1. Мар азьланяз но кароно христиан муртлы пылатӥськемез бере?

 ПЫЛАТӤСЬКЫКУЗ христиан мурт вань адямиос азьын возьматэ, со Иеговалы оске но солэн калыкеныз ӵош ужамез-тыршемез потэ шуыса. Пылатӥськемез бере солы азьланяз но Иеговалы осконзэ юнматоно. Озьы ик тыршоно эшшо но юнгес оскыны, Инмар аслаз организациеныз b кивалтэ шуыса.

2, 3. Кызьы Иегова аслаз организациеныз кивалтэ? Вералэ примеръёс.

² Со, кызьы Иегова аслаз организациеныз кивалтэ, возьматэ, кыӵе со Инмар луэ, кыӵе солэн эрикез но курон-косонъёсыз. Озьы ик отысь адӟыны луэ Иеговалэсь куинь сямъёссэ. Ойдолэ соосты али эскеромы.

³ Нырысетӥез, Иегова вылтус шоры уг учкы (Ап. уж. 10:34). Инмар, адямиосты яратэменыз, аслэсьтыз Пизэ сётӥз, «ваньзэ сьӧлыкъёслэсь мозмытон понна» (1 Тим. 2:6; Иоанн 3:16). Иегова косӥз аслэсьтыз ужась-тыршисьёссэ ӟеч иворез тодытыны котькинлы, кин соосты кылзоз. Озьы Инмар утиськыны луонлык сётэ ваньмызлы, кинъёс дун тыронлы оскозы. Кыкетӥез, Иегова — радлыклэн но тупаса улонлэн Инмарез (1 Кор. 14:33, 40). Соин ик солэн ужась-тыршисьёсыз ваньзэ радызъя лэсьто но тупаса уло. Куинетӥез, Иегова кадь визьнодъясь ӧвӧл ни (Иов 36:22). Соин ик солэн организациез туж тырше дышетыны милемыз Библиысь зэмлыкъёслы, озьы ик юрттэ милемлы та зэмлыкъёслы мукетъёссэ дышетыны. Кызьы христианъёс Иеговалэсь та сямъёссэ адӟем каризы нырысетӥ даурын? Кызьы Иеговалэн  Адӟись-Ивортӥсьёсыз адӟем каро Инмарлэсь асьме нуналъёсы? Но кызьы святой дух юрттэ тӥледлы Иеговалэн организациеныз ӵош солы ужаны-тыршыны?

4. Мар карыны косӥз Иисус аслэсьтыз дышетскисьёссэ, Апостолъёслэсь ужъёссэс 1:8 лыдэ басьтоно ке, но кыӵе юрттэт сётыны со соослы кылзэ сётӥз?

⁴ Нырысетӥ даур. Иисуслэн иворез вань адямиослы оскон сётӥз (Лука 4:43). Со дышетскисьёссэ косӥз кутскем ужзэ азьланьтыны но «музъемлэн пумысеныз пумозяз ик» тодытыны. (Лыдӟе Апостолъёслэсь ужъёссэс 1:8.) Ас кужыменызы гинэ соос та ужез быдэстыны ӧй быгатысалзы. Соослы кулэ вал святой дух — «Буйгатӥсь», яке юрттӥсь, кудзэ ыстыны Иисус кылзэ сётӥз (Иоанн 14:26; Зах. 4:6).

5, 6. Кызьы святой дух Иисуслэн дышетскисьёсызлы юрттӥз?

⁵ Иисуслэн дышетскисьёсыз святой дух басьтӥзы асьме вакытысь 33-тӥ арын Витьтонэтӥ нуналэ. Та духлэн юрттэменыз, соос соку ик тодытыны кутскизы но, вакчи дыр куспын трос адямиос, ӟеч иворез кылыса, сое улоназы пыртӥзы (Ап. уж. 2:41; 4:4). Куке христианъёс уйылон-уллянъёсын пумиськизы, соос ӧз кышкалэ, нош Инмарлэсь юрттэт куризы. Соос вӧсяськизы: «Аслад ляльчиосыдлы чик кышкатэк Тынэсьтыд кылдэ вераны луонлык сёт». Собере «ваньзы, Святой Духен тыр луыса, Инмар кылэз кышкатэк вераны кутскизы» (Ап. уж. 4:18—20, 29, 31).

