1. Wetin people wey don baptize as servants of Jehovah must continue to do?

YOU don baptize? If your answer na yes, then you don show other people say you get faith for Jehovah and you want serve-am for e organization. * The truth na say, your faith for Jehovah must continue to strong more-more. And you need to continue to make yourself dey sure say Jehovah de use e organization today.

2-3. How Jehovah de direct e organization today? Give examples.

² Today, Jehovah de direct e organization for way wey de show the kind person wey e be, the things wey e get for mind, and the way e want make e servants de do things. Make we talk about three character wey Jehovah get wey we fit see for e organization.

³ Number one, “God no de do partial.” (Acts 10:34) Na love make Jehovah give e Son as sacrifice to “save everybody.” (1 Tim. 2:6; John 3:16) Jehovah de use e people preach the good news to everybody wey want listen. E de use this one help everybody wey want benefit from the sacrifice. Number two, Jehovah like-am when things arrange well and peace dey. (1 Cor. 14:33, 40) So, we suppose expect say people wey de serve Jehovah go de do things as one group for way wey arrange well, and peace go dey among them. Number three, Jehovah na the best Teacher. (Isa. 30:20, 21) Because of this one, e organization de work hard to teach people Bible. Them de do this one for congregation and when them de preach to other people. How Christians for time of the apostles copy this three character wey Jehovah get? How Jehovah’s organization today de copy this fine-fine character? And how holy spirit fit help you as you de work with Jehovah’s organization today?

4. Wetin Jesus command e disciples to do for Acts 1:8, and wetin go help them?

⁴ For apostles their time. The things wey Jesus preach about give everybody hope. (Luke 4:43) E command e disciples make they continue the work wey e start. They go preach “for the whole earth.” (Read Acts 1:8.) But they no go fit do the work with their own power. They go need holy spirit. Na the holy spirit “go help” them, as Jesus don promise before.—John 14:26; Zech. 4:6.

5-6. Which ways holy spirit help disciples of Jesus?

⁵ The disciples of Jesus receive holy spirit for Pentecost 33 C.E. Because holy spirit help them, they no waste time start to preach. And after small time, plenty-plenty people accept the good news. (Acts 2:41; 4:4) When people begin give the disciples trouble, they no fear and stop to preach. Instead, they tell God make e help them. They pray say: “Continue to give your servants strong heart to talk your word.” Then all of them receive holy spirit and they continue to “preach the word of God without fear.”—Acts 4:18-20, 29, 31.

⁶ The disciples still face other things too. For example, the Bible wey dey that time no plenty. They no get other books wey explain Bible, as we get today. And they need to preach to people wey de speak plenty different-different language. Even with all this one, they do something wey be like say no dey possible. They use about 30 years preach the good news for the whole world that time.—Col. 1:6, 23.

7. More than 100 years ago, how servants of Jehovah know wetin God want make they do, and wetin they do?

⁷ For our time. Jehovah don continue to direct e people and to give them power. Na Bible be the main thing wey e de use direct e people, and na e holy spirit e use direct the people wey write-am. Bible tell us about the work wey Jesus come do and the command wey e give e disciples say make they continue the work wey e start. (Matt. 28:19, 20) Even since July 1881, Watchtower magazine don talk say: “Jehovah no choose us so that we go de receive special praise from people or so that we go dey rich. Instead, e choose us so that we go use everything wey we get to preach the good news.” One small book wey we print for 1919, wey the name na To Whom the Work Is Entrusted, talk say: “Na big work really dey our hand, but na the Lord get the work, and e go give us power to do-am.” True-true, like Christians for time of the apostles, this brothers no fear and they really work hard because they trust say holy spirit go help them preach to any kind of person. Today too, we trust say holy spirit go help us.

8-9. Which different-different style Jehovah’s organization don use to spread the good news?

⁸ The things wey Jehovah’s organization don use preach the good news to people na the best. Some of this things na books wey we print, the “Photo-Drama of Creation,” phonograph, sound cars, radio, and now we de use computer and Internet. Another thing be say, Jehovah’s organization de translate Bible message pass as them de do before for plenty different-different language. Why? So that different kind of people go fit hear the good news for their own language. Jehovah no de do partial. E don talk say people go preach the good news “for every country, and tribe and language and people.” (Rev. 14:6, 7) E want make everybody hear the good news about the Kingdom.

⁹ What about people wey we no fit preach to for their house, maybe because they get gateman or they lock the gate? So that we go fit preach to this kind people more, Jehovah help e organization to begin use different kind of preaching style. For example, for  2001, Governing Body talk say brothers and sisters for France go fit de use magazine-stand and other ways wey they fit de use show people our publication for open place. After, brothers and sisters for other place start to preach like that too. Better result come out from this one. For 2011, we start one new program for America for one place wey really dey busy for New York City. For the first year, they give people 102,129 books and 68,911 magazines. And 4,701 people talk say they want Bible study! E clear say, Jehovah de use e holy spirit de support this work. So Governing Body talk say, brothers and sisters for the whole world go fit de use magazine-stand and any other way to show people our publication for open place.

10. Wetin we go fit do to make the way we de preach and teach de better?

¹⁰ The thing wey you fit do. Jehovah de train us for our meeting. Use the things wey you don learn for there. De always preach with your field service group. The brothers and sisters for your group go fit help you sabi preach and teach more, and their fine example go encourage you. No matter wetin you de face, continue to preach. As we see from the Bible verse wey we take this article from, na holy spirit de help us to do wetin God want, no be because we get power. (Zech. 4:6) After all, no be God get the work?

