1. Ne a mea e ‵tau o fai faeloa ne Kelisiano papatiso?

A KOE ko oti ne papatiso? Kafai ko oti, ko oti eiloa ne fakaasi atu ne koe i mua o tino katoa a tou fakatuanaki ki a Ieova, mo tou loto fiafia o tavini atu ki a ia mo tena fakapotopotoga. * Kae ‵tau eiloa o gasolo aka o malosi tou fakatuanaki ki a Ieova. Kae ‵tau foki o fakatumau ne koe tou loto talitonu me fakaaoga eiloa ne Ieova tena fakapotopotoga i aso nei.

2-3. Ne a auala e takitaki ei ne Ieova a tena fakapotopotoga i aso nei? Taku mai ne fakaakoakoga.

² I aso nei, e takitaki ne Ieova tena fakapotopotoga i se auala telā e fakaasi mai ei ana uiga, tena fuafuaga mo ana tulaga. Ke onoono nei tatou ki uiga e tolu o Ieova kolā e lavea atu i tena fakapotopotoga.

³ Te mea muamua, a te “Atua e se fakailoga tino.” (Galu. 10:34) Ko te alofa ne fakamalosi aka ei a Ieova ke tuku mai tena Tama e pelā me se “togiola . . . mō tino katoa.” (1 Timo. 2:6; Ioa. 3:16) E fakaaoga ne Ieova ana tino ke talai atu te tala ‵lei ki tino katoa kolā e faka‵logo, ko fesoasoani atu ei latou ki tino e tokouke ke maua a mea aoga mai i te togiola. Te lua, a Ieova se Atua e fakatoka faka‵lei ana mea kae filemu. (1 Koli. 14:33, 40) Tela la, e ‵tau foki mo ana tino tapuaki o tavini atu ki a ia e pelā me se potukau e fakatoka faka‵lei olotou mea kae filemu. Te tolu, a Ieova ko te “faiakoga tafasili i te maluga.” (Isa. 30:20, 21) Tela la, e saga tonu eiloa tena fakapotopotoga o akoako a tena Muna fakaosofia i loto i te fakapotopotoga kae penā foki i te galuega talai. Ne lavea atu pefea a uiga e tolu konei  o Ieova i te fakapotopotoga Kelisiano i aso mua? E lavea atu pefea i aso nei? Kae fesoasoani atu pefea te agaga tapu ki a koe i te taimi e tavini atu ei koe i te fakapotopotoga a Ieova i aso nei?

4. E pela mo te Galuega 1: 8, se a te mea ne fakatonu atu ne Iesu ke fai ne ana soko, kae se a te fesoasoani ka maua ne latou?

⁴ I te senitenali muamua. A te fekau ne folafola ne Iesu, ne tuku atu ei se fakamoemoega ki tino katoa. (Luka 4:43) Ne fakatonu atu a ia ki ana soko ke faka‵soko ne latou te galuega ne kamata ne ia, ke tuku atu ne latou se molimau “ke oko eiloa ki toe koga ‵mao i te lalolagi.” (Faitau te Galuega 1:8.) E tonu, e se mafai o fai ne latou te galuega tenei i te lotou malosi eiloa. Ka ma‵nako latou ki te agaga tapu, ko “te fesoasoani” ne tauto mai a Iesu me ka maua ne latou.—Ioa. 14:26; Saka. 4:6.

5-6. I auala fea ne fesoasoani atu ei te agaga tapu ki soko o Iesu?

⁵ Ne maua ne soko o Iesu te agaga tapu i te Penitekoso 33 T.A. Mai i te fesoasoani o te agaga tenā, ne kamata latou o talai fakavave atu, kae i se taimi toetoe ne talia ne te fia afe o tino a te tala ‵lei. (Galu. 2:41; 4:4) I te taimi ne ‵sae aka ei a ‵tekemaiga ne seki ma‵taku a soko, kae ne ‵saga atu latou ki te Atua ke maua se fesoasoani. Ne ‵talo atu latou: “Talia mai au tavini ke fai‵pati atu faeloa ne latou tau muna mo te loto ‵toa.” Tenā ne ‵fonu ei latou i te agaga tapu kae ne tumau i te “fai‵pati atu ne latou te muna a te Atua mo te loto ‵toa.”—Galu. 4:18-20, 29, 31.

