1. Niinzi nzyayelede kuchita muKristu ubbabbatizidwe?

WAKABBABBATIZIGWA na? Kuti kakuli boobo, wakatondeezya antanganana kuti ulaalusyomo muli Jehova akuti uyanda kuba mumbunga yakwe. * Nikuba boobo, weelede kwiinkilila kunembo kusimya lusyomo lwako kulinguwe. Weelede kusyoma amoyo woonse kuti Jehova ulikubelesya mbunga yakwe kuti achite nzyayanda mazubaano.

2-3. Amba zintu nzitubona mumbunga yaJehova zitondeezya mbabede.

² Mazubaano, Jehova uzulwida mbunga yakwe munzila iitondeezya buntu bwakwe, makanze aakwe amilawu yakwe. Atubone zintu zitatu nzitubona mumbunga yaJehova zitondeezya mbabede.

³ Chakusaanguna, “Leza tasalululi.” (Mil. 10:34) Luyando lwakapa kuti Jehova ape Mwanaakwe kuti abe “cinunuzyo . . . cabantu boonse.” (1 Tim. 2:6; Joh. 3:16) Jehova ubelesya bakombi bakwe kuti bakambawuke makani mabotu, alubo eezi zigwasya bantu biingi kuti bagwasigwe achinunuzyo. Chabili, Jehova nguLeza waluumuno alubo uubambikene. (1 Kor. 14:33, 40) Nkinkaako bakombi bakwe beelede kumubelekela kababambikene alubo kabali aluumuno. Chatatu, Jehova ‘Mwiiyi wesu Mupati.’ (Is. 30:20, 21) Eezi nzizyo zipa kuti mbunga yakwe ibeleke changuzu kuyiisya Bbayibbele mumbungano amumulimu wakukambawuka. Zintu eezi zitatu zitondeezya mbabede Jehova zyakaboneka biyeni mumbungano yamaKristu  aakusaanguna? Ziboneka biyeni mazubaano? Mbukunga uli mumbunga yaJehova mazubaano, muuya uusalala nga ulakugwasya biyeni?

4. Kweendelana a Milimo 1:8, nguuli mulimu Jesu ngwaakapa batobeli bakwe alubo niinzi chakabagwasya?

⁴ Muchiindi chamaKristu aakusaanguna. Mulumbe Jesu ngwaakali kukambawuka wakabapa bulangilizi bantu boonse. (Lk. 4:43) Jesu wakabuzya batobeli bakwe kuti bayinkilile kunembo kabali kukambawuka “kusikila kumasena aakulamfwu kapati aanyika.” (Bala Milimo 1:8.) Pesi teebakachita mulimu ooyu amanguzu aabo pe. Bakagwasigwa amuuya uusalala, “mugwasyi” ngubakasyomezegwa aJesu.—Joh. 14:26; Zek. 4:6.

5-6. Muuya uusalala wakabagwasya biyeni batobeli baJesu?

⁵ Batobeli baJesu bakatambula muuya uusalala muPentekkoste yamu33 C.E. Kabagwasigwa amuuya uusalala, bakasaanguna kukambawuka alubo muchiindi chifwiifwi bantu biingi bakatambula makani mabotu. (Mil. 2:41; 4:4) Nibakakazigwa, teebakayoowa pe pesi bakakumbila Jehova kuti abagwasye. Bakakomba kabati: “Kopa bazike bako kuzumanana kukanana ijwi lyako cabusicamba.” Jehova wakabapa muuya uusalala alubo bakazumanana “kwaamba ijwi lya Leza cabusicamba.”—Mil. 4:18-20, 29, 31.

⁶ Kuli bumwi buyumu-yumu mbubakali aabo basikwiiya baJesu. Muchikozyano, kwakali makkopi aaMagwalo mache. Teekwakali mabbuku apandulula Magwalo mbuli ngitulaawo. Alubo basikwiiya bakeelede kukambawukila bantu baambuula milaka iisiyene-siyene. Nikuba kuti bakali kuswaanana abuyumu-yumu oobu, basikwiiya aaba basungu bakabeleka changuzu. Muminyaka miche biyo, bakali bakambawuka “kuzilenge zyoonse zili ansi aajulu.”—Kol. 1:6, 23.

7. Kwaminyaka yiinda ku100 yayinda, bakombi baLeza bakaziba biyeni nzyaakali kuyanda kuti bachite alubo bakachita biyeni?

