1. AKristu akabhabhatidzwa anodikana kurumbwa eciitei?

IMWIMWI makabhabhatidzwa here? Kana makabhabhatidzwa, makapangidza pamhene kutenda kenyu muna Djehovha uye kuda kenyu kumuseenzera pamwepo no sangano rake. * Zvirokwazvo kuti kutenda kenyu muna Djehovha, kunodikana kurumbwa kecikura. Uye imwimwi munodikana kurumbwa meciwaka rugondo re kuti Djehovha uri kuseenzesa sagano rake nyamasi uno.

2-3. Mu mazuwa ano, Djehovha urikutungamirira kudini sangano rake? Pasai muezaniso.

² Nyamasi uno, Djehovha urikutungamirira sangano rake nge mushobo unopangidza unhu wake, cinangwa cake, uye zvaanoda. Ngationei mawara matatu a Djehovha atinokwanisa kuona mu sangano rake.

³ Rokutanga, “Mwari Aasananguri.” (Zvi. 10:34) Rudo rakaita kuti Djehovha apase Mwana wake kuti “tisudzunurhwe.” (1Ti. 2:6; Ju. 3:16) Djehovha unoseenzesa anhu ake kuti aparidze masoko anopfadza kune anhu ese anopurutana, ngekudaro anobetsera anhu akawanda kuti abetsereke no rusudzunuro. Rocipiri, Djehovha ndi Mwari akarongeka uye we runyararo. (1Ako. 14:33, 40) Nge kudaro, isusu tinoimira kuti anamati ake amuseenzere hingana grupu rakarongeka uye no runyararo. Rocitatu, Djehovha “Mufundisi Mukuru.” (Isa. 30:20, 21) Hino, sangano rake rinobatikana pakufundisa  Soko rake rakafemerhwa, mu ungano uye mu basa rekuparidzira. Mawara a Djehovha aya anokwana kuita matatu akaoneka kudini mu ungano yekutanga ye ciKristu? Iyena unozviitawo kudini mazuwa ano? Uye mwiya mucena ungamubetsera kudini pamunonga meciseenza no sangano ra Djehovha nyamasi uno?

4. Hingana zvakareketywa pana Zviito 1:8, Djesu wakabvunza ateeri ake kuti aitei, uye aizotambira rubetso ripi?

⁴ Mu nguwa yekare. Soko rakaparidzwa na Djesu rakapasa kariro anhu. (Ru. 4:43) Wakabvunza ateeri ake kuti aenderere mberi eciita basa raainga atanga rekupupurira “dakara ku matii ari kure ke nyika.” (Erengai Zviito 1:8.) Zviripamhene kuti awona ainga asikazokwanisi kuita basa iri nge simba rawo pacawo. Iwona aizoda mwiya mucena—“mubetseri” waakagondeswa na Djesu.—Ju. 14:26; Zak. 4:6.

5-6. Mwiya mucena wakabetsera afundi a Djesu nge mushobo upi?

⁵ Ateeri a Djesu akatambira mwiya mucena wa Djehovha pa Pendekosti, 33 K.A. No rubetso re mwiya mucena uu, iwona akatanga kuparidza uye, pa nguwa doko basi, anhu akawanda akapfarira masoko anopfadza. (Zvi. 2:41; 4:4) Paakatanga kuzondwa, afundi a Djesu aazi kusiya basa nge ndaa yekutya, akapsvaka rubetso kuna Djehovha. Awona akanamata eciti: “Muite kuti aseenzi enyu arumbwe ecireketa soko renyu no ushingi.” Awona akadzadzwa nge mwiya mucena uye wakaapa simba ‘rekurumbwa ecireketa soko ra Mwari ne ushingi.’—Zvi. 4:18-20, 29, 31.

⁶ Afundi a Djesu akasonganawo no matambudziko amweni. Ngo muezaniso, makopiya e Matarhwa ainga padoko. Ainga asina mabhuku hingana atinawo nyamasi. Uye afundi aidikana kuparidzira anhu aireketa mireketero yakawanda. Kunyazi no matambudziko aya, iwona akaita zviro zvaiita hingana zvisikabviri—mu makore manganani, iwona akaparidzira masoko anopfadza “ku zvisikwa zvese zviri pasi pe denga.”—Ako. 1:6, 23.

