1. Vakreste lava khuvuriweke va fanele va ya emahlweni va endla yini?

 XANA u khuvuriwile? Loko swi ri tano, u swi kombise erivaleni leswaku u ni ripfumelo eka Yehovha naswona u tiyimisele ku n’wi tirhela u ri eka nhlangano wakwe. * U fanele u ya emahlweni u tiyisa ripfumelo ra wena. Nakambe u fanele u tiyiseka leswaku Yehovha u ya emahlweni a kongomisa nhlangano wakwe namuntlha.

2-3. Yehovha u wu kongomisa njhani nhlangano wakwe namuntlha? Vula swikombiso.

² Ndlela leyi Yehovha a kongomisaka nhlangano wakwe hayona namuntlha yi paluxa vumunhu, xikongomelo ni milawu yakwe. A hi buleni hi swilo swinharhu leswi Yehovha a swi kombisaka hi ku tirhisa nhlangano wakwe.

³ Xo sungula, “Xikwembu a xi na xihlawuhlawu.” (Mit. 10:34) Hikwalaho ka leswi Yehovha a rhandzaka vanhu, u nyikele hi N’wana wakwe tanihi “nkutsulo wa vanhu hinkwavo.” (1 Tim. 2:6; Yoh. 3:16) Yehovha u tirhisa vanhu vakwe leswaku va chumayela vanhu mahungu lamanene hi xikongomelo xo va pfuna leswaku va vuyeriwa eka gandzelo ra nkutsulo. Xa vumbirhi, Yehovha i Xikwembu lexi hlelekeke xi tlhela xi va ni ku rhula. (1 Kor. 14:33, 40) Sweswo hi swona leswi endlaka leswaku vagandzeri vakwe va va lava hlelekeke va tlhela va va ni ku rhula. Xa vunharhu, Yehovha i ‘Muleteri Lonkulu.’ (Esa. 30:20, 21) Nhlangano wakwe wu tikarhatela ku dyondzisa vanhu Bibele evandlheni ni le nsin’wini. Vakreste va le nkarhini wa  vaapostola va n’wi tekelele njhani Yehovha etimhakeni letinharhu? Vakreste va swi kombisa njhani leswaku va tekelela Yehovha namuntlha? Moya lowo kwetsima wu nga ku pfuna njhani loko u ri karhi u tirhela Yehovha u ri enhlanganweni wakwe?

4. Hi ku ya hi Mitirho 1:8, Yesu u lerise valandzeri vakwe leswaku va endla yini naswona a va ta pfuniwa hi yini?

⁴ Enkarhini wa vaapostola. Rungula leri Yesu a a ri dyondzisa a ri endla leswaku vanhu hinkwavo va va ni ntshembo. (Luka 4:43) U lerise vadyondzisiwa vakwe leswaku va ya emahlweni ni ntirho lowu a wu sunguleke, va chumayela “ku ya fika emakumu ka misava.” (Hlaya Mitirho 1:8.) A va nga ta swi kota ku endla ntirho wolowo hi matimba ya vona. A va ta lava moya lowo kwetsima, ku nga “mupfuni” loyi Yesu a va tshembiseke yena.—Yoh. 14:26; Zak. 4:6.

5-6. Moya lowo kwetsima wu va pfune njhani valandzeri va Yesu?

⁵ Valandzeri va Yesu va amukele moya lowo kwetsima hi Pentekosta ya 33 C.E. Hikwalaho ko pfuniwa hi moya wolowo, va sungule ku chumayela naswona hi nkarhi wutsongo vanhu va magidi va amukele mahungu lamanene. (Mit. 2:41; 4:4) Loko vadyondzisiwa va kanetiwa a va tshikanga kambe va kombele mpfuno eka Xikwembu. Va khongerile va ku: “Endla leswaku malandza ya wena ma ya emahlweni ma vulavula rito ra wena hi vurhena lebyikulu.” Va tale hi moya lowo kwetsima kutani “va vula rito ra Xikwembu hi vurhena.”—Mit. 4:18-20, 29, 31.

⁶ Vadyondzisiwa va Yesu a va langutane ni mitlhontlho yin’wana. Hi xikombiso, a va ri ni tikopi titsongo ta Matsalwa. Ku hambana ninamuntlha a va nga ri na tibuku leti a ti va pfuna ku hlamusela Matsalwa. Nakambe a va fanele va chumayela vanhu va tindzimi to hambanahambana. Hambileswi a va langutane ni mitlhontlho, hi malembe ya kwalomu ka 30, se a va chumayele “vanhu hinkwavo” mahungu lamanene.—Kol. 1:6, 23.