⁷ Mazubaano. Jehova ulikwiinkilila kunembo kuzulwida akubapa manguzu bakombi bakwe. Utuzulwida kabelesya Jwi lyakwe lyakalembwa kwiinda mukugwasigwa amuuya uusalala. MuJwi lyakwe, tujana makani aali atala amulimu waJesu amulawu wakukambawuka ngwaakapa batobeli bakwe. (Mt. 28:19, 20) Ngaziyakulinda yamuJuly 1881 yakati: “Jehova taakatusala naakuti kutunanika kuti tulemekwe aabantu naakuti tube bantu bonotede, pesi wakatusala kuti tubelesye zyoonse nzitulaazyo kuti tukambawuke makani mabotu.” Kabbuku kakapupululwa mu1919 kategwa To Whom the Work Is Entrusted kakati: “Mulimu ooyu ubonekaanga mupati pesi ngwaMwaami alubo uyootupa manguzu aakuti tuuchite.” Mbuli maKristu aakusaanguna, bakwesu aaba bakali aachibindi alubo bakabeleka changuzu kabasyoma kuti muuya uusalala wakali kuyoobagwasya kukambawukila bantu bamisyobo yoonse. Andiswe tusyoma kuti muuya uusalala uyootugwasya.

8-9. Mbunga yaJehova yakabelesya zili nzila kuti ikambawukile bantu boonse makani mabotu?

⁸ Mbunga yaJehova yakabelesya zibelesyo zyeendelana aachiindi eecho kuti ikambawukile bantu boonse makani mabotu. Yakali kubelesya mabbuku aakapulintwa, “Photo-Drama of Creation,” mafonogilafu, sipikka mpati yakali kukkala aajulu amoota, station yalediyo alubo lino yaabubelesya zibelesyo zyamazuba aano. Mbunga yaJehova ilikuchita mulimu wakusandulula kwiinda chiindi. Nkamboonzi? Kuchitila kuti muntu umwi awumwi amvwe makani mabotu mumulaka wakwe. Jehova tasaluuli pe, nkaambo wakaamba kuti  makani mabotu akali kuyookambawukwa “kumisyobo yoonse, kumilaka yoonse alimwi akubantu bamisyobo yoonse.” (Ciy. 14:6, 7) Uyanda kuti bantu boonse bamvwe makani aaBwaami.

⁹ Kutegwani abaabo mbitutakonzyi pe kukambawukila, mbuli bakkala mumaanda ngitutakonzyi pe kusika? Kuti tukonzye kukambawukila bantu aaba, mbunga yaJehova yakachita mabambe aazimwi nzila zyabukambawusi bwaantanganana. Muchikozyano, mu2001 bamuKabunga Keendelezya bakazumizya kuti kubelesegwe tungolo amatebbulu kuFrance mpawo mukuya kwachiindi zyakazoozumizigwa kuli zimwi nyika. Nzila eezi zyakazwidilila. Mu2011, kwakatalisigwa mabambe mapya kuUnited States kubusena bujanika bantu biingi loko mudolopo lyaNew York. Mumunyaka nguyooyo, bakapa bantu mabbuku aali 102 129 amamagazini aali 68 911. Alubo bantu bali 4 701 bakakumbila kwiiya Bbayibbele. Zilaantanganana kuti Jehova wakatugwasya mumulimu ooyu kabelesya muuya uusalala. Nkinkaako Kabunga Keendelezya kakazumizya kuti kubelesegwe tungolo amatebbulu munyika yoonse.

10. Niinzi nzitweelede kuchita kuti tuyungizye luzibo mumulimu wakukambawuka?

¹⁰ Nzweelede kuchita. Belesya luzibo ndupegwa aaJehova kabelesya miswaangano yachiKristu. Belekaamwi abantu bali mukabunga kako kamulimu wakukambawuka. Bayookugwasya kuti uyungizye luzibo mumulimu wakukambawuka alubo uyoosungwaazigwa azikozyano zyabo zibotu. Zumanana kukambawuka. Mbuli mbulwaamba lugwalo luzulwida chiiyo, tuchita kuyanda kwaLeza, kutali amanguzu eesu pe pesi kwiinda mukugwasigwa amuuya uusalala. (Zek. 4:6) Kwiinda zyoonse, Leza uyootugwasya nkaambo tuchita mulimu wakwe.

