1. Ino ty raha mila atao ty Kristiana vita badisa?

KRISTIANA vita badisa vao rehe? Naho izay, le azo antoke fa naseho’o tagnatreha o ndaty maro tie mino i Jehovah rehe sady vognogne hanompo aze miarake amy ty fandamina’e. * Faie mila ampitomboe’o avao ze finoa’o i Jehovah zay naho ty finoa’o tie ireke ty mitarike ty fandamina’e.

2-3. Ino iaby ty toetse i Jehovah trea mibaribary amy ty fomba itariha’e ty fandamina’e?

² Trea amy ty fomba itariha i Jehovah ty fandamina’e ty toetoe’e, ty raha safiri’e naho ty raha také’e amy ty mpanompo’e. Andao tika handineke tie ino iaby ty toetse i Jehovah trea mibaribary amy ty fomba itariha’e ty fandamina’e.

³ Voaloha’e, “Andrianagnahare tsy magnavakavake reke.” (Asa. 10:34) Nimey i Jehovah antika i Ana-dahi’ey ‘hisolovoigne antikagne’ noho ty hatea’e antika. (1 Tim. 2:6; Jaona 3:16) Mampiasa ty mpanompo’e areke ty Jehovah mba hitory i talily soay amy ze ndaty vognogne hitsanogne, satria io ty fomba agnampea’e iareo handrambe soa amo o solovoigne iohoe. Faharoe, Andrianagnahare tea filongoagne ty Jehovah. (1 Kor. 14:33, 40; Jak. 3:17) Tsy mahagaga areke naho voalamigne naho miharo saigne ty mpanompo’e. Fahatelo, “tea mampianatse ty Jehovah. (Isaia 30:20, 21) Izay ty mahavy ty fandamina’e miasa mafe mba hampianatse ty Saontsin’Andrianagnahare ty ndaty agnivo fiangonagne eo naho ty ndaty amy i fanompoagney ey. Akore ty nampisehoa ty Kristiana tamy taonjato voaloha’e naho ty mpanompo i Jehovah amo o androntikagne zao o toetse’e rehoe?  Akore ty agnampea ty fagnahy masigne antika naho fa miara miasa amy ty fandamina i Jehovah tika?

4. Ino ty raha nandilia i Jesosy o mpanonjohy ty lia’eò, arake ty Asan’ny Apostoly 1:8? Ino ty hagnampe iareo hahavita izay?

⁴ Tamy taonjato voaloha’e. Nanjare nanagne raha tamaegne o ndatio noho ty hafatse nitorie i Jesosy. (Lioka 4:43) Nandily ty mpanonjohy ty lia’e reke mba hanohy i asa natao’ey, le ty hitory “amy ty faritse fara’e lavitse amy ty tane toy iaby.” (Vakio ty Asan’ny Apostoly 1:8.) Faie tsy ho vita iareo amy ty hery iareo manokagne avao o asa iohoe fa tsy maintsy mila “mpagnampe” iareo, le i fagnahy masigne nampitamae i Jesosy iareoy.​—Jaona 14:26; Zak. 4:6.

5-6. Akore ty nagnampea ty fagnahy masigne o mpiana i Jesosio?

⁵ Le avy le nanomboke nitory i talily soay i mpanonjohy ty lia i Jesosy rey naho fa nahazo fagnahy masigne tamy ty Pentekosta taogne 33. Tsiela tafara izay, le ndaty agn’arivo eo ho eo ty nagneke i talily soay. (Asa. 2:41; 4:4) Naho fa nenjehegne ka iareo, le nangatake fagnampeagne amy i Jehovah mba hahafaha iareo hanohy i asay avao. Nivavake hoe izao iareo: “Anὸ ze hahavy anay mpanompo’o hitory ty saontsi’o amim-pahasahiagne.” Voka’e, nanjare feno fagnahy masigne iareo, le ‘nitory ty Saontsin’Andrianagnahare tamim-pahasahiagne.’​—Asa. 4:18-20, 29, 31.

⁶ Niatreke raha sarotse hafa ka o mpiana i Jesosy rehoe. Inogne zay? Mbe ty ila’e amy ty Soratse Masigne avao ty nisy tamy izay. Tsy nanagne fitaovagne fikarohagne manahake ty anagnantika amy izao ka iareo. Ie amy izao iareo nila nitory tamy ty ndaty nampiasa firehake isan-karaza’e. Faie ndra tie teo zay, le nazoto nitory avao iareo. Voka’e, am-polo’e taogne teo ho eo avao, le fa nahavita nitory i talily soay tamy ‘ze kila raha finorogne ambane i lagnitsey etoy’ iareo.​—Kol. 1:6, 23.

7. Akore ty nahafantara ty mpanompo i Jehovah tamy ty 100 taogne lasa ty raha nitaké’e tamy iareo, le ino ty natao iareo?

