1. Bici Omukristu wabatizibwe ashinganine okugendekera ajira?

KA WABATIZÎBWE? Akaba neci, erhi obatizibwa wayeresire abandi oku ogwerhe obuyemere muli Yehova onalonzize omukolere omw’ikubuliro lyage. * Co cirhumire, obuyemere bwawe kuli Yehova bushinganine bugendekere bwayushuka. Na kandi oshinganine oyemere n’obwalagale oku mwakano kasanzi kirhu Yehova ali alongoza ikubuliro lyage lyo lihikiriza obulonza bwage.

2-3. Ohâne enyiganyo ziyerekine oku Yehova ali alongoza ikubuliro lyage mwagano mango girhu.

² Mwagano mango, Yehova ali alongoza ikubuliro lyage lyo liyerekana aba Muntu wa gurhi, omuhigo gwage n’amakanuni gage gw’olugenzi lwinja. Olekage rhuganîrire morhere asharhu ga Yehova gabonekana kugerera ikubuliro lyage.

³ Burhangiriza, “Nyakasane arhajira kabôlo.” (Ebj. 10:34) Buzigire bwashumagya Yehova ahâne Omugala mpu “lyo acungula abantu boshi.” (1 Tm. 2:6, Mashi Bible; Yn. 3:16) Yehova ali akolesa abakozi bage bayalize omwanzi mwinja gurhabale ngasi muntu olonzize ayishiyunguka n’engombôlo Yezu ahânaga. Bwakabirhi, Yehova aba Nyamuzinda wa buholo ci arhaba wa kavulindi. (1 Kr. 14:33, 40) Co cirhuma rhubona abakozi bage bali bamukolera omu buholo na buzira kavulindi. Bwakasharhu, Yehova yeba “Omuyigiriza” Mukulu. (Iz. 30:20, 21) Co cirhuma ikubuliro lyage lisegeza Akanwa kage nka lyayigiriza amango g’entimanano y’ecigamba erhi omu mahubiri. Gurhi Abakristu bw’omu myaka igana mirhanzi bayerekinemwo ago morhere asharhu ga Yehova? Gurhi Abakristu ba mwakano kasanzi kirhu bali bayerekanamwo ago morhere? Na gurhi iroho litagatifu lya Yehova lyakakurhabala okolere Yehova haguma n’ikubuliro lyage mwagano mango girhu?

4. Nk’oku biyerekinwe omu Ebijiro by’Entumwa 1:8, mukolo muci Yezu abwizire abanafunzi bage bajire, na bici byakabarhabire okugujira?

⁴ Omu myaka igana mirhanzi. Emwanzi Yezu akagiyigiriza yakag’iha abantu boshi obulangalire. (Lk. 4:43) Arhegeka abanafunzi bage oku bagendekere bajira ogo mukolo gw’okuhâna obuhamirizi “kuhika aha igulu lihekera.” (Osome Ebijiro by’Entumwa 1:8.) Cikone, barhakahashirijira ogo mukolo oku buhashe bwabo bonene. Bâlilagirire oku iroho litagatifu, olya​—“murhabazi” Yezu alaganyagya.​—Yn. 14:26; Zak. 4:6, NWT.

5-6. Omu njira nci rhwakaderha oku iroho litagatifu lyarhabire abanafunzi ba Yezu?

⁵ Abanafunzi ba Yezu bahabirwe iroho litagatifu oku lwa Pentekoste y’omu mwaka gwa 33 muli Kano Kasanzi Kirhu (K.K.K.) Erhi bahâbwa oyo murhabazi, ho n’oho barhondera bayaliza, n’enyuma za kasanzi kasungunu ebihumbi byʼabantu byayemera omwanzi mwinja gw’Obwami. (Ebj. 2:41; 4:4) Erhi abanafunzi balibuzibwa barhayobohaga, cikone balangalira oburhabale bwa Nnamahanga. Basalira ntya: “Ohe abarhumisi bawe obuhashe bw’okuyigiriza akanwa kawe buzira boba.” Boshi banaciyunjula iroho litagatifu na ntyo bagendekera “okuyigiriza akanwa ka Nnamahanga buzira bwoba.”​—Ebj. 4:18-20, 29, 31.

