνελας-λεν τι βακερέν ο λατσσέ αμπέρια σαβέ τι μανγκές τζενένγκε. Αμέν-ντα ισινάμ σίγουροι ότι ο άγιος πνεύμας κα βοηθίνελ-αμέν αντιβές.

8, 9. Καλά πράγματα κερντάς η οργάνωση ι Ιεχωβάσκι για τι βακέρντιβεν πιο μπουτ τζενένγκε ο λατσσέ αμπέρια;

⁸ Η οργάνωση ι Ιεχωβάσκι χρησιμοποιηντάς ο πιο λατσσέ εργαλεία για τι βακερέλ ο λατσσέ αμπέρια. Μερικά εργαλεία ισινέ ο «Φωτόδραμας της Δημιουργίας», ο φωνογράφοι, ο αυτοκίνητα με μεγάφωνα, ο εκπομπές κο ραδιόφωνος, ντα ακανά ισί ο υπολογιστές ντα ο Ίντερνετ. Επίσης, η οργάνωση ι Ντεβλέσκι κερέλα ο πιο μπαρό μεταφραστικός έργος σο αβιλό-πες ποτές! Σόσκε; Για τι μπορίνεν σαβέ τι μανγκές τζενέ τι ασουνέν ο λατσσέ αμπέρια πουμαρέ τσσιμπάτε. Ο Ιεχωβά να ξεχωρίνελα ι τζενέν. Βακερντάας ότι ο λατσσέ αμπέρια κα βακέρντιβενας «σαρέ  κο τθεμά, κο φυλές, κο τσσιμπά ντα κο λαοί». (Αποκ. 14:6, 7) Μανγκέλα τι ασουνέν σαρέ ο τζενέ ο αμπέρια ι Βασιλειάκε.

⁹ Σο αβέλα-πες ι τζενέντζαρ σο ισί δύσκολος τι αρακχάς-λεν λένγκε κχερέντε επειδή μπορεί τι τζουβντιόνα πολυκατοικιέντε σο ισί λατσσές αρακχαντέ; Για τι ερεσέν ο αμπέρια ασακέ τζενέντε, η οργάνωση ι Ιεχωβάσκι αρχισάλι τι κερέλ έργος διάφορε τροπόντζαρ. Για παράδειγμας, κο 2001, ο Κυβερνών Σώμας βακερντάς ι πφραλένγκε κι Γαλλία τι αρχίνεν τι χρησιμοποιήνεν σταντ ντα γιαβερά πράγματα για τι ντεν αμαρέ έντυπα. Πιο σοράν, πφραλά γιαβερέ-ντα τθανέντε αρχισάλε τι κερέν έργος αντικάς. Ο πράγματα γκιλέ λατσσές. Κο 2011, ο πφραλά κο Ηνωμένες Πολιτείες αρχισάλε τι κερέν έργος εκχέ νεβέ τροπόσαρ εκχέ τθανέστε κι Νέα Υόρκη σο ισί μπερεκέτι τζενέ. Κο πρώτος μπρες, ντιντιλέ 102.129 βιβλία ντα 68.911 περιοδικά. Ντα 4.701 τζενέ μανγκλέ τι κερέν μελέτη! Σίγουρα, ο Ιεχωβά πι άγιε πνευμάσαρ βοηθιντάς τι αβέλ-πες ανταβά έργος. Οτθάρ, ο Κυβερνών Σώμας βακερντάς αμαρέ πφραλένγκε ντα πφενίνγκε σαρό κο ντουνιάς τι χρησιμοποιήνεν σταντ ντα γιαβερά πράγματα για τι ντεν αμαρέ έντυπα.

10. Σαρ κα αβάς πιο λατσσέ κο έργος;

¹⁰ Σο μπορίνενα τι κερέν. Χρησιμοποιήνεν ο σικλιαριπέ σο ντέλα-τουμέν ο Ιεχωβά κο συναθροίσεις. Τι νικιόν κο έργος τουμαρέ ομιλόσαρ. Οτθέ, κα λεν ζορ κατά λατσσό παράδειγμας ι πφραλένγκο ντα ι πφενίνγκο ντα ι βοήθεια σο μπορεί τι χρειαζίντιβενα. Κερέν έργος παρόλο σο ισί δυσκολίες. Σαρ ανέλα αμαρέ γκοντιάτε ο εδάφιος ανταλέ μαθημάσκο, κεράσα οντουβά σο μανγκέλα ο Ντεβέλ, όχι αμαρέ ζοριάσαρ, αλλά ι άγιε πνευμάσαρ. (Ζαχ. 4:6) Ο Ντεβέλ κα ντελ-αμέν ζορ, σόσκε ο έργος σο κεράσα ισί λέσκο.

