1. ¿Kuna amtarus taqenis puriñasa?

 KUNANAKTÏ awk taykanakajj amtapki ukajja, walja tiempow wawanakapar yanaptʼaspa jan ukajj jan waltʼayaspa. Jan wali amtanakar puripjjaspa ukhajja, walja jan walinakanwa wawanakapar uñjasiyapjjaspa. Ukampis suma amtanakar puripjjaspa ukhajja, kusisit jakasipjjañapatakiw yanaptʼapjjaspa. Wawanakas ukhamarakiw suma amtanakar puripjjañapa. Cheqas taqeniw alajjpachankir Jehová Dios Awkisar serviñ amtañasa, ukaw taqe amtanakat sipansa wali importantejja (Sal. 73:28).

2. Bibliarjamajja, ¿kuna suma amtanakarus Jesusan awk taykapajj puripjjäna, kuna suma amtarus Jesusajj purirakïna?

² Jesusan awk taykapajja, wawanakapar Diosar servipjjañapatakiw yanaptʼañ munapjjäna. Diosar serviñajj jupanakatakejj kunja wakiskirisa ukajja, kunanaktï amtapkäna ukanwa qhan amuyasïna (Luc. 2:40, 41, 52). Jesusasti suma amtanakaruw purirakïna, ukaw Diosan amtap phoqañatak yanaptʼäna (Mat. 4:1-10). Jesusajj suma jaqënwa, jan ajjsariri, Diosar jan jitheqtas serviri ukhamänwa. Diosar serviri awk taykanakajj ukham wawanïsajj wal kusisipjjaspa.

3. ¿Kuna jisktʼanakarus aka yatichäwin qhanañchaskañäni?

³ Aka yatichäwinjja, aka jisktʼanakaruw qhanañchaskañäni: ¿Jesusar aka oraqer khitaniñatakejj kuna suma amtanakarus Jehová Diosajj purïna? Suma amtanakar puriñ toqetjja, ¿kunsa awk taykanakajj Joseampit Mariampit yateqasipjjaspa?, ¿kunsa wayn tawaqonakajj Jesusat yateqasipjjarakispa?

4. ¿Kunsa Jehová Diosajj Jesusatakejj ajllïna?

⁴ Jehová Diosajja, suma awk taykwa Jesusatakejj ajllïna  (Mat. 1:18-23; Luc. 1:26-38). Mariajj Jehová Diosarojj taqe chuymaw munasïna, ukaw arunakapan qhan amuyasi (Luc. 1:46-55). Joseasti Jehová Diosar wal munasirakïna, kusisiyañwa munäna, ukatwa Diosar taqe kunan istʼirïna (Mat. 1:24).

5, 6. ¿Kuna jan walinakatsa Jehová Diosajj Yoqapar jan jarkʼaqkäna?

⁵ Jehová Diosajj janiw Jesusatakejj walja qollqeni awk tayk ajllkänti. Joseampi Mariampejj pobrëpjjänwa, Jesusajj naskäna uka qhepat sacrificio loqtapkäna ukanwa ukajj qhan uñjasïna (Luc. 2:24). Joseajj Nazaretanjja carpinteriataki mä jiskʼa talleranïpachänwa. Paqallqo wawanakats jukʼamp wawanakanïpjjatap laykojja, kunatï jakañatak wakiski ukampikiw jakasipjjpachäna (Mat. 13:55, 56).

⁶ Jehová Diosajj mä qhawqha jan walinakat Jesusar jarkʼaqkchïnsa, yaqhanakatjja janiw jarkʼaqkänti (Mat. 2:13-15). Sañäni, qalltanjja Jesusan familiapat yaqhepajj janiw Mesiasätap creyipkänti, ukajj Jesusatakejj wali llakkañäpachänwa (Mar. 3:21; Juan 7:5). Ukatjja, uywiri José awkipajj jiwjjäna ukhajja, ukhamarakiw wal llakispachäna. Niyakejjay jupajj jilïr wawächïnjja, jupaw familiapan negociopat encargasjjpachäna (Mar. 6:3). Tiempompejja, jupaw familiaparojj cuidjjarakpachäna. Qollqemp yanaptʼañatakis wal trabajpachäna. Ukhamajj jornal trabajisajj maynejj kunja qaritasa uk yatpachänwa.

