1. Mang e thingari ulul e pi Kristiano ni kar uned ko taufe ni ngar rin’ed?

KAM un ko taufe fa dawor? Faanra kam un, ma kam dag u fithik’ e girdi’ ni yoor nib mich Jehovah u wan’um mab m’agan’um ngay ni ngam pigpiggad e ulung rok u taabang. * Riyul’ nthingari ulul ni nge gel e michan’ rom ngak Jehovah. Kub t’uf ni ngari pagan’um ni be fanay Jehovah e ulung rok e ngiyal’ ney ni nge lebguy e n’en nib m’agan’ ngay.

2-3. Mang boch e kanawo’ ni ma pow’iy Jehovah e ulung rok riy e ngiyal’ ney? Mu weliy boch e kanawo’ ni ma rin’ riy.

² Ngiyal’ ney e be pow’iy Jehovah e ulung rok u reb e kanawo’ ni be m’ug riy rarogon, nge n’en nib m’agan’ ngay, nge rogon e motochiyel rok u murung’agen e ngongol nib m’agan’ ngay ni ngan rin’. Chiney e ngad weliyed dalip i fel’ngin Jehovah ni ma m’ug u daken e ulung rok.

³ Bin som’on e, “gubin e girdi’ ma taareb rogorad u wan’ Got.” (Acts 10:34) T’ufeg e aram e n’en ni k’aring Jehovah ni nge pi’ Fak ni nge “biyuliy urngin e girdi’.” (1 Tim. 2:6; John 3:16) Ma fanay Jehovah e girdi’ rok ni ngar machibnaged fare thin nib fel’ ngak e piin yad ra motoyil. Aram rogon ni be ayuweg urngin e girdi’ ni yad baadag ni nge yib angin fare biyul ngorad. Bin migid e, Jehovah e ir reb e Got ni baadag ni ngaun rin’ ban’en nib yaram mab gapas. (1 Kor. 14:33, 40) Aram fan ni pi tapigpig rok e susun e ngar pigpiggad ngak ni yad reb e ulung ni yad ba yaram ma yad ba gapas. Bin dalip e, Jehovah e ir e “Bin Th’abi Ga’ e Sensey” rodad. (Isa. 30:20, 21, NW) Aram fan nib gel e maruwel ni be tay e ulung rok ni ngar filed e Thin rok ko girdi’ u nap’an e muulung nge machib. Uw rogon ni i dag e pi walag u lan e ulung ni Kristiano ko bin som’on e chibog e re dalip i fel’ngin ney ni ma dag Jehovah? Uw rogon ni be dag e girdi’ rok Jehovah e pi fel’ngin ney e ngiyal’ ney? Ma uw rogon nrayog ni nge ayuwegem gelngin Got nib thothup u nap’an ni gimed be pigpig e ulung rok Jehovah u taabang e ngiyal’ ney?

4. Mang e tay Jesus chilen ngak pi gachalpen ni ngar rin’ed nrogon ni bay ko Acts 1:8, ma mang e ra ayuwegrad?

⁴ Nap’an e bin som’on e chibog. N’en ni i machibnag Jesus e pi’ e athap ngak urngin e girdi’. (Luke 4:43) I tay chilen ngak pi gachalpen ni ngar ululgad i rin’ fare maruwel ni tababnag ni aram e ngar machibgad “nge yan i mada’ ko yungi n’en ni yan i mus e fayleng ngay.” (Mu beeg e Acts 1:8.) Riyul’ ndabiyog ni ngar rin’ed e re maruwel ney u gelngirad. Ba t’uf gelngin Got nib thothup ni nge ayuwegrad ni aram fare ta ‘ayuw’ ni micheg Jesus nra pi’.​—John 14:26; Zek. 4:6.

5-6. Mang boch e kanawo’ ni i ayuweg gelngin Got nib thothup pi gachalpen Jesus riy?

⁵ I yib gelngin Got nib thothup nga daken pi gachalpen Jesus ko Pentekost ko duw ni 33 C.E. Bochan e ayuw ni pi’ e re gelngin nem ngorad, ma aram me yag ni ngar tababgad ko machib ni ka chingiyal’ nem, ma de n’uw nap’an nga tomuren ma aram me m’agan’ bokum biyu’ e girdi’ ko fare thin nib fel’. (Acts 2:41; 4:4) Nap’an ni yib e togopuluw ngak pi gachalpen Jesus, ma dar paged e re n’ey ni nge k’aring e marus ngorad ya ra sapgad ngak Got ni nge ayuwegrad. Ra meybilgad ni lungurad: “Ma ga ayuwegmad e pi tapigpig rom nggu weliyed e thin rom ndab kug rusgad.” Ere yib gelngin Got nib thothup nga dakenrad, ma aram “mi yad tabab i weliy e thin rok Got ngak e girdi’ ndaki yib e marus ngorad.”​—Acts 4:18-20, 29, 31.

