1. Andi Keesitu sëmbë di dopu musu ta du go dou?

I DOPU kaa u? Ee sö, hën da i lei sëmbë taa i ta biibi a Jehovah, söseei taa i kë dini ën a di ölganisaasi fëën. * An dë u taki taa i musu mbei möiti u di biibi fii ko möön taanga. Söseei i musu biibi möön taanga taa di ölganisaasi u Jehovah ta du di wooko di a kë taa musu du a di ten aki.

2-3. Konda unfa Jehovah ta tii di ölganisaasi fëën a di ten aki.

² A di ten aki, Jehovah ta tii di ölganisaasi fëën a wan fasi di ta lei u un pei sëmbë a dë, dee soni dee a kë du, ku dee wëti fëën. Boo taki u dii u dee fasi di Jehovah abi, dee dë u si a di ölganisaasi fëën.

³ Di fosu soni, hën da „Gadu an ta luku fesi” (Tjab. 10:34). U di Jehovah lobi u, mbei a da u di Womi Mii fëën ’kuma wan paima u paka puu u a hogi basu’ (1 Tim. 2:6; Joh. 3:16). Jehovah ta mbei dee sëmbë fëën konda di bunu buka da sëmbë di kë haikëën. A sö wan fasi a sa heepi sömëni sëmbë u de feni wini u di lusupaima. Di u tu soni da, Jehovah Gadu an dë wan Gadu di ta du soni fanjanfanjan (1 Kol. 14:33, 40). Fëën mbei u sa dë ku di mëni taa dee dinima u Jehovah an o ta du soni fanjanfanjan te de ta dini ën. Di u dii soni da, Jehovah da di „Gaan Leima” fuu (Jes. 30:20, 21). Fëën mbei di ölganisaasi fëën ta möön buta pakisei a di lei di a musu ta lei sëmbë soni u Bëibel. De ta lei sëmbë soni u Bëibel a di kemeente, söseei te de dë a di peleikiwooko. Unfa dee fesiten Keesitu sëmbë bi djeesi Jehovah a dee dii fasi fëën aki? Unfa dee sëmbë u Jehovah u di ten aki ta djeesi Jehovah a dee fasi aki? Söseei unfa di santa jeje sa heepi i te i ta wooko makandi ku di ölganisaasi u Jehovah?

4. Andi Jesosi bi piki dee bakama fëën u de du, nöö un heepi de bi o feni, te u luku Tjabukama 1:8?

⁴ A di ten u dee fesiten Keesitu sëmbë. Di bosikopu di Jesosi bi ta paaja da sëmbë bi ta mbei sëmbë biibi taa soni o waka möön bunu bakaten (Luk. 4:43). Jesosi bi piki dee bakama fëën taa de musu go dou ku di wooko di a bi bigi. De bi musu paaja di bunu buka „a hii dee köndëköndë u goonliba tuu ka sëmbë dë”. (Lesi Tjabukama 1:8.) Ma an dë u taki taa de an bi o sa du di wooko aki ku di u deseei kaakiti. De bi abi di santa jeje fanöudu. Jesosi bi paamusi de taa di santa jeje aki bi o ta heepi de.​—Joh. 14:26; Sak. 4:6.

5-6. Unfa di santa jeje bi heepi dee bakama u Jesosi?

⁵ Di santa jeje bi ko a dee bakama u Jesosi liba a di Pensiti daka u di jaa 33 Baka Keesitu. Di santa jeje bi dë ku de, hën de bi bigi du di peleikiwooko wantewante. An bi tei longi seei, hën dusudusu sëmbë bi piki di buka (Tjab. 2:41; 4:4). Di sëmbë bi bigi du ku dee bakama u Jesosi, de an bi ko fëëë, hën de disa di wooko di de bi ta du. Ma de bi hakisi Gadu faa heepi de. De bi begi Gadu taa: „U begi i, Masa, fii da u dee futuboi fii degihati, be u sa ta konda di Buka fii nöömö söndö fëëë.” Baka di dë, hën di santa jeje ko a de liba, „hën de ko ta konda di buka u Gadu seei söndö fëëë”.​—Tjab. 4:18-20, 29, 31.

