1. Ana Aklistu ŵabatisidwe akusosekwa kutenda chichi?

ANA wawojo ŵabatisidwe? Naga ŵabatisidwe, nikuti ŵalosisye kuti akusamkulupilila Yehofa, soni ali ŵakusachilila kumtumichila jwalakwe pampepe ni gulu jakwe. * Nambope, akusosekwa kulimbichila kuti chikulupi chawo chiŵe chakulimba. Akusosekwasoni kulupilila kuti Yehofa akulongolela gulu jakwe masiku agano.

2-3. Alondesye yakusatenda Yehofa pakujilongolela gulu jakwe.

² Masiku agano, Yehofa akulongolela gulu jakwe. Akutenda yeleyi ni chakulinga chakuti tumanyilile ndamo syakwe, yakulinga yakwe, soni yindu yakusasaka jwalakwe kuti tutendeje. Kwende tukambilane ndamo sitatu sya Yehofa syasikusawonechela chenene m’gulu jakwe.

³ Chandanda, “Mlungu jwangali lusagu.” (Mase. 10:34) Yehofa jwapeleche mwanache jwakwe kuti atuwombole. Jwatesile yeleyi ligongo lyakuti akusatunonyela. (1 Tim. 2:6; Yoh. 3:16) Yehofa akusakamulichisya masengo ŵandu ŵakwe kuti alalichileje ngani syambone kwa ŵandu wosope. Ŵandu ŵakusapikanila ngani syambonesi akwete upile wakulupuka. Chaŵili, Yehofa ali Mlungu jwadongosolo, soni jwamtendele. (1 Akoli. 14:33, 40) Ni ligongo lyakwe ŵakutumichila ŵakwe akusatenda yindu mwadongosolo soni mwamtendele. Chatatu, Yehofa ali ‘Jwakwiganya jwetu’ jwamkulungwa. (Yes. 30:20, 21) Ni ligongo lyakwe gulu ja Yehofa jikusalipeleka mnope pakwiganya mumpingo, soni mu utumiki. Ana ndamo sya Yehofa syatusasilesi syawonechele chamtuli mumpingo wa Chiklistu wandanda? Ana ndamosi sikuwonechela uli pasikati pa ŵandu ŵa Mlungu masiku agano? Ana msimu weswela mpaka wakamuchisye chamtuli wawojo pakumtumichila Yehofa yimpepe ni gulu jakwe masiku agano?

4. Ana lilemba lya Masengo 1:8, likulosya kuti Yesu ŵalamwile ŵakulijiganya ŵakwe kutenda chichi? Ana jemanjaji ŵapochele chichi kuti chakamuchisyeje?

⁴ Mu yaka 100 yandanda. Utenga waŵalalichilaga Yesu wapaga ŵandu chembecheyo. (Luk. 4:43) Jwalakwe ŵalamwile ŵakulijiganya ŵakwe kuti apitilisye kukamula masengoga “mpaka kumbesi kwa chilambo” (Aŵalanje Masengo 1:8.) Nambope jemanjaji ngamkanakombola kukamula masengoga mwamachili gawo. Myoyo, ŵasosekwaga msimu weswela kuti wakamuchisyeje. Sonitu Yesu ŵasalile jemanjaji kuti chachatumichisya jwakwakamuchisya.—Yoh. 14:26; Sak. 4:6.

5-6. Ana msimu weswela wakamuchisye chamtuli ŵakumkuya ŵa Yesu?

⁵ Ŵakumkuya ŵa Yesu ŵapochele msimu weswela pa Pentekosite mu 33 C.E. Paŵagambile kupochela msimu weswelawu, ŵatandite kulalichila mwamti mwangapita ndaŵi ŵandu ŵajinji ŵaŵele Aklistu. (Mase. 2:41; 4:4) Ŵandu paŵatandite kwalagasya, jemanjaji nganatenda woga. Mmalo mwakwe ŵamdalile Yehofa kuti ŵakamuchisye. Ŵapopesile kuti, “Atukunde uwe ŵatumichila ŵawo kuti tuŵechete maloŵe gawo mwakulimba mtima.” Kaneko jemanjaji ŵapochele msimu weswela ni “ŵatandite kuŵecheta maloŵe ga Mlungu mwakulimba mtima.”—Mase. 4:18-20, 29, 31.

