NGEREN U TIMEN SHA MI 43
Yehova Ngu Hemen Nongo Na
“Ka sha agee ga, ka sha utaha kpaa ga, kpa ka sha Jijingi Wam, kape TER u akum a Sha A kaa ne.”—SEK. 4:6.
ICAM 40 Ka An Se Civiri?
KWAGH U I TIM SHA MI KEN NGEREN NE YÔ *
1. Ka nyi i gbe u Mbakristu mba ve er batisema la vea za hemen u erene?
U ER batisema? Aluer u er yô, u tese ken i gbar je wer, u na Yehova jighjigh shi u kegh a kegh iyol u civir un imôngo vea nongo na. * Nahan kpa, gba u u za hemen u taver jighjigh u u ne Yehova la. Shi gba u u seer lun a jighjigh wer nongo u Yehova ngu eren tom u a soo ér u er la.
2-3. Ka sha igbenda i nyi nahan, Yehova a lu hemen nongo na nyiana? Tese ikyav.
2 Nyian ne, Yehova ngu hemen nongo na sha gbenda u u tese injaor i a lu la, man kwagh u a we ishima u eren kua atindi a na a perapera la. De se time sha aeren a Yehova atar a se fatyô u nengen a mi tseer tseer ken nongo na yô.
3 Kwagh u hiihii yô, “Aôndo sangen a sange ga.” (Aer. 10:34) Dooshima yange mgbegha Yehova na Wan na hingir “ipaan sha ci u ior cii.” (1 Tim. 2:6; Yoh. 3:16) Yehova ka a tindi ior nav sha u ve za pase loho u dedoo hen hanma or u nan soo u ungwan cii, sha nahan yô, ngu wasen hanma or u nan soo u zuan a mtsera ken ipaan la cii, sha er nana war yô. Kwagh u sha uhar yô, Yehova ka Aôndo u a soo ér i eren kwagh nzughul nzughul ga, shi a soo bem yô. (1 Kor. 14:33, 40) Sha nahan yô, doo u se fa ser mbacivir un a lu ior mba ve eren kwagh sha inja sha inja shi ve lu ken bem yô. Kwagh u sha utar yô, Yehova ka ‘Ortesen Uhemban.’ (Yes. 30:20, 21) Ka nahan ve nongo na ka u hemba veren ishima sha u tesen ior Mkaanem nam, ka Bibilo je la, ken tiônnongo man ken kwaghpasen ye. Yange lu u or a fatyô u nengen a aeren a Yehova a atar la tseer tseer ken tiônnongo u Kristu u sha ayange a mbaapostoli la nena? U nenge a aeren ne tseer tseer ken atô u ior mba Yehova sha ayange ase ne nena? Man icighan jijingi una fatyô u wasen we, er u lu civir Yehova vea nongo na imôngo nyian ne nena?
AÔNDO KA U SANGEN A SANGE GA
4. Er i pase ken Aerenakaa 1:8 nahan, Yesu yange kaa a mbadondon un ér ve er nyi, man lu iwasen i nyi gba u a na ve?
4 Sha ayange a mbaapostoli. Loho u Yesu yange pase la na uumace cii ishimaverenkeghen. (Luka 4:43) Yange kaa a mbahenen nav ér ve za hemen a tom u un hii la, ve er u zan zan ve ar sha “ajiir a hemban gban ica sha tar.” (Ôr Aerenakaa 1:8.) Nahan kpa lu u vea fatyô u eren tom ne sha tahav vev tseegh ga. Yange gba u icighan jijingi “orwasen” u Yesu tôndo zwa ér a tindi ve a mi la, una wase ve.—Yoh. 14:26; Sek. 4:6.
5-6. Ka sha nyi igbenda nahan, icighan jijingi wase mbadondon Yesu?
5 Mbadondon Yesu yange ve ngohol icighan jijingi shon sha iyange i Pentekosti u inyom i 33 la. Sha iwasen i icighan jijingi la yô, heregh ave ave je ve hii u pasen kwagh. Shighe kar kpuaa yô, ior udubu imôngo ngohol loho u dedoo la. (Aer. 2:41; 4:4) Shighe u ior va mough hii u tôvon mbahenen mban a ican la kpa, ve cia ve de u pasen kwagh ga, kpa ve sôn Aôndo ér a wase ve. Yange ve er msen ve kaa ér: “Na ikpan you i za hemen u pasen loho wou gbar gbar.” Nahan ve cii i iv ve a icighan jijingi shi ve za hemen u “pasen loho u Aôndo gbar gbar.”—Aer. 4:18-20, 29, 31.