⁶ Ne fe‵paki a soko o Iesu mo nisi tulaga faiga‵ta. E pelā me se fakaakoakoga, e se uke a ‵kopi o te Tusi Tapu i te taimi tenā. E seai foki ne tusi mo fai a sukesukega e pelā mo mea e maua ne tatou i aso nei. Kae e ‵tau mo soko o talai atu ki tino kolā e fai‵pati ki ‵gana kese‵kese. Faitalia a tulaga faiga‵ta konā, ne fai eiloa ne soko finafinau konei se mea telā e foliga mai me e se mafai o fai—i loto fua i se fia sefulu tausaga, ne folafola atu ne latou te tala ‵lei “ki tino katoa mai lalo o te lagi.”—Kolose 1:6, 23.

7. I se 100 tupu tausaga ko ‵teka, ne iloa pefea ne tavini a Ieova a mea kolā e manako te Atua ke fai ne latou, kae ne ‵saga atu pefea latou ki ei?

⁷ I aso nei. E tumau eiloa a Ieova i te takitaki kae fakamalosi ne ia ana tino. E takitaki ne ia ana tino e auala i te Tusi Tapu telā ne fakaosofia ne te agaga tapu o te Atua. E maua ne tatou i ei a te tala o te faiga ne Iesu a tena galuega, mo te fakatonuga ne fai ne ia ki ana soko ke faka‵soko te galuega ne kamata ne ia. (Mata. 28:19, 20) Ne fai mai te mekesini tenei i a Iulai 1881: “A matou ne seki kalagagina io me ne fakaeke ke maua se fakaaloaloga io me fakaputu a koloa e uke, kae ke fakaaoga omotou taimi mo te motou malosi ke talai atu te tala ‵lei.” E fai mai se tusi telā ne ‵lomi i te 1919 ko te To Whom the Work Is Entrusted penei: “E foliga mai me e lasi ‵ki te galuega, kae ko te galuega tenā i a te Aliki kae ka fai eiloa ne matou i tena malosi.” E pelā mo Kelisiano i aso mua, ne ga‵lue malosi eiloa a taina konei i te faiga o te galuega mo te loto tali‵tonu, me ka fesoasoani atu te agaga tapu ke talai atu latou ki vaegā tino katoa. E tali‵tonu foki tatou me ka fesoasoani mai te agaga tapu ki a tatou i aso nei.

8-9. Ne a auala ne fakaaoga ne te fakapotopotoga a Ieova ke fakalauefa atu te faiga o te galuega talai?

⁸ Ne fakaaoga ne te fakapotopotoga a Ieova a toe mea faigaluega ‵lei ke folafola atu ei te tala ‵lei. E aofia i mea faigaluega konei a tusi kolā ne ‵lomi, te “Photo-Drama of Creation,” laleo, mea faka‵lasi leo i motoka, fakasalalauga i letio kae fakamuli nei ko poto ‵fou i mea tau komupiuta. E fai foki ne te fakapotopotoga a te Atua se galuega lasi ‵ki ki te ‵fuliga o tusi i lō aso mua! Kaia? Ko te mea  ke mafai o lagona ne vaegā tino katoa a te tala ‵lei i olotou ‵gana totino. A Ieova e se fakailoga tino; ne ‵valo mai a ia me ka folafola atu a te tala ‵lei “ki atufenua mo matakāiga mo ‵gana mo tino katoa.” (Faka. 14:6, 7) E manako a ia ke maua ne tino katoa a te fekau o te Malo.

