1. მუ ოკო აკეთან ნათილ ქრისტიანეფქ?

ნათილ რეთო? თაშ ქორენ-და, თეთ სახალხოთ ოძირეთ, ნამდა რწანა იეჰოვა დო გოკონა, რდათ თიშ ორგანიზაციას. * მუშო ოკო რაგად, თქვა ოკო გაგრძელათ იეჰოვაშ მიმართ რწმენაშ გამანგარება დო, დროშ მიკულაწკუმა ართო, უმოსო ოკო რჯერდან, ნამდა ამდღა იეჰოვა მუშ ორგანიზაციას ირინუანს.

2, 3. იეჰოვაშ პიროვნებაშ ნამ სუმ მხარე იძირე თიშ ორგანიზაციაშე? გენწყით.

² იეჰოვაშ პიროვნება, განზრახვა დო მოთხოვნეფ თევრეშე იძირე, მუჭო ხემძღვანელენს მუშ ორგანიზაციას. მორთ გუვარჩუათ, მუჭო იძირე იეჰოვაშ ორგანიზაციაშე თიშ პიროვნებაშ სუმ მხარე.

³ პირველ, „ღორონთ მიკერძოებულ ვა რე“ (საქ. 10:34). იეჰოვა ჸოროფაქ აღძრჷ შეწირკო მუშ სქუა, მუდგათ „გიშაჸიდირალ გაკეთ არძაშო“ (1 ტიმ. 2:6; იოან. 3:16). იეჰოვა მუშ ხალხის ირინუანს, ნამდა სახიოლო ამბე უქადაგას არძას, მიდგას მორჩქილაფა ოკო დო თეშნერო, მუთ შილებე მეტ ადამიანს ოხვარ, ნამდა გიშაჸიდირალქ ჯგირობუა მუღას თინეფს. მაჟია, იეჰოვა რე წესრიგიშ დო მშვიდობაშ ღორონთ (1 კორ. 14:33, 40). ათეშენ ჩქი ვამკვენა, ნამდა ღორონთიშ თაყვანიშმცემელეფ თის მოწესრიგებულო დო მშვიდობიანო ომსახურნა. მასმა, იეჰოვა „დიდებულ მოძღვარ“ რე (ეს. 30:20, 21). ათეშენ თიშ ორგანიზაცია ირნერო ოცად, თიშ სიტყვაშე, ბიბლიაშე, ოგურუას, მუჭოთ კრებასინ, თეშ ქადაგებაშ დროს ხოლო. მუჭო იძირედ იეჰოვაშ თე სუმ თვისება პირველ საუკუნეშ ქრისტიანულ კრებას? მუჭო ირწყებე თენა ამდღა? მუჭო შეულებ წმინდა შურს, მიგეხვარას იეჰოვაშ ორგანიზაციაწკუმა თანამშრომლობაშ დროს?

4. მუჭოთ საქმეეფიშ 1:8-შე იძირე, მუ უწუ იესოქ მუშ მიმაჸუნალეფს დო მუს მიღენდეს თინეფ?

⁴ პირველ საუკუნეს. ცნობაქ, ნამდგას იესო ქადაგენდჷ, მთელ კაცობრიობას მეჩჷ იმენდ (ლუკ. 4:43). თიქ მუშ მიმაჸუნალეფს უწუ, გაგრძელესკო მუშ წუმოჭყაფილ საქმე, ნამდა „დედამიწაშ არძა კუნთხუს“ დამოწმესკო (წეკითხით საქმეეფიშ 1:8). მუშო ოკო რაგად, თინეფს თე საქმე მუნეფიშ ძალათ ვაკეთებედეს. თინეფს ოსაჭირდეს წმინდა შურ — „მოხვარე“, ნამუთ იესოქ დეპირ თინეფს (იოან. 14:26; ზაქ. 4:6).

5, 6. მუჭო მეხვარ წმინდა შურქ იესოშ მიმაჸუნალეფს?

