1. Kasi Ŵakhristu ŵakubatizika ŵakwenera kulutilira kuchitachi?

KASI muli kubatizika? Usange muli kubatizika, muli kulongora pakweru chipulikano chinu mwa Yehova, kweniso kuti muli ŵakukhumbisiska kumuteŵetera pamoza na gulu lake. * Kweni chipulikano chinu mwa Yehova chikwenera kukura. Ndipo mukwenera kulutilira kugomezga kuti Yehova wakugwiliskira ntchito gulu lake.

2-3. Kasi Yehova wakulongozga wuli gulu lake mazuŵa ghano? Pelekani viyelezgero.

² Mazuŵa ghano, Yehova wakulongozga gulu lake mwakukolerana na mikhaliro yake, khumbo lake, kweniso fundo zake. Tiyeni tidumbiskane mikhaliro yitatu ya Yehova iyo tikuwona mu gulu lake.

³ Wakwamba, “Chiuta wakutemwera yayi.” (Mil. 10:34) Chifukwa cha chitemwa, Yehova wakapeleka Mwana wake kuŵa “sembe yakuwombolera ŵanthu wose.” (1 Tim. 2:6; Yoh. 3:16) Yehova wakugwiliskira ntchito ŵanthu ŵake kuti ŵapharazge uthenga uwemi ku ŵa ŵanthu wose awo ŵakutegherezga. Ntheura wakovwira ŵanandi awo ŵakutegherezga kuti ŵasange chandulo na sembe yakuwombora. Wachiŵiri, Yehova ni Chiuta wa ndondomeko kweniso wa mtende. (1Kor. 14:33, 40) Ntheura, ŵateŵeti ŵake ŵakwenera kuŵa ŵa mtende kweniso kusopa mwandondomeko. Wachitatu, Yehova ni ‘Msambizgi Mukuru.’ (Yes. 30:20, 21) Lekani gulu lake likuŵikapo mtima chomene kusambizga ŵanji Mazgu ghake, mu mpingo na mu uteŵeti. Kasi mpingo wa Ŵakhristu ŵakwambilira ukalongora wuli mikhaliro yitatu iyi ya Yehova? Kasi ŵanthu ŵa Yehova ŵakulongora wuli mikhaliro iyi mazuŵa ghano? Kweniso kasi  mzimu utuŵa ungatovwira wuli apo tikuteŵetera na gulu la Yehova mazuŵa ghano?

4. Kuyana na Milimo 1:8, kasi Yesu wakaphalira ŵasambiri ŵake kuchita ntchito wuli, ndipo ni wovwiri wuli uwo ŵakapokera?

⁴ Mu nyengo ya Ŵakhristu Ŵakwambilira. Uthenga uwo Yesu wakapharazganga ukapeleka chigomezgo ku ŵanthu wose. (Luka 4:43) Iyo wakaphalira ŵasambiri ŵake kuti ŵalutizge ntchito iyo wakambiska na kuchitira ukaboni “ku vigaŵa vyakutali chomene vya charu chapasi.” (Ŵazgani Milimo 1:8.) Kweni pakuchita mulimo uwu ŵakeneranga kuthemba nkhongono zawo yayi. Ŵakakhumbikwiranga mzimu utuŵa panji kuti “movwiri” uwo Yesu wakaŵalayizga.—Yoh. 14:26; Zek. 4:6.

5-6. Kasi mzimu utuŵa ukaŵawovwira wuli ŵasambiri ŵa Yesu?

⁵ Ŵalondezgi ŵa Yesu ŵakapokera mzimu utuŵa pa Pentekoste, 33 C.E. Chifukwa cha wovwiri wa mzimu utuŵa uwu, nyengo yeneyiyo ŵakamba kupharazga, ndipo mu nyengo yichoko waka ŵanthu ŵanandi ŵakazomera uthenga wa makani ghawemi. (Mil 2: 41; 4:4) Apo ŵakamba kutambuzgika, ŵakawopa yayi na kuleka kupharazga. Kweni ŵakapempha Chiuta kuti waŵawovwire. Iwo ŵakalomba kuti: “Zomerezgani ŵazga ŵinu kuti ŵalutilire kuyowoya mazgu ghinu na chikanga.” Pamanyuma, ŵakazuzgika na mzimu utuŵa ndipo ŵakalutilira “kuyowoya mazgu gha Chiuta na chikanga.”—Mil. 4:18-20, 29, 31.