11. Bamukabunga keendelezya bakachita biyeni kuti babambe luumuno kumaKristu aakusaanguna?

¹¹ Muchiindi chamaKristu aakusaanguna. Bamukabunga keendelezya bakali muJerusalemu bakabelekelaamwi kuti bagwasye maKristu  bakusaanguna kuti babambikane akuti babe aluumuno. (Mil. 2:42) Muchikozyano, nikwakabuka nkani yakupalulwa kuma49 C.E., bamukabunga keendelezya bakagwasigwa amuuya uusalala kuti babambulule nkani eeyi. Kaansinga nkani eeyi teeyakabambululwa pe, mulimu wakukambawuka teewakali kunooyinkilila kunembo pe. Nikuba kuti baapostolo abaalumi bapati bakali maJuda, taakwe nibakatobelezya chiyanza chamaJuda naakuti kuswiilila bantu bakali kusumpula nkani eeyi. Pesi bakatobelezya Jwi lyaLeza alubo bakakumbila muuya uusalala kuti ubagwasye. (Mil. 15:1, 2, 5-20, 28) Niinzi chakachitika? Jehova wakalongezya kusala kwabo, bakazumanana kuba aaluumuno akujatana alubo mulimu wakukambawuka wakayinkilila kunembo.—Mil. 15:30, 31; 16:4, 5.

12. Niinzi chitondeezya kuti kuli kubambikana aluumuno mumbunga yaJehova mazubaano?

¹² Mazubaano. Mbunga yaJehova ilikubeleka changuzu kuti bakombi baJehova babambikane akuti babe aluumuno. Magazini yaZion’s Watch Tower and Herald of Christ’s Presence yamuNovember 15 1895 yakali aamutwe uuzwa mulugwalo lwa 1 Bakorinto 14:40 uti: “Zintu Zyoonse Azicitwe Kabotu-Kabotu Alimwi Kweelana Abubambe” (Decently and in Order). Chiiyo eechi chakati: “Kuli zintu zyiingi baapostolo nzibakalembela maKristu bakusaanguna atala akubambikana . . . Kulayandikana kuti tuswiilile zintu ‘izyakalembwa kaindi zyakalembelwa kutuyiisya.’” (Rom. 15:4) Mbunga yaJehova ilikubeleka changuzu mazubaano kuti kube luumuno mumbungano mbuli mbubakachita maKristu bakusaanguna. Muchikozyano, kuti wanjila chiiyo chaNgaziyakulinda ayimwi mbungano naakuti kuliimwi nyika, tusweeki pe nkaambo nga ulichizi chiiyo chiyiigwa akuti chichitwa biyeni. Alubo tukooba mweenzu pe. Muuya uusalala nguwo awulikke upa kuti kube kujatana kuli boobo.—Zef. 3:9.

13. Kweendelana alugwalo lwa Jakobo 3:17, njiili mibuzyo njitweelede kulibuzya?

¹³ Nzweelede kuchita. Jehova uyanda kuti bakombi bakwe ‘bazumanane mulukamantano lwamuuya muchaanzyo chaluumuno.’ (Ef. 4:1-3) Nkinkaako weelede kulibuzya kuti: ‘Ndipa kuti kube luumuno akujatana  na mumbungano? Ndilabalemeka na bakwesu bazulwida? Ndilabagwasya na bakombima, kapati kuti kandili amilimu mumbungano? Ndilafwambaana na alubo ndilalipeda na kugwasya bamwi?’ (Bala Jakobo 3:17.) Kuti wabona kuti kuli ayanda kubambululwa, kumbila muuya uusalala kuti ukugwasye. Kuti wazumizya muuya usalala kuti ukugwasye kuti ube abuntu bulikabotu akuchita zintu zilikabotu, bakombinyokwe bayookuyanda loko akubona kuti ulayandikana mumbungano.

