Hanenty ty anatiny ao

Ho amy loha hevitsy any

LAHATSORATSY FIANARA 43

Mitariky ty Fandaminany Jehovah

Mitariky ty Fandaminany Jehovah

“ ‘Tsy amy alalani-maramila na hery, fa amy alalani-fanahiko’, hoy Jehovah Tomponi-tafiky.”—ZAK. 4:6.

HIRA 40 An’iza moa Isika?

HO HITANAO ATO *

1. Ino ty tokony hataoni-Kristiana vita batisa?

FA VITA batisa va iha? Laha zay, le fa nambaranao an-kavoria hoe mino ani-Jehovah iha sady parè hanompo azy miaraky amy fandaminany. * Mazava ho azy fa mbo tokony hihamatanjaky avao ty finoanao ani-Jehovah. Mbo tokony hohamafisinao koa ty fatokisanao hoe mampiasa ty fandaminany Jehovah henanizao.

2-3. Ino ty hitantsika amy fomba itarihani-Jehovah ty fandaminany? Manomeza ohatsy.

2 Lafa mandiniky ty fomba itarihani-Jehovah ty fandaminany tsika, le hitantsika ty toetsiny, ty raha teany hatao, noho ty torolalany. Ndao tsika handiniky toetsini-Jehovah telo hita amy fandaminany eo.

3 Voalohany, “tsy mitingy volon’olo Ndranahary.” (Asa. 10:34) Fitiava ro nanosiky ani-Jehovah hanome ty Anakilahiny “mba hanavota ty olo iaby.” (1 Tim. 2:6; Jaona 3:16) Mampiasa ty vahoakiny Jehovah mba hitory ty vaovao soa amy ze olo ta hijanjy. Manao ani-zay ie mba ho farani-ze maro ty olo ampeany handramby soa baka amy vilim-panavota. Faharoe, Ndranaharini-filamina noho filongoa Jehovah. (1 Kor. 14:33, 40; Jak. 3:17) Ka tsy mahatseriky laha voalamy soa noho tea filongoa ty olo manompo azy. Fahatelo, tea mampianatsy Jehovah. (Isa. 30:20, 21) Zay ro mahavy ty fandaminany hifantoky amy fampianara ty Safàny, ndre amy fiangona eo zay ndre lafa mitory. Akory ty nampisehoani-Kristiana tamy taonjato voalohany rey ani-toetsini-Jehovah telo reo? Manao akory ty isehoany amy androntsika zao? Le akory ty anampeani-fanahy masy anao lafa manompo miaraky amy fandaminani-Jehovah iha?

TSY MANAVAKAVAKY NDRANAHARY

4. Laha hentea ty Asan’ny Apostoly 1:8, ino ty didy nameani-Jesosy ty mpanori-dia azy, le ino ty fanampea ho azon-drozy?

4 Tamy taonjato voalohany. Nahavy ty olombelo iaby hanan-draha tamany ty hafatsy nitorini-Jesosy. (Lioka 4:43) Nameany didy ty mpanori-dia azy mba hanohy ani-asa fa natombokiny iny, ka ho vavolombelo “amy faritsy farany lavitsy amy tany toy any.” (Vakio Asan’ny Apostoly 1:8.) Mazava ho azy fa tsy ho vitan-drozy amy ty herin-drozy manoka asa io. Mila fanahy masy rozy, zany hoe “mpanampy” nampitamanini-Jesosy an-drozy iny.​—Jaona 14:26; Zak. 4:6.

5-6. Nanao akory ty nanampeani-fanahy masy ani-mpanori-dia ani-Jesosy rey?

