1. Cuuamino Kiristaanchi maa assa agura dihasiissannosi?

ATI cuuamoottoho? Hatto ikkiro, Yihowa ammanattotanna dirijjitesi giddo isira soqqama hasiˈrattota mannu albaanni leellishootto. * Ikkollana, Yihowara noohe ammana lexxitanni haˈra hasiissannose. Xaa yannarano Yihowa dirijjitesi horoonsiˈranni noota ammana hasiissannohe.

2-3. Xaa yannara Yihowa dirijjitesi massaganni noohu hiittoonniiti? Lawishsha kuli.

² Xaa yannara Yihowa dirijjitesi massaganni noohu ayimmasi, isi hedinorenna amanyootu biddishshasi leellishanno garinniiti. Hanni Yihowa dirijjitesi widoonni leellishanni noota sase akattasi laˈno.

³ Umihunni, Yihowa dimallaadanno. (Soq. 10:34) Baxillu Yihowa Beettosi ‘manna baalaho wodote’ kakkalo asse aanno gede kakkayisinosi. (1 Xim. 2:6; Yoh. 3:16) Yihowa mannisi widoonni dancha duduwo mannu baalu macciishshanno gede assanni no; isi konni garinni dandaami deerrinni lowo manni Yesuusite wodote kakkalonni horo afiˈranno gede kaaˈlanni no. Layinkihunni Maganu amanyootunna keeru Maganooti. (1 Qor. 14:33, 40) Konnira Yihowa magansidhannori isira qinaawino garinninna keerunni soqqama hasiissannonsa. Sayikkihunni, Yihowa Bayira Rosiisaanchooti. (Isa. 30:20, 21) Konni daafira dirijjitesi mannaho Qullaawa Maxaafa rosiisate jawaatte loossanno. Umi xibbi diri Kiristaani songo Yihowa lawishsha harunsite  kuri sase akatta leellishshinohu hiittoonniiti? Xaa yannara Yihowa manni tenne akatta leellishanni noohu hiittoonniiti? Qullaawu ayyaani xaa yannara Yihowa dirijjite giddo soqqamatto gede kaaˈlannohehu ma garinniiti?

4. Soqqamaasinete Looso 1:8 kultanno garinni, Yesuusi harunsaanosi maa assitara hajajino? Insara mayi kaaˈlo hasiissannonsa?

⁴ Umi xibbi diro. Yesuusi sabbakino sokka mannu baalu hexxo afiˈranno gede assitannote. (Luq. 4:43) Isi hanafinoha sabbakate looso harunsaanosi “gobbate qacce geeshsha” loossanno gede hajajinonsa. (Soqqamaasinete Looso 1:8 nabbawi.) Insa konne looso uminsa jawaantenni loosa dandiitannokkiti egennantinote. Insara qullaawu ayyaani kaaˈlo hasiissannonsa; Yesuusi qullaawa ayyaana afidhannota kulinonsa.—Yoh. 14:26; Zak. 4:6.

5-6. Yesuusi rosaano qullaawu ayyaani kaaˈlinonsahu hiittoonniiti?

⁵ Yesuusi rosaano 33 M.D. yaano Phenxeqosxete ayyaani barra, qullaawa ayyaana adhitino. Qullaawu ayyaani kaaˈlonni insa bayichonko sabbaka hanaffino; mulenni lowo kume ikkanno manni dancha duduwo macciishshe ammanino. (Soq. 2:41; 4:4) Yesuusi rosaano mannu giwinsata waajjite badhera dihiggino; hatteentenni kaaˈlansara Magano huuccidhino. Insa togo yite huuccidhino: “Soqqamaanokki qaalekki waajjitukkinni jawaatte kultanno gede assi.” Hakkiinni insa qullaawu ayyaaninni woˈmite “Maganu qaale waajjitukkinni” sabbakkino.—Soq. 4:18-20, 29, 31.

⁶ Yesuusi rosaanora qarra ikkannonsari wolurino no. Lawishshaho hakkawaro nooti Qullaawa Borro shiimatella. Xaa yannara ninkera noonketi Qullaawa Borro xiinxallate kaaˈlitanno borro dinonsa. Hattono Yesuusi rosaano addi addi qaale coyiˈranno mannira sabbaka hasiissinonsa. Togoohu qarra ikkanno coyi heeˈrirono, kuri diinaggaabbe soqqantanno rosaano, mannu hedonni dandaamannokkiha lawanno looso loossino; insa boodu diri giddo dancha duduwo “kalqe baalate” sabbakkino.—Qol. 1:6, 23.