⁹ Kae e pefea la a tino kolā e faigata o maua ne tatou ona ko te mea e ‵nofo i fale kolā e puipui faka‵lei? Ko te mea ke mafai o talai atu ki tino e tokouke konei, ne fakaaoga ne te fakapotopotoga a Ieova a auala kese‵kese ke mafai o talai atu i koga e tokouke i ei a tino. E pelā mo te 2001, ne talia ne te Potukau Pule ke fakaaoga a ka talai mo nisi vaegā mea penā i Falani, kae fakamuli ifo i nisi koga aka. Ne ‵gali ‵ki a mea ne iku mai i ei. I te 2011, ne kamata se polokalame i te Iunaite Sitete i se fakai telā e tokouke ‵ki a tino i ei, ko New York. I te tausaga muamua, e ‵tusa mo te 102,129 tusi kae 68,911 mekesini ne tufa atu. Kae toko 4,701 a tino ne fakamolemole mai ke fai olotou akoga faka-te-Tusi Tapu! E mautinoa me ne fesoasoani eiloa te agaga tapu ki te galuega tenei. Tenā ne talia i ei ne te Potukau Pule ke fakaaoga a ka talai i te galuega talai i te lalolagi kātoa.

10. Ne a mea e mafai o fai ne tatou ke momea aka te ‵lei o ‵tou galuega talai?

¹⁰ Mea e mafai ne koe o fai? Fakaaoga faka‵lei a akoakoga e tuku mai ne Ieova ki a tatou i fakatasiga faka-Kelisiano. Ke tumau i te ga‵lue fakatasi i te otou potukau talai. E mafai o maua ne koe i ei a te fesoasoani telā e manakogina ne koe, pelā foki mo fakamalosiga mai fakaakoakoga a nisi tino. Tumau i te galuega talai faitalia a tulaga faiga‵ta. E pelā mo te fakamasauaga mai te ‵tou tusi siki fakavae, e fakataunu ne tatou a te loto o te Atua e auala i te agaga tapu kae e se i ‵tou malosi totino. (Saka. 4:6) Ke masaua la me i te galuega e fai ne tatou i a te Atua.

11. I te auala fea ne ga‵lue ei te potukau pule mo te ‵kau fakatasi ke fakatoka faka‵lei a tino o te Atua?

¹¹ I te senitenali muamua. Ne ga‵lue fakatasi a te potukau pule i Ielusalema ke fakatoka faka‵lei a mea kae ke maua te filemu i tino o te Atua. (Galu. 2:42) E pelā mo te taimi ne sae aka ei te kinauga e uiga ki te pilitome i te 49 T.A., mai lalo i te takitakiga a te  agaga tapu ne onoono a te potukau pule ki te fakalavelave tenā. Moi fai ne tumau a te mavae‵vae o te fakapotopotoga ona ko te fakalavelave tenei, penei ko ‵lave te faiga o te galuega talai. E tiga loa latou ne tino Iutaia, ne seki fakamalosi aka a te kau apositolo mo toeaina ne tuu mo aganuu a te kau Iutaia io me ko latou kolā e fakamalosi aka ne latou a akoakoga konā. Kae ne ‵kilo latou ki te Muna a te Atua mo tena agaga ke takitaki latou. (Galu. 15:1, 2, 5-20, 28) Ne a mea ne iku mai i ei? Ne fakamanuia ne Ieova te lotou fakaikuga, ne manumalo te filemu mo te ‵kau fakatasi kae ne gasolo ki mua te faiga o te galuega talai.—Galu. 15:30, 31; 16:4, 5.

