1. Ano an kinahanglan padayon nga buhaton han bawtismado nga mga Kristiano?

BAWTISMADO ka ba? Kon oo, iginpahayag mo na ha publiko an imo pagtoo kan Jehova ngan an imo hingyap nga mag-alagad ha iya kaupod an iya organisasyon. * Syempre, kinahanglan padayon nga magtubo an imo pagtoo kan Jehova. Ngan kinahanglan padayon mo nga parig-unon an imo pagsarig nga gin-gagamit ni Jehova an iya organisasyon yana.

2-3. Ha ano nga paagi gin-gigiyahan ni Jehova an iya organisasyon yana? Paghatag hin mga ehemplo.

² Yana, gin-gigiyahan ni Jehova an iya organisasyon ha paagi nga nagpapakita han iya personalidad, katuyoan, ngan mga suruklan. Hisgotan naton an tulo han mga kalidad ni Jehova nga makikita ha iya organisasyon.

³ Siyahan, “an Dios waray pinaurog.” (Buh. 10:34) Gugma an nagpagios kan Jehova nga ihatag an iya Anak sugad nga “lukat para ha ngatanan.” (1 Tim. 2:6; Juan 3:16) Gin-gagamit ni Jehova an iya katawohan basi isangyaw an maopay nga sumat ha tanan nga mamamati. Hito nga paagi, nabubuligan an mas damu nga tawo tubtob nga posible nga makabenepisyo ha lukat. Ikaduha, hi Jehova Dios han pagin organisado ngan han kamurayawan. (1 Cor. 14:33, 40) Salit, angay naton laoman nga an iya mga magsiringba nag-aalagad ha iya sugad nga organisado ngan murayaw nga grupo. Ikatulo, hi Jehova an “Harangdon nga Instruktor.” (Isa. 30:20, 21) Salit, an iya organisasyon nagpupokus ha pagtutdo han iya Pulong, ha kongregasyon ngan ha pagministeryo ha publiko. Paonan-o iginpakita han siyahan-siglo nga kongregasyon inin tulo nga kalidad  ni Jehova? Paonan-o ito iginpapakita han katawohan ni Jehova ha moderno nga panahon? Ngan paonan-o an baraan nga espiritu makakabulig ha imo samtang nag-aalagad ka kaupod han organisasyon ni Jehova yana?

4. Ha Buhat 1:8, ano an iginsugo ni Jesus ha iya mga sumurunod, ngan ano nga bulig an ira makakarawat?

⁴ Ha siyahan nga siglo. An mensahe nga iginsangyaw ni Jesus naghatag hin paglaom ha tanan nga tawo. (Luc. 4:43) Ginsugo niya an iya mga sumurunod nga ipadayon an buruhaton nga iya gintikangan, basi maghatag hin pamatuod “ngadto ha pinakahirayo nga bahin han tuna.” (Basaha an Buhat 1:8.) Syempre, diri nira mahihimo ini nga buruhaton ha ira la kusog. Kinahanglan nira an baraan nga espiritu​—“an parabulig” nga iginsaad ni Jesus ha ira.​—Juan 14:26; Zac. 4:6.

5-6. Ha ano nga mga paagi an baraan nga espiritu binulig ha mga sumurunod ni Jesus?

⁵ Nakarawat han mga sumurunod ni Jesus an baraan nga espiritu han Pentekostes 33 C.E. Pinaagi han bulig hito nga espiritu, gintikangan dayon nira an pagsangyaw, ngan ha halipot la nga panahon, yinukot an kinarawat han maopay nga sumat. (Buh. 2:41; 4:4) Han ginkontra an mga disipulo, waray hira humunong tungod ha kahadlok, lugod sinarig hira ha bulig han Dios. Nag-ampo hira: “Buligi an imo mga uripon nga padayon nga igyakan nga may bug-os nga kaisog an imo pulong.” Salit napuno hira han baraan nga espiritu ngan padayon nga “may kaisog nga nagyakan han pulong han Dios.”​—Buh. 4:18-20, 29, 31.

⁶ Inatubang liwat hin iba pa nga problema an mga disipulo ni Jesus. Pananglitan, gutiay la an mga kopya han Kasuratan. Waray hira mga publikasyon nga makakabulig ha pag-aram, pariho han aton ginagamit yana. Ngan kinahanglan nira magsangyaw ha mga tawo nga iba-iba an linggwahe. Bisan pa hito nga mga problema, nahimo hinin madasigon nga mga disipulo an usa nga butang nga baga hin imposible​—ha pipira la ka dekada, naisangyaw nira an maopay nga sumat “ha ngatanan nga linarang ha ilarom han langit.”​—Col. 1:6, 23.