⁶ Kandi hali agandi mazibu abanafunzi ba Yezu bagwerhe. Kwa lwiganyo, ako kasanzi harhali bitabu binji by’Amandiko g’Ebibliya. Barhagwêrhe ebitabu bihugwîre Ebibliya nk’oku rhubigwerhe ene. Na kandi abanafunzi bakagihubiri abantu ba ngasi lulimi. Cikone bibonekine oku bagendekire bayaliza omwanzi mwinja gw’Obwami ciru akaba bagwerhe ago mazibu. Bulya Ebibliya edesire oku enyuma za myaka 30 omwanzi mwinja gwayigirizibwa oku “ngasi ciremwa ciba en’igulu.”​—Kl. 1:6, 23.

7. Omu myaka erhalusire 100 egezire, gurhi abakozi ba Nnamahanga bahugûsirwemwo ebi al’ilonzize bajire, na gurhi bajijire?

⁷ Mwagano mango girhu. Yehova agendekire alongoza olubaga lwage n’okuluha emisi y’okuhikiriza obulonza bwage. Enjira nkulu ali alongozamw’olubaga lwage, kuli kugerera Akanwa kage kalongozibagwa n’iroho lyage litagatifu. Omu Bibliya rhunasomemwo emyanzi eganirire omukolo gwa Yezu n’oku arhegekaga abanafunzi bage oku bagendekere okujira ogo mukolo arhondezagya. (Mt. 28:19, 20) Egazeti y’Omwezi gwa 7, 1881 yali desire ntya: “Rhurhahamagalagwa, erhi rhwashîgwa amavurha mpu lyo rhuhâbwa olukengwa erhi lyo rhulonza obuhirhi, cikone lyo rhuhâna obuhirhi n’emisi yirhu n’okuyaliza omwanzi mwinja.” Ecitabu cisungunu Bandi Bahâbirwe ogo Mukolo c’omu Cingereza ca capagwa omu mwaka gwa 1919, caderha ntya: “Omukolo gubonekine oku guli munene bwenene, cikone guli mukolo gwa Nnawirhu na kugerera obuhashe n’emisi ya Nyamuzinda, rhwanaguhikiriza.” Aka Abakristu bw’omu myaka igana mirhanzi, abo bene wirhu bakola n’obushiru banacihâna omu mukolo bulya bali langalire oku iroho litagatifu lyabarhabala bahubiri abantu ba ngasi lubero. Mwakano kasanzi, nirhu rhugendekire rhwalangalira oku Yehova anarhuhashisa okuhikiriza ogo mukolo.

8-9. Njira zihi na zihi ikubuliro lya Yehova lyamakakolesa lyo rhujira omukolo gw’amahubiri?

⁸ Ikubuliro lya Yehova lyakolesize bikolanwa binji binja binashinganine n’akasanzi lyo liyaliza omwanzi mwinja. Mw’ebyo bikolanwa muli ebitabu, e “Photo-Drame de la Création,” efono, emituga erikw’emikro yakahisa izu kuli, eradio y’okuhâna emyanzi, na kandi bwenene mwakano kasanzi kirhu obulenga bw’ebyuma nka eordinatere n’e enterneti. Na kandi ikubuliro lya Yehova liri lyahindûla ebitabu birhu omu ndimi nyinji kulusha agandi mango goshi! Bulya gurhi liri lyajira ntyo? Lyo ngasi bantu bayumva omwanzi mwinja omu lulimi lwabo. Yehova  arhaba wa kabôlo; alebîre oku omwanzi mwinja gwayalizibwa oku “ngasi mulala, na ngasi bûko, na ngasi lulimi, na ngasi ishanja.” (Maf. 14:6, 7) Alonzize ngasi muntu ayumve omwanzi mwinja gw’Obwami.