⁶ Ku bay boch e magawon ni i mada’nag pi gachalpen Jesus. Bod ni ngiyal’ nem e ri in yang e Babyor nib Thothup ni immoy. Ku da immoy yu ken e babyor ni be weliy e thin nu Bible ni bod rogon e chiney. Ku thingari machibnag pi gachalpen Jesus e girdi’ nib thilthil e thin rorad. Machane yugu aram rogon, ma pi gachalpen Jesus nem e yad ba pasig. Ere rrin’ed ban’en ni gowa dabiyog ni ngan rin’. U lan sogonap’an 30 e duw ma ke yag ni ngar machibnaged fare thin nib fel’ u “gubin e nam u fayleng.”​—Kol. 1:6, 23, NW.

7. Ba pag 100 e duw ni ke yan, ma uw rogon ni nang e pi tapigpig rok Jehovah e n’en nib m’agan’ ngay ni ngar rin’ed, ma mang e rrin’ed?

⁷ Ngiyal’ ney. Ka be ulul Jehovah ni nge pow’iy e girdi’ rok ma be pi’ gelngirad. Machane, ba ga’ ni ma pow’iy e girdi’ rok u daken e Bible ni gelngin nib thothup e ayuweg boch e girdi’ ni ngar yoloyed e thin riy. Aram e gin nrayog ni ngad beeged riy murung’agen e machib ni i tay Jesus nge fare thin ni tay chilen ngak pi gachalpen ni aram e ngar ululgad i rin’ fare maruwel ni tababnag. (Matt. 28:19, 20) Ka nap’an e July ko duw ni 1881, min yoloy nga lan e re ke babyor ney e pi thin ni baaray ni be gaar: “Gathi kan mel’egdad ni bochan e nge yag ni yog e girdi’ e sorok ngodad ara ngad flaabgad ko tin gad be rin’, ya kan mel’egdad ni fan e ngad fanayed urngin e tin bay rodad ni ngad machibnaged fare thin nib fel’.” Bay ba ke babyor nni ngongliy ko duw ni 1919 ni thin ni Meriken ni kenggin e To Whom the Work Is Entrusted ni be gaar: “Boor e maruwel ni bay ni ngan rin’, machane maruwel rok Somol, ere ra pi’ gelngidad ni ngad rin’ed.” Arrogon, i par e pi walag ney ndar rusgad mab gel e maruwel nra ted ni bochan e ba pagan’rad nra ayuwegrad gelngin Got nib thothup ni ngar machibnaged urngin mit e girdi’ ni bod rogon ni rin’ e pi Kristiano ko bin som’on e chibog. Ku arrogodad e chiney nib pagan’dad nra ayuwegdad gelngin Got nib thothup.

8-9. Mang boch ban’en ni be fanay e ulung rok Jehovah ya nge yag ni garer fare thin nib fel’?

⁸ Ke fanay e ulung rok Jehovah e tin th’abi fel’ ban’en ni bay ya nge yag nra wereged fare thin nib fel’. Pi n’ey e ba muun ngay yu ken e babyor ni kan ngongliy, nge fare “Photo-Drama of Creation,” nge ba mit e masin ni ka nog e phonograph ngay, nge karrow ni bay e speaker u daken e chig riy, nge radio, ma chiney e yad be fanay e computer nge Internet. Ku be pilyeg e ulung rok Got e pi babyor nga boor mit e thin ni aram reb e maruwel ndariy ba ngiyal’ ni kan rin’ ni bod rogon ni yibe rin’ e chiney! Mang fan? Bochan e nge yag ni rung’ag urngin mit e girdi’ fare thin nib fel’ ko thin rorad. Jehovah e de laniyan’. Ke yiiynag ni yira machibnag fare thin nib fel’ ngak “urngin e pi nam, nge ganong nge thin nge gubin mit e girdi’.” (Rev. 14:6, 7) Baadag ni nge rung’ag urngin e girdi’ fare thin nib fel’ ni murung’agen Gil’ilungun.