7. Ha naglabay nga sobra 100 ka tuig, paonan-o nahibaroan han mga surugoon ni Jehova kon ano an iya iginsusugo ha ira, ngan ano an ira ginbuhat?

⁷ Ha moderno nga panahon. Hi Jehova padayon nga naggigiya ngan naghahatag hin kusog ha iya katawohan. Kaurogan na nga iya gin-gigiyahan an iya katawohan pinaagi han iya Pulong, nga iginsurat ha giya han baraan nga espiritu. Mababasa naton dida an mahitungod han ministeryo ni Jesus ngan an iya sugo ha iya mga sumurunod nga ipadayon an buruhaton nga iya gintikangan. (Mat. 28:19, 20) Tikang pa han Hulyo 1881, ini nga magasin nagsiring na: “Waray kita tawaga, o dihugi basi kumarawat hin dungog ngan magin riko kondi basi gamiton an ngatanan nga may-ada kita basi isangyaw an maopay nga sumat.” An bokleta nga To Whom the Work Is Entrusted nga iginpublikar han 1919, nagsiring: “Sobra gud kadamu an buruhaton, pero buruhaton ito han Ginoo, ngan pinaagi han iya kusog mabubuhat naton ito.” Oo, pariho han siyahan-siglo nga mga Kristiano, ini nga kabugtoan nagin maisugon ngan maduruto gud ha buruhaton, kay sinarig hira nga bubuligan hira han baraan nga espiritu ha pagsangyaw ha ngatanan nga klase hin tawo. Nasarig liwat kita nga bubuligan kita han baraan nga espiritu.

8-9. Ano nga pamaagi an gin-gagamit han organisasyon ni Jehova ha pagpasamwak han maopay nga sumat?

⁸ Tikang pa hadto, an organisasyon ni Jehova nagamit han pinakamaopay gud nga mga garamiton basi ipasamwak an maopay nga sumat. Kaapi hito an inimprinta nga mga publikasyon, an “Photo-Drama of Creation,” mga ponograpo, mga sound car, mga pagbrodkast ha radyo, ngan hinin bag-o la, an mga kompyuter ngan Internet. An organisasyon han Dios naghuhubad liwat hin mga impormasyon ha pinakadamu gud nga linggwahe nga yana pa gud la nahitabo! Kay ano?  Basi an ngatanan nga klase hin tawo makabati han maopay nga sumat ha ira kalugaringon nga linggwahe. Hi Jehova diri nagpapaurog; iya igintagna nga an maopay nga sumat isasangyaw “ha tagsa nga nasud ngan tribo ngan pinulongan ngan katawohan.” (Pah. 14:6, 7) Karuyag niya nga mahibaroan han tanan an mensahe han Ginhadian.

⁹ Kumusta man an mga tawo nga makuri masangyawan, bangin tungod kay naukoy hira ha mga apartment nga gwardyado? Basi masangyawan an damu hini nga mga tawo, an organisasyon ni Jehova napagios ha paggamit hin iba-iba nga porma han pagsangyaw ha publiko. Pananglitan, han 2001, gin-aprobaran han Nagmamando nga Lawas an paggamit hin mga cart han literatura ngan iba pa nga paagi han pagdispley han literatura ha France ngan ha urhi, pati ha iba nga mga lugar. Maopay gud an mga resulta. Han 2011, gintikangan an usa nga bag-o nga programa ha United States ha usa han pinakamatawo nga mga lugar ha New York City. Ha siyahan nga tuig, 102,129 nga libro ngan 68,911 nga magasin an naipanhatag. Ngan 4,701 nga tawo an naghangyo nga magpa-Bible study! Klaro, ginsusuportaran han baraan nga espiritu ini nga buruhaton. Salit gin-aprobaran han Nagmamando nga Lawas an paggamit han mga displey han literatura ha bug-os nga kalibotan.

10. Ano an puydi naton buhaton basi mag-uswag kita ha aton pagministeryo?

¹⁰ An imo mahihimo. Bug-os nga pahimulsi an training nga iginhahatag ni Jehova ha Kristiano nga mga katirok. Regular nga makig-upod ha ministeryo ha iyo grupo han pagsangyaw. An imo mga kagrupo makakabulig ha imo ha mga aspekto nga bangin kinahanglan mo pauswagon, ngan madadasig ka han ira maopay nga ehemplo. Padayon nga magsangyaw bisan pa han mga kakurian. Sugad han iginpapahinumdom han aton tema nga teksto, nahihimo naton an kaburut-on han Dios, diri ha aton kalugaringon nga kusog, kondi pinaagi han baraan nga espiritu. (Zac. 4:6) Tutal, buruhaton han Dios an aton ginhihimo.

