1. Die yen ofori nẹ Inenikristi ri bromaphiyame re, ji rhe ruẹ?

WO BROMAPHIYAME re? Ọ da dia ọtiọyen, kọyen wo dje esegbuyota wẹn kpahen Jihova phia vwẹ azagba re, wo ji djephia nẹ wọ guọnọ vwomaba ukoko * rọyen. Enẹna, ko fori nẹ wo ru esegbuyota wẹn kpahen Jihova kugbe ẹroẹvwọsuọ ru vwo vwori kpahen ukoko rọyen ganphiyọ.

2-3. Djunute iruemu erha ri Jihova vwori vẹ oborẹ ayen teyenphia vwẹ idjerhe ro suẹn ihwo rọyen wan.

² Nonẹna, oborẹ Jihova suẹn ukoko rọyen wan dje oka rẹ ohwo rọ hepha, eriyin ji te ọhọre kugbe iwan rọyen. Jẹ a ta ota kpahen erha usun rẹ iruemu sansan rẹ Jihova vwori ra sa mrẹ vwẹ ukoko rọyen.

³ Ọrẹsosuọ, “Ọghẹnẹ ghwẹ oma hẹ abọvo jẹ ọvo vwo-o.” (Iruo 10:34) Ẹguọnọ yen mu Jihova vwọ vwẹ Ọmọ rọyen kpahotọ vwọ “tan avwanre ejobi hirhe.” (1 Tim. 2:6; Jọn 3:16) Jihova reyọ ihwo rọyen vwo ghwoghwo iyẹnrẹn esiri na kẹ ihwo eje re guọnọ kerhọ, ọ womarẹ ọnana vwọ vwẹ ukẹcha kẹ ayen rere ayen sa vwọ mrẹ erere vwo nẹ ọtanhirhe na. Ọrivẹ, Jihova ọyen Ọghẹnẹ rẹ ọrhuẹrẹphiyotọ kugbe ufuoma. (1 Kọr. 14:33, 40) Ọtiọyena, e se rhẹro rọyen nẹ idibo rọyen je cha dia ihwo rẹ ufuoma re yan nene ọrhuẹrẹphiyotọ. Ọrerha, Jihova yen “Oyono” rọ Marho. (Aiz. 30:20, 21) Ọnana yen sorọ ukoko rọyen vwọ wian gangan rere ọ sa vwọ vwẹ Baibol na yono iniọvo na kugbe ihwo rehẹ otafe. Mavọ yen iruemu erha ri Jihova nana teyenphia wan vwẹ oma rẹ Inenikristi rẹ ẹgbukpe ujorin ẹsosuọ? Idjerhe vọ yen ihwo rẹ Ọghẹnẹ vwo dje iruemu nana phia vwẹ ọke rẹ avwanre na? Mavọ yen ẹwẹn ọfuanfon  na sa vwọ chọn wẹ uko wọ vwọ ga vwẹ ukoko ri Jihova nonẹna?

4. Vwo nene obo rehẹ Iruo Rẹ Iyinkọn Na 1:8, die yen Jesu ji iji kẹ idibo rọyen nẹ ayen ru, ukẹcha vọ yen ayen cha mrẹ?

⁴ Vwẹ ẹgbukpe ujorin ẹsosuọ. Ovuẹ rẹ Jesu ghwoghwori vwẹ iphiẹrophiyọ kẹ ihworakpọ eje. (Luk 4:43) O ji iji kẹ idibo rọyen nẹ ayen ruiruo rọ tonphiyọ na, rere ayen se oseri re te “oba rẹ akpọ na.” (Se Iruo Rẹ Iyinkọn Na 1:8.) Ayen cha sa vwẹ ogangan romobọ rayen ọvo vwo ruiruo nana-a. Ayen guọnọ ukẹcha rẹ ẹwẹn ọfuanfon rọ dia “obruche” rẹ Jesu ve ive rọyen na.—Jọn 14:26; Zek. 4:6.

5-6. Idjerhe sansan vọ yen ẹwẹn ọfuanfon na vwọ vwẹ ukẹcha kẹ idibo ri Jesu?

⁵ E ku ẹwẹn ọfuanfon ku idibo ri Jesu vwẹ Pẹntikọst 33 C.E. Womarẹ ukẹcha rẹ ẹwẹn ọfuanfon na, ayen da ton aghwoghwo phiyọ ugege yena, o kriri-i, ihwo uriorin buebun de rhiabọreyọ iyẹnrẹn esiri na. (Iruo 2:41; 4:4) Oshọ mu idibo na ọke rẹ omukpahen vwọ vwomaphia-a, ukperẹ ọtiọyen ayen yare ukẹcha mie Ọghẹnẹ. Ayen da nẹrhovwo: “Kẹ idibo wẹn aroeyivwo vwo ghwoghwo ota na.” Ẹwẹn ọfuanfon na da ro ayen oma, ayen de “ghwoghwo ota rẹ Ọghẹnẹ na vẹ aroeyivwo.”—Iruo 4:18-20, 29, 31.