12. Se a te mea e fakaasi mai ei me e fakatoka faka‵lei kae filemu a te fakapotopotoga a Ieova i aso nei?

¹² I aso nei. Ne ga‵lue eiloa te fakapotopotoga a Ieova ke fakatoka faka‵lei a mea kae ke maua te filemu i tino o Ieova. I te 1895, e isi se mataupu ne ‵lomi i te Zion’s Watch Tower and Herald of Christ’s Presence i a Novema 15 e fakaulutala penei “E Fanofano ‵Lei a Mea Katoa Kae Fakatoka Faka‵lei,” e fakavae ki te 1 Kolinito 14:40. E fai mai te mataupu tenā penei: “E uke a pati ne fai atu ne apositolo ki te Lotu i aso mua e uiga ki te fakatokaga faka‵lei o mea . . . Se mea ‵lei ke tumau i te tau‵tali faka‵lei atu ki ‘mea katoa ne tusi i aso mua ke akoako ei tatou.’” (Loma 15:4) E tonu, a te manakoga ke fakatoka faka‵lei a mea kae ke maua te filemu telā ne fakamailoga ki ei a Kelisiano i aso mua ko lavea faka‵lei atu foki i te fakapotopotoga a Ieova i aso nei. Ke fai se fakatusaga, kafai e kau atu koe ki te Sukesukega ki te Faleleoleo Maluga i te suā fakapotopotoga—io me i se fenua fakaa‵tea—e iloa ne koe te auala ka fai ei te sukesukega mo te mataupu ka sau‵tala ki ei. Ka se manavase eiloa koe! A te vaegā ‵kau fakatasi tenei e mafai fua o maua ona ko te fesoasoani o te agaga o te Atua.—Sefa. 3:9, fml.

13. Ne a fesili ka fesili ifo ne tatou ona ko te Iakopo 3:17?

¹³ Mea e mafai ne koe o fai. A Ieova e manako ko ana tino “ke fakatumau ne [latou] te tasi o te agaga telā ko te fusi o te filemu.” (Efe. 4:1-3) Tela la, ke fesili ifo: ‘E mata, e fakamalosi aka ne au te ‵kau fakatasi mo te filemu i te fakapotopotoga? E mata, e fakalogo au ki tino e fai ne latou te takitakiga? E mata, e mafai o fakalago‵lago a tino ki a au maise ma isi ne oku tauliaga i te  fakapotopotoga? E mata, e oko vave atu au ki te taimi, e toka o fesoasoani, kae loto fiafia o tavini atu?’ (Faitau te Iakopo 3:17) Kafai e manakogina ke fai ne fakama‵fuliga, ‵talo ki te fesoasoani o te agaga tapu. Kafai e talia ne koe ke fulifuli malie ne ia ou uiga mo au faifaiga, ka a‵lofa malosi foki ou taina mo tuagane ki a koe kae fakatāua ne latou koe.

14. E ‵tusa mo te Kolose 1:9, 10, ne akoako pefea ne Ieova ana tino i te senitenali muamua?

¹⁴ I te senitenali muamua. E fiafia malosi a Ieova o akoako ana tino. (Sala. 32:8) E manako a ia ke iloa ne latou a ia, ke a‵lofa ki a ia, kae ke ola ki te se-gata-mai e pelā me ko ana tama pele. E se mafai o ‵tupu a mea katoa konei e aunoa mo akoakoga ne tuku mai ne ia. (Ioa. 17:3) Ne fakaaoga ne Ieova te fakapotopotoga Kelisiano i te senitenali muamua ke akoako ei ana tino. (Faitau te Kolose 1:9, 10) A te agaga tapu—ko te “fesoasoani” telā ne tauto mai a Iesu me ka tuku mai ne ia—ne aoga malosi ‵ki. (Ioa. 14:16) Ne fai ei ke ‵loto te malamalama o soko i te Muna a te Atua, kae ne fakamasaua atu foki ki a latou a mea e uke ne faipati kae fai ne Iesu kolā ne tusi fakamuli i tusi Evagelia. Ne fakamalosi aka ne te iloaga tenei a te fakatuanaki o Kelisiano i aso mua e pelā foki mo te lotou a‵lofa ki te Atua, tena Tama, kae penā foki ki nisi tino.