11. Paonan-o an nagmamando nga lawas ha siyahan nga siglo urosa nga nagbuhat basi magpabilin nga organisado an katawohan han Dios?

¹¹ Ha siyahan nga siglo. An nagmamando nga lawas ha Jerusalem urosa nga nagbuhat basi magpabilin nga organisado ngan murayaw an katawohan han Dios. (Buh. 2:42) Pananglitan, han  binangon an isyu han pagturi han mga 49 C.E., ginhisgotan ito han nagmamando nga lawas pinaagi han giya han baraan nga espiritu. Kon an kongregasyon nagpabilin nga nababahin tungod hini nga isyu, naulang unta an pagsangyaw nga buruhaton. Bisan kon Judio an mga apostol ngan mga tigurang, waray hira magpaimpluwensya han tradisyon han mga Judio o hadton marig-on nga nagtututdo hito. Lugod, sinarig hira ha Pulong han Dios ngan ha giya han espiritu. (Buh. 15:1, 2, 5-20, 28) Ano an resulta? Ginbendisyonan ni Jehova an ira desisyon, nagpabilin an kamurayawan ngan pagkaurosa, ngan nagpadayon an pagsangyaw nga buruhaton.​—Buh. 15:30, 31; 16:4, 5.

12. Ano an nagpapakita nga organisado ngan murayaw an organisasyon ni Jehova yana?

¹² Ha moderno nga panahon. An organisasyon ni Jehova nangangalimbasog gud nga tipigan nga organisado ngan murayaw an katawohan ni Jehova. Tikang pa han 1895, an Zion’s Watch Tower and Herald of Christ’s Presence han Nobyembre 15 may artikulo nga an ulohan, “Desente Ngan Organisado” nga iginbasar ha 1 Corinto 14:40. Ini nga artikulo nagsiring: “Damu an ginsiring han mga apostol ha siyahan nga Singbahan may kalabotan ha pagin organisado . . . Importante nga padayon nga sundon naton hin maopay an mga butang nga ‘iginsurat hadto ha pagtutdo ha aton.’” (Roma 15:4) Oo, an organisasyon ni Jehova yana nangangalimbasog gud nga magpabilin nga organisado ngan murayaw sugad la han siyahan-siglo nga mga Kristiano. Ha pag-ilustrar: Kon maatender ka hin Pag-aram ha Barantayan ha iba nga kongregasyon​—bisan ha iba nga nasud—​maaram ka kon paonan-o ito dudumarahon ngan kon ano nga artikulo an pag-aadman. Magigin komportable ka dayon! Nagigin posible la ini nga pagkaurosa pinaagi han espiritu han Dios!​—Zep. 3:9.

13. May kalabotan ha Santiago 3:17, ano nga mga pakiana an angay naton ipakiana ha aton kalugaringon?

¹³ An imo mahihimo. Karuyag ni Jehova nga ‘matipigan [han iya katawohan] an pagin usa ha espiritu pinaagi han kamurayawan nga nagbubugkos ha ira.’ (Efe. 4:1-3) Salit pakianhi an imo kalugaringon: ‘Nabulig ba ako nga magkaurosa ngan magin murayaw an kongregasyon? Masinugtanon ba ako ha mga nangunguna? Masasarigan ba ako han iba, labi na kon may mga responsabilidad ako ha kongregasyon? Naabot ba ako ha eksakto nga oras, mabinuligon ba ako, ngan andam ha pagserbi ha iba?’ (Basaha an Santiago 3:17.)  Kon may nakikita ka nga angay pauswagon, pag-ampo para han baraan nga espiritu. Samtang mas gintutugotan mo ito nga magmolde han imo personalidad ngan makaimpluwensya ha imo mga ginbubuhat, mas hihigugmaon ngan papabilhan ka han kabugtoan.