⁷ Amo o androntikagne zao. Mbe mitarike naho magnomey hery ty vahoa’e ka ty Jehovah amy izao. Akore ty anoa’e izay? Amy ty alala ty Baiboly. Haintikagne fa nampiasa ty fagnahi’e masigne reke naho fa nampanoratse io. Treantikagne agnate’e ao ty fanompoagne natao i Jesosy naho ty nandilia’e o mpiana’eo mba hanohy i asa natao’ey. (Mat. 28:19, 20) Fa tamy Jolay 1881 ty gazete toy ro nirehake tie: “Tsy ty hahavy antika hahazo voninahitse boake amo o ndatio ndra ho mpagnarivo ty anto’e nijobogna i Jehovah antika, fa ty hampiasa ze raha anagnantika mba hitoriagne i talily soay.” Izao ka ty rehafe ty bokekele tihoe Ia ty Nagnankignagne i Asay? (anglisy) naboake tamy 1919: “Maro ty asa mandigne antika. Faie asa i Tompo io, le ireke ty hagnomey hery antika mba hahavitantikagne aze.” Nanagne herim-po manahake i Kristiana tamy taonjato voaloha’e rey ka areke o rahalahintikagneo. Niasa mafe iareo satria natoky fa hagnampe iareo ty fagnahy masigne mba hahavità iareo hitory amy ty karaza o ndaty iaby. Matoky ka tika amy izao fa mbe hagnampe antika ty fagnahy masigne.

8-9. Ino iaby ty fitaovagne nampiasae ty fandamina i Jehovah mba hitoriagne i talily soay?

⁸ Maro ty fitaovagne ampiasae ty fandamina i Jehovah mba hitoriagne i talily soay. Agnisa izay retoagne: Boke naho gazete vita pirinty, video, ordinatera naho Internet. Nahatreavagne vokatse ka ty ni-fampiasagne ty fitaovagne retoagne: “Fampisehoagne An-tsare ze Raha Finorogne”, girafofone, tobile misy parilera naho radio. Mandika boke naho gazete amy ty firehake fara’e ze ty maro ka ty fandamina i Jehovah amy izao, sady mbe tsy nisy fandaminagne  nahavita raha hoe izay. Ty anto’e, tea i Jehovah haharey i talily soay ze kila o ndaty. Toe fa nisaontsie’e mialoha tie hotoriegne “amy ty firenena naho ty foko naho ty ndaty sambe hafa firehake vaho amy ty vahoake iaby” i talily soay. (Apok. 14:6, 7) Trea vata’e tie Andrianagnahare tsy magnavakavake ty Jehovah!

⁹ Akore ka ty amy i ndaty tsy le azo idiragne ty toeragne misy aze rey? Akore ty hahavy iareo haharey i talily soay? Nampea i Jehovah ty fandamina’e mba hahatrea hevetse hahafahagne hitory amy ty toeragne maro ndaty. Tamy 2001 ohatse, le neké ty Filan-keve-pitantanagne ty hampiasa ty mpitory a Frantsa agne ty kalesy fampirantiagne naho ty fomba hafa ahafahagne manao izay. Tafara tatoy, le nampiasa io ka ty mpitory amy ty tane ila’e agne. Nampiasaegne ta New York, a Etazonia agne o fomba fitoriagne iohoe tamy 2011, satria tsy le zoe an-tragno’e ao ty ankamaroa ty ndaty agne. Tena nisy voka’e soa ty fanoagne ireo. Tagnate ty tao’e raike eo ho eo, ohatse, le boke 102129 naho gazete 68911 ty nivoapetrake tamy izay, le ndaty 4701 ty nangatake hianatse Baiboly. Tsy ho nisy ze vokatse rey zay naho tsy teo ty fagnahy masy i Jehovah. Neké ty Filan-keve-pitantanagne areke ty hampiasaegne o fomba fitoriagne iohoe magneran-tane.

10. Ino ty toko’e hataontikagne mba hagnasoagne ty fanompoantika?

¹⁰ Ino ty toko’e hatao’o? Hararaoto ty fampiofagnagne mey i Jehovah antika am-pivoriagne agne. Miaraha miasa tsy tapake amy ty andiam-pitory misy azo. Afake magnampe azo iareo mba hagnasoa ty fanompoa’o sady azo’o tsikombegne ty modely iareo. Tohizo avao ty asa fitoriagne ndra tie misy ty olagne. Maniahy antika i andinin-teny fototse ty lahatsoratse toỳ fa tsy noho ty herintikagne manokagne ty hahavitantika hanao ty zoton’arofo i Jehovah fa noho ty fagnampea ty fagnahi’e masigne. (Zak. 4:6) Matokia areke fa hagnomey hery azo ty Jehovah satria asa’e o atao’o iohoe.