5 Nahazo fanahy masy mpanori-dia ani-Jesosy rey tamy Pentekosta tao 33. Nanampy an-drozy fanahy io ka avy le nanomboky nitory rozy, le an’arivony ty olo naneky ty vaovao soa. (Asa. 2:41; 4:4) Lafa nisy fanohera, le tsy natahotsy mpianatsy reo fa nangataky fanampea tamy Ndranahary. Nivavaky rozy hoe: “Anovo ze hahavy anay mpanomponao mba tena hahasaky hitory ty safànao.” Nifeno fanahy masy amy zay rozy ka “nahasaky nitory ty safà-Ndranahary.”​—Asa 4:18-20, 29, 31.

6 Niatriky raha sarotsy hafa koa mpianatsini-Jesosy reo. Vitsivitsy avao, ohatsy, ty boky amy Soratsy Masy ao nananan-drozy. Mbo tsy nana boky nanazava ty raha voasoratsy ao rozy, tsy manahaky antsika henanizao. Nitory amin’olo manao fivolana sankarazany koa rozy. Ndre teo aza raha sarotsy iaby reo, le nazoto avao mpianatsy reo ka nahavita raha tsy nieritserety. Am-polony tao avao, le fa nivitan-drozy ty nitory ty vaovao soa “tamy zavaboary iaby ambany lanitsy etoy.”​—Kol. 1:6, 23.

7. Fa 100 tao mahery zay, le nihaini-mpanomponi-Jehovah reo ty raha taki-Ndranahary tamin-drozy. Akory ty nahaizan-drozy azy, le ino ty nataon-drozy?

7 Amy androntsika zao. Mbo mitariky ty vahoakiny avao Jehovah sady manome hery an-drozy mba hanaova ty sitrapony. Le ty Baiboly ro tena ampiasany mba hitariha ty mpanompony, satria baka amy fanahy masy raha io. Hitantsika ao ty tantarani-fanompoani-Jesosy noho ty didy nameany ani-mpanori-dia azy reo mba hanohy ty asa fa natombokiny. (Mat. 28:19, 20) Ho zao ty volanini-Tilikambo Fiambena tamy Ziè 1881: “Tsy hamea voninahitsy noho hananam-be ro nikaihani-Jehovah antsika na nanosora antsika fa mba hampiasa ze raha iaby ananantsika hitoria ty vaovao soa.” Hoy ty bokikely hoe Ia ro Nanankina ani-Asa Iny? (anglè) naboaky tamy 1919: “Marina fa atao raha bevata asa iny, fe asani-Tompo io ka amy heriny ro hahavitantsika azy.” Manahaky ty Kristiana tamy taonjato voalohany, le nibe herim-po rahalahintsika reo sady niasa mafy satria natoky rozy hoe hanampy an-drozy hitory amy karazan’olo iaby ty fanahy masy. Matoky manahaky ani-zay koa tsika henanizao.

Nampiasa fitaova tena soa ty fandaminani-Jehovah mba hitoria ty vaovao soa (Fehintsoratsy 8-9)

8-9. Ino iaby ty fomba nampiasani-fandaminani-Jehovah mba hampandrosoa ty asa fitoria?

8 Mampiasa fitaova farani-ze soa ty fandaminani-Jehovah mba hitoria ty vaovao soa. Anatini-zay ty boky vita printy, “Famorona Aseho amy Sary”, grafofony, tomabily misy fanamafisam-peo, radio, le vo tsiela koa zay nampiasa fitaova elekroniky. Miezaky koa ty fandamina mandika fanazavà amy safà maro mandilatsy ty taloha! Ino ty antony? Amy zay afaky maharè ty vaovao soa amy fivolanany ty karazan’olo iaby. Tsy manavakavaky Jehovah. Fa nivola ie hoe hambara “amy firenena noho foko noho olo samby hafa fivolana voho vahoaky iaby” ty vaovao soa. (Apok. 14:6, 7) Teany haharè ty hafatsy mikasiky ani-Fanjakà iny ty olo iaby.

