1. Yini emaKhristu labhajatisiwe lokufanele achubeke ayenta?

UBHAJATISIWE yini? Nangabe kunjalo, nawubhajatiswa wakhombisa bantfu kutsi unekukholwa kuJehova futsi sewufuna kumkhonta, ube senhlanganweni yakhe. * Kuliciniso kutsi kukholwa kwakho kuJehova kufanele kuchubeke kukhula futsi kufanele uchubeke ukhulisa kukholwa kwakho kutsi Jehova usebentisa inhlangano yakhe lamuhla.

2-3. Nguyiphi indlela Jehova layisebentisako kuze acondzise inhlangano yakhe lamuhla? Niketa tibonelo.

² Lamuhla, Jehova ucondzisa inhlangano ngendlela leveta buntfu bakhe, injongo yakhe netimiso takhe. Asesicoce ngebuntfu baJehova lobutsatfu lesibubona enhlanganweni yakhe.

³ Kwekucala, “Nkulunkulu akakhetsi.” (Imis. 10:34) Lutsandvo lwenta kutsi Jehova anikele ngeNdvodzana yakhe kutsi ibe “yinhlawulo yabo bonkhe.” (1 Thim. 2:6; Joh. 3:16) Jehova usebentisa bantfu bakhe kutsi bashumayele tindzaba letimnandzi kubo bonkhe labafuna kulalela, ngaleyondlela usita bantfu labanyenti kutsi bazuze kulenhlawulo. Kwesibili, Jehova uyajabula nangabe tintfo tenteka ngekuhleleka nangekuthula. (1 Khor. 14:33, 40) Ngako sikulindzele kutsi tikhonti takhe timkhonte ngendlela lehlelekile nangekuthula. Kwesitsatfu, Jehova unguMfundzisi Lomkhulu. (Isa. 30:20, 21) Kungako inhlangano yakhe isebenta kamatima kuze ifundzise labanye ngeliVi laNkulunkulu liBhayibheli, ebandleni nasensimini. EmaKhristu ekucala abulingisa njani lobuntfu lobutsatfu baJehova? Bantfu baJehova lamuhla babulingisa njani lobuntfu? Lamuhla, umoya longcwele waJehova ungakusita njani njengobe ukhonta Jehova usenhlanganweni yakhe?

4. Ngekusho kweMisebenti 1:8, Jesu wayala balandzeli bakhe kutsi benteni, futsi nguluphi lusito lebebatalutfola?

⁴ Ngesikhatsi semaKhristu ekucala. Umlayeto Jesu lawushumayela waniketa litsemba kubo bonkhe bantfu. (Luk. 4:43) Wayala balandzeli bakhe kutsi bachubeke nalomsebenti lebesekawucalile, lokukufaza kuto “tonkhe tincenye temhlaba.” (Fundza Imisebenti 1:8.) Kuliciniso kutsi lomsebenti bebangeke bakhone kuwenta ngemandla abo. Bebatawudzinga umoya longcwele, ‘lokungumsiti’ Jesu labetsembisa wona.—Joh. 14:26; Zak. 4:6.

5-6. Umoya longcwele wabasita ngatiphi tindlela balandzeli baJesu?

⁵ Balandzeli baJesu batfola umoya longcwele ngeliPhentekhoste langa-33 C.E. Bacala kushumayela ngekushesha basitwa ngumoya longcwele, futsi ngesikhashana nje tinkhulungwane tebantfu temukela tindzaba letimnandzi. (Imis. 2:41; 4:4) Ngesikhatsi bacala kuphikiswa, labafundzi abazange besabe kodvwa bacela lusito kuNkulunkulu. Bathantaza batsi: ‘Yenta tinceku takho tichubeke tikhuluma livi lakho ngesibindzi.’ Ngako babese batfola umoya longcwele futsi bachubeka ‘bakhuluma livi laNkulunkulu ngesibindzi.’—Imis. 4:18-20, 29, 31.

⁶ Bafundzi baJesu babhekana naletinye tinkinga. Sibonelo saloko kutsi bekamancane emakhophi emiBhalo lengcwele. Bekute tincwadzi tekufundza liBhayibheli. Labafundzi bekufanele bashumayele bantfu labakhuluma tilwimi letinyenti letehlukene. Ngisho nobe bebabhekene naletinkinga, labafundzi labakhutsele benta intfo lebekubonakala ingeke yenteke. Ngeminyaka lecishe ibe ngu-30 besebashumayele tindzaba letimnandzi “kuyo yonkhe indalo lengephansi kwelizulu.”—Khol. 1:6, 23.