⁹ Gurhi rhwakaderha okubiyerekire abantu rhurhakahash’ihubiri bulya enyumpa zabo ziri nyubake buzibu-zibu barhanayemiri mpu abantu bajemwo? Lyo rhuhikira aha rhwahubiri abo bantu ba ntyo, ikubuliro lya Yehova lyarhondeza njira nyinji z’okuhubiri ahantu hali bantu banji. Kwa lwiganyo, omu mwaka gwa 2001, Embaraza Eri Yalongoza yayemerera bene wirhu na bali birhu b’e France na b’omu bindi bihugo oku barhondere bahubiri aha nafasi y’abantu banji omu kukolesa eprezantware. Eyo njira mpyahya yabonekana oku eri nyinja bwenene. Omu mwaka gwa 2011 eyo programe yarhondera omu cihugo c’e États-Unis omu ville y’e New York. Omu mwaka murhanzi, bahikira aha bahâna bitabu 102129 na magazeti 68911. Na bantu 4701 bahûna oku babayigirize Ebibliya! Kobinali Yehova akolesize iroho lyage litagatifu libarhabale bahikirize ogo mukolo. Na ntyo Embaraza Eri Yalongoza yayemera okuhubiri kugerera eprezantware omw’igulu lyoshi.

10. Bici rhwakajira lyo rhuba n’obulenga omu mukolo gw’okuhubiri n’okuyigiriza?

¹⁰ Bici wakajira. Okaja oku ntimanano ngasi mango ly’oyunguka n’enjira Yehova ali akolesa lyarhukomereza. Okaja ngasi mango omu mahubiri haguma n’ecikundi c’amahubiri obamo. Bene wirhu na bali birhu bw’omu cikundi cawe c’amahubiri banakurhabala obe n’obulenga omu kuhubiri n’omu kuyigiriza na kandi banakuha omurhima kugerera olwiganyo lwabo lwinja. Ogendekere wahubiri, ciru ankaba oli omu mazibu. Nk’oku olwandiko lwirhu lw’omusingi luyerekine, arhali oku buhashe bwirhu rhuhikiriza obulonza erhi mukolo gwa Nnamahanga, cikone rhunahikire aho kugerera obuhashe bw’iroho litagatifu. (Zak. 4:6, NWT) Rhwanayemera n’obwalagale oku Yehova arhuha emisi y’okuhikiriza ogo mukolo.

11. Gurhi embaraza yakagilongoza omu myaka igana mirhanzi yagalwiremwo ecinyabuguma omu garhi k’abakozi ba Nnamahanga?

¹¹ Omu myaka igana mirhanzi. Embaraza yakagilongoza yali e Yeruzalemu yakagikola bwenene ly’abantu ba Nnamahanga balama omu  buholo na buzira kavulindi. (Ebj. 2:42) Kwa lwiganyo, omu mwaka gwa 49 muli Kano Kasanzi Kirhu (K.K.K.), erhi haba akadali okubiyerekire okukembulwa, embaraza eri yalongoza yadamala yalonza obulongozi bw’iroho litagatifu ly’emanya gurhi yashuza kw’er’idoso. Ako kavulindi kacigendekeraga, okujira omukolo gw’okuhubiri kwali kwaba kuzibu. Ciru akaba entumwa n’abagula bali Bayahudi, barhashimbaga enkômedu z’e Ciyahudi erhi enyigirizo zabo. Cikone, balonza okulongozibwa n’Akanwa ka Nnamahanga n’iroho lyage litagatifu. (Ebj. 15:1, 2, 5-20, 28) Kw’oko kwalesire emigisho? Neci, Yehova abahashisa barhôla omuhigo mwinja n’ecigamba cakola omu buholo na buzira kavulindi na ntyo boshi bacihâna omu mukolo gw’okuhubiri.​—Ebj. 15:30, 31; 16:4, 5.

