1. ?Ajalɛ kpafuɛ nga sran kun kwla fa’n yɛle benin?

BLƐ sunman’n ajalɛ nga siɛ nin niɛn’m be fa’n, ɔ ɲan ta be mma’m be su cɛ kpa. Sɛ be fa ajalɛ tɛ’n be mma’m be kwla isɛ i bo nzuɛn’n. Sanngɛ sɛ be fa ajalɛ kpa’n be mma’m bé ɲán su ye kpɛkun bé dí aklunjuɛ. Gbanflɛn nin talua’m be kusu ɔ fata kɛ be fa ajalɛ kpa wie. Sanngɛ ajalɛ kpafuɛ nga sran kun kwla fa’n yɛle e Si Zoova i sulɛ’n.—Jue. 73:28.

2. ?Ajalɛ kpa benin yɛ Zezi nin i si nin i nin be fali-ɔ?

² Zozɛfu nin Mari be miannin be ɲin be ukali be mma mun naan b’a kwla su Zoova. Yɛ ajalɛ kwlaa nga be fali’n kle weiin kɛ Zoova i sulɛ’n ti be cinnjin tra like kwlaa. (Lik. 2:40, 41, 52) Ajalɛ nga Zezi fali’n kusu ukɛli i naan w’a kwla yo like nga Zoova kunndɛ kɛ ɔ yo’n. (Mat. 4:1-10) I kwlaa sɔ’n ti’n, Zezi yoli aklunyefuɛ, ɔ nin Zoova be nantili klanman titi yɛ ɔ yoli yakpafuɛ. Siɛ nin niɛn nga be su Zoova’n, be kunndɛ kɛ be mma’m be yo sɔ wie.

3. ?Kosan benin mun yɛ é wá tɛ́ be su-ɔ?

³ Like suanlɛ nga nun’n, é wá tɛ́ kosan nga’m be su: ?Ajalɛ benin yɛ Zoova fɛli i Zezi i lika-ɔ? ?Ngue like yɛ Zozɛfu nin Mari be ajalɛ’n kle siɛ nin niɛn mun-ɔn? ?Ngue like yɛ ajalɛ nga Zezi fali’n kle gbanflɛn nin talua mun-ɔn?

4. ?Ajalɛ cinnjin benin yɛ Zoova fɛli i wa’n i lika-ɔ?

⁴ Zoova yoli maan Zezi ɲannin siɛ nin niɛn kpa. (Mat. 1:18-23; Lik. 1:26-38) Mari i ndɛ ng’ɔ kannin m’ɔ o Biblu’n nun’n kle kɛ ɔ klo Zoova nin i nuan Ndɛ’n. (Lik. 1:46-55) Wafa nga Zozɛfu kusu nantili atin nga Zoova kleli i’n su’n, ɔ kle kɛ ɔ klo Ɲanmiɛn naan ɔ kunndɛ kɛ i klun jɔ i wun.—Mat. 1:24.

5-6. ?Sa benin wie mun yɛ Zoova kplinnin su kɛ be tɔ Zezi su-ɔ?

 ⁵ Zoova w’a kunndɛman kɛ siɛ nin niɛn nga be ti aɲanbeunfuɛ’n yɛ be nian Zezi i lika-ɔ. Kɛ Mari wuli Zezi’n tɛ nga ɔ nin Zozɛfu be ko yili’n ɔ kle kɛ be ti yalɛfuɛ. (Lik. 2:24) Atrɛkpa’n, Zozɛfu i junman diwlɛ’n wo i awlo’n i wun koko lɛ. Asa’n be sa nun ninnge’m b’a sɔnman. Afin be le ba nso annzɛ nso tra su m’ɔ fata kɛ be nian be lika-ɔ.—Mat. 13:55, 56.