11. Akore ty natao ty Filan-keve-pitantanagne tamy taonjato voaloha’e naho fa tsy nitovy hevetse ty Kristiana tamy izay?

¹¹ Tamy taonjato voaloha’e. Niharo saigne ty Filan-keve-pitantanagne ta Jerosalema tagne naho fa niara-niasa. Voka’e, nanjare niharo saigne  ka ty vahoa i Jehovah. (Asa. 2:42) Nisy aly hevetse miomba ty savatse ohatse tamy taogne 49. Va’e ho nahavy o fiangonagneo tsy hahavita hitory o olagne iohoe satria nahavy iareo tsy hiharo saigne. Akore ty natao ty Filan-keve-pitantanagne tamy izay? Maregne fa Jiosy iaby o apostoly naho o androanavi-pagnahy ni-agnisa ty Filan-keve-pitantanagne tamy izay io faie tsy niantehetse tamy ty fomban-drazagne jiosy ndra ty fampianaragne jiosy iareo naho fa namaha i olagney. Niantehetse tamy ty Saontsin’Andrianagnahare naho ty fagnahy masigne iareo. (Asa. 15:1, 2, 5-20, 28) Voka’e, nitahie i Jehovah ty fanapaha-kevetse nirambese iareo, le niharo saigne indraike o fiangonagneo sady afake nanohy i asa fitoriagney.​—Asa. 15:30, 31; 16:4, 5.

12. Ino ty magnaporofo fa miharo saigne ty vahoa i Jehovah amy izao?

¹² Amo o androntikagne zao. Ampea i Jehovah amy ty alala i fandamina’e ka ty vahoa’e amy izao mba hiharo saigne. Nisy lahatsoratse tihoe “Manoa raha Amim-pahamendrehagne Naho Am-pilaminagne” niboake tamy i Fitalakesan-davy i Ziona Magnambara ty Fagnatreha i Kristy tamy 1895. Ty 1 Korintianina 14:40 ty andinin-teny fototse o lahatsoratse iohoe. Izao ty voarehake ao: “Maro ty raha nisorate o apostolio hoahy o Kristiana tamy ty taonjato voaloha’eo mba handrisihagne iareo hanao raha am-pilaminagne... Tena ilaentikagne ty mankatò irey satria ‘ze raha sinoratse taloha, le sinoratse hianarantikagne.’” (Rom. 15:4) Mikezake mafe ka ty fandamina i Jehovah amy izao mba hagnampeagne o fiangonagneo hiharo saigne, manahake o Kristiana tamy taonjato voaloha’eo. Intoy misy ohatse magnaporofo izay. Naho ihe mandeha magnatreke fivoriagne amy ty fiangonagne hafa ndra an-tane hafa agne, le mitovy avao ty fomba fitarihagne o fianaragne Fitalakesan-davitseo sady mitovy avao ka ty lahatsoratse ianaragne. Le avy le mahatsapa areke rehe tie hoe amy i fiangonagne misy azoy agne avao! Tsy ho niharo saigne hoe izay tika naho tsy teo ty fagnahy masy i Jehovah nagnampe antika.—Zef. 3:9.

13. Ino ty fagnonteneagne mila saintsaignentikagne mifandrambe amy ty raha rehafe ty Jakoba 3:17?

¹³ Ino ty toko’e hatao’o? Tea i Jehovah naho ‘mikezake mafe’ ty vahoa’e mba “hitagne ty  maha raike ty fagnahy agnate ty filongoagne, i fehe mampiharo raikey.” (Efes. 4:1-3) Saintsaigno areke zao: ‘Mikezake hampisy filongoagne naho firaisan-tsaigne agnivo fiangonagne eo vao raho? Mankatò ze tinendre hitarike agnivo fandaminagne eo vao raho? Manao soa ty andraikiko agnivo fiangonagne eo vao raho? Magnaja fotoagne naho vognogne hagnampe ty hafa vao raho? (Vakio ty Jakoba 3:17.) Naho tsapa’o tie misy raha mila hasoae’o, le mangataha fagnahy masigne amy i Jehovah. Naho engà’o hamolavola azo ty fagnahy masigne, le hihasoa ty toetse’o sady vao mainke ho tea azo o rahalahio naho o rahavaveo sady hihevetse azo ho sarobily.

14. Inogne ty raha nila nanagna o Kristiana tamy taonjato voaloha’eo arake ty Kolosianina 1:9, 10, le akore ty natao i Jehovah mba hahavy iareo hanagne izay?