⁶ Dee bakama u Jesosi bi abi woto pei fuka tu. Di Wöutu u Gadu an bi dë u feni a hii së, a di ten dë. Söseei de an bi abi woto buku di bi ta konda soni u Bëibel, kumafa u abi a di ten aki. Boiti di dë, de bi musu peleiki da sëmbë di bi ta fan woto töngö. Ma hii fa soni bi dë sö da de, tökuseei dee bakama u Jesosi aki bi ta du di wooko fajafaja. A söwan 30 jaa dendu, de bi paaja di bunu buka „a hii goonliba”.​—Kol. 1:6, 23.

7. Unfa dee sëmbë dee bi ta dini Jehovah 100 jaa pasa bi sabi andi Gadu bi kë u de du, nöö andi de bi du?

⁷ A di ten fuu aki. Jehovah ta tii dee sëmbë fëën jeti, söseei a ta da de di kaakiti di de abi fanöudu u de du di kë fëën. Ku di Bëibel Gadu ta tii dee sëmbë fëën möön gaanfa. Di santa jeje fëën hën bi mbei sëmbë sikifi di buku aki. A di Bëibel u sa lesi unfa Jesosi bi du di peleikiwooko, söseei nëën u sa feni di wëti di Jesosi da u fuu go dou ku di wooko di a bi bigi (Mat. 28:19, 20). Sensi Di Hei Wakitimawosu u baimatu-liba u di jaa 1881, dee baaa bi taki taa: „Jehovah an bi salufu u sö taa libisëmbë musu gafa u, nasö fuu ko gudu. Ma a bi salufu u fuu sa wooko ku hii soni di u abi fuu paaja di bunu buka.” Wan buku fuu de kai To Whom the Work Is Entrusted, di de bi tja ko a döö a di jaa 1919, bi taki taa: „Di wooko hia, ma a dë di wooko u Masa, nöö hën o da u di kaakiti di u abi fanöudu fuu du ën.” Wë leti kuma dee fesiten Keesitu sëmbë, dee baaa ku dee sisa aki, bi lei taa de abi degihati. De bi wooko taanga seei, u di de bi dë seiki taa di santa jeje bi o heepi de u de peleiki da hii pei sëmbë. Useei ta biibi taa di santa jeje o heepi u.

8-9. Ku un soni di ölganisaasi u Jehovah bi wooko u paaja di bunu buka?

⁸ Di ölganisaasi u Jehovah bi wooko ku dee möön bunu soni u de sa paaja di bunu buka. Dee soni aki bi dë dee buku fuu, di „Photo-Drama der Schepping”, dee gramofon, ku dee wagi ku gaan bökusu. Boiti di dë, de bi ta bai soni a ladio tu. Nöö a di ten aki, de ta wooko ku Internet ku computer soni. Boiti dee soni dë, di ölganisaasi u Gadu ta puu sömëni buku ku woto soni buta a woto töngö. Di soni aki an bi pasa wan daka jeti! Faandi mbei di ölganisaasi ta du di soni aki? Wë a ta du ën sö taa hii pei sootu sëmbë sa jei di bunu buka nëën mamabëë töngö. Jehovah an ta luku fesi. Nöö a bi taki a fesi taa di bunu buka bi o paaja dou „hii pei nasiön sëmbë, ku hii pei lö, ku hii pei föluku dee ta fan hii dee peipei töngö u goonliba” (Ako. 14:6, 7). Jehovah kë taa hii sëmbë jei di buka u di Könuköndë.

