1. O le ā e tatau ona faia pea e Kerisiano papatiso?

PO UA e papatiso? Pe afai o lea, ua e faailoa atu la i le lautele lou faatuatua iā Ieova ma lou lotomalie e auauna faatasi ma lana faalapotopotoga. * O le mea moni, e manaʻomia pea ona faamalosia lou faatuatua iā Ieova. E manaʻomia foʻi ona faamalosia pea lou mautinoa, o loo faaaogā e Ieova lana faalapotopotoga i aso nei.

2-3. O ā auala o loo taʻitaʻia ai e Ieova lana faalapotopotoga i aso nei? Aumai ni faaaʻoaʻoga.

² O loo taʻitaʻia e Ieova lana faalapotopotoga i aso nei i se auala e faaatagia mai ai le ituaiga Atua e iai o ia, lona finagalo ma ana tapulaa. O lea, seʻi o tatou iloiloina ni uiga se tolu o Ieova o loo faaatagia mai e lana faalapotopotoga.

³ Muamua, ʻe lē faailoga tagata le Atua.’ (Galu. 10:34) O le alofa na uunaʻia ai Ieova e foaʻi mai lona alo, ʻo se togiola mo tagata uma.’ (1 Timo. 2:6; Ioa. 3:16) O loo faaaogā e Ieova ona tagata e talaʻi le tala lelei iā i latou uma e fia faalogo, ina ia maua e le toʻatele aogā mai i le togiola. Lona lua, o Ieova o le Atua o le filemu ma e fai mea maopoopo. (1 Kori. 14:33, 40) O lea la, e tatou te faatalitalia ona tagata tapuaʻi e auauna faatasi iā te ia i se auala maopoopo ma filemu. Lona tolu, o Ieova o le “Aʻoaʻo Sili.” (Isa. 30:20, 21) O le māfuaaga lenā e uaʻi atu ai lana faalapotopotoga i le aʻoaʻoina o lana Afioga le Tusi Paia i le faapotopotoga, ma le galuega talaʻi. Na faapefea ona faaatagia mai e le uluaʻi faapotopotoga Kerisiano uiga na e tolu o Ieova? Ua faapefea ona faaatagia mai e Kerisiano i aso nei na uiga? E faapefea ona fesoasoani le agaga paia iā te oe a o e auauna  faatasi ma le faalapotopotoga a Ieova i aso nei?

4. E pei ona taʻua i le Galuega 1:8, o le ā na faatonuina e Iesu ona soo e fai ma o le ā le fesoasoani na latou mauaina?

⁴ I le uluaʻi senituri. O le feʻau na talaʻia e Iesu na avatu ai i tagata uma le faamoemoe. (Luka 4:43) Na ia faatonuina ona soo e faaauau le galuega na ia amataina, o le molimau atu i “tuluʻiga uma o le lalolagi.” (Faitau le Galuega 1:8.) O le mea moni, e leʻi mafai ona latou faia lenā galuega i so latou lava malosi. Na latou manaʻomia le agaga paia lea na folafola e Iesu o le a auina atu iā i latou, “o le fesoasoani.”​—Ioa. 14:26; Saka. 4:6.

5-6. O ā auala na fesoasoani ai le agaga paia i soo o Iesu?

⁵ Na maua e soo o Iesu le agaga paia i le Penetekoso i le 33 T.A. O le fesoasoani a le agaga na vave ai ona latou talaʻi, ma i se taimi puupuu e faitau afe i latou na talia le tala lelei. (Galu. 2:41; 4:4) Ina ua sauāina i latou, e leʻi faavaivai ai ma fefefe le ʻausoo ae na latou talosaga atu i le Atua mo le fesoasoani. Na latou tatalo: “Ia tuuina mai i au pologa le malosi e tautatala atu ai pea i lau afioga ma le lototetele.” O lea, na faatumulia ai i latou i le agaga paia ma faaauau ai ona latou “taʻutaʻu atu le afioga paia a le Atua ma le lototetele.”​—Galu. 4:18-20, 29, 31.

⁶ Na fesagaʻia foʻi e soo o Iesu nisi luʻi. O se faataʻitaʻiga, e leʻi tele ni kopi o le Tusi Paia na iai i lenā taimi. E leʻi iai ni tusi e faamatala ai le Tusi Paia e pei o aso nei. Na talaʻi atu foʻi soo i tagata e eseese a latou gagana. E ui i na luʻi, ae na faia e na soo maelega se mea na foliga e lē mafai ona faia. Na latou talaʻia le tala lelei “i foafoaga uma i lalo o le lagi,” i le pe a ma le 30 tausaga.​—Kolo. 1:6, 23.