7. Mu makore 100 adarika, aseenzi a Djehovha akaziya kudini zvaidiwa na Mwari uye akaitei?

⁷ Mu mazuwa ano. Djehovha ucirikurumbwa ecitungamirira ne kubetsera anhu ake. Nhungamiriro dzirikupaswa dze cibva mu Soko rakafemerhwa nge mwiya wake. Ndimona matinogumira zvese zvakaizwa na Djesu uye mitemo yake yekuti afundi arumbwe ne basa raakatangisa. (Mt. 28:19, 20) Mu mwedzi wa Khunguru mu gore ra 1881, revhista ii yakati: “Atizi kudaidzirhwa kana kudzodzerhwa kuti tikudzwe uye tiunganidze upfumi, asi kuti tiseenze basa rekuparidzira masoko anopfadza.” To Whom the Work Is Entrusted, kabhuku kakabudiswa muna 1919, kakati: “Basa rakhona rinopangidza hingana kuti rakakura, asi ngera Tenzi, uye nge simba rake ticarikwanisa.” Honde, hingana aKristu ekutanga, hama idzi dzakaita basa ne ushingi, ano rugondo rokuti mwiya mucena waizoabetsera kuti aparidzire mushobo wese we anhu. Dakara na nyamasi uno tinorugondo rimwero.

8-9. Sangano ra Djehovha rakaitei kuti basa rekuparidzira rihambire mberi?

⁸ Sangano ra Djehovha rinoseenzesa mafaramenta akanaka kuti aparidzire masoko anopfadza. Mafaramenta aya anobatanidza mabhuku akadhindwa, ma “Foto-Drama da Criação,” fonógrafos, zviridzwa zve mukaru, kupeperuswa ke mharidzo mu radhiyo uye comptador ne interneti. Sangano ra Mwari ririkuitawo basa re kuturikira zviro zvakaitika kare! Ngei? Kuitira kuti anhu ese azwe  masoko anopfadza mu mureketero wawo. Djehovha aasananguri, iyena wakati masoko anopfadza aizoparidzirhwa “ku madzinza ese no mareketero no anhu.” (Zva. 14:6, 7) Iyena unoda kuti anhu ese azwe masoko e Umambo.

⁹ Kuzoti ayani anoshupha kugumira, zvecida nge ndaa yekuti anogara pa nyumba inorindwa? No cinangwa ce kugumira anhu ese aya, sangano ra Djehovha rino mishobo yakasiyana-siyana kuitira kuti rikwanise kuparidzira anhu ese. Ngo muezaniso, mu gore ra 2001, Dare Rinotungamirira rakatendera kuseenzeswa ke zvingoro zve kuthwara mabhuku uye zvimweniwo ku França uye kuendesawo ku mbuto dzimweni. Uye izvona zvakabudirira. Mu gore ra 2011, urongwa umweni we ndeka wakatangwa ku Estados Unidos mu mbuto dzino anhu akawanda ku Nova York. Mu gore rekutanga, akabudisa mabhuku anokwana kuita, 102 129 uye mabhurushura anokwana 68 911. Uye anhu anokwana kuita 4701 akakumbira kufunda Bhaibheri! Hino, Dare Rinotungamirira rakatendera kuseenzeswa nge zvingoro mu nyika dzese.

10. Ngazvipi zvatinodikana kuita kuti tibudirire mu basa re kuparidzira?

¹⁰ Ngazvipi zvamungaita. Khorovherai mukana wekufundiswa kamunoitwa na Djehovha ku misangano ye cikristu. Seenzai no simba mu basa re kuparidzira no ma grupu enyu. Mukaita izvi, pamweni mucatambira rubetso ramungada, hingana kusimbwa nge miezaniso yakanaka ye anhu amweni. Rumbwai meciparidzira. Hingana zvinoreketwa no tsamba iri kutungamirira fundo ino, isusu tinokwanisa kuita kuda ka Mwari, haiwa no simba redu, asi ne mwiya mucena. (Zak. 4:6) Kudarika zvese, tiri kuita basa ra Mwari.

