1. Apa harusẹ̌ turusẹ̌ koatengu tau Kristen apang seng bọu nibaptisẹ̌?

APA i kau seng bọu nibaptisẹ̌? Mạeng seng bọu, su tempong i kau nibaptisẹ̌, i kau něnodẹ su taumata lawọ i kau mangimang si Yehuwa dingangu mapulu mẹ̌tahamawu si Sie sěngkasio dingangu organisasi-Ne. * Katewe, pangangimangu si Yehuwa harusẹ̌ turusẹ̌ koạ pakatoghasẹ̌. Kụ i kau lai harusẹ̌ mangimang Yehuwa měpẹ̌pakẹ organisasi-Ne orasẹ̌ ini.

2-3. Kerea Yehuwa měngẹ̌ngahạ organisasi-Ne orasẹ̌ ini? Gělịko contone.

² Orasẹ̌ ini, su tempong Yehuwa měngahạ organisasi-Ne, i Sie lai napakal᷊ahẹ manga sipat’E, apa sarung koateng’E, dingangu atorang’E soal u moral. Mahịe měmanda tatělu sipati Yehuwa nal᷊ahẹ su organisasi-Ne.

³ Humotong, ”Mawu tawe mawěhạ sěmběka.” (Kis. 10:34) Kakěndagẹ̌ nakakoạ si Yehuwa mapulu měgělị Ahus’E gunang makoạ ’tatěbusẹ̌ gunang kěbị taumata’. (1 Tim. 2:6; Yoh. 3:16) Yehuwa něpakẹ manga ělang’E gunang měhabarẹ̌ habarẹ̌ mapia su kěbị apang mapulu dumaringihẹ̌. Karuane, Yehuwa mapulu kěbị maatorẹ̌ dingangu mararame. (1 Kor. 14:33, 40) Hakị u ene, i kitẹ mangimang manga ělang’E kai kelompok naatorẹ̌ dingangu mararame. Katělune, Yehuwa kai ’Měnaněntiro Mawantugẹ̌’. (Yes. 30:20, 21) Hakị u ene, organisasi-Ne turusẹ̌ měnẹ̌něntiro Hengetang’E su sidang dingangu su tempong měnginjilẹ̌. Kerea tatělu sipati Yehuwa ini nal᷊ahẹ su sidang Kristen su abad humotong? Kerea tatělụ sipat’E ene nal᷊ahẹ orasẹ̌ ini? Dingangu kerea rohkẹ̌ masusi botonge makatul᷊ung si kitẹ mẹ̌tahamawu si Yehuwa sěngkasio dingangu organisasi-Ne orasẹ̌ ini?

4. Kere nilahẹ su Kisah 1:8, parenta apa nighělị i Yesus su manga murite, kụ tul᷊umang apa sarung tarimakeng i sire?

⁴ Su abad humotong. Habarẹ̌ lẹ̌habareng i Yesus nakaghělị pělaharapẹ̌ gunang kěbị taumata. (Luk. 4:43) Yesus nẹ̌parenta su manga murite gunang měnurusẹ̌ hal᷊ẹ̌ seng nitětạe, ene kai měgělị kesaksian ”sarang tampạ karauange su dunia”. (Basa Kisah 1:8.) Tantu manga murite tawe makakoạ hal᷊ẹ̌ ene dingangu katatoghasi sire hala. I sire membutuhkan ”mẹ̌tatul᷊ung” ene kai rohkẹ̌ masusi seng nirianding i Yesus gunang i sire.​—Yoh. 14:26; Za. 4:6.

5-6. Kerea rohkẹ̌ masusi nẹ̌tul᷊ung manga muriti Yesus?

⁵ Manga muriti Yesus nakatarimạ rohkẹ̌ masusi su ěllong Pentakosta taung 33 M. Ual᷊ingu tul᷊umang rohkẹ̌ masusi, i sire apidu něnětạ něnginjilẹ̌, kụ tawe nararěna, hiwune taumata něnarimạ habarẹ̌ mapia. (Kis. 2:41; 4:4) Bọu ene, su tempong manga muritẹ̌ nirarihang, i sire tawe natakụ katewe i sire nakitul᷊ung su Mawu. I sire nẹ̌doa, ”Koạko i kami, manga ělang’U, bahani měhabarẹ̌ hengetang’U.” Bọu ene su apang bọu nẹ̌doa, i sire napenẹu rohkẹ̌ masusi kụ ”něhabarẹ̌ hengetangu Mawu dingangu kawawahani”.​—Kis. 4:18-20, 29, 31.

