1. Aha do keputusan na massai denggan na boi dibahen sasahalak?

KEPUTUSAN na dibahen natua-tua boi do berpengaruh tu ngolu ni ianakkonna. Molo dibahen natua-tua keputusan na so denggan, boi do i parohon jea tu ngolu ni ianakkonna. Alai molo dibahen nasida do keputusan na denggan, gabe boi ma marlas ni roha ianakkonna di ngoluna. Tottu, ianakkonna pe ikkon mambahen keputusan na denggan do di ngoluna. Keputusan na massai denggan na boi dibahen sasahalak, i ma manomba Jahowa.​—Ps. 73:28.

2. Aha do keputusan na denggan na dibahen Jesus dohot natua-tuana?

² Marsitutu do si Josep dohot si Maria mangurupi ianakkonna asa manomba Jahowa. Jala keputusan ni nasida pe patuduhon Jahowa do na urrikkot di ngoluna. (Luk. 2:40, 41, 52) Dibahen Jesus do muse keputusan na denggan na boi mangurupi ibana mangulahon lomo ni roha ni Jahowa. (Mat. 4:1-10) Lam magodang Jesus, lam tarida ma parangena na burju, setia, jala barani. Pasti lomo do roha ni sude natua-tua molo songon Jesus ianakkonna.

3. Sukkun-sukkun aha do na lao taulas di artikel on?

³ Di artikel on lao taulas ma sukkun-sukkun on: Aha do keputusan na denggan na dibahen Jahowa tu Jesus? Aha do na boi diparsiajari natua-tua sian keputusan na dibahen si Josep dohot si Maria? Jala aha do na boi diparsiajari akka na poso sian keputusan na dibahen Jesus?

4. Aha do keputusan na petting na dibahen Jahowa tu Jesus?

⁴ Dipillit Jahowa do natua-tua na denggan tu Jesus. (Mat. 1:18-23; Luk. 1:26-38) Sian tangiang ni si Maria na  disurat di Bibel, tarida do balga ni holongna tu Jahowa dohot tu Hatana. (Luk. 1:46-55) Jala sian cara ni si Josep mangulahon paretta ni Debata, tarida do na dihaholongi ibana Jahowa.​—Mat. 1:24.

5-6. Akka tantangan aha do na dipaloas Jahowa na ikkon diadopi Jesus?

⁵ Dang halak na mamora dipillit Jahowa gabe natua-tua ni Jesus. Sian pelean na dilehon si Josep dohot si Maria dung tubu Jesus, tarida ma na pogos do nasida. (Luk. 2:24) Adong do ra partiga-tigaan ni si Josep di Nasaret, disi ma ibana karejo gabe tukkang hau. Jala adong lobi sian pitu ianakkonna. Jadi pasti sederhana do ngolu ni nasida.​—Mat. 13:55, 56.

⁶ Memang di piga-piga situasi, dilinggomi Jahowa do Jesus. Alai diloas Ibana do Jesus mangadopi tantangan. (Mat. 2:13-15) Misalna, pasti lungun do roha ni Jesus ala adong keluargana na so porsea molo ibana Messias. (Mrk. 3:21; Joh. 7:5) Lungun do muse roha ni Jesus ala tibu do mate si Josep. Jesus ma na ikkon mangalanjuthon karejo ni bapakna, ala ibana do anak siakkangan. (Mrk. 6:3) Lam magodang Jesus, ibana ma na martanggung jawab mangurus aha na porlu di keluargana. Pasti kerja keras do Jesus. Diboto ibana do loja ni karejo sian manogot sahat tu botari.

7. (a) Sukkun-sukkun aha do na porlu dipikkirhon pasangan Kristen tikki pagodang-godangkon ianakkon? (b) Songon dia do Poda 2:1-6 mangurupi natua-tua mangajari ianakkonna?

⁷ Molo nungnga marhasohotan hamu jala lomo rohamuna marianakkon, sukkun ma dirimuna, ‘Songon si Josep dohot si Maria, serep do rohanami? Holong do rohanami tu Jahowa dohot tu Bibel? Olo do Jahowa mamillit hami gabe natua-tua na lao mangurus sada poso-poso?’ (Ps. 127:3, 4) Molo nungnga adong ianakkonmuna, sukkun ma dirimuna, ‘Huajari do ianakkonku asa olo kerja keras?’ (Pjm. 3:12, 13) ‘Hubahen do sian nasa gogokku lao manjaga ianakkonku sian akka bahaya na adong di portibi ni Sibolis on?’ (Poda 22:3) Memang dang boi dijaga hamu ianakkonmuna sian sude tantangan na diadopi ibana. Alai torus ma ajari ianakkonmuna asa sai mangasahon Bibel tikki mangadopi masalah  di ngoluna. (Jaha Poda 2:1-6.) Misalna molo adong keluargamuna na so manomba Jahowa be, urupi ma ianakkonmuna mangida alasan ni Bibel boasa ikkon torus setia ibana tu Jahowa. (Ps. 31:24) Manang tikki mate sasahalak na dihaholongi ibana, patudu ma akka ayat sian Bibel na boi mangapuli jala mambahen dame rohana.​—2 Kor. 1:3, 4; 2 Tim. 3:16.