⁶ Idibo ri Jesu ji rhiẹromrẹ egbabọse efa. Kerẹ udje, ihwo buebun vwo Baibol na vwẹ ọke yena-a. Ẹbe re vwo yono Baibol na rẹ avwanre vwori nonẹna je herọ-ọ. Idibo na ji che ghwoghwo kẹ ihwo re jẹ ejajẹ sansan. Dede nẹ egbabọse nana herọ, idibo ri vwo oruru na ru obo re rori nẹ ayen che se ru-u, ayen ghwoghwo iyẹnrẹn esiri na “kẹ akpọ na ejobi” vwẹ uvwre ẹgbukpe 30 ọvo.—Kọl. 1:6, 23.

7. Mavọ yen idibo ri Jihova sa vwọ riẹn obo rọ guọnọ mie ayen vwẹ ikpe re vrẹ 100 re wanre, kẹ die yen ayen ruru?

⁷ Vwẹ ọke rẹ avwanre na. Jihova ji suẹn je vwẹ ẹgba kẹ ihwo rọyen. Idjerhe ọvo kiriguo ro vwo ruẹ ọtiọyen yen womarẹ Baibol na ra vwẹ ẹwẹn ọfuanfon rọyen si. Baibol na yen avwanre de se kpahen iruo rẹ aghwoghwo rẹ Jesu ruru kugbe iji rọ vwọ kẹ idibo rọyen nẹ ayen ruiruo rọ tonphiyọ na. (Mat. 28:19, 20) Uwevwin Orhẹrẹ ri July 1881 tare nẹ “Ọ dia Jihova se yẹrẹ jẹ avwanre reyọ rere avwanre vwo fe yẹrẹ ihwo vwo muọghọ kẹ avwanre-e, ẹkẹvuọvo o ru ọtiọyen rere avwanre vwọ reyọ kemu kemu re vwori vwo ghwoghwo iyẹnrẹn esiri na.” Ọbe otete ọvo ra teyenphia vwẹ 1919 re mu odẹ kẹ nẹ, To Whom the Work Is Entrusted da ta: “Iruo na pha rhuarho, ẹkẹvuọvo ọnana iruo rẹ Ọrovwori na, ọyen cha kẹ avwanre ẹgba re se vwo ruo.” Kerẹ Inenikristi ẹgbukpe ujorin ẹsosuọ, iniọvo nana nabọ fiudugberi wian gangan kidie ayen vwẹroso Jihova nẹ ọ cha vwẹ ẹwẹn ọfuanfon rọyen vwọ chọn ayen uko vwo ghwoghwo kẹ koka koka rẹ ohwo. Nonẹna, avwanre je vwẹroso Jihova nẹ ọ cha vwẹ ẹwẹn ọfuanfon rọyen vwọ chọn avwanre uko.

8-9. Ena kpokpọ vọ yen ukoko ri Jihova vwọ hẹre iruo rẹ aghwoghwo na phiyọ?

⁸ Ukoko ri Jihova reyọ ekuakua ri me yovwin kparobọ vwo ghwoghwo iyẹnrẹn esiri na. Evo usun rẹ ekuakua nana yen ẹbe sansan ra teyenphia, “Ifoto rẹ Eha Rudje rẹ Emama,” igramafonu, imoto rẹ agboro, iredio, intanẹti kugbe ikọmputa. Ukoko ri Jihova ji ruiruo rẹ efanfan ra je mrẹ ọkpọ rọyen dẹvo-o. Diesorọ? Rere ihwo ejobi se vwo nyo iyẹnrẹn esiri na vwẹ ephẹrẹ romobọ rayen. Jihova ghwẹ oma hẹ abọvo jẹ ọvo vwo-o, ọ tare nẹ e  che ghwoghwo iyẹnrẹn esiri na vwọ kẹ “kẹgborho kẹgborho kugbe orua korua kugbe ephẹrẹ kephẹrẹ kugbe ohwo kohwo.” (Ẹvwọ. 14:6, 7) Ọ guọnọre nẹ ihwo eje nyo ovuẹ rẹ Uvie na.