7. 1) ¿Kunsa chacha warminakajj wawanakar uywañ toqet jisktʼasipjjañapa? 2) Proverbios 2:1-6 textorjamajja, ¿kunsa awk taykanakajj wawanakapar yatichapjjañapa?

⁷ Chacha warminaka, jumanakatï wawanïñ munapjjsta ukhajja, akhamwa jisktʼasipjjañama: “¿Jiwasajj Joseyjama Mariyjam humilde chuymanïtanti, jupanakjam Dios chuymätanti, Jehová Diosajj mä wawar uywañatak confiyistaspati?” sasa (Sal. 127:3, 4). Maysa toqetjja, jumatï wawanëjjsta ukhajja, akhamwa jisktʼasiñamaraki: “¿Wawanakajar chʼama tukuña trabajojj kunjamasa uk yatichaskti?” (Ecl. 3:12, 13). “¿Akapachan utjki uka jan walinakat wawanakajar jarkʼaqañatakejj chʼamachasiskti?” sasa (Prov. 22:3). Cheqas janiw taqe jan walinakat jarkʼaqañ puedksnati. Ukampis jan walinakar saykatapjjañapatakejja, Biblian yatichäwinakapar  confiyañwa munasiñamp yatichañasa (Proverbios 2:1-6 liytʼañataki). Sañäni, mä familiarasatï Diosat jitheqtjjani ukhajja, kunatsa Diosat jan jitheqtañasäki ukwa Bibliamp wawanakar yatichañasa (Sal. 31:23). Jan ukajj mä munat familiarasasa jan ukajj amigosasa jiwani ukhajja, kawkïr textonakas jan sint llakisiñatak yanaptʼaspa ukwa uñachtʼayañasa (2 Cor. 1:3, 4; 2 Tim. 3:16).

8. Deuteronomio 6:6, 7 textorjamajj ¿kunsa Joseampi Mariampejj lurapjjäna?

⁸ Joseampi Mariampejja, kuna ewjjtʼanakatï awk taykanakatakejj utjki ukarjamapuniw kuns lurapjjerïna, ukatwa Jesusarojj Jehová Diosamp suma uñjatäñapatak yanaptʼapjjäna (Deuteronomio 6:6, 7 liytʼañataki). Panipajj Jehová Diosar wal munasipjjäna, wawanakapajj Diosar ukham munasipjjaspa ukwa munapjjarakïna, ukatakiw wal chʼamachasipjjäna.

9. ¿Kuna suma amtarus Joseampi Mariampejj puripjjäna?

⁹ Joseampi Mariampejj Diosaru wawanakapamp chika adorañwa amtapjjäna. Sapa semanaw Nazaretankir sinagogar sarapjjäna. Sapa mararakiw Jerusalenarojj Pascua fiesta amtirejj sarapjjäna (Luc. 2:41; 4:16). Viajkasajja, Jesusarusa mayni wawanakaparusa Diosan markapat yatichapjjerïpachänwa. Ukatakejj inas kawki cheqanakattï Bibliajj parlki uka cheqanakar sarapjjerïchïna. Familiapajj waljäjjäna ukhajja, Joseatakisa Mariatakisa wawanakapamp Diosar adorañajj janiw faciläjjpachänti. Ukampis Diosar adorañataki wal chʼamachasipjjatapajja, Diosar jukʼamp jakʼachasiñatakiw jupanakar yanaptʼäna.

10. ¿Kunsa awk taykanakajj Joseampit Mariampit yateqasipjjaspa?

¹⁰ ¿Kunsa cristiano awk taykanakajj Joseampit Mariampit yateqasipjjaspa? Awk taykanaka, taqe kunat sipansa, luratanakampi arsutanakampiw Jehová Diosar taqe chuyma munasipjjatam uñachtʼayapjjañama. Ukatjja, Jehová Diosar munasiñwa jupanakar yanaptʼapjjañama, ukajj mä suma regalökaspas ukhamawa. Ukatsti, Bibliat sapa kuti yatjjatañasa, orasiñasa, tantachäwinakar sarañasa,  predikir sarañasa kunatsa wali wakiskirejja ukwa yatichapjjañamaraki (1 Tim. 6:6). Maysa toqetjja, kunatï jakañatak wakiski ukanaksa wawanakamar churapjjañamawa (1 Tim. 5:8). Ukampis akwa amtapjjañama: akapachan tukusïwipat machaq mundor jakkiri pasañatakejja, janiw qollqenïñas cosasanakanïñas yanaptʼkaniti, jan ukasti Jehová Diosamp sum apasiñaw yanaptʼani (Ezeq. 7:19; 1 Tim. 4:8). *