6 Mbadondon Yesu mban shi yange ve tagher a mbamzeyol mbagen kpaa. Ikyav i tesen yô, sha ayange la, ukôpi mba Ruamabera lu kpishi ga. Shi yange ve lu a ityakeda i pasen Bibilo er se lu a mi nyian nahan ga. Shi yange gba u mbahenen mban vea pase ior mba ve lamen ijô kposo kposo yô, loho u dedoo. Er mbahenen mban tagher a mbamtaver mban nahan cii kpa, ve er kwagh u lu inja er a tsa a fatyô u eren ga yô; ken atô u anyom a kuman er 30 nahan tseegh, ve pase loho u dedoo shin tar “hen akaa a i gbe a cii.”—Kol. 1:6, 23.
7. Mba civir Yehova yange ve fa kwagh u Aôndo a soo ér ve er la ica gba je, anyom kar hegen hemba 100 nahan nena, man ve er nena?
7 Sha ayange ase ne. Sha ayange ne kpa, Yehova ngu hemen ior nav, shi nan ve agee a eren ishima na. Hemen ior nav, gayô tesen ve kwagh u vea er la, ken Bibilo i i lu Mkaanem nam ma icighan jijingi yange na i nger la. Ka se ôr kwagh u tom u Yesu hii la ken Bibilo, kua tindi u wa mbadondon un ér ve za hemen a tom shon la. (Mat. 28:19, 20) Ka nahan ve er ken uwer u Julai inyom i 1881 la je, magazin ne ôr kwagh nahan ye. A kaa ér: “I yila se, shin i shigh se mkurem sha u ior ve va naan se icivir shin se va hingir mba inyarev ga, kpa ka u se na hanma kwagh u se lu a mi cii sha u pasen loho u dedoo.” Antakeda u To Whom the Work Is Entrusted (Mba i Ne Ve Tom u Pasen Kwagh La) u yange i gber ken inyom i 1919 la, kaa ér: “Tom yô ngee tsô, kpa ka u Ter nahan una na se agee se er u.” Anmgbianev mban yange ve taver ishima, ve er tom kpoghuloo er Mbakristu mba sha ayange a mbaapostoli la nahan. Ve lu a vangertiôr ér icighan jijingi una wase ve, vea pase hanma or cii kwagh. Nyian ne kpa, se na jighjigh ser, icighan jijingi una wase se u eren nahan.
Nongo u Yehova ka u er tom a ikyav mbi tomov mbi hemban doon cii mbi ve zough a mi yô, u samber a loho u dedoo (Nenge ikyumhiange i sha 8-9)
8-9. Ka igbenda igen i nyi nahan nongo u Yehova u er tom a mi sha er a seer eren tom u pasen kwagh nee?
8 Nongo u Yehova ka u er tom a ikyav mbi tomov mbi hemban doon cii, mbi ve zough a mi yô u samber a loho u dedoo. Ikyav mbi tomov mbin ka ityakeda man vidio i “Photo-Drama of Creation” (Foto u Iniumbe i Kwagh u Igbetar) man ugeramafon man umato mba yôôn angwe u Tartor man uporogeram mba sha redio shi semberee ne je yô, sha kômputa man Intanet. Shi nongo u Yehova ngu geman akaa ken ijô kpishi, man i gbe je mba a gema kwagh ken ijô i ngeen iyenge nahan ga! Mba eren kwagh ne sha ci u nyi? Ka sha u ior cii vea fatyô u ungwan loho u dedoo ne ken zwa ve yô. Yehova sangen a sange ga; yange tsengaôron ér a pase loho u dedoo ne “hen hanma ikyurior man hanma ipyaven man hanma zwa man hanma nongoior” cii. (Mpa. 14:6, 7) A soo ér hanma or cii nana ungwa loho u Tartor ne.
