1. San dopu Kresten musu tan du?

YU DOPU kaba? Efu dati de so, dan yu sori na fesi tra sma taki yu e bribi na ini Yehovah èn taki yu wani dini en makandra nanga en organisâsi. * A no de fu taki dati a bribi fu yu musu kon moro tranga. Ma yu musu bribi moro nanga moro tu taki Yehovah e gebroiki en organisâsi fu du a wani fu en na ini a ten disi.

2-3. Na sortu fasi Yehovah e tiri na organisâsi fu en na ini a ten disi? Fruklari dati.

² Na ini a ten disi, Yehovah e tiri na organisâsi fu en na wan fasi di e sori krin fa a de, san a abi na prakseri, èn san na den gronprakseri fu en. Meki wi go luku dri fasi fu Yehovah di wi kan si na ini na organisâsi fu en.

³ A fosiwan na taki „Gado no lobi a wan sma moro a trawan” (Tori 10:34). Lobi meki taki Yehovah gi en Manpikin leki wan „paiman di fiti fu bai ala sma kon fri” (1 Tim. 2:6; Yoh. 3:16). Fu di Yehovah e meki a pipel fu en preiki a bun nyunsu, meki ala sma di wani arki kan kisi frulusu nanga yepi fu a lusu-paiman. A di fu tu sani na taki Yehovah a no wan Gado fu bruya, ma fu freide (1 Kor. 14:33, 40). Dati meki a no e fruwondru wi taki den anbegiman fu en, na wan grupu sma di orga bun èn di e libi na ini freide. A di fu dri sani na taki Yehovah na a „Gran Leriman” (Yes. 30:20, 21). Fu dati ede, na organisâsi fu en e wroko tranga fu gi sma leri fu Bijbel na ini a gemeente èn na ini a preikiwroko. Fa den sma na ini a fosi Kresten gemeente ben e sori den dri fasi disi fu Yehovah? Fa a pipel fu Yehovah e sori den dri fasi fu en na ini a  ten fu wi? Èn fa santa yeye kan yepi yu, aladi yu e dini Yehovah makandra nanga en organisâsi na ini a ten disi?

4. Soleki fa Tori fu den apostel 1:8 e sori, dan san Yesus ben taigi den bakaman fu en fu du èn sortu yepi den ben o kisi?

⁴ Na ini a ten fu den fosi Kresten. A boskopu di Yesus ben e preiki ben e gi ala sma howpu (Luk. 4:43). A taigi den bakaman fu en fu go doro nanga a wroko di a ben bigin èn fu preiki „te na den moro farawe presi fu grontapu”. (Leisi Tori fu den apostel 1:8.) A no de fu taki dati den no ben o man du a wroko disi nanga den eigi krakti. Den ben o abi a santa yeye fanowdu, „a yepiman” di Yesus ben o seni gi den.​—Yoh. 14:26; Sak. 4:6.

5-6. Na sortu fasi santa yeye yepi den bakaman fu Yesus?

⁵ Den bakaman fu Yesus kisi santa yeye na a Pinksterfesa fu a yari 33. A santa yeye dati yepi den fu bigin preiki wantewante gi furu sma èn na ini wan syatu pisi ten, dusundusun sma poti bribi na ini a bun nyunsu (Tori 2:41; 4:4). Di sma bigin frufolgu den disipel, den no kon frede èn den no tapu nanga a preikiwroko. Na presi fu dati den aksi Gado fu yepi den. Den begi: „Meki den srafu fu yu tan taki a wortu fu yu sondro frede.” Baka dati a santa yeye kon na den tapu èn den tan „taki a wortu fu Gado sondro frede”.​—Tori 4:18-20, 29, 31.

⁶ Ma tra sani ben de tu di ben e meki en muilek gi den disipel fu Yesus. Fu eksempre, furu kopi fu Bijbel no ben de. Den disipel no ben abi buku di ben e yepi den fu frustan Bijbel moro bun. Boiti dati, den ben musu preiki gi sma di ben e taki difrenti tongo. Aladi den sani disi ben e meki en muilek gi den disipel, toku den du san den no ben denki taki den ben o man du. Na ini sowan 30 yari nomo, den preiki a bun nyunsu „gi ala sma na grontapu”.​—Kol. 1:6, 23.

