1. Ema Kristaun neʼebé hetan ona batizmu tenke kontinua halo saida?

ITA hetan ona batizmu ka lae? Se nuneʼe, Ita hatudu sai ona katak Ita fiar Jeová no hakarak serbí nia hamutuk ho ninia organizasaun. * Ita-nia fiar ba Jeová tenke kontinua sai metin liután. No Ita mós presiza kontinua hametin Ita-nia fiar katak Jeová uza ninia organizasaun ohin loron.

2-3. Oinsá Jeová dirije ninia organizasaun? Fó toʼok ezemplu.

² Ohin loron, Jeová dirije ninia organizasaun iha dalan neʼebé hatudu sai nia mak Maromak hanesan saida, ninia hakarak no mós ninia prinsípiu sira kona-ba morál. Mai ita koʼalia kona-ba Jeová nia hahalok tolu neʼebé nia hatudu sai liuhusi ninia organizasaun.

³ Primeiru, “Maromak la todan ba sorin”. (Após 10:34) Domin book Jeová atu fó ninia Oan-Mane nuʼudar sakrifísiu hodi “sosa fali ema hotu”. (1 Tim 2:6; João 3:16) Jeová uza ninia povu atu haklaken liafuan diʼak ba ema hotu neʼebé hakarak rona. Hodi halo nuneʼe, nia ajuda ema barak atu hetan benefísiu husi Jesus nia sakrifísiu. Segundu, Jeová gosta bainhira buat hotu organiza ho didiʼak no iha dame. (1 Kor 14:33, 40) Tan neʼe, ema neʼebé adora nia presiza serbí nia iha dalan hanesan neʼe. Terseiru, Jeová mak “Mestre Boot”. (Isa 30:20, 21) Tan neʼe, ninia organizasaun tau fokus atu hanorin ninia Liafuan Bíblia iha kongregasaun no mós iha serbisu haklaken. Oinsá kongregasaun Kristaun iha tempu uluk hatudu sai Jeová nia hahalok tolu neʼe? Oinsá Jeová nia povu ohin loron hatudu sai hahalok  sira-neʼe? Oinsá espíritu santu bele ajuda Ita atu serbisu hamutuk ho Jeová nia organizasaun ohin loron?

4. Tuir Apóstolu 1:8, Jesus haruka ninia dixípulu atu halo saida? Jesus promete atu fó saida?

⁴ Iha apóstolu sira-nia tempu. Mensajen neʼebé Jesus haklaken fó esperansa ba ema hotu. (Lc 4:43) Jesus haruka dixípulu sira atu kontinua halaʼo serbisu neʼebé nia hahú ona hodi haklaken “toʼo rai sira neʼebé dook liu iha mundu”. (Lee Apóstolu 1:8.) Maibé sira labele halo ida-neʼe ho sira-nia kbiit rasik. Sira presiza “ajuda-naʼin” neʼebé Jesus promete ona, neʼe mak espíritu santu.​—João 14:26; Zac 4:6.

5-6. Oinsá espíritu santu ajuda Jesus nia dixípulu?

⁵ Jesus nia dixípulu sira simu espíritu santu iha loron Pentekostes tinan 33 EC. Ho ajuda husi espíritu santu, sira komesa kedas atu haklaken, no lakleur deʼit ema rihun ba rihun simu liafuan diʼak. (Após 2:41; 4:4) Bainhira ema kontra dixípulu sira, sira la sai taʼuk no la para atu haklaken. Duké halo nuneʼe, sira halo orasaun ba Maromak hodi husu: “Fó aten-brani ba Ita-nia atan sira atu kontinua haklaken Ita-nia liafuan.” Sira sai nakonu ho espíritu santu no kontinua “fó sai Maromak nia liafuan ho aten-brani”.​—Após 4:18-20, 29, 31.

⁶ Jesus nia dixípulu sira hasoru susar seluk tan. Porezemplu, sira ladún iha kópia barak husi Eskritura sira. Sira la iha livru oioin hanesan ita iha ohin loron. No dixípulu sira mós presiza haklaken ba ema barak neʼebé koʼalia língua oioin. Maski susar, maibé sira kumpre knaar boot neʼe. Iha maizumenus tinan 30 nia laran, sira haklaken liafuan diʼak “ba kriasaun hotu iha lalehan nia okos”.​—Kol 1:6, 23.