⁶ Zoova sasali Zezi ninnge sunman be lika. Sanngɛ nán sa ngba nun yɛ ɔ yoli sɔ-ɔ. (Mat. 2:13-15) I wie yɛle kɛ i osufuɛ’m be nun sunman b’a lafimɛn i su. I kpa bɔbɔ’n i niaan’m b’a lafiman su kɛ i yɛ ɔ ti Mesi’n niɔn. E si kɛ i sɔ’n yoli Zezi i ya. (Mar. 3:21; Zan 7:5) Asa ekun’n, kɛ i si Zozɛfu wú’n nn ɔ te yo gbanflɛn kan. E si kɛ blɛ sɔ’n nun’n, i awlɛn kpɔtɔli i klun. Kusu kɛ mɔ i yɛ ɔ ti ba’m be nun kaklaka’n ti’n, ɔ fata kɛ ɔ di junman kunngba nga i si dili i laa’n naan w’a kwla nian i nin ɔ nin i niaan’m be lika. (Mar. 6:3) Ɔ maan kɛ Zezi ɲín’n, nn ɔ si wafa nga be nian awlobo kun i lika’n. Kɔlɛ’n ɔ miɛnnin i ɲin dili junman kekle kpa naan w’a kwla suɛn i fuɛ’m be bo. I sɔ’n ti’n e kwla se kɛ, kɛ sran kun di junman lele m’ɔ fɛ’n, wafa nga i wun yo i’n Zezi si i.

7. (1) ?Kosan benin mun yɛ be nga be kunndɛ kɛ bé wú ba’n annzɛ be nga be le ba’n be kwla fa usa be wun-ɔn? (2) ?Wafa sɛ yɛ Nyanndra Mun 2:1-6 kwla uka siɛ nin niɛn mun naan b’a ta be mma’m be kpa-ɔ?

⁷ Sɛ amun a ja bla annzɛ bian naan amun kunndɛ kɛ amún wú ba’n, amun usa amun wun kɛ: ‘?E ti wun ase kanfuɛ yɛ e klo Zoova nin i nuan Ndɛ’n? ?Kɛ mɔ be klun ba’n ti like cinnjin mɔ Zoova fa cɛ awlobo kun’n ti’n, é kwlá nían ba sɔ’n i lika kpa?’ (Jue. 127:3, 4) Sɛ amun le ba kusu’n, amun usa amun wun kɛ: ‘? E kle e mma’m be kɛ sɛ sran kun di junman kekle’n i sɔ’n ti kpa?’ (Aku. 3:12, 13) ?E mian e ɲin e sasa e mma mun Satan i mɛn tɛ nga i lika? (Nya. 22:3) I yo, siɛ nin niɛn’m be kwlá sasaman be mma mun naan sa fi w’a ɲanman be. Kannzɛ ɔ ti sɔ bɔbɔ’n, sanngɛ be kwla kle be wafa nga Biblu’n kwla uka be naan b’a jran be su sa’m be ɲrun kekle’n. (An kanngan Nyanndra Mun 2:1-6 nun.) I wie yɛle kɛ sɛ amun osufuɛ kun yaci Zoova i sulɛ’n, an fa Ɲanmiɛn Ndɛ’n be kle amun mma mun like nga ti yɛ be liɛ’n ɔ fataman kɛ be kpɔci  Zoova wie’n. (Jue. 31:24) Sɛ kusu amun awlɛn su sran wu’n, amun fa Biblu’n nun ndɛ mma wie’m be kle amun mma mun wafa nga be kwla jran sa sɔ’n i ɲrun kekle’n.—2 Kor. 1:3, 4; 2 Tim. 3:16.

8. ?Ndɛ benin yɛ ɔ o Mmla’n 6:6, 7 nun mɔ Zozɛfu nin Mari be nantili su-ɔ?

⁸ Zozɛfu nin Mari be nantili ninnge kwlaa nga Zoova seli siɛ nin niɛn’m be kɛ be yo naan b’a kwla ta be mma’m be kpa’n be su. Ɔ maan be ukali Zezi naan w’a yo sran kun mɔ Zoova i klun jɔ i wun-ɔn. (An kanngan Mmla’n 6:6, 7 nun.) Zozɛfu nin i yi Mari be klo Zoova tankaan kpa. Yɛ like ng’ɔ yoli be cinnjin’n yɛle be mma’m be ukalɛ naan be kusu be klo Zoova wie.

9. ?Ajalɛ cinnjin benin wie mun yɛ Zozɛfu nin Mari be fali-ɔ?