⁵ ახ. წ. 33 წანაშ ჟარნეჩდომავითა დღაშ დღახუს იესოშ მიმაჸუნალეფქ წმინდა შურ მიღეს. თე ძალაშ მოხვარათ თინეფქ ხეთეშე ქიდიჭყეს ქადაგება დო ჭიჭე ხანშა ანთასეფქ მიღჷ სახიოლო ამბე (საქ. 2:41; 4:4). წინააღმდეგობაქ ქიდიჭყუნ, მოციქულეფქ თის ვადუშქურდეს დო ღორონთის თხუეს მოხვარა. თინეფ ლოცულენდეს: „ძალა ქიმეჩ სქან მონეფს, სქან სიტყვა მთელ გაბედულებათ იჩუან“. თინეფქ წმინდა შურით გეიფშეს დო ვემუტებნა „ღორონთიშ სიტყვაშ გაბედულო რაგად“ (საქ. 4:18—20, 29, 31).

⁶ იესოშ მოციქულეფქ შხვა სირთულეეფს ხოლო შეხვადეს. მაგალთო, თიმწკუმა წმინდა წერილეფიშ ხვალე მუსხირენ ასლი რდუ. ვართ თიცალ ოგურაფალ საშვალებეფ უღდეს, ნამუთ ამდღა ჩქი მიღნა. თეწკუმა ართო, თინეფქ ოკო უქადაგესკო ხალხის, მით შხვადოშხვა ნინაშა იჩიებუდ. თე ირფელიშ უმკუჯინუო, დუდგინოდვალირ მოციქულეფქ თინა გაკეთეს, მუთ ართ მეჯინათ შეიოლებერ ვარდჷ — სოდგარენ 30 წანაშ დინახალე, თინეფქ სახიოლო ამბე უქადაგეს „არძა გუნაჭყეფუს ცაშ თუდო“ (კოლ. 1:6, 23).

7. სოვრეშე უჩქუდეს იეჰოვაშ მსახურეფს სოდგარენ 100 წანაშ წოხოლე, მუს ითხინდჷ ღორონთ თინეფშე დო მუ აკეთეს თინეფქ?

⁷ თანამედროვე დროს. იეჰოვა ამდღა ხოლო ხემძღვანელენს დო ამანგარენს მუშ ხალხის. მუშო ოკო რაგად, ძირითადო თე ხემძღვანელობა ღორონთიშ წმინდა შურით შთაგონებულ სიტყვაშე მოურს. თექ ჩქი ბკითხულენთ იესოშ მსახურებაშ გურშენ. თეწკუმა ართო, ბიბლიას ინოჭარ იესოშ მითითება, ნამდა მუშ მიმაჸუნალეფქ ოკო გაგრძელესკო თიშ წუმოჭყაფილ საქმე (მათ. 28:19, 20). 1881 წანაშ კვირკვეშ „გინაჯინალ კოშკის“ ჭარუდ: „ჩქი თიშო ვა ვორდით მოწოდებულეფ, ნამდა ადამიანეფშე დიდება დო სიმდიდრე მიბღითკო. პირიქით, თიშო ვორდით მოწოდებულეფ, ნამდა სახიოლო ამბეშ ოქადაგებელო მუთ შემლებდეს, ირფელ გუვაკეთითკო“. 1919 წანას გიშაშქუმალირ ბუკლეტის, „მის მიენდჷ უფალიშ საქმექ?“, ჭარუდჷ: „თენა ქიანაშმადიდა საქმე რე, მარა თენა უფალიშ საქმე რე დო ათეშენ ღორონთიშ ძალათ შევასრულენთ თის“. პირველ საუკუნეშ ქრისტიანეფცალო, თე გაბედულ და დო ჯიმალეფქ დუდ მეუძღვინეს თე საქმეს დო დარწმუნებულ რდეს, ნამდა წმინდა შურ მეხვარებუდ თინეფს, არძანერ ადამიანს უქადაგესკო. ჩქი ხოლო დარწმუნებულეფ ვორეთ, ნამდა წმინდა შურ მიმეხვარებნა.

