1. ¿Bin ya skʼan ya jpastik teme kichʼojtikix jaʼe?

TEME kichʼojtikix jaʼe, kakʼojtikix ta ilel ta komonsitil te ay schʼuunel koʼtantik ta stojol te Jehová sok te ya jkʼan ya x-abatinotik ta stojole. Pero ya skʼan ya stsakxan yip te schʼuunel koʼtantik sok ya skʼan te ayuk smukʼul koʼtantik ta stojol te organisasion yuʼune. *

2, 3. ¿Bintik talelil yuʼun Jehová ya chiknaj ta ilel ta organisasion yuʼune?

² Te Jehová jaʼ yak ta swentainel te lum yuʼune, jich ya jtatik ta ilel te stalel, te skʼanojel yoʼtan sok te mantaliletik yuʼune. Kiltik oxeb talelil yuʼun Jehová te ya xchiknaj ta organisasion yuʼun.

³ Sbabial, te Jehová pajal ya yil te ants winiketik (Hech. 10:34). Ta swenta te skʼuxul yoʼtan, la yakʼ te sNichʼan yuʼun ya stoj te jmultike (Juan 3:16; 1 Tim. 2:6). Te Jehová ya stuuntes te j-abatetik yuʼun ta scholel te lek yachʼil kʼop, jich ya sta slekilalik te ants winiketik ta swenta te la yak sba ta lajel te sNichʼane. Schebal, te Jehová jaʼ Dios yuʼun lamalkʼinal sok lek chajpanbil yuʼun spisil, jaʼ yuʼun ya skʼan te ayuk lamalkʼinal sok te lek chajpanbil te lum yuʼune (1 Cor. 14:33, 40). Yoxebal, te Jehová jaʼ te Mukul Jpʼijubteswanej (Is. 30:20, 21). Te organisasion yuʼun ya spʼijubtesotik ta kongregasion sok ya spʼijubtes te ants winiketik te kʼalal ya jcholbeytik skʼop Dios. ¿Bin-utʼil la yakʼ ta ilel  te kongregasion ta sbabial siglo te talelil yuʼun Jehová? ¿Bin-utʼil ya yakʼ ta ilel te lum yuʼun ta kʼajkʼal ini? ¿Bin-utʼil ya skoltayotik te chʼul espiritu yuʼun ya x-abatinotik ta stojol te Jehová?

4. Jich bitʼil ya yal Hechos 1:8, ¿bin aʼtelil akʼbot spasik te jnopojeletik sok bin koltayel akʼbotik?

⁴ Ta sbabial siglo. Te bin la yakʼ ta nopel te Jesús la yakʼbey smukʼul yoʼtan spisil te ants winiketike (Luc. 4:43). La yalbey ta mantal te jnopojeletik te ya spasik te aʼtelil la sjach jilele, jaʼ te ya scholik te skʼop Dios «cʼalal ta stiʼil bahlumilal» (kʼopona Hechos 1:8). Pero ma xjuʼ ya spas ta stukelik, jaʼ koltayotik yuʼun te chʼul espiritu te la yichʼik ta patile (Juan 14:26; Zac. 4:6).

5, 6. ¿Bin-utʼil koltayotik yuʼun te chʼul espiritu te jnopojeletike?

⁵ Te jnopojeletik yuʼun Jesús la yichʼik te chʼul espiritu ta Pentekostes ta jaʼbil 33. Kʼalal la yichʼik te chʼul espiritue, jajchik ta scholel skʼop Dios sok maba bayal tiempo ta patil bayal ants winiketik ochik ta jnopojel (Hech. 2:41; 4:4). Maba xiwik te kʼalal kajik ta nutsel sok la skʼanbeyik koltayel te Jehová, jich la yalik: «Aʼbeya yip yoʼtanic te aʼbatetic awuʼun ta yalel te acʼop». Jich «nojesbot ta yoʼtanic te Chʼul Espíritu, soc bayel yip yoʼtanic la yalic te scʼop Diose» (Hech. 4:18-20, 29, 31).

⁶ Pero ay yan te bintik la sitintayik. Maʼyuk bayal kopiaetik-a yuʼun te sJun Dios sok maʼyuk yuʼunik-a te publikasionetik te ay kuʼuntik ta ora ini. Jaʼnix jich la scholik skʼop Dios ta yantik kʼopiletik. Manchukme jich la sitintayik te jnopojeletike, la spasik te bin ma xjuʼ ta pasel yilel-ae, ta treintanax jaʼbil juʼ yuʼunik scholel skʼop Dios ta «stojol spisilic te ayic ta yeʼtal chʼulchan» (Col. 1:6, 23).