⁶ Ŵakulijiganya ŵa Yesu ŵasimenesoni ni yakusawusya yine. Jemanjaji nganakola mipukutu jakwanila. Nambosoni nganakola mabuku gakwakamuchisya kupikanichisya Malemba, mpela gatukwete m’weji masiku agano. Ŵakulijiganya ŵa Yesuŵa ŵasosekwagasoni kwalalichila ŵandu ŵaŵaŵechetaga yiŵecheto yine. Atamose kuti ŵasimanaga ni yakusawusya yosopeyi, jemanjaji ŵalipeleche mnope pakukamula masengo gagawonekaga kuŵa gakusawusya. Pali pagambile kupita yaka yamnono, jemanjaji ŵalalichile ngani syambone “kwa ŵandu ŵapachilambo chosope.”—Akolo. 1:6, 23.

7. Ana Yehofa jwasagwile ŵakutumichila ŵakwe kuti atendeje chichi? Ana jemanjaji ŵatesile wuli paŵamanyilile yeleyi?

⁷ Masiku agano. Yehofa akupitilisyape kwalongolela soni kwapa machili ŵandu ŵakwe. Jwalakwe akutenda yeleyi pakamulichisya masengo Baibulo jajalembedwe mwakusalilidwa ni msimu weswela. M’Baibulomu ni mwatukusaŵalanga yaŵatesile Yesu pa utumiki wakwe soni lilamusi lyakuti ŵakulijiganya ŵakwe apitilisye kukamula masengo gaŵagatandite. (Mat. 28:19, 20) Sanja ja Mlonda ja Julayi 1881, jasasile kuti, “Yehofa nganatuŵilanga kapena kutusagula ni msimu wakwe ni chakulinga chakuti ŵandu atuchimbichisyeje soni kuti tupate yipanje. Nambo jwalakwe ŵatuŵilasile kuti tukamulichisye masengo chilichose chatukwete pakulalichila ngani syambone.” Kabuku kane (Whom the Work Is Entrusted) kakagaŵilidwe mu 1919 kasasile kuti, “Masengoga gali gekulungwa, nambo pakuŵa gali ga Ambuje, jwalakwe chatupe machili kuti tukombole kugakamula.” Mpela mwayaŵelele ni Aklistu ŵa m’yaka 100 yandanda, abaleŵa ŵakamwile masengo mwakulipeleka. Ŵakulupilile kuti msimu weswela chiwakamuchisye kwalalichila ŵandu ŵamitundu josope. M’wejisoni tukusakulupilila kuti msimu weswela ukutukamuchisya.

8-9. Ana gulu ja Yehofa jiŵele jili mkukamulichisya masengo matala gapi pakulalichila?

⁸ Gulu ja Yehofa jiŵele jili mkukamulichisya masengo yida yambone mnope pakulalichila ngani syambone. Yine mwa yidayi yili mpela mabuku, “Seŵelo Japakanema ja Yakupanganyikwa, magalamafoni,” magalimoto gakola yakwechesya maloŵe, wailesi jaguluchisya maloŵe, soni pamkawapa tutandite kukamulichisya masengo kompyuta soni intaneti. Gulu ja Yehofa jikulipelekasoni pakukamula masengo gakugopolela mabuku mu yiŵecheto yejinji pachilambo chosope. Jemanjaji akutenda yeleyi pakusaka kwakamuchisya ŵandu ŵajinji kupikana utenga wambone mu yiŵecheto yawo. Yeleyi yikulosya kuti  Yehofa jwangali lusagu. Paja jwalakwe jwasasile kuti ngani syambone sichilalichidwa “kwa ŵandu ŵa chilambo chapasi, kwa ŵandu ŵa mtundu uliwose, ŵa lukosyo lululose, ni ŵa chiŵecheto chilichose.” (Chiw. 14:6, 7) Jwalakwe akusasaka kuti jwalijose apikane ngani syambonesi.