7. Moro leki 100 yari pasa den futuboi fu Yehovah ben sabi kaba san a ben fruwakti fu den. Fa den ben sabi dati èn san den du?

⁷ Na ini a ten fu wi. Te nanga a dei fu tide, Yehovah e tiri a pipel fu en èn a e gi den krakti fu du a wani fu en. Moro furu a e du dati nanga yepi fu Bijbel, di skrifi nanga yepi fu en santa yeye. Na ini Bijbel wi e leisi fu a wroko di Yesus ben du èn fu a komando di a ben gi den bakaman fu en fu go doro nanga a wroko di a ben bigin (Mat. 28:19, 20). Na ini yuli 1881 kaba, A Waktitoren ben kan taki: „Yehovah no ben salfu wi fu kisi grani fu libisma noso fu kon gudu, ma fu gebroiki ala san wi abi fu preiki a bun nyunsu.” Wan fu buku fu wi di kon na doro na ini 1919, ben sori den preikiman fa den musu preiki. A buku disi ben taki: „A wroko bigi srefisrefi, ma a wroko na fu Masra èn a o gi wi krakti fu du en” (To Whom the Work Is Entrusted). Neleki den fosi Kresten, den brada disi ben abi deki-ati èn den wroko bun tranga fu di den ben abi a frutrow taki a santa yeye ben o yepi den fu preiki gi ala sortu sma. Wi abi a frutrow tu taki a santa yeye o yepi wi.

8-9. Na sortu tra fasi na organisâsi preiki a bun nyunsu?

⁸ Yehovah en organisâsi gebroiki den moro bun wrokosani di de fu preiki a bun nyunsu. Dati na sani soleki buku, a „Photo-Drama der Schepping”, gramofon, wagi nanga bigi boksu na tapu, programa na radio, èn na ini a ten disi computer nanga Internet. Noiti ete Gado organisâsi vertaal sani na ini so furu tongo leki na ini a ten disi! Fu san ede? So taki ala sortu sma kan yere a bun nyunsu na ini  den eigi tongo. Yehovah no lobi a wan sma moro a trawan èn fu dati ede a ben taki na fesi dati a bun nyunsu ben o preiki gi „sma fu ala kondre, lo, tongo, nanga pipel” (Openb. 14:6, 7). A wani taki ala sma yere a Kownukondre boskopu.

⁹ Fa a de nanga den sma di wi no man miti so makriki na den oso, kande fu di den e libi na ini apartement gebow pe wi no man go na inisei? Yehovah yepi en organisâsi fu bigin preiki na tra fasi, so taki moro fu den sma disi kan yere a bun nyunsu. Fu eksempre, na ini 2001, a Tiri Skin ben feni en bun taki preikiman na ini Fransikondre gebroiki bukuwagi nanga tra sani fu poti den buku fu wi so taki sma kan si den. Bakaten, den brada nanga sisa na tra kondre bigin preiki tu na a fasi disi èn den ben abi bun bakapisi. Na ini 2011, den pruberi fu preiki na wan nyun fasi na ini New York City, wan fu den presi na ini Amerkankondre pe bun furu sma e tan. A fosi yari, den Kotoigi prati 102.129 buku nanga 68.911 tijdschrift. Boiti dati, 4701 sma aksi fu studeri Bijbel! A de krin taki santa yeye ben e horibaka gi a wroko disi. Dati meki a Tiri Skin ben feni en bun taki wi brada nanga sisa na heri grontapu gebroiki bukuwagi nanga tra sani fu poti den buku fu wi so taki sma kan si den.

10. San wi kan du fu tron moro bun preikiman èn leriman?

¹⁰ San yu kan du. Kisi wini fu a leri di Yehovah e gi na den Kresten konmakandra. Preiki ibri wiki makandra nanga a preikiwroko grupu fu yu. Dati o yepi yu fu tron wan moro bun preikiman èn a moi eksempre fu den brada nanga sisa o gi yu deki-ati. Tan preiki awinsi a no makriki. Soleki fa a thema tekst e sori, dan a no fu di wi tranga meki wi man du a wani fu Gado, ma na fu di a santa yeye fu en e gi wi krakti (Sak. 4:6). Wi kan de seiker taki Gado o horibaka gi wi, fu di wi e du a wani fu en.