9 Ka manao akory azy olo mipetraky amy tranobe tsy azontsika ilira rey? Mba hanampea ty maro amin-drozy, le nanisy fitoria anjavalala amy fomba sankarazany ty fandaminani-Jehovah. Tamy 2001, ohatsy, le nekeni-Filan-kevi-pitantana ty hampiasani-rahalahy noho anabavintsika a Fransy any reo tablò fitoria noho fomba hafa mba hampisehoa ani-bokintsika rey. Nanomboky nampiasa ani-fomba fitoria io koa rahalahintsika an-tany hafa any rey tafarani-zay. Nisoa biby ty vokany. Tamy 2011, le nisy fandahara vaovao zay natomboky ta Etazinỳ any, amy pilasy raiky tena maro olo amy Tanàni-New York ao. Tanatini-tao raiky voalohany, le nisy 102 129 ty boky nivoapetraky, le gazety 68 911. Olo 4 701 koa ro nangataky hampianary Baiboly! Hita hoe nampiasa ty fanahiny masy Jehovah mba hanohana ani-asa io. Nekeni-Filan-kevi-pitantana amy zay ty hampiasani-rahalahy noho anabavintsika amy tany toy iaby tablò fitoria noho fomba hafa mba hampisehoa ani-bokintsika rey.

10. Ino ty azontsika atao mba hanasoava ty fanompoantsika?

10 Ino ty azonao atao? Hararaoto soa ty fampiofana ameani-Jehovah amy alalani-fivoria. Mitoria tsy tampaky miaraky amy andia-mpitory misy anao. Hahazo ty fanampea mety hilànao iha ao, le hampahery anao ty modelin’olo hafa. Mitoria avao ndre misy raha sarotsy. Mampitiaro antsika andinin-teny fototsy iny hoe afaky manatanteraky ty sitrapo-Ndranahary tsika, fe tsy amy ty herintsika manoka, fa amy alalani-fanahy masy. (Zak. 4:6) Afaky matoky tsika fa hanome ty hery ilàntsika Ndranahary, satria manao ty asany tsika.

NDRANAHARINI-FILAMINA NOHO FILONGOA JEHOVAH

11. Ino ty mampiseho hoe nahay niaraky niasa ty filan-kevi-pitantana mba hilamy avao ty vahoaki-Ndranahary?

11 Tamy taonjato voalohany. Nahay niaraky niasa ty filan-kevi-pitantana ta Jerosalema ao mba hilamy avao ty vahoaki-Ndranahary. (Asa. 2:42) Lafa nisy, ohatsy, ty alihevitsy mikasiky savatsy tamy tao 49, le nitarihini-fanahy masy ty filan-kevi-pitantana mba handiniky ani-raha manahira io. Laha nampizarazara ty fiangona hevitsy io, le ho nivoasaka ty asa fitoria. Jiosy apostoly noho anti-panahy rey, fe tsy nengan-drozy hisy vokany amin-drozy ty fombafomba jiosy na ty fampianaran-drozy. Mifanohitsy amy zay fa nandiniky ty Safà-Ndranahary rozy sady nangataky ty fanahiny masy mba hanampy an-drozy hahay hanapa-kevitsy. (Asa. 15:1, 2, 5-20, 28) Ino ty vokany? Nitahy ty fanapahan-kevitsy nataon-drozy Jehovah, ka nilamy noho niharo raiky avao ty fiangona le nandroso ty asa fitoria.​—Asa. 15:30, 31; 16:4, 5.