7. Eminyakeni lengetulu kwalelikhulu leyendlulile, yini leyasita tikhonti taJehova kutsi tikwati loko Nkulunkulu bekakufuna kuto, futsi yini letayenta?

⁷ Esikhatsini salamuhla. Jehova uyachubeka nekucondzisa bantfu bakhe nekubanika emandla ekwenta intsandvo yakhe. Usicondzisa asebentisa liBhayibheli leliphefumulelwe ngumoya wakhe. EBhayibhelini sifundza ngemsebenti wekushumayela Jesu lawenta kanye nemyalo lawunika balandzeli bakhe wekutsi bachubeke nemsebenti lawucala. (Mat. 28:19, 20) Kusukela kadzeni nga-1881 lomagazini watsi: “Jehova akazange asigcobe kuze sitawutfola ludvumo nobe sinjinge kodvwa wasigcoba khona sitawusebentisa konkhe lesinako kuze sishumayele tindzaba letimnandzi.” Incwajana letsi “To Whom the Work Is Entrusted,” leyashicilelwa nga-1919 yatsi: “Kunemsebenti lomnyenti lokufanele wentiwe, kodvwa ngumsebenti weNkhosi futsi itasinika emandla ekuwenta.” NjengemaKhristu ekucala, labazalwane bebanesibindzi futsi basebenta kamatima ngobe bebaciniseka kutsi umoya longcwele utabasita bashumayele bantfu bato tonkhe tinhlobo. Nalamuhla siyetsemba kutsi umoya longcwele utasisita.

8-9. Ngutiphi tindlela letisetjentiswe yinhlangano yaJehova kuze isakate tindzaba letimnandzi?

⁸ Inhlangano yaJehova isebentise emathulusi lancono kakhulu kuze isakate tindzaba letimnandzi. Lamathulusi afaka ekhatsi tincwadzi letinyatselisiwe, “i-Photo-Drama of Creation,” emagilamafoni, timoto letinemibhobho, siteshi semsakato futsi kamuva sekusetjentiswa i-internet. Inhlangano yaNkulunkulu ihumusha kwatiswa ngetilwimi letinyenti kunangesikhatsi lesendlulile! Kungani? Kuze tonkhe tinhlobo tebantfu tive tindzaba letimnandzi ngelulwimi lwato. Jehova akakhetsi, washo kutsi tindzaba letimnandzi betitawushunyayelwa “kuto tonkhe tive, tinhlanga, tilwimi, nebantfu.”  (Semb. 14:6, 7) Ufuna kutsi bonkhe bantfu bative letindzaba teMbuso.

⁹ Kutsiwani ngebantfu lesingakhoni kubashumayela emakhaya abo, ngesizatfu sekutsi bahlala emakhaya lagadvwako nobe lahlala akhiyiwe? Kuze kushunyayelwe linyenti lalabantfu, Jehova usite inhlangano yakhe kutsi icale kushumayela etindzaweni tawonkhe wonkhe letinebantfu labanyenti. Sibonelo saloko kutsi nga-2001, Sigungu Lesibusako saniketa bazalwane nabodzadze baseFrance imvume yekusebentisa tincola tekufakaza naletinye tindlela tekukhangisa ngetincwadzi tetfu. Ngekuhamba kwesikhatsi nebazalwane labakuletinye tindzawo bacala kushumayela basebentisa lendlela. Loko kwaba nemiphumela lemihle. Nga-2011, kwacaliswa luhlelo lolusha eMelika kulenye yetindzawo letiphitsitela kakhulu leseNew York. Ngemnyaka wekucala kucaliswe loluhlelo, kwahanjiswa tincwadzi letingu-102 129 nabomagazini labangu-68 911. Bantfu labangu-4 701 bacela kufundzelwa liBhayibheli! Kuyacaca kutsi Jehova bekasebentisa umoya wakhe longcwele kuze asite kulomsebenti. Ngako Sigungu Lesibusako saniketa bazalwane emhlabeni wonkhe imvume yekusebentisa tincola kanye naletinye tindlela tekukhangisa tincwadzi tetfu.

10. Yini lesingayenta kuze sitfutfuke endleleni lesishumayela ngayo nalesifundzisa ngayo?

¹⁰ Yini longayenta? Kusebentise ngalokugcwele kuceceshwa Jehova lasiniketa kona emihlanganweni yebuKhristu. Shumayela njalo nelicembu lakho lensimu. Bazalwane nabodzadze labakulelicembu lakho bangakusita kutsi utfutfuke endleleni loshumayela ngayo nalofundzisa ngayo, futsi bangakukhutsata ngesibonelo sabo lesihle. Chubeka ushumayela ngisho nobe ubhekana nebumatima. Njengobe umbhalo lokutsatselwe kuwo lesihloko usikhumbuta, sikhona kwenta intsandvo yaNkulunkulu hhayi ngemandla etfu, kodvwa ngekusitwa ngumoya longcwele. (Zak. 4:6) Siyaciniseka kutsi Nkulunkulu utasinika emandla lesiwadzingako ngobe senta umsebenti wakhe.