7. Eka malembe yo tlula 100 lama hundzeke, malandza ya Yehovha ma swi tive njhani leswi Xikwembu xi swi languteleke eka wona naswona ma angule njhani?

⁷ Namuntlha. Yehovha u ya emahlweni a kongomisa vanhu vakwe ni ku va nyika matimba. U va kongomisa hi ku tirhisa Bibele. Eka yona hi hlaya hi ntirho wo chumayela lowu Yesu a wu endleke ni xileriso lexi a xi nyikeke valandzeri vakwe xo ya emahlweni ni ntirho wolowo. (Mat. 28:19, 20) Xihondzo xo Rindza xa July 1881, xi te: “A hi hlawuleriwanga ku ta xiximiwa kumbe ku va swigwili kambe leswaku hi ta seketela ntirho wo chumayela mahungu lamanene.” Xiphephana lexi nge To Whom the Work Is Entrusted, xa 1919, xi te: “Ntirho lowu wu tikomba wu ri wukulu, kambe i wa Hosi, hi ta swi kota ku wu endla hi ku pfuniwa hi yona.” Ku fana ni Vakreste va le nkarhini wa vaapostola, vamakwerhu lava a va wu chivirikela ntirho wa vona naswona a va tiyiseka leswaku moya lowo kwetsima wu ta va pfuna va chumayela vanhu va tinxaka hinkwato. Ninamuntlha ha tiyiseka leswaku moya lowo kwetsima wu ta hi pfuna.

8-9. Hi tihi tindlela leti nhlangano wa Yehovha a wu ti tirhisa leswaku wu yisa ntirho wo chumayela emahlweni?

⁸ Nhlangano wa Yehovha a wu tirhisa switirhisiwa leswi pfunaka eku chumayeleni ka mahungu lamanene. Switirhisiwa sweswo a swi katsa mikandziyiso, “Photo-Drama of Creation,” tigramafoni, timovha leti nga ni swikurisamarito ni swiyanimoya naswona namuntlha wu tirhisa thekinoloji ya manguva lawa. Nhlangano wa Yehovha wu hundzuluxela mikandziyiso hi tindzimi to tala swinene! Hikwalahokayini? Leswaku vanhu va tinxaka hinkwato va  ta twa mahungu lamanene hi ririmi ra manana. Yehovha a nga na xihlawuhlawu; u profete leswaku mahungu lamanene a ma ta chumayeriwa eka “matiko hinkwawo, tinyimba hinkwato, tindzimi hinkwato ni vanhu hinkwavo.” (Nhlav. 14:6, 7) U lava leswaku vanhu hinkwavo va twa mahungu lamanene.

⁹ Vanhu van’wana swa tika ku va kuma hikuva va tshama etindhawini leti nga nghenekiki. Leswaku hi kota ku chumayela vanhu vo tano, nhlangano wa Yehovha wu hlele tindlela to chumayela etindhawini ta mani na mani. Hi xikombiso, hi 2001, Huvo leyi Fumaka yi hlele leswaku eFurwa ku tirhisiwa swigolonyana ni matafula naswona maendlelo wolawo ma tirhisiwe ni le matikweni man’wana. Ku ve ni vuyelo byo tsakisa. Hi 2011, eUnited States ku simekiwe tsima ro chumayela eDorobeni ra New York. Hi lembe rero, ku fambisiwe tibuku ta 102 129 ni timagazini ta 68 911. Vanhu va 4 701 va kombele ku dyondzisiwa Bibele! Swi le rivaleni leswaku ntirho lowu a wu kongomisiwa hi moya lowo kwetsima. Hikwalaho, Huvo leyi Fumaka yi hlele leswaku endlelo leri ri tirhisiwa emisaveni hinkwayo.

10. Hi nga yi antswisa njhani ndlela leyi hi chumayelaka hayona?

¹⁰ Leswi u nga swi endlaka. Tirhisa swiletelo leswi u swi kumaka etinhlengeletanweni ta vandlha. Nkarhi ni nkarhi tirha nsimu ni ntlawa lowu u averiweke eka wona. Vamakwerhu va ta ku pfuna u antswisa ndlela leyi u chumayelaka hayona va tlhela va ku khutaza. U nga tshiki ku chumayela hambiloko swi tika. Tsalwa leri nhlokomhaka ya hina yi sekeriweke eka rona ri vula leswaku moya lowo kwetsima wu ta hi pfuna hi endla ku rhandza ka Xikwembu. (Zak. 4:6) Tsundzuka, ntirho lowu hi wu endlaka i wa Xikwembu.