⁶ Manga muriti Yesus lai nakahombang kasasigěsạ wal᷊inẹ. Contone, su tempo ene kětạeng piạ mahal᷊i salinan Binohẹ Susi. Bọu ene lai, tawẹ apa bukẹ̌ gunang pěngangěndungang kere pẹ̌paketang i kitẹ orasẹ̌ ini. Kụ, manga muritẹ̌ lai harusẹ̌ měnginjilẹ̌ su taumata měpẹ̌pakẹ bawera wal᷊inẹ. Maning i sire tụtatěngo situasi masigěsạ kerene, manga muritẹ̌ masěmangatẹ̌ ini někoạ hal᷊ẹ̌ kakělaěng tawe mungkin ikakoạ i sire. Kětạeng su ral᷊ungu piram pul᷊o su taunge, i sire seng nakapěmahiạ habarẹ̌ mapia ”su kěbị diadikang su al᷊ungu langị”.​—Kol. 1:6, 23.

7. Nal᷊iu wọu 100 su taunge tamai, kerea manga ělang i Yehuwa masingkạ apa dẹ̌dorongang i Yehuwa bọu i sire, kụ apa nikoạ i sire?

⁷ Su zaman modern. Yehuwa turusẹ̌ měngẹ̌ngahạ manga ělang’E dingangu měgẹ̌gělị si sire katatoghasẹ̌ gunang měkoạ kapulu-Ne. Yehuwa kahumotongange měngẹ̌ngahạ manga ělang’E lumiu Hengetang’E. Su Hengetang’E, i kitẹ makawasa soal u pelayanan i Yesus dingangu parentang i Yesus su manga murite gunang měnurusẹ̌ hal᷊ẹ̌ seng nitětạe. (Mat. 28:19, 20) Su wul᷊ang Juli 1881, majalah The Watchtower bọu naul᷊ị, ”I kitẹ tawe nipile gunang makaěbạ daralo bọu taumata arau gunang makalạ. Katewe, i kitẹ nipile tadeạu měpakẹ apang piạ si kitẹ gunang měhabarẹ̌ habarẹ̌ mapia.” Bọu ene lai, brosur To Whom the Work Is Entrusted (Dipercayakan untuk Menginjil) nicetakẹ̌ taung 1919, nẹ̌bera, ”Piạ lawọ hal᷊ẹ̌ gunang koateng, katewe ene kai hal᷊ẹ̌ u Mawu, kụ i Sie sarung měgělị si kitẹ katatoghasẹ̌ gunang měkoạ ene.” Nal᷊ahẹ, kere tau Kristen su abad humotong, anạu sěmbaụ su tempo ene bahani něgělị watangeng i sire gunang měkoạ hal᷊ẹ̌ ene. I sire mangimang rohkẹ̌ masusi sarung mẹ̌tul᷊ung si sire měnginjilẹ̌ su kěbị haghing taumata. Orasẹ̌ ini, i kitẹ lai mangimang rohkẹ̌ masusi sarung mẹ̌tul᷊ung si kitẹ.

8-9. Cara apa nipakẹu organisasing Yehuwa gunang měmahiạ habarẹ̌ mapia?

⁸ Organisasing Yehuwa seng něpakẹ manga alatẹ̌ kapaelange gunang měmahiạ habarẹ̌ mapia. Manga alatẹ̌ ene kai publikasi seng nicetakẹ̌, ”Drama-Foto Penciptaan”, mesin pemutar rekaman, oto piạ toane, radio, dingangu kawuhuange ute teknologi digital. Organisasing Mawu lai někoạ hal᷊ẹ̌ penerjemahan kaguwạkenge su kanandụu sejarah. Kawe nụe? Tadeạu kěbị taumata botonge makaringihẹ̌ habarẹ̌ mapia su werang i sire hala. Yehuwa tawe mawěhạ sěmběka, kụ i Sie něněbal᷊ẹ̌ habarẹ̌ mapia  sarung habareng su ”patikụ umatẹ̌, hěnto, wera dingangu wangsa”. (Why. 14:6, 7) I Sie mapulu habarẹ̌ Kararatuang botonge karingihangu kěbị taumata.