⁹ Rere e se vwo ghwoghwo ota kẹ ihwo re dia iwevwin ra gbogba riariẹ re bẹn ẹruọ, Jihova de ruo rere ukoko rọyen sa vwọ reyọ ena rẹ aghwoghwo rẹ azagba sansan vwo ruiruo. Kerẹ udje, vwẹ 2001, Ẹko Rọvwẹrote na ghwobọphiyọ ẹreyọ vwo ruiruo rẹ imikpekpa re ghorie kugbe imẹjẹ vẹ ephapha efa re dje ẹbe phiyọ vwẹ France, ọke vwọ yanran na, ayen da je rhọnvwe kẹ iniọvo avwanre vwẹ asan efa. Obo ri nẹ obuko rọyen rhe yovwirin dẹn. Vwẹ 2011 a da ton ọrhuẹrẹphiyotọ kpokpọ ọvo phiyọ vwẹ asan rẹ ihwo wan mamọ vwẹ New York City rọhẹ United States. E phi ẹbe ri te 102,129 kugbe imagazini ri te 68,911 phiyọ ada vwẹ ukpe rẹsosuọ. Ihwo ri te 4,701 da rha nokpẹn rẹ uyono ri Baibol! O muẹro dẹn nẹ ẹwẹn ọfuanfon ri Jihova yehẹ obuko rẹ owian na. Ọtiọyena Ẹko Rọvwẹrote na da ghwobọphiyọ aghwoghwo ra vwẹ imikpekpa vwo ruẹ vwẹ akpọneje.

10. Mavọ yen e se vwo ru ona rẹ aghwoghwo avwanre yovwinphiyọ?

¹⁰ Obo wo se ru. Reyọ uyono rẹ Jihova vwọ kẹ avwanre vwẹ emẹvwa vwo ruiruo vọnvọn. Nene ẹko rẹ aghwoghwo wẹn wian ọkieje. Iniọvo rehẹ ẹko wẹn cha chọn wẹ uko vwo ru ona rẹ aghwoghwo wẹn yovwinphiyọ, wo ji se yono vwo nẹ omamọ rẹ udje rayen. Vwo erhiorin vwẹ iruo rẹ aghwoghwo na. Ẹkpo ri Baibol re mu uyono nana kpahen jẹ avwanre riẹn nẹ Jihova vwẹ ẹwẹn ọfuanfon rọyen vwọ chọn avwanre uko vwo ruẹ ọhọre rọyen. (Zek. 4:6) O ruẹ ọtiọyen kidie ọnana iruo rọyen.

11. Mavọ yen ẹko rọvwẹrote na vwọ wian kugbe vwọ sẹro rẹ ufuoma rẹ ihwo rẹ Ọghẹnẹ vwẹ ẹgbukpe ujorin ẹsosuọ?

¹¹ Vwẹ ẹgbukpe ujorin ẹsosuọ. Ẹko rọvwẹrote rọhẹ Jerusalẹm wian kugbe vwọ sẹro rẹ ufuoma rẹ ihwo rẹ Ọghẹnẹ. (Iruo 2:42) Kerẹ udje, ọke rẹ ota rẹ oyanvwe  vwo she vwẹ omarẹ 49 C.E., ẹko rọvwẹrote na da rhuẹrẹ ota na phiyọ womarẹ ukẹcha rẹ ẹwẹn ọfuanfon na. A rha rhuẹrẹ ota na phiyọ jovwo-o, mane o rhe gbowọphiyọ iruo rẹ aghwoghwo na. Dede nẹ ayen ihwo ri Ju, iyinkọn vẹ ekpako na vwẹ uphẹn kẹ ẹkuruemu vẹ iyono rẹ ihwo ri Ju nẹ i djobọte aye-en. Ukperẹ ọtiọyen, ayen vwẹ uphẹn kẹ Baibol vẹ ẹwẹn ọfuanfon na nẹ i sun ayen. (Iruo 15:1, 2, 5-20, 28) Kẹ die yen nẹ obuko rọyen rhe? Jihova de ku ebruphiyọ ku orhiẹn rẹ ayen bruru, ufuoma da rhe dia uvwre rayen, iruo rẹ aghwoghwo na da yan obaro.—Iruo 15:​30, 31; 16:4, 5.

