1. A lingbi aChrétien so awara batême awe angbâ ti sara nyen?

MO WARA batême awe? Tongana mo wara batême awe, andâ mo fa na azo awe so mo yeke na mabe na Jéhovah nga so mo ye ti sara na lo legeoko na bungbi ti lo. * A lingbi mabe ti mo na Jéhovah angbâ ti kpengba. Nga a lingbi mo ngbâ ti gi ti duti na confiance mingi so Jéhovah ayeke sara kua na bungbi ti lo laso.

2-3. Jéhovah ayeke fa lege laso na bungbi ti lo tongana nyen? Asarango ye ti Jéhovah wa la e yeke bâ ni na yâ ti bungbi ti lo?

² Jéhovah ayeke fa lege laso na bungbi ti lo na mbeni fason so afa asarango ye ti lo, afa ye so lo leke na bê ti lo ti sara nga na aye so lo hunda na e ti sara. Zia e bâ asarango ye ti Jéhovah ota so e yeke bâ ni na yâ ti bungbi ti lo.

³ Kozoni, “Nzapa ayeke sara kangbi na popo ti azo pëpe”. (Kus. 10:34). Ndoye apusu Jéhovah ti mû Molenge ti lo tongana ‘ye so a futa ti zi azo kue.’ (1 Tim. 2:6; Jean 3:16). So Jéhovah ahunda na azo ti lo ti fa nzoni tënë na azo kue so ayeke mä ala, lo ye ti mû maboko na azo mingi ti wara aye ti nzoni na lege ti ye so a futa ti zi azo. Use ni, Jéhovah ayeke Nzapa ti wusuwusu ape nga Nzapa ti siriri (1 aCor. 14:33, 40). Tongaso, a yeke na lege ni ti tene so azo so avoro lo ayeke sara na lo na yâ ti wusuwusu ape nga na yâ ti siriri. Ota ni, Jéhovah ayeke “Kota maître”. (És. 30:20, 21). Ndani la, bungbi ti lo ayeke sara ngangu ti fa tënë ti lo na azo na yâ ti congrégation nga na fango  tënë. Tongana nyen la aita ti congrégation ti akozo Chrétien amû lani tapande ti asarango ye ti Jéhovah ota so? Tongana nyen la azo ti Jéhovah ayeke mû tapande ti asarango ye ti lo so na ngoi ti e? Tongana nyen la yingo vulu alingbi ti mû maboko na mo ti sara kua maboko na maboko na bungbi ti Jéhovah laso?

4. Na Kusala 1:8, nyen la Jésus amû yanga na adisciple ti lo ti sara? Mungo maboko wa la ala bezoin ni lani?

⁴ Na ngoi ti akozo Chrétien. Tënë so Jésus afa lani amû beku na azo kue (Luc 4:43). Lo mû yanga na adisciple ti lo ti ngbâ ti sara kua so lo komanse ni lani, so ti tene ti fa tënë “juska na ambage ti sese so ayeke tâ yongoro.” (Diko Kusala 1:8.) Ala lingbi lani ape ti sara kua so na ngangu ti ala wani. Ala yeke lani na bezoin ti yingo vulu, “wamungo maboko” so Jésus amû zendo ti mû ni na ala.—Jean 14:26; Zach. 4:6.

5-6. Na alege wa la yingo vulu amû lani maboko na adisciple ti Jésus?

⁵ Adisciple ti Jésus awara lani yingo vulu na Pentecôte ti ngu 33. Grâce na mungo maboko ti yingo so, ala komanse ti fa tënë hio, nga na yâ ti ngoi mingi ape, azo saki mingi ayeda na nzoni tënë (Kus. 2:41; 4:4). Na ngoi so azo akomanse ti sara aye ti ngangu na adisciple ni, mbeto asara ala ape na ala zia lege ti fango tënë ape, me ala hunda Nzapa ti mû maboko na ala. Ala sambela, atene: “Mû lege na angbâa ti mo ti ngbâ ti fa tënë ti mo na mbeto oko pëpe.” Na pekoni, ala si na yingo vulu na ala ngbâ ti “tene tënë ti Nzapa na mbeto pëpe.”—Kus. 4:18-20, 29, 31.

⁶ Adisciple ti Jésus atingbi nga lani na ambeni kpale nde. Na tapande, wungo ti aMbeti ti Nzapa ayeke lani mingi ape. Adisciple ni ayeke lani na ambeti so afa nda ti Bible ape, tongana ti e laso. Ala doit nga lani ti fa tënë na azo so atene gbâ ti ayanga ti kodro. Atâa aye so kue, adisciple so ayapu asara mbeni ye so, na bango ni, zo alingbi ti sara ni ape. Na yâ ti ngu 30 tongaso, ala fa lani nzoni tënë “na création kue so ayeke na gbe ti yayu”.—aCol. 1:6, 23.