¹⁴ Tamy taonjato voaloha’e. Tena tea i Jehovah ty mampianatse o vahoa’eo. (Sal. 32:8) Tea’e hahafantatse naho ho tea aze iareo sady tea’e hahazo havelogne nainai’e satria ana’e tea’e. Faie sarotse ty hahatanterake zay iaby naho tsy mampianatse iareo reke. (Jaona 17:3) Ty fiangonagne Kristiana zao ty nampiasae i Jehovah mba hampianatse ty vahoa’e tamy ty taonjato voaloha’e. (Vakio ty Kolosianina 1:9, 10.) Tena nagnampe iareo ka i “mpagnampe” nampitamae i Jesosy iareoy. Tsy inogne zay fa ty fagnahy masigne. (Jaona 14:16) Io ty nagnampe o mpiana i Jesosy rehoe hahatakatse ty Saontsin’Andrianagnahare naho hahatadidy ty raha nirehafe i Jesosy naho natao’e. Sinoratse amy i Filazantsaray ao ty ankamaroa i raha rey naho fa tafara tatoy. Nagnampe iareo hampitombo ty finoa iareo naho ty hatea iareo i Jehovah naho i Ana-dahi’ey i fahalalagne nanagna iareo rey sady nagnampe iareo hifankatea ka.

15. Akore ty nahatreava’o fa nitanterahe i Jehovah i raha nampitamae’e amy Isaia 2:2, 3 aoy?

¹⁵ Amo o androntikagne zao. Fa nisaontsy ty Jehovah tie “am-para’e agne”, le hisy vahoake  boake amy ty firenena maro havori’e amy i vohi’e Masigney agne. Hampianaregne ty lala’e o ndaty rehoe. (Vakio ty Isaia 2:2, 3.) Trea tie tanterake vata’e zay amy izao. Avory i Jehovah amy i vohi’e Masigney agne ndra amy ty fivavahagne maregne ze matahotse aze. Trea areke tie tena miambake amo o fivavahan-disò ty fivavahagne maregne amy izao. Maro ka ty fahalalagne mey i Jehovah ty mpanompo’e. (Isaia 25:6) Ty “mpanompo mahihitse naho mahimbagne” ty ampiasae’e mba hagnomey antikagne izay sady isan-karaza’e ty fomba anoa’e aze. Amy ty alala ty boke naho gazete, lahajaka naho video isan-karaza’e. (Matio 24:45) Hoe ty Eliho nama i Joba: “Ia ty Mpagnanatse mitovy aman’Andrianagnahare?” (Joba 36:22) Tsy hoe izay ka vao ty tsapa’o?

16. Ino ty toko’e hatao’o mba hahavy azo handrambe soa amy ty fampianaragne mey i Jehovah?

¹⁶ Ino ty toko’e hatao’o? Afake magnampe azo hampihatse ze raha vakie’o naho ianara’o amy Baiboly ao ty fagnahy masigne. Mivavaha areke manahake ty mpanao salamo toy tie: “O Jehovah, ampianaro ty lala’o raho. Handeha amy ty hamaregna’o raho. Anò ze hatahorako ty tahina’o amy ty foko.” (Sal. 86:11) Mamakia ka Baiboly naho i boke aman-gazete mey i Jehovah amy ty alala i fandamina’e rey. Faie tsy ty hampitombo ty fahalala’o avao ty toko’e ho tanjo’o. Mikezaha handrambe am-po i hamarenagne rey, le ampiharo amy ty fiaigna’o. Afake magnampe azo hahavita izay ty fagnahy masigne. Mikezaha ka hampahery o mpiara-manompò satria iareo ty keleia’o ara-pagnahy. (Heb. 10:24, 25) Mangataha ka fagnahy masigne mba hagnampe azo hahavita hagnomey toin-drehake mampahery naho fa mivory sady mba hahavita’o hagnomey ty fara’e soa naho fa manao anjara rehe. Ireo ty ampisehoa’o amy i Jehovah naho amy i Ana-dahi’ey fa tena tea’o o “agnondry” iareo sarobily reo.​—Jaona 21:15-17.

17. Akore ty ampisehoantika fa manohagne ty fandamina i Jehovah tika?

¹⁷ Tsy ho ela, le ty fandamina i Jehovah tarihe ty fagnahi’e masigney avao ty ho sisa ambone tane etoy. Mikezaha areke mba hiara-hiasa amo o fandamina’e iohoe. Asehò fa tea’o ze kila ndaty, le itorio i talily soay iareo. Anò ze hampisy firaisan-tsaigne agnivo fiangonagne eo. Manahake i Jehovah rehe naho manao ireo. Tsanogno i Mpagnanatse Lahibey Tsy Misy Hoe’ey, le rambeso ze hanegne ara-pagnahy mei’e. Ho bey herim-po rehe amy izay naho fa horavagne ty tontolo i Satana toy. Tsy hatahotse ka rehe sady ho vita’o ty tsy hivalike amy i Jehovah manahake ty ndaty manompo aze agnivo i fandamina’e eo.