⁶ Ŵasambiri ŵa Yesu ŵakasanganaso na masuzgo ghanyake. Mwachiyelezgero, pa nyengo yira mipukutu ya Malemba yikasangikanga bweka yayi. Kukaŵavya mabuku ghakulongosora Baibolo, nga umo viliri pasono. Kweni ŵasambiri ŵakeneranga kupharazgira ŵanthu awo ŵakayowoyanga viyowoyero vyakupambanapambana. Nangauli ŵakasangana na masuzgo agha, kweni ŵasambiri aŵa ŵakakwaniska kuchita mulimo uwo ukawonekanga nga ŵangafiska yayi. Mu vyaka 30, ŵakaŵa kuti ŵapharazga makani ghawemi “mu chilengiwa chose kusi ku mtambo.”—Kol. 1:6, 23.

7. Mu vyaka 100 ivyo vyajumpha, kasi ŵateŵeti ŵa Yehova ŵakamanya kuti Chiuta wakukhumba kuti ŵachite vichi, ndipo ŵakachita wuli?

⁷ Mazuŵa Ghano. Yehova wakulutilira kulongozga ŵanthu ŵake na kuŵapa nkhongono kuti ŵafiske khumbo lake. Chomene wakuŵalongozga kwizira mu Mazgu ghake Baibolo, ilo likalembeka na wovwiri wa mzimu utuŵa. Mu Baibolo, tikusangamo ivyo Yesu wakachita pa uteŵeti wake, kweniso dango ilo wakapeleka lakuti ŵasambiri ŵake ŵalutizge mulimo uwo iyo wakambiska. (Mat. 28:19, 20) Mu Julayi 1881, magazini ya Gongwe la Mulinda yikati: “Tili kuchemeka panji kuti kuphakazgika kuti ŵanthu ŵatichindikenge yayi, nesi kuti tisambazge, kweni kuti tichite chilichose mwakuti tipharazge makani ghawemi.” Kabuku ka mutu wakuti To Whom the Work Is Entrusted, ako kakafuma mu 1919, kakati: “Ntchito yakuti yichitike njikuru, kweni ntchito iyi nja Fumu, ndipo Fumu yitipenge nkhongono kufiska mulimo uwu.” Nga Mbakhristu ŵakwambilira, ŵabali aŵa nawo ŵakaŵa ŵachikanga ndipo ŵakaŵikapo mtima pa mulimo uwu chifukwa ŵakamanyanga kuti mzimu utuŵa uŵawovwirenge kuti ŵapharazgire ŵanthu ŵa mitundu yose. Nase mazuŵa ghano tili na chigomezgo chose kuti mzimu utuŵa utovwirenge.

8-9. Kasi ni nthowa wuli izo gulu la Yehova lagwiliskirapo ntchito pakupharazga makani ghawemi?

⁸ Gulu la Yehova lagwiliskira ntchito vinthu viwemi kuti lithandazge makani ghawemi. Ivi ni vinthu nga ni mabuku, “Sinema Yakulongosora Chilengiwa,” giramafoni, galimoto za vyakukuzgira mazgu, wayilesi kweniso nthowa zinandi ziphya za tekinoloje. Gulu la Chiuta likung’anamuraso mabuku mu viyowoyero vinandi kuluska kale. Chifukwa wuli? Kuti ŵanthu ŵamitundu yose ŵapulike makani ghawemi mu chiyowoyero chawo. Yehova wakutemwera yayi. Iyo wakayowoyerathu kuti makani ghawemi  ghazamupharazgika “ku mtundu uliwose, fuko lililose, lulimi lulilose, na ŵanthu wose.” (Chiv. 14:6, 7) Iyo wakukhumba kuti ŵanthu wose ŵapulike uthenga wa Ufumu.