7. Te ayix tal sien jaʼbile, ¿bin-utʼil la snaʼik te bin aʼtelil akʼbilik yuʼun te Jehová sok bin la spasik te ermanoetik-abi?

⁷ Ta kʼajkʼal ini te Jehová jaʼnix jich ya skoltay sok ya swentain te lum yuʼune. Te koltayel-abi talem ta sKʼop Dios, tey ya jtatik-a te bin la spas te Jesús sok te mantalil la yalbey te jnopojeletik te ya spasik te aʼtelil la sjach jilele (Mat. 28:19, 20). Te rebista yuʼun julio te lokʼ ta 1881, jich la yal: «Maba la kichʼtik tsael yuʼun ya kichʼtik ichʼel ta mukʼ sok yuʼun ya jtsob jkʼulejaltik, la kichʼtik tsael swenta jaʼ ya xbajt ta koʼtantik scholel te lek yachʼil kʼope». Te foyeto te lokʼ ta 1919 To Whom the Work Is Entrusted (Te machʼatik ya spasik te aʼtelil) jich la yal: «Ma xjuʼ ta pasel yilel, pero jaʼ ya skoltayotik te Kajwaltike, melel jaʼ yuʼun te aʼtele». Te ermanoetik-abi la scholik skʼop Dios sok yip yoʼtanik jich bitʼil te jnopojeletik ta sbabial siglo, snaʼojik-a te jaʼ ya xkoltayotik yuʼun te chʼul espiritue. Jaʼnix jich te joʼotike jnaʼojtik te ya skoltayotik-euke.

8, 9. ¿Bintik stuuntesoj te organisasion yuʼun Jehová swenta ya yichʼ cholel te skʼop Diose?

⁸ Te organisasion yuʼun Jehová bayal bin stuuntesoj yuʼun ya yichʼ cholel te skʼop Diose. Jich bitʼil te junetik, te «Foto-Drama de la Creación», te gramófono, te karroetik te ay sbosinaul sok te radio, ta ora ini jaʼnix jich ya stuuntes te Internet. Te organisasion yuʼun Jehová jaʼnix jich skʼasesoj ta bayal kʼopiletik te junetike. ¿Bin yuʼun? Swenta jich ya yaʼiyik te lek yachʼil kʼop «spisil nacionetic, tsʼumbaliletic, cʼopiletic soc pueblohetic» (Apoc. 14:6, 7). Te Jehová jaʼ ya  skʼan te spisil te ants winiketik ya yaʼiyik te lek yachʼil kʼop yuʼun te Wentainele.

⁹ ¿Bin-utʼil ya jcholbeytik skʼop Dios te machʼatik nainemik ta mukʼul edifisioetik te ma xjuʼ ya x-ochotik tey-ae? Te Jehová la skoltay te j-abatetik yuʼun swenta ya xjajch scholik skʼop Dios ta banti ya xkʼax bayal ants winiketik. Ta 2001 te Kuerpo Gobernante la yal te ya xjuʼ ta tuuntesel karritoetik sok eksibidoretik ta Francia. Ta patil la stuuntesik ta yantik lugaretik, bayal bin lek lokʼ yuʼun-a. Ta 2011 ta Nueva York (Estados Unidos) jajch scholik skʼop Dios te banti ay bayal ants winiketik. Ta sbabial jaʼbil la spukik 102,129 libroetik sok 68,911 rebistaetik, soknix la skʼanik kurso yuʼun Biblia 4,701 ta tul. Chikan ta ilel te jaʼ ta swenta te chʼul espiritu te juʼ te aʼtelil ini, jaʼ yuʼun te Kuerpo Gobernante la yal te ya yichʼ tuuntesel eksibidoretik ta swolol Balumilal.

10. ¿Bin ya skʼan ya jpastik yuʼun ya jnaʼtikxan scholel skʼop Dios sok pʼijubteswanej?

¹⁰ Te bin ya skʼan ya jpastik. Jtuuntestik te bintik ya yakʼ jnoptik te Jehová ta tsoblejetik. Jcholtik skʼop Dios sok te jgrupotik ta kongregasion, melel ya xjuʼ ya stij koʼtantik sok ya skoltayotik te ejemplo yuʼunik swenta ya jnaʼtikxan scholel skʼop Dios sok pʼijubteswanej. Mame jkom jbatik manchukme ay jwokoltik, te teksto yuʼun te artikulo ini ya yakʼ jnaʼtik te ma ta swentauk kiptik te bin ya jpastike, jaʼ ta swenta te schʼul espiritu te Diose (Zac. 4:6). Te aʼtelil ya jpastike jaʼme yuʼun te Diose.