11. Fa a tiri skin fu a ten fu den fosi Kresten wroko makandra fu sorgu taki bruya no kon na mindri a pipel fu Gado?

¹¹ Na ini a ten fu den fosi Kresten. A tiri skin na ini Yerusalem ben wroko makandra fu sorgu taki bruya no ben e kon na mindri  a pipel fu Gado èn taki freide ben tan na den mindri (Tori 2:42). Fu eksempre, na ini a yari 49 di sma na ini a Kresten gemeente ben feni taki wan Kresten musu besnèi, a tiri skin luku a tori nanga yepi fu a santa yeye. Efu den sma na ini a gemeente no ben e si a tori disi na a srefi fasi, dan den no ben o man du a preikiwroko bun. Aladi den apostel nanga den owru man ben de Dyu, toku den no hori densrefi na den gwenti fu den Dyu èn den no arki den sma di ben de nomonomo taki sma musu besnèi. Na presi fu dati, den luku san Gado Wortu ben e taki fu a tori èn den aksi Gado fu gi den en santa yeye so taki den ben kan teki wan bun bosroiti (Tori 15:1, 2, 5-20, 28). San ben de a bakapisi? Yehovah blesi a bosroiti fu den, freide nanga wánfasi tan na ini a gemeente, èn den tan preiki a bun nyunsu.​—Tori 15:30, 31; 16:4, 5.

12. San e sori taki na organisâsi fu Yehovah na ini a ten fu wi orga bun èn taki freide de na wi mindri?

¹² Na ini a ten fu wi. Yehovah en organisâsi yepi a pipel fu en fu tan du sani na wan fasi di orga bun èn a sorgu taki freide ben de na den mindri. Na ini a yari 1895, a „Sion Waktitoren nanga Boskopuman di e sori taki Krestes kon” (Zion’s Watch Tower and Herald of Christ’s Presence) fu 15 november ben abi wan artikel kaba di ben taki fu 1 Korentesma 14:40. Na artikel di ben nen „Na wan fasi di fiti èn soleki fa sani seti”, ben taki: „Den apostel ben skrifi furu fu a fasi fa sani ben musu orga na ini a fosi Kresten gemeente . . . A bun te wi e tan du ala den sani di ’skrifi fositen, fu leri wi wan sani’” (Rom. 15:4). Na ini a ten disi, na organisâsi fu Yehovah e wroko tranga tu fu orga sani bun èn fu sorgu taki freide de na den mindri soleki fa a ben de na ini a ten fu den fosi Kresten. Fu eksempre, efu yu go na wan Waktitoren-studie na ini wan tra gemeente noso srefi na ini wan tra kondre, dan yu sabi fa a studie o hori èn yu sabi sortu artikel den o luku. Wantewante yu e firi taki yu de na mindri yu brada nanga sisa. Disi e sori taki na a santa yeye fu Gado wawan kan meki taki wánfasi de na wi mindri!​—Sef. 3:9.

13. San wi musu aksi wisrefi te wi e prakseri Yakobus 3:17?

¹³ San yu kan du. Yehovah wani taki a  pipel fu en „du ala muiti fu tan abi a wánfasi di [den] kisi nanga yepi fu a santa yeye” (Ef. 4:1-3). Dati meki a bun fu aksi yu srefi: ’Mi e du muiti fu sorgu taki wánfasi nanga freide de na ini a gemeente? Mi e gi yesi na den wan di e teki fesi? Tra sma kan frutrow na mi tapu, spesrutu efu mi abi frantwortu na ini a gemeente? Mi gwenti de biten èn mi de klariklari fu yepi trawan?’ (Leisi Yakobus 3:17.) Efu yu si taki wan tu sani de di yu kan du moro bun, dan begi Gado fu gi yu en santa yeye. O moro yu e meki a santa yeye kenki a fasi fa yu de èn fa yu e du sani, o moro den brada nanga sisa o lobi yu èn warderi den sani di yu e du.

