1. Cossa che una persona batesada la ga de far?

SITO belche batesà? Se te sì batesà, te ghè mostrà ai altri che te ghè fede in Geovà e che te vol servirlo insieme dela so organisassion. * Ma come una persona batesada, te ghè de seitar a far pi forte la to fede in Geovà e la to confiansa che lu l’è drio doperar la so organisassion ancoi.

2-3. (a) Come che Geovà el orienta la so organisassion? (b) Che tre robe sora Geovà vedemo nela so organisassion?

² Ancoi, Geovà el orienta la so organisassion de una maniera che mostra le so qualità, quel che lu el vol far e i so prinsipi. Noantri ndaremo studiar tre qualità de Geovà che vedemo nela so organisassion.

³ In primo posto, “Geovà el trata tute le persone dela medèsima maniera”. (Ati 10:34) Geovà el ne ama tanto, par quela el ne ga dato el so Fiol come “risgate par tuti”. (1 Tim. 2:6; Gioani 3:16) Geovà el vol tanto che le persone le gàpia fede nel risgate e che le sìpie salve. Par quela che el dopera el so pòpolo par predicar le bone notìssie a tute le persone. La seconda roba che vedemo nela organisassion, l’è che Geovà l’è un Dio de òrdine e de pace. (1 Cor. 14:33, 40) Par quela che i so servi i lo adora de maniera organisada e con pace. E la tersa roba che vedemo nela organisassion de Geovà, l’è che Geovà l’è el “Grandioso Istrutor”. (Isa. 30:20, 21) Una prova la ze che la so organisassion la fà tanto sforso par insegnar ai altri sora la Bìblia  nela congregassion e nela predicassion. Come che podemo veder che ghen’era queste qualità nela congregassion del primo sècolo? Come che podemo veder queste qualità nele congregassion ancoi? Come che el spìrito santo el pol giutarne a servir nela organisassion de Geovà ancoi?

4. (a) De acordo con Ati 1:8, cossa che Gesù el ga mandà i so seghidori far? (b) Che aiuto lori i gavaria?

⁴ Nel primo sècolo. Gesù el parlea sora una speransa ale persone. (Luc. 4:43) E lu el ga mandà i so seghidori seitar a predicar e lori i gavea de far questo “fin la parte pi distante dela tera”. (Ledi Ati 1:8. *) Ma come i dissìpoli no i saria boni de far questo laoro lori soli, Gesù el ga prometesto che el spìrito santo el ndaria giutarli. — Gioani 14:26; Zac. 4:6.

5-6. Come che el spìrito santo el ga giutà i seghidori de Gesù?

⁵ I seghidori de Gesù i ga ricevesto spìrito santo nel Pentecoste del ano 33 d.C.. Col aiuto del spìrito santo, suito lori i ga scominsià a predicar e miliari de persone le ga acetà le bone notìssie. (Ati 2:41; 4:4) El spìrito santo anca el ga giutà i dissìpoli quando lori i ze stati perseghidi. Lori i ga domandà a Geovà: “Giuta i to schiavi a esser boni de seitar a parlar dela la to parola con tanto coraio.” Alora, lori i ga ricevesto spìrito santo, no i ze restadi spauradi e i ga scominsià a ‘parlar la parola de Dio con tanto coraio’. — Ati 4:18-20, 29, 31.

⁶ El spìrito santo el ga giutà i seghidori de Gesù quando lori i ga infrontà anca altre dificoltà. Par esémpio, l’era pròpio fadiga gaver le Scriture e no ghen’era le publicassion che spieghea la Parola de Dio come ghemo ancoi. I seghidori i ga bio anca de predicar a persone de tante léngue. Ancora che lori i gàpie infrontà tute queste dificoltà, in trenta ani, lori i ze stati boni de predicar le bone notìssie “in tuto el mondo”. — Col. 1:6, 23.

7. (a) Come che i servi de Geovà i savea quel che Geovà el spetea de lori? (b) Cossa che lori i ga fato?

⁷ Nei nostri giorni. Geovà el seita dar orientassion e poder al so pòpolo. La prinsipal maniera che lu el dopera par orientarne la ze la Bìblia, che lu el ga doperà el so spìrito santo par farla. Nela Bìblia, noantri podemo saver quel che Gesù el ga fato e cossa che lu el ne ga domandà de far. (Mat. 28:19, 20) In lùlio de 1881, la revista La Sentinela la disea: “Noantri no semo ciamadi e gnanca scoliesti par ricever onor o imuciar su capital, ma par doperar tuto quel che ghemo par predicar le bone notìssie.” El libreto A Chi che se Fida el Laoro, che l’è stà fato in inglese in 1919, el ga dito: “L’è tanto fadiga de far el laoro, ma l’è el laoro del Signor. Alora, par meso dela So forsa saremo boni de farlo.” Cossita, vedemo che questi fradei i gavea el medèsimo coraio e i fea el medèsimo sforso dei cristiani del primo sècolo. Lori i se fidea che el spìrito santo el ndaria giutarli a predicar a tute le persone. Anca noantri ghemo questa confiansa.

