1. Ol Kristen i baptais pinis i mas wok yet long mekim wanem?

OLSEM WANEM? Yu baptais pinis? Sapos olsem, orait yu soim klia long ol narapela olsem yu bilip long Jehova na yu redi long mekim wok bilong em long oganaisesen bilong em. * Tasol yu mas wok yet long strongim pasin bilong yu long bilip long Jehova. Na tu, yu mas wok yet long bilip strong olsem Jehova i yusim oganaisesen bilong em long mekim laik bilong em long nau.

2-3. Wanem 3-pela rot Jehova i stiaim oganaisesen bilong em long nau?

² Long nau, Jehova i stiaim oganaisesen bilong em long rot we i kamapim klia ol pasin bilong em, ol samting em i tingting pinis long mekim, na ol lo bilong em. Yumi bai stori long 3-pela pasin bilong Jehova em yumi inap luksave long en insait long oganaisesen bilong em.

³ Namba 1: “God i save mekim wankain pasin long olgeta man.” (Apo. 10:34) Pasin laikim i kirapim Jehova long givim Pikinini bilong em olsem “pe i stret bilong baim bek olgeta man.” (1 Tim. 2:6; Jon 3:16) Jehova i yusim lain bilong em long autim gutnius long olgeta manmeri husat i laik harim tok, na long dispela rot em i helpim planti manmeri moa long kisim helpim long pe bilong baim bek man. Namba 2: Jehova em God bilong bel isi na mekim ol samting i ron gut. (1 Kor. 14:33, 40) Olsem na ol manmeri i lotuim em ol i save stap bel isi na olgeta wok ol i mekim i save ron gut. Namba 3: Jehova em i “Nambawan Bikpela Tisa.” (Ais. 30:20, 21) Olsem na oganaisesen bilong em i givim bel tru long skulim ol manmeri long tok bilong Baibel insait long kongrigesen, na tu, long rot bilong wok autim tok. Olsem wanem ol Kristen long pastaim  i bin bihainim dispela 3-pela pasin bilong Jehova? Olsem wanem ol Kristen long nau i bihainim dispela 3-pela pasin? Olsem wanem holi spirit inap helpim yu taim yu mekim wok bilong Jehova long oganaisesen bilong em long nau?

4. (a) Olsem Aposel 1:8 i kamapim, Jisas i tokim ol disaipel long mekim wanem? (b) Ol disaipel bai kisim wanem helpim?

⁴ Long taim bilong ol aposel. Ol tok Jisas i bin autim i helpim ol manmeri long bilip na wet long ol gutpela samting bai kamap bihain. (Luk 4:43) Em i tokim ol disaipel long mekim yet wok em i bin kirapim—olsem ol i mas autim tok “i go inap long olgeta hap bilong graun.” (Ritim Aposel 1:8.) Tasol ol i no inap mekim dispela wok long strong bilong ol yet, nogat. Ol i nidim holi spirit long mekim olsem—em “dispela helpim” Jisas i bin tok promis long givim long ol.—Jon 14:26; Sek. 4:6.

5-6. Holi spirit i helpim ol disaipel bilong Jisas long wanem ol rot?

⁵ Ol disaipel bilong Jisas i kisim holi spirit long Pentikos 33 C.E. Holi spirit i helpim ol na wantu ol i kirap long autim tok, na insait long sotpela haptaim planti tausen manmeri i harim tok na ol i bilip. (Apo. 2:41; 4:4) Maski ol man i mekim nogut long ol disaipel, ol i no pret na lusim wok autim tok, nogat, ol i beten askim God long helpim ol. Ol i beten long God olsem: “Helpim ol wokboi bilong yu long autim yet tok bilong yu na no ken pret.” Na holi spirit i pulap long ol na ol i “autim tok bilong God na ol i no pret.”—Apo. 4:18-20, 29, 31.

⁶ Ol disaipel bilong Jisas i bungim ol narapela hevi. Long pastaim, ol i no gat planti kopi bilong Ol Rait Holi. Ol i no gat ol pablikesen bilong stadi long Baibel olsem yumi gat long nau. Na tu, ol i mas autim tok long ol manmeri bilong planti narapela tokples. Maski ol dispela samting inap pasim ol long autim tok, ol i mekim bikpela wok tru—insait long 30 yia samting ol i autim gutnius long “olgeta hap bilong graun aninit long skai.”—Kol. 1:6, 23.