11. Dare rinotungamirira re mu nguwa yekare rakaseenza kudini kuti arumbwe akabatana no anhu a Djehovha?

¹¹ Mu nguwa dze kare. Dare rinotungamirira re ku Djerusarema, rakaseenza rakabatana kuitira kuti arumbwe akarongeka uye ari mu runyararo no anhu a Mwari. (Zvi.  2:42) Ngo muezaniso, nyaya ye ucekeri pe yakaguma mukati me gore ra 49 K.A., dare rinotungamirira, recitungamirirhwa no mwiya mucena rakarangarira nge zve nyaya ii. Dai ungano yakarumbwa isikazi kubata nge ndaa ii, zvaida kupingaidza basa re kuparidzira. Kunyazi ainga aDjudha, apostori uye anarume ainga akura aazi kutendera kutungamirirhwa no mitemo ii ye aDjudha. Iwona akatanga kupsvaka nhungamiriro mu Soko ra Mwari ecitungamirirhwa no mwiya mucena wake. (Zvi. 15:1, 2, 5-20, 28) Zvakabudirira here? Djehovha wakakomborera cisananguro cawo, runyararo uye kubatana zvakaita kuti basa re kuparidzira ribudirire.—Zvi. 15:30, 31; 16:4, 5.

12. Zvinyi zvinopangidza kuti runyararo ne kurongeka zvicirikuoneka mu sangano ra Djehovha mazuwa ano?

¹² Mu nguwa yedu. Sangano ra Djehovha rakaseenza kuitira kuti pakati pe anhu a Djehovha agare akarongeka uye ne runyararo. Zvino mu gore ra 1895, revhista yaizwi Zion’s Watch Tower and Herald of Christ’s Presence ya November 15 yainga ino nyaya yaiti “Zvinociremera uye Zvakarongeka,” zvecibva pana 1 Akorinti 14:40. Revhista ii yakati: “Apostori ainga ano zvakawanda zvekureketa nge zve Ungano dzepa nguwa yawo zvakaringana ne kurongeka . . . Zvakanaka kurumbwa tecipurutana ‘ngekuti zviro zvese zvakatarhwa kare zvakatarhwa kuti tipangwe.’” (Aro. 15:4) Honde, zvainga zvakaita Ungano dzekare zvakaringana ne runyararo uye kurongeka, nyamasi uno zviri kuonekawo mu sangano ra Djehovha. Kuezanisira: Kana mukapinda misangano ku ungano imweni—kunyazi ku nyika dze kunza—imwimwi maizoziya maitirhwe azvo uye kuti musoro upi waizofundhwa. Nokukasika, maizozwa kuti muri pa nyumba! Cinyi cinoita kuti izvi zviitike?—Zef. 3:9, masoko e pasi.

13. Maererano na Tiyago 3:17 mibvunzo ipi yatinodikana kudzibvunzisa?

¹³ Mungaiteiwo. Djehovha unoda kuti anhu ake “acengete kubatana kwe mwiya mucisungo ce runyararo.” (Aef. 4:1-3) Hino dzibvunzisei kuti: ‘Ndinoita kuti ungano igare inorunyararo uye yakabatana here? Ndinozwira  aya anotungamirira here? Kana ndinoubaba, zvandinoita zvinofundisa amweni here? Ndinononoka, uye ndinoda kuseenzerhwa here?’ (Erengai Tiyago 3:17.) Kana mukaona pamunodika kugadzirisa, namatai mecikumbira mwiya mucena. Pamunonga mecicinja unhu wenyu uye miitiro yenyu, hama ne hazvadzi dzicamuda uye dzicamureremedza.