8, 9. მუ მეთოდეფს გიმირინუანს იეჰოვაშ ორგანიზაცია სახიოლო ამბეშ უმოსო გავრცელებერო?

⁸ იეჰოვაშ ორგანიზაცია სახიოლო ამბეშ გავრცელებერო ირიათო არძაშ უჯგუშ საშვალებეფს ირინუანს, მუთ ხეშამალაფარ რე. ადრე თე საშვალებეფშა მიშეშ „შემოქმედებაშ ფოტოდრამა“, პატეფონეფ, რუპორეფამ მანქანეფ, რადიო მაუწყებლობა, ბეშტელ პუბლიკაციეფ დო ბოლო წანეფს თე საშვალებეფიშ რიცხვის ციფრულ ტექნოლოგიეფქ ხოლო ქიგიაძინ. თეს გეძინელ, ღორონთიშ ორგანიზაცია ასრულენს ისტორიას არძაშ უმოს დიდ მთარგმნელობით საქმეს! მუ რე თეშ მიზან? თეშ მიზან თინა რე, ნამდა არძანერ ადამიანქ მშობლიურ ნინაშა მირჩქილუას სახიოლო ამბე. იეჰოვა მიუკერძოებელ რე; თიქ იწინასწარმეტყველ, ნამდა სახიოლო ამბე გეცხადებუდ „არძა ერს, ტომს, ნინას დო ხალხის“ (გამოცხ. 14:6, 7). თის ოკო,  ნამდა სამეფოშ ცნობაქ არძაშა ქიმიოჭირინუას.

⁹ მუშ რაგად შილებე თინეფშე, მიდგაშა მეულა დო ქადაგება შილებე რთულ რდას, მაგალთო თიშენ, ნამდა განსაკუთრებულო დაცულ ბინეფს ცხოვრენა? თეცალ ხალხშა სახიოლო ამბექ ქიმიოჭირინუკონ, იეჰოვაშ ორგანიზაციაქ ხალხიშ შაყარუაშ ადგილეფს შხვადოშხვა მეთოდით ქადაგება ქიდიჭყჷ. მაგალთო, 2001 წანას ხემძღვანელ საბჭოშ ნებართვათ, დიო საფრანგეთის დო უკულ შხვა ადგილეფს ხოლო ქიდიბჭყით ლიტერატურაშ სტენდეფიშ დო შხვა საშვალებეფიშ გიმორნაფა, მუდგას ჯგირ შედეგეფქ მაჸუნ. 2011 წანას შეერთებულ შტატეფს, ნიუ-იორკიშ ართ-ართ თიცალ ადგილს, სოდეთ ბრელ ხალხ გილურს, ხალხიშ შაყარუაშ ადგილეფს ქადაგებაშ საცდელ პროგრამაქ ქიდიჭყჷ. თეცალ მსახურებაშ პირველ წანას 102 129 წიგნიქ დო 68 911 ჟურნალქ გევრცელ. თეწკუმა ართო 4 701 კოჩიქ მითხუ ბიბლიაშ გურაფა! არგამა რე, თე საქმეს იეჰოვაშ წმინდა შურ მიკურდჷ. თაშ ნამდა, ხემძღვანელ საბჭოშ ნებართვათ მთელ მსოფლიოს გიმიბრინუანთ ქადაგებაშ თე მეთოდეფს.

10. მუშ კეთება შემლებნა, ნამდა გუვაუჯგუშათ მსახურებაშ უნარეფ?

¹⁰ მუშ კეთება შეილებნა? სრულ სარგებელ მიღით თი მომზადებაშე, ნამდგას იეჰოვა ქრისტიანულ შეხვალამეფიშ საშვალებათ მარზენა. რეგულარულო ითანამშრომლით თქვან სამქადაგებლო ჯგუფწკუმა. თე დროს და დო ჯიმალეფ მსახურებაშ თი მხარეეფიშ გაუჯგუშებას მიგეხვარებნა, ნამდგას მოხვარა გოსაჭირნა. თეს გეძინელ, შხვეფიშ ჯგირ მაგალით გურშა ელაიკინანა. სირთულეეფიშ უმკუჯინუო გაგრძელით ქადაგება. მუჭოთ თე სტატიაშ მთავარ მუხლ გუმოშინანა, ღორონთიშ ნებას ჩქინ ძალეფით ვარინ, წმინდაშ შურიშ მოხვარათ შევასრულენთ (ზაქ. 4:6). ჩქი ხომ ღორონთიშ საქმეს ვორთუთ?!