⁹ Kweni wuli pakuyowoya za ŵanthu awo ŵakukhala ku malo ghakusuzga kufikako, nga nkhu malo agho ngakuvikilirika chomene? Gulu la Yehova lili kwambiska nthowa zakupharazgira uko kukusangika ŵanthu ŵanandi na chilato chakuti uthenga uwemi ufikire ŵanthu ŵanandi ŵanthena aŵa. Mwachiyelezgero, mu 2001, Wupu Wakulongozga ukazomerezga ŵabali na ŵadumbu ku France kupharazga mwakugwiliskira ntchito tumashelufu na nthowa zinyake zakuyanako. Ndipo pamanyuma, mu vyaru vinyake namo ŵakamba kugwiliskira ntchito nthowa iyi. Upharazgi uwu ukendanga makora chomene. Mu 2011 upharazgi uwu ukambika ku United States mu msumba wa New York, malo agho kukusangika ŵanthu ŵanandi chomene. Mu chaka chakwamba, ŵakagaŵira mabuku 102,129 na magazini 68,911. Ndipo ŵanthu 4,701 ŵakapempha kuti ŵasambirenge Baibolo. Apa vikulongolerathu kuti mzimu utuŵa ukaŵawovwiranga pa ntchito iyi. Ntheura Wupu Wakulongozga ukazomerezga kuti ŵabali na ŵadumbu pa charu chose ŵangagwiliskira ntchito nthowa izi pakupharazga.

10. Kasi tingachita wuli kuti tipharazgenge mwaluso?

¹⁰ Ivyo mungachita. Londezgani ivyo Yehova wakutisambizga pa maungano ghithu Ghachikhristu. Nyengo zose mupharazgenge na ŵanthu ŵa mu gulu linu. Ŵanthu aŵa ŵangamovwirani kuti mupharazgenge na kusambizga mwaluso, kweniso ŵangamukhozgani. Lutilirani kupharazga nangauli mungakumana na masuzgo. Nga umo lemba ilo pajintha nkhani yithu likuyowoyera, tikufiska khumbo la Chiuta na nkhongono zithu yayi, kweni na mzimu utuŵa. (Zek. 4:6) Nakuti ntchito iyo tikuchita nja Chiuta.

11. Kasi wupu wakulongozga mu nyengo ya Ŵakhristu ŵakwambilira ukachita wuli kuti ŵanthu ŵa Chiuta ŵalutilire kukolerana?

¹¹ Mu nyengo ya Ŵakhristu ŵakwambilira. Wupu wakulongozga ku Yerusalemu ukagwiranga ntchito mwakukolerana kuti ulutilire kuchita vinthu mu ndondomeko kweniso mwamtende pakati pa ŵanthu ŵa Chiuta. (Mil. 2:42) Mwachiyelezgero, apo nkhani ya ukotoli yikambika cha  mu 49 C.E., wupu wakulongozga ukadumbiskana nkhani iyi mwakovwirika na mzimu utuŵa. Mpingo ulutilirenge kuŵa wakugaŵikana pa nkhani iyi, mphanyi ntchito yakupharazga yikenda makora yayi. Nangauli Ŵakhristu aŵa ŵakaŵa ŵa Yuda, kweni ŵapositole na ŵanalume ŵalara ŵakalondezganga mitheto ya Ŵayuda yayi, nesi kwendera vya ŵanthu awo ŵakakhozgeranga mitheto iyi. M’malo mwake, ŵakasanda Malemba na kupempha wovwiri wa mzimu utuŵa kuti uŵawovwire kudumura makora nkhani iyi. (Mil. 15:1, 2, 5-20, 28) Kasi chikachitika ntchivichi? Yehova wakatumbika ivyo ŵakasankha, ndipo umoza na mtende vikalutilira. Ntchito yakupharazga nayo yikalutilira kukura.—Mil. 15:30, 31; 16:4, 5.