14. Maererano na Akorosi 1:9, 10, Djehovha wakafundisa kudini anhu ake e mu nguwa yekare?

¹⁴ Mu nguwa dze kare. Djehovha unopfarira maningi kufundisa anhu ake. (Pis. 32:8) Unoda kuti anhu amuziye, amude uye kuti ararame nokusikaperi hingana ana ake. Zvese izvi zvaisazoitapi pasina fundo yaanopa. (Ju. 17:3) Djehovha wakaseenzesa ungano ye ciKristu ye mu nguwa yekare kuti afundise anhu ake. (Erengai Akorosi 1:9, 10.) Mwiya mucena—“mubetseri” wainga wakagondeswa na Djesu—wakaita basa rinokosha. (Ju. 14:16) Mwiya mucena wakaita kuti afundi azwisise nge zve Soko ra Mwari, uye wakaita kuti aedzurire zviro zvakareketwa uye zvakaizwa na Djesu, hingana zvakatarhwa mu Evhangeri. Uzii uu wakabambisa kutenda ke aKristu e pa kutanga pamwepo no rudo rawo kuna Mwari, Mwana werume wake uye kuno anhu ese.

15. Djehovha akadzadzisa kudini gondeso iri pana Isaya 2:2, 3?

¹⁵ Mu nguwa yedu. Djehovha wakareketa kuti “mazuwa ekupedzesera,” anhu e madzinza ese aizoungana mu dunhu rake rekufananidzira kuti afundiswe. (Erengai Isaya 2:2, 3.) Tiri kuona kuti uphorofita uu uri kudzadzika. Kunamata kakacena kakakwidziridzwa kudarika kunamata kese kekunyepa. Zvakadini no zvekurhya zvekunamata zvatiri kupaswa na Djehovha! (Isa. 25:6) Eciseenzesa “museenzi wakagondeka wakangwara,” iyena urikutipasa haiwa zvekurha  zvakawanda basi asi zviro zvakasiyana-siyana zvakaita hingana mharidzo, mavidhiyo e mabhuneka uye mavhidhiyo. (Mt. 24:45) Tinozwa hingana shamwari ya Djobo Eriu, wakati: “Mufundisi upi wakaezana na [Mwari]?”—Djo. 36:22.

16. Ngazvipi zvamungaita kuti mukure pa kunamata?

¹⁶ Mungaiteiwo. Mwiya wa Mwari ucamubetsera kuti museenzese zviya zvamunoerenga uye zvamunofunda mu Soko ra rake. Namatai hingana mutari we pisarema: “Ndifundisei makwanza enyu Djehovha. Ndicahamba mu cokwadi cenyu. Batanidzai mwoyo wangu kuti uthye zina renyu.” (Pis. 86:11) Hino rumbwai mecida zvekurhya zve ku mwiya zvatinopaswa na Djehovha eciseenzesa sangano uye Soko rake. Zvezvirokwazvo, cinangwa cenyu andokuziapi basi. Munoda kukanda cokwadi mu mwoyo menyu uye kuzviseenzesa mu upenyu wenyu. Mwiya mucena wa Djehovha ungamubetsera kuti muzviite. Imwimwiwo munoda kukohomedzesa hama no hanzvadzi dzenyu. (Ahe. 10:24, 25) Ngei? Ngekuti i hama dzenyu dze ku mwiya. Namatai mecikumbira mwiya mucena wa Mwari kuti umubetsere kuti mupase mhinduro dzinobva pa mwoyo ku misangano ye ciKristu uye kuti mukwanise kubudirira pamunonga mune dii rekuita. Ngekudaro, munonga mecipangidzira Djehovha ne Mwana wake kuti munoda maningi “bira” rake.—Ju. 21:15-17.

17. Mungapangidza kudini kuti munotsigira sangano ra Djehovha?

¹⁷ Mu nguwa doko iri kuteera, sangano ricasara pasi pano nge riya rinotungamirirwa no mwiya mucena wa Mwari. Hino shingirirai pa kuseenza no simba ne sangano ra Djehovha. Pangidzai rudo ra Djehovha risikasananguri nge kuparidza masoko anopfadza ku anhu ese amunogumira. Teedzerai rudo rake nge kurumbwa makarongeka uye munorunyararo meciita kuti ungano urumbwe yakabatana. Uye purutanai Mufundisi wenyu Mukuru mecinyasa kurha zvekurha zvaanopasa. Hino nyika ya Sathani painoguma ku mugumo, imwimwi amuzotyi. Pano kudaro, munonga muri pakati pe anhu anoseenza akagondeka kuna Djehovha pamwepo no sangano rake.