⁹ Nambi wuli ya ŵandu ŵele tukusalepela kwalalichila ligongo lyakuti akusatama kunyumba syakola chiteteyo chamachili mnope? Pakusaka kwakamuchisya ŵandu ŵeleŵa, gulu ja Yehofa jalinganyisye matala gane gakulalichilila ku malo gakusimanikwa ŵandu ŵajinji. Mwachisyasyo, mu 2001, Likuga Lyakulongolela lyajitichisye kuti abale wa ku France atande kukamulichisya masengo mashelefu pakulalichila. Kaneko abale ŵa mmadela gane ŵatandite kukamulichisya masengo litalali. Abale ŵayiweni kuti litali lili lyakamuchisya mnope. Mu 2011 abale ŵa ku United States ŵatandite kukamulichisya masengo litalali mu msinda wa New York mwamukusasimanikwa ŵandu ŵajinji. M’chaka chandanda, abale ŵagaŵile mabuku gakwana 102,129 soni magasini 68,911. Soni ŵandu ŵakwana 4,701 ŵaŵendile kuti alijiganyeje Baibulo. Kusala yisyene Yehofa jwakamulichisye masengo msimu wakwe pakulongolela masengoga. Kaneko Likuga Lyakulongolela lyajitichisye kuti abale pachilambo chosope atande kukamulichisya masengo litalali.

10. Ana mpaka tutende uli kuti tulalichileje chenene?

¹⁰ Yakusosekwa kutenda. Akamulichisyeje masengo yindu yakusalijiganya ku misongano ja mpingo. Alalichileje yimpepe ni kagulu kawo kautumiki. Kutenda yeleyi mpaka kwakamuchisye kuti alalichileje chenene soni kuti abale ni alongo ŵane ŵalimbikasyeje. Apitilisyeje kulalichila atamose pakusimana ni yakusawusya. Mpela mwalikuŵechetela lilemba lyalikulongolela nganiji, tukusakombola kutenda yakusaka ya Mlungu ngaŵaga mwamachili getu nambo ligongo lya msimu weswela. (Sak. 4:6) Mpaka tuŵe ŵakusimichisya kuti Mlungu chachitupa msimu wakwe ligongo masengoga gali gakwe.

11. Ana likuga lyakulongolela lya mu yaka 100 yandanda lyatesile yamtuli kuti ŵandu ŵa Mlungu apitilisye kuŵa ŵakamulana?

¹¹ Mu yaka 100 yandanda. Likuga lyakulongolela ku Yelusalemu lyatendaga yindu mwakamulana pakusaka kwakamuchisya ŵandu ŵa Mlungu  kuti atendeje yindu mwadongosolo soni mwamtendele. (Mase. 2:42) Mwachisyasyo, pajagambile kutanda ngani ja kuwumbala mu 49 C.E., msimu wa Mlungu wakamuchisye abale ŵa m’likuga lyakulongolela kuti ajisamalile nganiji chenene. Yikaŵe kuti mpingo waliji wakugaŵikangana ligongo lya nganiji, nikuti masengo gakulalichila gakasokonechele. Atamose kuti abale ŵa m’likuga lyakulongolela ŵaliji Ayuda, nambo nganakunda kuti ndamo ja Chiyuda jasokonasyeje. Mmalo mwakwe, jemanjaji ŵakundile kuti Maloŵe ga Mlungu soni msimu wakwe ŵalongolele. (Mase. 15:1, 2, 5-20, 28) Pambesi pakwe, Yehofa ŵatendekasisye kuti yaŵasagwile jemanjaji yikole yakuyichisya yambone. Yeleyi yakamuchisye kuti mpingo uŵe wakamulana soni uŵe pamtendele mwamti masengo gakulalichila gatandite kwenda chenene.—Mase. 15:30, 31; 16:4, 5.