7. Maizumenus tinan 100 liubá, oinsá Maromak nia atan sira hatene buat neʼebé sira presiza halo? No sira halo saida?

⁷ Iha tempu modernu. Jeová kontinua dirije no fó kbiit ba ninia povu. No nia dirije ninia povu liuliu hodi uza ninia Liafuan. Ninia espíritu santu mak dirije ema atu hakerek Bíblia. Iha Bíblia, ita bele lee kona-ba Jesus nia serbisu haklaken no ninia mandamentu ba ninia dixípulu sira atu kontinua haklaken. (Mt 28:19, 20) Livru Haklaken ba fulan-Jullu tinan 1881 dehan: “Jeová hili ita laʼós atu ema seluk fó hahiʼi ba ita ka atu ita bele sai riku, maibé nia hili ita atu ita bele uza ita-nia forsa no sasán atu haklaken liafuan diʼak.” Livru kiʼik ida (To Whom the Work Is Entrusted) neʼebé fó sai iha tinan 1919 hatete: “Iha serbisu barak atu halo, maibé neʼe mak Naʼi nia serbisu no nia sei fó kbiit ba ita atu kumpre serbisu neʼe.” Hanesan ema Kristaun iha apóstolu sira-nia tempu, irmaun-irmán sira-neʼe hatudu aten-brani no serbisu makaʼas. Sira iha konfiansa katak espíritu santu sei ajuda sira atu haklaken ba ema oioin. Ita mós iha konfiansa neʼe.

8-9. Jeová nia organizasaun uza dalan saida atu haklaken ba ema barak liután?

⁸ Jeová nia organizasaun sempre uza buat neʼebé diʼak liu atu fahe liafuan diʼak. Ida-neʼe inklui publikasaun sira, “Foto-Drama kona-ba Kriasaun”, fonógrafu, karreta ho lian, estasaun rádiu, no foin lalais komputadór no mós internét. Ninia organizasaun mós tradús informasaun ba língua barak liu. Tanbasá? Atu nuneʼe ema hotu bele rona liafuan diʼak iha sira-nia língua rasik. Jeová la todan ba sorin. Nia  fó sai nanis katak liafuan diʼak sei haklaken “ba nasaun, suku, língua no povu hotu”. (Apok 14:6, 7) Nia hakarak ema hotu atu rona kona-ba ninia Ukun.

⁹ Oinsá ho ema sira neʼebé hela iha apartamentu neʼebé ita labele tama? Atu bele haklaken ba sira, Jeová nia organizasaun komesa haklaken iha fatin públiku. Porezemplu, iha tinan 2001, Grupu Administradór fó lisensa ba irmaun-irmán sira iha rai-Fransa atu haklaken ho karrosa no ho dalan seluk iha fatin públiku. Depois neʼe, irmaun-irmán sira iha fatin seluk mós komesa haklaken hanesan neʼe. Sira hetan rezultadu diʼak. Iha tinan 2011, irmaun-irmán sira komesa haklaken iha fatin públiku neʼebé rame liu iha sidade Novaiorke. Durante tinan primeiru, sira fahe livru hamutuk 102.129 no revista 68.911. No ema naʼin-4.701 husu atu estuda Bíblia. Klaru katak Jeová uza ninia espíritu santu atu apoia serbisu neʼe. Tan neʼe Grupu Administradór fó lisensa ba kongregasaun hotu atu haklaken ho karrosa no ho dalan seluk iha fatin públiku.

10. Oinsá ita bele aumenta ita-nia matenek atu haklaken no hanorin?

¹⁰ Buat neʼebé Ita bele halo. Aproveita treinu hotu neʼebé Jeová fó liuhusi reuniaun sira. Haklaken beibeik ho Ita-nia grupu haklaken. Irmaun-irmán sira iha Ita-nia grupu bele ajuda Ita atu haklaken no hanorin ho diʼak liután no mós sira-nia ezemplu diʼak bele anima Ita. Kontinua haklaken maski hasoru susar. Ita-nia eskritura tema ba lisaun neʼe fó-hanoin ita katak ita bele kumpre Maromak nia hakarak laʼós ho ita-nia kbiit rasik maibé ho kbiit husi espíritu santu. (Zac 4:6) Neʼe tanba ita halo Maromak nia serbisu.