9 Hide di ior mba se fetyô u pasen ve kwagh ga, sha ci u alaghga mba sha uya mba mbakuran ka ve lu dôsôô la di ye? Sha gbar la kpa Yehova wase ior nav, ve due a igbenda kposo kposo i pasen kwagh ken igbar, sha er vea fatyô u pasen ambaaior la kwagh yô. Ikyav i tesen yô, ken inyom i 2001 la, Mbahemenev mba Shin Itine na ian ér anmgbianev mba ken tar u Frans ve hii kwaghpasen u ka i wa ityakeda shin akeke i ver la, kua shi igbenda igen i taren ityakeda kpaa. Shighe kar yô, anmgbianev mba sha ajiir agen kpa hii u dondon gbenda u pasen kwagh ne. Man kwagh u dedoo due ken kwagh ne. Shi ken inyom i 2011 la, i due a gbenda ugen u he u pasen kwagh ken geri u New York City sha avegher a ior ve hembe ngeen la ken tar u Amerika. Inyom i hiihii i i hii kwaghpasen sha gbenda u he ne la, i na ityakeda kera 102,129 man umagazin 68,911. Shi ior mba kuman 4,701 nahan, kaa ér i va hen Bibilo a ve! Ikyav tese wang ér lu icighan jijingi u Yehova je lu suen tom ne ye. Sha nahan yô, Mbahemenev mba Shin Itine na ian ér anmgbianev sha tar cii vea fatyô u hiin kwaghpasen u ka i wa ityakeda shin akeke i ver la, kua shi igbenda igen i taren ityakeda la cii.
10. Ka nyi se er ve se hemba fan u pasen kwagh shi tesen ioro?
10 Kwagh u u fatyô u eren yô. Yehova ka a tsaase se ken mbamkombo asev mba Mbakristu sha er se fa u pasen kwagh yô. Nahan dondo ityesen la. Zaan kwaghpasen vea annongo wou u duen kwaghpasen la hanma shighe. Anmgbianev mba hen annongo wou la vea fatyô u wase we, u hemba fan u pasen kwagh shi tesen ior shi ikyav ve i dedoo la ia taver we ishima kpaa. Wea tagher a mbamtaver kpa de yen ishima ga, za hemen u pasen kwagh her. Er ivur i ngeren ne a har sha mi la i tese nahan, se mba eren ishima i Aôndo ka sha tahav asev ga, kpa ka icighan jijingi ngu a na se agee a eren kwagh ne ye. (Sek. 4:6) Kera ga je kpa, se mba eren ka tom u Aôndo.
YEHOVA KA AÔNDO U EREN KWAGH NZUGHUL NZUGHUL GA SHI KA U BEM
11. Mbahemenev mba shin itine yange ve nôngo kpoghuloo, sha er ior mba Aôndo vea za hemen u eren kwagh ken mzough man sha injaa sha inja sha ayange a mbaapostoli la nena?
11 Sha ayange a mbaapostoli. Mbahemenev mba shin itine mba ken Yerusalem yange ve nôngo kpoghuloo sha er ior mba Aôndo vea eren kwagh ken mzough sha inja sha inja shi vea lu ken bem yô. (Aer. 2:42) Ikyav i tesen yô, shighe u zayol due sha ikyaa i icôngo, er ken inyom i 49 nahan la, icighan jijingi yange wase mbahemenev mba shin itine u nengen sha ikyaa ne. Luun er ior za hemen u lun a mbamnenge kposo kposo sha ikyaa ne ken tiônnongo yô, alaghga kwagh ne ma na ma i kera fatyô u eren tom u pasen kwagh la tsembelee ga. Er mbaapostoli man mbatamen mban lu Mbayuda nahan kpa, mayange ve lumun u dondon ieren ityôô i Mbayuda shin dondon mba ve lu samber a ityesen ne la ga. Yange ve dondo kwagh u Mkaanem ma Aôndo ma kaa la, shi ve de ér icighan jijingi na a wase ve, sha er vea tsua kwagh u vough yô. (Aer. 15:1, 2, 5-20, 28) Nahan lu nyi i due ken kwagh laa? Yehova yange ver kwagh u ve tsua la, nahan bem za hemen u lun ken atôônanongo, ve lu eren kwagh ken mzough, shi loho u dedoo za hemen u samber.—Aer. 15:30, 31; 16:4, 5.