7. I le silia ma le 100 tausaga ua mavae, na faapefea ona iloa e auauna a Ieova lona finagalo mo i latou ma o le ā na latou faia?

⁷ I aso nei. O loo faaauau ona taʻitaʻia ma faamalosia e Ieova ona tagata. O le tele o lenā taʻitaʻiga e ala mai i le Afioga a le Atua le Tusi Paia lea na fesoasoani lona agaga e tusiaina. E tatou te maua i le Tusi Paia tala o le faiva a Iesu ma lana faatonuga i ona soo e faaauau le galuega na ia amataina. (Mata. 28:19, 20) Na taʻua i le Olomatamata o Iulai i le 1881: “E leʻi valaauina pe faauuina i tatou ina ia viia e tagata pe mauoloa ai, ae ia faaaogā o tatou ola ma mea uma ua tatou maua, e talaʻi ai le tala lelei.” Ua faapea mai se tamaʻi tusi na tusia i le 1919 e taʻua o le To Whom the Work Is Entrusted: “E matuā tele galuega e fai ae o le galuega a le Alii, ma o le a ia foaʻi mai iā i tatou le malosi e faataunuu ai.” Ioe, na pei o tatou uso o uluaʻi Kerisiano, na latou lototetele ma galulue mamafa ona na latou mautinoa, e fesoasoani le agaga paia iā i latou e talaʻi i so o se ituaiga tagata. O loo faaauau pea ona tatou mautinoa i le fesoasoani a le agaga i aso nei.

8-9. O ā auala ua faaaogā e le faalapotopotoga a Ieova e faalautele atu ai le galuega talaʻi?

⁸ Ua faaaogā e le faalapotopotoga a Ieova meafaigaluega e sili ona lelei e talaʻia ai le tala lelei. Ua aofia i nei meafaigaluega lomiga ua uma ona lomiaina, “Ata o le Foafoaga,” (Photo-Drama of Creation) laau e tā ai lauga, o taavale faasalalau, o polokalame i le leitiō ma masini faaonapōnei. I le taimi lenei, ua sili atu ona tele gagana ua faaliliuina ai e le faalapotopotoga a le Atua mataupu faale-Tusi Paia nai lo o se isi lava taimi. Aiseā? Ina ia mafai ai e ituaiga uma o tagata ona maua le tala lelei i la latou lava gagana. E lē faailoga tagata Ieova auā na ia valoia o le a folafolaina atu le tala lelei “i nuu uma, ma ituaiga uma, ma  gagana uma, ma tagata uma.” (Faaa. 14:6, 7) E finagalo Ieova ia maua e tagata uma le feʻau o le Malo.

⁹ Ae e faapefea i latou e faigatā ona talaʻi i ai, atonu e nonofo i ni fale e matuā malupuipuia? Ina ia talaʻi atu i le toʻatele o nei tagata, ua fesoasoani Ieova i lana faalapotopotoga e faaaogā auala eseese e talaʻi atu ai i nofoaga faitele. O se faataʻitaʻiga i le 2001, na faamaonia ai e le Vaega Pule le faaaogāina o fata tusi ma isi mea e faailoa ai lomiga i Falani, ma na mulimuli ane faaaogā i isi atunuu. Na maua ai iʻuga lelei. I le 2011, na amata faataʻitaʻi ai i le Iunaite Setete se polokalame faapitoa e talaʻi ai i nofoaga faitele i aai e sili ona pisi, e faaaogā ai fata tusi. Na amata lenei polokalame i vaega e sili ona pisi i le aai o Niu Ioka. I le tausaga muamua, e 102,129 tusi na ave e tagata ma mekasini e 68,911. E 4,701 i latou na talosaga mo ni suʻesuʻega faale-Tusi Paia. E mautinoa le taʻitaʻiga a le agaga paia i lenei galuega. O lea, na faamaonia ai e le Vaega Pule le faaaogāina o fata tusi mo le talaʻiga i le lalolagi aoao.

10. O le ā e mafai ona tatou faia e faaleleia ai o tatou tomai i le faiva?

¹⁰ Mea e mafai ona e faia. Ia faaaogā atoatoa toleniga ua saunia e Ieova i sauniga faa-Kerisiano. Ia faaauau ona talaʻi faatasi ma lau vaega i le talaʻiga. O i inā o le a e maua ai le fesoasoani i auala e faaleleia ai lau talaʻi ma le aʻoaʻo atu, ma o le a faalaeiauina ai foʻi oe i faaaʻoaʻoga lelei a isi. Ia talaʻi pea e tusa pe tutupu mai faafitauli. Ua faamanatu mai e le mau autū o lenei suʻesuʻega, ua mafai ona tatou faataunuuina le finagalo o le Atua ona o lona agaga paia ae e lē o so tatou lava malosi. (Saka. 4:6) O lea la, ia manatua e aumai e le Atua le malosi e tatou te faia ai lana galuega.