⁹ Ere uw rogon e tin baaray e girdi’ nib mo’maw’ ni ngan machibnagrad ni bochan e sana yad ma par u boch e naun ndabiyog ni ngan yan ngay ni bochan  e bay e matanag riy ara bay e garog riy ni yima loknag? Ke ayuweg Jehovah e ulung rok ni ngar tababgad ni ngaur machibgad u boch e kanawo’ nib thilthil ko yungi n’en ni ma muulung e girdi’ ni yoor ngay ni bochan e nge yag ni taw e machib ko pi girdi’ ney. Bod nnap’an e duw ni 2001, ma aram me m’agan’ fare Ulung ni Ma Pow’iyey ngay ni ngan fanay e cart nge boch ban’en ni ngaun tay e babyor ngay nrayog ni ngan wereg ko girdi’ u France, me munmun mu kun rin’ e re n’ey u yugu boch e nam. Rib ga’ angin e re maruwel ney nni tababnag. Ya nap’an e duw ni 2011, ma aram min tababnag reb e program u Meriken u bangi ban’en ni bay u New York City nri boor e girdi’ ni ma yib ngay. U lan e re duw nem, ma 102,129 ken e babyor ma 68,911 e magazine nni wereg ko girdi’. Ma 4,701 e girdi’ nrogned ni yad baadag ni ngan fil e Bible ngorad! Ere ba tamilang ni gelngin Got nib thothup e aram e n’en ni pi’ gelngin e re maruwel ney nge yag ni ngan rin’. Bochan e re n’ey, ma aram me m’agan’ fare Ulung ni Ma Pow’iyey ngay ni ngaun tay e cart nge boch ban’en ni bay e babyor riy ko yungi n’en ni ma muulung e girdi’ ni yoor ngay u ga’ngin yang e fayleng.

10. Mang e rayog ni ngad rin’ed ya nge yag nda mon’oggad ko machib ni gad ma tay?

¹⁰ N’en nrayog ni ngam rin’. Mu fanay e pi n’en be fil Jehovah ngodad u nap’an e pi muulung ni gad ma tay. Um machibgad e pi walag ko re ulung ni kan tem ngay ni ngaum machibgad u taabang ni gubin ngiyal’. Pi walag ko re ulung ni ga ma un riy ko machib e rayog ni ngar ayuweged gur ni ngam salap ko machib nge rogon ni ga ma fil ban’en ko girdi’, maku rayog ni ngar pied e athamgil nga lanin’um u daken e pi n’en nib fel’ ni yad ma rin’. Mu ulul ko machib ni yugu aram rogon ni ga be mada’nag boch e magawon. Be puguran fare kenggin e thin nu Bible ko re article ney ngodad ni gathi be yag ni ngad rin’ed e tin nib m’agan’ Got ngay ni bochan e ba gel gelngidad, ya gelngin Got nib thothup e ir e be pi’ gelngidad be yag ni ngad rin’ed e pi n’ey. (Zek. 4:6) Bin riyul’ riy e, maruwel rok Got e gad be rin’.

11. Uw rogon ni maruwel fare ulung ni ma pow’iyey ko bin som’on e chibog u taabang nib taareban’rad ya nge yag ni par e girdi’ rok Got ni yad ba yaram?

¹¹ Nap’an e bin som’on e chibog. Fare ulung ni ma pow’iyey ni ur moyed u Jerusalem e ra maruwelgad u taabang nib taareban’rad ni ngar ayuweged e girdi’ rok Got ni ngar pared ni yad ba yaram ma yad ba gapas. (Acts 2:42) Bod nnap’an ni sum fare magawon u murung’agen ni ngan maad’adnagey u ba ngiyal’  ko duw ni 49 C.E., ma aram me pow’iy gelngin Got nib thothup fare ulung ni ma pow’iyey ni ngar weliyed e n’en ngan rin’ ko re magawon nem. Faan gomanga de taareban’ e ulung u rogon ni ngan pithig e re magawon nem, ma dabiyog ni ngar rin’ed fare maruwel ni machib nib fel’ rogon. Yugu aram rogon ni pi apostal nge piin piilal e ngiyal’ nem e yad boch e Jew, machane dar paged e yalen rok e pi Jew ara piin yad baadag ni ngan fol ko pi yalen nem ni nge gagiyegnag rogon e n’en ni ngar dugliyed. Ya ra paged e Thin rok Got nge gelngin nib thothup ni nge pow’iyrad. (Acts 15:1, 2, 5-20, 28) Ere mang angin ni yib riy? I tow’athnag Jehovah e n’en nra dugliyed, me par e ulung ni bay e gapas riy mab taareb, miki ulul fare maruwel ni machib.​—Acts 15:30, 31; 16:4, 5.