7. Ahon ngu 100 awe, tongana nyen la awakua ti Jéhovah so ayeke lani dä ahinga ye so lo hunda na ala? Nyen la ala sara?

⁷ Na ngoi ti e. Jéhovah angbâ ti fa lege na azo ti lo nga ti mû na ala ngangu. Mingi ni, lo yeke sara ni na lege ti Bible, so a sû ni na gbe ti yingo ti lo. Na yâ ti Bible, e wara aye na ndö ti kua ti fango tënë ti Jésus nga na yanga so lo mû na adisciple ti lo ti ngbâ ti sara kua so lo komanse ni lani (Mat. 28:19, 20). Na juillet, ngu 1881, Tour ti Ba Ndo atene: “Jéhovah airi e, wala lo soro e na lege ti yingo vulu ti wara gonda ape wala ti ga azo ti mosoro ape, me ti mû aye kue so e yeke na ni ti fa nzoni tënë.” Na yâ ti mbeni brochure, (To Whom the Work Is Entrusted), so a sigi na ni na ngu 1919, a tene: “Kua ti sarango ni ayeke gbani, me a yeke kua ti Seigneur, na lo yeke mû na e ngangu ti sara ni.” Tongana ti akozo Chrétien, na mbeto ape, aita so abi terê ti ala kue na yâ ti kua ni ndali ti so ala yeke na confiance so yingo vulu ayeke mû maboko na ala ti fa tënë na mara ti azo nde nde kue. E nga kue e yeke na mara ti confiance so laso.

8-9. Akode wa la bungbi ti Jéhovah asara kua na ni ti sara si nzoni tënë amû ndo?

⁸ Ti sara si nzoni tënë amû ndo, bungbi ti Jéhovah asara kua na anzoni ye ti fango na tënë. Na popo ti aye so, mo yeke wara ambeti so a imprimé ni, “Photo-Drame de la Création,” aphonographe, a-oto so ahaut-parleur ayeke na ndö ni, radio nga na ordinateur na Internet so a sigi na ni ade ti ninga ape. Bungbi ti Jéhovah ayeke kiri nga na peko ti ambeti na ayanga ti kodro mingi ahon ti kozo. Ndali ti nyen? Ti tene mara ti azo nde nde kue amä nzoni tënë na yanga ti kodro ti ala. Jéhovah ayeke sara kangbi na popo ti azo pëpe; lo tene lani so a yeke fa nzoni tënë “na amara kue, akete mara kue, azo  ti ayanga ti kodro kue nga na azo ti kodro kue.” (Apoc. 14:6, 7). Lo ye ti tene azo kue amä tënë ti Royaume.

⁹ Tongana nyen la e lingbi ti fa tënë na azo so a yeke ngangu ti wara ala ndali ti so ala lango na mbeni ndo so agarde ayeke dä? Ti tene e fa tënë na mingi ti azo so, bungbi ti Jéhovah akomanse ti sara kua na akode nde nde ti fa tënë na ando so azo ayeke hon dä mingi. Na tapande, na ngu 2001, Bebungbi ayeda ti tene, na France, aita asara kua na présentoir nga na ambeni ye so a zia ambeti ti e na ndö ni ti fa na tënë. Na pekoni, ambeni kodro nde akomanse nga ti sara tongaso. Aye ti nzoni aga na pekoni. Na ngu 2011 na États-Unis, a komanse ti sara kua na mbeni fini kode ti fango tënë na mbeni ndo so azo ayeke gue dä mingi na gbata ti New York. Na yâ ti kozo ngu ni, a zia na azo abuku 102 129 nga na apériodique 68 911. Nga azo 4 701 ahunda ti manda Bible. A yeke polele so yingo vulu amû maboko na kua so. Tongaso, Bebungbi ayeda ti tene a sara kua na présentoir nga na ambeni ye so a zia ambeti ti e na ndö ni na yâ ti akodro kue.

10. Aye wa la e lingbi ti sara ti fa tënë nzoni mingi?

¹⁰ Aye so mo lingbi ti sara. Na ngoi ti abungbi, Jéhovah ayeke fa na e tongana nyen ti fa tënë. Sara kua na afango ye so. Fa tënë lakue na groupe ti mo ti fango tënë. Aita ti groupe ti mo alingbi ti mû maboko na mo ti fa tënë nga ti fa ye nzoni mingi, nga nzoni tapande ti ala alingbi ti kpengba mo. Ngbâ ti fa tënë atâa mo wara akpale. Tongana ti so versê so amû li ni na yâ ti article so adabe ti e na ni, e yeke sara ye so bê ti Nzapa aye na ngangu ti e wani ape, me na lege ti yingo vulu (Zach. 4:6). Nzapa ayeke mû na e ngangu ti sara ni ndali ti so a yeke kua ti lo.