12. Ka nyi i tese ér nongo u Yehova ngu eren kwagh sha inja sha inja nyian shi ngu ken beme?
12 Sha ayange ase ne. Nongo u Yehova wase ior nav u eren kwagh sha inja sha inja shi lun ken bem. Ken inyom i 1895 la, i gber ngeren ugen ken magazin u Zion’s Watch Tower and Herald of Christ’s Presence (Iyoukura i Shion man Mtemtor u Kristu) u Novemba 15. Ngeren la lu a itinekwagh ér, “Decently and in Order” (I̱ Eren Akaa Tsembelee, sha Inja sha Inja.) Ngeren la yange har sha 1 Mbakorinte 14:40. Ngeren shon kaa ér: “Yange mbaapostoli nger akaa kpishi ken tiônnongo u sha ayange a ve la, sha kwagh u eren kwagh sha inja sha inja . . . Sha nahan yô, gba hange hange u se za hemen u dondon akaa a ‘yange i nger a sha u se̱ zua a ityesen ker’ la.” (Rom. 15:4) Nyian ne kpa, nongo u Yehova za hemen u eren tom kpoghuloo sha er atôônanongo a Mbakristu a a eren kwagh sha inja sha inja shi a a lu ken bem yô, vough er sha ayange a mbaapostoli la kpa lu nahan. Ikyav i tesen yô, aluer u nyôr Iyoukura i Henen vea tiônnongo ugen, aluer ka tiônnongo u ken tar ugen je kpa, u fa er a hen Iyoukura shon yô, shi u fa ngeren u a lu henen la kpaa. Nahan kwagh u nyian we ishima una lu ga! Ka jijingi u Aôndo tseegh una na ior vea fatyô u eren kwagh ken mzough nahan ye.—Sef. 3:9.
13. Ka mbampin mba nyi nahan i doo u se pine ayol a ase zum u se ôr Yakobu 3:17 laa?
13 Kwagh u u fatyô u eren yô. Yehova soo ér ior nav ve ‘za hemen u lun ken mzough u jijingi a wase ve ve lu ker la.’ (Ef. 4:1-3) Nahan pine iyol you wer: ‘M nôngon u van a mzough man bem ken tiônnongo kpa? M ongo imo i mba ve lu hemen la kpa? Mbagenev vea fatyô u nan mo jighjigh hemban je yô, aluer m ngu sha iantom ken tiônnongo kpa? M ze hen kwagh faa shi m wasen mbagenev shi ka m kegh a kegh iyol u eren tom sha ci u mbagen kpa?’ (Ôr Yakobu 3:17.) Aluer u nenge wer doo u u seer nôngon sha avegher agen yô, er msen sôn Yehova a na u icighan jijingi na. Aluer u de wer icighan jijingi a hemen we sha hanma kwagh u u eren cii yô, kwagh la una na u seer doon anmgbianev ou ishima shi u hemba gban ve kwagh.
YEHOVA TESEN SE SHI NE SE AKAA A KWAGH A GBE SE A MI YÔ
14. Er i ôr ken Mbakolose 1:9, 10 nahan, Yehova yange wase ior nav mba sha ayange a mbaapostoli la, ve zua a mfe u vough u sha kwagh u awashima na nena?
14 Sha ayange a mbaapostoli. Ka i doo Yehova tsung u tesen ior nav. (Ps. 32:8) A soo ér mbayev nav mba ve doo un ishima ne, ve fa un shi ve soo un shi ve lu uma gbem sha won. Nahan kpa, aluer A tese ve ga yô, kwagh a fatyô u eren nahan ga. (Yoh. 17:3) Yehova yange er tom a tiônnongo u Kristu u tesen ior nav sha ayange a mbaapostoli la. (Ôr Mbakolose 1:9, 10.) Icighan jijingi u a lu “orwasen” u Yesu tôndo zwa ér a tindi mbahenen a mi la, yange wase ve. (Yoh. 14:16) Icighan jijingi yange wase mbahenen mbara seer kaven Mkaanem ma Aôndo, shi umbur ve akaa a Yesu ôr shi er la cii, er i va nger ken ityakeda ivangeli la nahan. Mfe la yange wase Mbakristu mba sha ayange a mbaapostoli mban jighjigh ve u nan seer taver shi Aôndo man Wan na seer doon ve ishima shi ve seer soon ayol ave kpaa.
15. Ka sha nyi igbenda nahan Yehova a lu kuren ityendezwa i a er ken Yesaia 2:2, 3 laa?
15 Sha ayange ase ne. Yehova yange tsengaôron ér “sha ayange a masetyô yô” ior mba ken akuraior cii, vea tim nongo kôndon lugh lugh sha uwo na u sha injakwagh la, sha er una tese ve igbenda Na yô. (Ôr Yesaia 2:2, 3.) Se mba nengen er kwaghôron u profeti la a lu kuren sha mi yô. Se fatyô u nengen a kwagh ne wang, er mcivir u mimi a hembe doon a hanma mcivir u aiegh cii yô. Shi Yehova ngu tesen ior nav akaa kpishi a ken Bibilo! (Yes. 25:6) Ngu eren tom a “wanakiriki u jighjigh man u fan kwagh,” u tesen se akaa a ken Bibilo ne sha igbenda kpishi. Ikyav i tesen yô, ka se ôr ken ungeren shi se ungwa akaaôron shi se nenge ukatun man uvidio. (Mat. 24:45) Ka i lu se vough er ngise lu Elihu, ijende i Yobu la nahan; yange kaa ér: ‘Ka an nan lu ortesen er [Aôndo] nahana?’—Yobu 36:22.