11. 1) Kuntï 1 Timoteo 6:17-19 texton siski ukajja, ¿kunjamsa awk taykanakar suma amtanakar puripjjañapatak yanaptʼaspa? 2) ¿Kunanak lurañsa familianakajj amtapjjaspa, kuna bendicionanaksa katoqapjjarakispa? (“ ¿Kunanak lurañsa amtapjjasma?” sat recuadro uñjjattʼäta).

¹¹ Familiapan sum jakasiñataki suma amtanakar puripki uka awk taykanakar uñjañajj wali kusiskañawa. Jupanakajj wawanakapamp chikaw adorapjje, tantachäwinakarusa asambleanakarusa predikirisa sarapjjapuniwa. Yamas yaqhep familianakajja, kawkjantï jukʼamp predikirinakajj munaski ukaruw sarapjje. Yaqhanakasti Betelaruw visitir sarapjje. Yaqhepasti Diosar adorañatak utanak lurañanwa yanaptʼapjje. Ukham lurañatakejj qollqepwa gastasipjje, awisajj jan walinakanwa uñjasipjjaraki. Ukampis Jehová Diosatjja walja bendicionanakwa katoqapjje (1 Timoteo 6:17-19 liytʼañataki). Ukham familianakan jilsuwayapki uka cristianonakajja, kuntï jiskʼatpach yateqawayapki uka suma costumbrenakjja janiw armasipkiti, ukham suma yatichäwinak katoqasas awk taykaparojj wal yuspärapjje (Prov. 10:22). *

12. ¿Kunsa Jesusajj jilsjjasajj lurjjañapäna?

¹² Jesusan alajjpachankir Awkipajj suma amtanakarupuniw puri, aka oraqenkir awk taykapasa ukhamarakiw suma amtanakar puripjjerïna. Jesusajj jilsjjasajja, jupa pachpaw suma amtanakar purjjarakïna (Gál. 6:5). Jupajj jiwasjamarakiw kun amtañatakis librëna, kun lurañtï munkäna ukwa jupajj amtaspäna. Ukampis Jehová Diosampi sum apasiskakiñwa amtäna (Juan 8:29). Jichhürunakanjja, wayn tawaqonakajj jupatwa yateqasipjjarakispa.

13. ¿Jesusajj kun lurañsa wawatpach amtäna?

¹³ Jesusajj wawatpachwa awk taykapar istʼañ amtäna. Janipuniw José contras ni María contras saytʼkänti, janirakiw jupanakat sipans jukʼamp yatiñanïkaspas ukham amuyaskänti. Jan ukasti, “jupanakar istʼasapuniw” sarnaqerïna (Luc. 2:51). Jesusajj jilïr wawjamajj kunayman lurañanakanïnwa,  uk phoqañatakis wal chʼamachaspachäna. Familiapar yanaptʼañatakejja, kuntï uywir awkipajj yatichkäna ukanak yateqañatakejj wal chʼamachasirakpachäna.

14. Jesusajj Diosan Arupat suma yatjjatirïnwa sasajj ¿kunatsa sissna?

¹⁴ Kunjamsa Jesusajj mä milagro toqe nasïna, angelanakajj jupjjat kamsapjjänsa, ukanak awk taykapajj awisapjjpachänwa (Luc. 2:8-19, 25-38). Ukampis Jesusajj jupa pachpaw Qellqatanakat jukʼamp yatjjatirïpachäna. Jupajj Diosan Arupat suma yatjjatirïnwa, ¿kunatsa ukham sistanjja? Waynitükäna ukhajja, Jerusalenankir yatichirinakajj “wali amuytʼasirïtapatsa jisktʼanakar qhanañchatapatsa wal musparapjjäna” (Luc. 2:46, 47). Jesusajj 12 maranëjjasajj Jehová Diosan wawapätapat janiw pächaskänti (Luc. 2:42, 43, 49).