15. I auala fea ne lavea ei ne koe a te fakataunuga o te folafolaga a Ieova i te Isaia 2:2, 3?

¹⁵ I aso nei. Ne ‵valo mai a Ieova me “i te fakaotiotiga o aso fakaoti” ka olo atu a tino mai atufenua katoa ki tena mauga fakatusa ke akoako latou ki ana auala. (Faitau te Isaia 2:2, 3.) Ko lavea ne tatou te fakataunuga o te valoaga tenā. Ko oti ne fakamaluga aka te tapuakiga tonu ke maluga atu i tapuakiga sē ‵ma katoa. Kae ko oko eiloa te lasi o te ‵kaiga faka-te-agaga tenei ne fakatoka ne Ieova! (Isa. 25:6) E auala i “te tavini fakamaoni kae poto” e se tuku mai fua ne ia a meakai e uke, kae ne meakai kese‵kese e uke, kamata mai i mataupu mo lāuga ke oko  ki ata ‵lomi mo vitio. (Mata. 24:45) Ko ‵pau eiloa ‵tou lagonaga mo pati a te taugasoa o Iopu ko Eliu telā ne fai mai penei: “Ko oi la te faiakoga e ‵pau mo [te Atua]?”—Iopu 36:22.

16. Ne a au mea e mafai o fai ke aoga ki a koe a akoakoga mai i a Ieova?

¹⁶ Mea e mafai ne koe o fai. Ka fesoasoani atu a te agaga o te Atua ki a koe ke fakagalue ne koe a mea ko oti ne faitau kae sukesuke koe ki ei i te Muna a te Atua. Ke ‵talo e pelā mo te faisalamo: “Akoako mai au, e Ieova e uiga ki tou auala. Au ka sasale i tau munatonu. Fai ke se fakalotolotolua toku loto ko te mea ke mataku au ki tou igoa.” (Sala. 86:11) Tela la, tumau i te faitau ki meakai faka-te-agaga kolā e tuku mai ne Ieova e auala i tena Muna mo tena fakapotopotoga. E tonu, e se taumafai fua koe ke lasi tau mea e iloa. E manako koe ke fakatalitonu aka ne koe me tenei eiloa te munatonu, kae fakagalue ne koe i tou olaga. Ka fesoasoani atu te agaga o Ieova ke fai ne koe te mea tenā. E manako foki koe o fakamalosi ou taina mo tuagane. (Epe. 10:24, 25) Kaia? Me i a latou ko ou kāiga faka-te-agaga. ‵Talo ki te fesoasoani o te agaga o te Atua ke fesoasoani atu ke fai ne koe ne tali fakamalosi i fakatasiga faka-Kelisiano, kae ke fai ne koe te ‵toe mea e mafai o fai māfai ko isi sou tofiga. Mai te faiga o mea konei, ko fakaasi atu ne koe ki a Ieova mo tena Tama me alofa malosi eiloa koe ki ana “mamoe” pele.—Ioa. 21:15-17.

17. I auala fea e mafai o fakaasi atu ne koe me ‵lago atu eiloa koe mo te fakamaoni ki te fakapotopotoga a Ieova?

¹⁷ I se taimi pili mai mua nei, a te fakapotopotoga fua telā e ‵toe mai i te lalolagi ko te fakapotopotoga telā e takitaki ne te agaga o te Atua. Tela la, ke ga‵lue mo te loto finafinau fakatasi mo te fakapotopotoga a Ieova. Fakaasi atu a te alofa sē fapito o te Atua ki tino, mai te folafola atu o te tala ‵lei ki tino katoa e fetaui mo koe. Fakaakoako ki tena fiafia ke fakatoka faka‵lei a mea mo te filemu mai te fakamalosi aka a te ‵kau fakatasi i te fakapotopotoga. Kae ke fakalogo ki tou Faiakoga Tafasili i te Maluga mai te fakaaoga faka‵lei ne koe a akoakoga faka-te-agaga kolā e tuku mai ne ia. Kafai ko palele atu te lalolagi a Satani, ka se mataku eiloa koe. Kae ka tu eiloa koe mo te loto malosi fakatasi mo tino kolā e tavini atu mo te fakamaoni i te fakapotopotoga a Ieova.