12. Bici biyerekine oku ikubuliro lya Yehova liri lyakola omu buholo na buzira kavulindi mwagano mango girhu?

¹² Mwagano mango girhu. Ikubuliro lya Yehova ligendekire lyakola bwenene lyo lirhabala abakozi bage bakole omu buholo na buzira kavulindi. Kurhondera omu mwaka gwa 1895, Le Phare de la Tour de Sion et Messager de la Présence de Christ y’omu nsiku 15/11 y’ali mw’ecigabi cali desire ntya: “Obuholo na buzira Kavulindi,” eco cigabi caliyimangire oku lwandiko lwa 1 Abakorinti 14:40. Cali desire ntya: “Entumwa zagwerhe bintu binji zakayandikire ebigamba by’omu myaka igana mirhanzi okubiyerekire okukola buzira kavulindi . . . Kuli kwa bulagirire okugendekera kwaseza buzibu-zibu ‘ebyayandikagwa mîra byoshi, mpu bibe nyigirizo zirhu.’” (Rm. 15:4) Mwakano kasanzi kirhu nako, ikubuliro lya Yehova ligendekire lyakola omu buholo na buzira kavulindi nk’oku byali omu cigamba c’Abakristu bw’omu myaka igana mirhanzi. Kwa lwiganyo: Erhi wakagenda omu cindi cigamba, ciru akaba omu cindi cihugo onagende erhi onamanyire Ilabiro ly’Akalalizi lihi bali bayiga na cigabi ca kanga baliko. Ho n’aho onayumve oku orhali cigolo! Iroho litagatifu lyone lyakarhuhashisa rhube n’ecinyabuguma ciri nk’eco!​—Sof. 3:9, NWT, amahugûlo g’idako.

13. Omu kurhanya oku lwandiko lwa Yakobo 3:17, madoso gahi ngasi muguma wirhu akacidosa?

¹³ Bici wakajira. Yehova aba alonzize abakozi bage bacisêze “okulanga obuguma bw’iroho litagatifu omu murhula gw’ecinyabuguma.” (Ef. 4:1-3, NWT) Co cirhumire wanacidosa ntya: ‘Ka nancihangane okugendekeza obuholo n’ecinyabuguma omu cigamba? Ka nankenge abali  barhulongoza? Ka mba wakulangalirwa omu mikolo mba mpirwe n’ecigamba? Ka nankenge akasanzi na kandi ka mba mubidu okurhabala?’ (Osome Yakobo 3:17.) Erhi wakabona oku hali aha bihûnyire ojire empindûlo, orharhindiraga okushenga Yehova iroho lyage litagatifu likurhabale ozijire. Nka wakaleka lilingoze entanya zawe n’ebijiro byawe, kwo na bene wirhu na bali birhu bakakuzigira n’okukubona oku ali wabulagirire.

14. Nk’oku biyerekinwe omu Abakolosi 1:9, 10, njira nci Yehova akolesize ly’ayigiriza abakozi bage omu myaka igana mirhanzi?

¹⁴ Omu myaka igana mirhanzi. Yehova anashagalukire okuyigiriza abakozi bage. (Enna. 32:8) Aba alonzize bamumanye, bamuzigire, na kandi balame emyaka n’emyaka nka bana bage bazigirwa. Okuhikira aho kurhakahashikana buzira enyigirizo arhuha. (Yn. 17:3) Omu myaka igana mirhanzi Yehova akolesize ecigamba c’Ecikristu ly’ayigirize abakozi bage. (Osome Abakolosi 1:9, 10.) Iroho litagatifu​—olya “murhabazi” Yezu alaganyagya—​abarhabala okuhikiriza bintu binji. (Yn. 14:16) Lyaha abanafunzi bumanye bunji bahugûkwa Akanwa ka Nnamahanga lyanabakengeza ebintu Yezu adesire n’okujira, nk’okubiyerekinwe omu bitabu bye Injili. Obo bumanye bwaseza obuyemere n’obuzigire bwabo kuli Nnamahanga n’Omugala na bone na nnene.