14. Fa Yehovah gi a pipel fu en leri na ini a ten fu den fosi Kresten, soleki fa Kolosesma 1:9, 10 e sori?

¹⁴ Na ini a ten fu den fosi Kresten. Yehovah lobi gi a pipel fu en leri (Ps. 32:8). A wani taki den musu kon sabi en, taki den lobi en, èn taki den libi fu têgo leki pikin fu en. Disi no ben o man efu a no ben sorgu taki wi kisi leri (Yoh. 17:3). Yehovah gebroiki a fosi Kresten gemeente fu gi en pipel leri. (Leisi Kolosesma 1:9, 10.) Boiti a gemeente, a santa yeye, di de „a yepiman” di Yesus ben pramisi, ben yepi den disipel tu (Yoh. 14:16). A santa yeye yepi den disipel fu frustan Gado Wortu èn fu memre ala den sani di Yesus ben taki èn du. Bakaten sma ben man leisi den sani disi na ini den Evangelietori. Ala den sani di den fosi Kresten ben leri, tranga a bribi fu den èn den kon abi moro lobi gi Gado, gi en Manpikin, èn gi makandra.

15. Fa den sani di Yehovah pramisi na Yesaya 2:2, 3 kon tru?

¹⁵ Na ini a ten fu wi. Yehovah ben taki dati „na ini den lasti dei” furu sma fu ala pipel ben o kon na a „bergi” fu en, san wani taki dati den ben o kon fu dini en makandra nanga den tru anbegiman fu en. (Leisi  Yesaya 2:2, 3.) Wi e si taki a profeititori dati e kon tru na ini a ten disi. A de krin taki a tru anbegi bun moro ala falsi anbegi. Boiti dati, Yehovah e leri a pipel fu en furu sani fu Bijbel (Yes. 25:6). A e gebroiki „a koni srafu di de fu frutrow” fu gi wi a leri dati na someni fasi. Wi kan leisi artikel, wi kan arki lezing èn wi kan luku felem srefi (Mat. 24:45). Wi e firi neleki Yob en mati Elihu di ben taki: „Suma de wan leriman leki [Gado]?”​—Yob 36:22.

16. San yu kan du fu kisi wini fu a leri di Yehovah e gi wi?

¹⁶ San yu kan du. A santa yeye fu Gado o yepi yu fu gebroiki den sani di yu e leri fu Gado Wortu na ini yu aladei libi. Begi neleki a psalm skrifiman di ben taki: „Yehovah, leri mi fa fu waka a pasi fu yu. Mi o waka a reti pasi fu yu. Meki mi sori lespeki gi yu nen nanga mi heri ati” (Ps. 86:11). Sobun, tan leisi èn studeri Bijbel nanga den buku fu Yehovah en organisâsi. A no de fu taki dati yu no o du dati fu kon sabi sani nomo, ma fu di yu wani de seiker taki san yu e leri de so trutru èn fu di yu wani gebroiki den sani dati na ini yu libi. A santa yeye fu Yehovah kan yepi yu fu du dati. Boiti dati, yu wani gi yu brada nanga sisa deki-ati tu (Hebr. 10:24, 25). Fu san ede? Fu di den na yu famiri. Begi Gado fu gi yu en santa yeye so taki yu kan gi piki nanga yu heri ati na den Kresten konmakandra èn aksi en fu yepi yu fu du tranga muiti te yu abi wan lezing. Te yu du den sani disi, dan yu e sori Yehovah nanga en Manpikin taki yu lobi den „skapu” fu den.​—Yoh. 21:15-17.

17. Fa yu kan sori taki yu e tan wroko makandra nanga na organisâsi fu Yehovah?

¹⁷ Dyonsro a wan-enkri organisâsi di o de na grontapu o de a wan di a yeye fu Gado e tiri. Sobun, wroko makandra fayafaya nanga na organisâsi fu Yehovah. De leki Gado èn sori taki yu lobi ala sma. Preiki a bun nyunsu gi ala sma di yu e miti. Yepi fu sorgu taki wánfasi tan na ini a gemeente. Na so yu e sori taki yu de leki Gado di lobi te sani orga bun èn te freide de. Te yu e gebroiki ala den sani di Yehovah e leri yu, dan yu e sori taki yu e arki yu Gran Leriman. Yu no o frede te Satan en grontapu o kon na wan kaba. Ma yu o abi deki-ati èn yu o tan wroko makandra nanga na organisâsi fu Yehovah.