15. ¿Kunjamsa Jesusajj Awkipan munañap phoqañ amtatap uñachtʼayäna?

¹⁵ Jesusajj kunsa Diosan amtap phoqañatakejj lurañapäna uk amuyjjäna ukhajja, taqe chuymaw ukar iyawsäna (Juan 6:38). Walja jaqenakaw jupar uñisipjjañapäna, uk jupajj yatïnwa. Ukhaman uñjasiñ janis munkchïnjja, jupajj Jehová Diosar istʼañwa amtäna. 29 maran bautisasjjäna ukhajja, Awkipan munañap phoqañatakiw chʼamachasïna, ukaw jupatakejj wali importantënjja (Heb. 10:5-7). Kunapachatï lawan warkkatat tʼaqesiskäna ukhasa, Awkipan munañap phoqaskakïnwa (Juan 19:30).

16. ¿Kunsa wawanakajj Jesusat yateqasipjjaspa?

¹⁶ Awk taykamar istʼañamawa. Joseampi Mariampejj pantjasirïpjjänwa, awk taykamajj jupanakjam pantjasirïpjjarakiwa. Ukampis Jehová Diosaw jumar cuidapjjañapataki, yatichapjjañapataki awk taykamar jaytawayi. Awk taykamar istʼañamapuniwa, respetañamarakiwa, ukhamatwa sum jakasïta (Efes. 6:1-4).

17. Josué 24:15 textorjamajja, ¿kunsa wayn tawaqonakajj jupanak pachpa amtapjjañapa?

¹⁷ Khitirus servïta ukwa amtañama. Khitis Jehová Diosajja, kunas munañapajja, kunjamsa jumajj munañap phoqasma ukanakjja juma pachpaw yatjjatañama (Rom. 12:2). Ukhamatakwa Jehová Diosar serviñ amtäta, uka amtar puriñaw vidaman wali importantejja (Josué 24:15 liytʼañataki; Ecl. 12:1). Jumatï Biblia sapür liyïta, sapa kut yatjjatarakïta ukhajja, jukʼampiw Jehová Diosar munasïta, jukʼampirakiw jupar confiyäta.

18. ¿Kun lurañsa wayn tawaqonakajj amtapjjañaparaki, uk lurasajj kunjamas jakasipjjani?

 ¹⁸ Jehová Diosan munañapwa nayrar uchañama. Akapachankir jaqenakajja, ‘kunanaktï sum lurañ yatkta ukanak juman askimatak luräta ukhajj kusisitaw jakasïta’ sasaw sapjje. Ukampis khitinakatï walja qollqenïñataki chʼamachasipki ukanakajj ‘kunayman llakinakampiw apjjatasipjje’ (1 Tim. 6:9, 10). Jumatï Jehová Diosar istʼäta, munañap nayrar uchäta ukhajja, kusisitaw jakasïta, ‘taqe luräwinakamas sumaruw sarani’ (Jos. 1:8).

19. ¿Kunsa awk taykanakajj janipun armapjjañapäki?

¹⁹ Awk taykanaka, wawanakaman Diosar servipjjañapatak wal chʼamachasipjjam. Diosar taqe chuyma confiyapjjam, Jupaw suma amtanakar puripjjañamatak yanaptʼapjjätam (Prov. 3:5, 6). Ak janipun armapjjamti: arunakat sipansa luratanakaw wawanakar jukʼamp yanaptʼi. Ukhamasti suma amtanakarupun puripjjam, ukaw wawanakamarojj Jehová Dios nayraqatan suma uñjatäpjjañapatak yanaptʼani.

20. ¿Kunjamsa Diosar serviñ amtiri wayn tawaqonakajj jakasipjjani?

²⁰ Wayn tawaqonaka, awk taykamaw suma amtanakar puripjjañamatak yanaptʼapjjeristam. Ukampis Dios nayraqatan suma uñjatäñatakejj jumanak pachpaw chʼamachasipjjañama. Ukhamasti Jesusat yateqasisa alajjpachankir Awkisar serviñ amtapjjam. Uktï lurapjjäta ukhajja, Diosatak wal trabajisajj walja bendicionanakwa katoqapjjäta, kusisitaw jakasipjjarakïta (1 Tim. 4:16). Jutïrinsa jukʼamp kusisitaw jakasipjjäta.