1. Pakaynien i kahacecay tamdaw sangaˈayay a mipiliˈan o maanan hani?

O mipiliˈan no wama wina taˈangayay ko pifiyor to wawa. Ano caka inaneng ko saˈosi no wama wina, wa paira to pasangaray no wawa. Safeliten ko sowal, ano inaneng ko saˈosi nangra, wa padama to wawa lipahak ko kaˈorip. Kawra, a inaneng ko saˈosi no wawa ngaˈ ngaˈay. Pakaynien i kahacecay tamdaw, sangaˈayay a saˈosi i, midoko to sidaˈitay a Wama i kakarayan ci Yihofaan.—ˈOlic 73:28.

2. Ci Yis ato wama wina ningra inanengay misaˈosi to manan hani?

² O wama wina ni Yis mitokelay padama to wawa malo midokoay ci Yihofaan a tamdaw. Ora saˈosi nangra paihkalay, o sakakaay kalimlaan ko pidoko ci Yihofaan i kaˈorip nangra. (Luka 2:40, 41, 52) Ano ci Yisto inanengay ko misaˈosiyan, mansa ngaˈay mitoor to araaw ni Yihofa a maˈorip. (Matay 4:1-10) Lomahadto ci Yis malo sidaˈitay, madimadiay ato timoloay a tamdaw. O maolahay ci Yihofaan a wama wina maˈaraw ko wawa malecad ci Yisan, o mamaliko a lipahak.

3. Oniya lalakaw wa pacaˈof to maanan a salicay hani?

³ Oniya lalakaw wa pacaˈof to laenoay a salicay: Padamaay ci Yihofa ci Yisan inanengay misaˈosi to manan hani? O Krisciyang a wama wina ngaˈay mikitini pisaˈosi ni Yosif aci Mariya minanam to manan hani? O kapah a Krisciyang wa ngaˈay mikitini pisaˈosi ni Yis a minanam to manan hani?

4. Patadoan ni Yihofa ko Wawa Ningra midemak to maanan kalimlaan a saˈosi?

⁴ Patadoan ni Yihofa ci Yis mipiliˈ to sangaˈayay a wama wina.  (Matay 1:18-23; Luka 1:26-38) Mikifalocoˈay a sowal ni Mariya mahapinangay ita, tada maolahay cingra ci Yihofaan ato sowal Ningra. (Luka 1:46-55) Makahiyay ci Yosif midofdof to sakayat ni Yihofa, mitadtaday konini tada mikangodoay cingra to Kawas, makalim pakahemek to Kawas.—Matay 1:24.

5-6. Mihaiyay ci Yihofa misiˈayaw ci Yis to maanan pasangaray hani?

⁵ Cowa patadoen ni Yihofa ci Yis mipiliˈ to cihafayay a wama wina. Ikor no hofocen ci Yis o sapatafang ni Yosif aci Mariya wa mahapinang ita, awaay ko payci nangra. (Luka 2:24) Itiniay Nacali ko kitiraan ni Yosif, itiniay tihi no lomaˈ a misasayho cingra alatek. Papitoay ko wawa ningra aci Mariya, madeng kantangay ko kaˈorip nangra.—Matay 13:55, 56.

⁶ Soˈlin tahalifa ci Yis to katalawan i, midipotan ni Yihofa cingra, kawra mihaiyan ni Yihofa misiˈayaw ci Yis to pasangaray ato sapalifet. (Matay 2:13-15) Tinakoen, paro no lomaˈ ni Yis salakat cowa pakasoˈlin to ci Misiya cingra, madeng masomaday ci Yis. (Marko 3:21; Yohani 7:5) Roma i, madeng kaemangho ci Yis mapatayayto ci Yosif, tada masomaday ci Yis tonini. Malo fisac ci Yis, micadaay to tayal no wama. (Marko 6:3) Lomahadto cingra, mitamorongay to ˈinorong no paro no lomaˈ. Marorayay ci Yis matayal paliliˈ to paro no lomaˈ, mafanaˈay cingra misaromiˈad a mawmah hakowaay ko kalotay.

7. (1) Itini pipalahad to wawa, o mararamoday ngaˈay licayen ko niyah to maanan a salicay hani? (2) Mikitini Taneng 2:1-6, o wama wina wa ngaˈay padama to wawa misamaan ko demak hani?