Lu a vangertiôr wer ka mimi je ne shi dondo un ken uma wou (Nenge ikyumhiange i sha 16) *
16. U er nan ve u zua a mtsera ken ityesen i Yehova laa?
16 Kwagh u u fatyô u eren yô. Jijingi u Aôndo una wase u, u eren tom a kwagh u u ôr shi u hen ken Mkaanem Nam la ken uma wou. Er msen er ngise orpasalmi kpa er nahan ér: “TERE, tesem gbenda Wou, sha u me zende ken mimi Wou; sôr ishima yam i̱ hingir i môm sha u cian iti You.” (Ps. 86:11) Nahan za hemen u ôron Bibilo shi henen ityakeda i pasen Bibilo i nongo u Yehova u gberen la. Nahan kpa umbur wer awashima wou yô, ka di u zuan a mfe tseegh ga. Gba u mimi u u lu henen la, una nyôr u ken ishima shi u dondon kwagh u u henen la ken uma wou kpaa. Jijingi u Yehova una wase u, u eren kwagh ne. Shi gba u u taver anmgbianev ou ishima. (Heb. 10:24, 25) Sha ci u nyi? Sha ci u ne cii ne mba tsombor môm u mbacivir Yehova. Er msen sôn Yehova a na jijingi na a wase u sha er zum u u ze mbamkombo yô, u na mbamlumun mba injaav yô, shi a wase u sha er zum u u lu a asaimenti shin kwaghôron yô, u nôngo sha afatyô wou cii u er tsembelee yô. Aluer u ngu eren nahan yô, u tese Yehova man Wan na wer “iyôngo” ve la doo u ishima kpishi.—Yoh. 21:15-17.
17. Ka sha igbenda i nyi nahan u tese wer u ngu suen nongo u Yehova sha mimi?
17 Ica a gba ga tsô, a lu nongo u jijingi u Aôndo a lu hemen u ne tseegh ua mase shin sha tar ye. Sha nahan yô, eren tom sha gbashima vea nongo u Yehova. Tese wer ior cii doo u ishima er ve doo Aôndo nahan sha u pasen hanma or u u zough a nan cii loho u dedoo. Dondo ikyav i Aôndo i eren kwagh sha inja sha inja, man ken bem la sha u nôngon wer tiônnongo a lu ken mzough. Shi keghen ato a Ortesen wou Uhemban la, sha u henen hanma kwagh u a tesen ior nav cii. U er nahan yô, zum u a timin tar u Satan ne la, we u cia ga. Kpa u gema u lu imôngo a mba ve lu civir Yehova sha mimi vea nongo na la a mciem shio.
ICAM 3 Ne Se Vangertiôr man Agee man Ishimaveren
^ Ikyum. 5 U na jighjigh a ishima i môm wer Yehova ngu hemen nongo na nyian ne kpa? Ken ngeren ne, se lu timen nengen er Yehova yange hemen tiônnongo u Kristu u sha ayange a mbaapostoli la yô, kua er a ze hemen u hemen ior nav sha ayange ne la kpaa.
^ Ikyum. 1 ISHEMBER I I TE IWANGER SHA MI YÔ: Nongo u Yehova la ngu a avegher ahar, vegher u sha man vegher u shin tar. Nahan kpa, ken ngeren ne yô, ishember i “nongo” la ngi ôron ka kwagh u vegher u nongo u Yehova u shin tar la.
^ Ikyum. 52 NGEREN U PASEN FOTO: Anmgbian u kwase ugen u a lu pania yô, a nenge uvidio nahan a nenge er mbagenev ve lu za eren tom ken ityar i kwagh a hembe gban sha mbapasenkwagh yô, nahan un kpa kwagh la mgbegha un u dondon ikyav ve la. A er kwagh u wa ishima u eren la, ngu za pasen kwagh hen ijiir i kwagh a hembe gban sha mbapasenkwagh yô.