 ⁹ Unfa a dë ku dee sëmbë dee wa sa miti a de pisi fuu peleiki da de, kandë u di de ta libi a wan kamian di tapa ku gaan döö, ka woto sëmbë an sa pasa go a dendu? Wë fuu sa peleiki da dee lö sëmbë aki, Jehovah mbei di ölganisaasi fëën seeka soni sö taa u sa ta du di peleikiwooko a kamian ka hia sëmbë ta waka pasa. A di jaa 2001 di Tii Kulupu bi da pasi taa dee baaa ku dee sisa u Gaan Faansi, sa wooko ku bukuwagi ku woto soni u buta dee buku fuu. Bakaten, baaa ku sisa u woto köndë bi bigi du di wan seei soni tu. Soni bi waka bunu seei. A di jaa 2011, de bi pooba di njunjun soni aki a wan kamian ka gaan hia sëmbë ta waka pasa a di foto New York City, di dë na Amëëkanköndë. A wan jaa dendu de bi paati 102.129 buku ku 68.911 u Di Hei Wakitimawosu. Söseei 4701 sëmbë bi hakisi u wan sëmbë ko lei de soni u Bëibel! U bi sa si unfa Jehovah ta wooko ku di santa jeje fëën u du di wooko aki. Fëën mbei di Tii Kulupu bi taki taa baaa ku sisa a hii së u di goonliba, sa wooko ku di buku wagi nasö ku di buku tafa te de ta du di peleikiwooko.

10. Andi u sa du fuu sa ta du di peleikiwooko möön bunu, söseei fuu sa ta lei sëmbë soni u Bëibel möön bunu?

¹⁰ Di soni di i sa du. A dee komakandi Jehovah ta lei u unfa u musu du di peleikiwooko. Nöö u musu wooko ku dee soni dee u ta lei. Peleiki makandi ku dee baaa ku dee sisa u di peleikiwooko kulupu ka i dë. Dee baaa ku dee sisa a di kulupu ka i dë sa heepi i fii ko ta du di peleikiwooko möön bunu, söseei de sa heepi i fii lei sëmbë soni a wan möön bunu fasi. Boiti di dë, i sa feni taanga a di fasi fa de ta du soni. Peleiki go dou aluwasi ee soni ta taanga da i. Kumafa di tëkisi u di woto aki ta taki, u sa ta du andi Jehovah ta piki u fuu du, u di u ta feni taanga a di santa jeje u Gadu. Ma na u di u taanga sö (Sak. 4:6). U sa dë seiki taa Gadu o da u di kaakiti di u abi fanöudu, u di u ta du di wooko fëën.

11. Unfa di tii kulupu bi wooko makandi u seti soni, sö taa dee fesiten Keesitu sëmbë bi sa dini Gadu makandi go dou?

¹¹ A di ten u dee fesiten Keesitu sëmbë. Di tii kulupu di bi dë a Jelusalen bi wooko makandi u seti soni, söseei u heepi dee sëmbë u Gadu u de wooko fiifii makandi (Tjab. 2:42). A di jaa 49 Baka Keesitu, sömëni Keesitu sëmbë bi ta si soni woto fasi te a nama a di buta di sëmbë  musu buta di maaka u wan Dju ee a bi kë dini Jehovah. Di santa jeje bi heepi di tii kulupu ku di woto aki. Ee di kemeente bi fika paatipaati u di soni dë hedi, nöö de an bi o sa du di peleikiwooko a wan bunu fasi. Hii fa dee apösutu ku dee gaanwomi bi dë Dju sëmbë, tökuseei de an bi mbei dee guwenti u dee Dju tooka di fasi fa de ta si soni, söseei de an bi haika dee woto Dju dee bi ta si soni woto fasi. Ma de bi öndösuku soni a di Wöutu u Gadu, söseei de bi hakisi Gadu faa heepi de ku di santa jeje fëën (Tjab. 15:1, 2, 5-20, 28). Andi bi ko pasa bakaten? Di soni di de bi buta taa de o du, bi kai ku Jehovah, de bi ta libi fiifii ku deseei, söseei de bi ta du di peleikiwooko go dou.​—Tjab. 15:30, 31; 16:4, 5.

12. Faandi mbei u sa taki taa di ölganisaasi u Jehovah ta mbei sëmbë libi fiifii ku deseei, söseei taa a ta mbei möiti sö taa soni an ta waka fanjanfanjan?