⁷ Ano ciraramoday to kiso, ciharateng saka ci wawaaw, ngaˈayay licayen namo ko niyah: ‘O misapoeneray a tamdaw kami han? Soˈlinay kami maolah ci Yihofaan ato sowal Ningra han? Wa rihaday ci Yihofa patorod tamiyanan midimokos to faelohay ˈorip han?’ (ˈOlic 127:3, 4) Ano iraayto ko wawa iso, ngaˈayay licayen ko niyah: ‘Pasifanaˈan ako ko wawa malalok a matayal han?’ (Patnakay 3:12, 13) ‘Itini hekal ni Satan, madokaˈay ko tireng no wawa alatek, o harateng nangra mafiyoray alatek, misarocoday kako a midipot cangranan han?’ (Taneng 22:3) Manaokaniw, midipot to wawa hoeca ka madokaˈ cowa ko madoloay. Kawra, ngaˈayay hadidien iso a pasifanaˈ cangra, padama cangranan minanam ano tahasiˈayaw to masakenaay a pasangaray  i, mikilim to sakayat no Fangcalay Cudad. (ˈOsien ko Taneng 2:1-6.) Tinakoen, ano cato pidoko ko salawina ci Yihofaan, ngaˈayay saka dademaken iso ko Fangcalay Cudad padama to wawa mihapinang, padotoc a madimadi ci Yihofaan o kalimlaan. (ˈOlic 31:23) Ano ira ko mapatayay tamdaw i lomaˈ, ngaˈayay paˈarawen iso ko wawa to mamihinom cingranan, padama to sakarihaday no falocoˈ ningra a sinael.—2 Korinto 1:3, 4; 2 Timoti 3:16.

8. Mikitini Limoˈot 6:6, 7, ci Yosif aci Mariya wa samaan ko demak hani?

⁸ Mitooran ni Yosif aci Mariya ko sakayat ni Yihofa to wama wina a midemak, palahad ci Yisan malo maolahay to Kawas a tamdaw. (ˈOsien ko Limoˈot 6:6, 7) Tangongolay ko olah nangra ci Yihofaan, padamaayho to wawa malo sakakaay a patosokan ko kaolah ci Yihofaan.

9. Ci Yosif aci Mariya mipiliˈay to maanan kalimlaan a demak?

⁹ Marariday ci Yosif aci mariya miˈorong to wawa mirienang to midokoay ci Yihofaan a tayal. To lipalipay tayraay cangra i kasaˈopoan no Nacali mirienang to saˈopo, to mihecahecaan tayraay i Yirusalim misalisin to Pitaˈlifan a Lisin. (Luka 2:41; 4:16) Itini lalan no sakatayra i Yirusalim, mametan nangra ko toki padama to wawa minanam to likisi no finawlan no Kawas, i fatad tayraay i masowalay no Fangcalay Cudad a pala minengneng. Ikor, matongalay ko adihay no wawa ni Yosif aci Mariya, sapadotocaw toniya ngaˈayay nanaman cowa ko madoloay, kawra tada ciepocay ko pihaen nangra to demak. Mipiliˈan nangra paitinien i salakatay no kaˈorip ko midokoay to Kawas a demak, mansa paro no lomaˈ ngaˈayay ko kalalaˈed a miingid ci Yihofaan.

10. Mikitini taˈarawan ni Yosif aci Mariya ngaˈay mananam no malo wama winaay a Krisciyang ko maanan hani?

¹⁰ Mikitini ci Yosifan aci Mariyaan ngaˈay mananam no malo wama winaay a Krisciyang ko maanan hani? Sakakaay i, pakaynien i waywayan sasowalen pahapinang to wawa, soˈlinay maolah kiso ci Yihofaan. O sangaˈayay sapatelong iso to wawa i, padama cangranan minanam a maolah ci Yihofaan. Iraayho ko  cecay kalimlaan, papadamaen no wama wina ko wawa palahad to ngaˈayay nanaman, micerid micekiw, mitolon, ato mirienang to saˈopo ato mitosilay tayal. (1 Timoti 6:6) Manaokaniw, o mamidimokos kiso to sakaˈorip no wawa. (1 Timoti 5:8) Haharatengen, ano malaˈafo koniya hekal i, o sakalidong no wawa ato micomod i faelohay hekal, cowa ko hafay, ao ngaˈayay kalawidang to Kawas. *—Icikil 7:19; 1 Timoti 4:8.