8. Songon na disurat di 5 Musa 6:6, 7, aha do na ikkon diulahon si Josep dohot si Maria?

⁸ Diurupi si Josep dohot si Maria do Jesus mangulahon lomo ni roha ni Debata, ala diihutton nasida do tudu-tudu ni Jahowa tu akka natua-tua. (Jaha 5 Musa 6:6, 7.) Massai balga do holong ni si Josep dohot si Maria tu Jahowa. Jadi lomo do roha ni nasida asa balga holong ni ianakkonna tu Jahowa.

9. Aha do na diulahon si Josep dohot si Maria?

⁹ Taratur do si Josep dohot si Maria manomba Jahowa rap dohot ianakkonna. Lao do nasida tu sinagoga di Nasaret ganup minggu, dohot tu perayaan Paska di Jerusalem ganup taon. (Luk. 2:41; 4:16) Tikki di pardalanan tu Jerusalem i do ra diajari nasida Jesus dohot akka anggina aha na masa tu halak Israel najolo. Dikunjungi nasida do ra akka inganan na disurat di Gulungan. Pasti dang mura di nasida boi taratur manomba Jahowa ala martamba do ianakkon ni nasida. Alai dipasu-pasu Jahowa do upaya ni nasida i. Ala dibahen keluarga i do Jahowa na urrikkot, gabe boi ma nasida lam jonok tu Jahowa.

10. Aha do na boi diparsiajari natua-tua Kristen sian si Josep dohot si Maria?

¹⁰ Aha do na boi diparsiajari natua-tua Kristen sian si Josep dohot si Maria? Tikki mangajari ianakkonmuna, patudu ma sian pakkataion dohot parniulaonmuna na holong do rohamuna tu Jahowa. Silehon-lehon na massai arga na boi lehononmuna tu ianakkonmuna, i ma mangurupi nasida asa makkaholongi Jahowa. Rikkot do muse mangajari ianakkonmuna asa taratur marsiajar Bibel, martangiang, ro tu parpunguan, jala dohot marbarita na uli. (1 Tim. 6:6) Memang, ikkon dilehon  hamu do aha na porlu di ianakkonmuna. (1 Tim. 5:8) Alai ingot ma, dang arta na boi paluahon ianakkonmuna. Parale-aleon ni nasida tu Jahowa do na boi mamboan nasida masuk tu tano na imbaru. *—Hes. 7:19; 1 Tim. 4:8.

11. (a) Songon dia do poda na disurat di 1 Timoteus 6:17-19 mangurupi natua-tua mambahen keputusan na denggan tikki pagodang-godangkon ianakkonna? (b) Tujuan aha do na boi dibahen keluargamuna jala pasu-pasu aha do na boi dapotmuna? (Ida kotak “ Tujuan Aha do na Boi Dibahen Hamu?”)

¹¹ Las do rohatta mangida natua-tua Kristen na mambahen keputusan na denggan lao mangurupi ianakkon ni nasida marale-ale tu Jahowa. Taratur do nasida rap marpungu, ro tu kebaktian, jala rap marbarita na uli. Adong do muse piga-piga keluarga na marbarita di inganan na jarang dikarejohon. Na asing mengunjungi Betel, manang dohot tu proyek pembangunan ni organisasi. Memang dang mura mangulahon i, jala porlu do biaya tusi. Alai pasti dipasu-pasu Jahowa do molo diulahon nasida i. (Jaha 1 Timoteus 6:17-19.) Jadi dakdanak na dipagodang-godang di keluarga sisongon i, boi ma torus mangulahon na denggan songon na diparsiajari ibana. Pasti mandok mauliate do nasida tu natua-tuana! *—Poda 10:22.

12. Aha do na ikkon diulahon Jesus dung magodang ibana?

¹² Dibahen Jahowa do keputusan na denggan tu Jesus. Jala si Josep dohot si Maria pe mambahen keputusan na marbisuk tu ibana. Alai dung magodang Jesus, ibana sandiri do na ikkon mambahen keputusan tu dirina. (Gal. 6:5) Dos songon hita, dilehon do tu Jesus kebebasan lao mamillit. Boi do dipillit ibana lao makkarikkotton diri sandiri. Alai mangulahon lomo ni roha ni Debata do na dipillit ibana. (Joh. 8:29) Songon dia do akka na poso boi maniru Jesus?

13. Aha do keputusan na rikkot na dibahen Jesus tikki poso?

¹³ Tikki poso dope Jesus, unduk do ibana tu natua-tuana. Dang hea dialo Jesus natua-tuana, manang dang hea didok rohana na ummalo do ibana sian natua-tuana. Gariada, “tongtong do dioloi ibana nasida”. (Luk. 2:51) Ala anak siakkangan do Jesus, marsitutu do ibana mangulahon tanggung jawabna. Pasti marsiajar do ibana gabe tukkang hau sian si Josep, asa boi mangurupi keluargana.