7. (a) Winim 100 yia i go pinis, lain bilong Jehova i luksave long wanem samting ol i mas mekim? (b) Ol i bin mekim wanem?

⁷ Long taim bilong yumi. Long nau, Jehova i wok yet long stiaim na strongim lain bilong em long mekim wok bilong em. Nambawan rot em i yusim bilong stiaim lain bilong em long nau em long rot bilong Baibel. Baibel i stori long wok autim tok bilong Jisas na tok em i givim long ol disaipel long mekim yet wok em i bin kirapim. (Mat. 28:19, 20) Long Julai 1881, nius Was Taua i tok: “God i no singautim yumi bilong litimapim nem bilong yumi yet o bilong bungim bikpela mani kago; nogat; em i singautim yumi bilong lusim olgeta samting na mekim wok bilong autim tok.” Wanpela buklet ol i bin wokim long 1919, nem bilong en To Whom the Work Is Entrusted, i tok: “Dispela em bikpela wok tru, tasol em wok bilong Bikpela, na em bai strongim yumi long mekim dispela wok.” Olsem ol Kristen bilong pastaim, ol bratasista bilong yumi i sanap strong na givim bel tru long mekim wok, na ol i bilip tru olsem holi spirit bai helpim ol long autim tok long olgeta kain manmeri. Long nau tu, yumi bilip tru olsem holi spirit bai helpim yumi long mekim gut dispela wok.

8-9. Oganaisesen bilong Jehova i yusim wanem ol rot long autim tok long planti manmeri moa?

⁸ Oganaisesen bilong Jehova i save yusim ol nambawan gutpela tul long autim gutnius long ol manmeri. Sampela bilong ol dispela tul em ol pablikesen ol i prinim, piksa “Photo-Drama of Creation,” ol masin pikap, ol saun-kar, ol redio brodkas, na kompiuta na Intenet. Na tu, oganaisesen bilong God i mekim bikpela wok bilong trensletim ol buk na nius long planti moa tokples winim long bipo! Wai? Ol i mekim olsem na bai olgeta kain man i ken harim gutnius long tokples bilong ol yet. Jehova i save mekim wankain  pasin long olgeta man na em i bin tok profet olsem ol man bai autim gutnius “long olgeta kantri, long olgeta traib, long olgeta tokples na long olgeta lain pipol.” (Rev. 14:6, 7) Em i laik bai olgeta manmeri i ken harim gutnius bilong Kingdom.

⁹ Olsem wanem long ol manmeri em ol i stap long ol flet we i gat sekiuriti gad o banis na dispela i pasim yumi long autim tok long ol? Oganaisesen bilong Jehova i laik bai yumi autim tok long ol dispela manmeri, olsem na oganaisesen i stat long yusim ol narapela rot bilong autim tok long ol pablik ples. Eksampel: Long 2001, Gavening Bodi i tok orait long yusim ol litresa troli na ol tebol samting long Frans na bihain long ol narapela kantri tu. Gutpela samting i kamap long dispela. Long 2011, ol i kirapim nupela program long Amerika long wanpela bisi ples long New York City. Long fes yia bilong dispela program, ol pablisa i tilim 102,129 buk na 68,911 nius. Na inap olsem 4,701 manmeri i askim long stadi long Baibel! I klia tru olsem holi spirit i stiaim dispela wok. Olsem na Gavening Bodi i tok orait long ol pablisa long olgeta hap bilong graun long ol i ken yusim ol tebol samting bilong putim ol litresa bilong autim tok.

10. Yumi inap mekim wanem bilong mekim gut moa wok autim tok?

¹⁰ Samting yu ken mekim. Mekim gutpela wok long trening yu kisim long Jehova long ol miting Kristen. Oltaim wok wantaim grup bilong autim tok em yu stap long en. Ol bratasista long grup bilong yu inap helpim yu long kamap gutpela moa long wok autim tok, na gutpela eksampel bilong ol inap strongim yu. Maski hevi i kamap, sanap strong na wok yet long autim tok. Olsem tim skripsa bilong yumi i kamapim, yumi mekim wok bilong God long strong bilong holi spirit, na i no long strong bilong yumi yet. (Sek. 4:6) Yumi ken bilip tru olsem God bai givim yumi strong yumi nidim bikos yumi mekim wok bilong em.