11. (1) Itini pipalahad to wawa, saka 1 Timoti 6:17-19 palimoˈotay to wama wina inaneng mipiliˈ to maanan hani? (2) O paro no lomaˈ no miso ngaˈay patireng to maanan patosokan hani? Mihaen ko demak wa ira ko maanan a sapalemed? (Nengnengen ko sapatongal a lalakaw “ O paro no lomaˈ no miso ngaˈay patireng to maanan patosokan hani?”)

¹¹ ˈAlomanay Krisciyang a wama wina inanengay ko mipiliˈan, padama to wawa miingid ci Yihofaan, maˈaraw ita mihaen ko demak nangra, tada mapakalalokay. Miceriday cangra malacafay ko paro no lomaˈ mirienang to midokoay to Kawas a demak, malacafay mirienang to saˈopo, taykay ato mitosilay tayal. Roma paro no lomaˈ tayraay i cowa kararid lisoˈen a kilac milasil to ngaˈayay lihaf, o roma tayraay Pitil minengneng, anca mirienang to patirengay a tayal no likakawa. Mirienang to hatiniay tayal wa adihay ko mapalakay a payci, pakaynien i roma paro no lomaˈ, mihaen to demak cowa ko madoloay, kawra taˈangayay ko sapalemed ni Yihofa cangranan. (ˈOsien ko 1 Timoti 6:17-19.) Itini mahaenay a paro no lomaˈ a lomahad a wawa tocerid iraay ko ngaˈayay nanaman, miakoˈiday to wama wina mihaen a pasifanaˈ cangranan. *—Taneng 10:22.

12. Lomahadto ci Yis misaaliay to sasamaan ko pidemak hani?

¹² O kakarayan a Wama ato fafekangay no sera a wama wina ni Yis inanengay ko mipiliˈan, kawra lomahadto ci Yis wa oniyah ko mamipiliˈ. (Kalatiya 6:5) Malecaday ci Yis to tao, iraay ko pasalatay harateng, wa ngaˈay cingra mipiliˈ eca pidofdof to araaw no kakarayan Wama a maˈorip, kawra makalimay cingra makelec ko kalalaˈed to kakarayan Wama . (Yohani 8:29) Mikitini ci Yisan ngaˈayay mananam no kaemangay ko maanan hani?

13. Kaemangho ci Yis mipiliˈay to samaan ko demak hani?

¹³ Kaemangho ci Yis mipiliˈay to midofdof to wama wina. Mitengilay to sowal no wama wina cingra, cowa ka ikakaay ko adihay no kafanaˈ no niyah cangranan saan miharateng. Sowal no Fangcalay Cudad ‘ci Yis padotocay midofdof to wama wina.’ (Luka 2:51) Ihkalay,  ci Yis misongilaˈay minengneng to ˈinorong no fisac. Minanamay cingra to inaneng no wama misasayho alatek, mihaen wa ngaˈay misarocod a midipot to paro no lomaˈ.

14. Hano mafanaˈ kita kaemangho ci Yis misongilaˈay cingra micekiw to Fangcalay Cudad?

¹⁴ O wama wina ni Yis pasowalay cingranan alatek, o kafahkaan konika hofoc ningra. Pasowalho cingranan, na iraay ko coyoh no Kawas milasilay to pakayraay cingranan a sapairasol. (Luka 2:8-19, 25-38) Kawra, cowa ko wama ato wina aca ko mihaenay pasowal ci Yisan, misongilaˈay cingra micekiw to Fangcalay Cudad. Hano mafanaˈ kita hani? Madeng 12 ko mihecaan ni Yis i, o singsi itini fangcalay sefi no Yirusalim ‘fahkaay to kafanaˈan ningra.’ (Luka 2:46, 47) Roma i, pakasoˈlinayto ci Yis itiya, o Wama ningra ci Yihofa.—Luka 2:42, 43, 49.