11. მუჭო თანამშრომლენდჷ გაერთიანებულო პირველ საუკუნეშ ხემძღვანელ საბჭო, ნამდა ღორონთიშ ხალხიქ ვადინუკო წესრიგ დო მშვიდობა?

¹¹ პირველ საუკუნეს. იერუსალიმს თიმ დროშიან ხემძღვანელ საბჭო გაერთიანებულო თანამშრომლენდჷ, ნამდა ღორონთიშ ხალხიქ  ვადინუკო წესრიგ დო მშვიდობა (საქ. 2:42). მაგალთო, მუჟამსით სოდგარენ ახ. წ. 49 წანას წინადაცვეთაშ საკითხიქ წიმიჭკირ, ხემძღვანელ საბჭოქ წმინდა შურიშ მოხვარათ, გარჩუ თე საკითხ. კრებას თე საკითხიშ გურშენ შხვადოშხვა აზრ ქაღვენუდ-და, თენა ქადაგებაშ საქმეს ეცილებუდ. მართალ რე, მოციქულეფ დო უხუცესეფ იუდეველეფ რდეს, მარა თინეფშა ვა უმოქმედებ იუდაურ ტრადიციას ვარდა თინეფიშ აზრის, მით თე ტრადიციას უკინენდჷ ხუჯის. პირიქით, თინეფ ღორონთიშ სიტყვათ დო წმინდა შურით ხემძღვანელენდეს (საქ. 15:1, 2, 5—20, 28). მუქ მაჸუნ თეს შედეგო? იეჰოვაქ აკურთხჷ თინეფიშ გადაწყვეტილება, ღორონთიშ ხალხის კინ უღუდ მშვიდობა დო ართობა დო ქადაგებაშ საქმექ ხოლო წიმი მიდართჷ (საქ. 15:30, 31; 16:4, 5).

12. სოვრეშე იძირე, ნამდა ამდღა იეჰოვაშ ორგანიზაციას წესრიგ დო მშვიდობა რე?

¹² თანამედროვე დროს. იეჰოვაშ ორგანიზაცია ირფელს ორთჷ, ნამდა იეჰოვაშ ხალხ შქას წესრიგ დო მშვიდობა რდას. 1895 წანას, „სიონიშ გინაჯინალ კოშკიშ დო ქრისტეშ მოულაშ მაცნეშ“ 15 ნოემბერიშ გიშაშქუმალას მოჩამილ რდუ სტატია: „წესიერო დო ორგანიზებულო“, ნამუთ 1 კორინთელეფიშ 14:40-შა რდუ გერსხილ. სტატიას ჭარუდ: «მოციქულეფ ბრელს ურაგადდეს პირველ საუკუნეშ ქრისტიანეფს, ნამდა . . . წესრიგ ოკო ჸოფედკო . . . მნიშვნელოვან რე, ირიათო ფშუდან, ნამდა „მუდგაქ ადრე იჭარ, ჩქინ ოგურაფალო იჭარ“ (რომ. 15:4)». იეჰოვაშ ორგანიზაცია, პირველ საუკუნეშ ქრისტიანეფცალო, ირნერო ოცად, წესრიგ დო მშვიდობა უღდას. მაგალთო: „გინაჯინალ კოშკიშ“ შეხვალამას შხვა კრებას ქიდესწრებუთ-და, გვალო შხვა ქიანას რდასინ ხოლო, გიჩქნა, მუჭო ჩეტარებ შეხვალამა დო ნამ სტატია იჸუაფ გარჩიებულ. ათეშენ დუდის ხეთეშე კომფორტულო იგინანთ. ღორონთიშ წმინდა შურიშ მეტის მუთუნს ქეშულებნო თეცალ ართობაშ გავითარება? (სოფ. 3:9).