11. Long taim bilong ol aposel, gavening bodi i mekim wanem bilong strongim pasin bilong mekim ol samting i ron gut insait long kongrigesen?

¹¹ Long taim bilong ol aposel. Gavening bodi long Jerusalem i wok bung wantaim bilong strongim bel isi na pasin bilong mekim ol samting i ron gut insait long kongrigesen. (Apo. 2:42) Eksampel: Long yia 49 C.E., taim tok pait  i kamap long sait bilong katim skin, gavening bodi em holi spirit i stiaim ol—ol i bung na skelim dispela samting. Sapos kongrigesen i no stap wanbel long dispela samting, dispela inap pasim ol long mekim gut wok autim tok. Maski ol aposel na ol hetman ol i bilong lain Juda, ol i no larim ol bilip na ol kastam bilong ol Juda na ol man husat i strong long bihainim ol dispela bilip i stiaim disisen bilong ol. Ol i larim Tok Bilong God na holi spirit long stiaim disisen bilong ol. (Apo. 15:1, 2, 5-20, 28) Wanem gutpela samting i kamap? Jehova i blesim disisen bilong ol na dispela i strongim pasin wanbel na bel isi insait long kongrigesen, na wok autim tok i go het yet.—Apo. 15:30, 31; 16:4, 5.

12. Wanem samting i soim olsem bel isi na pasin bilong mekim ol samting i ron gut i stap namel long lain bilong Jehova long nau?

¹² Long taim bilong yumi. Oganaisesen bilong Jehova i mekim ol wok bilong strongim bel isi na pasin bilong mekim ol samting i ron gut namel long ol manmeri bilong Jehova. Long 1895, Zion’s Watch Tower and Herald of Christ’s Presence bilong Novemba 15 i gat wanpela atikol, nem bilong en “Wok Stret na i Ron Gut”—ol i kisim dispela tok long 1 Korin 14:40. Atikol i tok: “Ol aposel i raitim planti pas i go long kongrigesen long pasin bilong mekim ol samting i ron gut . . . Em i bikpela samting long yumi mas wok yet long bihainim ‘ol tok ol i bin raitim long bipo bilong skulim yumi.’” (Rom 15:4) Long nau oganaisesen bilong Jehova i wok yet long strongim bel isi na pasin bilong mekim ol samting i ron gut insait long ol kongrigesen wankain olsem ol Kristen long pastaim i bin mekim. Tingim dispela samting: Sapos yu go long Wastaua Stadi long narapela kongrigesen—maski em long narapela kantri—yu bai save pinis long pasin ol bai bihainim long kondaktim stadi na wanem atikol yupela bai stadi long en. Wantu yu bai pilim olsem yu hap bilong dispela kongrigesen! Holi spirit bilong God i mekim na dispela pasin wanbel i stap namel long ol manmeri bilong God.—Sef. 3:9, ftn.

13. Yumi ritim tok bilong Jems 3:17 na yumi laik givim wanem ol askim long yumi yet?

¹³ Samting yu ken mekim. Jehova i laik bai ol manmeri bilong em i “holimpas pasin wanbel bilong holi spirit na stap bel isi, em pasin i save bungim yumi wantaim.” (Efe. 4:1-3) So askim yu yet: ‘Mi save strongim bel isi na pasin wanbel insait long kongrigesen? Mi save daun na bihainim tok bilong ol brata i go pas insait long  kongrigesen? Ol narapela inap bilip long mi long mekim ol wok insait long kongrigesen? Mi save bihainim stret taim, helpim ol narapela, na redi long mekim wok?’ (Ritim Jems 3:17.) Sapos yu luksave olsem i gat sampela samting yu mas stretim, orait beten askim God long givim holi spirit long yu bilong helpim yu. Taim yu larim holi spirit i stiaim pasin na tingting bilong yu, ol bratasista bai laikim yu moa yet na ol bai pilim tru ol gutpela wok yu mekim.