⁶ Иисуслэн дышетскисьёсыз мукет шуг-секытъёсын но пумиськылӥзы. Кылсярысь, Священной Гожтэмъёсын свитокъёс со дыре ӧжыт вал. Со сяна, соослэн ӧй вал дышетон тӥрлыкъёссы, кудъёсыз милям туннэ вань. Озьы ик соослы тодытоно вал пӧртэм кылын вераськись адямиослы. Но та шуг-секытъёс шоры учкытэк, ӟырдыт мылкыдын тодытӥсьёс быдэстыны луонтэмзэ лэсьтӥзы кадь: ог 30 ар ортчыса, ӟеч ивор «ин улын улӥсь вань калыкъёслы тодытэмын» вал (Кол. 1:6, 23).

7. Кызьы азьло малпало вал Инмарлэн ужась-тыршисьёсыз со сярысь, мар соослэсь Инмар возьма? Мар соос каризы?

⁷ Асьме нуналъёс. Азьло сямен ик, Иегова ужась-тыршисьёсыныз кивалтэ но соослы кужым сётэ аслэсьтыз эриксэ быдэстыны. Валтӥсез, мар пыр Иегова милемын кивалтэ,— со солэн Кылыз, Библия. Отын гожтэмын Иисуслэн ужам-тыршемез сярысь, озьы ик дышетскисьёссэ солэсь ужзэ азьланьтыны курон-косонэз сярысь (Матф. 28:19, 20). 1881-тӥ арын пӧсьтолэзь понна поттэм «Возьмаськон башняын» верамын вал: «Куке Иегова милемыз бырйиз, яке зырӟиз, со ӧз малпа, милемыз адямиос мед данъялозы яке ми узырлык мед люкаломы шуыса. Нош Инмарлэн потэ вал, ваньзэ, мармы милям вань, ми ӟеч иворез тодытон понна мед кутомы шуыса». 1919-тӥ арын поттэмын вал «Кинлы оскемын уж» брошюра, кудаз ивортӥсьёслы кивалтэт сётӥськиз, кызьы ӟеч иворез верано. Отын пусйиськиз: «Туж трос уж лэсьтоно, но та Господьлэн ужез, соин ик, сое быдэстон понна, со милемлы кужым сётоз». Нырысетӥ даурысь христианъёс сямен, та вын-агайёс кышкатэк но тыршыса та ужез быдэсъязы. Соос оскизы, вань адямиослы тодытыны соослы святой дух юрттоз шуыса. Ми но солы ик оскиськомы.

8, 9. Кыӵе тодытон амалъёсты Иеговалэн организациез азьвыл уже кутӥз но кыӵе амалъёсты со асьме нуналъёсы кутэ?

⁸ Ӟеч иворез вӧлмытон понна, Иеговалэн организациез котьку уже кутэ тужгес но умой тӥрлыкъёсты. Соос пӧлы печатлам но электрон публикациос пыро. Нош азьвыл тодытон понна уже кутӥзы «Кылдытон сярысь фотодрамаез», патефонъёсты, рупоръёсын машинаосты но радиоез. Озьы ик малпаське берыктон уж сярысь, кудзэ быдэсто Иеговалэн ужась-тыршисьёсыз,— сыӵе уж талэсь азьвыл ноку ӧз нуиськы! Ваньмыз та лэсьтӥське, адямиос ӟеч иворез вордскем кылынызы мед кылозы шуыса. Иегова вылтус шоры уг учкы; со азьло ик вераз, Эксэйлык сярысь ивор  «вань выжыослы, пӧртэм кылын вераськисьёслы, калыкъёслы, улыослы-бечеослы» тодытэмын луоз шуыса (Усьт. 14:6, 7). Инмарлэн потэ, та иворез вань адямиос мед кылозы шуыса.