12. Kasi ntchivichi chikulongora kuti gulu la Yehova ndamtende kweniso likuchita vinthu mwandondomeko?

¹² Mazuŵa ghano. Gulu la Yehova lawovwira kuti pakati pa ŵanthu ŵa Yehova paŵe mtende na umoza. Mu 1895, Zion’s Watch Tower and Herald of Christ’s Presence ya Novembala 15, yikaŵa na nkhani ya mutu wakuti, “Mwakwenelera Ndiposo mu Ndondomeko,” ndipo mutu uwu ukajintha pa lemba la 1 Ŵakorinte 14:40. Nkhani iyi yikati: “Ŵapositole ŵakalemba vinandi ku mpingo wakwambilira pa nkhani ya kuchita vinthu mu ndondomeko . . . Ntheura, tikwenera kuŵikapo mtima kulondezga vinthu ivyo ‘vikalembeka kale kuti vitisambizge.’” (Rom. 15:4) Mazuŵa ghano napo, gulu la Yehova likuŵikapo mtima kuchita vinthu mwandondomeko kweniso kuŵa pa mtende nga umo vikaŵira mu nyengo ya Ŵakhristu ŵakwambilira. Kuti tipulikiske, tiyelezgere kuti mwaluta mu mpingo unyake, kwali ni mwenemumo mu charu chinu panji ku charu chinyake ndipo mukukhumba kukaŵapo pa sambiro la Gongwe la Mulinda. Mukumanyirathu nkhani iyo musambirenge kweniso umo vikwendera pa sambiro la Gongwe la Mulinda. Pakuŵavya chachilendo ndipo mukuŵa ŵakufwatuka. Ni mzimu wa Chiuta uwo ukutovwira kuŵa ŵakukolerana nthena.—Zef. 3:9.

13. Kuyana na Yakobe 3:17, kasi ni mafumbo wuli agho tikwenera kujifumba?

¹³ Ivyo mungachita. Yehova wakukhumba kuti ŵanthu ŵake ŵayezgeyezge “kusungilira umoza wa mzimu mu chakukakira cha mtende.” (Efe. 4:1-3) Ntheura jifumbani kuti: ‘Kasi ine nkhovwira kuti mu mpingo muŵe mtende na umoza? Kasi nkhupulikira awo ŵakulongozga? Kasi ŵanji  mu mpingo ŵanganigomezga chomenechomene usange napika maudindo? Kasi nkhuchita vinthu panyengo yake, nkhovwira ŵanji, kweniso nili wakukhumbisiska kuteŵetera?’ (Ŵazgani Yakobe 3:17.) Usange pali vinyake ivyo mungakhumbikwira kusintha, lombani mzimu utuŵa. Usange mwazomerezga kuti mzimu utuŵa umuwumbani na kumulongozgani, ŵabali na ŵadumbu ŵamutemwaninge chomene na kumuzirwiskani.

14. Kuyana na Ŵakolose 1:9, 10, kasi Yehova wakaŵasambizganga wuli ŵanthu ŵake mu nyengo ya Ŵakhristu ŵakwambilira?

¹⁴ Mu nyengo ya Ŵakhristu ŵakwambilira. Yehova wakukondwa kusambizga ŵanthu ŵake. (Sal. 32:8) Iyo wakukhumba kuti ŵamumanye makora, ŵamutemwenge, na kukhala kwamuyirayira pakuŵa ŵana ŵake ŵakutemweka. Kweni vyose ivi vingachitika yayi kwambura kuŵasambizga. (Yoh. 17:3) Mu nyengo yakale, Yehova wakagwiliskira ntchito mpingo wa Ŵakhristu ŵakwambilira kuti wasambizge ŵanthu ŵake. (Ŵazgani Ŵakolose 1:9, 10.) Mzimu utuŵa panji kuti “movwiri” uwo Yesu wakalayizga, nawo ukawovwira chomene. (Yoh. 14:16) Ukaŵawovwira ŵasambiri kuti ŵapulikiske makora Mazgu gha Chiuta, kweniso ukaŵakumbuska vinthu vinandi ivyo Yesu wakayowoya na kuchita ndipo pamasinda ŵakavilemba mu mabuku gha Makani Ghawemi. Ivi vikawovwira Ŵakhristu ŵakwambilira kuŵa na chipulikano chakukhora, kutemwa Chiuta na Mwana wake, kweniso kuti ŵatemwanenge yumoza na munyake.