14. Olsem Kolosi 1:9, 10 i kamapim, olsem wanem Jehova i bin skulim ol manmeri bilong em long taim bilong ol aposel?

¹⁴ Long taim bilong ol aposel. Jehova i save amamas tru long skulim ol manmeri bilong em. (Sng. 32:8) Em i laik bai ol i kisim save long em, laikim em, na kisim laip oltaim olsem ol pikinini bilong em. Ol i no inap mekim olsem sapos ol i no kisim stretpela save long em. (Jon 17:3) Jehova i yusim kongrigesen Kristen long taim bilong ol aposel long skulim ol manmeri bilong em. (Ritim Kolosi 1:9, 10.) Holi spirit em “dispela helpim” Jisas i bin tok promis long en i bin helpim tru ol disaipel. (Jon 14:16) Holi spirit i helpim ol disaipel long kliagut moa long Tok Bilong God. Na i helpim ol long tingim gen ol tok Jisas i bin skulim ol long en na ol wok em i bin mekim—bihain ol i bin raitim stori bilong ol dispela samting long Ol Gutnius. Dispela save i strongim bilip bilong ol Kristen long pastaim, na i strongim tu pasin bilong ol long laikim God, Jisas, na laikim narapela narapela.

15. Yu luksave long wanem ol rot Jehova i yusim bilong truim tok promis i stap long Aisaia 2:2, 3?

¹⁵ Long taim bilong yumi. Jehova i bin tok profet olsem “long taim bilong las de,” ol manmeri bilong olgeta kantri bai joinim lotu i tru na bai ol inap kisim skul long ol pasin bilong em. (Ritim Aisaia 2:2, 3.) Yumi lukim truim bilong dispela tok profet i kamap. Lotu i tru i gutpela moa winim olgeta kain lotu giaman. Jehova i skulim ol manmeri bilong em long planti gutpela tok bilong Baibel! (Ais. 25:6) Long rot bilong “gutpela  wokboi i gat savetingting,” em i givim yumi planti samting bilong strongim bilip na em i givim yumi ol dispela samting long kain kain rot, olsem ol atikol yumi ritim, ol tok yumi harim, na ol vidio yumi lukim. (Mat. 24:45) Yumi pilim wankain olsem pren bilong Jop em Elihu, em i bin tok: “[God] i gutpela tisa tru. Husat inap skulim yumi olsem em?”—Jop 36:22.

16. Yu inap mekim wanem bilong strongim bilip bilong yu?

¹⁶ Samting yu ken mekim. Spirit bilong God bai helpim yu long bihainim ol tok yu ritim na stadi long en long Baibel. Yu inap mekim wankain beten em man bilong raitim song i bin mekim, em i tok: “O Jehova, skulim mi long pasin yu laik mi bihainim. Na mi bai bihainim tok i tru bilong yu. Kirapim mi long rispek long nem bilong yu long bel olgeta.” (Sng. 86:11) Olsem na yu mas wok yet long kisim ol tok bilong strongim bilip em Jehova i givim long rot bilong Tok bilong em na long rot bilong oganaisesen bilong em. Yu mas kisim stretpela save, na yu mas mekim sampela samting moa. Yu mas bilip tru olsem ol tok yu kisim save long en em tok i tru, na yu mas bihainim ol dispela tok long laip bilong yu. Holi spirit bilong Jehova inap helpim yu long mekim olsem. Na tu, yu mas strongim bel bilong ol bratasista bilong yu. (Hib. 10:24, 25) Wai? Bikos ol i wanfamili bilong yu long sait bilong bilip. Beten askim God long givim holi spirit long yu bilong helpim yu long givim ol gutpela bekim long ol miting Kristen na long taim yu gat asainmen bilong mekim tok long miting. Long dispela rot, yu soim Jehova na Pikinini bilong em olsem yu laikim tru ol “sipsip” bilong ol i dia tumas.—Jon 21:15-17.

17. Olsem wanem yu inap soim olsem yu sapotim oganaisesen bilong Jehova?

¹⁷ Klostu nau bai i gat wanpela oganaisesen tasol i stap long graun, em dispela oganaisesen holi spirit bilong God i stiaim. Olsem na yu mas sapotim oganaisesen bilong Jehova. Yu mas bihainim pasin bilong God long laikim olgeta kain manmeri long rot bilong autim gutnius long olgeta manmeri yu bungim. Yu soim olsem yu bihainim pasin laikim bilong God taim yu strongim bel isi na pasin bilong mekim ol samting i ron gut insait long kongrigesen. Na wok yet long putim yau long Nambawan Bikpela Tisa long rot bilong givim bel tru long kisim save long olgeta tok i kam long em. Taim yu mekim olsem, yu no inap pret taim graun bilong Satan i bagarap na pinis. Yu bai strongim bel na wok bung yet wantaim ol manmeri i mekim wok insait long oganaisesen bilong Jehova.