⁹ Но адямиосты дорысьтызы котьку ик шедьтыны уг луы. Кылсярысь, куд-огъёсыз уло умой утиськись коркаосын. Сыӵе адямиослы Инмар сярысь тодыны юрттон понна, радъямын вал трос калыко интыосын пӧртэм амалъёсын тодытон. Кылсярысь, 2001-тӥ арын Франциын вын-агайёс, Кивалтӥсь кенешлэн лэземез бере, публикациосынымы стендъёсын тодытыны кутскизы. Берлогес та тодытон амалэз уже кутӥзы мукет шаеръёсын но. Со умой емышъёс вайиз. 2011-тӥ арын Нью-Йорклэн тужгес но трос калыко ёросаз уже кутэмын вал нимысьтыз программа, бадӟым каръёсысь трос калыко интыосын тодытон понна. Нырысетӥ ар куспын вӧлмытэмын вал 102 129 книгаос но 68 911 журналъёс. Со сяна, 4 701 адями куриз соин Библиез дышетыны! Ми адӟимы, Иегова святой духеныз та ужез нуыны юрттӥз шуыса. Соин ик Кивалтӥсь кенеш лэзиз публикациосын стендъёсты быдэс дунне вылын уже кутыны.

10. Мар карыны луоз, эшшо но быгатыса тодытон но мукетъёссэ дышетон понна?

¹⁰ Мар карыны быгатӥськоды тӥ. Христиан пумиськонъёсын Иегова милемыз тодытыны дышетэ. Басьтэм тодон-валандэс уже кутэ. Ялан ӟеч иворез вералэ тодытон ужез нуись группаысьтыды вын-агайёсын но сузэр-апайёсын. Соос тӥледлы визь-кенеш сётыны быгатозы, кызьы эшшо но умойгес тодытыны но мукетъёссэ зэмлыклы дышетыны. Со сяна, соослэн примерзы тӥлесьтыд мылкыддэс ӝутыны быгатоз. Шуг-секытъёс шоры учкытэк, азьланяз но тодытон уже пыриське. Кызьы гожтэмын та статьялэн валтӥсь кылбураз, ми ас кужыменымы ӧвӧл, нош святой духлэн юрттэменыз Инмарлэсь эриксэ быдэсъяськомы (Зах. 4:6). Ми оскыны быгатӥськомы, Иегова милемлы кулэ луись кужым сётоз шуыса, малы ке шуоно ми солэсь ужзэ нуиськомы.

11. Кызьы нырысетӥ даурын кивалтӥсь кенеше пырись вын-агайёс Инмарлэн калыкез пӧлын радлыкез но тупаса улонэз утьыны тыршизы?

¹¹ Нырысетӥ даур. Иерусалимысь кивалтӥсь кенеше пырись вын-агайёс огкылысь ужазы-тыршизы,  Инмарлэн калыкез пӧлын радлык но тупаса улон мед луоз шуыса (Ап. уж. 2:42). Кылсярысь, асьме вакытысь 49-тӥ арын христианъёс пӧлын вандӥськон сям пумысен ченгешон потӥз. Кивалтӥсь кенеш, святой духлэн юрттэменыз, та юанэз эскериз. Та ченгешон сэрттэмын-пертчемын ӧй луысал ке, соку вын-агайёс но сузэр-апайёс азинлыко тодытыны ӧй быгатысалзы. Иерусалимысь апостолъёслы но тӧроослы ужпум кутыны ӧз люкетэ иудейёслэн сям-йылолъёссы но, та сямъёсты быдэсъяны косӥсьёс но. Шонер ужпум кутон понна, вын-агайёс Иеговалэн Кылысьтыз кивалтэт утчазы но солэсь святой духсэ куризы (Ап. уж. 15:1, 2, 5—20, 28). Кыӵе со пайда вайиз? Иегова кивалтӥсь кенешлэсь кутэм ужпумзэ бакель кариз: христианъёс тупаса но огкылысь улыны кутскизы но ӟеч иворез мылысь-кыдысь тодытыны азьланьтӥзы (Ап. уж. 15:30, 31; 16:4, 5).

12. Кытысь адӟиське, Иеговалэн организацияз радлык но тупаса улон вань шуыса?