11. Σαρ κερένας μπουτί σαρέ γιεκ ο πφραλά κατά κυβερνών σώμας για τι αβέν-πες ο πράγματα εκχέ σειράσαρ κο λαός κι Ντεβλέσκο;

¹¹ Κο μπρεσά κι πρώτε Χριστιανόνγκε. Ο πφραλά κατά κυβερνών σώμας κι Ιερουσαλήμ κερένας μπουτί σαρέ γιεκ για τι αβέν-πες ο πράγματα εκχέ σειράσαρ ντα τι ατσσικιαρέν ι ειρήνη αντρέ κο λαός κι Ντεβλέσκο. (Πράξ. 2:​42) Για παράδειγμας, κο μπρες 49 Κ.Χ., μπουτ Χριστιανοί βακερένας ότι εκ τζενό έπρεπε τι κερέλ περιτομή για τι υπηρετίνελ  ι Ιεχωβάς, ενώ γιαβερά βακερένας ότι να χρειαζίντιβελας. Οτθάρ, ο πφραλά κο κυβερνών σώμας, σο τθερένας ο άγιος πνεύμας, κερντέ λάφι γιεκ ανταλέσκε. Άμα η κχανγκιρί κα ατσσόλας διχομέ ιτιρί ανταλέσταρ, να κα αβέλας-πες ο έργος. Παρόλο σο ο απόστολοι ντα ο πρεσβύτεροι ισινέ Ιουδαίοι, να επηρεασάλε κατά ιουδαϊκή παράδοση ούτε οντουλένταρ σο τσσίντενας λάταρ. Αλλά ροντιντέ κο Λάφι κι Ντεβλέσκο ντα μανγκλέ κατά Ιεχωβά ο άγιος πνεύμας για τι σικαβέλ λένγκε σο τι κερέν. (Πράξ. 15:1, 2, 5-20, 28) Καβά ισινέ ο αποτέλεσμας; Ο Ιεχωβά ευλογιντάς λένγκι απόφαση, τθερένας ειρήνη ντα ενότητα, ντα να τσσιναντέ τι βακερέν ο λατσσέ αμπέρια.​—Πράξ. 15:​30, 31· 16:4, 5.

12. Σο σικαβέλα ότι κι οργάνωση κι Ιεχωβάσκι αντιβές ισί ειρήνη ντα αβένα-πες ο πράγματα εκχέ σειράσαρ;

¹² Αμαρέ ντιβεσέντε. Η οργάνωση ι Ιεχωβάσκι βοηθίνελα τι αβέν-πες ο πράγματα εκχέ σειράσαρ ντα τι αβέλ ειρήνη αντρέ κο λαός κι Ντεβλέσκο. Κο 1895, Η Σκοπιά 15 Νοεμβρίου (κι αγγλική) τθερέλας εκ θέμας με τίτλος «Με το Σωστός Τρόπος ντα Σειράσαρ», σο βασίντιβελας κο εδάφιος 1 Κορινθίους 14:​40. Ο θέμας βακερέλας: «Ο απόστολοι γραφιντέ μπουτ πράγματα κι πρώτη κχανγκιρί για τι βοηθίνεν ι πφραλέν τι κερέν ο πράγματα εκχέ σειράσαρ . . . Ισί μπουτ σημαντικός τι κεράς “σαρέ οντουλά σο γραφισάλε κο πουρανέ μπρεσά . . . αμαρέ σικλιαριμάσκε”». (Ρωμ. 15:4) Σαρ κο πρώτος αιώνας, αντιβές-ντα η οργάνωση ι Ιεχωβάσκι μανγκέλα τι τθερέλ ειρήνη η κχανγκιρί ντα τι αβέν-πες ο πράγματα εκχέ σειράσαρ. Για παράδειγμας: Άμα κα τζαν εκχέ γιαβερέ κχανγκιριάτε, ατζέ-ντα γιαβερέ τθεμέστε, κα τζανέν σαρ κα αβέλ-πες η Σκοπιά ντα καβά μάθημας κα κερέν. Κα νιωθίνενας σαρ τι αβένας τουμαρέ κχανγκιριάτε! Σάντε ο πνεύμας ι Ντεβλέσκο μπορίνελα τι ανέλ ασακί ενότητα!​—Σοφ. 3:9, υποσ.