¹² A di ten fuu aki. Di ölganisaasi u Jehovah ta heepi dee sëmbë u Jehovah u de libi fiifii ku deseei, söseei u de an du soni fanjanfanjan. Di „Sion Hei Wakitimawosu ku di buku tjabukama di ta lei taa keesitu ko” (Zion’s Watch Tower and Herald of Christ’s Presence) u 15 u ëlufumu-liba u di jaa 1895, bi abi wan woto a dendu de kai „Du soni a wan fasi di fiti, söseei kumafa soni seti”. Di woto aki bi nama ku di soni di 1 Kolenti 14:40 ta taki. Di woto aki bi taki taa: „Dee apösutu bi sikifi sömëni biifi manda da dee kemeente u dee fesiten Keesitu sëmbë. Dee biifi aki bi ta taki taa de an bi musu du soni fanjanfanjan. A dë fanöudu fuu du soni kumafa de bi ’taki a fesi.’” (Lom. 15:4) Wë leti kumafa soni bi dë a di ten u dee fesiten Keesitu sëmbë, di ölganisaasi u Jehovah a di ten aki, ta mbei taanga möiti u hii dee baaa ku dee sisa sa libi fiifii ku deseei. Söseei a ta mbei möiti u soni an waka fanjanfanjan a dee kemeente. Pakisei di soni aki: Boo taa i go a wan woto kemeente, nasö a wan woto köndë, nöö de ta hoi di Hei Wakitimawosu-lei. Joo sabi unfa de o hoi di Hei Wakitimawosu-lei, söseei joo sabi un woto de o luku di daka dë. Wantewante joo fii bunu! Di santa jeje u Gadu wanwan sa du di soni aki!​—Sef. 3:9.

13. Andi ku andi u musu hakisi useei te u luku Jakobosi 3:17?

¹³ Di soni di i sa du. Jehovah kë taa ’u musu mbei möiti fuu ta libi fiifii ku useei. U musu dë ku wan hati’ (Ef. 4:1-3). Fëën mbei i sa hakisi iseei dee soni aki: ’Mi ta mbei möiti u mi ku dee  baaa ku dee sisa u mi sa ta libi fiifii ö? Mi ta piki dee sëmbë dee ta tei fesi buka u? Dee baaa ku dee sisa sabi mi kuma wan sëmbë di de sa suku heepi nëën u, möönmöön ee mi abi faantiwöutu a di kemeente u? Mi ta dou fuuku a kamian u? Mi ta dë kabakaba u heepi dee baaa ku dee sisa u mi ö?’ (Lesi Jakobosi 3:17.) Ee i si taa i sa du soni a wan möön bunu fasi, nöö i sa begi Jehovah faa da i di santa jeje fëën. Möön i da di santa jeje pasi faa tooka di fasi fa i dë, ku di fasi fa i ta du soni, möön dee baaa ku dee sisa fii o lobi i, nöö de o ta möön tei dee soni dee i ta du u bigi.

14. Unfa Jehovah bi lei dee sëmbë fëën soni a di ten u dee fesiten Keesitu sëmbë, te u luku Kolosën 1:9, 10?

¹⁴ A di ten u dee fesiten Keesitu sëmbë. A ta da Jehovah piizii te a ta lei dee sëmbë fëën soni (Ps. 32:8). A kë taa de musu ko sabi ën, u de lobi ën, söseei a kë u de libi u teego kuma miii fëën. Ma hii dee soni aki an bi o sa pasa, ee an bi ta lei de soni (Joh. 17:3). Jehovah bi wooko ku di kemeente fëën a di ten u dee fesiten Keesitu sëmbë, u lei dee sëmbë fëën soni. (Lesi Kolosën 1:9, 10.) Di santa jeje, nasö „di heepima” di Jesosi bi paamusi dee bakama fëën taa a bi o begi hën Tata faa manda da de, bi du wan gaan wooko u mbei di soni aki pasa (Joh. 14:16, NW). Di santa jeje bi heepi dee bakama u Jesosi u de ko fusutan di Wöutu u Gadu möön bunu, söseei a bi heepi de u de toona mëni hii dee soni di Jesosi bi taki, ku dee a bi du. Dee soni aki dee fesiten Keesitu sëmbë bi sa feni lesi bakaten a dee buku dee ta taki soni u di libi u Jesosi. Dee soni aki bi mbei di biibi u dee fesiten Keesitu sëmbë ko möön taanga. De bi ko lobi Gadu ku di Womi Mii fëën möön gaanfa. Söseei de bi ko lobi de na de möön gaanfa tu.