⁹ Kerea dingangu taumata apang masigěsạ kapẹ̌sombangeng aramanung ual᷊ingu i sire mětẹ̌tanạ su apartemen dẹ̌diagateng? Tadeạu botonge makapěnginjilẹ̌ su taumata kerene, Yehuwa nẹ̌tul᷊ung organisasi-Ne gunang měpakẹ cara wal᷊inẹ su tempong měnginjilẹ̌. Contone, su taung 2001, Badan Pimpinan setuju anạu sěmbaụ su Perancis měpakẹ rak beroda arau meda lektur. Bọu ene, anạu sěmbaụ su tampạ wal᷊inẹ lai něnětạ něnginjilẹ̌ něpakẹ cara ene. Hasile sěbạe mapaelẹ̌. Su taung 2011, sěmbaụ program buhu nitětạ su Amerika Serikat su sěmbaụ bageang sěbạe masibukẹ̌ su New York City. Su kanandụu taung humotong, piạ 102.129 bukẹ̌ dingangu 68.911 majalah seng nipahiạ. Kụ piạ 4.701 taumata mapulu měngěndung Alkitapẹ̌! Nal᷊ahẹ, Yehuwa něpakẹ rohkẹ̌’E masusi gunang mẹ̌tul᷊ung hal᷊ẹ̌ ini. Hakị u ene, Badan Pimpinan setuju anạu sěmbaụ su patikụ dunia měpakẹ rak beroda dingangu meda lektur gunang měnginjilẹ̌.

10. Kerea tadeạu i kitẹ limembong matahuěna su tempong měnginjilẹ̌?

¹⁰ Bageang i kitẹ. Tarimạe pelatihan bọu i Yehuwa su pěngangibadang, kụ koạ ene. I kitẹ lai harusẹ̌ marading měnginjilẹ̌ dingangu anạu sěmbaụ su kelompok dinas lapangan i kitẹ. I sire sarung makatul᷊ung si kitẹ limembong matahuěna su tempong měnginjilẹ̌, kụ i kitẹ lai makaěbạ katatoghasẹ̌ ual᷊ingu nakasilo contoh mapaelẹ̌ bọu i sire. Kere nilahẹ su ayat tema pěngangěndungang i kitẹ, i kitẹ botonge makakoạ kapulung Mawu, bal᷊inẹ ual᷊ingu katatoghasi kitẹ hala, katewe ual᷊ingu tul᷊umang rohkẹ̌ masusi. (Za. 4:6) Hakị u ene, i kitẹ mangimang Mawu sarung měgělị si kitẹ katatoghasẹ̌ ual᷊ingu i kitẹ kai měkẹ̌koạ hal᷊ẹ̌’E.

11. Kerea badan pimpinan su abad humotong nẹ̌tul᷊ung manga ělangu Mawu tadeạu tatapẹ̌ naatorẹ̌?

¹¹ Su abad humotong. Badan pimpinan su Yerusalem něhal᷊ẹ̌ sěngkasio tadeạu manga ělangu Mawu tatapẹ̌ naatorẹ̌ dingangu mararame. (Kis. 2:42) Contone, ěndịu su taung 49 M, piạ masalah sunatẹ̌ nariadi. Mạeng masalah ene walang kụ sidang  tatapẹ̌ mapahiạ, ene sarung makasahaghe hal᷊ẹ̌ měnginjilẹ̌. Hakị u ene, dingangu laahạ rohkẹ̌ masusi, badan pimpinan nẹ̌bisara soal u hal᷊ẹ̌ ene. Maning i sire kai tau Yahudi, manga rasulẹ̌ dingangu manga penatua ene tawe napěngarung tradisi Yahudi arau i sire apang měnẹ̌něntiro tradisi ene. Katewe i sire němala Hengetangu Mawu dingangu rohkẹ̌ masusi něngahạ putusang i sire. (Kis. 15:1, 2, 5-20, 28) Apa hasile? Yehuwa něngal᷊amatẹ̌ putusang i sire. Sidang tatapẹ̌ nasěmbaụ dingangu mararame, kụ hal᷊ẹ̌ měnginjilẹ̌ turusẹ̌ kẹ̌koateng.​—Kis. 15:30, 31; 16:4, 5.