⁹ Zozɛfu nin Mari nin be mma’m be suli Zoova likawlɛ titi. E si kɛ Zozɛfu nin i awlobofuɛ’m be trannin aɲia’m kwlaa nga be yoli be Ɲanmiɛn sulɛ sua ng’ɔ o Nazarɛti lɔ’n nun’n, be bo. Asa ekun’n, e si kɛ afuɛ nuan kwlaa nun be kɔ Zerizalɛmun be ko di Delɛ cɛn’n. (Lik. 2:41; 4:16) Atrɛkpa’n, kɛ bé kɔ́ Zerizalɛmun’n blɛ sɔ’n nun’n be kleli Zezi nin i niaan’m be like. I wie yɛle kɛ be kannin sa nga be juli Zoova i sufuɛ’m be su laa’n i ndɛ. Yɛ atrɛkpa’n be ɔli lika nga be kan be ndɛ Ɲanmiɛn Ndɛ’n nun’n, be nun wie’m be nun. Sanngɛ kɛ be mma’m be wa sɔnnin’n, e si kɛ i sɔ yolɛ’n w’a yoman pɔpɔ w’a manman be. Sanngɛ Zoova yrali be ɲin mɔ be miannin’n su. Kɛ mɔ be fali Zoova i sulɛ’n be sieli i like kwlaa ɲrun’n ti’n be nin Zoova be afiɛn mantannin kpa.

10. ?Ngue like yɛ Zozɛfu nin Mari be kle siɛ nin niɛn nga be su Ɲanmiɛn’n niɔn?

¹⁰ ?Ngue like yɛ Zozɛfu nin Mari be kle siɛ nin niɛn nga be su Ɲanmiɛn’n niɔn? Like cinnjin nga be kwla yo’n yɛle kɛ maan be ayeliɛ’n nin ndɛ nga be kan’n be kle be mma’m be kɛ be klo Zoova tankaan kpa. Like cinnjin kpa nga amun kwla yo man amun mma mun’n yɛle kɛ amun uka be naan be kusu be klo Zoova wie. Asa’n, like nga amun kwla yo i ekun’n, yɛle kɛ amun uka be naan be suan Biblu’n nun like, be srɛ Ɲanmiɛn, be wɔ aɲia’m be bo, yɛ be bo jasin fɛ’n titi. (1 Tim. 6:6)  Kpɛkun amun fa like ng’ɔ mian amun mma’m be sa’n man be. (1 Tim. 5:8) Asa kusu’n, nán amun wla fi su kɛ nán aɲanbeun ninnge nga amún fá mán be’n yɛ ɔ́ dé be-ɔ. Sanngɛ sɛ be nin Zoova be afiɛn mantan’n yɛ bé kwlá ɲán be ti Satan i mɛn tɛ nga nun naan b’a ɲan nguan m’ɔ leman awieliɛ’n niɔn. *—Eze. 7:19; 1 Tim. 4:8.

11. (1) ?Wafa sɛ yɛ ndɛ ng’ɔ o 1 Timote 6:17-19 nun’n kwla uka siɛ nin niɛn mun naan be mma’m be talɛ nun’n b’a fa ajalɛ kpa-ɔ? (2) ?Ninnge benin wie mun yɛ amun nin amun awlobofuɛ mun amun kwla fa sie amun ɲrun kɛ amún yó-ɔ? (An nian kusu nga be flɛ i kɛ “?Ngue yɛ amun kwla fa sie amun ɲrun kɛ amún yó-ɔ?” nun.) (3) ?Yɛ i su ye benin yɛ amun kwla ɲɛn i-ɔ?

¹¹ Kɛ e wun siɛ nin niɛn nga be mian be ɲin be uka be mma mun naan be nin Zoova be afiɛn mantan kpa’n, i sɔ’n yo ɲɛnmɛn dan. Be nin be mma’m be su Ɲanmiɛn likawlɛ titi. Be tran aɲia mun nin aɲia dandan’m be kwlaa be bo. Asa’n be bo jasin fɛ’n i likawlɛ wie. Awlobo wie’m be liɛ’n, be fa ajalɛ kɛ bé kó bó jasin fɛ’n lika nga be boman jasin fɛ lɔ titi’n be nun. Wie mun ekun be kɔ Betɛli be ko niannian lɔ annzɛ be suan be nga be kplan Ɲanmiɛn sulɛ sua’m be bo. Kɛ ɔ ko yo naan awlobo nga be fɛ i sɔ ajalɛ’n b’a kwla yo ninnge sɔ mun’n, ɔ ju wie’n be bo kalɛ. Yɛ blɛ wie nun’n, sa wie’m be tɔ be su. Sanngɛ Zoova yra be ɲin mɔ be mian’n su. (An kanngan 1 Timote 6:17-19 nun.) Ba nga be ta be awlobo sɔ’m be nun’n kɛ be ɲin’n be yaciman ninnge sɔ’m be yolɛ. Kpɛkun kɛ mɔ be si nin be nin’m be kleli be ajalɛ kpa’n ti’n, i sɔ’n yo be fɛ dan. *—Nya. 10:22.