12. Ino ty mampiseho hoe milamy noho miharo raiky vatany ty fandaminani-Jehovah henanizao?

12 Amy androntsika zao. Nanampy ty vahoakini-Jehovah hilamy noho hiharo raiky avao ty fandaminani-Jehovah. Nisy lahatsoratsy zay tamy Tilikambo Fiambenani-Ziona Sady Mpanambara ty Fanatrehani-Kristy, 15 Novambra 1895. Ty foto-kevitsiny hoe “Maeva Noho Milamy.” Nalà baka amy 1 Korintianina 14:40 raha io. Ho zao ty volaniny ao: “Maro ty raha nivolanini-apostoly reo tamy fiangona voalohany mikasiky ty filamina ... Tena ilà ty manaraky avao ‘ty raha iaby nisoraty taloha mba ho fianara ho ahintsika.’ ” (Rom. 15:4) Hita amy fandaminani-Jehovah henanizao hoe maniry hilamy noho hiharo raiky manahaky ty Kristiana tamy taonjato voalohany rozy. Toy misy ohatsy: Laha manatriky Fianara Tilikambo amy fiangona hafa iha, na an-tany hafa, le fa hainao hoe manao akory ty fomba itariha ani-fianara iny, ndre ty lahatsoratsy hianara aza. Avy le tsy misalasala iha! Ty fanahi-Ndranahary avao ro afaky mampiharo raiky manahaky ani-zay!​—Zef. 3:9.

13. Ino iaby ty fanontanea tokony ho eritseretintsika lafa mandiniky ty Jakoba 3:17?

13 Ino ty azonao atao? Teani-Jehovah ty vahoakiny mba “hitanjaky ty maha raiky ty fanahy anatini-filongoa, azy fehy mampiharo iny.” (Efes. 4:1-3) Ka eritsereto hoe: ‘Ataoko va ze hampisy filongoa noho fiharoa raiky amy fiangona eo? Manoriky ty safàni-azy mitariky reo va aho? Azon’olo tamany va aho, sirtò laha mana andraikitsy anivoni-fiangona eo? Manaja fotoa va aho, tea manampy, sady mazoto manompo?’ (Vakio Jakoba 3:17.) Laha hitanao hoe misy raha tokony hasoavy, le mivavaha soa hahazo fanahy masy. Laha enganao hanasoa ty toetsinao noho ty raha ataonao raha io, le vomaiky ho tea anao rahalahy noho anabavinao reo sady hankasitraky ty raha ataonao.

MAMPIANATSY ANTSIKA JEHOVAH SADY MANOHA ANTSIKA

14. Laha hentea ty Kolosianina 1:9, 10, manao akory ty nampianarani-Jehovah ty vahoakiny tamy taonjato voalohany?

14 Tamy taonjato voalohany. Mahafalifaly ani-Jehovah ty mampianatsy ty vahoakiny. (Sal. 32:8) Teany hahay azy rozy, ho tea azy sady ho velo zisiky farany. Tsy ho tanteraky raha iaby zay laha tsy eo ty fampianara ameany. (Jaona 17:3) Nampiasa ty fiangona tamy taonjato voalohany Jehovah mba hampianara ty vahoakiny. (Vakio Kolosianina 1:9, 10.) Nanampy ani-mpianatsy reo koa ty fanahy masy, azy “mpanampy” nampitamanini-Jesosy iny. (Jaona 14:16) Nampeany rozy mba hahazo soa ty Safà-Ndranahary, noho hahatiaro ani-ze raha iaby nivakin-drozy tamy Filazantsara ao mikasiky ty raha nivolanini-Jesosy noho nataony. Nanatanjaky ty finoani-Kristiana tamy taonjato voalohany reo fahaiza zay, sady nanamafy ty fitiavan-drozy a Ndranahary noho Anakilahiny iny, voho ty olo hafa.

15. Ino iaby ty fomba hitanao hoe nanatanterahani-Jehovah ani-fampitamanany amy Isaia 2:2, 3 ao iny?

15 Amy androntsika zao. Fa nivola Jehovah hoe “amy andro farany”, le hivory amy vohitsiny masy eo ty olo baka amy firenena iaby mba hianatsy ty lalany. (Vakio Isaia 2:2, 3.) Hitantsika ty fahatanterahani-faminania io. Nasondrotsy anabo mandilatsy ty fivavahan-diso iaby ty fivavaha marina. Maro vatany ty sakafo ara-panahy ameani-Jehovah ty vahoakiny! (Isa. 25:6) “Ty mpanompo azo atokisa noho mahihitsy” ro ampiasany mba hanomeza ani-raha reo amy fomba sankarazany. Eo, ohatsy, ty lahatsoratsy, lahateny, sarisary noho video. (Mat. 24:45) Mahatsapa manahaky ani-Eliho namani-Joba iny tsika. Nivola ie hoe: “Ia ty mpampianatsy manahaky [a Ndranahary]?”​—Joba 36:22.