11. Ngesikhatsi semaKhristu ekucala, sigungu lesibusako sasebenta njani ngebunye kuze sente bantfu baNkulunkulu bahleleke?

¹¹ Ngesikhatsi semaKhristu ekucala. EJerusalema, sigungu lesibusako sasebenta  ngebunye kuze silondvolote kuhleleka nekuthula emkhatsini webantfu baNkulunkulu. (Imis. 2:42) Sibonelo saloko kutsi nga-49 C.E., emaKhristu lamanyenti aba nemibono lengafani mayelana nekutsi kufanele yini umuntfu asokwe kuze akhonte Jehova, ngako sigungu lesibusako sicondziswa ngumoya longwele sacoca ngalendzaba. Kube libandla lachubeka lehlukene ngenca yalendzaba, umsebenti wekushumayela bewutawuphatamiseka. Ngisho nobe baphostoli nemadvodza lamadzala bebangemaJuda, abazange bavumele lisiko lemaJuda nobe labo lebebakhutsata indzaba yekusoka kutsi babe nesandla kulesincumo lebebatawusenta. Kunaloko, bafundza liVi laNkulunkulu futsi bacela umoya wakhe longcwele kutsi ubasite bente sincumo lesikahle. (Imis. 15:1, 2, 5-20, 28) Waba yini umphumela? Jehova wasibusisa sincumo sabo, libandla lachubeka linekuthula nebunye futsi lachubeka lishumayela tindzaba letimnandzi.—Imis. 15:30, 31; 16:4, 5.

12. Yini lekhombisa kutsi inhlangano yaJehova ihlelekile futsi inebunye lamuhla?

¹² Esikhatsini salamuhla. Inhlangano yaJehova isite bantfu bakhe kutsi bachubeke bahlelekile futsi banekuthula. Nga-1895, “i-Zion’s Watch Tower and Herald of Christ’s Presence” yaNovember 15 beyinesihloko lesitsi: “Ngendlela Lefanele Nangekuhleleka” lebesitsatselwe ku-1 Khorinte 14:40. Lesihloko satsi: “Baphostoli babhalela libandla lekucala tintfo letinyenti mayelana nekuhleleka . . . Kubalulekile kutsi sitilalele ‘tintfo letabhalwa kadzeni tabhalelwa kufundzisa tsine.’” (Rom. 15:4) Nalamuhla, inhlangano yaJehova isebenta kamatima kuze igcine kuhleleka nekuthula emabandleni ebuKhristu njengobe beyenta ngesikhatsi semaKhristu ekucala. Sibonelo saloko kutsi nawungaya kulelinye libandla, kungaba seveni lakho nobe kulelinye live, futsi ukhandze kuSifundvo seSicongosekulindza, uyati kutsi sitawube sichutjwa kanjani nekutsi kutawube kufundvwa siphi sihloko. Ngekushesha nje, ungavele utive usekhaya! Ngumoya waNkulunkulu kuphela longenta kutsi kube nalobunye.—Zef. 3:9.

13. Sicabanga ngaJakobe 3:17, ngumiphi imibuto lokufanele sitibute yona?

¹³ Yini longayenta? Jehova ufuna kutsi bantfu bakhe ‘bagcine bunye bemoya ngesibopho sekuthula.’ (Ef. 4:1-3) Ngako tibute:  ‘Ngiyabutfutfukisa yini bunye nekuthula ebandleni? Ngiyabalalela yini labaholako? Labanye bangetsembela yini kimi, ikakhulukati nangiphatsiswe imisebenti letsite ebandleni? Ngiyasibamba yini sikhatsi, ngilusito yini futsi ngihlale ngikulungele yini kukhonta labanye?’ (Fundza Jakobe 3:17.) Nangabe ubona kutsi kukhona lapho ungatfutfukisa khona, thantazela umoya longcwele. Nawuchubeka uwuvumela kutsi uceceshe buntfu bakho netento takho, bazalwane nabodzadze batakutsandza.