12. Ana chichi chachikusalosya kuti gulu ja Yehofa jikusatenda yindu mwamtendele soni mwadongosolo?

¹² Masiku agano. Gulu ja Yehofa jiŵele jili mkwakamuchisya ŵandu ŵakwe kuti atendeje yindu mwadongosolo soni mwamtendele. Mwachisyasyo, mu 1895, magasini jine (Zion’s Watch Tower and Herald of Christ’s Presence) ja Nofemba 15 jakwete ngani ja mtwe wakuti, “Kutenda Yindu Mwadongosolo.” Mtwewu watyochele pa 1 Akolinto 14:40. Nganiji jasasile kuti, “Ŵandumetume ŵakwete yindu yejinji yakuti awusalile mpingo wandanda pangani ja kutenda yindu mwadongosolo . . . Myoyo, yikusaŵa chenene kupikanila mwakusamala ‘yindu yayalembedwe kuti yitujiganye.’” (Alo. 15:4) Masiku aganosoni, gulu ja Yehofa jikusatenda yindu mwadongosolo soni mwamtendele mpela mwayaŵele ni Aklistu ŵandanda. Tuwanichisye kuti wawojo apite kukusongana ku mpingo wa mu dela jine kapena m’chilambo chine, ana mpaka alaje kumanyilila Sanja ja Mlonda jakulijiganya wiki jelejo? Iyayi. Kusala yisyene chachilipikana mpela ali kumangwawo. Yosopeyi yikusakomboleka ligongo lya msimu weswela.—Sef. 3:9.

13. Pakuganichisya yalikusasala lilemba lya Yakobo 3:17, ana mpaka tuliwusye yiwusyo yapi?

¹³ Yakusosekwa kutenda. Yehofa akusasaka kuti ŵandu ŵakwe ‘aŵeje ŵakulinjilila kusunga umpepe wa msimu weswela pakamulana mumtendele.’ (Aef. 4:1-3) Myoyo, akusosekwa kuliwusya kuti, ‘Ana une ngusalimbikasya mkamulano soni mtendele mumpingo? Ana  ngusinapikanilaga ŵandu ŵakwete maudindo mumpingo? Naga ngwete udindo mumpingo, ana ŵandu akusandalilaga? Ana ngasasunga ndaŵi soni ngusaŵa jwakusachilila kwatumichila ŵane?’ (Aŵalanje Yakobo 3:17.) Naga akuyiwona kuti akusosekwa kongolela, amŵende Yehofa kuti ŵakamuchisye. Pakukunda kuti msimu weswela walongoleleje paumi wawo, abale ni alongo chachitanda kwanonyela soni kwawona kuti ali mundu jwakusosekwa mnope.

14. Ana lilemba lya Akolose 1:9, 10, likulosya kuti Yehofa ŵajiganyaga chamtuli ŵandu ŵakwe?

¹⁴ Mu yaka 100 yandanda. Yehofa akusasangalala mnope pakwajiganya ŵandu ŵakwe. (Sal. 32:8) Jwalakwe akusasaka kuti tummanyilileje, tumnonyeleje soni kuti tutame ni umi mpaka kalakala ligongo tuli ŵanache ŵakwe ŵapamtima. Yosopeyi yikusakomboleka ligongo lyakuti jwalakwe akusatujiganya. (Yoh. 17:3) Yehofa ŵakamulichisye masengo mpingo wa mu yaka 100 yandanda kuti ŵajiganyeje ŵandu ŵakwe. (Aŵalanje Akolose 1:9, 10.) Msimu weswela, wele Yesu ŵasalile kuti chachatumichisya ni wawakamuchisye mnope jemanjaji. (Yoh. 14:16) Msimuwu, wakamuchisye ŵakulijiganya ŵa Yesu kugapikanichisya Maloŵe ga Mlungu, soni wakumbwisye yindu yaŵatesile Yesu mwamti ŵayilembile m’mabuku ga Ngani Syambone. Yeleyi yakamuchisye Aklistuŵa kulimbisya chikulupi chawo. Yakamuchisyesoni kumnonyela Yehofa, Yesu nambosoni ŵandu ŵane.