13. იაკობიშ 3:17-იშ თანახმას, მუ ოკო ბკითხათ ჩქინ დუდის?

¹³ მუშ კეთება შეილებნა. იეჰოვას ოკო, ნამდა მუშ ხალხიქ ვადინუას „ღორონთიშ წმინდა შურშე მეღებულ ართობაშ ძღვინ“ (ეფეს. 4:1—3). ათეშენ ქოკითხით თქვან დუდის: „ხეს ქოვუნწყუნქო კრებას ართობა დო მშვიდობას? ქუვომორჩილუქო ხემძღვანელ ჯიმალეფს? შეულებნანო შხვეფს ჩქიმ იმენდ  უღდან, მითუმეტეს კრებას პასუხიშმგებლობეფ ქომღუნ-და? ქუვორექო პუნქტუალურ? ქუვოხვარუქო შხვეფს? მზათ ვორექო მივემსახურე თანაქრისტიანეფს?“ (წეკითხით იაკობიშ 3:17). თაქ გუმოკოროცხილ ნამდგაინ მხარეს გაუჯგუშება ქუგოსაჭირნა-და, ღორონთის წმინდა შურ ქოთხით. მუთ უმოსო მეჩანთ წმინდა შურს საშვალებას, ნამდა თქვან შინაგან პიროვნებაშა დო საქციელშა იმოქმედასინ, თით უმოსო ქოიჸოროფუანა დო დუგაფასენა და დო ჯიმალეფ.

14. კოლოსელეფიშ 1:9, 10-იშ თანახმას, მუჭო ოგურუანდჷ იეჰოვა მუშ ხალხის პირველ საუკუნეს?

¹⁴ პირველ საუკუნეს. იეჰოვას მანგარო ოხიოლ, მუშ ხალხშა გურაფა (ფსალმ. 32:8). თის ოკო, ნამდა თინეფქ გეჩინებაფუან, ქიჸოროფუან თინა დო მარადიულო იცხოვრან, მუჭოთ საჸოროფო სქუალეფქ. თე ირფელ ვეჸიდ შეიოლებერ, იეჰოვა ვა მოგურუანდანინ (იოან. 17:3). იეჰოვა პირველ საუკუნეს ქრისტიანულ კრებას გიმირინუანდჷ, ნამდა თიმ დროს მუშ ხალხის ოგურუკო (წეკითხით კოლოსელეფიშ 1:9, 10). წმინდა შურქ — „მოხვარექ“, ნამუთ იესოშ დაპირება რდუ — დიდ როლ შეასრულ (იოან. 14:16). წმინდა შურქ მოციქულეფს მეხვარ, უმოსო ქინანჭესკო ღორონთიშ სიტყვას დო ქუგაშინ ირფელ, მუთ იესოქ თქუ დო აკეთ დო მუდგაქ, უმოს გვიანო, სახარებეფს ინიჭარ. თე რჩქინაქ გამანგარ პირველ საუკუნეშ ქრისტიანეფიშ რწმენა. თეწკუმა ართო, უმოსო ქიჸოროფუეს ღორონთ, თიშ სქუა დო ართიან.

15. სოვრეშე ორწყეთ, ნამდა იეჰოვა ასრულენს ესაიაშ 2:2, 3-ს ინოჭარილ დუნაპირებუს?

¹⁵ თანამედროვე დროს. იეჰოვაქ იწინასწარმეტყველ, ნამდა „ბოლო დღალეფს“ ხალხ არძა ერშე ღორონთიშ „გვალაშა“ გეკიშ, ნამდა ღორონთიშ შარეფიშ გურშენ ქიდიგურუესკო (წეკითხით ესაიაშ 2:2, 3). ამდღა ჩქინ თოლით ვორწყეთ თე წინასწარმეტყველებაშ შესრულებას. ჭეშმარიტ თაყვანიშმცემლობაქ არძა ტყურა თაყვანიშმცემლობაშე მაღალას ქიგედირთჷ. იეჰოვა დიდებულ სულიერ ნადიმს მინწყუნა! (ეს. 25:6). ართგურ დო გონიერ მონაშ საშვალებათ იეჰოვა მარზენა  ბრელნერ სულიერ საზრდოს — სტატიეფით დო მოხსენებეფით დოჭყაფილ, ანიმაციეფით დო ვიდეოეფით თებულ (მათ. 24:45). ჩქი იობიშ მეგობარ ელიჰუცალო ფიფქრენთ, ნამდგაქ თქუ: „მი რე [ღორონთცალ] მოძღვარ?“ (იობ. 36:22).