14. Ngekusho kwaKholose 1:9, 10, Jehova wabafundzisa njani bantfu bakhe ngesikhatsi semaKhristu ekucala?

¹⁴ Ngesikhatsi semaKhristu ekucala. Jehova uyakutsandza kufundzisa bantfu bakhe. (Hla. 32:8) Njengobe sibantfwana bakhe, ufuna kutsi simati, simtsandze futsi siphile phakadze. Kodvwa konkhe loku bekungeke kwenteke kube akasifundzisi. (Joh. 17:3) Jehova wasebentisa libandla lemaKhristu ekucala kuze afundzise bantfu bakhe. (Fundza Kholose 1:9, 10.) Umoya longcwele, ‘lokungumsiti’ Jesu lawetsembisa, nawo wawasita lamaKhristu. (Joh. 14:16) Umoya longcwele wabasita labafundzi kutsi bacondze liVi laNkulunkulu futsi bakhumbule tonkhe tintfo Jesu lebekatishito nalebekatentile, lokwatsi ngekuhamba kwesikhatsi tabhalwa eBhayibhelini. Lolwati lwakucinisa kukholwa kwalamaKhristu ekucala futsi lwawenta amtsandza kakhulu Nkulunkulu, iNdvodzana yakhe kanye nalamanye emaKhristu.

15. Ngutiphi tindlela lobone Jehova asifeza ngayo setsembiso sakhe lesiku-Isaya 2:2, 3?

¹⁵ Esikhatsini salamuhla. Jehova watsi “ngemalanga ekugcina” bantfu bato tonkhe tive bebatawuya “entsabeni” yakhe, lokusho kutsi bebatawuba yincenye yetikhonti takhe teliciniso futsi bebatawufundza tindlela takhe. (Fundza Isaya 2:2, 3.) Siyasibona sigcwaliseka lesiphrofetho. Kukhonta kweliciniso kuncono kakhulu nakucatsaniswa nekukhonta kwemanga. Jehova uniketa  bantfu kwatiswa lokunyenti ngeliBhayibheli! (Isa. 25:6) Usebentisa “sisebenti lesetsembekile nalesihlakaniphile” kuze asinikete konkhe lokwatiswa lokuchamuka ngetindlela letehlukene. Nasi sibonelo, usinikete tihloko letifundvwako, tinkhulumo letilalelwako, bopopayi nema-video. (Mat. 24:45) Sitiva njenga-Elihu umngani waJobe lowatsi: ‘Ngubani nje lofundzisa njengaNkulunkulu?’—Jobe 36:22.

16. Yini longayenta kuze uzuze ekuceceshweni nguJehova?

¹⁶ Yini longayenta? Umoya waNkulunkulu utakusita kutsi ukusebentise loko lokutfolako nawufundza futsi udadisha liVi laKhe. Thantaza njengemhlabeleli utsi: “Ngifundzise indlela yakho, [Jehova], ngiyawuhamba ecinisweni lakho; yenta inhlitiyo yami ihlose intfo yinye: kutsi ilesabe libito lakho.” (Hla. 86:11) Ngako chubeka ufundza futsi udadisha liBhayibheli kanye naletinye tincwadzi lesitinikwa yinhlangano yaJehova. Umgomo wakho awusiwo nje kuphela kutsi utfole lwati. Ufuna kuciniseka kutsi leli liciniso futsi ulisebentise ekuphileni kwakho. Umoya waJehova ungakusita kutsi ukwente loko. Ufuna nekukhutsata bazalwane nabodzadze. (Heb. 10:24, 25) Leni? Ngobe bangumndeni wakho. Thantazela umoya waNkulunkulu kutsi ukusite uphendvule ngalokusuka enhlitiyweni emihlangweni yebuKhristu futsi ukusite wente konkhe longakwenta nawuniketwe sabelo. Nawenta njalo utawube ukhombisa Jehova neNdvodzana yakhe kutsi uyawatsandza “emawundlu” abo laligugu.—Joh. 21:15-17.

17. Ngutiphi tindlela longakhombisa ngato kutsi uyisekela ngekwetsembeka inhlangano yaJehova?

¹⁷ Masinyane, yinhlangano leholwa ngumoya waNkulunkulu kuphela letawusala emhlabeni. Ngako bambisana nenhlangano yaJehova ngemdlandla. Khombisa kutsi ubatsandza bonkhe bantfu njengaNkulunkulu ngekutsi ushumayele tindzaba letimnandzi kubo bonkhe. Lingisa indlela lakutsandza ngayo kuhleleka nekuthula ngekutsi utfutfukise bunye ebandleni. Lalela uMfundzisi wakho Lomkhulu ngekutsi ukusebentise konkhe lakuniketa kona. Naselibhujiswa lelive laSathane, angeke uze wesabe. Kunaloko, utawuba nesibindzi sekuma emkhatsini walabo labakhonta Jehova ngekwetsembeka enhlanganweni yakhe.