12. Apa buktine organisasing Yehuwa orasẹ̌ ini naatorẹ̌ dingangu mararame?

¹² Su zaman modern. Organisasing Yehuwa seng nẹ̌tul᷊ung manga ělang i Yehuwa tadeạu maatorẹ̌ dingangu mararame. Contone, majalah Watch Tower 15 November 1895 nělahẹ sěmbaụ topik tatěmbọe ”Dengan Sopan dan Tertib”, kụ dasare nial᷊ạ bọu 1 Korintus 14:40. Majalah ene naul᷊ị, ”Manga rasulẹ̌ seng němohẹ lawọ hal᷊ẹ̌ gunang tau Kristen su abad humotong soal u maatorẹ̌ . . . Ini penting tadeạu i kitẹ botonge makakoạ ’kěbị ayatẹ̌ seng niwohẹ gunang měněntiro si kitẹ.’” (Rm. 15:4) Nal᷊ahẹ, kere su abad humotong, organisasing Yehuwa orasẹ̌ ini lai něhal᷊ẹ̌ masěghadẹ̌ gunang měndiagạ sidang Kristen tatapẹ̌ maatorẹ̌ dingangu mararame. Contone, mạeng i kau tumol᷊e Pěngangěndungang Měhabarẹ̌ su sidang wal᷊inẹ, arau lai su negeri wal᷊inẹ, i kau seng masingkạ kerea pěngangěndungang ene sarung ahạkeng dingangu artikel sude sarung ěndungang. I kau sarung mẹ̌pěndang mẹ̌sul᷊ungu něngibadah su sidangu hala. Kasasěmbaụ kerene botonge nariadi ual᷊ingu piạ tul᷊umangu rohkẹ̌ u Mawu.​—Zef. 3:9, catatan kaki.

13. Apidu mẹ̌tiněna Yakobus 3:17, kakiwal᷊o apa botonge tiněnang i kitẹ?

¹³ Bageang i kitẹ. Yehuwa mapulu i kitẹ ”měndiagạ kasasěmbaụ seng nighělị limiung rohkẹ̌ masusi, dingangu měbiahẹ̌ su ral᷊ungu pẹ̌darame seng nakasěmbaụ”. (Ef. 4:1-3) Hakị u ene, pẹ̌kiwal᷊ọe su watangengu, ’Apa iạ něndiagạ kasasěmbaụ dingangu pẹ̌darame su sidang? Apa iạ matuhụ si sire apang nakoạ těmbonang? Apa iạ botonge kapěngimangeng, něngělembo mạeng iạ piạ tanggung jawab su sidang? Apa iạ dụděnta su tempone, puluang mẹ̌tul᷊ung dingangu  puluang melayani?’ (Basa Yakobus 3:17.) Mạeng i kau nakasilo i kau botonge makoạ limembong mapaelẹ̌ su manga hal᷊ẹ̌ ene, pẹ̌doạe pẹ̌dorong rohkẹ̌ masusi. Mạeng i kau měmala rohkẹ̌ masusi měmal᷊ui sipatẹ̌ dingangu kakanoạu, anạu sěmbaụ sarung limembong makěndagẹ̌ dingangu měngarěga si kau.

14. Tumuhụ Kolose 1:9, 10, kerea Yehuwa něněntiro manga ělang’E su abad humotong?

¹⁴ Su abad humotong. Yehuwa puluang měněntiro manga ělang’E. (Mz. 32:8) I Sie mapulu i sire makasingkạ soal i Sie, kuměndagẹ̌ si Sie, dingangu měbiahẹ̌ sarang karěngụe kụ tatapẹ̌ makoạ manga anạ’E ikẹ̌kěndagẹ̌. Kěbị ene botonge mariadi ual᷊ingu i Sie něněntiro manga ělang’E. (Yoh. 17:3) Yehuwa něpakẹ sidang Kristen su abad humotong gunang měněntiro manga ělang’E. (Basa Kolose 1:9, 10.) Rohkẹ̌ masusi arau ”mẹ̌tatul᷊ung” seng nirianding i Yesus, ene lai nakatul᷊ung manga muritẹ̌. (Yoh. 14:16) Ene nakatul᷊ung si sire nakaěna Hengetangu Mawu, dingangu nakatahěndung lawọ hal᷊ẹ̌ seng nitěntiro dingangu nikoạ i Yesus, kụ samurine niwohẹ su ral᷊ungu Injilẹ̌. Manga kasingkạ ene nakatoghasẹ̌ pangangimangu tau Kristen su abad humotong. Kụ, ene lai nakatoghasẹ̌ kakěndagi sire su Mawu, su Ahus’E, dingangu su sěmbaụ su wal᷊inẹ.