11. How governing body for time of the apostles work as one to make peace dey among God’s people?

¹¹ For apostles their time. The governing body for Jerusalem work as one to make sure say things arrange well and peace dey among God’s people. (Acts 2:42) For example, around the year 49 C.E., some Christians think say everybody wey want serve Jehovah must circumcise, but some no think like that. So holy spirit help the governing body discuss the matter well. If to say the congregation continue to think for different way for this matter, they for no fit do the preaching work well. Even though say the apostles and the elders na Jew people, they no allow their tradition affect the way they see the matter. And they no allow  the people wey de teach say person must circumcise to affect them. Instead, they allow Bible and holy spirit to help them decide the correct thing. (Acts 15:1, 2, 5-20, 28) So wetin happen after? Jehovah bless their decision, the brothers and sisters dey as one, they get peace, and they continue to preach the good news.—Acts 15:30, 31; 16:4, 5.

12. Wetin show say things arrange well and peace dey for Jehovah’s organization today?

¹² For our time. Jehovah’s organization don help us to do things for way wey arrange well and wey go bring peace among us. Even since 1895, Zion’s Watch Tower and Herald of Christ’s Presence of November 15, get one article wey the topic na “Decently and in Order.” The topic na from 1 Corinthians 14:40. The article talk say: “The apostles get plenty things to tell the congregation about how to make things arrange well . . . E dey important to sofri obey ‘the things wey they write before our time to teach us.’ ” (Rom. 15:4) True-true, Jehovah’s organization today de work hard to make sure say peace dey and things arrange well just as e be for time of the apostles. For example, if you attend Watchtower Study for another congregation, whether for your country or even for another country, you go know how they go do the study and the article wey they go study. Quick-quick, you no go feel say you be stranger! Na holy spirit from Jehovah fit make this one dey possible!—Zeph. 3:9, ftn.

13. With wetin dey for James 3:17, which questions we go ask ourself?

¹³ The thing wey you fit do. Jehovah want make e people continue to get “one mind wey the spirit de give with the kind peace wey de make [us] dey as one.” (Eph. 4:1-3) So ask yourself say: ‘I de do things wey go bring peace and make everybody dey as one for congregation? I de obey the people wey Jehovah de use direct e work? People trust me, especially if e get some work wey I de do for congregation? I de try make I no late? I de help people and I dey ready to work?’ (Read James 3:17.) If you see say you no de do well for some things, make you beg God for holy spirit. The more you de allow holy spirit to help you get better character and do things for the right way,  the more your brothers and sisters go love you and like the things wey you de do for congregation.

14. With wetin dey for Colossians 1:9, 10, how Jehovah teach e people for time of the apostles?

¹⁴ For apostles their time. Jehovah love to teach e people no be small. (Ps. 32:8) E want make they know the kind person wey e be, make they love-am, and live forever as children wey e love. All this things no go dey possible if Jehovah no teach us. (John 17:3) Jehovah use the congregation for time of apostles to teach e people. (Read Colossians 1:9, 10.) Holy spirit really “help” the disciples that time as Jesus promise. (John 14:16) The spirit help them understand Bible well, and e help them remember many things wey Jesus talk and do. And this things wey Jesus talk and do, later dey for book for people to read-am. This things make the faith of Christians for time of apostles dey strong. And their love for God, for Jesus, and for one another strong more-more.

15. Which different-different way you don see say Jehovah de do the thing wey e promise for Isaiah 2:2, 3?

¹⁵ For our time. Jehovah don talk say “for last days,” people from all the country go come e “mountain” so that they go learn about the things wey e want. This one mean say people go join e organization to worship-am for correct way. (Read Isaiah 2:2, 3.) Today we see say wetin that Bible verse talk de happen. E dey clear say true worship better pass any kind of lie-lie worship by far. And Jehovah de really teach e people plenty things for Bible! (Isa. 25:6) E de use “the faithful and discreet slave” teach us all this plenty things, and we de receive them for different-different way. For example, we de read-am for our books, de hear-am for talks, de watch-am for cartoons and videos. (Matt.  24:45) We de feel like the friend of Job wey e name na Elihu. E talk say: “Which teacher be like God?”—Job 36:22.

16. Wetin you fit do to gain from the things wey Jehovah de teach e people?

¹⁶ The thing wey you fit do. God go use e spirit help you to do the things wey you de read and study for e Word. Pray like one of the person wey write the book of Psalms. E say: “Teach me, about your way, O Jehovah. I go waka for inside your truth. Make my heart to be one to fear your name.” (Ps. 86:11) So make you continue to read and study Bible and other books wey Jehovah de use e organization give us. Remember say, the reason why you de study no be just to know things. You want really dey sure say wetin you de learn na the truth, and you want use-am for your life. The holy spirit from Jehovah fit help you do that one. You still want de encourage your brothers and sisters. (Heb. 10:24, 25) Why? Na because they be your family. Beg Jehovah make e give you e spirit to help you de answer question from your heart for our meeting. Make you still beg God make e help you do your best anytime wey you get part for meeting. For this different-different way, you fit show Jehovah and e Son say you love their “sheep” and say this sheep dey important.—John 21:15-17.

17. Which different-different way you fit show say you de support the organization wey Jehovah de use?

¹⁷ Small time, the only organization wey go remain for this earth go be the one wey God de use e spirit direct. So make you use all your heart work with Jehovah’s organization. De preach the good news to everybody wey you see. This one go show say you love everybody like Jehovah. De do things wey go make congregation dey as one. This one go show say you de copy the way Jehovah want make things arrange well and make peace dey among e people. Make you de learn from all the things wey Jehovah de teach e people. This one go show say you de listen to the best Teacher, Jehovah. And as this world wey Satan de control don de near when e go end, you no go fear. Instead, you go get strong heart and dey among the people wey hold Jehovah tight and de serve-am for e organization.