12. ?Kɛ Zezi ɲinnin’n ngue yɛ ɔ fata kɛ ɔ yo-ɔ?

¹² Zezi i si Zoova fali ajalɛ kpa titi. Yɛ Zozɛfu nin Mari be kusu be fali ajalɛ kpa wie. Sanngɛ kɛ Zezi ɲinnin’n, ɔ fata kɛ i bɔbɔ fɛ i tiaun ajalɛ liɛ. (Gal. 6:5) Kɛ sran kwlaa sa’n Zezi kusu kwla fɛ i klun klo ajalɛ. Ɔ kwla se kɛ ɔ́ yó i klunklo like. Sanngɛ w’a yoman sɔ, ɔ miɛnnin i ɲin yoli like kwlaa ng’ɔ kwla yo naan ɔ nin Zoova be afiɛn w’a mantan kpa’n. (Zan 8:29) ?Wafa sɛ yɛ Zezi i ajalɛ’n kwla uka gbanflɛn nin talua mun andɛ-ɔ?

13. ?I nun mɔ Zezi ti gbanflɛn’n ngue yɛ ɔ yoli-ɔ?

¹³ I nun mɔ Zezi o asiɛ’n su wa’n i ɲin yili i si nin i nin. W’a seman kɛ kɛ m’ɔ si ninnge kpanngban ti’n, ɔ́ kpálo ndɛ nga be kan kle i’n. Sanngɛ “i ɲin yili be titi.” (Lik. 2:51) Kɛ m’ɔ ti ba’m be nun kaklaka’n ti’n, ɔ fata kɛ ɔ yo ninnge kaka. E kwla se kɛ ɔ yoli ninnge sɔ mun kusu. I wie yɛle kɛ ɔ miɛnnin i ɲin dili junman nga i si Zozɛfu dili i laa’n naan w’a kwla ɲan sika w’a fa niɛn i nin ɔ nin i niaan’m be lika.

14. ?Ngue yɛ ɔ kle kɛ Zezi suannin Ɲanmiɛn Ndɛ’n nun like kpa-ɔ?

 ¹⁴ Kɛ Zozɛfu nin Mari be wuli Zezi’n, e si kɛ be kannin atrɛ nga Zoova yili naan b’a kwla wu i’n i ndɛ kleli i. Kpɛkun i su ndɛ nga anzi’m be kannin’n, be kan kleli i wie. (Lik. 2:8-19, 25-38) Sanngɛ Zezi w’a kaman ngalɛ’n su. I bɔbɔ suannin Ɲanmiɛn Ndɛ’n i nun like wie. ?Ngue yɛ ɔ kle kɛ Zezi suannin Ɲanmiɛn Ndɛ’n i nun like kpa-ɔ? Like ng’ɔ kle sɔ’n yɛle kɛ i nun m’ɔ ti gbanflɛn kan’n, kɛ like klefuɛ nga be o Zerizalɛmun lɔ’n be ti ndɛ ng’ɔ kan be’n, ɔ bo be nuan. Afin “ɔ wun sa wlɛ, kpɛkun kɛ be usɛ i sa’n, ɔ si su tɛ.” (Lik. 2:46, 47) I nun m’ɔ le afuɛ 12 nn ɔ si kɛ i Si’n yɛle Zoova.—Lik. 2:42, 43, 49.

15. ?Wafa sɛ yɛ Zezi yili i nglo kɛ ɔ kunndɛ kɛ ɔ́ yó i Si i klun sa titi-ɔ?

¹⁵ Kɛ Zezi sili like nga Zoova kunndɛ kɛ ɔ yo’n, ɔ miɛnnin i ɲin yoli like sɔ’n. (Zan 6:38) Ɔ si kɛ ajalɛ sɔ m’ɔ fali’n ti’n sran kaka bé wá kpɔ́ i. Kannzɛ ɔ kunndɛman kɛ sran’m be kpɔ i’n, sanngɛ i ɲin yili Zoova titi. Kɛ afuɛ 29 nun’n, be yoli i batɛmun’n like ng’ɔ yoli i cinnjin trali like kwlaa’n yɛle Zoova i klun sa yolɛ. (Ebr. 10:5-7) I kpa bɔbɔ’n, i nun m’ɔ o ɲrɛnnɛn waka’n su’n ɔ fuali kpa kɛ ɔ́ yó i Si i klun sa titi.—Zan 19:30.

16. ?Ngue like yɛ Zezi i su ndɛ’n kle ba mun-ɔn?