11. ¿Bin la spas te kuerpo gobernante ta sbabial siglo yuʼun ayuk lamalkʼinal?

¹¹ Ta sbabial siglo. Te kuerpo gobernante te ay ta Jerusalén-ae, jun-nax aʼtejik yuʼun ay lamalkʼinal sok lek chajpanbil te lum yuʼun te Diose (Hech. 2:42). Jich bitʼil ta jaʼbil 49 te kuerpo gobernante la schajpan te kʼop jajchem ta swenta te sirkunsision, jaʼ koltayotik yuʼun te chʼul espiritue. Te manchuk chajpaj te kʼope  maniwan ayukix lamalkʼinal ta kongregasion-a sok maniwan la yichʼix cholel-a te skʼop Diose. Manchukme judioetik-a te jpuk-kʼopetik sok te ansianoetik, maba la skʼayinbey skostumbreik te judioetike. La sleik koltayel ta sKʼop Dios sok la skʼanik te chʼul espiritue (Hech. 15:1, 2, 5-20, 28). Jaʼ yuʼun akʼbotik bendision yuʼun te Jehová sok ayin lamalkʼinal ta kongregasion, jich maba kejchaj te scholel skʼop Diose (Hech. 15:30, 31; 16:4, 5).

12. ¿Bin-utʼil ya xchiknaj ta ilel te jun-nax ayotik sok te lek chajpanbil te bin ya spas te organisasion yuʼun Jehová?

¹² Ta kʼajkʼal ini te organisasion yuʼun Jehová jaʼnix jich spasoj tulan yuʼun ayuk lamalkʼinal sok te lek chajpanbiluk te lum yuʼun te Diose. Ta jun artikulo te sbiilinej «Yichʼojuk swentail sok lek chajpanbiluk» * te lokʼem skʼoplal ta 1 Corintios 14:40, jich la yal: «Te jpuk-kʼopetik la yalbeyik te sbabial kongregasionetik te lek chajpanbiluk te bin ya spasike [...]. Mukʼ skʼoplal te ya kichʼtik ta wenta te bintik tsʼibaybil jilel ta sJun Dios» (Rom. 15:4). Ta lum yuʼun Jehová ay lamalkʼinal sok lek chajpanbil te bintik ya spase. Jun ejemplo, teme ya xbootik ta tsoblej ta yan kongregasion o ta yan nasion ya jnaʼtik bitʼil ya yichʼ kʼasesel Te J-ilkʼinal ta toyol sok bin artikulo yakik ta snopel. Jich ya kaʼiytik te ayotik ta jkongregasiontik. Te bitʼil jun-nax ayotik jaʼ ta swenta te schʼul espiritu te Diose (Sof. 3:9).

13. Teme ay ta koʼtantik te bin ya yal Santiago 3:17, ¿bin jojkʼoyel ya skʼan ya jpasbey jbatik?

¹³ Te bin ya skʼan ya jpastik. Te Jehová ya skʼan te ya jpastik tulan yuʼun junuknax ayotik sok te ayuk lamalkʼinal (Efes. 4:1-3). Jaʼ yuʼun jojkʼoybey jbatik: «¿Yabal xkoltaywanon yuʼun ayuk lamalkʼinal sok te jun ayotik ta kongregasion? ¿Yabal jchʼuunbey skʼop te ermanoetik te ay yaʼtelik ta kongregasion? Teme ay kaʼtel ta kongregasion ¿aybal smukʼul yoʼtanik ta jtojol te yantike? ¿Yabal jpas ta yorail te  bin kaloje? Sok ¿yabal jmulan skoltayel te yantike?» (kʼopona Santiago 3:17). Teme ya kiltik te ay banti maba yakotik ta spasele, jkʼanbeytik te schʼul espiritu te Jehová. Teme ya kakʼ x-aʼtej ta koʼtantik te chʼul espiritue, yame sjeltay te jtaleltik sok jich kʼux ya yaʼiyotik ta yoʼtan te ermanoetike.

14. Jich bitʼil ya yal ta Colosenses 1:9, 10, ¿bin la stuuntes te Jehová yuʼun ya spʼijubtes te jchʼuunjeletik ta sbabial siglo?