11. Na faapefea ona galulue autasi le vaega pule i le uluaʻi senituri e faatumauina le maopoopo o tagata o le Atua?

¹¹ I le uluaʻi senituri. Na galulue autasi le vaega pule i Ierusalema, ina ia faatumauina le maopoopo ma le filemu i tagata o le Atua. (Galu. 2:42) O se faataʻitaʻiga, ina ua tulaʻi  mai le faafitauli e faatatau i le peritomeina i le 49 T.A., na talanoaina ai e le vaega pule lenā mataupu e ala i le taʻitaʻiga a le agaga paia. Pe afai e tumau pea ona fevaevaeaʻi le faapotopotoga i lenā mataupu, o le a lē mafai la ona talaʻia le tala lelei i se auala maopoopo. E ui o le vaega pule o ni tagata Iutaia, ae e leʻi taaʻina i latou i tū ma aga faa Iutaia po o manatu o i latou na aʻoaʻoina nei tū ma aga. Peitaʻi, na latou saʻili taʻiala mai i le Afioga a le Atua ma le taʻitaʻiga a lona agaga. (Galu. 15:1, 2, 5-20, 28) O le ā le iʻuga? Na faamanuia e Ieova la latou faaiʻuga, ma na faatumauina le filemu ma le autasi o le faapotopotoga ma agaʻigaʻi ai pea i luma le galuega talaʻi.​—Galu. 15:30, 31; 16:4, 5.

12. O le ā e faaalia ai e maopoopo ma filemu le faalapotopotoga a Ieova i aso nei?

¹² I aso nei. O loo faaauau pea ona galulue le faalapotopotoga a Ieova, e faatumauina le maopoopo ma le filemu i tagata o Ieova. I le 1895 i le Zion’s Watch Tower and Herald of Christ’s Presence iā Novema 15, na iai i inā se mataupu na faamatuaina “Tulaga Talafeagai ma le Maopoopo” na faavae lenā mataupu i le 1 Korinito 14:40. Na taʻua i lenā mataupu: “E tele mea na tusi atu ai le ʻauaposetolo i le uluaʻi faapotopotoga e faatatau i le maopoopo. E tāua le mulimuli lelei i ʻmea na tusia i aso ua mavae e faatonu ai i tatou.’” (Roma 15:4) Ioe, o le maopoopo ma le filemu o le faanaunauga lava lea e tasi na iloa ai uluaʻi Kerisiano, lea o loo vaaia i le faalapotopotoga a Ieova i aso nei. O se faataʻitaʻiga: Pe afai e te auai i le Suʻesuʻega o le Olomatamata i se isi faapotopotoga po o se isi foʻi atunuu, e te iloa le auala e fai ai le suʻesuʻega ma le mataupu o le a suʻesuʻeina. E vave lava ona iā te oe se uiga mautinoa. Ioe, ua na o le agaga o le Atua ua mafai ai ona tatou maua lenei autasi.​—Sefa. 3:9.

13. E tusa ai ma le Iakopo 3:17, o ā fesili e tatau ona tatou fesili ifo ai?

¹³ Mea e mafai ona e faia. E finagalo Ieova ia “tausia” e ona tagata “le autasi i le agaga i le fusi o le filemu.” (Efe. 4:1-3) O lea ia fesili ifo: ʻPo o oʻu tausia le autasi ma le filemu i le faapotopotoga? Po ou te usitaʻi iā i latou o loo taʻimua? Pe e maufaatuatuaina aʻu e  isi aemaise lava pe a iai ni aʻu vaega e fai i le faapotopotoga? Po ou te tausi taimi, loto fesoasoani ma naunau e auauna mo isi?’ (Faitau le Iakopo 3:17.) Pe a e iloa e manaʻomia ona faaleleia na tulaga, ia tatalo mo le fesoasoani a le agaga paia. O le tele e te faatagaina ai le agaga paia e faaleleia ou uiga ma au gaoioiga, o le alolofa foʻi lenā o ou uso ma tuafāfine iā te oe ma latou talisapaia oe.

14. E tusa ai ma le Kolose 1:9, 10, o le ā na manaʻomia e uluaʻi Kerisiano, ma na faapefea ona saunia e Ieova mea na latou manaʻomia?