15. Kerea Yehuwa něngganapẹ̌ diandi-Ne su Yesaya 2:2, 3?

¹⁵ Su zaman modern. Yehuwa něněbal᷊ẹ̌ ”su ěllo-ěllo pěngěngsuenge”, taumata bọu haghing bangsa sarung sumaka sarang wul᷊udi Yehuwa gunang těntirong soal u manga ral᷊eng’E. (Basa Yesaya 2:2, 3.) Orasẹ̌ ini, těbal᷊ẹ̌ ini seng naghanapẹ̌. I kitẹ nakasilo ibadah tutune kai limembong mapaelẹ̌ sul᷊ungu haghing ibadah palsu. Kụ Yehuwa něnadia lawọ kaěng rohani. (Yes. 25:6) Limiung ”ělang masatia dingangu matahuěna”, Yehuwa bal᷊inẹ kětạeng něgělị lawọ kaěng katewe lai něgělị haghing kaěng, měnětạ bọu artikel, nasẹ̌, sarang animasi digital dingangu  manga video. (Mat. 24:45) Pěndang i kitẹ tantu mẹ̌sul᷊ung dingangu pěndang i Elihu, hapị i Ayub. I sie nẹ̌bera, ”Apa piạ měnaněntiro limembong mapaelẹ̌ bọu [Mawu]?”​—Ayb. 36:22.

16. Apa koatengu tadeạu makaěbạ gunane bọu laahạ i Yehuwa?

¹⁶ Bageang i kitẹ. Rohkẹ̌ u Mawu sarung makatul᷊ung si kau měkoạ apa seng niwasa dingangu niěndungangu su Hengetangu Mawu. Pẹ̌doạe kere pemazmur, ”Yehuwa, těntiroiko iạ soal u ral᷊eng’U. Iạ sarung dumal᷊eng su katěngad’U. Pakasěmbaụko naungku gunang měngadatẹ̌ areng’U.” (Mz. 86:11) Hakị u ene, turusẹ̌e kaěng kaěng rohani seng nisadiang i Yehuwa limiung Hengetang’E dingangu organisasi-Ne. Tantu timonanu bal᷊inẹ kětạeng gunang makaěbạ kasingkạ. Katewe lai i kau mapulu kasingkạ ene maresọ su naungu, kụ měkoạ ene su pěbawiahu. Rohkẹ̌ i Yehuwa botonge makatul᷊ung si kau měkoạ hal᷊ẹ̌ ene. I kau lai tantu mapulu měnoghasẹ̌ anạu sěmbaụ. (Ibr. 10:24, 25) Kawe nụe? Ual᷊ingu i sire kai keluarga rohaninu. Hakị u ene, pẹ̌doạe mẹ̌dorong rohkẹ̌ masusi gunang mẹ̌tul᷊ung si kau měgělị komentarẹ̌ su pěngangibadang dingangu měkoạ kapaelange mạeng i kau piạ bageang su pěngangibadang. Mạeng i kau měkoạ manga hal᷊ẹ̌ ene, i kau něnodẹ si Yehuwa dingangu su Ahus’E, i kau makěndagẹ̌ su ”dombang” i sire maarěga.​—Yoh. 21:15-17.

17. Kerea měnodẹ i kau masatia něhal᷊ẹ̌ sěngkasio dingangu organisasing Yehuwa?

¹⁷ Seng mal᷊ighạ tempone, organisasi mal᷊ěmbe su dunia ene kate organisasi lẹ̌ahạkengu rohkẹ̌ u Mawu. Hakị u ene, pakasěmangatẹ̌e měhal᷊ẹ̌ sěngkasio dingangu organisasing Yehuwa. Todẹko kakěndagi Yehuwa tawe mawěhạ sěmběka su taumata, carane ute pěmahiạ habarẹ̌ mapia su kěbị taumata apang nipẹ̌sombangengu. Pẹ̌těnọe su Mawu puluang kěbị maatorẹ̌ dingangu mararame, carane ute diagạ kasasěmbaụ su sidang. Kụ, daringihẹ̌ su Měnaněntiro Mawantugẹ̌, carane ute kaěng kaěng rohani seng nisadia-Ne. Kụ, su tempong duniang Setang seng maraning mawinasa, i kau tawe matakụ katewe i kau sarung bahani, kụ dumarisị dingangi sire apang masatia nẹ̌tahamawu si Yehuwa sěngkasio dingangu organisasi-Ne.