Alatsaho am-ponao ao ty fahamarina, sady oriho amy fiainanao (Fehintsoratsy 16) *

16. Ino ty azonao atao mba handramby soa baka amy fampianarani-Jehovah?

16 Ino ty azonao atao? Hanampy anao ty fanahy masy ka ho vitanao ty hanoriky ze raha nivakinao noho nianaranao tamy Safà-Ndranahary ao. Mivavaha manahaky ani-mpanao salamo iny hoe: “Ampianaro ahy lahy Jehovah ty lalanao! Handeha amy ty fahamarinanao aho. Anovo ze hatahorako ty anaranao amy ty foko iaby.” (Sal. 86:11) Mazotoa mandramby ty sakafo ara-panahy ameani-Jehovah amy alalani-Safàny noho ty fandaminany. Tsy ty hahazo fahaiza avao ro raha kendrenao, fa teanao koa ty handatsaky am-po ty fahamarina noho hanoriky azy amy fiainanao. Afaky manampy anao hanao ani-zay ty fanahini-Jehovah. Ta hampahery ani-rahalahy noho anabavinao reo koa iha. (Heb. 10:24, 25) Fa manino? Satria fianakavianao ara-panahy rozy. Mangataha fanahy masy mba hanampy anao hanome valin-teny mampahery noho hanao soa ty anjaranao lafa am-pivoria any. Asehonao amy Jehovah noho Anakiny iny baka amy zay hoe teanao ‘aondrin-drozy’ lafovily reo.​—Jaona 21:15-17.

17. Ino iaby ty azonao atao mba hampisehoa hoe tsy mivaliky iha fa manoha ty fandaminani-Jehovah avao?

17 Tsy ho ela, le tsy hisy fandamina hafa sasy ty an-tany etoy laha tsy azy tarihini-fanahi-Ndranahary iny avao. Ka mba mazotoa miaraky miasa amy fandaminani-Jehovah. Atorò hoe tea ty olo iaby manahaky a Ndranahary iha, ka ambarao amy ze olo hitanao ty vaovao soa. Tahafo ty fitiavany filamina noho filongoa, ka miezaha hampiharo raiky ty fiangona. Rambeso iaby ty sakafo ara-panahy ameani-Mpampianatsy Be Voninahitsy iny, satria zay ty ampisehoanao hoe mijanjy azy iha. Tsy hatahotsy iha amy zay lafa ho rava tontoloni-Satana toy. Vomaiky aza iha ho kalma avao miaraky amin’olo tsy mivaliky amy fandaminani-Jehovah eo.

HIRA 3 Ianao no Tokinay

^ feh. 5 Resy lahatsy va iha hoe Jehovah ro mitariky ty fandaminany henanizao? Hodinihintsika amy lahatsoratsy toy ato hoe akory ty fomba nitarihani-Jehovah ty fiangona kristiana tamy taonjato voalohany, le akory ty itarihany ty vahoakiny zisiky henanizao.

^ feh. 1 FANAZAVÀ: Mizara roe ty fandaminani-Jehovah amy kila raha iaby zao, ty tampany raiky an-danitsy any, le ty tampany raiky an-tany etoa. Ty tampany an-tany etoa ro kaihy hoe “fandamina” amy lahatsoratsy toy ato.

^ feh. 52 SARY: Lafa baka nanenty video noho tantaran’olo manompo amy tany mila mpitory fanampiny any rey ty ranabavy raiky mpisava lala, le voatosiky hanao manahaky an-drozy koa. Nitratsiny avao raha kendreny iny tamy farany, ka manompo amy pilasy mila mpitory koa ie.