7. Xibbe saˈˈanno dirira albaanni, Yihowa soqqamaasine Maganu maa assitara hasiˈrannoro wodanchitinohu hiittoonniiti? Hakkiinni insa maa assitino?

⁷ Xaa yannara. Yihowa xaano mannasi massaganninna jawaachishanni no. Yihowa mannasi massagannoti qara doogo qullaawu ayyaaninni borreessamino Qaalisi widoonniiti. Qullaawu Maxaafi Yesuusi soqqanshorenna harunsaanosi isi hanafino looso loossanno gede hajajinota kulanno. (Mat. 28:19, 20) Maaja 1881nniti Agarooshshu Shae togo yitino: “Maganu woshshinonkehu woy buurinonkehu ayirrinye afiˈnammoranna jiro duuˈninammora ikkikkinni, noonkere baala horoonsiˈne dancha duduwo dudumbammoraati.” Looso Eeggo Uyinoonnirira Baalaho yitannoti 1919nni attammoonni buukileete togo yitanno: “Loosu lowoha ikkirono, kuni loosi Mootichunniha ikkino daafira, isi aannonke jawaantenni loonseemmo.” Kuri roduuwi umi xibbi diri Kiristaani gede konne looso loosate dandiiture baala assitino; insa baalunku gari mannira sabbakate qullaawu ayyaani kaaˈlannonsata addaxxitino. Ninkeno qullaawu ayyaani kaaˈlannonketa addaxxineemmo.

8-9. Yihowa dirijjite dancha duduwo halashshate hiikkuri doogga horoonsidhino?

⁸ Yihowa dirijjite dancha duduwo halashshate addi addire horoonsidhanno. Kuri giddo gamu, attammoonni borro, Kalaqote Foto Diraama, fonogiraafe, mayikirafoone qansoonni makiinna, raadoonete xaawa hattono yannankera noo tekinoolojeeti. Qoleno Maganu dirijjite Qullaawa Maxaafanna Qullaawu Maxaafi aana xintantino borro albinni roore lowo afiinni tirtanni no. Mayira? Baalunku gari manni dancha duduwo afoo  dadhino qaalinni macciishshanno gedeeti. Yihowa mallaadannokki Maganooti; isi “baattote aana noo gosara, gaˈretenna addi addi afiinni coyiˈranno manni baalaho” dancha duduwo dudumbannita masaalino. (Aju. 14:6, 7) Isi Maganu Mangiste sokka mannu baalu macciishshara hasiˈranno.

⁹ Wolu manni eannota fajjinannikki hintsi giddo heeˈranno mannira dancha duduwo kulate maa assinoonni? Yihowa dirijjite togoo mannira danchu duduwi iillanno gede kaaˈlate addi addita gudumaalu soqqansho hanaffino. Lawishshaho, Aliidi Bisi 2001nni Faransayete gobbara gaarete borronna wolere horoonsiˈne gudumaaleho sabbankanni gede fajjino; gedensaanni wole gobbuwarano roduuwu konni garinni sabbaka hanaffino. Tini dancha guma abbitino. Ameerikaho mannu batiˈrannohu Niwu Yorkete katamira 2011nni gudumaalu soqqansho hananfoonni. Hananfi diro roduuwu 102,129 maxaafanna 68,911 metseetta eltino. Hattono 4,701 manni Qullaawa Maxaafa xiinxallinsansara xaˈmiˈrino. Konne looso qullaawu ayyaani kaaˈlanni nooti dihuluullissannote. Konnira Aliidi Bisi alamete doyichora heedhanno roduuwi borrote gaarenna wolere horoonsidhe gudumaaleho sabbakkara fajjino.

10. Sabbakatenna rosiisate dandoonke woyyeessiˈrate maa assa dandiineemmo?

¹⁰ Assa dandaattore. Yihowa Kiristaanu gambooshshi widoonni aanno qajeelshinni woˈmunni woˈma horo afiˈrate sharrami. Soqqanshote gaamokki ledo ganyite soqqami. Insa sabbakatenna rosiisate dandookki woyyeessiˈratto gede kaaˈlitahera dandiitanno; hattono danchu lawishshinsa jawaachishannohe. Guficho ikkannori heeˈrirono cincite soqqami. Kuni birxichi xintamino qummeeshshi, Maganu fajjo wonshineemmohu uminke wolqanni ikkikkinni qullaawu ayyaani kaaˈlonni ikkinota qaagiissannonke. (Zak. 4:6) Maganu isi looso loonsanni heeˈnoommo daafira, jawaante aannonketa dihuluullammeemmo.