8-9. Cossa che la organisassion la ze drio doperar par predicar le bone notìssie?

⁸ La organisassion de Geovà la ga sempre doperà le meio robe che ghen’è par predicar le bone notìssie. Par esémpio: publicassion stampade, el “Fotodrama dela Creassion”, fonògrafi, auto de son, programi de ràdio e adesso computadori e internet. Geovà el trata tute le persone dela medèsima maniera, alora lu el ga dito che le bone notìssie le saria predicade “a tute le nassion, tribo,  léngua e pòpolo”. (Apo. 14:6, 7) Adesso la organisassion de Geovà la ze drio far el pi grando laoro de tradussion del mondo. Cossita, tante persone le ze bone de scoltar le bone notìssie nela so léngua.

⁹ La organisassion anca la se sforsa par predicar ale persone che le ze de star in apartamenti e in posti che l’è fadiga de ndar rento. La organisassion la ga pensà in tante maniere par predicar a queste persone. Par esémpio, in 2001, el Corpo Governante el ga aprovà che i fradei dela Frància i doperasse displays de publicassion. Dopo, i predicadori de altri paesi anca i ga scominsià a doperar queste robe. Cossita, lori i ze stati boni de predicar a tante persone. In 2011, el Corpo Governante el ga proà nantra maniera de predicar nela cità de Nova York, Stati Unidi. Le persone le ga ciapà 102.129 libri e 68.911 reviste e 4.701 persone le ga domandà un stùdio bìblico! Sicuro che questo laoro el gavea el aiuto del spìrito santo. Alora, el Corpo Governante el ga aprovà che altri paesi i doperasse careti e displays nela predicassion.

10. Cossa che podemo far par predicar e insegnar meio?

¹⁰ Quel che noantri podemo far. Noantri ghemo de far sforso par imparar tuto quel che semo boni nele nostre riunion e ghemo de laorar sempre insieme col nostro grupo de predicassion. Alora, ndaremo ricever aiuto par predicar e insegnar meio e saremo incoraiadi par el bel esémpio dei fradei. Ancora che noantri infrontemo dificoltà, no podemo desister de predicar. Parché come dise el testo de questo stùdio, noantri femo la volontà de Geovà par meso del poder del spìrito santo. (Zac. 4:6) Ghemo de ricordarse che el laoro che femo no l’è nostro, ma de Geovà.

11. Come che el corpo governante del primo sècolo el ga mostrà che el volea mantegner la òrdine e la pace intrà el pòpolo de Dio?

¹¹ Nel primo sècolo. El corpo governante in Gerusalen el ga fato tanto sforso par mantegner la òrdine e la pace intrà el pòpolo de Dio. (Ati 2:42) Par esémpio, nel ano 49, quando le persone le pensea de maniera difarente sora la sirconsision, el corpo governante el ga ricevesto  aiuto del spìrito santo par far la dessision sora el assunto. Se la congregassion no la gavesse pi union, lori no i saria boni de predicar dela maniera giusta. Alora, cossa che i ga fato? Invesse dei apòstoli e i ansiani esser influensadi par quel che tanti giudei i credea, lori i ga volesto saver quel che Geovà el pensea. Lori i ze ndati in serca del aiuto dela Parola de Dio e del spìrito santo par saver cossa far. (Ati 15:1, 2, 5-20, 28) Cossa che ga sucedesto? Geovà el ga benedio la so dessision parché la congregassion la ga bio pace e union e lori i ga seità a far el laoro de predicassion. — Ati 15:30, 31; 16:4, 5.

12. Cossa che mostra che la organisassion de Geovà la ga òrdine e pace ancoi?

¹² Nei nostri giorni. La organisassion de Geovà la ga sempre fato sforso par mantegner la òrdine e la pace intrà el pòpolo de Dio. Nel ano de 1895, nela revista de 15 de novembre dela Tore de Vigia, in inglese, ghen’era un stùdio col tema “Dignità e òrdine”. El stùdio el parlea sora 1 Corinti 14:40 e el disea: “I apòstoli i ga parlà tanto ale prime congregassion sora òrdine . . .  L’è giusto seitar obedir ‘tuto quel che l’è stà scrito nel passà’ parché ‘l’è stà scrito par insegnarne’.” (Rom. 15:4) E ancoi noantri semo boni de veder che la organisassion de Geovà la vol mantegner la medèsima òrdine e pace. Par esémpio, se te fussi nte una congregassion in nantro posto o fin in nantro paese, el stùdio dela Sentinela el saria compagno e studià dela medèsima maniera. Sicuro che te ndarissi sentirte tanto ben. Sol par meso del spìrito santo de Dio che noantri ghemo questa union! — Sof. 3:9, nota.