¹⁴ I le uluaʻi senituri. E matuā fiafia Ieova e aʻoaʻo ona tagata. (Sala. 32:8) O se fanau e pele iā Ieova ona tagata ma o lona finagalo ia latou iloa ma alolofa iā te ia ma ia ola e faavavau. E lē mafai ona tatou iloa le finagalo o Ieova pe a ia lē aʻoaʻoina i tatou. (Ioa. 17:3) Na faaaogā e Ieova le uluaʻi faapotopotoga Kerisiano e aʻoaʻoina ona tagata. (Faitau le Kolose 1:9, 10.) Na telē se vaega a le agaga paia lea na folafola e Iesu o le “fesoasoani,” i le aʻoaʻoina o tagata o Ieova. (Ioa. 14:16) Na fesoasoani le agaga paia i soo e malamalama ai i le Afioga a le Atua, ma manatua mea e tele na fetalai ma faia e Iesu lea na tusia mulimuli ane i tusi o Evagelia. O le iloa o na mea, na faamalosia ai le faatuatua o uluaʻi Kerisiano, lo latou alofa mo le Atua ma lona Alo, ma le alofa o le tasi i le isi.

15. O ā auala ua e vaaia ai le faataunuuina o folafolaga a Ieova o loo i le Isaia 2:2, 3?

¹⁵ I aso nei. Na valoia e Ieova o “aso e gata ai” o le a gasolo ane ai tagata o atunuu uma i lona mauga faafaatusa po o le tapuaʻiga moni, ina ia aʻoaʻoina i latou i ona ala. (Faitau le Isaia 2:2, 3.) Ua tatou vaaia le faataunuuina o lenā valoaga. Ua matuā faamaualugaina le tapuaʻiga moni i tapuaʻiga lē mamā uma. Maʻeu le anoanoaʻi o meaʻai faaleagaga e sili  ona lelei ua saunia e Ieova! (Isa. 25:6) O loo faaaogā e Ieova le “pologa faamaoni ma le faautauta,” e saunia le anoanoaʻi ma le mataʻina o auala eseese ua saunia ai nei meaʻai, e pei o mataupu ua lomiaina, o lauga, o ata komi a tamaiti ma vitiō. (Mata. 24:45) Ua pei o tatou faalogona o faalogona o Eliu le uō a Iopu, na ia faapea mai: “O ai ea sē e aʻoaʻo e pei [o le Atua]?”​—Iopu 36:22.

16. O le ā e mafai ona e faia ina ia e agaʻigaʻi ai i luma faaleagaga?

¹⁶ Mea e mafai ona e faia. E fesoasoani le agaga o le Atua iā te oe e faatatau i lou olaga mea o loo e faitau i ai ma aʻoaʻoina mai i le Afioga a le Atua. Ia tatou tatalo e pei o le faisalamo: “Ieova e, ia e aʻoaʻo mai iā te aʻu i lou ala. Ou te savali i lau upu moni. Ma ia e faia ina ia tasi loʻu loto e mataʻu i lou suafa.” (Sala. 86:11) O lea la, seʻi faaauau ona faitau ma suʻesuʻe le Tusi Paia ma isi lomiga ua saunia e le faalapotopotoga a Ieova. O lou sini e lē na o le maua o le poto, ae ia e faamautinoa iā te oe lava o le upu moni lea, ma ia faatatau i lou olaga. E mafai ona fesoasoani le agaga paia o Ieova iā te oe e faia faapea. E te manaʻo foʻi e faalaeiau i ou uso ma tuafāfine. (Epe. 10:24, 25) Aiseā? Talu ai o i latou o lou aiga faaleagaga. Ia tatalo mo le agaga o le Atua ina ia e faia ai tali faalaeiau i le sauniga. Ia sauniuni lelei pe a iai sau vaega e fai i le sauniga. O le faia faapea ua e faailoa atu ai iā Ieova ma lona Alo, lou alofa i a la “mamoe” faapelepele.​—Ioa. 21:15-17.

17. E faapefea ona e faaalia o loo e lagolagoina ma le faamaoni le faalapotopotoga a Ieova?

¹⁷ Ua lē o toe umi ona faaumatia lea o faalapotopotoga uma i le lalolagi ae totoe ai na o le faalapotopotoga e taʻitaʻia e le agaga o le Atua. O lea, ia maelega e galulue faatasi ma le faalapotopotoga a Ieova. Ia e faaalia atu le lē faailoga tagata o le Atua e ala i le talaʻi atu o le tala lelei i tagata uma e te feiloaʻi i ai. Ia faaaʻoaʻo i le fai mea maopoopo ma le filemu o Ieova e ala i le tausia o le autasi i le faapotopotoga. Ia faalogo atu foʻi i le Aʻoaʻo Sili, e ala i le faaaogā atoatoa o le anoanoaʻi o meaʻai faaleagaga e sili ona lelei ua ia saunia mo i tatou. O le a e lē fefe ai la pe a faaumatia le lalolagi a Satani, ae o le a e tū ma le mautinoa faatasi ma i latou o loo auauna faamaoni ma le faalapotopotoga a Ieova.