¹⁴ Te Jehová ya smulan spʼijubtesel te lum yuʼune (Sal. 32:8). Ya skʼan te yakuk jnaʼbeytik sbae, te kʼuxuk ta koʼtantik sok te ya xkuxinotik ta sbajtelkʼinal, jaʼ yuʼun ya spʼijubtesotik (Juan 17:3). Ta sbabial siglo, te Jehová la stuuntes te kongregasion yuʼun ya spʼijubtes te jchʼuunjeletike (kʼopona Colosenses 1:9, 10). Jaʼnix jich la stuuntes te schʼul espiritu swenta ya xkʼot ta yoʼtanik te bin ya yal te sKʼope sok yuʼun ya xjul ta yoʼtanik te bintik la yal sok te bintik la spas te Jesuse, melel mato tsʼibaybil-a te Ebanjelioetike (Juan 14:16). Jich la sta yip schʼuunel yoʼtanik sok chʼixan skʼuxul yoʼtanik ta stojol te Jehová, te Jesús sok ta stojol te yermanotakike.

15. ¿Bin-utʼil yak ta kʼoel ta pasel te bin la yal te Jehová ta Isaías 2:2, 3?

¹⁵ Ta kʼajkʼal ini. Te Jehová la yal te «ta nopol slajibal cʼahcʼal» bayal ants winiketik ya xmoik ta wits yuʼun swenta ya snopik te beetik yuʼune (kʼopona Isaías 2:2, 3). Jich yak ta kʼoel ta pasel ta kʼajkʼal ini. Te bitʼil ya kichʼtik ta mukʼ te Jehová ma spaj te bitʼil ya spasik te yantik relijione. Te Jehová ya stuuntes «te aʼbat te jun yoʼtan soc pʼij» swenta ya yakʼbotik «bayel lequil weʼelil» jich bitʼil te artikuloetik, diskursoetik sok bayal ta chajp bideoetik  (Mat. 24:45; Is. 25:6). Jich ya kaʼiy jbatik te bitʼil la yaʼiy sba te Elihú te jich la yal ta swenta te Diose: «¿Machʼa jpʼijubteswanej te pajal soque?» (Job 36:22).

16. ¿Bin ya skʼan ya jpastik swenta ya stsakxan yip te schʼuunel koʼtantike?

¹⁶ Te bin ya skʼan ya jpastik. Te chʼul espiritu ya skoltayotik yuʼun ya jpas ta jkuxlejaltik te bin ya jnoptik ta Biblia. Jkʼanbeytik koltayel te Jehová jich bitʼil te salmista te jich la yal: «Aʼbon quil, Jehová, te be awuʼun, hich ya xbehenon a tey ta smelelil cʼop awuʼune; aʼbon yichʼ yip te coʼtan yuʼun hich ya quichʼ ta mucʼ te abihile» (Sal. 86:11). Jich yuʼun jkʼopontik sok jnoptik te Biblia sok te publikasionetik ya yakʼbotik te organisasion yuʼun te Jehová. Pero mame jaʼuknax ya jkʼopontik, ya skʼan te yakuk stij koʼtantik sok te ya jpas ta jkuxlejaltik, jaʼ ya skoltayotik te schʼul espiritu te Jehová. Kakʼbeytik smukʼul yoʼtan te kermanotaktik, melel jich kʼoem bitʼil jfamiliatik (Heb. 10:24, 25). Jkʼanbeytik te schʼul espiritu te Jehová, jaʼ ya skoltayotik yuʼun ya xlokʼ ta koʼtantik te jkomentariotik sok yuʼun ya jpastik ta lek te asignasion ya jkʼasestik ta tsoblej. Teme jich ya jpastike, ya kakʼbeytik yil te Jehová sok te Jesús te kʼux ta koʼtantik te tuminchijetik yuʼunike (Juan 21:15-17).

17. ¿Bin-utʼil ya kakʼtik ta ilel te ya jkoltaytik te lum yuʼun te Jehová?

¹⁷ Ta pajel chaʼbejxanix, jaʼnax ya xjil ta Balumilal te lum yuʼun Jehová. Jaʼ yuʼun jkoltaytik sok sbujtsʼ koʼtantik. Kakʼtik ta ilel te skʼuxul koʼtantik sok pajaluk ya kiltik te ants winiketik te kʼalal ya jcholtik te skʼop Diose. Te Jehová ya skʼan te ayuk lamalkʼinal sok te junuk ayotik ta kongregasion, jichuk ya jpastik-euk. Jchʼam kaʼiytik spisil te bin ya yakʼ jnoptik te Mukul Jpʼijubteswanej, jich maba ya xiwotik te kʼalal ya yichʼ lajinel te balumilal yuʼun te Satanase. Te bin ya jpastike jaʼ te jun koʼtantik ya x-ayinotik sok te lum yuʼun Jehová.