11. Oinsá mak grupu administradór serbisu hamutuk atu organiza ho didiʼak Maromak nia povu?

¹¹ Iha apóstolu sira-nia tempu. Grupu administradór iha Jeruzalein serbisu hamutuk atu Maromak nia povu bele organiza ho didiʼak no iha dame. (Após 2:42) Porezemplu, iha tinan 49 EC, ema Kristaun barak iha opiniaun la hanesan kona-ba sirkunsizaun. Tan neʼe espíritu  santu dirije grupu administradór atu koʼalia hamutuk kona-ba asuntu neʼe. Se kongregasaun la konkorda malu, sira labele haklaken ho didiʼak. Maski apóstolu no katuas sira mak ema Judeu, maibé sira la hetan influénsia husi ema Judeu nia tradisaun no ema neʼebé habelar hanoin sira-neʼe. Duké halo nuneʼe, sira buka matadalan husi Maromak nia Liafuan no husu espíritu santu atu dirije sira. (Após 15:1, 2, 5-20, 28) Rezultadu mak saida? Jeová haraik bensaun ba sira-nia desizaun, kongregasaun nafatin iha unidade no dame, no sira kontinua haklaken.​—Após 15:30, 31; 16:4, 5.

12. Saida mak hatudu katak ohin loron Jeová nia organizasaun organiza ho didiʼak no iha dame?

¹² Iha tempu modernu. Jeová nia organizasaun hakaʼas an atu Maromak nia povu organiza ho didiʼak no ajuda sira atu iha dame. Iha tinan 1895, Livru Haklaken ba fulan-Novembru iha lian Inglés iha informasaun ho títulu “Dalan neʼebé loos no tuir arranju” neʼebé bazeia ba 1 Korinto 14:40. Informasaun neʼe hatete: “Apóstolu sira hakerek buat barak ba ema Kristaun iha tempu neʼebá kona-ba halo tuir arranju . . . Importante atu kontinua halo tuir ‘buat hotu neʼebé hakerek ona horiuluk kedas hodi hanorin ita’.” (Rom 15:4) Ohin loron, Jeová nia organizasaun hakaʼas an atu organiza kongregasaun Kristaun no ajuda sira atu iha dame hanesan ho ema Kristaun iha apóstolu sira-nia tempu. Porezemplu, se Ita tuir Estudu Livru Haklaken iha kongregasaun seluk ka iha nasaun seluk, Ita hatene oinsá sira halaʼo estudu neʼe no lisaun neʼebé sira atu estuda. Neʼe halo Ita sente kmaan. Ita bele iha unidade hanesan neʼe tanba deʼit Maromak nia espíritu dirije ita.​—Sof 3:9.

13. Kuandu ita hanoin kona-ba Tiago 3:17 neʼe book ita atu husu pergunta saida deʼit?

¹³ Buat neʼebé Ita bele halo. Jeová hakarak ninia povu atu ‘kaer metin nafatin unidade neʼebé sira hetan ona liuhusi espíritu hodi moris iha dame laran’. (Éf 4:1-3) Tan neʼe, husu ba Ita-nia an: ‘Haʼu ajuda kongregasaun atu iha unidade no buka dame ka lae? Haʼu halo tuir ema neʼebé dirije kongregasaun ka lae? Ema seluk  bele sadere ba haʼu, liuliu se haʼu iha responsabilidade iha kongregasaun ka lae? Haʼu tuir oras no prontu atu ajuda ema seluk ka lae?’ (Lee Tiago 3:17.) Se Ita presiza halo mudansa, halo orasaun hodi husu espíritu santu. Bainhira Ita husik espíritu santu atu fó influénsia ba Ita-nia hahalok, irmaun-irmán sira sei hadomi Ita liután no hafolin Ita.