11. Umi xibbi diro noohu aliidi bisi Maganu manni mereero amanyootu heeˈranno gede assate mitteenni loosinohu hiittoonniiti?

¹¹ Umi xibbi diro. Yerusaalamete noohu aliidi bisi Maganu manni mereero amanyootunna  keeru heeˈranno gede assate mittimmatenni loosino. (Soq. 2:42) Lawishshaho, 49 M.D. balla barcimate daafira kaˈino hajo aliidi bisira shiqquta, qullaawu ayyaani massageennansa tenne hajo daafira hasaabbino. Aliidi Bisi tenne hajo hasaawe tira hoogoommero songote mereero babbadooshshu kalaqamanno daafira, sabbakate looso danchu garinni loosa didandiitanno. Soqqamaasinenna geerru Yihudoota ikkiturono, Yihudu budira digolantino woy konne roso rosiissannori widira higge dituqqitino. Hatteentenni insa Maganu Qaale xiinxallitino; hattono qullaawu ayyaani massagansara huuccidhino. (Soq. 15:1, 2, 5-20, 28) Tini mayi guma abbituyya? Yihowa insa assitinore maassiˈrino daafira songotenni keerunna mittimma dibaˈino; hattono jawaatte sabbakkino.—Soq. 15:30, 31; 16:4, 5.

12. Xaa yannara Yihowa dirijjite giddo amanyootunna keeru noota leellishannori maati?

¹² Xaa yannara. Yihowa dirijjite Maganu manni mereero amanyootunna keeru baˈˈannokki gede assate jawaatte loossanno. Bocaasa 15, 1895nnite Agarooshshu Shaera 1 Qorontoosi 14:40 aana xintaminohu “Seerunninna Amanyootunni” yaanno birxichi fulino. Konni birxichira togo yinoonni: “Soqqamaasine umi xibbi dirira noo songora amanyootu daafira lowore borreessitino. . . . ‘Umo assine borreessinoonnita’ tenne amaale harunsa lowo geeshsha hasiissanno.” (Rom. 15:4) Umi xibbi dirira noo Kiristaani gede, xaa yannarano Yihowa dirijjite Maganu manni mereero amanyootunna keeru baˈˈannokki gede assate sharrantanno. Lawishshaho, wole songo haˈrittoro, woy wole gobba haˈroottowa nafa songo haˈrittoro Agarooshshu Shae massaganni garanna hiikko birxicho xiinxallinanniro afootto. Borsattori dino. Togoo mittimma heedhanno gede assannohu Maganu ayyaana agurranna woluri mayi no?—Sof. 3:9.

13. Yaiqoobi 3:17 ninkeneeto hiikkuri xaˈmuwa xaˈmineemmo gede assitannonke?

¹³ Assa dandaattore. Yihowa mannisi “Maganu Ayyaani aanno keerinni” mittooˈme heeˈrara hasiˈranno. (Efe. 4:1-3) Konnira ateneeto togo yite xaˈmi: ‘Songote giddo mittimmanna keeru baˈˈannokki gede asseemmo? Albisa ikkite soqqantannorira hajajameemmo? Wolootu hakko iso songote giddo qoosso nooeha ikkiro  addaxxitannoe? Saate ayirriseemmo? Woloota kaaˈlanna insara soqqama baxeemmo?’ (Yaiqoobi 3:17 nabbawi.) Woyyeessiˈra hasiissannoheri nooti leeltuhero qullaawu ayyaani kaaˈlo afiˈrate huucciˈri. Assattore baala qullaawu ayyaani massagannohe gede assiˈrittoro, roduuwu baxxannohe hattono ayirrissannohe.