11. Na ngoi ti akozo Chrétien, tongana nyen la bebungbi asara kua na yâ ti beoko ti sara si wusuwusu aduti na popo ti awakua ti Nzapa ape?

¹¹ Na ngoi ti akozo Chrétien. Bebungbi so ayeke lani na Jérusalem asara kua na yâ ti beoko ti sara si wusuwusu aduti na popo ti awakua ti Nzapa ape nga ala duti na siriri (Kus. 2:42). Na tapande, na ngoi so tënë ti fango ganza aga lani ngangu na ngu 49 tongaso, na gbe ti fango  lege ti yingo vulu bebungbi abâ lege ti tënë ni. Tongana tënë so angbâ ti kangbi aita na yâ ti congrégation, ka ala yeke fa tënë nzoni ape. Atâa so abazengele na a-ancien ayeke aJuif, ala zia lani ape si angobo ti aJuif wala azo so agi ti maï ni asara ngangu na ndö ti ala. Me ala zia si Mbeti ti Nzapa nga na yingo ti lo afa lege na ala (Kus. 15:1, 2, 5-20, 28). Ye ti peko ni ayeke nyen? Jéhovah airi tënë nzoni na ndö ti desizion ti ala, siriri nga beoko amû ndo nga fango tënë ague na li ni.—Kus. 15:30, 31; 16:4, 5.

12. Nyen la afa so wusuwusu ayeke na yâ ti bungbi ti Jéhovah ape nga siriri ayeke dä laso?

¹² Na ngoi ti e. Bungbi ti Jéhovah asara kue ti sara si wusuwusu aduti na popo ti awakua ti lo ape nga ala duti na siriri. Na ngu 1895, na yâ ti Le Phare de la Tour de Sion et Messager de la Présence de Christ ti lango 15 ti novembre, mbeni article ayeke dä so aluti mingi na ndö ti 1 aCorinthien 14:40, na li ti tënë ni ayeke “Sara ye na lege ni nga na yâ ti wusuwusu ape” (na Français). Article ni atene: “Abazengele asû atënë mingi na kozo congrégation na ndö ti sarango ye na yâ ti wusuwusu ape . . . A yeke kota ye ti ngbâ ti sara kue ti sara ye alingbi na ‘aye kue so a sû ândö giriri na yâ ti Mbeti ti Nzapa ti fa ye na e.’” (aRom. 15:4). Legeoko tongana ti akozo Chrétien, bungbi ti Jéhovah ayeke sara kue laso ti sara si wusuwusu aduti na popo ti awakua ti Jéhovah ape nga ala duti na siriri. Na tapande, tongana mo gue na bungbi ti Mandango Tour ti Ba Ndo na mbeni congrégation nde, wala même na mbeni kodro nde, mo hinga tongana nyen la a yeke sara bungbi ni nga na article so a yeke manda ni. Hio, mo yeke bâ so mo yeke na ndo ti mo. Gï yingo ti Nzapa la alingbi ti sara si mara ti beoko so aduti dä.—Soph. 3:9, kete tënë na gbe ni.

13. Ahundango ndo wa la atënë so ayeke na Jacques 3:17 ayeke pusu e ti hunda terê ti e na ni?

¹³ Aye so mo lingbi ti sara. Jéhovah aye ti tene azo ti lo abata “beoko ti yingo na yâ ti kamba ti siriri so abungbi ala oko.” (aÉph. 4:1-3). Tongaso, hunda terê ti mo: ‘Eskê mbi yeke gi ti maï beoko nga na siriri na yâ ti congrégation? Mbi yeke mä yanga ti aita so ayeke mû li ni? Aita alingbi ti sara confiance na mbi, mingi ni tongana mbi yeke na akua na ya ti congrégation? Mbi yeke si na bungbi na l’heure nga mbi ye mingi ti sara ambeni ye ti mû maboko na azo?’  (Diko Jacques 3:17.) Tongana mo bâ so na yâ ti aye so ambeni ye ayeke dä so mo lingbi ti sara ni nzoni mingi ahon ti kozo, sambela Jéhovah ti wara yingo vulu. Tongana mo zia lege mingi na yingo vulu ti sara ngangu na ndö ti mo nga na ndö ti aye so mo sara, aita ti mo ayeke ye mo mingi nga ala yeke kiri singila na mo.