15. Ana yindu yapi yayakamuchisye wawojo kukuwona kukwanilichikwa kwa lilemba lya Yesaya 2:2, 3?

¹⁵ Masiku agano. Yehofa jwasasile kuti “m’masiku” gambesi ŵandu wosope chachigungumuchila ku litumbi lyakwe, ni chakulinga chakuti akajiganyidwe ni jwalakwejo. (Aŵalanje Yesaya 2:2, 3.) Masiku agano tukukuwona kukwanilichikwa kwa yaŵasasile Yehofayi. Yili yakuwonechela chenene kuti Yehofa akukwesisye kulambila kusyesyene masiku agano. Kusala yisyene, Yehofa akutupa chakulya chausimu chejinji. (Yes. 25:6) Yehofa akukamulichisya masengo kapolo  “jwakulupichika ni jwalunda” pakutupa chakulya chausimuchi. Kapoloju akusatenda yeleyi pakamulichisya masengo matala gejinji. Mwachisyasyo, akusatupa ngani syakuŵalanga, syagamba kupikanila soni mafidiyo. (Mat. 24:45) Yeleyi yikusatutendekasya kuti tuŵechete mpela mwaŵaŵechetele Elihu jwaŵatite, “Ana mwalimu jwakwe nduni jwampaka alandane ni [Mlungu]?”—Yob. 36:22.

16. Ana mpaka atende uli kuti apinduleje ni yindu yakusapeleka Yehofa?

¹⁶ Yakusosekwa kutenda. Msimu weswela mpaka wakamuchisye kuti akamulichisyeje masengo yindu yalijiganyisye m’Maloŵe ga Mlungu. Kuti yeleyi yikomboleche akusosekwa apopeleje kwa Yehofa mpela mwajwaŵechetele jwamasalimo kuti, “Anjiganye une matala gawo, yakusaka ŵalakwe kuti une niyitendeje; nipo tinjapikanila mwakulupichika.” (Sal. 86:11) Myoyo alijiganyeje yindu yakusapeleka Yehofa kupitila m’Maloŵe gakwe soni m’gulu jakwe. Nambope chakulinga chawo chikaŵaga gamba kusaka kumanyilila yindu. Akusosekwa kukulupilila kuti yakulijiganyayo yili yisyesyene soni ayikamulichisyeje masengo paumi wawo. Yehofa mpaka ŵakamuchisye kuti atende yeleyi. Akusosekwasoni ŵalimbikasyeje abale ni alongo. (Aheb. 10:24, 25) Akusosekwa kutenda yeleyi, ligongo jemanjaji ali ŵachinasi ŵawo. Amŵendejesoni Yehofa kuti ŵakamuchisyeje kupeleka ndemanga syakamula mtima soni kuti akambeje chenene ngani kumpingo. Pakutenda yeleyi chachilosya kuti akusasinonyela “ngondolo” sya Yehofa soni Yesu.—Yoh. 21:15-17.

17. Ana mpaka alosye chamtuli kuti ali ku mbali ja ŵandu ŵa Yehofa?

¹⁷ Pachangakaŵapa, gulu jimpepe jajichisigala pachilambo jili jele Yehofa akujilongolela ni msimu wakwe. Myoyo, akusosekwa akamuleje masengo mwakulipeleka mu gulu ja Yehofaji. Aŵeje ŵangali lusagu mpela mwakusatendela Yehofa. Mpaka atende yeleyi mwakumlalichila mundu jwalijose jwasimene najo. Amsyasyejesoni Yehofa mwakutenda yindu mwadongosolo soni mwamtendele ni chakulinga chakuti ŵandu mumpingo aŵe ŵakamulana. Yehofa ali Jwakwiganya Jwamkulungwa. Myoyo akamulichisyeje masengo chenene yindu yosope yakusatupa. Yeleyi yichakamuchisya kuti akasakola woga pandaŵi jele Yehofa chachijonangaga chilambo cha Satanachi. Chachiŵasoni ŵakusimichisya kuti ali kumbali ja ŵandu ŵakusamtumichila Yehofa mwakulupichika m’guluji.