12. Mang e be dag nib yaram mab gapas e ulung rok Jehovah e ngiyal’ ney?

¹² Ngiyal’ ney. Kab kafram i yib ni ma ayuweg e ulung rok Jehovah e girdi’ rok ni ngar pared ni yad ba yaram ma yad ba gapas. Ka nap’an e duw ni 1895, min ngongliy ba article ngan tay nga lan fare ke babyor ni Zion’s Watch Tower and Herald of Christ’s Presence ko November 15 ni thin ni Meriken ni kenggin e “Ba Fel’ Rogon Mab Yaram,” nib puluw ko fare thin ko 1 Korinth 14:40. Be gaar e re article nem: “Boor ban’en ni yoloy e pi apostal ngar pied ngak e ulung ko bin som’on e chibog ni be weliy murung’agen rogon ni ngaun rin’ ban’en nib yaram . . . Ere ba ga’ fan ni ngad ululgad ngad folgad u ‘urngin ban’en nni yoloy nga lan e babyor nib thothup . . . ni nge fonownagdad.’” (Rom. 15:4) Ku arrogon e ulung rok Jehovah e ngiyal’ ney ni be maruwel nib gel ni nge ayuweg e ulung ni Kristiano ni nga i par nib yaram mab gapas ni bod rogon ko bin som’on e chibog. Baaray rogon nrayog ni ngan susunnag e re n’ey: Faanra kam un ko Fol Wulyang ko Damit u yugu reb e ulung ni bay ko nam rom ara yugu reb e nam, ma ga manang rogon ni yira tay e re muulung ney ma ka ga manang e re article ni yira fil. Ba papey nra puf rogom ni ngam un ko tin yibe rin’! Kemus ni yigoo gelngin Got nib thothup e rayog ni nge yibnag e biney e taareban’ nga thilin e girdi’ rok Got.​—Zef. 3:9.

13. Mang boch e deer nsusun e ngad fithed gadad riy nrogon nib puluw ko James 3:17?

¹³ N’en nrayog ni ngam rin’. Baadag Jehovah ni nge par e girdi’ rok ni kar taab girdi’gad ni gelngin Got nib thothup e ‘ke pi’ ngorad u daken fare gapas ni ir e ke m’agrad nga taabang.’ (Efe. 4:1-3) Ere mu fithem ni nge lungum: ‘Gu ma guy rogon ni nge par e ulung ni bay e gapas nge taareban’ riy, fa? Gu ma fol rok e piin yad be yog e thin u lan e ulung, fa?  Rayog ni nge taga’ yugu boch e girdi’ ngog, nib ga’ ni faanra gag be’ ni bay boch e maruwel ni kan pag fan ngog u lan e ulung, fa? Gag be’ nda gur ma sagaal, ma gu ma pi’ e ayuw, ma kub m’agan’ug ngay ni nggu rin’ boch ban’en ni fan ngak yugu boch e girdi’, fa?’ (Mu beeg e James 3:17. *) Faanra ga be guy ni ka bay boch ban’en nib t’uf ni ngam mon’og riy, mag yibilay gelngin Got nib thothup ni nge ayuwegem. Faanra um pag gelngin Got nib thothup ni nge gagiyegnag rarogom nge rogon e ngongol rom, ma aram e ra gel fanam t’uf rok e pi walag u lan e ulung miki ga’ fam u wan’rad.

14. Uw rogon ni skulnag Jehovah e girdi’ rok u nap’an e bin som’on e chibog nrogon ni bay ko Kolose 1:9, 10?

¹⁴ Nap’an e bin som’on e chibog. Ri baadag Jehovah ni ma skulnag e girdi’ rok. (Ps. 32:8) Baadag ni ngar nanged nib fel’ rogon, me t’uf rorad, mar pared ni yad boch i fak ni yad ba t’uf rok ndariy n’umngin nap’an. Dariy reb e pi n’ey nrayog ni nge buch ni faanra der skulnagdad Jehovah. (John 17:3) I fanay e ulung ko bin som’on e chibog ni nge skulnag e girdi’ rok. (Mu beeg e Kolose 1:9, 10.) Gelngin Got nib thothup ni aram fare ta ‘ayuw’ ni micheg Jesus nra pi’ e ri kub ga’ e ayuw ni pi’ ngak pi gachalpen Jesus e ngiyal’ nem. (John 14:16) I ayuwegrad ni ngari tamilangan’rad ko Thin rok Got, miki yib ngan’rad urngin ban’en ni yog Jesus nge tin ni i rin’ ni ir e ni yoloy nga lan fapi Gospel boch nga tomuren. Re tamilangan’ ney e gelnag e michan’ ko pi Kristiano ko bin som’on e chibog miki gelnag e t’ufeg rorad ngak Got, nge Fak, nge t’ufeg rok bagayad ngak bagayad.