14. Ti gue oko na aColossien 1:9, 10, tongana nyen la Jéhovah afa ye lani na azo ti lo na ngoi ti akozo Chrétien?

¹⁴ Na ngoi ti akozo Chrétien. Jéhovah aye mingi ti fa ye na azo ti lo (Ps. 32:8). Lo ye ti tene ala hinga lo, ala ye lo nga ala ngbâ na fini lakue lakue. Tongana Jéhovah afa ye na ala ape, ala lingbi pëpe ti hinga lo, ti ye lo nga ti ngbâ na fini lakue lakue (Jean 17:3). Jéhovah asara kua lani na congrégation ti akozo Chrétien ti fa ye na azo ti lo. (Diko aColossien 1:9, 10.) Yingo vulu, “wamungo maboko” so Jésus amû zendo ni, amû nga maboko mingi na ala (Jean 14:16). Yingo vulu amû maboko na adisciple ti Jésus ti mä yâ ti Mbeti ti Nzapa nga ti dabe ti ala na aye kue so Jésus atene nga lo sara. Na pekoni, a sû mingi ti anzene nzene tënë so na yâ ti aÉvangile. Ye so akpengba mabe ti ala nga asara si ala ye Nzapa, ala ye Molenge ti lo nga na amba ti ala mingi ahon ti kozo.

15. Na alege wa la mo bâ so Jéhovah asara ye alingbi na zendo ti lo so e wara na Ésaïe 2:2, 3?

¹⁵ Na ngoi ti e. Jéhovah atene lani so “na andangba lango ni,” azo ti amara kue ayeke kungbi ti gue na “hoto” ti lo, so ti tene ala yeke ga ti bungbi oko na atâ wakua ti lo ti tene lo fa alege ti lo na ala. (Diko Ésaïe 2:2, 3.) E bâ tongana nyen la prophétie so aga tâ tënë laso. Tâ bungbi ti vorongo Nzapa ayeke tâ nzoni mingi ahon abungbi ti vorongo nzapa ti wataka kue. Nga, Jéhovah ayeke fa gbâ ti aye na azo ti lo na yâ ti Bible (És. 25:6). Lo sara kua na “ngbâa be-ta-zo so ayeke sara ye na ndara” ti fa na e gbâ ti aye so kue na lege ti a-article, adiskur, adessin animé nga na avidéo (Mat. 24:45). Pensé ti e  ague oko na ti Élihu, kamarade ti Job, so ayeke na raison ti tene: “Zo ti fango ye wa ayeke tongana [Nzapa]?”—Job 36:22.

16. Aye wa la mo lingbi ti sara ti bâ nzoni na lege ti fango lege ti Jéhovah?

¹⁶ Aye so mo lingbi ti sara. Yingo ti Nzapa ayeke mû maboko na mo ti sara ye alingbi na aye so mo diko nga mo manda na yâ ti Bible. Sambela tongana ti zo ti sungo psaume so atene: “Jéhovah, fa na mbi ye so andu lege ti mo. Mbi yeke tambela alingbi na tâ tënë ti mo. Sara si bê ti mbi aduti oko ti kpe mbeto ti iri ti mo.” (Ps. 86:11). Nga, ngbâ ti diko nga ti manda Bible na ambeti so bungbi ti Jéhovah asigi na ni. Me ye so mo gi ayeke pëpe gï ti wara hingango ye. Mo ye ti tene tâ tënë andu bê ti mo nga mo sara ye alingbi na ni na yâ ti fini ti mo. Yingo ti Jéhovah alingbi ti mû maboko na mo ti sara ni. Mo ye nga ti kpengba aita ti mo (aHéb. 10:24, 25). Ndali ti nyen? Ndali ti so ala yeke sewa ti mo na lege ti yingo. Sambela ti tene yingo ti Nzapa amû maboko na mo ti mû acommentaire so alondo na bê ti mo na ngoi ti abungbi nga sara kue ti sara mbage so a mû na mo nzoni. Na sarango tongaso, mo yeke fa na Jéhovah nga na Molenge ti lo so mo ye ‘ataba’ ti ala so ala ye ala mingi.—Jean 21:15-17.

17. Na alege wa la mo lingbi ti fa so mo yeke mû maboko na bungbi ti Jéhovah na bê ti mo kue?

¹⁷ Fafadeso, oko bungbi so ayeke ngbâ ande na ndö ti sese ayeke bungbi so yingo ti Nzapa ayeke fa lege na ni. Tongaso, na bê ti mo kue, sara kua maboko na maboko na bungbi ti Jéhovah. Fa so mo ye azo kue, sara kangbi na popo ti azo ape tongana ti Nzapa na lege so mo fa nzoni tënë na azo kue so mo tingbi na ala. Tongana ti lo, fa so mo ye sarango ye na wusuwusu ape nga na siriri na lege so mo gi ti maï beoko na yâ ti congrégation. Nga, mä Kota Maître ti mo na lege so mo sara kue ti manda ye na lege ti gbâ ti aye so lo fa na e na yâ ti Bible. Tongaso, mbeto ayeke sara mo ape na ngoi so a yeke futi dunia ti Satan. Me mo yeke ngbâ ti sara na Jéhovah na mbeto ape na terê ti amba ti mo so ayeke sara na lo be-ta-zo na yâ ti bungbi ti lo.