13. Σο πρέπει τι πουτσάς-αμέν καζόμ τθεράσα αμαρέ γκοντιάτε ο εδάφιος Ιακώβου 3:17;

¹³ Σο μπορίνενα τι κερέν. Ο Ιεχωβά μανγκέλα τι ατσσικιαρέλ λέσκο λαός “ι ενότητα ι πνευμάσκι με την ειρήνη σο κερέλα-λεν τι αβέν γιεκ”. (Εφεσ. 4:​1-3) Οτθάρ, πουτσέν-τουμέν: “Ανάβα ι ενότητα ντα ι ειρήνη κι κχανγκιρί; Ντάβα καν οντουλέντε σο τθερένα ι ευθύνη αντρέ κι κχανγκιρί; Μπορίνενα ο γιαβερά τι ντεν μάνγκε μπέσα, ντα πιο μπουτ άμα τθεράβα ευθύνες κι κχανγκιρί; Ισινόμ μι  σαατίστε κάνα τθεράβα τι κεράβ κάτι; Ισινόμ έτοιμος τι βοηθίναβ ντα τι υπηρετίναβ αντράλ μι γκίσταρ;” (Διαβάνεν Ιακώβου 3:​17) Άμα ντικχένα ότι μπορίνενα τι αβέν πιο λατσσέ μερικέ πραγματέντε, κερέν προσευχή τι τθερέν άγιος πνεύμας. Καζόμ πιο μπουτ μουκχένα ο άγιος πνεύμας τι επηρεάνελ τουμαρό χαρακτήρας ντα ο πράγματα σο κερένα, αζόμ πιο μπουτ τουμαρέ πφραλά ντα πφενιά κα μανγκέν-τουμέν ντα κα εκτιμίνεν-τουμέν.

14. Σαρ σικλιαρντάς ο Ιεχωβά ι πρώτε Χριστιανόν σαρ βακερένα ο εδάφια Κολοσσαείς 1:9, 10;

¹⁴ Κο μπρεσά κι πρώτε Χριστιανόνγκε. Ο Ιεχωβά χαιρίνελα μπουτ τι σικλιαρέλ πι λαός. (Ψαλμ. 32:8) Μανγκέλα τι σικλιόν λέσκε, τι μανγκέν-λες ντα τι τζουβντιόν για πάντα. Σαρέ ανταλά ναστί κα αβένας-πες άμα να κα σικλιαρέλας-αμέν. (Ιωάν. 17:3) Ο Ιεχωβά χρησιμοποιηντάς ι πρώτη Χριστιανική κχανγκιρί για τι σικλιαρέλ πι λαός. (Διαβάνεν Κολοσσαείς 1:9, 10) Ο άγιος πνεύμας​—ο «βοηθός» σο βακερντάς πι μαθητένγκε ο Ιησούς ότι κα ντέλας-λεν—​βοηθιντάς-λεν μπουτ. (Ιωάν. 14:​16) Βοηθιντάς-λεν τι αγαβέν πιο λατσσές ο Λάφι ι Ντεβλέσκο ντα τι ντεν-πες γκοντί σαρέ οντουλά σο βακερντάς ντα κερντάς ο Ιησούς. Σοράν, μπουτ οντουλέ πραγματένταρ γραφίντιλε κο Ευαγγέλια. Ανταβά σικλιαριπέ μπαριαρντάς ι πίστη ι πρώτε Χριστιανόνγκι αλλά ι αγάπη-ντα σο τθερένας ι Ντεβλέσκε, λέσκε Τσσαβέσκε ντα ο εκ ι γιαβερέσκε.

15. Καλέ τροπόντζαρ ντικχλέν τι νικιόλ μπαγιά ι Ιεχωβάσκο λάφι σο ισί κο εδάφια Ησαΐας 2:2, 3;