15. Mang boch e kanawo’ ni kam guy rogon ni ke lebguy Jehovah fare thin riy ni ke micheg ni bay ko Isaiah 2:2, 3?

¹⁵ Ngiyal’ ney. Ke yiiynag Jehovah nnap’an nra taw ko “tin ni bay yib e rran nga m’on [“tin tomuren e rran,” NW], ma girdi’ u gubin e nam e yad ra mokun ko burey rok ni be yip’ fan ni ngar chaggad ko tin riyul’ e tapigpig rok, me fil ngorad e n’en ni baadag  ni ngar rin’ed. (Mu beeg e Isaiah 2:2, 3.) Gad be guy e re yiiy ney ni be lebug e chiney. Rayog ni ngad guyed ni kab fel’ e bin riyul’ e liyor ko liyor ni googsur. Ku boor ban’en ni be fil Jehovah ko girdi’ rok u murung’agen e Bible! (Isa. 25:6) Be fanay “fare tapigpig nib yul’yul’ ma ba gonop” ni nge pi’ urngin e pi n’ey ngodad u boor e kanawo’, ni bod rogon e pi article ni gad ma beeg, nge pi welthin ni gad ma motoyil ngay, nge pi video ni kan fal’eg ni fen e piin bitir, nge yugu boch e video. (Matt. 24:45) Taareb rogon e lem rodad Elihu ni fager rok Job ni faani gaar: “[Got e] ir e re sensey nth’abi ga’.”​—Job 36:22, BT.

16. Mang e rayog ni ngam rin’ ya nge yag ni yib angin ngom e pi n’en ma fil Jehovah ngodad?

¹⁶ N’en nrayog ni ngam rin’. Rayog ni nge ayuwegem gelngin Got nib thothup ni ngam fol ko n’en ni ga be beeg ma ga be fil u lan e Thin rok Got. Mmeybil ni bod rogon fare psalmist ni faani gaar: “Somol, mu fil ngog ko mang e ga baadag ni nggu rin’, ma bay ug fol rom u fithik’ e yul’yul’; mu fil ngog rogon ni nggu pigpig ngom u polo’ i lanin’ug.” (Ps. 86:11, BT) Ere mu ulul ni ngam beeg ma ga be fil e Bible nge yu ken e babyor ni be ngongliy e ulung rok Jehovah. Machane, gathi n’en ni ga be nameg e kemus ni nge yoor ban’en ni ngam nang. Ya ga baadag ni ngari mich e tin riyul’ u wan’um mag fol riy. Rayog ni nge ayuwegem gelngin Jehovah nib thothup ni ngam rin’ e re n’ey. Maku reb e, ga baadag ni ngam pi’ e athamgil nga laniyan’ pi walagem. (Heb. 10:24, 25) Mang fan? Ya gimed girdien taab tabinaw. Ere mu yibilay gelngin Got nib thothup ni nge ayuwegem ni ngaum pi’ e fulweg u nap’an e muulung nrogon ni keb u gum’irchaem, miki ayuwegem ni ngam pi’ e welthin rom u rogon feni fel’ rogon nrayog rom. Faan ga ra rin’ ni aray rogon, ma aram e ga be dag ngak Jehovah nge Fak nib t’uf rom e pi “saf” rorow.​—John 21:15-17.

17. Mang boch e kanawo’ nrayog ni ngam dag riy ni gab yul’yul’ nga rogon ni ga be ayuweg e ulung rok Jehovah?

¹⁷ Dabki n’uw nap’an ma taare ulung nra magey u fayleng e aram fare ulung ni be pow’iy gelngin Got nib thothup. Ere mu pasignagem ngaum maruwelgad e ulung rok Jehovah u taabang. Mu dag rarogon Got ni taareb rogon urngin e girdi’ u wan’ ni aram e ngam machibnag fare thin nib fel’ ngak urngin e girdi’ ni kam mada’nag. Mu folwok rok u rogon ni baadag ni ngaun rin’ ban’en nib yaram mab gapas ya nge yag nim mon’ognag e taareban’ u lan e ulung. Mag motoyil ko Bin Th’abi Ga’ e Sensey ni be skulnagem ni aram e ngam fil urngin ban’en ni be fil ko girdi’ rok. Faan ga ra rin’ ni aray rogon, ma aram e nap’an ni yira thang e re fayleng rok Satan ney, ma dab mu rus. Ya bin riyul’ riy e, ga ra gelnigem ngam par ndab mu rus ni gimed e piin yad be pigpig u lan e ulung rok Jehovah ni yad ba yul’yul’.