14. Tuir Koloso 1:9, 10, oinsá Jeová hanorin ninia povu iha apóstolu sira-nia tempu?

¹⁴ Iha apóstolu sira-nia tempu. Jeová gosta tebes atu hanorin ninia povu. (Sal 32:8) Nia hakarak sira atu koñese nia, hadomi nia no moris ba nafatin nuʼudar ninia oan sira. Se Jeová la hanorin ita, ida-neʼe labele akontese. (João 17:3) Iha apóstolu sira-nia tempu, Jeová uza kongregasaun Kristaun atu hanorin ninia povu. (Lee Koloso 1:9, 10.) “Ajuda-naʼin” katak espíritu santu neʼebé Jesus promete, mós ajuda dixípulu sira. (João 14:16) Espíritu santu ajuda dixípulu sira atu komprende Maromak nia Liafuan no mós ajuda sira atu hanoin-hetan buat hotu neʼebé Jesus koʼalia no halo. Ikusmai, sira mós bele lee neʼe iha Evanjellu haat. Koñesimentu neʼe hametin ema Kristaun sira-neʼe nia fiar no mós hametin sira-nia domin ba Maromak, ninia Oan-Mane no ba malu.

15. Oinsá Ita rasik haree Jeová kumpre ninia promesa iha Isaias 2:2, 3?

¹⁵ Iha tempu modernu. Jeová fó-hatene nanis katak “iha loron ikus sira”, ema husi nasaun hotu sei laʼo nadodon ba ninia foho atu simu hanorin kona-ba ninia dalan sira. (Lee Isaias 2:2, 3.) Ita haree profesia neʼe sai loos daudaun. Ita bele haree katak adorasaun loos mak diʼak liu adorasaun falsu hotu. No Jeová fó ai-han espirituál barak ba ninia povu. (Isa 25:6) Liuhusi “atan laran-metin no matenek”,  Jeová fó ai-han neʼe iha dalan oioin hanesan publikasaun sira, diskursu, no vídeo ba labarik no mós vídeo seluk tan. (Mt 24:45) Ita sente hanesan Job nia belun Eliú neʼebé hatete: “Mestre ida-neʼebé mak hanesan ho [Maromak]?”​—Job 36:22.

16. Oinsá Ita bele hetan benefísiu husi Jeová nia hanorin?

¹⁶ Buat neʼebé Ita bele halo. Maromak nia espíritu santu bele ajuda Ita aplika buat neʼebé Ita lee no estuda iha Bíblia. Halo orasaun hanesan David: “Oh Jeová, hanorin haʼu kona-ba Ita-nia dalan sira. Haʼu sei laʼo tuir Ita-nia dalan lia-loos nian. Hametin haʼu-nia laran hodi hamtaʼuk Ita-nia naran.” (Sal 86:11) Kontinua lee no estuda Bíblia no mós publikasaun sira husi Jeová nia organizasaun. Maibé Ita lakohi atu halo ida-neʼe tanba deʼit hakarak hetan koñesimentu. Ita-nia objetivu mak atu hametin Ita-nia fiar ba lia-loos no aplika ida-neʼe. Jeová nia espíritu santu bele ajuda Ita atu halo ida-neʼe. Ita mós hakarak anima irmaun-irmán sira. (Ebr 10:24, 25) Tanbasá? Tanba sira mak Ita-nia família. Halo orasaun hodi husu Maromak nia espíritu atu ajuda Ita hatoʼo komentáriu iha reuniaun no ajuda Ita bainhira Ita simu knaar ruma iha reuniaun atu Ita bele halo neʼe ho didiʼak. Hodi halo nuneʼe, Ita hatudu ba Jeová no ninia Oan-Mane katak Ita hadomi sira-nia “bibi” neʼebé folin-boot.​—João 21:15-17.

17. Oinsá Ita bele hatudu katak ita apoia Jeová nia organizasaun?

¹⁷ Lakleur tan sei iha organizasaun ida deʼit iha mundu, neʼe mak organizasaun neʼebé Maromak dirije ho ninia espíritu. Tan neʼe, ho laran-manas serbisu hamutuk ho Jeová nia organizasaun. Hatudu katak Ita hadomi ema hotu hanesan Jeová hadomi sira hodi haklaken ba ema hotu neʼebé Ita hasoru. Jeová gosta buat hotu neʼebé organiza ho didiʼak no iha dame. Banati-tuir Jeová hodi ajuda kongregasaun atu iha unidade. No rona ba Ita-nia Mestre Boot hodi aproveita ai-han espirituál hotu husi Jeová. Ho ida-neʼe, bainhira Satanás nia mundu remata, Ita la sai taʼuk. Maibé Ita ho aten-brani sei serbí Jeová hamutuk ho ninia organizasaun.