16. მუშ კეთება შეილებნა, ნამდა სულიერო წიმი მიდართათ?

¹⁶ მუშ კეთება შეილებნა. ღორონთიშ წმინდა შურ მიგეხვარებნა, ცხოვრებას გეგმირინუათ თინა, მუდგას ღორონთიშ სიტყვას კითხულენთ დო გურაფლენთ. ფსალმუნმაბირეცალო ქილოცით: „ქუდმოგურე სქან შარა, იეჰოვა. სქან ჭეშმარიტებათ გილეფშენ იჸი. მთლიან გურ ქომუჩ, ნამდა სქან სახელიშ შიშ მიღდას“ (ფსალმ. 86:11). თაშ ნამდა, ვემიოტუათ სულიერ საზრდოშ მეღება, ნამდგას იეჰოვა მუშ სიტყვაშ დო ორგანიზაციაშ საშვალებათ გარზენა. მუშო ოკო რაგად, თქვან მიზან ხვალე რჩქინაშ მეღება ვა რე. თქვა გოკონა, ჭეშმარიტება გურშა გენიღათ დო ცხოვრებას გეგმირინუათ თინა. თეშ კეთებას იეჰოვაშ წმინდა შურ მიგეხვარებნა. თეს გეძინელ, და დო ჯიმალეფ თქვან სულიერ ოჯახ რენა, ათეშენ გოკონა, გურშა ელუკინათ თინეფს (ებრ. 10:24, 25). ღორონთის ქოთხით წმინდა შურ, ნამდა ქიმგეხვარან, ქრისტიანულ შეხვალამეფს გურიშემაკინალ კომენტარეფ გაკეთათ დო მუჟამსით დავალება გიღნა, ირნერო ეცადათ, თიქ ჯგირო გეგშაირთან. თეშნერო იეჰოვა დო იესოს ოძირანთ, ნამდა გიჸორა თინეფიშ ძვირფას „კირიბეფ“ (იოან. 21:15—17).

17. მუჭო შეილებნა ოძირათ, ნამდა ართგურო უკინენთ ხუჯის იეჰოვაშ ორგანიზაციას?

¹⁷ მალას დედამიწას ხვალე ართ ორგანიზაცია დოსქიდუ — ორგანიზაცია, ნამდგას ღორონთიშ წმინდა შურ ხემძღვანელენს. თაშ ნამდა, შურდოგურით ითანამშრომლით იეჰოვაშ ორგანიზაციაწკუმა. სახიოლო ამბე გუცხადით არძას, მიდგას შეხვადუთ დო თეშნერო მიაჸუნით ღორონთიშ მიუკერძოებელ ჸოროფაშ მაგალითის. კრებას ხე შეუნწყით ართობას დო თეშნერო მიაჸუნით იეჰოვაშ წესრიგ დო მშვიდობაშ მაგალითის. დო ბოლოს, სრულ სარგებელ მიღით თი სულიერ ნადიმშე, ნამდგას იეჰოვა გიმზადენა დო თეშნერო ქურჩქილით თქვან „დიდებულ მოძღვარს“. შედეგო, მუჟამსით სატანაშ ქიანაშ აღსასრულ ქუდოდირთუ, მუთუნშა ვა გაშქურნენა. თეშ გინაწონს თქვა მტკიცას გერდათ იჸი თინეფ შქას, მით ართგურო თანამშრომლენს იეჰოვაშ ორგანიზაციაწკუმა.