¹² Асьме нуналъёс. Иеговалэн организациез котьку тыршиз, Инмарлэн ужась-тыршисьёсыз пӧлын радлык но тупаса улон мед луоз шуыса. 1895-тӥ арын 15-тӥ шуркынмон понна поттэм «Возьмаськон башняын» печатламын вал «Озьы, кызьы кулэ, радызъя» статья, кудӥз пыкиськиз 1 Коринфъёслы 14:40 вылэ. Отын гожтэмын вал: «Апостолъёс нырысетӥ даурысь христианъёслы трос веразы святойёслэн умой радъям кенешсы сярысь... Азьланяз но туж кулэ кылзӥськыны солэсь, мар гожтэмын вал „асьмемыз визьман-дышетон понна“» (Рим. 15:4). Туннэ но Иеговалэн организациез, нырысетӥ даурысь христианъёс сямен, вань кужмысьтыз тырше, кенешъёсын радлык но тупаса улон мед луоз шуыса. Тани одӥг гинэ пример: куке тӥ «Возьмаськон башняез» эскероды мукет кенешын, яке мукет шаерын но, тӥ тододы, кызьы эскерон ортчытӥськоз но кыӵе статья эскериськоз. Ваньмыз луоз озьы ик, кызьы со ортчысал тӥляд кенешады! Таӵе огкылысь улон Инмарлэн святой духезлэн юрттэменыз гинэ луыны быгатэ (Соф. 3:9).

13. Кыӵе юанъёс аслыд сётоно, Иаковлэсь 3:17 лыдэ басьтоно ке?

¹³ Мар карыны быгатӥськоды тӥ. Иеговалэн потэ, солэн ужась-тыршисьёсыз «одӥг духен тупаса, огмылкыдын улыны» мед тыршозы шуыса (Еф. 4:1—3). Соин ик асьтэлэсь юалэ: «Юрттӥсько-а мон кенешлы огкылысь но тупаса улыны? Кылзӥськисько-а мон соослэсь,  кинъёслы кенешын кивалтэт оскемын? Быгато-а мукетъёсыз мон вылэ оскиськыны, тужгес но соку, куке мон кенешын дано ужъёсты быдэсъясько? Лэсьтӥсько-а мон ваньзэ дырыз дыръя? Сюлмысь-а мон мукетъёсызлы юрттӥсько?» (Лыдӟе Иаковлэсь 3:17.) Тӥ адӟиськоды ке, мае ке умоятоно шуыса, вӧсяське, святой дух курыса. Макем тросгес тӥ лэзёды святой духлы тӥлесьтыд сямъёстэс но ужъёстэс тупатыны, сокем золгес вын-агайёсты но сузэр-апайёсты тӥледыз яратозы но дунъялозы.

14. Кызьы Иегова дышетӥз ужась-тыршисьёссэ нырысетӥ даурын? (Колоссыослы 1:9, 10).

¹⁴ Нырысетӥ даур. Иегова шумпотыса дышетэ аслэсьтыз ужась-тыршисьёссэ (Пс. 31:8). Инмысь Атаймылэн потэ, ми сое мед тодомы, мед яратомы но пырак мед уломы шуыса. Нош со понна милемлы шонер тодон-валан басьтыны кулэ (Иоанн 17:3). Нырысетӥ даурын Иегова аслэсьтыз ужась-тыршисьёссэ христиан кенеш пыр дышетӥз. (Лыдӟе Колоссыослы 1:9, 10.) Озьы ик со дышетӥз святой дух пыр — «Буйгатӥсь», яке юрттӥсь пыр, кудзэ ыстыны Иисус кылзэ сётӥз (Иоанн 14:16). Иеговалэн духез Иисуслэн дышетскисьёсызлы Инмарлэсь Кылзэ умойгес валаны юрттӥз но тодазы вайытылӥз, мар вераз но лэсьтӥз Иисус (берлогес ваньмыз та Евангелиосын гожтэмын вал). Басьтэм тодон-валанзы со христианъёслэсь осконзэс юнматӥз но юрттӥз соослы эшшо но юнгес яратыны Инмарез, солэсь Пизэ но ог-огзэс.