11. Huvo leyi fumaka ya le nkarhini wa vaapostola yi tirhisane njhani hi vun’we leswaku ku va ni ku hleleka exikarhi ka vanhu va Xikwembu?

¹¹ Enkarhini wa vaapostola. Huvo leyi fumaka eYerusalema yi endle leswaku vanhu va Xikwembu va hleleka va tlhela va va ni ku rhula. (Mit. 2:42) Hi xikombiso, loko ku pfuka njhekanjhekisano mayelana ni ku yimbisiwa hi 49 C.E., moya lowo kwetsima wu pfune  huvo leyi fumaka leswaku yi tlhantlha mhaka yoleyo. Loko mhaka leyi a yi nga tlhantlhiwanga, ntirho wo chumayela a wu ta va wu nga yanga emahlweni. Hambileswi vaapostola ni vakulukumba a va ri Vayuda, a va pfumelanga ku kuceteriwa hi ndhavuko kumbe hi vanhu lava a va wu hlohlotela. Kurinasweswo, va titshege hi Rito ra Xikwembu ni moya lowo kwetsima. (Mit. 15:1, 2, 5-20, 28) Vuyelo byi ve byihi? Yehovha u katekise xiboho xa vona naswona ku ve ni ku rhula ni vun’we, leswi endleke leswaku ntirho wo chumayela wu ya emahlweni.—Mit. 15:30, 31; 16:4, 5.

12. Hi swi vona njhani leswaku nhlangano wa Yehovha wu hlelekile naswona wu ni ku rhula namuntlha?

¹² Namuntlha. Nhlangano wa Yehovha wu tirha hi matimba leswaku vanhu va Yehovha va va lava hlelekeke va tlhela va va ni ku rhula. Hi 1895, magazini wa Zion’s Watch Tower and Herald of Christ’s Presence wa November 15, a wu ri ni nhlokomhaka leyi nge “Hi Ndlela Leyinene Ni Hi Ku Hleleka,” leyi sekeriweke eka 1 Vakorinto 14:40. Nhlokomhaka yoleyo yi te: “Vaapostola va tsalele Kereke yo sungula swilo swo tala mayelana ni ku hleleka . . . Hi fanele hi swi yingisa kahle ‘swilo leswi tsariweke enkarhini lowu hundzeke leswi tsaleriweke ku letela hina.’” (Rhom. 15:4) Ninamuntlha, nhlangano wa Yehovha wu hlelekile naswona wu ni ku rhula hilaha a swi ri hakona enkarhini wa vaapostola. Hi xikombiso, loko u fanele u ya dyondza Xihondzo xo Rindza evandlheni kumbe etikweni rin’wana, wa swi tiva leswaku ku ta dyondziwa nhlokomhaka yihi ni ndlela leyi yi nga ta fambisiwa hayona. Loko u fika u titwa u ri ekaya! Moya wa Xikwembu hi wona lowu endlaka leswaku ku va ni vun’we hi ndlela leyi.—Sof. 3:9.

13. Yakobo 3:17 yi endla leswaku hi tivutisa swivutiso swihi?

¹³ Leswi u nga swi endlaka. Yehovha u lava leswaku vanhu vakwe va ‘tshama va ri ni vun’we lebyi va byi kumaka eka moya lowo kwetsima.’ (Efe. 4:1-3) Tivutise: ‘Xana ndzi kondletela vun’we ni ku rhula evandlheni? Xana ndza va yingisa lava rhangelaka? Xana vanhu va nga ndzi tshemba, ngopfungopfu loko ndzi ri ni vutihlamuleri evandlheni? Xana ndza wu  khoma nkarhi naswona ndzi tiyimisele ku pfuna ni ku tirhela van’wana?’ (Hlaya Yakobo 3:17.) Loko u vona leswaku ku na laha u faneleke u antswisa kona, khongela u kombela moya lowo kwetsima. Loko u wu pfumelela wu ku kongomisa, vamakwerhu va ta ku rhandza.