14. Sumala ha Colosas 1:9, 10, paonan-o gintutdoan ni Jehova an iya katawohan han siyahan nga siglo?

¹⁴ Ha siyahan nga siglo. Nalilipay gud hi Jehova nga tutdoan an iya katawohan. (Sal. 32:8) Karuyag niya nga makilala nira hiya, higugmaon hiya, ngan mabuhi ha kadayonan sugad nga iya hinigugma nga mga anak. Diri magigin posible ini ngatanan kon waray an edukasyon nga iya iginhahatag. (Juan 17:3) Gin-gamit ni Jehova an Kristiano nga kongregasyon han siyahan nga siglo basi tutdoan an iya katawohan. (Basaha an Colosas 1:9, 10.) An baraan nga espiritu​—an “parabulig” nga iginsaad ni Jesus—​binulig liwat ha mga disipulo. (Juan 14:16) An baraan nga espiritu binulig ha mga disipulo nga masabtan an Pulong han Dios ngan mahinumdoman an tanan nga ginyakan ngan ginbuhat ni Jesus, nga ha urhi, iginrekord ha mga Ebanghelyo. Ito nga kahibaro nagparig-on han pagtoo han siyahan-siglo nga mga Kristiano pati han ira gugma ha Dios, ha iya Anak, ngan ha kada tagsa.

15. Ha ano nga mga paagi nakikita mo nga gintutuman ni Jehova an iya saad ha Isaias 2:2, 3?

¹⁵ Ha moderno nga panahon. Igintagna ni Jehova nga “ha ultimo nga bahin han mga adlaw,” an mga tawo ha ngatanan nga nasud masagka ha iya simboliko nga bukid basi tutdoan han iya mga paagi. (Basaha an Isaias 2:2, 3.) Nakikita naton nga natutuman na ito nga tagna. An tinuod nga pagsingba mas labaw gud kay ha bisan ano nga klase han buwa nga pagsingba. Ngan gintatagan ni Jehova an iya katawohan hin damu gud nga impormasyon mahitungod ha Biblia! (Isa. 25:6) Pinaagi han “matinumanon ngan maaramon nga uripon,” diri la kita niya basta gintatagan hin damu nga impormasyon, kondi iba-iba liwat nga klase, tikang ha mga artikulo ngan pahayag tubtob  ha mga animation ngan video. (Mat. 24:45) Inaabat naton an inabat han sangkay ni Job nga hi Elihu nga angayan la nga nagsiring: “May instruktor ba nga pariho ha [Dios]?”​—Job 36:22.

16. Ano an mahimo mo buhaton basi magtubo ka ha espirituwal?

¹⁶ An imo mahihimo. An espiritu han Dios mabulig ha imo nga maiaplikar kon ano an imo ginbabasa ngan gin-aadman ha Pulong han Dios. Pag-ampo pariho han salmista: “Tutdui ako, O Jehova, mahitungod han imo dalan. Maglalakat ako uyon ha imo kamatuoran. Pag-usaha an akon kasingkasing basi magkaada ako kahadlok ha imo ngaran.” (Sal. 86:11) Salit padayon nga pahimulusi an espirituwal nga pagkaon nga igintatagana ni Jehova pinaagi han iya Pulong ngan han iya organisasyon. Syempre, an imo tumong diri la basta magkaada kahibaro. Karuyag mo maisilsil an kamatuoran ha imo kasingkasing ngan iaplikar ito ha imo kinabuhi. Mabubuligan ka han espiritu ni Jehova nga mabuhat ito. Karuyag mo liwat dasigon an imo kabugtoan. (Heb. 10:24, 25) Kay ano? Kay imo hira espirituwal nga pamilya. Pag-ampo para han espiritu han Dios nga buligan ka nga makaghatag hin kinasingkasing nga mga komento ha mga katirok ngan himoon an imo pinakamaopay kon may-ada ka bahin. Hini nga mga paagi iginpapakita mo kan Jehova ngan ha iya Anak nga hinigugma mo an ira presyoso nga “mga karnero.”​—Juan 21:15-17.

17. Ha ano nga mga paagi mo maipapakita nga matinumanon nga nasuporta ka ha organisasyon ni Jehova?

¹⁷ Diri mag-iiha, an organisasyon nga mabibilin na la ha tuna amo an organisasyon nga gin-gigiyahan han espiritu han Dios. Salit madasigon nga magbuhat kaupod han organisasyon ni Jehova. Ipakita an waray pinaurog nga gugma han Dios ha mga tawo pinaagi ha pagpasamwak han maopay nga sumat ha ngatanan. Subara an iya gugma ha pagin organisado ngan ha kamurayawan pinaagi ha pagbulig nga magkaurosa an kongregasyon. Pamati ha imo Harangdon nga Instruktor pinaagi ha bug-os nga pagpahimulos han hura nga espirituwal nga pagkaon nga iya iginhahatag. Ngan kon umabot na an kataposan han kalibotan ni Satanas, diri ka mahahadlok. Lugod, may kompyansa ka nga matindog sugad nga usa hadton maunungon nga nag-aalagad kaupod han organisasyon ni Jehova.