14. Sian dia do taboto na ringgas do Jesus mamparsiajari Hata ni Debata?

 ¹⁴ Pasti nungnga dipaboa si Josep dohot si Maria songon dia partubu ni Jesus, jala aha na didok suru-suruan ni Debata taringot ibana. (Luk. 2:8-19, 25-38) Alai, dang cukkup holan manangihon carita ni natua-tuana. Diparsiajari Jesus do i muse sian akka Gulungan. Sian dia taboto na ringgas do Jesus mamparsiajari Hata ni Debata? Alana tikki gelleng dope ibana, longang do roha ni akka guru di Jerusalem mambege “pangantusion dohot angka alusna”. (Luk. 2:46, 47) Jala tikki marumur 12 taon dope Jesus, nungnga godang diparsiajari ibana Hata ni Debata. Gabe pos ma rohana, Jahowa do Bapakna.​—Luk. 2:42, 43, 49.

15. Songon dia do Jesus patuduhon sai diulahon ibana do lomo ni roha ni Jahowa?

¹⁵ Tikki diboto Jesus aha na dihalomohon Jahowa sian ibana, olo do ibana mangulahon i. (Joh. 6:38) Pasti diboto Jesus, godang do halak na lao marsogo ni roha tu ibana. Alai nang pe dang lomo rohana masa i, toktong do dioloi ibana Jahowa. Tikki tardidi Jesus taon 29 M dipatudu ibana ma na rikkot di ngoluna, i ma mangulahon lomo ni roha ni Jahowa. (Heb. 10:5-7) Nang pe naeng mate nama ibana di hau partinaonan, toktong do diulahon ibana lomo ni roha ni Amana.​—Joh. 19:30.

16. Aha do na boi diparsiajari akka na poso sian Jesus?

¹⁶ Oloi ma natua-tuamuna. Songon si Josep dohot si Maria, dang sempurna natua-tuamuna. Alai dilehon Jahowa do tanggung jawab tu nasida asa manjaga jala mangalatik hamu. Molo diargai jala dioloi hamu nasida, songon na dibahen Jesus tu natua-tuana, gabe ‘denggan ma ngolum’.​—Eps. 6:1-4.

17. Songon na disurat di Josua 24:15, keputusan aha do na ikkon dibahen akka na poso tu dirina?

¹⁷ Pillit ma ise na lao sombaonmuna. Ikkon takkas do ditanda hamu Jahowa, aha na dihalomohon rohana, jala songon dia hamu mangulahon i di ngolumuna. (Rom 12:2) Gabe boi ma dibahen hamu keputusan na massai petting di ngolumuna, i ma keputusan lao manomba Jahowa.  (Jaha Josua 24:15; Pjm. 12:1) Molo taratur hamu manjaha jala mamparsiajari Bibel, lam holong ma rohamuna tu Jahowa, jala gabe lam togu ma haporseaonmuna tu Ibana.

18. Aha do na ikkon diulahon akka na poso, jala aha do hasilna?

¹⁸ Bahen ma mangulahon lomo ni roha ni Jahowa na urrikkot di ngolumuna. Di portibi ni Sibolis, sai dijujui do hamu mamakke bakatmuna asa boi marlas ni roha. Hape sasittongna, molo dibahen hamu do hamoraon na uppetting, boi do i parohon “godang hasusaan” tu hamu. (1 Tim. 6:9, 10) Alai molo ditangihon hamu do Jahowa, jala mangulahon lomo ni rohana do na urrikkot di ngolumuna, gabe marhasil jala marbisuk ma hamu mambahen keputusan.​—Jos. 1:8.

19. Aha do na ikkon diingot akka natua-tua?

¹⁹ Hamu akka natua-tua, marsitutu ma hamu mangurupi ianakkonmuna asa manomba Jahowa. Marhaposan ma hamu tu Jahowa, pasti urupanna do hamu mambahen keputusan na denggan. (Poda 3:5, 6) Ingot ma, ajari ma ianakkonmuna dang holan sian pakkataion, alai na urrikkot sian parniulaonmuna. Bahen ma keputusan na boi mangurupi ianakkonmuna asa marale-ale tu Jahowa.

20. Aha do pasu-pasu na boi didapot akka na poso molo olo nasida manomba Jahowa?

²⁰ Hamu akka na poso, boi do natua-tuamuna mangurupi hamu mambahen keputusan na denggan di ngolumuna. Alai ikkon hamu do na mambahen keputusan lao palashon roha ni Jahowa. Jadi tiru ma Jesus, jala lehon hamu ma dirimuna lao manomba Jahowa. Molo diulahon hamu i, marlas ni roha ma hamu ala boi mangulahon godang ulaon tu Jahowa. (1 Tim. 4:16) Jala di ari na naeng ro, boi ma marlas ni roha ngolumuna salelengna!