14. Hi ku ya hi Vakolosa 1:9, 10, Yehovha u va dyondzise njhani vanhu vakwe enkarhini wa vaapostola?

¹⁴ Enkarhini wa vaapostola. Yehovha wa swi rhandza ku dyondzisa vanhu vakwe. (Ps. 32:8) Leswi a rhandzaka vana vakwe, u lava leswaku va n’wi tiva, va n’wi rhandza ni ku hanya hilaha ku nga heriki. Leswi a swi nga ta koteka loko a nga hi dyondzisi. (Yoh. 17:3) Yehovha u tirhise vandlha ra Vukreste ra le nkarhini wa vaapostola leswaku a dyondzisa vanhu vakwe. (Hlaya Vakolosa 1:9, 10.) Moya lowo kwetsima, ku nga “mupfuni” loyi Yesu a n’wi tshembiseke wu pfunile swinene. (Yoh. 14:16) Wu pfune vadyondzisiwa va twisisa Rito ra Xikwembu ni ku va tsundzuxa swilo hinkwaswo leswi Yesu a swi vuleke ni ku swi endla, leswi hi ku famba ka nkarhi swi tsariweke eka Tievhangeli. Sweswo swi tiyise ripfumelo ra vona ni ku endla leswaku va rhandza Xikwembu ni N’wana wa xona va tlhela va rhandzana.

15. Yehovha u xi hetisise njhani xitshembiso xakwe lexi nga eka Esaya 2:2, 3?

¹⁵ Namuntlha. Yehovha u profete leswaku “emikarhini ya makumu,” vanhu va matiko hinkwawo va ta khitikanela entshaveni yakwe yo fanekisela leswaku va ya dyondzisiwa tindlela takwe. (Hlaya Esaya 2:2, 3.) Ha ku vona ku hetiseka ka vuprofeta byebyo. Vukhongeri bya ntiyiso byi hambane ngopfu ni vukhongeri bya mavunwa. Hakunene Yehovha u hi nyika swakudya swo tala swa moya! (Esa. 25:6) U hi phamela swakudya sweswo hi ku tirhisa “nandza wo tshembeka ni wo tlhariha,” swakudya sweswo swi katsa mikandziyiso,  mimbulavulo ni tivhidiyo to hambanahambana. (Mat. 24:45) Hi titwa hilaha Elihu munghana wa Yobo a titweke hakona loko a ku: “I mani muleteri la fanaka ni [Xikwembu]?”—Yobo 36:22.

16. U nga byi tiyisa njhani vuxaka bya wena na Yehovha?

¹⁶ Leswi u nga swi endlaka. Moya lowo kwetsima wu ta ku pfuna leswaku u hanya hi leswi u swi dyondzaka eRitweni ra Xikwembu. Khongela ku fana ni mupisalema loyi a nga te: “Yehovha Xikwembu xanga, ndzi dyondzise ndlela ya wena. Ndzi ta famba entiyisweni wa wena. Ndzi endle ndzi chava vito ra wena hi mbilu ya mina hinkwayo.” (Ps. 86:11) Yana emahlweni u tiwundla hi ku hlaya Bibele ni mikandziyiso hinkwayo leyi Yehovha a hi nyikaka yona hi ku tirhisa nhlangano wakwe. Tsundzuka leswaku xikongomelo xa wena a hi ku kuma vutivi ntsena kambe u lava ku hanya ni ku tirhisa leswi u swi dyondzaka. Moya lowo kwetsima wa Yehovha wu ta ku pfuna u endla tano. Nakambe u lava ku khutaza vamakwenu. (Hev. 10:24, 25) Hikwalahokayini? Hikuva mi ndyangu wun’we. Khongela u kombela moya lowo kwetsima leswaku wu ku pfuna u nyikela tinhlamulo leti akaka etinhlengeletanweni ta vandlha ni loko u nyikela mbulavulo. Loko u endla tano, u komba Yehovha ni N’wana wakwe leswaku wa ti rhandza ‘tinyimpfu’ ta vona ta risima.—Yoh. 21:15-17.

17. U nga swi kombisa njhani leswaku u seketela nhlangano wa Yehovha?

¹⁷ Ku nga ri khale, laha misaveni ku ta sala nhlangano lowu kongomisiwaka hi moya wa Xikwembu. Hikwalaho, tikarhatele ku tirhisana ni nhlangano wa Yehovha. Kombisa leswaku u tekelela Xikwembu lexi nga riki na xihlawuhlawu hi ku chumayela vanhu hinkwavo mahungu lamanene. Tekelela ku hleleka ni ku rhula loku Xikwembu xi nga na kona hi ku kondletela vun’we evandlheni. Yingisa Muleteri wa wena Lonkulu hi ku dyondza rungula hinkwaro leri a ku nyikaka rona. Loko u endla tano, a wu nge khomiwi hi ku chava loko misava leyi yi lovisiwa. Kurinasweswo, u ta va exikarhi ka vanhu lava tirhisanaka ni nhlangano wa Yehovha hi ku tshembeka.