15. Кызьы Иегова быдэстэ сётэм кылзэ, кудӥз гожтэмын Исаиялэн 2:2, 3?

¹⁵ Асьме нуналъёс. Иегова азьло ик вераз, «берпуметӥ аръёсы» вань калыкъёс пӧлысь адямиос солэн «гурезез» доры лыктозы, яке зэмос ужась-тыршисьёсыз пӧлы пырозы, но солэн сюресъёсыз вылтӥ ветлыны дышетскозы шуыса. (Лыдӟе Исаиялэсь 2:2, 3.) Та азьпалзэ ивортон асьмелэн син азямы быдэсме. Иеговалы йыбырттон, кудзэ гурезен ӵошатыны луэ, зэмос луисьтэм инмаръёслы йыбырттонлэсь  трослы вылӥын. Иегова милемлы ӝӧквыл тыр «сиён-юон» дасяз! (Ис. 25:6). «Оскиськымон, визьмо ляльчиез» пыр Иегова сётэ милемлы пӧртэм духовной сиён: статьяос, речьёс, видеороликъёс но мультфильмъёс (Матф. 24:45). Милям кылдо сыӵе ик шӧдонъёсмы, кыӵеесь вал Елиуйлэн, Иовлэн эшезлэн. Иегова сярысь со вераз: «Со кадез кин визьнодъясь вань?» (Иов 36:22).

16. Мар тӥ карыны быгатӥськоды, Иеговаен кусыпъёстэс юнматон понна?

¹⁶ Мар карыны быгатӥськоды тӥ. Святой дух улонады пыртыны юрттоз сое, мае тӥ тодӥды, Инмарлэсь Кылзэ лыдӟыса но эскерыса. Вӧсяське, псаломъёсты гожъясь сямен, кудӥз вераз: «Кузё-Инмаре, Аслад сюресэдлы монэ дышеты, соку мон зэмлык сюрес кузяд ветло; Тынад нимыдлэсь кышкан пала сюлэмме берыкты» (Пс. 85:11). Азьланяз но лыдӟе но эскере Библиез но со вылэ пыкиськыса гожтэм публикациосты, кудъёссэ сётэ милемлы Иеговалэн организациез. Нош тӥляд ужпумды тросгес тодон-валан басьтыны гинэ ӧвӧл. Тӥледлы вань сюлмысьтыды осконо, со, малы дышетэ Библия, зэм луэ шуыса, но соя улыны тыршоно. Иеговалэн духез юрттоз тӥледлы та ужпумез быдэстыны. Озьы ик вын-агайёсты но сузэр-апайёсты юнматыны тыршоно (Евр. 10:24, 25). Малы? Малы ке шуоно соос тӥляд духовной семьяды луо. Вӧсяське, святой дух тӥледлы мед юрттоз шуыса христиан пумиськонъёсын сюлмысь валэктонъёс сётъяны но тӥледлы сётэм ужъёсты тыршыса быдэсъяны. Озьы тӥ Иеговалы но солэн Пиезлы возьматоды, соослэсь дуно «ыжъёссэс» яратӥськоды шуыса (Иоанн 21:15—17).

17. Кызьы тӥ возьматыны быгатӥськоды, Иеговалэн организациеныз ӵош оскымон ужаськоды-тыршиськоды шуыса?

¹⁷ Ӝоген музъем вылэ одӥг гинэ организация кылёз — Инмарлэн организациез. Соин ик та организациен ӵош мылысь-кыдысь ужалэ-тырше. Иегова сямен, вань адямиосты яратэ, нош со понна ӟеч иворез тодытэ, адямиослэн вылтуссы шоры учкытэк. Инмар кадь ик, радлыкез но тупаса улонэз яратэ, кенешлы огкылысь улыны юрттыса. Кылзэ Иеговаез, кудӥзлэсь визьнодо нокин ӧвӧл ни. Со понна лыдӟе но эскере ваньзэ, мае со сётэ организациез пыр. Соку тӥ уд кышкалэ, куке адӟоды, кызьы Шайтанлэн дуннеез куашка. Тӥ луоды соос пӧлын, кинъёс Иеговалэн организациеныз ӵош оскымон ужало-тыршо.