15. Samanay ko demak ni Yis, paihkal to pisetek ningra to falocoˈ midemak to araaw no Kawas?

¹⁵ Mafanaˈto ci Yis to saaroˈan no niyah i araaw no Kawas i, mipiliˈay micada to sapafeli no Kawas a ˈinorong. (Yohani 6:38) Mafanaˈay cingra ˈalomanay ko ˈintehay cingranan, maharateng koniya demak madeng karetengay ko saroero ningra, kawra kamayan mipiliˈ cingra midofdof ci Yihofaan. Itini ikor no micada cingra to paputisem i kongyin 29 miheca, midemak to araaw ni Yihofa malo sakakaay i nokaˈorip ningra. (Hipray 10:5-7) Ikor, soˈlin misemsem cingra i pisemseman a hecek, cowa ka ngiyangi ci Yis. —Yohani 19:30.

16. Mikitini ci Yisan o wawa mananam ko maanan hani?

¹⁶ Midofdof to wama wina. Wawa maemin, o wama wina iso malecaday ci Yosifan aci Mariyaan cowa ko malefotay, kawra patorodan ni Yihofa cangra to sapidipot ato pasifanaˈ tisowanan a ˈinorong. Ano mitengil kiso to sowal no wama wina, mikangodo cangranan, wa ‘malaˈosi ko demak’ iso.—Ifiso 6:1-4.

17. Mikitini Yosuwa 24:15, o kapah a tamdaw wa midemak to maanan a sasaˈosien hani?

¹⁷ Mipiliˈ midoko ci Yihofaan. Wa cipinang kiso o cima ci Yihofa, iraay ko manan a araaw Ningra, ato o araaw Ningra iraay ko maanan kalaliting tisowanan. (Loma 12:2) Mihaen, wa ngaˈay midemak to kalimlaan a saˈosi i nokaˈorip iso, mipiliˈ midoko ci Yihofaan. (ˈOsien ko Yosuwa 24:15; Patnakay 12:1) Ano micerid kiso minengneng to Fangcalay Cudad, tangongol ko picekiw, wa matongal matongal ko  kaolah iso ci Yihofaan, wa matongal ko pakaˈsolinay falocoˈ Cingranan.

18. O kapah tamdaw mamipiliˈ midemak to maanan? Wa ira ko maanan sakangaˈay?

¹⁸ Mipiliˈ paisalakat to araaw ni Yihofa i nokaˈorip. Pasowalay to tamdaw ko hekal ni Satan, saka dademak to inaneng micangacang tono tekedan a patosokan ngaˈ ira ko lipahak sanay, kawra mafanaˈay kita, makalimay saka cihafayaw a tamdaw salikor ‘oniyah ko mamidokaˈ to tireng no niyah.’ (1 Timoti 6:9,10) Ano tengilen iso ko sowal ni Yihofa, paisalakat to araaw Ningra i nokaˈorip, oha ‘inaneng ko demak, malaˈosi ko kaˈorip.’—Yosuwa 1:8.

19. O wama wina haharatengen ko manan hani?

¹⁹ Wama wina, padamaen ko wawa midoko ci Yihofaan. Mitadiˈec kamo ci Yihofaan, o papadamaen Ningra kamo inaneng ko misaˈosiyan. (Taneng 3:5, 6) Haratengen, o nano demak namo ikakaay to sowal ko taˈangay no pifiyor to wawa, mihaenay ka inaneng ko misaˈosiyan, padama to wawa malo kaolahan ni Yihofa a tamdaw.

20. O wawa mipiliˈ midoko ci Yihofa wa milifok to maanan a sapalemed?

²⁰ Wawa maemin, o wama wina wa ngaˈay padama tisowanan inaneng ko misaˈosiyan, kawra milifok to pihayda no Kawas hokira, kalimlaan i ora mipiliˈan iso ko piˈarawan. Pasayra ci Yisan a minanam, mipiliˈ midoko to sidaˈitay a Wama i kakarayan. Ano mihaen kiso, nohatini wa ngaˈay marenec ko kaˈorip, mahemek, ato irako epoc nokaˈorip. (1 Timoti 4:16) Noikor, wa milifokho kiso to sangaˈayay a nokaˈorip!