¹⁵ Αμαρέ ντιβεσέντε. Ο Ιεχωβά βακερντάας ότι «κο τελευταία ντιβεσά» τζενέ σαρέ κατά τθεμά κα τζάνας λέσκε “βεσέστε” για τι σικλιόν λέσκο ντρομ. (Διαβάνεν Ησαΐας 2:2, 3) Ντικχάσα ανταγιά προφητεία τι νικιόλ μπαγιά ακανά. Ντικχάσα ότι η αληθινή θρησκεία ισί μπουτ πιο λατσσί σαρέ κατά γιαβερά ψεύτικες θρησκείες. Ντα σο πνευματικός χαμπέ ντέλα ο Ιεχωβά! (Ησ. 25:6) Αντράλ κατά «πιστός ντα φρόνιμος δούλος», ντέλα-αμέν μπερεκέτι πνευματικός χαμπέ. Για παράδειγμας,  τθεράσα τι διαβάνας περιοδικά, τι ασουνάς ομιλίες ντα τι ντικχάς βίντεα, ατζέ-ντα βίντεα χουρντένγκε. (Ματθ. 24:​45) Νιωθίνασα σαρ ο αμάλ του Ιώβ ο Ελιού, σο βακερντάς: «Κον σικλιαρέλα αζόμ λατσσές σαρ [ο Ντεβέλ];»​—Ιώβ 36:22.

16. Σο μπορίνενα τι κερέν για τι μπαριόν πνευματικά;

¹⁶ Σο μπορίνενα τι κερέν. Ο πνεύμας ι Ντεβλέσκο κα βοηθίνελ-τουμέν τι κερέν τουμαρέ ζωγιάτε σο-ντα διαβάνενα ντα σικλιόνα Λέσκε Λαφίσταρ. Τι προσευχίντιβεν σαρ ο ψαλμωδός: «Σίκλιαρ-μαν, Ιεχωβά, το ντρομ. Κα πφιράβ τι αληθειάτε. Κερ-μαν τι νταράβ τι ναβέσταρ σαρέ μι γκίσαρ». (Ψαλμ. 86:​11) Οτθάρ, μα τσσιναβέν τι λεν ο πνευματικός χαμπέ σο ντέλα-αμέν ο Ιεχωβά αντράλ πι Λαφίσταρ ντα πι οργανωσιάταρ. Όμως, δεν πρέπει τι μανγκέν σάντε τι σικλιόν πράγματα. Πρέπει η αλήθεια τι ερεσέλ τουμαρέ γκίστε ντα τι κερέν-λα τουμαρέ ζωγιάτε. Ο πνεύμας ι Ιεχωβάσκο κα βοηθίνελ-τουμέν τι κερέν-λες ανταβά. Επίσης, πρέπει τι ντεν ζορ τουμαρέ πφραλέν ντα τουμαρέ πφενίν. (Εβρ. 10:​24, 25) Σόσκε; Επειδή βον ισί τουμαρί πνευματική φαμιλί. Τι προσευχίντιβεν τι βοηθίνελ-τουμέν ο πνεύμας ι Ντεβλέσκο για τι ντεν απαντήσεις αντράλ τουμαρέ γκίσταρ κο συναθροίσεις ντα τι κερέν ο πιο λατσσό κάνα τθερένα εκ διορισμός κι συνάθροιση. Ανταλέ τροπόντζαρ, σικαβένα κο Ιεχωβά ντα λέσκε Τσσαβέσκε ότι μανγκένα λένγκε πολύτιμε «μπρακέν».​—Ιωάν. 21:​15-17.

17. Σαρ κα σικαβέν ότι τσσίντενα κατά οργάνωση ι Ιεχωβάσκι;

¹⁷ Ατζεχάνικ, κα ατσσόλ κι πφουβ σάντε η οργάνωση σο οδηγίντιβελα κατά πνεύμας ι Ντεβλέσκο. Οτθάρ, τι κερέν μπουτί σαρέ τουμαρέ γκίσαρ ι Ιεχωβάσκε οργανωσιάσαρ. Τι βακερέν ο λατσσέ αμπέρια σαρέ κο τζενέ για τι σικαβέν ότι μανγκένα-λεν σαρ ο Ντεβέλ. Τι ανέν ι ενότητα κι κχανγκιρί ντα αντικάς τι σικαβέν ότι, σαρ ο Ιεχωβά, μανγκένα τι αβέν-πες ο πράγματα εκχέ σειράσαρ ντα τι αβέλ ειρήνη. Τι ασουνέν ι Ιεχωβάς σο ισί ο Μπαρό Εκπαιδευτής ντα τι μουκχέν σαρέ ο πράγματα σο σικλιαρέλα-τουμέν τι κερέν τουμένγκε λατσσιπέ. Άμα κα κερέν-λεν ανταλά, κάνα κα αβέλ ο τέλος ι Μπενγκέσκε ντουνιάσκο, να κα νταρέν. Αλλά κα αβέν μπίνταρανε ντα κα αβέν οντουλέντζαρ σο υπηρετίνενα πιστά ι Ιεχωβάς λέσκε οργανωσιάσαρ.