14. Kweendelana alugwalo lwa Bakolose 1:9, 10, Jehova wakabayiisya biyeni bakombi bakwe?

¹⁴ Muchiindi chamaKristu aakusaanguna. Jehova ulakuyanda kuyiisya bakombi bakwe. (Int. 32:8) Mbutuli bana bakwe mbayanda, uyanda kuti tumuzibe, tumuyande akuti tupone kukabe kutamani. Tatukonzyi pe kuchita zyoonse eezi kuti teetwagwasigwa aluzibo ndwatupa. (Joh. 17:3) Chiindi, Jehova wakali kubelesya mbungano yakusaanguna kuti ayiisye bakombi bakwe. (Bala Bakolose 1:9, 10.) Alubo bakagwasigwa amuuya uusalala, “mugwasyi” Jesu ngwaakabasyomezya. (Joh. 14:16) Muuya uusalala wakabagwasya kuti bamvwisisisye Jwi lyaLeza akuyeeya zintu zyakaambwa akuchitwa aJesu zyakazoolembwa mumabbuku aaMakani Mabotu. Luzibo oolu lwakagwasya maKristu bakusaanguna kuti babe aalusyomo lusimide akuti bayande Jehova aMwanaakwe akuti bayandane.

15. Niinzi nzwaakabona zitondeezya kuti majwi aali muli Isaya 2:2, 3 alikuzukizigwa?

¹⁵ Mazubaano. Jehova wakaamba kuti “kumamanino aamazuba” bantu bazisi zyoonse bayooyinka kuchilundu chakwe chakukozyanisya kuti bakayiisigwe nzila zyakwe. (Bala Isaya 2:2, 3.) Tulikubona bupolofita oobu kabuli kuzuzikizigwa. Bukombi bwakasimpe bwasumpulwa kwiinda bukombi boonse bwakubeja. Alubo Jehova ulikutupa chakulya chamubukombi chiingi loko. (Is. 25:6) Ulikubelesya  “muzike uusyomeka alimwi uucenjede” kuti atupe chakulya chiingi loko munzila zisiyene-siyene. Muchikozyano, tuli aazyakubala, nkani zyakuswiilizya amavidiyo miingi akweebela. (Mt. 24:45) Tulimvwa mbuli mweenzinyina waJobu uutegwa Elihu wakati: “Ino mwiiyi nzi uuli mbuli [Leza]?”—Job. 36:22.

16. Niinzi nzweelede kuchita kuti usime mubukombi?

¹⁶ Nzweelede kuchita. Muuya uusalala ulakonzya kukugwasya kuti ubelesye zintu nzuyiya muJwi lyaLeza. Komba kuli Jehova mbuli mbaakachita sintembawuzyo wakati: “Kondiyiisya nzila yako, O Jehova. Mebo ndinakweenda mukasimpe kako. Kondipa kuba amoyo omwe kutegwa kandiyoowa zina lyako.” (Int. 86:11) Yinkilila kunembo kulya chakulya chamubukombi nchitupegwa aaJehova kabelesya Jwi lyakwe ambunga yakwe. Makanze aako tayeelede kuba aakujana luzibo luzutu pesi weelede kusyoma kasimpe akukabelesya mubuumi bwako. Muuya uusalala ulakonzya kukugwasya kuchita oobo. Alubo weelede kusungwaazya bakombinyokwe. (Heb. 10:24, 25) Nkamboonzi? Nkaambo tuli mpuli iimwi yamubukombi. Kombela muuya uusalala kuti ukugwasye kupa nsandulo ziyaka kumiswaangano akuti uchite kabotu kuti kuli ankani. Kuti wachita oobo, nga ulikutondeezya Jehova aJesu kuti ulaziyanda ‘mbelele’ zyabo nzibayanda.—Joh. 21:15-17.

17. Kujana watondeezya biyeni kuti ubelekelaamwi ambunga yaJehova chakusyomeka?

¹⁷ Lino-lino, anyika kuzoochaala mbunga iimwi luzutu ilikuzulwidwa amuuya uusalala. Nkinkaako belekaamwi ambunga yaJehova. Tondeezya kuti tusaluuli pe mbuli Jehova kwiinda mukukambawukila bantu boonse. Tondeezya kuti uyanda luumuno akubambikana mbuli Jehova kwiinda mukupa kuti kube kujatana mumbungano. Swiilizya Muyiisi Mupati kwiinda mukubelesya chakulya chiingi chamubukombi nchatupa. Kuti wachita oobo, tuzooyoowi pe niyazoonyonyoonwa nyika yaSaatani. Kunze lyaboobo, uyooba aachibindi alubo uyooba aakati kabantu bali kubelekelaamwi ambunga yaJehova chakusyomeka.