15. Omu njira zihi rhuli rhwabona oku Yehova ali ahikiriza eciragane cage ciri omu Izaya 2:2, 3?

¹⁵ Mwagano mango girhu. Yehova alebire oku “omu nsiku za buzinda,” amashanja goshi gayish’ikâshubûkira oku ntondo yage lyo gajiyigirizibwa enjira zage. (Osome Izaya 2:2, 3, NWT.) Mwagano mango, rhuli rhwabona gurhi obo bulebi buli bwahikirira. Enterekêro y’okuli yahizirwe enyanya z’ezindi nterekêro zoshi z’obunywesi. Orhanye kandi okw’ishêga ly’ekiroho Yehova ali arhuha! (Iz. 25:6) Kugerera kuli “mushizi mwirhonzi na mwikubagirwa,” Yehova ali arhuha biryo binji binja bya ngasi lubero. Kwa lwiganyo, rhugwerhe bitabu binji by’okusoma,  amavideo n’amahotuba ga ngasi lubero. (Mt. 24:45, NWT) Ebyo byoshi binarhume rhwaderha aka Elihu mwîra wa Ayubu, waderhâga ntya: “Mwigiriza ohi oli aka [Nnamahanga]?”​—Ayu. 36:22, NWT.

16. Gurhi rhwakayungukamwo n’enyigirizo kurhenga emwa Yehova?

¹⁶ Bici wakajira. Iroho litagatifu lyanakurhabala okolese ebi oli wasoma n’ebi oli wayiga omu Kanwa ka Nnamahanga. Wanashenga Yehova nk’oku omwandisi w’ennanga ashengaga: “Muhanyi, onnangûle enjira yawe nkaz’igera omu kunali kwawe. Ohabûle omurhima gwani gukaz’irhinya izîno lyawe.” (Enna. 86:11) Lyo rhuhikira aho, rhunagendekere rhwacilisa ebiryo by’ekiroho ngasi mango omu kusoma Ebibliya n’ebindi bitabu Yehova agendekire arhuha kugerera ikubuliro lyage. Omuhigo gwawe gurhal’igwakuba n’obumanye kone, cikone oshinganine oyemere n’obwalagale ebi oli wayiga na kandi ocihangane obikolese omu kalamo kawe. Iroho litagatifu lya Yehova lyanakurhabala ojire ntyo. Na kandi nawe wanaha bene wirhu na bali birhu omurhima. (Hb. 10:24, 25) Bulya gurhi? Bulya abo gw’omalala gwawe gw’ekiroho. Okashenga Nnamahanga akuhe iroho lyage litagatifu likurhabale obe n’omurhima mwirhohye ly’ohâna ishuzo lyarhenga oku murhima omu ntimanano n’okukuhashisa ojire ecipindi cinja amango ocigwerhe. Kugerera eyo njira wanayereka Yehova na Yezu oku oshagalukire okuba muguma w’omu “bibuzi” byabo.​—Yn. 21:15-17

17. Gurhi wakayerekanamwo oku olunzire ikubuliro lya Yehova okuboko?

¹⁷ Hano hofi-hofi, ikubuliro liri lyalongozibwa n’iroho lya Nnamahanga lyone lyayish’isigala omw’igulu. Obe mubidu okukola haguma n’ikubuliro lya Yehova. Oyige olwiganyo lwa Nnamahanga omu kuyaka akabôlo, okayigiriza omwanzi mwinja ngasi muntu wakanabona. Oyige obuzigire bwa Yehova omu kugendekeza obuholo n’ecinyabuguma omu cigamba na ntyo oyake akavulindi. Na kandi okayumvirhiza Omwigiriza Mukulu omu kulonza akasanzi kw’okuyunguka n’ishega ly’ekiroho ali arhuha ngasi mango. Erhi wakajira ntyo orhakaciyoboha ebiri byagera mw’er’igulu lya Shetani liyerekire ebuzinda. Na ntyo wanaba n’obushiru bw’okukolera Yehova haguma n’abandi bali bamukolera n’obwishwekerezi omw’ikubuliro lyage.