14. Qolasiyaasi Sokka 1:9, 10 kultanno garinni, Yihowa umi xibbi diro mannasi rosiisinohu hiittoonniiti?

¹⁴ Umi xibbi diro. Yihowa mannasi rosiisa lowo geeshsha baxanno. (Far. 32:8) Insa iso affara, baxxaranna isi ooso ikkite hegerera heedhara hasiˈranno. Isi rosiisa hoogoommero kuni baalu didandaamannoreeti. (Yoh. 17:3) Yihowa mannasi rosiisate umi xibbi diri Kiristaani songo horoonsiˈrino. (Qolasiyaasi Sokka 1:9, 10 nabbawi.) Yesuusi adhitinanni yee qaale einohu qullaawu ayyaani lowo geeshsha kaaˈlinonsa. (Yoh. 14:16) Qullaawu ayyaani, Yesuusi rosaano Maganu Qaale roore huwattanno gede hattono Yesuusi coyiˈrinorenna assinore qaagganno gede kaaˈlinonsa; gedensaanni Yesuusi coyiˈrinorenna assinore Wongeelluwate giddo borreessinoonni. Tini umi xibbi diri Kiristaani ammana kaajjishshino; hattono Maganoho, Beettisiranna mimmitinsara noo baxilli lexxanno gede assitino.

15. Yihowa Isayaasi 2:2, 3te coyiˈrino masaalo woˈmitanni noohu hiittoonniiti?

¹⁵ Xaa yannara. Yihowa “goofimarchu yannara” baalante daganni dayino manni doogosi rosate isi ‘ilaala’ yaano halaalu magansiˈrawa daannota masaalino. (Isayaasi 2:2, 3 nabbawi.) Tini masaalo woˈmitanna laˈnanni heeˈnoommo. Halaalu magansiˈra kaphu magansiˈra baalante giddonni luphi yite leeltanni no. Yihowa ayyaanaamittete sagale shiqishanni noonke. (Isa. 25:6) Yihowa “Ammanaminohunna wodanaamu borojjichi” widoonni falakkinota addi addita ayyaanaamitte sagale aanni noonke; lawishshaho borro, lallawo hattono  viidiyo heda dandiineemmo. (Mat. 24:45, NW) Ninkeno Yihowa daafira gara ikkinore coyiˈrinohu Iyyoobi jaali Eelihu gede, “[Maganu] gedee rosiisaanchi” dino yaa dandiineemmo.—Iyo. 36:22.

16. Ayyaanaamittetenni lophate maa assa dandaatto?

¹⁶ Assa dandaattore. Qullaawu ayyaani Maganu Qaalinni nabbawoottorenna xiinxallootore loosu aana hosiisatto gede kaaˈlannohe. Faarsaasinchu gede atino togo yite huucciˈri: “[Yihowa] ballo, halaalikkinni qaafeemmo gede doogokki rosiisie; ate ayirrisate beehaminokki wodana uyie.” (Far. 86:11) Konnira Yihowa Qaalisinna dirijjitesi widoonni shiqishannota ayyaanaamittete sagale sagaˈla agurtooti. Hatto assattohu egenno afiˈrate calla diˈˈikkino. Halaalu wodanikkira coanno gede assiˈranna nabbawoottore loosu aana hosiisa hasiissannohe. Yihowa ayyaani hatto assatto gede kaaˈlannohe. Roduuwakkino jawaachisha dandaatto. (Ibi. 10:24, 25) Mayira? Korkaatuno insa ayyaanaamittete maatekkiiti. Kiristaanu gambooshshiwa dancha dawaro qolatto gedenna kifile heedhuhero kifilekki danchu garinni shiqishatto gede qullaawu ayyaani kaaˈlo afiˈrate huucciˈri. Konni garinni Yihowanna Beettisira muxxe ‘geˈreewonsa’ baxattota leellishatto.—Yoh. 21:15-17.

17. Ammanante Yihowa dirijjite kaaˈlattota leellisha dandaattohu hiittoonniiti?

¹⁷ Muli yanna giddo uullate aana gattannoti Maganu ayyaani massaganno dirijjite callate. Konnira Yihowa dirijjite ledo diinaggaabbe, loosi. Baalunku mannira dancha duduwo dudubbe Maganu gede mallaadittokkinni manna baala baxattota leellishi. Songote giddo mittimma heedhanno gede assite, Maganu gede amanyootenna keere baxattota leellishi. Maganu shiqishannote ayyaanaamittete sagalenni woˈmunni woˈma horo afiˈrate sharrante, Bayira Rosiisaanchokki macciishshi. Hatto assittoro Sheexaanu alame baˈanno woyite diwaajjatto. Hatteentenni Yihowa dirijjite giddo ammanante soqqantannori ledo waajjittokkinni kaajjite uurratto.