¹⁶ Maan amun ɲin yi amun si nin amun nin mun. Kɛ Zozɛfu nin Mari sa’n, fɔ o amun si nin amun nin’m be nun wie. Sanngɛ Zoova mannin be junman cinnjin kun. Yɛle kɛ be sasa amun, yɛ be kle amun like naan amun fa atin kpa su. Ɔ maan sɛ amun ɲin yi be’n naan amun fa afɔtuɛ kwlaa nga be man amun’n be su’n, amun “liɛ yó ye.”—Efɛ. 6:1-4.

17. ?Kɛ nga Zozie 24:15 fa kan’n sa’n, ajalɛ cinnjin benin yɛ ɔ fata kɛ gbanflɛn nin talua’m be bɔbɔ be fa-ɔ?

¹⁷ Maan amun kle sran nga amún sú i’n. Ɔ fata kɛ amun bɔbɔ amun si Zoova kpa naan amun wun i klun sa’n i wlɛ. Kpɛkun amun wun wafa nga amun kwla yo i klun sa’n i wlɛ kpa. (Rɔm. 12:2) I liɛ’n amún kwlá fá ajalɛ cinnjin kpa kun. Yɛle kɛ amún sé kɛ amún sú Zoova wie. (An kanngan Zozie 24:15 nun; Aku. 12:1 nun.) Sɛ amun kanngan Biblu’n nun naan amun suan nun like titi’n, amún kló Zoova kpa yɛ amún láfi i su kpa trá laa’n.

18. (1) ?Ajalɛ uflɛ benin yɛ ɔ fata kɛ gbanflɛn nin talua’m be fa-ɔ? (2) ?Wafa sɛ yɛ i bo’n gúa-ɔ?

 ¹⁸ Maan Zoova klun sa yolɛ’n yo amun cinnjin tra like kwlaa. Satan i mɛn nunfuɛ’m be laka amun kɛ sɛ amun fa ninnge nga amun si be yo’n, be fa yo amun bɔbɔ amun klunklo ninnge liɛ mun’n, i lɛ nun yɛ amún dí aklunjuɛ-ɔ. Ndɛ nanwlɛ’n, yɛle kɛ be nga be fa aɲanbeun ninnge’m be kunndɛlɛ’n be fa cici be ti’n ‘be kpɛ saɛ man be bɔbɔ be wun.’ (1 Tim. 6:9, 10) Sanngɛ sɛ amun fa Zoova i klun sa yolɛ’n be sie i like kwlaa ɲrun’n, ‘like nga amun yo’n ɔ́ yó ye’ kpɛkun amún dí aklunjuɛ.—Zoz. 1:8.

19. ?Ngue yɛ ɔ fataman kɛ siɛ nin niɛn’m be wla fi su-ɔ?

¹⁹ Siɛ nin niɛn mun, amun yo like kwlaa nga amun kwla yo naan amun a uka amun mma mun naan be kusu b’a su Zoova wie. I sɔ yolɛ’n nun’n amun lafi Zoova su. I liɛ’n ɔ́ úka amun naan amun a fa ajalɛ kpa. (Nya. 3:5, 6) Nán amun wla fi su kɛ like nga amun yo’n ɔ le ta amun mma’m be su tra ndɛ nga amun kan’n. I sɔ’n ti’n, amun yo like ng’ɔ kwla uka amun mma mun naan b’a su Zoova kpa naan i klun w’a jɔ be wun’n.

20. ?Sɛ Gbanflɛn nin talua’m be fa ajalɛ kɛ bé sú Zoova’n ngue yɛ bé ɲɛ́n i-ɔ?

²⁰ Gbanflɛn nin talua mun, amun si nin amun nin’m be kwla uka amun naan amun a fa ajalɛ kpa. Sanngɛ amun bɔbɔ yɛ ɔ fata kɛ amun yo naan Ɲanmiɛn i klun jɔ amun wun-ɔn. Kɛ ɔ ko yo naan amun a kwla yo sɔ’n amun nian Zezi i ajalɛ’n su naan amun fa ajalɛ kɛ amún sú amun Si m’ɔ o nglo lɔ’n. Sɛ amun yo sɔ’n, dɔ nga su bɔbɔ’n amún ɲin trán Ɲanmiɛn junman’n su yɛ amún dí aklunjuɛ. (1 Tim. 4:16) Kpɛkun e ɲrun lɔ’n amún dí aklunjuɛ i kpafuɛ’n.