15. Kasi Yehova wafiska wuli ivyo wakalayizga pa Yesaya 2:2, 3?

¹⁵ Mazuŵa ghano. Yehova wakayowoyerathu kuti “mu mazuŵa ghaumaliro,” ŵanthu ŵa mitundu yose ŵazamuthilimukira ku phiri lake kuti waŵasambizge nthowa zake. (Ŵazgani Yesaya 2:2, 3.) Uchimi uwu panyengo yasono ukufiskika. Kusopa kwaunenesko kwakwezgeka kuluska visopa vyose vyautesi. Kweniso Yehova wakupeleka chakurya chinandi chauzimu ku ŵanthu ŵake. (Yes. 25:6) Kwizira mwa “muzga wakugomezgeka  na wavinjeru,” Yehova wakutipa chakurya chinandi chauzimu chakupambanapambana. Mwachiyelezgero, pali nkhani zinandi izo tingaŵazga na kupulikizga kweniso pali mavidiyo. (Mat. 24:45) Nase tikujipulika nga ni Elihu mubwezi wa Yobu uyo wakayowoya kuti: “Ni msambizgi nju wali nga [ni Chiuta]?”—Yobu 36:22.

16. Kasi mungachita wuli kuti mukurenge mwauzimu?

¹⁶ Ivyo mungachita. Mzimu wa Chiuta ungamovwirani kuti mulondezgenge ivyo mukusambira mu Mazgu gha Chiuta. Lombani nga ni umo wakachitira wamasalimo. Iyo wakati: “Nisambizgani nthowa yinu, A Yehova. Nendenge mu unenesko winu. Lungani mtima wane kuti wopenge zina linu.” (Sal. 86:11) Ntheura lutilirani kurya chakurya chauzimu icho Yehova wakupeleka kwizira mu Mazgu ghake kweniso gulu lake. Ndipouli, chilato chinu ntchakuti mumanye waka vinthu vinandi yayi. Kweni kuti mukhorwe na unenesko, na kulondezga ivyo mukusambira. Ndipo mzimu wa Yehova ungamovwirani pa nkhani iyi. Kweniso mukwenera kukhozga ŵabali na ŵadumbu. (Heb. 10:24, 25) Chifukwa wuli? Chifukwa ntchakuti ni mbumba yinu yauzimu. Lombani mzimu wa Chiuta kuti umovwirani kuti para mukuzgorapo pa maungano gha mpingo, muyowoyenge kufumira pasi pa mtima. Kweniso para mwapika nkhani mukayidumbe makora. Para muchitenge nthena, mulongorenge Yehova na Yesu kuti mukutemwa “mberere” zawo zakuzirwa.—Yoh. 21:15-17.

17. Kasi mungalongora wuli kuti mukukhozgera mwakugomezgeka gulu la Yehova?

¹⁷ Sonosono apa, gulu lekha ilo liŵengepo pa charu chapasi ni ilo likulongozgeka na mzimu wa Chiuta. Ntheura ŵikanipo mtima kukolerana na gulu la Yehova. Nga ni Chiuta uyo wakutemwera yayi, namwe temwani ŵanthu wose mwa kuŵapharazgira makani ghawemi. Yezgani chitemwa chake, kuti mu mpingo muŵe umoza na mtende, kweniso kuti vinthu vichitikenge mwandondomeko. Ndipo tegherezgani kwa Msambizgi winu Mukuru mwa kurya chakurya chauzimu icho wakupeleka. Para muchitenge nthena, muwopenge yayi apo charu cha Satana chikuluta kuumaliro. M’malo mwake, muŵenge na chikanga na kuŵa pamoza na ŵanthu awo ŵakuteŵetera Chiuta mwakugomezgeka pamoza na gulu lake.