12. Die yen djerephia nẹ ọrhuẹrẹphiyotọ kugbe ufuoma hẹ ukoko ri Jihova nonẹna?

¹² Vwẹ ọke rẹ avwanre na. Nẹ awanre rhe yen ukoko ri Jihova vwọ wian rere ayen se vwo nene ọrhuẹrẹphiyotọ je sẹro rẹ ufuoma rọhẹ uvwre rẹ ihwo rẹ Ọghẹnẹ. Vwẹ ukpe ri 1895, Zion’s Watch Tower and Herald of Christ’s Presence rẹ November 15 vwo uyovwinrota na “Decently and in Order,” re mukpahen 1 Kọrẹnt 14:40. Uyovwinrota na da ta: “Iyinkọn na si erọnvwọn buebun vwo rhe Ishọshi rẹ ẹgbukpe ujorin ẹsosuọ kpahen ọrhuẹrẹphiyotọ . . . O ji fo nẹ a rha kerhọ rẹ obo re si ‘phihọ otọ rhabae rhe, . . . kẹ eyono rẹ avwanre.’” (Rom 15:4) Ẹwẹn rẹ ufuoma kugbe uruemu re vwo nene ọrhuẹrẹphiyotọ ro rhe Inenikristi ẹgbukpe ujorin ẹsosuọ, jehẹ ukoko ri Jihova nonẹna. Gba reyọ kerẹ udje nẹ ukoko ọfa vwẹ ẹkuotọ wẹn yẹrẹ ẹkuotọ ọfa yen wọ vwomaba vwọ kẹ Uyono rẹ Uwevwin Orhẹrẹ, imuẹro herọ nẹ wọ riẹn obo ra cha vwẹrote uyono na wan vẹ uyovwinrota re che yono. Kọ cha ghwa họhọ nẹ ukoko wẹn wọ hepha! Ẹwẹn ọfuanfon ri Jihova ọvo yen sa nẹrhẹ e ku evun gbe ọtiọyen!—Zẹf. 3:9.

13. Vwo nene oborẹ Jems 3:17 tare, enọ vọ yen ofori nẹ a nọ oma rẹ avwanre?

¹³ Obo wo se ru. Jihova guọnọre nẹ ihwo rọyen “yọnre okugbe rẹ Erhi [“ẹwẹn,” NW] na vwẹ ẹguọnọ rẹ ufuoma.” (Ẹfe. 4:1-3) Nọ oma wẹn: ‘Mi toroba ufuoma vẹ okugbe rẹ ukoko na? Mi muọghọ kẹ ihwo re vwo mu? Ihwo efa sa  vwẹroso ovwẹ, marho ọ da dianẹ mi vwo owian vwevunrẹ ukoko na? Me yan muẹ ọke, chọn ihwo uko, ji vwo ẹwẹn ra vwọ ga?’ (Se Jems 3:17.) Wọ da mrẹ asan ro de fo nẹ wo ru yovwinphiyọ, gba yare ukẹcha rẹ ẹwẹn ọfuanfon. Ẹguọnọ rẹ iniọvo wẹn vwo kpahen owẹ cha ganphiyọ siẹrẹ wọ da vwẹ uphẹn kẹ ẹwẹn ọfuanfon na nẹ o wene uruemu vẹ iroro wẹn, ayen ji che ni we ghanghanre.

14. Vwo nene obo rehẹ Kọlose 1:9, 10, mavọ yen Jihova yono ihwo rọyen wan vwẹ ẹgbukpe ujorin ẹsosuọ?

¹⁴ Vwẹ ẹgbukpe ujorin ẹsosuọ. Oma vwerhen Jihova gangan ro vwo yono ihwo rọyen. (Une 32:8) Ọ guọnọre nẹ ayen vughe ọyen, vwo ẹguọnọ rọyen, je dia bẹdẹ kerẹ emọ ro vwo ẹguọnọ rọyen. Uyono ri Jihova yen sa nẹrhẹ avwanre riẹn erọnvwọn nana eje. (Jọn 17:3) Jihova reyọ ukoko rẹ Inenikristi rẹ ẹgbukpe ujorin ẹsosuọ vwo yono ihwo rọyen. (Se Kọlose 1:9, 10.) Ẹwẹn ọfuanfon na rọ dia “obruche” rẹ Jesu ve uve rọyen na je vwẹ ukẹcha kẹ idibo na. (Jọn 14:16) Ọ nẹrhẹ idibo na vwo ẹruọ rẹ Ota rẹ Ọghẹnẹ vrẹ obo ri jovwo, je nẹrhẹ ayen karophiyọ erọnvwọn sansan ri Jesu ta ota kpahen ji ru, rẹ ayen sa mrẹ se vwẹ Ẹbe rẹ Ikuegbe ri Jesu ukuko na. Erianriẹn nana ru esegbuyota rẹ Inenikristi rẹ ẹgbukpe ujorin ẹsosuọ na ganphiyọ, ọtiọyen ji te ẹguọnọ rẹ ayen vwo kpahen Ọghẹnẹ, Ọmọ rọyen, kugbe omoma rayen.