13. Che domande ghemo de farse?

¹³ Quel che noantri podemo far. Geovà el vol che el so pòpolo el fae “sforso par mantegner la pace, parché la produse la union che la vien del spìrito”. (Efe. 4:1-3) Alora noantri ghemo de domandarse: ‘Mi son drio far sforso par mantegner la pace e la union dela congregassion? Mi son drio obedir a quei che i ga de pi responsabilità? E se mi go de pi responsabilità nela congregassion, sarà che le persone le pol fidarse in mi? Sarà che i altri i pol fidarse che mi fao le robe nela ora giusta e che mi go  caro de giutar ai altri?’ (Ledi Tiago 3:17. *) Se noantri vedemo che ghemo de cambiar qualcossa, ghemo de domandar el spìrito santo. I fradei i va amarne cada volta de pi se noantri assemo el spìrito santo cambiar la nostra maniera de pensar e la nostra maniera de far le robe.

14. De acordo con Colossensi 1:9, 10, come che Geovà el ga insegnà al so pòpolo nel primo sècolo?

¹⁴ Nel primo sècolo. Geovà el ghe piase tanto de insegnar el so pòpolo. (Sal. 32:8) Geovà el vol tanto che noantri lo cognossemo, lo amemo e che vivemo par sempre come i so fioi. L’è par quela che lu el ne ga dato la so Parola, la Bìblia. (Gioani 17:3) Nel primo sècolo, Geovà el ga doperà le congregassion par insegnar al so pòpolo. (Ledi Colossensi 1:9, 10. *) Gesù el gavea prometesto che el daria el spìrito santo ai so dissìpoli. Cossita, col aiuto del spìrito santo, i dissìpoli i ze stati boni de capir de pi sora la Bìblia. (Gioani 14:16) El spìrito santo anca li ga giutà a ricordarse de quel che Gesù el gavea parlà e de quel che el gavea fato, come quele che le ze state scrite nei Vangeli. Quel che lori i ga imparà ga fato pi forte la so fede, ma anca el so amor par Dio, par el Fiol e un ai altri.

15. Come che la professia de Isaia 2:2, 3 la ze drio realisarse?

¹⁵ Nei nostri giorni. Geovà el ga dito che “nei ùltimi giorni” le persone de tute le nassion le ndaria fin el so monte par esser insegnade par  Lu. (Ledi Isaia 2:2, 3. *) Ancoi noantri vedemo questa professia realisarse. Adorar a Geovà dela maniera giusta la ze la meio roba che ghen’è. Geovà el ne dà tante robe par capir ben la Bìblia! (Isa. 25:6) Geovà el dopera el “schiavo fedele e prudente” par insegnarne tante robe e de tante maniere. Par esémpio, lu el ne dà le publicassion, discorsi, vìdei e arquante robe anca par i tosatei. (Mat. 24:45) Noantri se sentimo come Eliù, un amigo de Giò, che el ga dito che no ghen’è nantro istrutor come Dio! — Giò 36:22.

16. Cossa che ghemo de seitar a far?

¹⁶ Quel che noantri podemo far. Noantri ghemo de seitar a studiar quel che Geovà el ne dà par meso dela Bìblia e dela so organisassion. Noantri volemo imparar, ma anca meter nel nostro cuor e meter in pràtica quel che imparemo. El spìrito santo el pol giutarne a far questo. Par quela, ghemo de domandar la medèsima roba che el salmista: “Ò Geovà, inségname la to strada. Vao caminar nela to verità. Giùtame a temer el to nome con tuto el me cuor.” (Sal. 86:11) Noantri ghemo anca de incoraiar i nostri fradei parché lori i ze la nostra fameia. (Ebr. 10:24,25) Noantri podemo far questo quando domandemo el spìrito santo de Geovà par dar boni comentari nele riunion e quando femo bone parte. Cossita, noantri mostremo che amemo ai nostri fradei, che i ze tanto valiosi par Geovà e par Gesù. — Gioani 21:15-17.

17. Come che te pol mostrar che te sì leal ala organisassion de Geovà?

¹⁷ Suito ghen sarà sol la organisassion de Geovà nela Tera, che la ze orientada par meso del so spìrito. Alora, sìpia leal ala organisassion de Geovà. Cossita come Geovà, trata tute le persone dela medèsima maniera e predica a tute lore. Anca mostra che te ami la òrdine e la pace, cossita ghen sarà union nela congregassion. Fà tuto quel che te pol par studiar la Bìblia e quel che la organisassion de Geovà la ne dà. Se te fè queste robe, te gavarè coraio quando el mondo de Sàtana el sarà finio fora e anca te sarè intrà quei che i ze leai a Geovà e ala so organisassion.