15. Na un fasi i si taa Jehovah du di soni di a taki a Jesaaja 2:2, 3?

¹⁵ A di ten fuu aki. Jehovah bi taki a fesi taa „a dee lasiti daka”, nöö hii nasiön sëmbë bi o go a di kuun fëën u de sa ko sabi soni fëën. (Lesi Jesaaja  2:2, 3.) U ta si fa di soni aki ta pasa tuutuu. U ta si unfa di tuutuu lei bunu möön dee poipoi lei. Nöö Jehovah ta mbei dee sëmbë fëën ko sabi sömëni soni u Bëibel! (Jes. 25:6) Jehovah ta wooko ku di „köni saafu di dë u futoou tuutuu” u lei u hii dee soni aki. Nöö de ta lei u dee soni aki a peipei fasi. U ta lesi de a buku, u sa haika taki, söseei u sa luku de a fëlön (Mat. 24:45, NW). U ta fii kumafa di mati u Jöpu de kai Elihu bi fii. A bi hakisi taa: „Ambë seei ta lei sëmbë soni kuma [Gadu]?”​—Jöpu 36:22.

16. Andi i sa du fii sa feni wini u dee lei u Jehovah?

¹⁶ Di soni di i sa du. Di jeje u Gadu o heepi i fii du dee soni dee i ta lei a di Wöutu u Gadu. I sa begi kumafa di psalöm sikifima bi begi. A begi taa: „Jehovah o, lei mi fa mi musu waka a di pasi fii e. Mi o waka a di leti pasi fii. Heepi mi u mi sa lesipeki i në ku hii mi hati” (Ps. 86:11). Söseei i musu ta lesi di Bëibel ku dee woto buku, di di ölganisaasi u Jehovah ta da u. Na sabi nöö i musu kë ko sabi soni. Ma i musu mbei möiti u dee soni dee i ta lei dou i hati, söseei i musu mbei möiti u libi ku dee soni dë. Di jeje u Jehovah sa heepi i fii du di soni aki. Boiti di dë, i musu ta da dee baaa ku dee sisa fii taanga tu (Heb. 10:24, 25). Faandi mbei? Wë u di de da famii fii. Begi Jehovah faa da i di jeje fëën sö taa i sa ta da piki a dee komakandi, söseei fii sa ta hoi dee taki fii nasö woto soni a wan bunu fasi. A dee lö fasi aki i sa lei Jehovah ku di Womi Mii fëën taa i lobi dee „sikapu” u de.​—Joh. 21:15-17.

17. Unfa i sa lei taa i ta wooko makandi ku di ölganisaasi u Jehovah?

¹⁷ Abiti möön di wan kodo ölganisaasi di o fika a goonliba aki, o dë di ölganisaasi di Gadu ta tii ku di jeje fëën. Fëën mbei wooko fajafaja makandi ku di ölganisaasi fëën. Lei taa i lobi sëmbë kumafa Gadu lobi de, nöö i paaja di bunu buka da hii sëmbë di i miti. Djeesi Gadu a di lobi di a lobi te sëmbë ta libi fiifii ku deseei, nöö i mbei möiti u libi fiifii ku wotowan. Söseei mbei möiti u soni an waka fanjanfanjan a di kemeente. Haika di Gaan Leima fii u di joo ta lei hii dee soni fëën dee dë u lei. Nöö te di goonliba u Saatan o booko kaba a sösö, ja o fëëë. Ma joo abi degihati, nöö joo dë makandi ku dee sëmbë dee ta wooko makandi ku di ölganisaasi u Jehovah.