15. Idjerhe sansan vọ yen wọ vwọ mrẹ orugba rẹ ive rẹ Jihova veri vwẹ Aizaya 2:2, 3?

¹⁵ Vwẹ ọke rẹ avwanre na. Jihova tare nẹ vwẹ “ukuko rẹ ẹdẹ na,” ihwo ri nẹ ẹgborho sansan rhe che rhurie kpo igbenu rẹ udje rọyen rere o yono ayen kpahen idjerhe rọyen. (Se Aizaya 2:2, 3.) Avwanre mrẹ  orugba rẹ aroẹmrẹ yena nonẹna. A kpare ẹga rẹ uyota kpenu vrẹ koka koka rẹ ẹga rẹ efian ejobi. Etiyin kọyen Jihova de yono ihwo rọyen erọnvwọn buebun! (Aiz. 25:6) Ọ reyọ “odibo esiri na,” vwo yono avwanre erọnvwọn nana vwẹ idjerhe sansan. Kerẹ udje, avwanre se ẹbe, kerhọ rẹ eta, ji nẹ ividio sansan. (Mat. 24:45) Oka rẹ iroro ro rhe Elihu yen ji rhe avwanre, rọ vwọ tanẹ, “Ono oyono rọ họhẹ [Ọghẹnẹ]?”—Job 36:22.

16. Die yen wo se ru wọ vwọ mrẹ erere vwo nẹ uyono ri Jihova?

¹⁶ Obo wo se ru. Ẹwẹn ọfuanfon rẹ Ọghẹnẹ cha vwẹ ukẹcha kẹ wẹ vwọ reyọ obo wo se vẹ obo wo yono vwo ruiruo. Nẹrhovwo kerẹ ọbuine na rọ tare nẹ, “Yono uvwe idjerhe wẹn, E Ọrovwohwo, rere me yan phihọ uyota wẹn; ku udu mẹ gbe rọ vwọ djẹ oshọ wẹn.” (Une 86:11) Ọtiọyena, gbe rhe se Baibol na vẹ ẹbe efa rẹ ukoko ri Jihova vwọ kẹ avwanre. Ọ dia fikirẹ erianriẹn ọvo yen wo vwo se Baibol vẹ ẹbe ukoko na-a. Wọ guọnọ vwo imuẹro kpahen uyota na, je reyọ vwo ruiruo vwẹ akpeyeren wẹn. Ẹwẹn ọfuanfon rẹ Ọghẹnẹ sa chọn wẹ uko vwo ru ọtiọyen. Wọ je guọnọ phiuduphiyawọ rẹ iniọvo wẹn. (Hib. 10:24, 25) Diesorọ? Kidie wẹ vẹ ayen ihwo rẹ orua ọvo. Nẹrhovwo nẹ ẹwẹn rẹ Ọghẹnẹ chọn wẹ uko vwọ nabọ kpahenphiyọ onọ vwẹ uyono, ji ru oborẹ ẹgba wẹn muru siẹrẹ a da kẹ wẹ ota. Vwẹ idjerhe ọtiọyena, wo djephia kẹ Jihova vẹ Ọmọ rọyen nẹ wo vwo ẹguọnọ rẹ “igegede” rayen re pha ghanghanre.—Jọn 21:15-17.

17. Idjerhe sansan vọ yen wo se vwo djephia nẹ wọ fuevun biẹcha ukoko ri Jihova?

¹⁷ O rhe che kri-i, ukoko rẹ ẹwẹn Ọghẹnẹ suẹn ọvo kọyen che chekọ vwẹ akpọ na. Ọtiọyena gba vwẹ oruru nene ukoko ri Jihova wian kugbe. Djephia nẹ wo vwo ẹguọnọ rẹ ihwoeje kerẹ Ọghẹnẹ womarẹ wo vwo ghwoghwo iyẹnrẹn esiri na kẹ kohwo kohwo ru wọ mrẹre. Vwẹrokere ẹguọnọ rọyen kpahen ọrhuẹrẹphiyotọ vẹ ufuoma womarẹ wo vwo toroba okugbe rẹ ukoko na. Wọ me je kerhọ rẹ Oyono rọ Marho na womarẹ wọ vwọ reyọ uyono rọ vwọ phia vwo ruiruo vọnvọn. Ọke ra da cha ghwọrọ akpọ rẹ Eshu nana oshọ rhe che mu we-e. Ukperẹ ọtiọyen, wo che fiudugberi dia usun rẹ ihwo re fuevun ga Jihova vwẹ ukoko rọyen.